قراءة رواية حياة بعد التحديث

الجزء الثاني من بدون ضمان كاملة

تنشر حصريًا على مدونة رواية وحكاية قبل أي منصة أخرى

رواية حياة بعد التحديث

 رواية جديدة قيد النشر

من قصص و روايات 

الكاتبة خديجة السيد

اقتباس 

الفصل السادس

❈-❈-❈

أملك قلبا لا يؤذي أحدا، لكنه يؤذيني. 

هوت فريدة بجسدها فوق الفراش بعد الإنتهاء من عملها حيث رحل الجميع إلي منازله، وقعت عيناها على صوره سونار طفلها و تنهدت بحزن وهي تتذكر كيف رحل دون أن تراه  وتحمله بين ذراعيها وتخبره انه أصبح رجلها من الآن.. انحدرت دمعه من عينيها مسحتها سريعاً، وشعرت بالاختناق من تدفق الذكريات

المؤلمه التي لا تذهب عن بالها ابدا. 

نظرت حولها وتذكرت حديث صديقتها عندما أخبرتها، أن تلك الوحدة هي السبب الرئيسي في تدفق الذكريات لها كل ليله وتقتلها، وبدأت تتساءل.. لو أن لها فرصة تتخلى بها عن كل ما آلمها، تمحي من خاطرها.. لو تعرف كيف يطوي المرء حزنه ويلقيه بعيدًا.. لو يصادفها النسيان وتمضي دون ثقل يُشقينها.. فتلك الحياة تضيع منها بالفعل وهي تقف كل ليلة تراقب تسرب الأيام والشهور من حياتها، لكن عاجزة عن العودة للأيام الرائعة من حياتها.

اليوم، وغدا ودائما تبكي بمفردها، تبكي لأن كل الأشياء التي آمنت بها يومًا لم تحصد منها سوى خيبه وهي مُتعبة من محاولاتها المستمره للتخطي وعدم الالتفات دون الوصول لِجهه آمنة حتى الان."

وبدات تشرد في حديث السيدة عواطف حينما عرضت عليها فكره الزواج من شخص ارمل لدي طفلتين ويريد ان يتزوجها لتراعي اولادة! حينها ثارت عليها بانفعال ولم تعطيها فرصه ورحلت.. وتذكرت أيضا حديث صديقتها في الصباح معها عن ذلك الموضوع .  

أردفت سماح قائله بنبرة إصرار

= يا بنتي ما تسمعي الكلام وبلاش تضيعي الفرصه دي من ايدك، جربي تقابلي حتى الراجل اللي مدام عواطف قالت عليه ولو ما عجبكيش خلاص ما حدش هيغصبك على حاجه مش عاوزاها .

قاطعتها فريدة بصلابة قليلة

= سماح انتٍ عارفه من ساعه ما عرفتي الموضوع ده وكام مره تفتحي معايا؟ وبرده بقول لك لا وانتٍ مصممه، هتخليني ازعل منك تاني ليه واحنا لسه متصالحين من مده .. انتٍ مش قلتي مش هتدخلي في حياتي تاني ولا هتفضلي تزني بعد ما عرفتك كل اللي حصل لي

رفعت أنظارها للأمام مبتسمة بهدوء قائله

= حصل بس الموضوع دلوقتي غير، وبعدين هو انا بكلمك في موضوع اهلك دلوقتي انا بكلمك في موضوع خاص بحياتك اللي جايه، وبصراحه بقى انا شايفه ان دي فرصه ما تتعوضش و ده الشخص المناسب ليكي ولظروفك .. بكره لما تتجوزي البنتين دول انتٍ اللي هتربيهم وهيبقوا زي ولادك بالضبط

نهضت واقفًة من على مقعدها مشيرًة لها بيدها وهي تتابع بنبرة عقلانية

= تخيلي كده مع نفسك! مش احسن من الوحده اللي انتٍ فيها.. عشان كده مش عايزاكٍ تضيعي الفرصه من ايدك مش هتيجي تاني.. وبعدين هو انتٍ عاوزه اكتر من كده ايه؟ جالك بدل العيل عيلين وهتربيهم من و هم صغيرين وبكره ينادوكي ماما عشان انتٍ اللي هتربيهم  وهم ما شافوش والدتهم حتي.

رغم عنها بدات بالفعل أن تسرح بخيالها و تتخيل بأنها تمتلك عائله صغيره، مكونه من زوج و اطفال صغار يخصونها هي فقط! ترعاهم وينادوها بامي، كم جميل الشرود بذلك حقا! لكن تلك الحياه بالتاكيد ستكون مجرد خيال ولم تحدث بالواقع، كتمت بصعوبة المها الموجوعة عليها، لكن زاد ألمها وكذلك حدة الوخزات التي أوجعت حلقها، و رغم ذلك قالت بهدوء

= يا سلام حليتي موضوع الاطفال، طب و بالنسبه للراجل اللي هتجوزه ده فكرتي فيه؟  وانا اعرف عنه حاجه عشان اثق فيه وامن على نفسي معاه.. سماح انتٍ مش فاهماني ولا هتفهميني اللي جوايا صعب، انا مبقتش اثق ولا في أي راجل، محدش يستاهل ثقة حد عموماً انا واحدة كنت بثق في اي انسان يضحك في وشي بس.. يعني انا لو لسه مقبلاكي النهاردة لأول مرة هقعد احكيلك قصة حياتي كلها.. انا كنت كده للاسف.. وبثق في الناس بسرعه وبصدق ان اللي قدامي عمره ما هياذيني! حتى الثقه دي كنت بثقها في اهلي والنتيجه كانت ايه.. أنا اتغيرت لما قرب الناس ليا ولقلبي وكل حاجة في حياتي ادوني كـف على وشي.. 

أمسكت الأخري يديها بحنان تشجعها بكلمات بسيطة قائله باهتمام

= بلاش تشاؤم وبكره ان شاء الله كل حاجه هتتصلح وتبقى زي الأحسن وكل المخاوف اللي جواكي دي هتروح لوحدها، بس لما انتٍ تحاولي وتخشي تجارب جديده مش هتتغيري لوحدك.. وبطلي بقى اسطوانه انا هفضل كده لوحدي ومش هتجوز خالص بذمتك دي حياه؟ العمر بعد كده هيجري وهتلاقي نفسك لوحدك وهتندمي .. خديها مني نصيحه طالما مش عاوزه ترجعي لاهلك ومش قادره! يبقي ابني عيله تخصك لوحدك و تعوضك 

حديثها بالفعل لمس قلبها، صمتت للحظة لتلتقط أنفاسها قبل أن تتحدث ببطء 

= انا ممكن في يوم افكر اتجوز بس لما اقابل شخص مناسب.. اللي متقدم ده مش مناسب

او ممكن انا اللي في وضع مش مناسب ان ابدا حياه وارتبط من تاني؟ عارفه لما تكون ثقتك بنفسك ضعيفة و تربطي سعادتك بشخص؟ وقتها بتتنازلي عن كل حاجه وترضي بقليلك وانا مش عاوزه ابقى كده .. ‏انا محتاجه اقابل حد يثبتلي إن مش كل الناس وحشة.

اقتربت إليها مواصلة الربت على يدها بحنو مطمئنة وهي تجيب بهدوء جاد محافظة على ثبات نبرتها

= عارفه هتلاقي الشخص ده امتى؟ لما تحبي يا فريدة، وتسيبي نفسك للدنيا مره ثانيه وتعيشي بجد، لكن انتٍ دايما حاطه في دماغك ان ده الحل وأن عمر ما حد هيعرف يوصل لك ولا يؤذيكي طول ما انتٍ حابسه نفسك في الاوضه جوه وده مش صح، في ايه لو جربتي تاني حتى لو فشلتي ما انتٍ اتعلمتي من تجربتك اللي فاتت وقلتي بنفسك كده؟ يبقى جربي واتعلمي تاني .

تأهبت حواسها من كلماتها لكن رغماً عنها 

أجابتها فريدة بسخرية مريرة و بابتسامة باهتة

= الكلام سهل يا سماح وبعدين حب ايه اللي احبه، ولله انتٍ فايقه ورايقه ومين اصلا ده اللي هيحبني وعلى ايه؟ ولا أنا ممكن أحب بعد اللي شفته كله و افتح قلبي لمين؟ احنا محتاجين ناس تستحملنا قبل ما تحبنا يا سماح ! وانا الحمد لله ولا لقيت اللي يحبني ولا إللي يستحمل وضعي .

زاد رفضها، بينما حاولت سماح امتصاص احباط صديقتها قائله بحذر 

= طب هو مين قال لك انك مش هتلاقي، طب ما هو موجود مش انتٍ هتربي لي عياله... قصاد كده بقى يستحملك ويقبل وضعك ومين عارف مش ممكن يطلع ابن حلال وكويس، هو يطول أصلا بس انتٍ بلاش تنشفي دماغك واقبلي وبلاش ترفضي المرة دي.

التفتت نحوها وتضاعف ارتباكها وهي ترد بتجهم

= انتٍ بتقولى ايه يا سماح ؟؟ وهو لو طلع انسان کویس استغله يعني !! و ايه الكلام الغريب اللي انتٍ بتقوليه ده ايه دي قصاد دي! ده جواز هو لعب عيال.. بقول لك ايه؟ اقفلي على السيرة دي خلاص بقى وانا اصلا اتخنقت مع مدام عواطف و هبيت فيها هبه جامده و اكيد وصلت الكلمتين دول للعريس ومش هيفكر تاني فيا، يعني الموضوع اتقفل من قبل ما يبدأ اصلا

نظرت لها سماح بعتاب وهي تقول بنبرة جادة

= أولا ما اسمهاش استغلال، خدمه قصاد خدمه، وهو الجواز ايه غير اتفاقات! وثانيا بقى واهم حاجه مدام عواطف لما اتكلمت معاها وحكيتلي ظروف الجدع اللي اسمه بدر ده .. عرفت انه لما يصدق اي واحده تقبل بظروفه قصاد انها تربي العيال وهو مش عاوز اكتر من كده.. وما اعتقدش انها استعجلت وحكيتله اللي حصل، واديكي شايفه بنفسك كل يوم والثاني بنشوف العيال عندها، يعني معنى كده أنه لسه ملقاش العروسه المناسبه

يتبع

إلى حين نشر الفصل الجديد للكاتبة خديجة السيد من رواية حياة بعد التحديث, لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة