رواية روضتني 2

(الجزء الرابع من رواية ترويض الفهد)

طمس الهوية

للكاتبة أسماء المصري

الفصل السادس عشر

❈-❈-❈

رحب بعائلتها بحرارة مما أدهشهم وهي أيضا رمقته بتعجب وهو ينحنى ليحتضن جدها:

-أزيك يا حاج؟ أهلا وسهلا نورتوا.

مد ساعده ليصافح عمها ونرمين من بعده:

-مجتش فرصه اباركلك على الحجاب، مبروك.

ابتسمت الأخيرة وهي تعقب:

-الحمد لله، خطوة كانت لازم تتعمل من سنين.

ابتسم ولف رأسه ينظر لزوجته غامزا لها:

-عقبالك.

جلسوا على المائدة بعد أن أصر عليهم بمشاركتهم الطعام، ولكنه نظر أمامه فوجد مقعد مربيته خال فجعد جبينه وتذكر حدته معها ليلة أمس فنهض يستأذنهم بلباقة:

-بعد اذنكم لحظه، داده لازم حد يسندها عشان تيجي تفطر.

تركهم متحركا صوب غرفة مربيته فالتفت محمود يسأل ابنة أخيه بحيرة:

-هو جوزك طبيعي ولا الصدمه أثرت على دماغه؟

ابتلعت ريقها وأجابت والحزن يخيم على ملامحها:

-شادي ده مؤذي بشكل متخيلتوش قبل كده، والحمد لله يا عمي إن فارس هادي دلوقتي، حضرتك مشوفتوش امبارح كان عامل إزاي.

بنفس الوقت دلف غرفة مربيته بعد أن سمحت له ولكن فور أن وقعت عينيها عليه أدارت وجهها تنظر للجانب الآخر فهرع ناحيتها واستند على ركبتيه أرضا ممسكا براحتها المجعدة وهو يعتذر:

-حقك عليا يا داده، أنا عارف اني اتعصبت عليكي امبارح.

لم تجبه وظلت تحرك أناملها تسبح بالمسبحة؛ فقبل راحتها وتمتم بحزن:

-بلاش انتي كمان تزعلي مني، أنا مليش غيرك وآسف على طريقتي معاكي بس...

صمت بعد أن اختنق صوته وأسند رأسه على فخذها يبكي بصمت مضيفا:

-انا تعبان اوي يا داده ومحتاجك جنبي.

لم تستطع اتخاذ موقف معه فربتت على كتفه ومسحت على شعره وهي ترد على حديثه:

-ربنا يروق بالك يا بني ويبعد عنك كل شر، أنا لو هزعل من الدنيا كلها عمري ما ازعل منك ابدا على الأقل انت طمرت فيك التربية مع اني مقعدش معاك إلا 8 سنين بس.

تنهدت مطلقة زفرة يأس وبكت وهي تضيف:

-الدور والباقي على ولادي اللي ربيتهم وكبرتهم وعلمت وجوزت وفي الآخر رموني في دار المسنين ولولاك كان زماني لسه مرميه هناك.

ارتفع بجسده محتضنا إياها وهو يؤكد على حديثه:

-أنا اللي ابنك، وأنا غيور بصراحه ومحبش حد يشاركني فيكي فاحسن حاجه عملوها انهم سابوكي ليا.

ابتسمت وربتت على وجهه فساعدها بالوقوف وتحرك بها للخارج لمكان مائدة الطعام، ظل الجميع يتناولون الطعام بهدوء مريب ولكن فور أن انتهى هو من طعامه وقف وأخبر زوجته:

-ياسمين من فضلك اعمليلنا 3 قهوة من ايدك عشان اتكلم مع جدك وعمك وانا بالي رايق.

فهمت من حديثه أوامره الخفية بعدم جلوسها معهم لا هي ولا ابنة عمها فسحبت نرمين معها للمطبخ لتعد لهم القهوة وتحرك هو يسند الجد لغرفة المكتب المهشمة منذ أمس وعلى الفور لعن بداخله تناسيه للمجزرة التي حدثت منه بحق تلك الغرفة مرتين بنفس اليوم، وحقا لم يحدث أي تقصير من جانب الخدم عندما حطمها صباحا ولكن ما حدث بالأمس وهو برفقة مازن ومحاميه ربما لم يلحق الخدم تداركه.

ارتبك واشار لهما للجلوس بأحد الأركان البعيدة قليلا عن الحطام والزجاج المتناثر ولم يكتم الجد فضوله بل سأله متعجبا:

-ايه اللي حصل هنا؟

جلس فارس بجواره ورد بقوته المعهودة:

-قولت اخرج عصبيتي في المكتب بدل ما اخرجها على حفيدك يا حاج.

غصته اتسعت بحلقه فصمت ذلك الكهل وترك الحديث لابنه ليسأله:

-طبعا كلنا اتفاجئنا باللي سمعناه امبارح، بس المهم دلوقتي الخطوة الجايه هتكون ايه؟

اراح فارس ظهره على المسند الجلدي للمقعد وزم شفتيه وهو يتصنع التفكير وتكلم بالنهاية:

-خطوتي الجايه هتكون رد عنيف جدا على محاولة تشويه سمعة اختي، أنا استحملت لما ابن اخوك كان بيقف لي أنا، لكن توصل انه يأذي أختي فده اللي مش هسكت عليه.

ابتلع الجد ريقه وحاول أن يخرج حروفه بمنطقية وترتيب:

-وقت ما نزلت أخبار عنكم وكان شادي ظاهر في الجرايد معاكم وسألناكم، ليه معرفتوناش يا بني بالحقيقه يمكن كنا قدرنا نحلها...

قاطعه فارس موضحا:

-يا حاج البني آدم ده بيحاول ينتقم مني في اختي وأنا عشان خاطر ياسمين عديت أفعاله مره واتنين وتلاته، بس هو اللي مصر يناطحني فبراحته بقى هو اللي جابه لنفسه.

تجهم وجه محمود من تهديده الصريح وسأله متوجسا:

-ناويله على ايه؟ هتحبسه من تاني شهور وتعذبه وتعمله كيس ملاكمه؟ 

نظرات فارس النارية والصامته جعلت الأول يضيف:

-شادي حكالنا على كل حاجه، ومش قادر أتصور انك بالوحشيه دي! عمل ايه شادي لكل ده؟ واحد اتجوز على سنة الله وأنت اللي رفضته وأجبرته ع الطلاق....

صاح فارس بنفس وقت دخول ياسمين حاملة قهوتها:

-واااضح جدا انه محكاش كل حاجه زي ما بتقول، وأنا مش هضيع وقتي بالرغي في القديم، إحنا فـ دلوقتي والوضع اللي اختي فيه والفضايح اللي ابنكم عايز يعملها

صر على أسنانه وأخرج زفرة غاضبة وأكمل حديثه مركزا بصره على تلك الواقفة شاردة به وبعصبيته:

-لو ليكم كلام عليه خليه يتنازل على القضيه وطبعا يلغي انذار الطاعه اللي عامله، والاهم من ده يطلقها شرعي لأنها مش ليه وعمرها ما هتكون ليه.

تحركت ياسمين بخطوات ثقيلة تاركه القهوة أمامهم وخرجت مغلقة الباب خلفها فسحبتها نرمين فورا تسألها باهتمام:

-بيتخانقوا ولا ايه؟

نفت برأسها فعادت تسألها من جديد:

-متعرفيش فارس ناوي على ايه؟ أصل سكوته ده مش طبيعي ويخوف بصراحه.

تحركت معها لخارج الفيلا حيث الحديقة وجلست بأحد المقاعد الأرضية المبطنة وجلست الأخرى بجوارها وهي تكمل تساؤلاتها الفضولية:

-تفتكري مازن لما يعرف ان جوازه من جنى باطل هيعمل ايه؟ هو عرف ولا فارس لسه مقالش لحد؟ هو انتي ساكته ليه كده ومش بتردي عليا؟

ردت الأخرى بعصبية:

-وأنتي مالك بقيتي فضوليه ليه كده؟ موضوع ميخصناش في حاجه، شادي ومازن وجنى وحتى فارس، كل واحد فيهم ضلع في الموضوع ويتصرف مع التاني براحته واللي له حق هياخده لكن احنا ملناش دعوة.

ابتسمت نرمين بزواية فمها وهي تعلق عليها:

-ده فارس روضك صح يا ياسمين، بجد والله برافو عليه.

هنا بالتحديد احتدت ملامح الأخيرة ورمقتها بضيق وما قطع تواصلهما البصري رنين هاتف نرمين لتجد أسم رب عملها على شاشتها فردت على الفور:

-اتفضل يا يزن بيه

ابتسم المعنى وهو يقول ساخرا:

-مصرة برده على بيه دي، انتي شيفاني لابس طربوش قدامك ولا ايه.

اخفقت في كتم ضحكتها وخرجت عالية رغما عنها فبادلها الضحك وهو يعقب:

-لااا، ده احنا بالنا انهارده رايق أوي، يارب كده كل يوم.

انتبهت لحالتها فتجهم وجهها من جديد وهي تنظر بساعتها وتسأله:

-هو حضرتك اتحركت من البيت ولا لسه؟

نفى مجيبا:

-لأ لسه متحركتش بس كنت عايز أئكد عليكي إن في ميتنج الساعه 9، عمرك شوفتي مدير هو اللي يفكر الAssisstant بتاعته بمواعيد الاجتماعات؟

ضحك فردت وهي تشعر بالخجل لتأخرها عن العمل بالآونة الأخيرة:

-أنا آسفه فعلا عشان اتأخرت كذا مره غصب عني بس...

قاطعها وهو يخرج مفاتيح سيارته من جيبه وفتحها دالفا خلف المقود:

-مفيش داعي للأسف يا نرمين، أنا عارف الظروف اللي أنتي فيها.

استمعت لصوت محرك سيارته فجاءتها تلك الفكرة لتتخلص من المشاحنة مع توأم روحها:

-أنا عند ياسمين وفارس، يعني قريبه من حضرتك جدا فلو ممكن تعدي عليا ونروح الشركه مع بعض عشان متأخرش عن الاجتماع؟

علت ضربات قلبه لمجرد تخيلها تجلس بجواره ويستمتع بالتحدث معها لفترة طويلة حتى يصلا لمقر الشركة فوافق دون تفكير وبلهفة واضحة:

-بس كده، هوااا وأكون عندك، لأ ده خلاص تقريبا وصلت.

ضحكت من طريقته السلسة وبالرغم من ملامح وجهه الجادة إلا أنها وجدته شخص لين القلب على العكس من ابن عمه الجالس برفقة والدها وجدها، ربما ذكرها خفة ظله بمازن ولكن هيهات فمازن أخف ظلا و...

صمت عقلها عن التفكير بعد أن وجدت نفسها تذكره دون وعي منها للمرة التي لم تحصها فبوخت عقلها وتفكيرها ولم تنتبه لأغلاقه المكالمة معها ولا لنظرات ياسمين المتضايقة وعبراتها المكتومة بداخل مقلتيها فتكلمت وهي تسحب حقيبتها النسائية:

-معلش يا سو ابقى بلغي بابا اني روحت الشركه، توصيله بلاش بدل البهدله في المواصلات.

❈-❈-❈

استيقظ عندما فُتح عليه باب الغرفة ودخل الفريق الطبي يجرونها على السرير النقال فانتفض من مضجعه متفاجئا وهو يسأل بقلق:

-في ايه؟ مالها؟

أجابه أحد الأطباء وهو يساعد فريق التمريض بحملها ووضعها على سريرها:

-اغمى عليها وعلمنا لها الإسعافات اللازمة.

تجهم وجهه وهو يسأل بحيرة:

-ايه اللي حصل لها فهمني؟ دي كانت نايمه هنا!

حرك الطبيب كتفيه وأجابه مستنبطا:

-هي كانت فـ الحضانه بتشوف البيبي وغالبا أغمى عليها لما عرفت حالته.

ارتبك وابتلع ريقه واقترب منها ناظرا لوجهها المتعب وسأله:

-هي لسه مغمى عليها؟ 

نفى وهو يوضح:

-لأ، بس واخده مهدأ لأنها لما فاقت حالتها كانت وحشه جدا، وياريت لما تفوق تستدعيني عشان مظنش هتعرف تتعامل مع حالتها لوحدك.

وافقه وجلس بجوارها وهو يتنهد لا يعلم ما عليه فعله بعد كل ما مر به، ولم يمر الكثير من الوقت حتى بدأت تتحرك بتململ فاقترب منها وجلس بجوارها وبدأ بتمرير راحته على رأسها بحنان بالغ وهي تخرج أصوات همهمات ضعيفة حتى استفاقت تماما وفتحت عينيها ونظرت له بعيون شاردة وكأن الحياة قد غادرتها وبدأت تذرف العبرات دون تحدث فقبلها من وجنتها وهو يحاول فتح حديث معها:

-حبيبتي، الحمد لله أنك كويسه.

بكت وانهمرت عبراتها على وجنتيها ولم تتوقف حتى خرجت شهقاتها العالية وهو يحاول احتضناها وتهدئة روعها هامسا:

-كل حاجه هتتحل طول ما احنا مع بعض، متخافيش انا معاكي.

ابتعدت عن حضنه وسألته بصوتها المبحوح من كثرة البكاء:

-بجد يا مازن ابننا داون؟ ليه؟ 

مسح على ظهرها وهو يبتسم باقتضاب:

-امر ربنا يا روحي، يمكن يكون ده تذكرتنا للجنه زي ما ماما قالت.

اسندت رأسها على كتفه وظلت تبكي وهي تتكلم؛ فخرج صوتها حزين وكلماتها متقطعة:

-لو ده عقاب من ربنا عشان اللي عملته فأنا...

قاطعها فورا وهو يؤكد عليها:

-أنتي معملتيش حاجه غلط يا جوجو، أنا اللي حياتي كلها كانت غلط فـ غلط ولو ده فعلا عقاب من ربنا فهو ليا أنا مش ليكي، بس أنا مش شايفه عقاب بالعكس أنا شايفه هدية من ربنا عشان بيحبنا وعايزنا نكفر على ذنوبنا بأننا نرضى بقضائه.

نهجت بأنفاسها واعتدلت بجلستها تسأله:

-مين عرف؟ 

رد غير مكترث بمغذى سؤالها:

-مفيش غير فارس وبابا وماما.

ظلت تنتحب وهي تخبره:

-هنتصرف ازاي يا مازن؟ بقى أنا اتحملت كل التعب والبهدلة دي في الحمل عشان...

صمتت عندما وجدت نظراته المندهشة من حديثها وإحمرار حدقتيه وهو يسألها:

-ايه الكلام ده؟ البيبي ده ابني وابنك، مهما كان عنده فهو ابننا ومش هنعترض على وجوده في حياتنا.

انهارت وصرخت متألمة وهي توضح سبب حنقها:

-أنا معملتش حاجه غلط عشان يحصل معايا كل ده.

لم يعقب على حديثها بل انشغل باله بمعضلته وتأثيرها على حياته بعد أن تعلم أنها ليست زوجته من الأساس، بل كل ما عاشاه سويا يندرج تحت مسمى الزواج الباطل، انتبه لسؤالها الحزين:

-أنت هتسيبني مش كده؟ هتطلقني وتتجوز واحده تانيه تسعدك اكتر مني صح؟

لمعت عينه متفاجئا من حديثها وحاول الرد عليها ولكنها أدهشته بسؤالها الذي لم يبد عفويا أبدا:

-هترجع لنرمين تاني مش كده؟ ما هي اتطلقت وعيزاك انا شايفه ده في عنيها و...

أصمتها بقبلته الدافئة التي تجاوبت معها على الفور وانتهت بنفس سرعة تجاوبها معه لتذكره أنها لم تعد زوجته؛ فحاول إخفاء ملامح الغضب والحزن ووقف مبتعدا وتمتم بصوت مسموع لها:

-ده ردي على كلامك، نرمين علاقتي الوحيدة بيها انها أخت مرات اخويا، وعمري ما هفكر فيها غير كده لأنها...

قاطعته ساخرة بألم وقهر:

-ما أنا كنت اختك اللي مستحيل تفكر فيها برده، كنت أختك اللي من رابع المستحيلات تتجوزها وشوف احنا فين دلوقتي؟

هو الآن ليس بحاجة لهذا الحديث وتلك المشاجرة فحقا قد قارب عقله على الإنفجار من كثرة التفكير مما قد يحدث لهما بعد أن تعلم بحقيقة زواجهما، هو بالطبع استمع لتفسير المحامي أن الأمر قد ينتهي بحكم خلع لن يأخذ وقتا بالمحكمة، ولكن هذا لا ينفي أنهما الآن وبهذا الوقت تحديدا غير متزوجين بل وأنها على ذمة رجل آخر هو من ألد أعدائه.

تذكر حديث المحامي عندما سأله:

-جوازها من غير وكيلها الشرعي اللي هو أبوها أو أخوها ده ميبطلش الزواج؟

رد المحامي مؤكدا:

-الشريعة في الزواج هو القبول والإشهار وفي بعض المذاهب بتقبل للبنت كمان انها تجوز نفسها من غير وكيل لكن ضوابط الوكيل دي احكام مذهبية والقانون مش بيعترف بيها القانون المصري للأسف فهي حاليا شرعا وقانونا زوجته .

عاد من شروده على صوت والدته التي دلفت ولم يشعر بها وجلست بجوارها تهدأها:

-يا حبيبتي ده انتي خلفتي ملاك وكلنا فرحانين بيه، ده هيفضل طول عمره صادق وطيب ومش منافق، ومتخافيش النسبه عنده مش كبيره يعني ممكن جدا متحسيش بيها.

هي تعلم بالطبع أنها تحاول التخفيف عنها بكلماتها ولكنها لم تعبأ بكلامها وتحدثت بلسان لاذع:

-لو كنتي خلفتي ابن عنده داون مكنتيش قولتيلي كده.

تعجبت دينا من طريقتها الفجة وردت عليها بحدة:

-يمكن البيبي ده مش ابني، بس هو حفيدي اللي اغلى عندي من ابني نفسه يا جنى.

أدارات جنى وجهها عنها وهي تتمتم:

-كفايه عليكم فارس الصغير اللي هياخد كل الحب.

لم تصدق دينا أن تلك الفتاة الرقيقة التي لطالما أعدتها بمنزلة ابنتها قد تتحدث معها بتلك الطريقة؛ فنظرت لأبنها الذي لم يتخذ أي رد فعل بل رمش لها بجفنيه يطلب منها تمرير الأمر وقبول حديثها فقوست فمها ونهضت:

-طيب اسيبكم عشان عندي شغل كتير انهارده.

تركتهما وهي تشعر بالضيق من أسلوب تلك الصغيرة التي امتلكت قلب بكريها، ولكنها التمست لها العذر لما تمر به ليس فقط من حالة تعب ووهن وألم بدني ونفسي ولكن لما يعرف باكتئاب ما بعد الولادة والذي تمر به الكثير من النساء ولا يستطع أزواجهن تمييز الأمر وقد يتسبب بأثر نفسي سيئ جدا لبعضهن إن لم يتم التعامل معهن بحرص شديد.

جلس على المقعد صامتا ولكن بكائها المستمر جلعه يهتف متذمرا:

-خلاص بقى يا جنى مش كده انا اعصابي مش متحمله.

تفاجئت من حدته وما زادها إلا بكاءا على بكاءها ونحيبا يقطع نياط القلب وهي تتحدث بتقطع من بين لهاثها الباكي:

-ايوه هو ده اللي أنا مستنياه منك، عارفه خلاص اللي كان رابطك بيا هو الحمل والولد اللي جاي ومصدقت لقيت فرصتك، منا خلفت طفل مريض و...

قاطعها متفاجئا من تفسيرها وحديثها الذي أحزنه كثيرا:

-أنا مش مصدق اني بسمع منك الكلام ده، يا جنى عشان خاطري استهدي بالله وربنا إن شاء الله هيقف معانا.

تذمرت ورفضت حديثه:

-انت ليه محسسني إن ابننا تعبان وبالعلاج هيخف! ده مرض ملوش علاج وهيعيش بيه طول عمره، انا زعلانه خالص يا مازن.

اقترب منها وجلس بجوارها محتضنا إياها وظل يهدأها مؤكدا:

-ده اختبار من ربنا واحنا إن شاء الله هننجح فيه، استهدي بالله انتي وإن شاء الله هنقدر نعدي الأزمة دي مع بعض.

❈-❈-❈

لم يصدق أنها أمامه تبتسم له وفور أن اقتربت تصافحه فشرد بطلتها الساحرة ومد ساعده:

-ازيك يا نرمين؟

ردت ببسمة رقيقة:

-الحمد لله

فتح لها باب السيارة بلباقة والتف يركبب خلف المقود فتغللت رائحة عطرها بداخله فهمس بصوت استمعت له جيدا:

-براحه عليا

لم تفهم سبب قوله فسألته:

-أنا عملت حاجه؟

نفى على الفور وحاول تغيير مجرى حديثه وهو يفسر كذبا:

-اصلك قفلتي الباب جامد شويه

ضحكت بعفوية وهي تسأله:

-لأ بجد هو حضرتك منهم؟

عقد حاجبيه مستفسرا بصمت فأوضحت:

-الناس اللي عربياتهم أهم من أي حاجه وأي حد

بادلها الضحك واضطر لمجاراة كذبته وأكد:

-شكلك كده هتاخدي عني فكره مش حلوه، أنا مش كده اوي يعني

نظرت للطريق أمامها وردت بعد ان رأت نظراته المرتكزة عليها جعلتها تختنق بلعابها وتحاول الهروب من تحديقه بها:

-احنا كده هنتأخر

أدار محرك السيارة وتحرك بعد ان صدق على حديثها ولم يلتفت لينظر لها مجددا عندما وجدها أخرجت هاتفها تتصفحه بتركيز

❈-❈-❈

أغلقت الباب وراء عمها وجدها بعد أن ودعتهما وأخبرتهما بمغادرة نرمين للذهاب للعمل، التفتت تنظر بترقب لزوجها الذي ظل مبتسما بوجهها واتسعت بسمته عندما وجد الفضول يقفز من حدقتيها وهي تسأله:

-أتكلمتوا في ايه؟

أجابها وهو يداعب ذقنها:

-في حوار شادي طبعا.

ابتلعت بوجل وسألته:

-طيب اتفقتوا على ايه؟

أقترب منها فعادت بجسدها للخلف حتى استندت على الحائط خلفها؛ فحاصرها بذراعيه وانحنى مقتربا من وجهها وتكلم بصوت هادئ:

-اتفقت اني هستنى يتكلموا معاه، أنا بلغتهم اني مسافر 3 أيام وعايز لما ارجع ألاقيهم خلصوا الموضوع.

أومأت ببسمة مقتضبة وسألت:

-وقالولك ايه؟

قبلها من وجنتها همس بأذنها:

-ولا حاجه يا سلطانه، هيحاولوا، بس انا عارف اللي فيها، شادي لو كان بيكبر لحد مكانش عمل كده.

دمعت عينيها فمسحها لها بإبهاميه وهو يكوب وجهها براحتيه وابتسم لها يطمئنها:

-لو اهلك معرفوش يتصرفوا معاه فأنا هتصرف معاه بعقل متخافيش انا هديت خلاص ومش هيكون اكتر من وقت ما نشر فيديوهاتوا معاها وصورك معاه.

انحنى ليقبها ولكنه وجد رفضها واستمع لصوت ارتباك أنفاسها وشرارات جسدها الرافضة لقربه فابتعد وهو متجهم وتكلم بصوت حزين:

-للدرجة دي مش قابله لمستي؟

أطرقت رأسها وهي تتحاشى النظر له حتى لا يلمح شكلها الرافض والحزين:

-معلش يا فارس اديني وقتي.

تنهد وزفر بيأس وأومأ وبدأ بالصعود وهو يخبرها:

-هطلع اجيب الشنطه عشان لسه هعدي على جنى.

صعدت معه ودلفت جناحهما ومنها للمرحاض وظلت تبحث عن الخاتم الماسي الذي ألقته بالأرضية ليلة أمس ولكنها لم تجده فخرجت تتحدث بحدة:

-لااااا، كده في حاجه مش طبيعيه.

انتبه هو لحديثها فالتفت يسألها:

-في ايه؟

أجابته بتوتر:

-الخاتم الألماظ بتاعي كان جنب الدبله، مشوفتهوش؟

نفى فقوست فمها وهي توضح:

-كده الموضوع مش طبيعي، أنا قلعاهم مع بعض امبارح و...

قاطعها هو ساخرا:

-أنا لقيت الدبله مرميه على الأرض.

أومأت وأكدت:

-والخاتم كان معاها يبقى راح فين بقى، طيب الحلق وقولت يمكن وقع هنا ولا هنا وعشان صغير مش باين، انما الخاتم راح فين؟

دلف المرحاض وتبعته وبدأ بالبحث هنا وهناك وعندما لم يجده رفع حاجبه الأيسر مندهشا، ولكنه وقف أمامها واحتضنها قائلا:

-فداكي يا سلطانه هجيب...

قاطعته رافضة لحديثه ولتساهله بهذا الشيئ:

-لأ يا فارس مش عايزه غيره، أنا عايزه الخاتم بتاعي ده خاتم جوازنا وغير كده أنت ليه مستهون إن في حد معانا فـ البيت بيمد ايده على حاجتنا؟

تفاجئ من حديثها هو يعقب:

-أنا متأكد انه ضايع مش مسروق، لأن الخدم دول معايا بقالهم 6 سنين ومفيش حاجه لا اتسرقت ولا اتكسرت حتى من يوم ما اشتغلوا.

صرت على أسنانها وهي توضح الأمر من وجهة نظرها:

-أنت لو اتسرقت مش هتعرف أصلا، تقدر تقولي عندك كام زرار ودبوس بدله، ولا كام ساعه؟

جلس على طرف الفراش يخلع جوربه ليرتدي غيره نظيفا وأكد:

-محدش بيدخل الجناح بتاعنا غير آلاء وسنيه والأتنين أنا متأكد منهم 100%.

جلست بجواره متذمرة:

-مش عارفه بقى.

ابتسم ورمقها بنظرات عاشقة وتكلم مستطردا:

-البيت فيه 5 بس اللي شغالين فمش صعب خالص اننا نقدر نعرف اذا في منهم حد بيسرق ولا لأ، البنتين اللي في المطبخ وسنيه وآلاء والناني، وبما إن بتوع المطبخ مش بيطلعوا هنا خالص يبقى الشك منحصر في الباقيين، بس أنا هاخد الكل بذنب واحد ولحد ما نعرف مين اللي عمل كده ياريت تاخدي بالك من حاجتك.

حركت كتفيها باعتراض وهي تخبره:

-طيب ما تبص في الكاميرات.

ضحك وداعب وجهها بأنامله وهو يقول:

-وهو انتي وافقتي نركب كاميرات هنا؟ ولو شوفت الكاميرات اللي في الممر بره هيحط شك مش يقين لأننا عارفين انهم بيدخلوا الجناح يا روحي.

أوقفها أمامه وتحرك يسحبها وراءه وهو يقول:

-تعالي طيب نشوف الموضوع ده.

نزل الدرج واستدعى الجميع بمن فيهم مربية صغيريه وجلس على الأريكة واضعا قدم فوق الأخرى ونظر لهن بنظرات جامدة دبت الرعب فيهن وتكلم بصوته الغليظ:

-الواضح كده إن المعاملة الطيبة بتخلي الناس تتخطى الحدود ونسيتوا مين هو فارس الفهد.

نظرات الجميع المرتكزة عليه بجهل لما يتحدث عنه جعلته يكمل موضحا:

-الخاتم الألماظ بتاع ياسمين اتاخد امبارح من الحمام وقبله فردة الحلق ف...

قاطعته سنيه بتوتر:

-والله يا باشا أنا مطلعتش انظف الجناح من امبارح أصلا لأن تعبنا على ما ظبطنا المكتب ورجعنا بالليل نجيب الصنايعيه تاخد مقاسات الازاز اللي اتكسر فمكنش فيه وقت نطلع الجناح بتاع سيادتك و...

أشار لها بالصمت فابتلعت باقي حديثها بجوفها وقوس حاجبيه؛ فخرج شكله مخيف بعض الشيئ ووقف أمامهم وتكلم بحدة:

-انا أقدر أراجع الكاميرات وهعرف مين اللي عمل كده، بس انا مش عايز اعرف عشان وقتها مش هكتفي بقطع عيشه، فاللي اخدت منكم الحلق والخاتم تحطه في الجناح وزي ما عرفت تتسحب وتدخل تاخده فتتسحب وتحطه مكانه.

عاد للجلوس بجوار ياسمين واضعا قدمه فوق الأخرى يهزها بعنجهية:

-أنا مسافر 3 ايام، الحاجه ترجع قبل ما ارجع، أظن كلامي مفهوم ومش محتاج أقولكم ايه اللي هيحصل لو الحاجه دي مرجعتش، وحتى لو اللي واخدها منكم عامل حذره كويس ومش ظاهر في الكاميرات وده شيئ مستبعد، فساعتها انتو الخمسه هتبقوا بره من غير لا رواتب ولا مستحقات ولا حتى مكافأة نهاية خدمة.

وقف من جديد منتفضا وهو يسألهن:

-اظن كلامي واضح؟

أومأ له الجميع فأشار لسنيه بعينه:

-اطلعي هاتيلي الشنطه من فوق.

هم بالمغادرة بعد أن أخبر حارس زوجته بسفرته وهو يقول:

-بلغ زين انه في اجازه مفتوحه لحد ما ابعت استدعيه، وأنت تخليك هنا مع الهانم وتجيب لها موبايل جديد بنفس رقمها.

استمع لرفضها وهي ترجوه:

-انا عايزه موبايلي يا فارس، كان عليه صورنا أنا والولاد و...

قاطعها مبتسما:

-هعمله تتبع، رجع كان بها مرجعش يبقى معاكي موبايل اعرف اطمن عليكي بيه، وغير كده الصور اكيد على ذاكرة جوجل.

أومأت فقبلها من وجنتها وهمس بأذنها مما جعل حارسها يشعر بالحرج وأستدار بجسده لهما:

-هتوحشيني أوي.

التفت يقبل صغيره الممسك بيد مربيته وحمل جاسمين منها وظل يقبل ويستنشق رائحتها الطفولية وهو يودعهم:

-هتوحشوني أوي مع انهم 3 ايام بس.

أبتسمت له ياسمين فمسك راحتها بعد أن ترك الصغيرين وهتف:

-أخيرا ضحكتي، كنت خايف امشي وانتي مكشره في وشي كده.

لم تستطع إخفاء نظراتها الوالهة والعاشقة فهو دائما ينجح بتشتيتها وجعلها تتغاضى عن أفعاله، سحبها من خصرها وقبلها قبلة عميقة وابتعد يهمس لها:

-مش هرجع إلا لما تقوليلي انك سامحتيني حتى لو قعدت شهر، اتفقنا؟

❈-❈-❈

بغضون الثلاثة أيام التي مكثها فارس بالمشفى لم تهدأ الأوضاع كثيرا بعد أن احتدت الأمور بينه وبين مازن الذي علم بتركه للأمر بيد هذا الكهل الذي وعده بالتصرف وإقناع شادي بالتنازل عن القضية، وبالرغم من تقصي المحامي الخاص له وأكتشف الكثير من الأمور الخفية والقضايا التي تنتظر أحكام لم يعلم عنها شيئا، إلا أنه حافظ على عهده مع جد زوجته وانتظر تصرفه مما زاد من حنق مازن كثيرا وتشاجر هاتفيا مع فارس بشكل خرج تماما عن السيطرة.

وبنفس التوقيت الذي يعاني فيه مازن من مرض رضيعه وتفاقم حالة زوجته النفسية والجسدية أيضا، يكتشف تلك القضية المرفوعة بحقه من عدوه اللدود وتهاون فارس بها فأصبح مطلوب منه ليس فقط الصمت وارتضاء الأمر الواقع والتعامل مع زوجته المحرمة عليه دون أن يشعرها بشيئ؛ فطلب مساعدة والدته وبدلا من أن يخرج من المشفى لبيته ذهب لمنزل والديه بحجة مساعدتها حتى شفاؤها هي وصغيرها.

طرقت دينا على باب مكتب والده فأذن لها:

-ادخل.

دلفت فوجدته متجهم الوجه حزين، ويبدو أنه كان يبكي بسبب إحمرار حدقيته بشكل أثار فزع والدته؛ فهرعت ناحيته تربت على كتفه:

-يا حبيبي كل حاجه ولها حل، ربنا يقويك يا مازن يا حبيبي.

لم يعقب عليها فأضافت:

-جنى مش مرتاحه هنا وكل شويه تقولي عايزه أروح، حتى بيري مش بتسيبها ومع ذلك مش ساكته، ما تطلع تهديها شويه ونام معاها في الاوضة انهارده احسن بتقولي انك ناوي تطلقها عشان كده بتنام في اوضه تانيه.

رفع وجهه ينظر لها بشرود فمسحت على وجهه وهي توضح:

-هرموناتها مخلياها مفكره انك عايز تسيبها، متاخدش على كلامها بس اطلع نام في حضن مراتك وابنك.

ترددت كلمات والدته بداخله، زوجته! هي ليست كذلك، فكيف عليه إخبارها بهذا الأمر وهي بتلك الحالة بالأساس، هي تظن انه سيتخلى عنها لمجرد إنجابها لطفل مريض فما بال حالها إن علمت أنهما ليسا بزوجين من الأساس.

شرد أيضا بقضيته التي علمها مؤخرا وينتظر إصدار الحكم بها بالتواطئ مع فارس وإجبار المدعي بتطليق زوجته رغما عنه بل والزواج منها وهو يعلم ببطلان طلاقها.

انتبه لوالدته عندما هتفت:

-مازن، انت سرحت في ايه يا بني؟ 

حرك رأسه دون تعقيب فربتت عليه تكرر حديثها:

-طيب يلا يا حبيبي اطلع خد مراتك وابنك في حضنك وحسسها بوجودك ودعمك ليها، يلا يا مازن.

أومأ وهو يستأذنها:

-طيب يا ماما بس سبيني شويه وهطلع.

وافقته وخرجت تاركة إياه بمفرده فأمسك هاتفه واتصل برفيق دربه يحدثه بحدة دون انتظار رد أو سلام:

-بما انك شيلت ايدك من موضوعي أنا واختك فعايز أخد موافقتك اني انام جنبها وهي مش مراتي.

صر على أسنانه وهو يكمل سخريته اللاذعة:

-هنام وأخدها في حضني بس حضن اخوي عشان نفسيتها تعبانه، ايه رأيك؟

اتكئ فارس على سريره الموضوع بجناحه الطبي ورد بهدوء:

-الحدود بينك وبينها قبل جوازكم وقبل اي مشاعر بينكم كانت عاديه يا مازن، كنت بتحضنها وتبوسها و...

قاطعه صارخا بوجل:

-كانت أختي، كنت بحضنها وأبوسها زيها زي بيري؛ فتفتكر لو حضنتها وبوستها دلوقتي والامور اتطورت بينا ايه اللي ممكن يحصل؟

ابتسم فارس بسمة جانبية وهو يخبره:

-متخافش، كده كده مينفعش لأنها فـ النفاس، أهدى شويه ومتخليهوش ينجح في اللي عايز يعمله.

اخرج ضحكة استهزاء وهو يسأله:

-وايه بقى اللي عايز يعمله؟

أجابه فارس بضيق:

-اللي احنا فيه دلوقتي، انا وأنت حديد على جمر نار، انا وياسمين على مشارف الطلاق، وانت وجنى حدث ولا حرج.

صاح به مازن على غير عادته:

-مش أنت سكتله عشان عيون السلطانه، عايزه يسكت؟ ده مش بعيد يعملنا لعبته بعد كده، ما هو بيدخلك من نقطة ضعفك وعارف أنك هتفوت وتعدي عشان خاطر عيونها لأنه لو خاف منك زمان أو لو يعرف انت تقدر تعمل فيه ايه كان زمانه عمالها على نفسه من رعبه منك، بس هو قاعد حاطط رجل على رجل ومكمن عـ الآخر أنك مش هتلمسه عشان خاطرها.

سحب فارس شهيقا حادا وأخرجه ببطيء وهو يتعجب من حالة الهدوء التي يشعر بها وتلك العقاقير التي يتناولها وتجعل ذهنه ليس فقط صافيا بل تجعله لا يكترث للعالم وإن احترق عن بكرة أبيه.

رد بعد أن فكر قليلا بحل لتلك الأزمة الفريدة من نوعها والخلاف الذي ينشأ بينه وبين رفيق دربه ولأول مرة:

-بص يا مازن، جلستك لسه قدامها 20 يوم وأنا راجع كمان يومين و...

قاطعه متسائلا:

-أنت مش قولت 3 أيام؟ بقالك فوق الـ 5 ايام ولسه مرجعتش ثم انت فين أصلا؟ سفرية ايه دي اللي معرفش عنها حاجه ولا لها علاقة بالشغل؟

وجد نفسه يخبره بهدوء وعفوية:

-انا في المستشفى مش مسافر ولا حاجه.

انتفض مازن على الفور واقفا بقلق وهو يسأله بلهفة:

-مالك؟ فيك ايه؟

رد بنفس الهدوء الذي تعجب له الآخر:

-متقلقش انا كويس.

سأله مازن وهو يسحب مفاتيحه من على المكتب متوجها للخارج:

-أنت في مستشفى ايه طيب؟

وقبل ان يجيبه اصطدم هو ببيري التي استمعت لنهاية حديثه فسألته بفضول:

-مين اللي في المستشفى؟

لم يجبها واستمع لجواب فارس:

-بقولك أنا كويس، خليك مع جنى ومع ابنك، انتو سمتوه ايه صحيح؟

أجابه وهو يعود أدراجه بعد أن تجاهل اخته الصغرى:

-مدحت.

أخرج فارس ضحكة سخرية وهز رأسه عدة مرات فسأله مازن وهو يتقد شررا:

-لو جد ياسمين معملش حاجه هتعمل انت مش كده؟

صمت ولم يعقب عليه فكرر مازن سؤاله بحدة أكبر واستمع لإجابته الهادئة:

-كله هيتحل إن شاء الله، روح ارتاح وخد ابنك في حضنك وبوسهولي لحد ما أرجع.

أغلق معه وصعد دالفا غرفته القديمة والتي تمكث بها جنى وفور أن وقعت عينيها عليه انفطرت من البكاء فهرع ناحيتها وهو يجاهد نفسه:

-وبعدين معاكي بس، هتفضلي كده لحد امتى؟

سألته وهي تنتحب:

-انت سايبني ليه كده؟

أغلق عينيه واحتضنها وهو يؤكد لها:

-مش سايبك والله بس فارس مسافر والشغل على راسي.

لم تبتاع حديثه وهدرت بعصبية:

-انت بتروح الشركة أصلا؟ ما انت قاعد تحت طول الوقت.

نظر لها بتركيز ورفع حاجبه وهو يوضح لها:

-بشتغل من البيت، بس يا ترى بعمل كده ليه؟ مش عشان أفضل معاكي أكبر وقت ممكن.

ارتعشت شفتيها وهي تكتم بكائها وارتمت بحضنه تسأله:

-مازن، انت مش هتسيبني مش كده؟

نفى محركا رأسه:

-عمري ما هسيبك يا جوجو، أنتي حياتي وعمري كله.

لم تتركه ينهي تغزله بها فارتفعت بجسدها وعانقته بقوة وبدأت بتقبيله قبلات متفرقة على وجهه وعنقه وزاد الأمر عليه هو التصاق ثغرها الكرزي بثغره الذي يتوق لها شوقا وقبلته قبلة حارة أهلكته وأثارته فلم يستطع التوقف أو إبعادها، ولم يوقفه سوى تأوهها بتألم من جرح بطنها عندما اعتلاها دون وعي منه فانتفض مبتعدا، ولكنها ضحكت وهي تخبره:

-متبعدش بس حاول متسندش على بطني.

رفض محركا رأسه وهو يبتلع ريقه بتوتر:

-لأ بلاش عشان متتعبيش.

ردت بدلال:

-مش تعبانه، هو انا موحشتكش؟

ارتبك وهو يلعن نفسه ووضعه وحياته بل ويلعن ذلك الحقير الذي وضعه بهذا الوضع المخذي ورد وهو يتهرب مازحا معها:

-عرفتي ليه بنام بعيد؟ انا بنهار خلاص يا حبيبتي، يلا خفي بسرعة بقى عشان وحشتيني ووحشني حركاتك وتكاتك وازيائك.

❈-❈-❈

جلست بجوارها على الفراش تتحدث بحيرة:

-تفتكري لما فارس يرجع من السفر هيعمل ايه؟

لم تجد إجابة حقا بعد فشل جدها وعمها باقناعه أو إجباره على التخلي عن إصراره بزعزعة العائلة بتلك المشاحنات التي لن تؤدي سوى لأزمة حقيقة ستقع بين عائلة الفهد وعائلة غزال.

عادت نرمين تتكلم وهي تفكر بحل للأزمة:

-المشكلة إن الموضوع عمال يكبر ومش هيفضل مستخبي كتير، أنتي قولتيلي أن محدش في عيلة فارس يعرف حاجه؟

أومأت بصمت فصاحت بها الأولى:

-مش معقول بقيتي شبهه بالظبط يخربيت كده.

رمقتها بنظرة مندهشة من حدتها وهي تضيف:

-بجد بقيتي نسخة من فارس، ما تردي عليا يا بنتي عشان لما جوزك يرجع نشوف حل.

دمعت عينيها فحزنت نرمين لأجلها واحتضنتها وهي تسألها:

-انتي لسه زعلانه مني ولا ايه؟ مش اعتذرتلك واتصالحنا.

نفت وهي تزداد بكاءا:

-مش زعلانه منك يا نرمو، بس مش عارفه آخرة الموضوع ده ايه؟ شادي مش هيسكت إلا اما نتطلق أنا وفارس.

رفعت شفتها العليا بشكل ممتعض وهي ترفض حديثها:

-تبقي عبيطه لو خلتيه ينجح في هدفه، وبعدين ده لأول مره ألاقي فارس هادي كده، ده انا كنت متخيله انه هيقتل شادي و...

قطعت حديثها على رنين هاتف ياسمين فأجابت الأخيرة على اتصاله المرئي وهو يحدثها باشتياق:

-وحشتيني.

نظرت إلى جوارها وردت وهي تبتلع ريقها:

-انا مش لوحدي، نرمين هنا معايا.

وضعت نرمين حجاب رأسها قبل أن تقتحم الشاشة لترحب به مازحة:

-ازيك يا أبو نسب.

ضحك فارس عاليا من خفة ظلها الحديثة عليها وعقب:

-حلو اوي لما العيلة يبقى فيها اتنين دمهم خفيف.

بالطبع هي تعلم عن من يتحدث فحاولت الهروب من التعمق بالأمر وهتفت:

طيب أسيبكم تتكلموا وهروح اقعد مع الولاد شويه.

خرجت فهتف فارس على الفور:

-عامله ايه؟

أجابته بفتور:

-الحمد لله.

تنهد وهو يسألها:

-مش ناويه تحني عليا وتصالحيني، بقالي اكتر من أسبوع هنا ووحشتيني انتي والولاد.

ردت متحاشية النظر له:

-محدش قالك مترجعش.

عقب عليها مؤكدا:

-انا قولتلك مش هرجع إلا لما تسامحيني، وواضح إن لسه بدري على الخطوة دي.

ظلت تبتلع ريقها فحرك رأسه مستسلما ولكنه ترجاها:

-طيب ممكن آجي أشوف الولاد وأمشي تاني.

رددت نفس حديثها:

-قولتلك محدش قالك مترجعش بيتك، ده بيتك يا فارس و..

قاطعها وهو يتناول ورقة أمامه يظهرها لها أمام الشاشة:

-الحقيقة هو مش بيتي، هو بيتك انتي.

لم تستطع رؤية المكتوب بداخل الورقة غير العنوان ذو الخط السميك (عقد بيع ابتدائي)؛ فاقتربت اكثر من شاشة الهاتف لتقرأ المكتوب فتفاجأت أنه قام بكتابة الفيلا بعقد بيع وشراء وليس فقط تنازل فلمعت عينيها وهو يؤكد:

-حبيت يكون عقد قانوني عشان لو حصلي حاجه محدش يقدر يشاركك فيه حتى ولادي.

أغلقت عينيها وتكلمت بصوت حزين وهي تبكي رغما عنها:

-يا فارس الفلوس مش كل حاجه، أرجوك كفايه تصالحني بهدايا غاليه لاني بحس اني رخيصه اوي لما بتعمل كده.

تفاجئ من تفسيرها للأمر ورد يدافع عن نفسه:

-بتحسي أنك رخيصه؟! انا مش مصدق نفسي بجد، انا بحاول اوريكي قيمتك عندي واللي ممكن تخليني اتنازل عن العالم كله عشانك وأنتي شايفه ان ده رُخص! أنا لأول مره ازعل انا ومازن بالشكل ده عشان مخلفش وعدي معاكي وشايفه نفسك رخيصه؟!

ازدادت حدة تنفسه وهو يضيف مطنبا:

-قاعد هنا بقالي اسبوع عشان اراضيكي وبرده لسه زعلانه مني، عارف ان اللي عملته كبير بس فين رصيدي عندك اللي المفروض يكون الدفاع بتاعي دلوقتي؟ هو انا كنت طول الوقت وحش معاكي عشان لما أغلط تعلقيلي المشنقه بالشكل ده، انتي عارفه الادوية اللي باخدها هنا بتعمل فيا ايه؟ ومع ذلك قاعد وراضي وساكت عشانك وانتي مستخصرة حتى انك تقبلي مني كلمه واحده تخليني انام ولو يوم واحد وبالي مرتاح من ناحيتك، أنا بجد تعبت اوي ومش عارف الحل فين؟

صمتها جعله ينهي حديثه متسائلا:

-حتى الرد مستكتراه عليا، عايزه تقفلي؟

عادت للبكاء فسألها متوترا:

-طيب ايه اللي يريحك وأنا اعمله؟ مش لازم تسامحيني بس عايز اشوفك مرتاحه وبس.

تلك الآلام التي تضرب قلبها جعلتها تعجز عن وصف ما يثور بداخلها وحتى تلك الزيارتين لطبيبتها النفسية لم تشعرها أبدا بالارتياح بعدها كما ظنت وظن هو معها، تمتمت له بصوت مسموع:

-أنت وحشتني بس انا زعلانه منك يا فارس.

مسد لحيته في محاولة منه لكبت حزنه وألمه الداخلي وتكلم:

-انتي عارفه الأمور وصلت لفين مع شادي؟ عارفه انه رافع قضيه عليا وعلى مازن بيتهمنا بالاكراه على التوقيع؟ عارفه انه رافع قضية تانيه على مازن متهمه انه كان عارف بطلان جوازه لانه كان طرف في الاكراه على الطلاق، عارفه أنه رافع قضية على زين بيتهمه فيها بالضرب المبرح عشان رفضه انه يتجوز دعاء؟ انتي عارفه إن جنى لسه متعرفش بكل ده ؟ عارفه إن مازن مش عارف يحضنها عشان يخفف عليها مرض ابنهم؟ عارفه وضع ابنهم عامل ازاي وهم عايشين ازاي؟ وكل ده وأنا ساكت ومتصرفتش عشانك، بقيت بتعاير بحبي ليكي وضعفي قدامك ومش هاممني عشانك، وانتي مش قادره تسامحي في غلطه مكنتش اقصدها ابدا!

تفاجئت من بعض الأمور التي ربما لم تعلم عنها شيئا بصدد تلك القضايا فسألته مهتمة بمعرفة مجريات الأحداث:

-ورأي المحامي ايه في كل ده؟

اجابها ضاحكا بسخرية:

-لأ عادي، كل القضايا تتحل بس المشكلة مش فـ القضايا يا ياسمين، المشكلة في الشوشرة اللي هتيجي من ورا القضايا دي وده هدفه الأساسي، بس عادي انا موافق بيها لو ده هيرضيكي وطالما جدك وعمك مقدروش عليه فالمفروض انا ارجع واتصرف، بس انا لسه مرجعتش، عشانك برده.

مسحت عبراتها ونطقت أخيرا بصوت هادئ:

-ارجع بيتك يا فارس، ولو سمحت قطع العقد ده وكويس انه ابتدائي يعني لسه مجرد حبر على ورق

مسك الورقة أمام عينيها وقام بتمزيقها وهو يقول:

-تمام، ايه تاني؟

رددت كلماتها الأولى:

-أرجع بيتك.

رفض وهو يصر على أسنانه:

-مش هرجع إلا لما تسامحيني، مهما الوقت طال، أنا مش هقدر أرجع وأشوف نظراتك دي ولا أقرب منك وأحس برفضك، ولا انام جنبك كأني غريب عنك.

همهمت بتردد:

-أرجع يا فارس.

رفض بحركات من رأسه فرددت:

-عشان خاطري أرجع انت بجد وحشتني.

ابتسم نصف ابتسامة وسألها:

-بجد؟ وحشتك بجد؟

أومأت له فسحب نفسا بداخله وزفر زفرة ارتياح وسألها:

-طيبب سامحتيني ولا لسه؟

عضت على جانب شفتها وهي تجيبه:

-هقولك لما ترجع.

ابتسم وأومأ ووقف فورا ممسكا الهاتف بيد وباليد الأخرى بدأ يلملم متعلقاته الشخصية وهو يخبرها:

-هاجي حالا.

يتبع..

إلى حين نشر الفصل الجديد للكاتبة أسماء المصري من رواية روضتني 2، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة