سلسلة أماكن مسكونة

 بقلم الكاتبة سمر إبراهيم 

الحلقة الحادية عشر

مثلث التنين

سلسلة

أماكن مسكونة 

اتكلمنا المرة اللي فاتت عن مثلث برمودا ومعظم الكلام اللي اتقال عنه سواء علمي أو غير علمي تعالوا بقى النهاردة نتكلم عن توأمه النسخة اليابانية منه ( مثلث التنين ) أو بحر الشيطان.

يمكن معظم الناس سمعت عن مثلث برمودا إنما قليل جدا جدا اللي سمعوا عن مثلث التنين.

مثلث التنين في نظر ناس كتير وانا منهم أخطر بكتير جدًا من مثلث برمودا المكان ده ومن قبل الميلاد بألف سنة وهو بيحصد الأرواح وبتختفي فيه السفن وحاليًا الطائرات من غير سبب واضح غرقت فيه آلاف السفن على مر التاريخ.

فيه ناس قالت إنه بيرتبط بمثلث برمودا ارتباط وثيق وفيه أوجه شبه بينهم كبيرة جدا لو مديت خط افقى من مثلث التنين هتلاقيه وصل لمثلث برمودا من غير أي انحراف للخط، كمان الاتنين بيقعوا على نفس دائرة العرض دائرة عرض ٣٥ درجة، كمان الاتنين بيقعوا على حدود دولتين من أكثر الدول تقدما في العالم الولايات المتحدة الأمريكية، واليابان،  فهل يا ترا التشابه المكاني ده ليه علاقة بالتشابه في الأحداث؟ محدش يعرف.

تعالوا بينا نتعرف أكتر على مثلث التنين ده.

يُعرف مثلّث التّنين بأسماء كثيرة جدا  توحي بخطورته، وغموضه، بيطلق عليه اسم بحر الشيطان، وده لأنّ الإنسان اتعود ديما أن ينسب أي خطر مجهول السبب إلى الشيطان الذي يعد العدو الأول للإنسان، كمان  يعرف باسم مثلث برمودا الهادي وده نسبة للمحيط الهادي مش علشان هو هادي ولا حاجة يعني، أو مثلث فورموزا، أما بالنسبة لاسم مثلث التنين فده أقدم اسم أطلق عليه ليه بقى لاعتقاد البحارة بوجود تنّين ضخم  في قاعه، يخرج لمهاجمة القوارب والسفن وبعدين يأخذها معه إلى قاع المحيط.

 ده بالنسبة لاسمه أما بقى مكانه فهو عبارة عن امتداد مائى كبير  يقع في المحيط الهادي، قرب الساحل الجنوبيّ الشرقيّ لجزيرة مياكي اليابانية، وبالتحديد في منطقة تسمى حلقة النار، وهي منطقة تمتد من السواحل الغربية للأمريكيتين مروراً بالأسكا، نحو الساحل الشرقيّ لآسيا، متّجهةً جنوباً نحو إندونيسيا، كما ويبعد عن جنوب طوكيو حوالي 100كم، أي أنّه يقع بين تايوان، وهونغ كونغ، واليابان، والفلبين، ولا بد من الإشارة إلى أنّ ضلعه الأكبر يمتد من جزيرة يوكوهاما اليابانية شمالاً إلى جزيرة جوام الفلبينية جنوباً، مروراً بجزيرة أيوجيما، في حين أنّ ضلعه الأصغر يمتد من جزيرة جوام جنوباً إلى مجموعة جزر تعرف باسم جزر ماريانا شمالاً، أما ضلعه الثالث فيمتد من جزر ماريانا جنوباً نحو جزيرة يوكوهاما شمالاً.

بالرغم من خطورته اللي أكتر بمراحل من مثلث برمودا إلا أنه أقل منه شهرة بكتير يمكن علشان موقعه في اليابان ومش كتير يعرف لغتها ويمكن علشان الشو الإعلامى الأمريكى اللي عمل شهرة كبيرة  لبرمودا. 

الحوادث بدأت زي ما قولنا من قبل الميلاد بألف سنة لكن المشهور منها اللي حصل في القرن ال ١٣ لما حاول حفيد جنكيز خان انه يحتل اليابان فبعت حملتين بحريتين واحدة سنة ١٢٧٤م والتانية ١٢٨١م والحملتين غرقوا قبل ما يوصلوا لليابان بالتحديد داخل مثلث التنين وراح ضحيتهم ٤٠ الف مقاتل .

ناس كمان بتنسب لبحر الشيطان انه كان السبب في تحطم طيارة إيميليا إير هارت سنة ١٩٣٧م ودي للي ميعرفهاش أول امرأة تقود طيارة في التاريخ واختفت طيارتها فوق مثلث التنين في ناس قالوا إنها وقعت في البحر وفيه ناس قالت لأ دى اليابانيين قبضوا عليها وأعدموها بس في رأيي هيعدموها ليه إيه السبب؟

كمان من سنة ١٩٥٠م لسنة ١٩٥٤م حصل غرق ٩ سفن للصيد بشكل دوري ومفيش غير سفينة واحدة بس اللي صدر منها نداء استغاثة والباقي اختفى من غير أي أثر ولا نداء استغاثة واحد 

سنة ١٩٨٠م اختفت سفينة الشحن البريطانية العملاقة ديربي شاير وعليها حمولة تقدر ب ١٥٠ ألف طن من الحديد وهي كمان اختفت من غير أي نداء استغاثة والسفينة دي كانت ضخمة جدا وكان حجمها تقريبا ضعف حجم تيتانيك وبعد ١٤ سنة من اختفائها حاولوا يدوروا على الحطام بتاعها فى قاع المثلث جابوا جهاز ضخم  اسمه سونار البحر الجانبي ودا وظيفته يصور قاع البحر علشان يشوفوا الحطام فين وفعلا كشف عن وجود حطام يشبه حطام السفينة ولما قربوا من المكان اختفى سونار البحر نفسه ولما سحبوه بالسلك الحديدى  الموصول بسفينة الإنقاذ لقو السلك  مقطوع بطريقة غريبة جدا زي ميكون مقطوع بأسنان حيوان.

############

ومن اكتر الحوادث الغامضة والغريبة اللي حصلت هناك هو اللي حصل للسفينة الفلبينية كارلوتا سنة ١٩٨٧م اللي حصل إن السفينة وهي معدية قريب من المنطقة فجأة ومن غير أي مقدمات مقدمة السفينة ولعت ومكانش فيه على السفينة اى مادة قابلة للاشتعال ولما جم يطفوا الحريقة لقوا النار مسكت فى مؤخرة السفينة هي كمان  ومعرفوش يطفوها بأي طريقة لكن فجأة ومن غير سابق إنذار النار زي ما ولعت لوحدها انطفت لواحدها برده، ولما رجعت السفينة المينا معرفوش يصلحوها ولسة لحد دلوقتى موجودة هناك كلغز يصعب حله وبيجيلها السياح من كل مكان علشان يتفرجوا عليها.

وغير الحوادث دي سجل بحر التنين أو الشيطان إختفاء عدد كبير من الطائرات والسفن والغواصات ، زي الغواصة السوفييتية “جولف” والتي كانت تحمل على متنها ثلاثة رؤوسٍ نوويّة ، والغواصة النوويّة “إيكو 3” .

ومن حوادث الإختفاء الغامضة كمان  اختفاء حاملتي طائرات يابانيتين وعلى متنهما عدد من الطائرات الحربيّة ، ولم يتم العثور على أي أثر لهما لحد النهاردة .

وفي سنة 1957م أقلعت طائرة شحن تابعة للقواتِ الجويّةِ الأميركيّة من جزيرة “وياك” متجهةً إلى مطار طوكيو وعلى متنها 67 راكباً واختفت هى كمان من غير أي أثر ولا كأنها كانت موجودة من الأساس.

غرق السفينة اليابانية البحرية جويتا، إذ عثر عليها على بعد 500 ميلاً من مكان غرقها. 

غرق السفينة الإنجليزية الجونار، إذ عثر عليها على بعد 2000 ميلاً من مكان غرقها. 

تعرّض الطائرة الحربية المقلعة من مطار سان دييجو في الولايات المتحدة إلى ظروف قاسيةجدا  أدت لانقطاع التواصل المفاجئ بين طاقمها والقاعدة الجوية، ولما رجعت  المطار كانت المفاجأة أن كل الل  كان فيها ميتين وعددهم ١٢ كابتن ما عدا قائد الطيارة اللي لقوه في كابينة القيادة فاقد للوعي وللاسف مات بعدها بدقايق قليلة من غير ما يقول ولا كلمة ولما شرحوا الجثث لقوا أنهم ماتوا   بسبب إصابتهم بتلوث شديد في الجلد وثقوب في الصدر، علماً بأنه انبعثت من داخل الطائرة رائحة كبريتية عفنة لم يعرف مصدرها. 

كمان لازم نذكر اختفاء ناقلة البترول اليابانية الضخمة المعروفة باسم كايو مارو رقم 5، واللي كانت تحتوي على 150 طناً من البترول واللي مالقولهاش أثر لا هي ولا الطقم بتاعها وملقوش أي أثر للبترول على سطح المية كل اللي لقوه خمس براميل بترول وفاضية كمان. 

سنة ١٩٧٥م اختفت طائرة رئيس الفلبين رامون ماجاي ومعاه  24 راكباً راحوا من غير أي أثر.

انشطار السفينة الليبيرية صوفيا باباس إلى نصفين ولحد دلوقتي محدش عارف سبب الانشطار المفاجئ ده إيه. 

اختفاء طائرة كاوازاكي المزودة بأحدث أجهزة الإنذار بشكلٍ مفاجئ، وكمان من غير أي نداء استغاثة. 

بعد الحوادث دي كلها قررت الحكومة اليابانية إنها مش هتسكت بقى ولازم تتصرف في الموضوع ده عملت ايه بقى قامت بتمويل مشروع ضخم لدراسة المثلث ده واشتغل على المشروع ده اكتر من ١٠٠ عالم يابانى وقاموا بتجهيز سفينة ضخمة تحتوى على أحدث وسائل تكنولوجيا الاتصالات والبحث والدراسة وطلعت السفينة وأول ما قربت من المنطقة اختفت من غير سابق إنذار وكان عليها اكتر من ٢٥ عالم من خيرة علماء اليابان.

اللي حصل ده خلى الحكومة اليابانية تعلن بأن المنطقة دي منطقة خطيرة جدا وحددت حدود المنطقة على الخرايط الرسمية  بتاعتها  علشان تتجنبها السفن والطائرات كمان اعترفت الولايات المتحدة الأمريكية بخطورة المنطقة والمنطقة المحيطة بيها ومنعت الحكومة اليابانية أي مشروع لدراسة المنطقة دي علشان ميحصلش خسائر جديدة في الأرواح علشان كدا لسة لحد دلوقتى محدش عرف يحل لغز المكان ده .

لكن زيه زي مثلث برمودا اتقال عليه أساطير كتير قالوا مثلا  أن السبب في الحوادث دي زي ما قولنا قبل كدا تنين ضخم عايش في قاع المحيط في المنطقة دي وهو اللي بيغرق السفن وكمان فيه شهود عيان قالوا انهم شافوا نور أحمر طالع من البحر في المكان ده وفقاعات ضخمة.

 كمان ناس قالت أنهم شافوا سفن ماشية من غير أي حد عليها وسموها سفن الأشباح وفيه اللي قال إن إحساسهم بالزمن كان مختلف وهما معديين من هناك فيه اللي قال أنهم كانوا ببحسوا بالوقت بيعدى ببطئ شديد جدا وفيه اللي  قال كان بيعدي بسرعة جدا عن المعتاد.

وطبعا فيه اللي قال  ان عرش إبليس موجود في المكان ده وموجود فيه مكان تجمعه هو وجنوده من الجن والشياطين وفيه اللي قال انه مكان المسيح الدجال وياجوج ومأجوج زى مثلث برمودا بالظبط .

كمان التفسير العلمى مشابه للي اتقال عن برمودا من فقاعات غاز هيدرات الميثان والمجال المغناطيسى اللي بيعطل أجهزة التحكم والبوصلة كمان قالوا ان الجاذبية تأثيرها مختلف في المكان ده وفيه اللي قال السبب البراكين القريبة من المكان اللى لما بتثور بتعمل اضطراب في الأمواج ممكن تؤدي لغرق السفن كمان قالوا ان المكان يعد من أماكن الدوامات البحرية الدنيئة اللي ممكن تسحب أضخم سفينة وميبقاش ليها أثر فى ثوانى معدودة .

إيه الحقيقة الله اعلم ولكم اعتقاد ما تشاؤون 

سمر ابراهيم