قراءة رواية جديدة حياة الفهد الجزء الثاني كاملة

تنشر حصريًا على مدونة رواية وحكاية قبل أي منصة أخرى

رواية حياة الفهد الجزء االثاني

خادمة الفهد

 رواية جديدة قيد النشر

من قصص و روايات 

الكاتبة صفاء حسني

الفصل الثالث عشر

اقتربت منه ملك تضع يدها على رأسه، 

لكنه بعد إيدها بعنف وافتكر أسماء أول مره اهتمت بيه وهو مريض في الوقت اللي كانت أمه مسافرة لما سهرت طول الليل تعمل له في كمادات ، لما نامت في حضنه عشان تدفيه لما كانت حرارته مرتفعه 

في الوقت دا كان فهد بيتهيئ له إن أسماء هي اللي واقفه قدامه مش ملك وكان بيهلوس ويقول 

إنتي عايزة إيه وليه مهتمه بيا أنا وابني. 

استغربت ملك من سؤاله لأنها فعلاً مش عارفه إيه اللي جذبها ليه حاسة إنها مديونه ليه بحاجات كتير  لكن مش عارفه أي هي 

إحساسها بيقول إن الشخص ده تعرفه أو كانت تعرفه ، وهو كان كويس معاها ممكن حست إنه صديق أو أخ  

بلعت ريقها وقالت

أنا دكتورة وده شغلي وإحنا أصدقاء ومتنساش إنت اللي وقفت جنبي في وقت تعبي ودا حقك عليا .

ضحك فهد بسخرية وحزن وقال:

للأسف فهمت لعبتكم الستات كلهم صورة واحدة بتبتدوا بالضعف والمسكنه والطيبة كلكم كدا وبعد كدا بتظهروا على حيقيقتكم حيات بتقرص .

استغربت ملك من كلامه وقالت 

هو حضرتك ليه بتجمع محسسني إني طلبت إيدك أنا مجرد كنت بشوف حرارتك لومش عايز مفيش مشكله هنادي علي أي ممرضة 

رفض فهد وقال 

مش عايز أي واحده من جنسكم كلكم نسخة واحدة وبإذن الله لما أقوم بالسلامه هطرد كل الممرضات والطبيبات من المستشفى وإنتي أولهم 

انصدمت ملك من كلامه متصورتش إن الشخص الطيب اللي شافته من سنتين وقالها المكان ده متاح ليكي للدراسة يطلع بالشكل دا .

وكأن فهد قرأ أفكارها وقال 

عشان كنت مخدوع فيكم كنت فاكر نفسي عايش قصة حب جميله وربنا عوضني بزوجة جميلة لكن فجأة ظهرت كل الحقائق قدامي ، فجأة عرفت إن البنت الشغالة اللي عندي كانت بتمثل إن قلبها عليا ووقعتني في حبها  

لكن كان غرضها زي غرضك بالظبط ، أكيد لما عرفتي إني صاحب المستشفى ، قولتي في نفسك دا راجل لقطه أعلق ابنه بيا وأضحك عليه

وممكن تكوني بدأتِ التمثيلية من بدري من وقت  تعبك 

وممكن يكون تعبك نفسه لعبة إزاي ما انتبهتش ، اختيارك لنفس المكان الخاص بيا مش غيره وكمان تشتغلي في نفس المستشفى بتاعتي عشان تقربي مني ونسيتي إني راجل متجوز  وقولت ِ في نفسك هو هرب مني فى المكان المفضل ليه أروح له على المستشفى بتاعته ممكن أشوفه 

انصدمت ملك من أسلوبه واتهامه ليها وكانت مجروحة من جواها  وقالت: 

ملك : لو سمحت حضرتك بلاش تغلط فيا أو تخمن حاجات مش حقيقية 

أنا مش زي حد ، وممكن فعلاً غلطت إني اتكلمت معاك بعفوية وبراءة وقت تعبي، ومكنتش أعرف إن الحديقة بتاعتك، وإنت اللي طلبت تساعدني مش انا ، افتكر كل حاجه يا فهد باشا حتى إسمك أنا معرفتوش غير من إبنك اليومين دول يبقي إزاي أرسم عليك أو اخطط لكل ده .

إبتسم فهد  بسخرية  وصقف 

هو إنتم إيه نسخة واحدة يا بنات حواء نفس الكلام والتمثيل وبعد كدا تقولي العفوية والبراءة

 ياه مش هي دي اللي رسماها على وشك  عشان توقعي أي حد أنا بكره الكلمة دي فاهمة يعني إيه 

وبكره كل ست ومعنديش إستعداد واحدة جديد تدخل وتدمر حياتي 

اتضايقت ملك من كلامه واستغربت هي إمتا طلبت تدخل حياته بالعكس هي بقالها يجي  سنتين مش بتشوفه إلا بالصدفة  في الحديقة ولما بدأ يتجاهلها بعدت و مبقتش تروح وهو موجود لأنها مش حابه تفرض نفسها على حد يبقى إمتا فرضت نفسها عليه 

 ملك بتنهيدة أكيد  اللي حصل معاه هو السبب في الحالة اللي هوا فيها ووجهت له الكلام :

ملك : أنا مقدرة ظروفك وتعبك ومش هاخذ كل كلامك ده على محمل الجد استأذنك ..

صرخ فيها فهد وقال

مش عايز أشوفك قدامي تاني مفهوم كلكم زي بعض تتمسكنو لحد ما تتمكنو

 ملك هزت راسها وقالت :

شكراً لحضرتك متقلقش حضرتك أنا مش فاضيه أصلاً أشغل نفسي بيك ولا محتاجه ليك ووقفتي دلوقتي معاك كنوع من رد الجميل اللي عملته معايا لكن لو إنت شايف إني بنت يتيمة و فقيرة وبترمي شبكها عليك تبقى غلطان أنا مش كدا

وانسحبت من قدامه لكن فجأة مسكها من إيدها وسحبها ناحيته بكل قوته لدرجة إنها بقت صدمت بصدره 

ملك استغربت وهو كان هيتجنن من مشاعره ناحيتها ، ليه مش قادر يتخلص منها أكيد هي نسخة منهم عايزة تلعب بيه 

وبكل قوة زقها بعيد عنه وقعت ملك على الأرض واتخبطت في الحيطة 

❈-❈-❈

فى نفس الوقت دا

كانت الممرضة داخلة الأوضة عندهم شافت الموقف خرجت بسرعة وبلغت دكتور شريف 

اتلم التمريض على صوت فهد وهو متعصب

دخل شريف 

شاف ملك على الأرض بتتوجع بسبب خبطتها في الحيطة قرب منها الدكتور شريف ومد ايده قومها من على الأرض وهو بيعتذر ليها 

أنا آسف يا حياة بجد آسف 

وأفتكر كلام هدير وإنه لازم يبعد ملك عن الناس دي وإنهم مش بيجي من وراهم غير الأذى وبيقول في نفسه :

هدير حذرتنى إنك متتعامليش معاهم لكن أنا مسمعتش كلامها 

ملك كتمت زعلها و ألمها وقالت

مفيش حاجه حضرتك أنا بخير  

ملك :  بعد إذنك يادكتور ممكن أمشي وسامحني أنا خلصت تدريب عايزة أركز الفترة الجاية في دراستي ، وربنا يعينك على مرضاك 

ومشيت وهي بتتألم من راسها، اللي اتفتحت والدم في شعرها وكانت في صور مشوشة بتظهر قدام عينبها .  

  فهد كانت عينيه على ملك اللي بتختفي من قدام عينيه وكان بيحس وكأن روحه بتتسحب منه مش عارف إن كان عايزها ولا لا 

وبعدها غاب عن الوعي . 

❈-❈-❈

رجعت ملك للبيت اللي حولوه لدار للبنات اللي مالهمش مأوى واشتروا بيت جنب المأوى بقى دار للأيتام .

 مهاب كان حاسس إن ملك مش على طبيعتها كانت حزينه 

مهاب سألها : مالك يا ملوك زعلانه ليه 

 ملك بصتله وقالت

مين قال إني زعلانه أنا كويسة وبخير وهزعل ليه عشان فقدت الذاكرة ولا عشان مش فاكره إنت مين ولا هدير ولا مروان ولا وردة أزعل ليه ها مافيش حاجه تزعل 

هدير كانت راجعه من الشغل قربت منهم وسمعت كلامهم وقالت

إنتي ليه حكيتي لأهل مريض عندك إنك فاقدة الذاكرة مش أنا منبه عليكِ ياملك إنتي ليه مش خايفة على نفسك 

بصتلها ملك وبتحاول تتحكم  بدموعها علشان ماتنزلش 

ملك : أولاً أنا حره أقول اللي عايزه أقوله وأنا مقولتش بصريح العبارة 

إتنهدت هدير وقالت

قبل كده قولت لطفل ثاني حكايتك أرجوك بلاش البراءة اللي إنتي فيها دي لازم تنتبهي على نفسك وأنا حذرتك وقولتلك إن في عدوا ليك ِ

وطالما إنتي كل ده مش فاكرة يبقى لازم تحذري مش كل الناس هتصدقك 

ملك اتكلمت بوجع وقالت 

عندك حق المتخلف إفتكر وقفتي معاه إني عايزة أتقرب منه ، وإني عملت نفسي تعبانة عشان أستعطفه أو عشان أجري وراه 

وضحكت بسخرية وقالت 

هو مين أصلاً عشان أجري وراه وفاكر نفسه إيه عشان هو صاحب المستشفى يعني سبتيها ليه مخضرة يشبع بيها .

إنصدم مهاب وسألها :

إيه اللي حصل لكل ده مين اللي زعلك وقال الكلام دا عليكِ انطقي يا ملك وإيه الدم اللي في شعرك دا

شهقت هدير وقالت

دم إيه قربت منها وبعدت شعرها شافت جرح صغير بسبب الخبطة لكنها اترعبت

هدير : إنتي إزاي سبتي نفسك كدا ووقعتي فين مش تاخدي بالك 

اتنهدت ملك وقالت 

هدخل أخذ شاور وهكون بخير ماتقلقيش عليا يا هدير 

سابتهم ملك وطلعت أخذت شاور ونظفت وطهرت الجرح ولبست هدومها ونامت على السرير حست بألم في جسمها اللي ظهرت فيه علامة زرقاءبسبب زقة فهد أخدت مسكن ودواء مضاد للإلتهاب ونامت حلمت إنها فى كبينه وبتضحك وبتجري ورى حد لكن صورة الشخص دا مشوشة

استمرت أسبوع  موزعة نفسها 

مابين اهتمامها بأطفال الملجأ وهروبها وإنها تفضل بأوضتها بسبب الصداع اللي أصبح بيجليها بصورة مستمرة والصورة اللي بتظهر قدامها باستمرار وهي ماتعرفش هل الصورة دي من الماضي وكان لازم ترجع للدكتور اللي بيعالجها . 

ملك قررت تروح للدكتور ومستغربة إنها مشدودة للمكان ده لكن بردو مش هينفع لأن المكان دا تبعه وهي مش هتروح هناك تانى 

❈-❈-❈

 فهد قعد لمدة يومين مريض وخلال اليومين دول كان بدر بيبكي ويسأل عن ملك ورفض ياكل أو ياخذ الدواء .

لحد ما فهد قدر يمسك نفسه وقرر يعيش لإبنه وبس ومش هيدخل حد تاني في حياته . 

 

فهد نقل بدر للبيت وطلب ممرض يهتم بيه ودكتور يتابع الحالة رفض إن أي ست تشتغل في البيت عندوا وشرط دا على أمه وطبعاً وافقت لأنها معندهاش إستعداد إن حد تاني يدخل حياتهم وانتقلوا من البيت القديم اللي كله ذكريات  لبيت ثاني عشان ميفتكرش أي حاجه من كل اللي فات لكن بدر كان رافض يتعامل مع حد ونفسيته كانت تعبانة 

 فهد كان بيحاول ينسى كل اللي مر بيه لكن فى يوم حس إنه تايه لقى رجليه واخذاه على الكبينة اللي على نهر النيل وكان من جواه نفسه يشوفها اه اتعصب عليها وجرحها لكن على الأقل كان لازم تستوعبه ولكنه صرخ في نفسه 

هتضعف تاني فوق يا فهد 

 فهد راح ناحية الكبينة ومايعرفش ليه هو راح هناك كان خايف يشوفها هناك وفي نفس الوقت نفسه يشوفها 

 

ملك قررت تقعد  فى مكان تاني بعيد عن حديقة الكبينة بتاعته عشان ميحصلش لقاء ما بينهم 

  ❈-❈-❈

دخل فهد للكبينة كان عم إبراهيم قاعد جوا بيراعي الكبينة وبيهتم بيها فوقه عم إبراهيم من شرودوا في المكان وسأله 

مالك يا ابني في حاجه 

بصله فهد وهو تايه وافتكر  وبعصبية قال 

إنت اخترت الهروب زي فارس وزي أمي وسبتني تحت إيد بنتك 

حس عم إبراهيم بالحرج وقال

إنت اللي كنت دايما محتفظ بيها أيام كتير طلبت منك تخليها تبعد عنك، وإنك بياللي بتعمله  بتعذب نفسك مش بتعذبها لكن رفضت كنت دائماً ترجع ببنات الليل عشان تكسرها لكن في المقابل إنت اللي كنت بتتكسر مش عارف ليه خليتها تشتغل خدامة في البيت رغم إنها كانت مراتك

 ليه عملت في نفسك كدا أنا كنت بعمل المستحيل علشان تبعد عنها، علشان هي  نسخة من أمها اللي دمرتني وسابتني زمان لكن إنت اخترت تعذب نفسك لحد ما ظهرت ملك فرحت جداً 

 قاطعه فهد وسأله

مين ملك اللي ماتت بسببي وبسبب بنتك دائماً أشوف صور مشوشة قدامي لكن ماقدرتش أفتكر حاجة.

 عم إبراهيم :

طيب ارتاح يا ابني أنا هحضرلك حاجة تأكلها وهحكيلك عن ملك وإزاي دخلت حياتك 

وبعد وقت عم إبراهيم حط الأكل قدام فهد اللي قاعد قدام النيل وبدأ يحكي له عن ملك  

عم إبراهيم 

ملك هي اللي انقذتك مش إنت هي أصلاً قدرت تحمي نفسها وهي في بيت إعتماد إنت رجعت من إيطاليا زعلان بعد ما عرفت إن والدتك  وافقت تتجوزت اللواء منصور مع  إنك إنت اللي طلبت منها دا لكن غيرتك على أمك كانت أقوى، وكنت فاكر إنك بكدا بتأكد اللي شوفته وإنهم على علاقة ولما واجهتها وطلبت إنك تاخذ كل حاجه تخص والدك وقتها المحامي   خلاك تطلع على وصية والدك بإنك تتجوز من بنت متعلمة وعلى مستوى ، إنت شككت في الوصية وقعدت شهور هناك

وقتها أنا جيبت محمود من البلد علشان يساعدني ووقتها بنتى لعبت عليه قولت خلاص هي نسيت قصتك وفعلاً جت هي ومحمود وقالو إنهم حابين يتخطبوا استغربت، لكن قولت ممكن لو إنت عرفت الخبر تطردها وخصوصاً إنك لما بتكون سكران كانت تدخل عليك وتمارس معاك في الحرام كان نفسي اقتلها بإيدى لكن مش عارف ليه كنت ضعيف ، كان نفسي تتخلص من إدمنها ولما بلغتك بخبر الخطوبة إنت رجعت  وكنت مكسور 

وقتها طلبت من اعتماد تعطيك بنت وتجهزها ليك بنت ميكنش حد لمسها لكن موجودة عندها وملهاش سوابق 

و لما  إنت روحت كانت ملك بتحاول إنها تهرب من البيت وإنت فضلت تدق على الباب وإنت سكران وإعتماد فتحت لك الباب وكانت رافضة تسلمك اي بنت عشان إنت كنت لما بتاخذ واحدة مش بترجعها عندها، وكنت بتمسح اي حاجه تخصها 

إعتماد وقتها سابتك في أوضة وراحت تختار لك بنت و ملك كانت في نفس الأوضة دي فضلت تهزق فيك 

وبعد ما رجعت لعندي فضلت تحكي لي إنها  قالتلك كلام قاسي جداً، رغم إنك مكنتش شايف ملامحها بسبب الظلمة اللي في الأوضة لكنها بكلامها خلتك تفوق ورفضت تاخذ أي بنت واتفقت تأخذها هي ودفعت نص تمنها لعتماد 

وتاني يوم روحت وإنت فايق عشان تشوف البنت 

 إعتماد جهزت لك بنت تانية لكن أول ما سمعت صوتها رفضت تاخذها وقولت لها إنك عايز نغم، فطلبت من نغم تجهز نفسها وقتها نغم اتفقت مع شاب يجيب لها حبوب أعراضها نفس أعراض التسمم الغذائي، كانت عايزة تنتحر ومحدش يلمسها ولما ظهرت قدامك إنت انبهرت بيها واتفقت معاها تكون هي البنت اللي تدربها علشان تكون سيدة أعمال و تمسك هي الشغل مكان سهير 

وجيبتها على البيت وحكيت لي وإنت مضايق إزاي تنقذها وتدفع كل الفلوس اللي عليها 

كنت مستغرب نفسك إنك مهتم بيها وطبعاً بنتي النار شعلت فيها لأنك كنت بتخاف على ملك خصوصاً بعد ما ملك مرضت وعرفت إن عندها تسمم وفارس جه وعالجها 

كنت دائماً تقولها أم لسان طويل وهي كانت تقولك الباشا الوسيم يوم وراء يوم قلبك إتعلق بيها مكنتش بتقدر تغيب لحظة عن عينيك كنت بتروح الشغل بليل وهي نايمة عشان الصبح تفطر معاها . 

إبتسم ابراهيم : في مرة سألتك ملك وقالت ليك بالحرف 

فلاش باك 

هو إنت عاطل حضرتك معندكش 

شغل ولا مشغلة دائماً قاعد في البيت 

فهد ضحك ورد عليها:

إنتي مالك يا أم لسان هتأكليني مثلاً 

اعتذرت ملك  وقالت 

لا سمح الله لكن اقعدت الراجل في البيت بتسبب خنقة وخصوصاً لو وسيم 

قرب فهد منها وهي قلبها بيدق 

مالها قعدت الوسيم في البيت 

شعرت ملك بضعف وحبت تهرب فقالت 

يعني إنت في وسط بنتين ووسيم ومش عايز مثلاً يغيروا عليك أنا أصلاً عاذرة أسماء 

إبتسم فهد وقرب منها : وإيه كمان 

 ملك افتكرت أغنيه بدأت تغني  مقطع منها

غيرتك وظنونك

إبتسم فهد :وإيه كمان 

ضحكت ملك وقالت

طيب إيه رأيك تغني معايا الأغنيه دي

ابتسم فهد أغنيه إيه هو إنتي الكلام اللي بتقوليه دا أغنيه 

ضحكت ملك 

طبعاً أغنيه بتعحبني هات تليفونك أشغلها

 أعطها فهد التليفون وسألته 

هي كلمة السر  إيه، أو افتحه وهات اليوتيوب

فهد بحب قال لها الباس ورد : حياة قلبي 

 ملك بإستغراب

هو في حد يكتب باس ورد أغنيه ولما هي حياة قلبك ليه تاعبها 

ضحك فهد وإيش عرفك اني تاعبها أنا أصلاً بعشقها 

 ملك كشرت وكتمت جواها وقالت

ربنا يهديكم لبعض 

جت تخرج مسك إيديها وقربها ناحيته

وسألها رايحه فين مش هتغني 

ردت ملك بحزن مكتوم لا أنا كتبتهالك تبقي تغنيها مع حياة قلبك 

إبتسم فهد لما حس بغيريتها مسك إيديها وشغلها وقال حاضر وأرقص كمان 

ورقصوا  مع بعض وهما بيرددوا الأغنيه بطريقة كوميدية ساخرة زي سامون وحميد الشاعري 

ملك: بتحبني 

فهد: طبعاً ياحياتي 

ملك: بتحبني 

فهد: وبقولها يوماتي

ملك: بتحبني 

فهد: وبحب جمالك

ملك: بتحبني 

فهد: وبحب دلالك

ملك: وإيه كمان !

فهد: غيرتك وظنونك

ملك: وإيه كمان !

فهد : عقلك وجنونك

ملك: وإيه كمان !

فهد : بتاخدني عيونك

ملك: لحد فين !

فهد: فوق فوق فوق عند القمر

ملك: بس

فهد: وأبعد مالقمر بكتير

بدوب فيهم وأهيم بيهم

وأقول ياقلبي دوب أكتر 

ياريت أقدر أوفيهم

طب إنتي إيه 

ملك: طبعاً ياروحي مجنونه بيك

فهد أنا 

ملك: بلاقي عمري كله فعينيك

فهد أنا: 

ملك: إنت اللي حبك خلاني أقول بحبك وروحي فيك

باك 

كان فهد يتخيل الكلام اللي بيحكيه إبراهيم وحس بسعادة وكمان حزن وقال 

الله يرحمها ياريت أفتكر كل اللحظات دي ماتت بسببي ومقدرتش أحافظ عليها 

 إبراهيم بصدمه :

ومين قال إن ملك ماتت ملك عايشة 

بصله فهد بفرحة ودهشة : إنت قولت حاجه 

يتبع 

إلى حين نشر الفصل الجديد للكاتبة حياة الفهد الجزء الثاني, لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة