قراءة رواية حياة بعد التحديث

الجزء الثاني من بدون ضمان كاملة

تنشر حصريًا على مدونة رواية وحكاية قبل أي منصة أخرى

رواية حياة بعد التحديث

 رواية جديدة قيد النشر

من قصص و روايات 

الكاتبة خديجة السيد

اقتباس 

الفصل الثامن والعشرون

تم النشر يوم الخميس

30/11/2023

❈-❈-❈

مضى عدت ساعات ورحل سالم للعمل بينما تسنيم لقد قدمت على أجازه مفتوحه تلك الأيام، استغلت رحيل زوجها واتجهت نحو المطبخ لتعد إلي ليلي طعام خفيفًا، قامت برص الصحون واضعة بها قطعًا من الجبن واللانشون والمربى وغيرها مما يصلح بتناوله في صينية معدنية كبيرة، فسالم قد حذرها من الإقتراب منها افضل لها حتى لا تصنع المشاكل بينهما مره ثانيه! في البدايه أيدت تسنيم هذا الرأي معتقده بان ليلى ما زالت تلك الفتاه المتمرده صاحبه المشاكل الغير منتهيه والتي لا يؤثر فيها شيء! لكن عندما جاءت هنا و رأتها قد تفاجات بالتغيير الذي طرأ عليها شعرت بالعطف تجاهها من معامله سالم و جدتها لها، تحركت نحو الداخل وهي تحمل صينيه الطعام انتفضت ليلي مذعورة عندما رأت الباب يفتح معتقده والدها لكن تنهدت براحه قليلاً عندما رأت تسنيم امامها، وهي  لاحظت ذلك وشعرت بالاشفاق نحوها فلم تتصور مطلقاً بان تصبح العلاقه بينها وبين والدها بذلك الشكل المرعب، فسالم يتعامل مع الوضع للمره الثانيه بالطريقه الخاطئه .

جلست تسنيم أمامها أعلي الفراش وقالت بإبتسامة خفيفه

= انا جبتلك الأكل .

انفرج فمها مردده بصدمة وقد ارتفع حاجبها للأعلى بشك

= جايبه لي الاكل ولا جايه تشمتي فيا .

حدجتها بنظرات يأس وهي تردد بعتاب  

= لا يا ليلى مش جايه اشمت فيكي عشان انا عمري ما كان في مشكله بيني وبينك، انتٍ اللي دايما عندك مشكله مع اللي حواليكي بدون سبب مش انا؟ بس انا فعلا كنت مستنيه خروج باباكي عشان عايزه اتكلم معاكي شويه 

على أمل يعني انك تسمعيني لمره واحده في حياتك .

توهمت أنها تفعل ذلك كنوع من التعاطف، أو انتقام خفي تتابعه معها حتي تشفي غلها منها، لذلك ردت بكرامة

= عاوزه تقولي ايه؟ لو هتعملي فيها منصحه زيهم وتقعدي تنصحيني وتعاتبي فيا وليه عملت كده واللي استفدته، فوفري كلامي خدت منه كتير والمشكله انهم بيسالوني ومش بيستنوا ردودي لان حتى مبررتي بالنسبه لهم ولا حاجه .

أجابت بهدوء أصابها بالارتباك وهي تردف مبتسمه

=طب ما تعتبريني سألت السؤال وتجاوبيني وانا هديكي الفرصه وهصدقك، ليه بجد يا ليلى كنتي بتعملي معايا كده او مش معايا انا وبس ومع غيري كمان واي حد كان بيحاول يقرب من باباكي غيرك! انا اللي فاهمه ان انتٍ كنتي غيرانه.. بس معقول هو ده السبب الوحيد.. ممكن الغيره لوحدها تكون دافع قوي فإنك بتاذي نفسك وتاذي اللي حواليكي.

إبتلعت ريقها بيأس، وهي ترد بنبرة مرتجفة

= وهتفرق معاكي في ايه؟ هتكوني مثلاً عاوزه تساعديني! بس مستحيل انتٍ اخر واحده هتكوني عاوزه تساعديني اصلا.. عشان اللي عملته معاكي ولما تصدقي تمسكي عليا اي حاجه عشان تضريني وتردي اللي كنت بعمله فيكي .

كان الإرهاق واضحاً أسفل جفن ليلي، وبدأت مشتت التفكير طوال الوقت فما هي فيه دون إيجاد حل ولاحظت ذلك تسنيم، قبل أن تجيب اجابتها قائله بتهكم 

= لو هي دي كانت طريقتي من الأول كنت استخدمتها من زمان وحاولت اوقعك باي طريقه عشان اكشفك ليهم زي اني مثلا اصورك ولا اسجل لك؟. زي ما الشاب ده عمل معاكي

اكيد حاجه زي كده كانت بتيجي في دماغي بس انا مش من النوع ده ولا انا عندي مشكله معاكي للدرجه دي صحيح انتٍ عملتي حاجه بسيطه بالنسبه لك خربتي بيتي وحياتي بس ما اتعودتش ولا اتربيت ان انا ارد الغلط بغلط 

لم تعلق عليها واكتفت بالصمت الذي أصابها بالخزي فوجدت أنها محقه بالفعل وكان من الممكن أن تاذيها بنفس الطريقه وتكشفها امام عائلتها مثل ما فعل معها ذلك الشاب، لكن رغم كل ما فعلته معها لم تاذيها حتى الان، بدأت تدمع عينها بحزن شديد وهي تقول بنبرة باهته 

= عارفه انك مش هتصدقيني بس انا ندمت! لما شفت بابا بالشكل ده و زعلان أوي مني وزعلان اكتر عشانك.. بس انا ما كنتش عارفه أن الأمور ممكن توصل معايا لكده .. والله العظيم بقى يصعب عليا و زعلانه عشانه ونفسي يسامحني .. بس هو خلاص عمره ما هيسامحني وبقى يكرهني أوي ومش طايق يشوفني حتي .

اقتربت منها وبدأت تمسح دموعها برفق وهي تقول بنبرة هادئة

= طب اهدي وبطلي عياط، والدك عمره ما هيكرهك يا ليلى مهما تعملي، هو زي ما قلتي هو زعلان ومتضايق ومصدوم كمان لانه متوقعش حاجه زي كده تحصل منك، بس لما يعرف انك فعلا ندمانه اكيد هيسامحك و هيحاول ينسى غلطتك طالما مش هتعمليها تاني .

صمتت للحظات بحسرة قبل أن تجيبها بنبرة مزعوجة

= ما هو مش بيسمعني ومش هيصدقني كمان، ولا هو ولا تيته اللي مشيت وسابتني .

ربتت بيدها علي ركبتيها الموضوعه فوق الفراش بحنان كنوع من الدعم، هاتفه بصوت جاد

= كل حاجه ان شاء الله هتتصلح وخلينا نمشي واحده واحده خلينا الاول نحاول نثبت لباباكي انك ندمانه فعلا والولد ده لعب بيكي وانك عمرك ما هتعملي الغلطه دي تاني واتعلمتي منها .. مش كده برضه!. 

نظرت إليها نظرة تعجب ثم هزت راسها بيأس وإحباط و أجابتها بخفوت

= وهو ازاي هيصدقني انتٍ هتقوليله؟ مش هيسمعلك برده 

عاودت النظر إليها لتقول بجدية ملحوظه

= هو مش عاوز كلام يا ليلى هو عاوز فعل قدامه وانتٍ الوحيده اللي قادره فعلا توصلي لي الإحساس ده.. وانا هعمل اللي عليا واحاول اساعدك و بعمل كده عشانكم انتم الاثنين.. والدك طول ما هو زعلان منك مش هيقدر  يتخطى الموضوع.. والحال بينكم ما ينفعش يطول كده لازم يتحطله حد .. خليه الاول ياخد وقته ويزعل و انتٍ في نفس الوقت بتحاولي تثبتي له ده ونحاول بدل المره اثنين وثلاثه وعشره واكيد هيستسلم في مره . 

اضطربت أنفاسها أثر كلماتها وتسارعت دقات قلبها بتلهف وأمل، وهمست لها برجاء كبير 

= انتٍ بجد ممكن تعملي كده وتخلي بابا يسامحني ويرجع يثق فيا من تاني

تركت صوتها ينساب إلى داخل خلايا عقلها وهي تأكد عليها بتمهل قائله بتنهيدة مطولة

= هحاول وجربي تثقي فيا مش هتخسري حاجه، بس انا اكيد مش هعمل كل ده لوحدي وانتٍ لازم تساعديني وعشان تساعديني لازم اعرف منك كل حاجه وتثقي فيا وتحاولي تتكلمي على اللي جواكي.. اتفقنا .

ترددت في الموافقه ثم بالنهاية هزت رأسها بإيماءة مترددة فليس أمامها غيرها تثق به لذلك ستجرب فلم يعد هناك شيئا لم تخسره وأصبح الجميع يعرف نواياها القديمه، أبتسمت تسنيم براحه نوعاً ما وهي تقول باقتراح

= طب ايه رايك بعد ما تاكلي نخرج بره ونتكلم براحتنا .

ازدردت ريقها بتوتر أكبر، وهي تجيب بصوت مرتبك 

=بابا مش هيرضى ده حتى دروسي والمدرسه قعدني منهم وبيخليني اذاكر هنا في البيت بس وهروح على الامتحانات و مش عارفه لا اذاكر كويس ولا اركز في حاجه طول ما هو زعلان مني . 

هزت رأسها متفهمة و ردت عليها بهدوء وهي توميء بعينيها 

= ما تخافيش انا هطلب منه وهو هيرضى طالما مش هتخرجي لوحدك، وبالنسبه لمذاكرتك لازم تفصلي بين زعلك حاجه ومذاكرتك لدراستك حاجه تانيه عشان انتٍ لو لا قدر الله ما عديتيش السنه دي والدك هيزعل منك اكثر انا عارفه الموضوع هيكون صعب شويه عليكي بس انا برده مش هسيبك في الموضوع ده وهحاول اساعدك .

يتبع

إلى حين نشر الفصل الجديد للكاتبة خديجة السيد من رواية حياة بعد التحديث, لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة