رواية روضتني 2 (الجزء الرابع من رواية ترويض الفهد) طمس الهوية -لأسماء المصري - الفصل 3
قراءة رواية روضتني 2 (طمس الهوية) كاملة
تنشر حصريًا على مدونة رواية وحكاية قبل أي منصة أخرى
رواية روضتني 2
(الجزء الرابع من رواية ترويض الفهد)
طمس الهوية
للكاتبة أسماء المصري
الفصل الثالث
❈-❈-❈
في الحياة هناك شيئان لا يستطيع الإنسان التحكم بهما وهما الحياة والموت، غير ذلك هو من اختيار البشر؛ فمن يختار الطريق الصواب أو الخطأ يحاسب عليه لأنه ليس اجبارا ولا انصياعا لأمر ما.
حتى الحب وما نظن انه ليس بيدنا ولكنه اختيار، اختار قلبك أن يدق لذاك ويكره هذا ويبغض تلك، لذا فحياتنا عبارة عن مجموعة اختبارات نمر بها حتى نرى ردود الأفعال لحواسنا ولمن حولنا على ما نمر به.
فإن خذلوك فلا تأبه بأحد وفكر بنفسك، وإن وقفوا بجوارك فتكون تلك السعادة الخفية التي تشعر بها وقت الحاجة.
وقف ينظر للضابط مدهوشا بما قاله ولم يع لما يحدث سوى باقتراب أحد العساكر لتكبيله وصراخ زوجته من خلفه:
-مش ممكن، انتوا بتعملوا ايه؟
صاح مازن معترضا:
-اللي بيحصل ده تهريج وأنا مش هسكت على المهزلة دي.
ثم التفت للمحامي صارخا به:
-ما تتصرف يا متر.
ابتلع محفوظ ريقه واقترب من الضابط يحدثه بهدوء:
-ملوش داعي ابدا التحفظ على موكلي يا فندم بالشكل المهين ده، هو هيهرب يعني؟
رفع الضابط كتفيه لأعلى وهو يزم شفتيه للأمام:
-وأنا ايه اللي يضمن لي؟
صرخ مازن بحدة:
-اسمه، اسمه الضامن الوحيد والكافي ليك يا حضرة الظابط.
رفض الضابط بشدة وهو يؤكد:
-أنا بنفذ القانون يا حضرات.
التفت للعساكر وأمر أحدهم:
-حط الكلبشات في ايده.
بكائها وصراخها جعله يخرج من حالة الذهول التي تملكته وترك فرد الأمن يضع القيد برسغيه بهدوء بعد أن تأكد أن هناك أمرا مريبا بحدث حوله؛ فلا يمكن أن يتهم هكذا دون دليل بالرغم من وجود كاميرات مراقبة ترصد كل ما يحدث بغرفتها.
ابتسم بهدوء لزوجته التي تبكي أمامه واقترب منها يرفع يديه فوق رأسها حتى يستطيع ان يحاوط جسدها براحتيه المكبلتين واحتضنها هامسا لها بهدوء:
-أهدي يا سلطانه، دي مجرد اجراءات بسيطه وهتعدي إن شاء الله.
تحرك بعد أن أمسكه أحد العساكر وتحرك به ناحية باب المشفى فهدر مازن بغضب:
-طيبب بلاش تخرجوا بيه بالشكل ده، البوابه متروسه صحافه ولا أنتوا عازين بروبجاندا وخلاص.
لم يهتم الضابط بحديث مازن وتقدم بالقوة التي معه من أفراد الأمن لخارج المشفى؛ فبدأت عدسات الكاميرات بالتقاط صور عديدة لفارس الفهد وهو مكبل بهذا الشكل ويساق صوب سيارة الشرطة، فما كان إلا أن انهالت عليه الأسئلة المتداخلة والسريعة فلم يجب أي منها ورفع رأسه بشموخ رسمه على وجهه وتحرك معهم لداخل سيارة الأمن.
تبعه كل من مازن وياسمين والمحامي بالطبع بعد أن اسرعوا لسياراتهم متجهين لقسم الشرطة فاستقلت ياسمين سيارة مازن تاركة سيارة زوجها بسائقه وحرسه واقفين مدهوشين مما يروه يحدث أمامهم في سابقة لم تحدث من قبل.
قاد مازن السيارة وأمسك هاتفه يتصل بكل معارفه وصلاته بالداخليه وحتى انه تحدث مع الوزير ذاته:-يا معالي الوزير اللي حصل ده تعدي كبير اوي على شخص فارس الفهد، وحضرتك مش محتاج اقولك مين هو فارس الفهد.
رد الآخر بحيرة:
-مستحيل يا مازن بيه يكون الظابط أخد الاجراء ده من غير ما يكون قدامه دلائل بتورطه وأنااا...
قاطعه مازن صائحا:
-كلام فاغ، أنتوا المفروض عارفين التهديد اللي بيتعرض له فارس هو وعيلته وبالتنسيق معاكم عندكم كل المعلومات عن قضية غسان الصباغ وفي بروتوكول بينا وبين الانتربول، فبأي عقل ممكن يتحط فارس موضع اتهام في حادثه زي دي؟
رد الوزير مؤكدا:
-حقيقي يا مازن بيه انا معنديش أي معلومات وحسب ما فهمت الموضوع حصل من ساعات قليله، سيبني انسق مع مديرية الأمن واشوف القصة ايه وأكيد هلاقي حل.
اغلق مازن ونظر للطريق بعد أن وصل لقسم الشرطة وصف السيارة؛ فالتفت ينظر لياسمين التي لم تكف عن البكاء فسألها بحيرة:
-انتي كويسه؟
نفت برأسها وعينيها مشوشة من كثرة العبرات وهتفت بصوت مبحوح:
-هم هيحطوه في السجن؟
نفى مؤكدا:
-لا طبعا سجن ايه؟ اهدي بس وحاولي تتماسكي قدامه عشان ميتعبش من انهيارك بالشكل ده.
أومأت وهي تتناول محرمة من أمامه تمسح بها وجهها، وقبيل أن تفتح باب السيارة لتترجل معه التفت يسألها وكأنه تذكر للتو:
-آه صحيح، أنتي رد فعلك ايه للجواب بتاع عاليا واللي مكتوب فيه؟
نظرت له بتفاجئ وهدرت به:
-هو ده وقته يا مازن! احنا في ايه ولا في ايه؟
ابتسم لها وهو يحرك رأسه باستحسان معقبا:
-معاكي حق، خلينا في المهم دلوقتي.
ترجلت وهرعت للداخل تبحث عنه ولم تعلم مكانه سوى بعد أن اجتمع حولها العديد من رجال الصحافة والمصورين ووجدت مجموعة أخرى ملتفه حول أحد الأبواب فتأكدت أنه بداخله؛ فصاحت تطلب المساعدة من مازن:
-مازن، تعالى خدني.
دفعهم بقوة وابعدهم عنها وهو يهاتف رجال الحراسات:
-انتو فين؟ احنا اتبهدلنا تعالوا بسرعة.
رد زين من الطرف الآخر:
-دقيقتين وهنوصل يا مازن بيه.
أحاط مازن ياسمين بذراعيه وابعدها عن تزاحم الصحفيين حتى وصل لمكتب الضابط فأدخله احد العساكر فورا لتجد فارس يجلس على الأريكة والغرفة فارغة لا يوجد بها سواه؛ فهرعت نحوه ترتمي بحضه وهي تسأله:
-انت كويس؟
ربت على ظهرها يهداها:
-اطمني، مفيش حاجه مستاهله، الظاهر الظابط ده عايز اسمه يبقى ترند مش أكتر.
نفى مازن الأمر وتكلم موضحا:
-لا يا فارس الموضوع في إن، ده حته ظابط مباحث مش أهل أبدا أنه يعمل كده.
جلس بجوارهما واستطرد:
-أنا كلمت الوزير وكان المفروض أنه يقولي إنك هتخرج انهارده بعد التحقيق ما يخلص بس لقيته بيلاوع كده وكأن القرار مش في ايده.
تنهد فارس وهو يؤكد:
-واضح اني متوصي عليا، بس من مين؟
همست ياسمين بحيرة:
-مالك؟ ممكن يكون مالك...
قاطعتها ضحكاته وهو يسخر قائلا:
-وهو الصرصار ده يقدر يعملها؟ بيقولك وزير الداخليه مش في ايده القرار يا ياسمين.
صمتت فانتبه لحزن عينها فأمسك راحتها وتكلم بصوت عميق:
-بلاش تخلي الكلام اللي مكتوب في الجواب يلعب في عقلك، أنا...
أوقفته واضعه يدها على فمه وهي تبتسم له متمتة:
-مش وقته، ومتخافش أنا رميت الكلام ده ورا ضهري و...
قاطعها هو بحدة:
-أنا مش عايزك ترميه وافضل أنا موضع شك أو اتهام، أنا عايزك تعرفي حقيقته و...
هنا قاطعهما مازن يصيح بعصبية:
-يا جدعان هو ده وقته؟ محفوظ فين يعرفنا الدنيا هتمشي ازاي وهتخرج امتى؟
حرك فارس كتفه بعدم معرفة فوقف مازن وهو يوضح:
-طيب أنا هروح اشوفه فين وارجع لكم.
❈-❈-❈
تلقى ذلك الاتصال فنزل الدرج بلهفة وهو يكمل ارتداء ثيابه وزوجته تتسائل من خلفه:
-ايه اللي بيحصل يا ساجد؟ معقول قبضوا على فارس؟
تكلم بضيق وهو يهم بالخروج:-ايوه، البسي وروحي لمامتك وأنا لما أخلص هعدي عليكي هناك وخدي بالك من نفسك ومن فارس الصغير.
أومأت له بحزن فخرج ليجد والده بانتظاره فركب بجواره وهو متجهم الوجه وسأله:
-ايه اللي بيحصل يا بابا؟
أجاب بغضب:
-عاليا ومصايبها، مؤذية بكل أحوالها والواحد مش عارف حتى يترحم عليها.
توجها صوب قسم الشرطة وبالطريق تلقى مراد اتصال من رقم محجوب فعلم انه ابن اخيه فاجابه فورا:
-أيوه يا بني.
سأله يزن بحزن:
-الدفن امتى يا عمي؟
اجابه بضيق:
-دفن ايه يا بني بس! ده لسه في طب شرعي وليلة طويلة، ودلوقتي أحنا مشغولين بقضية فارس.
رفع يزن حاجبه وهو يستائل:
-ماله فارس هو كمان؟
اجاب وهو ينظر للطريق أمامه:
-اتهموه بقتلها.
اندهش وهو يعقب:
-ايه؟ هي مش انتحرت؟
أجابه مؤكدا:
-انتحرت بس قال شاكين في دوافع وكلام فاضي كده مش عارف ايه طبيعته.
هتف يزن محتدا:
-هو ايه اللي بيحصل بجد؟ أنا مش قادر اصدق الحياة اللي انتوا عايشينها دي.
لم يكن مراد بحال تسمح له ان يرد على ابن اخيه الراحل فاغلق معه هاتفا:
-انا سايق دلوقتي يا بني، لما اعرف تفاصيل هبلغك.
اغلق معه وصف السيارة أمام قسم الشرطة وتوجه فورا للداخل ليجد حشد الصحفيين قد زاد حجمه لدرجة اضطرت قوات الأمن أن تضع حاجز مانع دخول حتى يحجم الموقف، وعندما حاول الدخول رفضت القوات المرابطة فاضطر أن يعود أدراجه لسيارته وهاتف مازن ليدخله.
❈-❈-❈
تلقى الخبر بدهشة فاتصل برفاقه بالأمن الوطني علهم يعرفون مجريات الأحداث؛ فتحدث مع زميله الذي ساعدهم بقضية غسان الصباغ وقص عليه ملابسات القضية فرد الأخير:
-أنت عارف يا عمر لو في حاجه في ايديا مش هتأخر، بس الموضوع شكله مش مريح.
رد عمر وهو يصر على أسنانه من الغيظ:
-ما ده اللي مجنني، بعد ما فارس اتعاون معانا وقدرنا بمساعدته نوقع حد مهم أوي كده زي غسان ده ومن قبله لما بلغ عن عمه فالمفروض الراجل ده يكون عندكم ذو أهمية مش تسيبوه كده الداخليه تبهدله بالشكل ده!
رد وهو ينظر أمامه لشاشة الحاسوب قائلا بتردد:
-صدقني انا قدامي الملف بتاعه وكل كلامك مظبوط بس الواضح كده أنه متوصي عليه من فوق.
جعد عمر جبينه وهو يتسائل:
-من فوق ازاي؟ مين يعني؟
رفض صديقه الإفصاح عن هوية عدوه وهو يوضح:
-فوق يا عمر، حد فوق الداخليه وفوق الأمن الوطني كمان، بالعربي كده حد عايز حاجه من فارس وعنده سلطه جامده اوي أنه يحبسه من غير لا دوافع ولا جريمة.
شخّص عمر عينيه وهو يفكر بماهية هذا الشخص وتأكد بالنهاية أن الوحيد القادر على حصر اعداءه هو فارس بنفسه؛ فقرر أن يذهب لملاقاته والتحدث معه بشأن ما حدث.
وصل لقسم الشرطة ولم يكن من الصعب عليه الدخول حتى مقر اللواء الذي يدير القسم كاملاً فرحب به الاخير وصافحه:
-اهلا اهلا بالبطل، ازيك يا عمر ووالدك اخباره ايه؟
أجابه مبتسما باقتضاب:
-الحمد لله يا فندم، انا للأسف معنديش وقت ومحتاج من حضرتك تطلع قرار اخلاء لفارس الفهد طالما كده كده نتيجة المعمل الجنائي هتظهر بكره.
حرك رأسه رافضا بأسف:
-آسف جدا يا عمر مش هينفع، فارس الفهد مطلوب في قضية كبيرة وجايلي توصية عليه انه يبات في الحجز.
لمعت عين عمر وهو يرمقه بتعجب والآخر يكمل:
-أنا بقولك الصراحه عشان عارفك مش هتسكت وهتفضل تكلم ده وده عشان تخرجه، فالخلاصه كده فارس الفهد هيبات انهارده في التخشيبه مهما حصل؛ فياريت بدل ما تتعب نفسك انك تخرجه حاول تستغل الوقت ده وتعرف مين اللي واقف له وعايز منه ايه، لأن اللي يقدر يعمل كده يقدر يغير في نتايج المعمل الجنائي لو حب يلبسهاله.
تنفس عمر بحدة وجلس يفكر قليلا ورفع رأسه ناظرا للواء وتكلم بمودة:
-طبعا يا فندم حضرتك هتعملي خاطر ومش هتدخله التخشيبه؟
حاول الأخير الضغط عليه أكثر فاكمل:
-مش مطلوب حد يعرف هو نام فين، بس ممكن يقضي الليل هنا في مكتبك ويتحط عليه حراسه بره الباب، مع إن فارس الفهد مش هيهرب يعني.
أومأ له اللواء وهو يربت على كتفه هاتفا ببسمه واسعة:
-أنت عارف إن غلاوتك من غلاوة سامح ابني يا عمر ومش ناسي وقفتك معاه أيام الجيش، ولحد انهارده انا وامه بندعيلك إنك كنت السبب انه رجع لنا سالم، بس...
قاطعه عمر برجاء:
-من غير بس يا سيادة اللوا، أرجوك أنا عمري ما طلبت منك طلب قبل كده بس دلوقتي فعلا أنا محتاجك تنفذ الطلب ده، فارس الفهد مينفعش يتحط في التخشيبه.
أومأ له اللواء مربتا على كتفه فهتف الثاني:
-ينفع اشوفه؟
اجابه وهو يتحرك به للخارج:
-طبعا.
تحرك للخارج فالتقى بمازن الذي كان على وشك الخروج من بوابة القسم فسأله عمر بحيرة:
-رايح فين يا مازن؟
اجابه وهو يشير للخارج:
-بابا وساجد بره و...
قاطعه وهو يسحبه لركن هادئ وتحدث بجدية:
-تعالى بس أنا عايزك في موضوع مهم.
نظر له مازن باهتمام فقص عليه محاولاته البائسة للافراج عن فارس دون جدوى، وما علمه من رجال الأمن الوطني بالاضافة للواء رئيس القسم؛ فهدر مازن بحدة انتبه لها الصحفيين بالخارج:
-ايه التهريج ده؟
أسكته عمر على الفور وهو يوضح:
-افهم بالراحه بلاش التهور ده، دلوقتي لازم نعرف مين اللي ورا الموضوع ده ونعرف عايز ايه بالظبط.
رد وهو يصر على أسنانه:
-هيكون مين غير توابع غسان الصباغ ورجالته!
أومأ عمر مؤكدا:
-وأنا كمان بقول كده، بس عايزين ايه هو ده السؤال.
تنهد واخرج زفيرا عنيفا طرده بحدة وتمتم:
-بلاش فارس يعرف باللي قولته، أنا شايفه ساكت وهادي هدوء ميطمنش، وخايف عليه انت عارف صحته اليومين دول مبقتش زي الأول.
حرك عمر رأسه رافضا وهو يقول:
-فارس لازم يعرف عشان...
قاطعه مازن بحدة:
-وأنا بقولك بلاش يعرف، كده ولا كده هو هنا مش هيعرف يعمل حاجه والموضوع كله في ايدنا انا وأنت يبقى ليه نشغل باله على الفاضي!
زم عمر شفتيه وأومأ منصاعا لرغبته واستمع لمازن يضيف:
-المهم تتأكد من انه مش هيبات في الحجز، فارس لو دخل الحجز ممكن يجراله حاجه.
ربت على كتفه مطمئنا:
-متقلقش.
دلف عمر للمكتب بعد أن تركه مازن وخرج لملاقاة والده وصرفه من المكان لصعوبة دخوله، جلس عمر أمام فارس وياسمين المتمسكة براحته بقوة وبدأ يتكلم بهدوء:
-احنا حاليا لازم نستنى لبكره عشان تتعرض ع النيابة لان تقرير الطبيب الشرعي وخبير الخطوط لسه مطلعش.
سأله بايجاز:
-فرغوا الكاميرات؟
أومأ له وهو يوضح:
-أيوه، بس لسه التقارير هتتقدم بكره مع باقي الأحراز.
سألته ياسمين:
-هو الاستاذ محفوظ المحامي فين كل ده؟
أجابها دون مماطلة:
-راح المعمل الجنائي عشان يثبت الأحراز في المحضر بدل ما يتحط حرز كده ولا كده بره القضية.
أومأ فارس بنفس الهدوء المريب الذي تملكه فنظرت له ياسمين بحيرة:
-مالك يا فارس أنت ساكت ليه كده؟
أجابها وهو يبتسم بسمة مقتضبة:
-ابدا يا روحي، ملوش لزوم العصبية في الحالات اللي زي دي لأن لو في حد عايز يلبسهالي هتلبسني؛ فسايبها على ربنا.
ترقرت عينيها بالعبرات ووضعت رأسها على صدره تحتضنه من خصره؛ فأشاح عمر بصره عنهما بنفس توقيت دخول مازن فحاول المزاح معهما وهو يطلق نكاته الساخرة:
-طيب انا وواخد على الجفاف العاطفي ده، انما الراجل الغلبان اللي واخدينه من مراته ليل ونهار ده ذنبه ايه في المشاهد ال +18 دي؟
ضحك عمر رغما عنه ووقف مبتعدا ليسمح لهم بالتحدث باريحية، ولكن صوت فارس الأجش ما جعل ثلاثتهم يدخلون نوبة ضحك عندما هتف:
-اتلم يا جحش انت بدل ما هحطك مكاني وأخرج انا مع مراتي.
ضحكوا ومازن يعقب:
-لا ومش هياخدوا بالهم من الفرق، مجرد 40 سم فرق طول، على كام درجه فرق لون عين، على شويه عضلات مش هيلاقوها عندي بسيطه يعني.
نظر لياسمين وابتسم متسائلا:
-ايه كمان يا ياسمين فرق بيني وبين فارس.
رد وهي تنظر لقطعة روحها:
-كأنك بتقارن الشمس بالقمر، مفيش وجه شبه أصلا.
سألها مازن ساخرا:
-ويا ترى هو الشمس ولا القمر؟
اجابت بغزل:
-الشمس طبعا اللي بتنور كل حياتنا وهي السبب في كل حاجه حلوة احنا عايشينها.
ابتسم فارس لغزلها، ولكن لم يتوقف مازن عن العبث معهما وهو يعقب:
-قصدك إن أنا القمر، الحق يا فارس مراتك بتعاكسني، يا كسوفي.
قالها وهو يضم طرفي سترته حول صدره كفتاة خجلة؛ فضحكوا جميعا على مزاحه الذي دائما ما يأتي ليخرجهم من حالة الحزن والوهن التي تستعر بهم.
دلف أحد الضباط المناوبين وهو يبتسم لعمر وهتف باحترام:
-أزيك يا عمر باشا؟ سيادة اللوا بيقولك ان لازم الاساتذة تتفضل دلوقتي لأن ملوش لزوم القاعدة كده لحد بكره.
أومأ له فوقفت ياسمين رافضة:
-أنا مش همشي، أنتوا هتسجنوه؟
رد الضابط باحترام:
-لا يا فندم سجن ايه بس، الباشا هيفضل هنا معزز مكرم لحد العرض ع النيابة بكره إن شاء الله.
التفتت تنظر له بعيون دامعة فاقترب من أذنها وهمس لها برقة:
-وبعدين معاكي يا سلطانه، أنا كده هفضل قلقان عليكي بلاش تتعبيني بدموعك دي.
اسندت رأسها على صدره فحاوطها بذراعيه وتمتم:
-كله خير إن شاء الله، روحي عشان الولاد لوحدهم من بدري وتعالي بكره.
ابعدها ينظر لعينيها وابتسم متغزلا بهما:
-عيونك دي هي السبب في عذابي، بحبك.
ابعدها، ولكنها عادت ترتمي بداخل حضنه رافضة ومتمسكة به كأنها طفلة صغيرة تتمسك بوالدها:
-لا يا فارس مش هسيبك، أنا هفضل معاك هنا عشان خاطري.
ابعدها بقوة وهو يأمر مازن:
-خدها يا مازن يلا.
سحبها مازن بالقوة وهي تعافر:
-لأ يا فارس وحياتي عندك.
ربت عليها وهو يدفعها:
-روحي مع مازن وتعالي الصبح وهاتيلي معاكي هدوم نضيفه، يلا يا حبيبتي.
سحبها مازن للخارج فبكت بانهيار وما كان من مازن إلا أن احتضنها وظل يربت على ظهرها يواسيها:
-هو ده اتفاقي معاكي برده؟ كده فارس ممكن يتعب من منظرك ده مش من المشكلة اللي هو فيها.
ابتعدت ترمقه بنظرة حزينةوقالت:
-هاتله أكل والعلاج بتاعه وميه و...
قاطعها عمر مؤكدا:
-متقلقيش، كل اللي هيحتاجوا هيلاقيه، وأنا هنا معاه مش ماشي متقلقيش انتي.
بكت وهي تتحرك للخارج وكالعادة تبعتها عدسات المصورين حتى ركبت سيارة مازن وتحرك صوب منزل أخيه الروحي.
غفت وهي تستند على زجاج السيارة بعد ان ظلت تبكي بكاءا يقطع نياط القلب؛ فامسك مازن هاتفه واتصل بشقيقه الأصغر وهمس متحدثا:
-ايه يا ساجد، أنا عارف إن شيري ممكن متعرفش تبات مع ياسمين عشان فارس الصغير، بس روح هاتلها نرمين تبات معاها عشان...
قاطعه ساجد يخبره:
-العيلة كلها هنا يا مازن.
سأله بحيرة:
-هنا فين؟
أجابه فورا:
-في الڤيلا عند فارس، كلنا هنا وروحت جبت چنى من عندك كمان، حتى فريده هانم وميار وساهر كلهم هنا وكانوا عايزين يروحوله القسم بس أنا وبابا منعناهم وقولنالهم اننا معرفناش ندخل.
استحسن فعلته ولكن قلق الآخر لم يتوقف فسأله:
-هو فارس محجوز في التخشيبه؟
نفى مؤكدا:
-لا طبعا، في مكتب رئيس المباحث وفي كنبه بتفتح سرير وعمر الباشا معاه متقلقش.
تمتم ساجد بضيق:
-وهو يعني هينام، فارس مستحيل يجيله نوم للصبح.
❈-❈-❈
صرخت والدته رافضة لما ألقاه ابنها على مسامعها وهي تتوسله:
-عشان خاطري يا بني بلاش تعرض حياتك للخطر.
رد بتجهم وهو يجلس محتارا لما يود فعله:
-أعمل ايه بس يا ماما؟ فارس بيمر بكل ده بسبب بابا، تفتكري أنا هعرف اعيش بإحساس الذنب ناحيته؟
ارتمت على الاريكة تضرب على فخذها بحزن وهي تتذمر:
-الله يسامحك يا مروان، مش عارفه ادعي عليك وأنت بين ايدين ربنا.
ربت آسر على كتف أخيه وهو يعقب:
-نزولك مصر في التوقيت ده ومن قبل ما نعرف ايه الحكاية خطر علينا كلنا مش شجاعه يا يزن، بطل تهور وفكر مره واحدة بعقلك يا أخي.
نفرت عروق وجهه وهو يشعر بالغضب وقد تأجج بداخله لما يعايشه منذ أشهر أو ربما سنوات لمجرد ارتباط اسمه باسم مروان الفهد ذلك النذل الذي لم يضع أي اعتبارات لا أبوّه ولا لعائلته التي تربى وكبر بكنفها؛ فظل يجاهد غضبه حتى يهدأ، ولم يقطعه سوى جرس الباب فتحركت والدته لتفتح فوجدتها لاميتا.
ابتسمت لها الأخيرة وهي تستأذن بأدب:
-كيفيك خاله؟ فيني مر لعندكن شوي؟
أومأت وهي تفتح لها المجال للدخول فدلفت فانتفض آسر على الفور يرحب بها:
-أهلا أهلا البيت نور.
رمقه يزن نظرة نارية من لا مبالاته وسحب نفسا عميقا بداخله ورحب بها باقتضاب:
-اهلا يا انسه، اتفضلي اقعدي.
جلست وابتلعت ريقها بتوتر وهي تخرج ورقة مطوية من جيب سروالها وهتفت توضح:
-أنا وعم راجع أوراق الورث ياللي أرسلها المحامي تبع البابا...
تلعثمت واختنقت بحروفها وهي تصحح:
-بقصد غسان الصباغ.
أطرقت رأسها وناولت الورقة ليزن وهي تكمل:
-وجدت هاي الورقة، بتخص مروان بك وبظن هي السبب بكل اللي عم يصير.
نظر للورقة والمكتوب بها خطاب من مروان الفهد يخاطب المنظمة التي يعمل معها، وبدأ يزن يقرأ ما بها بصوت عال وهو يصر على أسنانه من الغيظ.
(مرحبا بكم يا سادة أنا مروان الفهد أحد رجالكم بالمنظمة بالشرق الاوسط وبالتحديد بمصر.
بالآونة الأخيرة تعرضت للكثير من الصعوبات والمضايقات بتجارتي التي تصب بمصلحتكم، وكان السبب الأساسي بتلك العرقلة هو شخص اعتبرته عدوي اللدود لما ذاقني من خسارة مادية ومعنوية وتكبدت بسببه العديد من الخسائر وهو فارس الفهد ابن اخي الراحل ماهر الفهد.
لذا اطلب منكم الوقوف معي وحل تلك المعضلة لأنه أصبح كالعضمة التي تقف في حلق الكلب وقد تؤدي لوفاته تماماً.
وشكرا لكم على سعة صدركم.)
احكم يزن قبضته على الورقه فسحبتها منه والدته لتتاكد أنه خط زوجها؛ فاغلقت عينها وهي تؤكد:
-خط ابوكم فعلا.
لمح نظرات لاميتا التي تلمع بما يثور بداخلها فسألها بحيرة:
-في حاجه تانيه عايزه تقوليها؟
أومأت له وهي تبتلع:
-المحامي عم يساومني على براءة فارس الفهد قريبكن.
لمعت عينه واحتدت نظراته وهو ينتظر منها توضيح فاضافت:
-بده كل مصاري غسان الصباغ ترجع للمنظمة وعم يهدد إذا علم الانتربول أو الأمن بمصر رح يقوصوه لفارس.
نهجت انفاسه وهو يعقب عليها:
-فلوس غسان مش في ايدنا، أنااا...
قاطعته توضح:
-هو كتب نصها لأيلي والنص التاني لعاليا، فيكن تبلغوها تتنازل منشان فارس و...
قاطعها آسر يحزن:
-عاليا انتحرت ومتهمين فارس بقتلها.
تخوفت من حديثه وقالت بقلق:
-يا الله شو هاد؟! أنا ما بدي هاي المصاري، رح اتنازل عنها وهلأ ما بعرف مصاري عاليا شو مصيرن بس رح اتواصل مع هادول الناس و...
قاطعها يزن ينبهها:
-أوعي، استني لما نعرف راسنا من رجلنا، احنا مش هينفع نتصرف من دماغنا وروح فارس تحت ايديهم.
صرخ بحدة وغضب:
-انا مش عارف اتنفس وانا محبوس هنا، انا عايز انزل مصر كده كتير.
جلس على ركبتيه أرضا يشعر بالعجز وهو يصر على اسنانه وصرخ متألما بقوة:
-آاااااه.
وقف بعد أن أخرج نوبه غضبه ونظر أمامه با٥صرار وهو يتحدث صارا على أسنانه:
-أنا نازل مصر وخليكم هنا أنتو، مبقاش ينفع أسيب فارس لوحده في المصايب دي وخصوصا اننا عشنا مع عاليا وشوفنا جنانها بنفسنا.
ابتسم آسر لثورة اخيه الذي كان دائما وابدا ممتعض من فارس وتصرفاته، ولكنه الآن يشعر وكأنه شقيقه ويحاول منع الأذى عنه حتى وإن عرض نفسه هو للخطر.
❈-❈-❈
دلفت لا ترى أمامها من كثرة عبراتها فهرع ناحيتها توأم حياتها واحتضنتاها بقوة وهما تربتا عليها ونرمين تهتف:
-حبيبتي يا سو، إن شاء الله ربنا هيظهر الحق وفارس بكره يكون في بيته.
بنفس الوقت اقتربت چنى من زوجها باكية وعيونها مغيمة من عبراتها وتمتمت بحزن وتلعثم:
-أخووويا فييين يا مازن؟ أخويااا.
احتضنها بقوة وظل يمسح على ظهرها، ولكنها لم تتوقف عن البكاء بل زاد نحيبها فانحنى بطوله ينظر لها وهو ممسك براحتيها وأكد بجدية وهو يمسح براحته على بطنها المنتفخ:
-چنى، بلاش كده عشان اللي في بطنك.
بكت وهي تعقب:
-مش قادره، حاسه إن في حاجه وحشه اوي هتحصل.
رمقها بنظرة حاده وقال:
-حرام كده ياسمين مش ناقصه.
صرخت غير عابئة بأحد:
-هو يعني مش أخويا زي ما هو جوزها، انت مش عايزني أقلق زيها؟
لم تنتبه المعنية بحديثها، ولكن انتبه الآخرون فنظرت لها هدى بامتعاض وتمتمت بصوت منخفض:
-بت قليلة الأدب، والله لولا المصيبه اللي احنا فيها لكنت جبتها من شعرها الدلوعة دي.
التفت محمود يحثها على الصمت بتعابيره فصمتت واضعة يدها على فهمها بحركتها المعتادة وهي تتذمر:
-اهو سكت.
وقفت ياسمين تتحرك صوب جدها وارتمت بداخل حضنه وهي تتوسله:
-جدووو، ادعيلو يا جدو يمكن ربنا يستجاب لك.
احتضنها وتضرع للمولى:
-ربنا يفك كربة يا بنتي، إن شاء الله يطلع منها على خير.
هنا لم يتمالك مراد نفسه فصرخ بالجميع:
-جرى ايه يا جماعة؟ ايه المندبه دي ما بلاش الفال الوحش ده.
عقبت هدى على الفور باسلوبها المستفز:
-ايوه والله معاك حق، هو يعني فااااارس باشا على سن ورمح مش هيقدر يخرج نفسه حتى لو عملها بجد! ده اقل واحد شغال عنده يروح يعترف على نفسه بداله وتبقى خلصت.
تجهم وجه رجال الفهد ولم يسعهم الرد فردت دينا على الفور:
-الكلام ده لو عاملها ويكون كمان معندوش ضمير، بس فارس الحمد لله بيخاف ربنا يا هدى ومش بتاع السكك دي.
ردت الأخرى وكأنها تصحح ما قالته:
-يا دينا انا مش قصدي، أقصد أنها لو لبسته يعني ليها حل ومش مستاهله عياط، ده الست فريده هاتم اهي ما شاء الله قاعده زي الأسد ولا دمعة نزلت من عنيها فهل بقى هم موجوعبن اكتر منها؟
لم تتمالك ياسمين نفسها فصرخت دون وعي:
-بس خلاص، كفايه انا مش مستحملة كلام من ده.
نظرت حولها وتسائلت بحزن وبكاء:
-فين ولادي، انا عايزه ولادي.
اقتربت منها شيرين تخبرها:
-الولاد في اوضتهم ومعاهم فارس الصغير كمان، تعالي اطلعي ارتاحي شويه وبعدها...
قاطعتها صارخة:
-لأ، أنا عايزه ولادي في حضني، عايزة ريحتهم في حضني.
سحبتها نرمين بهدوء وصعدت برفقتها صوب غرفة صغيريها واخذتهما من المربية وتحركت صوب جناحهما؛ فأراحت جسدها على فراشها وهي تحتضن صغيريها وجلست نرمين بجوراها تربت على شعرها بهدوء حتى غفت ودموعها لا تزال تشق وجهها.
❈-❈-❈
فتح الباب ودخل يجلس برفقته وهو يحمل معه أكياس الطعام فانتبه له فارس واعتدل بجلسته متسائلا:
-أنت لسه هنا؟ أنا بحسبك روحت.
ابتسم له وجلس بجواره وبدأ بفتح الاكياس وهو يخبره:
-كنت بجيب أكل وميه وشوية عصاير، ومنستش علاجك.
غمز له وهو يمزح معه:
-مدام ياسمين مسابتنيش إلا لما حلفت لها اني هأكلك واديلك العلاج بايديا.
سحب نفسا عميقا وطرده للخارج ف٦اشار عمر للطعام وهو يبدأ بتناوله:
-بسم الله، ولا لازم شوكة وسكينه؟
ضحك فارس وبدأ بتناول الطعام هو الآخر، ولكنه توقف ونظر لعمر وتكلم بحزن:
-ياسمين أكيد مأكلتش حاجه، انا عايز اطمن عليها.
اشار عمر لعينيه بالتتابع وهو يقول:
-من عنيا يا باشا.
اخرج هاتفه المحمول وناوله لفارس الذي اتصل فورا على الرقم الخاص بها، ولكن وجده مغلق فأغلق واتصل بمازن الذي أجاب فوا وبلهفة:
-ايه يا عمر حصل حاجه؟
أجابه فارس بصوت هادئ:
-انا فارس يا مازن.
صرخ مازن دون وعي:
-فاارس، أنت كويس؟ هو عمر لسه معاك؟
أجابه مؤكدا:
-أيوه وشكله هيبات هنا، المهم بس انت عندي في البيت؟
أوما وهو يجيب:
-أيوه كلنا هنا.
استحسن حديثه واخبره:
-ياسمين عامله ايه؟
أجابه كاذبا:
-كويسه والله متقلقش وطلعت مع بنات عمها تنام.
سأله مجددا:
-أكلت حاجه؟
عاد لكذبه وهو يجيب:
-أيوه اكلوها بالعافيه، متقلقش انت عليها وخد علاجك لحد ما نجيلك بكره.
أغلق معه وعاد للجلوس بعد أن ابتعد قليلا فهتف عمر مازحا:
-الكباب والكفته لو بردوا مش هيبقوا حلوين، يلا بقى انا جعان.
عاد لتناول الطعام فشرد قليلا فسأله عمر بحيرة:
-هو انت متغير ليه كده؟ أنا كنت متخيل أنك هتقوم الدنيا ومش هتقعدها و...
قاطعه وهو يوضح:
-متأكد إن في حاجه مش مظبوطه من أول نظرات الظابط ليا لحد الحبسه دي، عشان كده ساكت لحد ما أعرف ايه اللي بيحصل.
ارتبك عمر فهو لم يخبره بالمعلومات التي وصلت له، ولكن حقا فذكاء فارس لا يضاهيه أحد فسأله عله يجد إجابات للعديد والعديد من التساؤلات التي تشغل ذهنه:
-تفتكر مين اللي ورا اللي حصل؟ والأهم من مين عايزين ايه؟ وهل عاليا انتحرت فعلا ولا ممكن حد قتلها وعايز يلبسك الجريمة؟
نفى غامزا بعينه:
-لأ انا متأكد أنها انتحرت لانهم عملوها قبل كده وقت قتل كارما ومعرفوش يلبسوهالي.
عقب عمر بضيق:
-بس المرة دي غير يا فارس، سلاح الجريمة بتاعك وعليه بصماتك.
عقب مؤكدا:
-بس في كاميرات إلا لو في حد عنده سلطه كافيه انه يحذف التسجيلات دي وساعتها هعرف انهم المنظمة دي وإن لسه لهم ديل وماتتش بقطع الراس زي ما كنا فاكرين.
تنفس عمر بحدة وهو يستمع استطراده:
-ممكن جدا يكونوا عايزين فلوس غسان الصباغ، لأن الفلوس دي تعتبر ميزانيه دوله ومش بالساهل يتخلوا عنها بسهوله كده، والغالب إن في مساومه جايه قريب عليها، ده انا لاحظته وانا بتفاوض مع المحامي بتاع غسان على اسهم الشركه.
سأله عمر وهو ينظر له باعجاب على تحليله الشبه صائب:
-ولو كلامك صحيح، اعتقد ممكن يلعبوا في الأدلة عشان يساوموك تتنازل مش كده؟
أومأ وهو يتذمر:
-انا اصلا مش عايز الفلوس دي، وبموت عاليا أصلا بقت ورث مش لعيلة الفهد وبس لعيلة ابوها كمان؛ فانا لو قدرت اتحكم في نصيب الناس اللي تبعي فحقيقي معرفش رد فعل أهل عاليا هيكون ايه خصوصا ان علاقتها بيهم كانت شبه معدومة وغالبا محدش ممكن يتنازل بسهوله.
أكد عمر:
-لما يعرفوا الكوارث اللي جايه من ورا الفلوس دي مظنش حد عاقل ممكن يحتفظ بيها.
وافقه بايماءة خفيفة من رأسه ولمعت عينه فجاة وهو يقول:
-الفلوس اتقسمت بين عاليا وبين البنت اللي عاملها بنته، وأكيد هيحاولوا يوصلولها عشان يساموها هي كمان وده معناه انها مش في أمان لا هي ولا يزن وآسر.
انتفض فورا وهو يصيح بعمر:
-بلغ القوات اللي بتحرسهم عشان يعملوا حسابهم ويشددوا الحراسه عليهم أنا معنديش استعداد ينقص فرد تاني من العيلة لصالح المنظمة دي.
وافقه ولم يكمل حديثه على إثر رنين هاتف عمر الذي أجاب فورا:
-أيوه يا فندم.
تجهم وجهه وهو يستمع للطرف الآخر وأومأ بحيرة:
-أنا عارف إن القانون مش بيجبر حد على الحماية بس هل في خطوره برجعوهم؟
صمت ليستمع للطرف الآخر فحرك رأسه مستمعا بانصاب وعقب قائلا:
-خلاص براحتهم، الخيره فيما اختاره الله، وكده كده فارس باشا كان عايز كده المهم بس التأمين بتاعهم يفضل معاهم لحد ما يوصلوا.
استمع من جديد لحديثه ورد:
-مش عارف الحقيقة بس أظن إن الموضوع هيفرق لأن في توقعات كده جت في بال فارس ومستبعدش أنها صح.
صمت وتحدث يسأل:
-صحيح قولي، موصلكش أي اخبار عن قضية عاليا؟
صمت مستمعا بانتباه وجلس بجوار فارس الذي لم يكن من الصعب عليه وعلى ذكاءه تكهن ما يدور بتلك المكاملة وانتظر تعقيب عمر الاخير:
-خلاص تمام، كده الأمور كلها وضحت وأظن مش هتكون في مشكله لو اتواصلنا معاهم بعيد عنكم وبعد كده منهم للانتربول بقى وأحنا out.
اغلق معه والتفت ينظر لفارس المبتسم وهو يقول:
-طبعا يزن وآسر عايزين يرجعوا
أومأ له وهو يبادله البسمة فعاد فارس لاستنتاجاته الصحيحة:
-والبنت اللي اسمها لاميتا جايه معاهم.
أومأ له من جديد فعاد يستطرد:
-واضح إن اللي حسبته لقيته والمنظمة اتواصلت معاهم بشكل ما وساومتهم ع الفلوس كلها اللي مع لاميتا واللي مع عاليا.
أومأ عمر مجددا وهو منبهر بذلك الرجل الذي ما هو إلا عبارة عن كتلة من الذكاء المتحرك واستمع له يضيف من جديد:
-وأظن لو مسلمنهاهمش الفلوس القضية هتلبسني لأن الواضح إن لهم رجاله مش بس في الداخليه ده كمان في الأمن الوطني ومش بعيد يكون لهم في الانتربول نفسه.
زم عمر شفتيه بضيق وهو يؤكد على حديثه فتنهد؛ فارس وهو يعود بجسده للوراء مسندا رأسه على ظهر الأريكة وتمتم:
-ياسمين كانت طول عمرها بتقولي إن فيا صفات كتير حلوه ما عدا الغرور، كانت شايفه انه بيبوظ الصفات الكويسه فيا ودايما كانت بتحاول معايا عشان اتخلى عنه.
تنفس وهو مغلق عينه واكمل:
-الظاهر ان ربنا كل ما يلاقيني خرجت بره الطريق المستيقم يبعت لي اللي يرجعني له، ربنا حب يوريني إن الغرور ممكن يودي صاحبه في داهيه وإن مهما كان الإنسان قوي ففي الأقوى منه واللي يقدر يكسره ويذله بالشكل اللي انا فيه دلوقتي، أنا البرئ هتفاوض على برائتي مقابل الفلوس الحرام بتاعة غسان.
تنهد وهو يريح جسده على الاريكة متمتما:
-لله الامر من قبل ومن بعد.
يتبع
إلى حين نشر الفصل الجديد للكاتبة أسماء المصري من رواية روضتني 2، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
