رواية عشق الروح - بقلم الكاتبة منى محمود - الفصل العاشر
رواية عشق الروح
بقلم الكاتبة منى محمود
الفصل العاشر
رواية
عشق الروح
ضحكو كلهم علي شكل فرح و فعلا رامي وليلي وحتي يوسف فضلو يعيدو في الكلام ويفهمو فرح
وليلي أقنعت رامي بصعوبه أنه يأجل زيارته مع والدة ل تاني يوم عشان تكون اتكلمت مع خالتها ومتزعلش منها
كانو خلاص خارجين من الحفله والضحكة مرسومة علي وشهم لحد ما حد خبط من غير ما يقصد في ليلي
حنين بأسف ...
سوري سوري بجد والله ماقصدش ا اد ايه ليلي صح ؟
ليلي اتوترت وسكتت وفرح وقفت قدامها واتكلمت هي
فرح ببرود ...
اه هي ليلي وانا فرح ازيك يا حنين كويسه تمام سلام بقا عدينا عشان متأخرين
حنين وقفتها وعينيها علي ليلي ...
ثواني يا فرح معلش انا لما صدقت شوفت ليلي تاني ... ليلي بليز ممكن نتكلم دقيقه بس
فرح بحدة ...
لا مش ممكن وقلتلك مستعجلين اوعي بقا
يوسف ...
في ايه يا فرح مش كدة اهدي
حنين ببتسامة ...
لسه زي ما انتي يا فرح شعنونة وعصبيه
فرح بسخريه ...
و يا تري انتي كمان لسه زي ما انتي لسانك بينقط سم ومعندكيش زوق
رامي بحرج ...
فرح في ايه ميصحش كدة
ليلي بصوت واطي لكنة مسموع ...
انا عايزة امشي دلوقتي
حنين بحزن ...
ليلي انا عارفه اني اخر واحدة تحبي انك تتكلمي معاها بس بالله عليكي دقيقه واحدة بس من وقتك وانا والله العظيم مش هضايقك خالص
رامي كشر لما شاف عيون ليلي بتملع بالدموع
رامي ...
ممكن افهم في ايه بالظبط ؟؟ مين حضرتك ؟؟ وعايزة ليلي علي انفراد ليه ؟؟
فرح ....
يلا نمشي وكفايه كدة يا حنين لو سمحتي
حنين بدموع ...
مش همشي الا لما اتكلم مع ليلي انا مش مصدقه اني أشوفها بعد السنين دي كلها ... ليلي ارجوكي اسمعيني والله انا ندمانة جدا ومش هضايقك خالص والله ما هضايقك خالص
رامي ...
يبقي تتكلمي هنا قدامنا لأن ليلي مش هتتحرك من هنا
ليلي بصوت مخنوق ....
قولي ف ايه لاني مش هتحرك فعلا
بحركة لا ارادية منها مسكت ايد رامي وضغطت عليها اوي كانت خايفه وحست أنها محتاجة تتشجع محتاجة تحس بأنها مش لوحدها وهو فهم و مسك ايديها وضغط عليها كزا مرة عشان يطمنها وحنين شافت كدة غمضت عينيها وبدأت تتكلم
حنين بدموع ...
انا عارفه اني اذيتك كتير زمان بس والله العظيم يا ليلي انا بعد الثانويه دروت عليكي كتير عشان اعتذرتلك ملقتكيش خالص والله ندمت جدا علي كل مقلب سخيف عملتة فيكي أو كلمة بايخة قولتهالك انا ... انا من بعد آخر الامتحانات بتاعت الثانويه روحت لاقيت بابي اتوفي في الشغل ب سكتة قلبيه بسبب أنهم عملوا فيه مقلب ف الشغل واتريقو علي شكله لما اتخض وفضلو يضحكو عليه ... حبيبي قلبه مستحملش الخضه و التريقه مات في وقتها ... ( بدأت تعيط ) انا اسفة يا ليلي والله اسفة وندمانة بجد سامحيني عشان خاطر ربنا يسامحني
الكل أتأثر بكلام حنين و دموعها ليلي اكتر واحدة اتاثرت
فرح بتأثر ...
احم ... اهدي يا حنين البقاء لله ربنا يرحمو
ليلي ببكاء ...
انا مش زعلانة خلاص منك ربنا يرحمه حبيبتي
حنين ببتسامة من بين دموعها ...
بجد ... يعني سامحتيني يا ليلي بجد احلفي
ليلي ابتسمت ...
والله سامحتك خلاص احنا اخوات محصلش حاجة
يوسف ...
حصل خير وكل حاجة بس امسحو دموعكم دي الناس بدأت تتفرج علينا
حنين ...
انا اسفه لو عطلتكم فرصه سعيدة جدا اني شوفتكم مرة تانيه
ليلي ...
مفيش عطله ولا حاجة ... انا مبسوطة اني شوفتك و اتصافينا يا حنين
فرح ...
انا كمان مبسوطة اني شوفتك
حنين ...
ربنا يسعدكم يارب عن ازنكم اروح اكمل شغلي بدل ما اترفد
رامي ...
اتفضلي
واتحركت حنين بهدوء من قدامهم
يوسف ...
انا مش فاهم حاجة علي فكرة
رامي وهو بيشد ليلي علي برة ...
لا انت فرح بهتت عليك تقريبا يلا وهنفهمك في العربيه
❈-❈-❈
ليلي روحت وحكت ل سميرة كل حاجة من اولها لاخرها وسميرة دموعها كانت نازله وهي بتسمع ليلي من الفرحة أن اخيرا خلاص بنت اختها هتحب وتتجوز وهتطمن عليها وتحس انها أدت الأمانة علي اكمل وجه خلص اليوم بكل حاجة حلوة حصلت فيه من اعترافات عاشق ل مسامحة من قلب طيب ل فرحة ام
وجه اليوم الي رامي ويوسف هيتقدمو فيه ل ليلى و فرح
ليلي كانت لابسه جيب و بلوزه وميكب هادي وفرح كانت لابسه فستان وحطه ميكب تقيل شويه
ويوسف كان لابس قميص ابيض وبنطلون اسود ورامي كان لابس بدله كحلي
ولما وصلو الشباب مع بركات والدهم قابلتهم سميره بابتسامه هاديه
سميره ...
اهلا اهلا نورتم يا جماعه اتفضلو
بركات ...
دا نورك يا هانم اومال فين العرايس بصراحه هموت واشوف اللي خطفو قلوب ولادي الاتنين شكلهم ايه
سميره ...
ههههه حالا جايين
وهنا دخلو البنات ورامي ويوسف تنحو رامي كان حاسس انه طاير وهو شايف الضحكه في وش حبيبته ويوسف كان حاسس انه اخيرا هيرتاح بعد ما تعبته معاها
بركات ابتسم ... ب
سم الله ماشاء الله ايه القمرات اللي دخلو علينا دول لا يا واد منك له عرفتو تنقو بصحيح
البنات ضحكو بخجل
رامي بغيره ...
ايه يا حج ما تهدي شويه هه اهدي
بركات ....
هههههههه انت هتغير عليها مني لا بقولك ايه اعقل كده بدل ما اكدرك
يوسف بمكر ....
طب تقدر تحدد مين فرح ومين ليلى ؟
بركات بثقه ....
طبعا اقدر بص يا سيدي اللي الشقاوه بتنط من عينيها دي فرح (وشاور على فرح)
واللي مكسوفه و خدودها احمرو دي ليلى (وشاور ع ليلى)
يوسف ابتسم ....
يا بركه يا جامد صح
رامي كشر ....
طب ايه ندخل ف الموضوع ولا ايه ؟
بركات ...
يا واد اتقل مالك كده متسربع علي ايه
رامي بضيق ....
بابااا يلا بقا الله يخليك
بركات ....
خلاص خلاص اهدي ... مدام سميره احنا يشرفنا نطلب ايد بناتك الاتنين ل ولادي واوعدك هنحافظ عليهم كويس وعمرك ما هتسمعي عنهم غير كل خير واي طلبات عندكم احنا تحت أمركم فيها طبعا
سميره ....
الأمر لله من قبل ومن بعد انا مليش طلبات غير سعادتهم وبس
❈-❈-❈
رامي بلهفه ....
يعني حضرتك موافقه
سميره ....
هههه انت مستعجل كده ليه ؟
رامي ....
لا انا مش هستني تاني بصي حضرتك انا جايب دبل عشان نقري فاتحه ونلبسها دلوقتي و الفرح كمان شهر قولتي ايه؟
كلهم اتفاجو من كلامه ولسه يوسف هيتكلم قاطعته سميرة
سميره ....
شهر ازاي بس مش هنلحق نعمل اي حاجه دول بناتي الاتنين يا رامي
رامي بحماس ....
حضرتك اطمني خالص الشقق جاهزة من كل حاجه و هما في شهر هيقدرو يجهزو نفسهم مش كده يا بنات
ونظر لهم نظره رجاء
فرح ...
هههههههه اشمعني دلوقتي بتكروت بمزاجك وفي الشغل مكدرني
يوسف ....
لا يا فرحة مش هيكدرك تاني بس وافقي علي كلامة وخليكي جدعة بقا
فرح ببتسامة بسيطة ....
موافقه بعد اذن ماما طبعا
رامي بص ل ليلى برجاء ....
لي لي وافقي عشان خاطري بليز
ليلى بتوتر وخجل ....
م موافقه بعد اذن خالتو طبعا
رامي بسعادة ....
على خيره الله نقري الفاتحه ونلبس الدبل بقا
ضحكو كلهم عليه
بركات ....
انت ياواد طول عمرك صبور ايه حصلك بس
رامي ابتسم بحب ....
ولا حاجه حبيت بس ومش قادر اصبر افضل بعيد عنها كتير
خجلت ليلى و وشها احمر اوي
يوسف ضحك ....
اهي لي لي احمرت تاني اهي
رامي بغيره و ضيق ....
يووووه قلتلك شوفيلك ليهم حل بقا
ضحكو مره ثانيه عليه
❈-❈-❈
بعد وقت قرو الفاتحه و الشباب لبسو البنات الدبل واتفقو كلهم انهم يتقابلو تاني يوم يختارو حاجات للفرح سوا وسميرة أصرت علي شهرين مش شهر واحد رامي وافق وهو مكشر
يوسف اقترح أن اول حاجة يبدوء فيها الفساتين عشان دي اكتر حاجة البنت بتكون شايلة همها
صباح يوم جديد وتحديدا قدام الاتيليه
فرح ....
يلا يا برنس منك له استنو هنا
يوسف كشر ....
نعم نستنى هنا ليه مش هندخل نختار معاكم
فرح ...
لا يا سكر هنختار لوحدنا احنا مش صغيرين
رامي برجاء ...
لي لي انا هدخل معاكي تمام مش كدة
ليلى بهدوء ...
مش انت بتثق فيا سيبني أنقى ع زوقي بليز وبعدين الفساتين مش هتكون مظبوطة اكيد انا عايزة تشوفني بيه وهو مظبوط ممكن
رامي بحب ....
حاضر يا قلبي
خجلت ليلى
فرح ....
لا وحياه امك مش وقت كسوف يلا ورانا لف كتير انهاردة
جت تشدها ويبعدو اوقفها صوت يوسف
يوسف بحده ....
فرررررح
فرح بخضه ....
ايه ياعم براحه ف ايه
يوسف ....
هتدخلي لوحدك تمام بس اقسم بربي يا فرح لو الفستان مكشوف او ضيق هخليها ليله سودا ع دماغك ودماغي معاكي
فرح ....
هههههههه اهدي يا حبيبي حاضر والله متقلقش انت بس
البنات دخلت الاتيليه والشباب قعدو في كافيه قدام المكان يستنوهم رامي كان بيتصفح الاخبار ع الموبايل ومرة واحدة تنح
رامي بصدمه ...
ايه دا !!! مش معقول !!
يوسف باهتمام ...
في ايه يا رامي ؟
رامي بحزن ...
لا حول ولا قوه الا بالله
يوسف ...
يا بني في ايه قلقتني
رامي ...
مريهان اتقتلت ... توبا صديقها من النادي قتلها و حاول ينتحر بعدها بس لحقوة
يوسف بصدمة ...
معقول دا ... لا حول ولا قوه الا بالله ربنا يرحمها ويغفر لها
رامي بحزن ...
امين يارب
يوسف ...
افرد وشك دا قبل ما يخرجو ولا الا ليلي هتقلق وتسالك مالك وقتها هتقولها ايه بقا الاكس بتاعتي اتقتلت وانا حزين عليها
رامي كشر ...
انت عديم الاحساس يالا ... ما ممكن اقولها صديقه ومتنساش اني كنت اعرف توبا معرفه شخصيه يعني طبيعي استغرب واضايق كمان انت اللي حلوف باين
يوسف ....
صحيح ايه اللي ممكن يخليه يعمل كدة ؟ يعني علي كلامك انهم كانو أصحاب جدا ف غريبه اوي
رامي ...
مش عارف يا يوسف بس اكيد هعرف
يوسف بتحذير ...
رامي ... ملكش دعوة بالحوار دا انت واحد بتحضر ل جوازك هه
رامي ابتسم ...
عارف اني بحضر ل جوازي بس بردو لازم اعرف توبا ازاي وليه يعمل كدة مش يمكن في حاجة غلط ويكون محتاج مساعدة واقدر انا اقدمهالو
يوسف حس أن النقاش مع رامي مش هيجيب نتيجة هو عارف رامي كويس لما بيكون مقرر حاجة مهما حاول اي حد تغيير رأيه مش بيقدر اتنهد بخوف من اللي ممكن الموضوع دا يعمله من مشاكل ودعا ربنا أن الدنيا تمشي زي ما هما مخططين
❈-❈-❈
بعد وقت خرجو البنات و توجهو كلهم الي المول عشان يلفو علي حاجات للبيت ولما تعبو قعدو يتغدو في أحدي المطاعم
رامي ...
هموت من الجوع
يوسف ....
يالهووووي ياما مش حاسس برجلي منك لله يا فرح
فرح ....
الله وانا مالي يا لمبي مش اللي جمبك دا اللي مستعجل علي الجواز
ليلى ....
هههههههه بقولكم ايه اهدو شويه خلونا ناكل ف هدوء
رامي ....
صحيح يا جو هو مش انا كل لما بتقعدو معانا بطردكم
يوسف ابتسم ....
حصل يا كبير
رامي ....
طب وقعدتم تاني معانا ليه ما المطعم كبير و واسع اهو
ليلى بخجل ...
رامي ميصحش بجد عيب كده
رامي ....
ايه الي عيب ياقلبي بس وحشتني و مش بعرف اتكلم بيفضلو يناقرو ف بعض.. وبقولك ايه لو خدودك احمرو مش هيحصل كويس تمام احنا في مكان عام الله يباركلك
انسحب يوسف وفرح ل مكان تاني
رامي بحب ....
عينيكي فيها كلام كتير قولي يا حبيبتي
ليلى ....
هههههههه ياسلام حكيم عيون حضرتك وانا معرفش
رامي ....
لي لي قولي ايه شاغل تفكيرك ؟
ليلى بعد تنهيده طويله ...
انا انا في حاجه خبتها عليك و مش عارفه هتأثر على علاقتنا ولا لا
رامي بقلق ....
اتكلمي ياحبيبتي سامعك
ليلى بتوتر ....
ا انا احم يعني كنت انا
رامي ....
لي لي اهدي ممكن والله ما في حاجه هتبعدني عنك انا بحبك
ليلى ....
رامي انا يعني كنت بروح ل دكتوره نفسيه عشان عشان الحاجات ال حكتلك عليها و
رامي بحب . ..
ودي بقا الحاجه الي موتراكي كده.. ايه المشكله والحمد لله الدنيا بقت تمام اهو واحنا سوا ومع بعض
ليلى ....
لا بس بس ف حاجات تاني انا مقلتهاش... بص هي هي حاجه واحده بس
رامي ...
قولي يا حبيبتي
ليلى ...
ماهو بصراحه يعني مش هقدر اقول وانت قاعد قدامي كده هتكسف
ضحك رامي بصوته كله وظهرت غمازته و تاهت ليلى في ضحكته وسرحت
رامي ...
يعني اودي وشي الناحيه التانيه ولا اعمل ايه دلوقتي ؟
ليلى كشرت ....
من غير تريقه لو سمحت انا ممكن بالليل اكلمك شات ع وأتس هعرف اتكلم براحتي من غير كسوف اوك؟
رامي ابتسم. ...
والله مجنونه حاضر يا تعبه قلبي ناكل بقا
عند المجانين
فرح ....
حبيبي هو انت صحابك كلهم بنات زي ال ملزقه جيجي دي
يوسف بخبث ....
يعني ... علي فكرة جيجي دي اقلهم جمالا
فرح بغيظ ....
وحياه امك
يوسف بحدة ....
فرح لمى لسانك دا شويه ف ايه
فرح وتجمعت دموع ف عينيها ...
اسفه
يوسف بدهشه ....
فرح ف ايه انا بهزر والله حبيبتي انا عيني متشفش غيرك والله من يوم العربيه وعيني فعلا مش شايفه غيرك
فرح بابتسامه ...
بحبك
يوسف ...
ايوووووووه بقا بموت فيكي وربنا
❈-❈-❈
انتهى اليوم ورامي باله مشغول بللي ليلى هتقوله وقاعد ماسك الفون ومستنيها تكتب وبعد لحظات جتله المسج
ليلى ....
رامي ازيك
رامي....
تمام ليلي قولي علي طول من غير مقدمات الله يخليكي
ليلى ....
بص انا عندي مشكله لسه مش قدرت اتخطاها وهي
يتبع ...
