رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الثالث

تم النشر الخميس

5/9/2024

هتفت هناء باستغراب من ولدها فهو دائما مطيع لأبيه ولا يثير أبدا المشكلات 

واه آدم!! ادم ولدك عمل ايه ديه زي النسمة يا حبة عيني لا بيقول غير حاضر ونعم يا بوي 

سلمان بغيظ 

لكن النوبادي معايزش يسمع الكلام وعايز يغلبني معاه ومنشف راسه ومنيش عارف جايب الفكرة داي منين اساسا وايه اللي دخلها ف راسه ومخليه امصمم عليها أكده 

 ضيقت هناء ما بين حاحبيها وهي لا تفهم 

طب فهمني فيه ايه يا واد عمي اني منيش فاهمة ايتها حاجة ومعرفاش انتوا عتتحدتوا عن ايه واصل ما تقولي يا ادم يا ولدي فيه ايه 

تنهد ادم بضيق ونظر لوالده الذي قال بانزعاج 

ابنك قال ايه عايز يدخل كلية الشرطة 

هناء وفيها ايه داي يا سلمان يا واد عمي ما تسيبه يعمل اللي يلد عليه 

سلمان بحمقة 

واه يعمل اللي يلد عليه ايه احنا فين والظباط فين داي عايزة واسطة ومحسوبية وكلام محناش قديه ولو فضل يحلم بيها من اهنه لسنين قدام عمره ما هيطولها فهمي ابنك ورسيه يفوق لحاله احنا ناس ع باب الله اني مجرد جنايني غلبان لا لينا حد يتوسطلنا ولا الكلام ديه من توبنا اسكت متضحكش الناس علينا ولدي عايزة الناس تمشي تخايل عليا ف الشارع وتجول ابنه عايز يبقى ظابط وهو جربوع وحكيان فوق يا ادم وع قد لحافك مد رجليك 

تحكلم ادم بحماس 

كل الحديت ديه ملوش عازة عندي يا بوي وميهمنيش كلام الناس ولا يفرق امعاي ببصلة حتى المهم اني مهعملش حاجة غلط خلاص.. علشان أكده يا بوي اني بقولك سيبني اخد فرصتي واقدم زي اللي بيقدموا يمكن لعل وعسى الحال يمشي والحلم يتحقق يا بوي 

طالع سلمان ولده بضجر 

انت مهتفهمش يا واد انت .. انت ابوك جنايني وانت جنايني وملكش شغلانة غير أكده وورثناها ابا عن چد فبلاش تضحك الناس علينا وتزود غلبي اكتر من اكده انت فاهم .. ويلا هم قدامي خلينا نرجع ع السرايا بدل ما نتكدر من البيه هناك هم 

❈-❈-❈

طلع رائد ع اوضة بنته واول ما خبط 

جريت وعد وفتحت الباب 

بابي حبيبي 

رائد نور عين بابا اللي بتعرف خبطته وبتقدر تميزها كويس اوي 

وعد بمرح 

طبعا يا بابي ان مكنتش اعرف خبطة حضرتك واحس بيك وانت جاي احس بمين يعني 

 احتنضها رائد بحب 

حبيبة ابوها الصغنن يا ناس ها قوليلي  بقا كنتي بتعملي ايه شايف الفون مفتوح اكيد كنتي بتلعبي جيمز او بتتفرجي على فيديوز 

ضمت وعد شفتيها بانزعاج 

اممم يبقى مامي قالتلك اني مش عايزة اذاكر مش كدا 

جلس رائد على اقرب مقعد ف الغرفة وقال وهو يلهو بكتاب خاص بابنته ع المكتب 

تعرفي ان ماما شوق عمرها ما اشتكت منك ليا أبدا يا وعد انا كل اما اسألها عليكي اخبار وعد ايه وعاملة ايه معاكي تقولي ربي يبارك فيها ويحميها ويخليهالنا نعمة من عند ربنا ولازم نشكرها عليها 

اتفاجئت وعد بكلام والدها وقعدت جنبه 

بجد يا بابي مامي بتقول كدا مش بتشتكيلك مني ؟؟ 

رائد انتي ليه مستغربة يا وعد 

وعد مامي كل مرة تقولي انا مش هتكلم معاكي انا هشتكيكي لباباكي 

ضحك رائد بقوة 

ههههه اه انا عارف شوق هي دائما بتقول كدا لكن عمرها ما اشتكت منك ابدا وعلطول تقول وعد نعمة ربنا عليا وزيها زي اي بنت في الدنيا لازم تغلب اهلها شوية بس الواجب عن الأهل انهم يصبروا على عيالهم ويدعولهم دايما بالهداية والصلاح والفلاح ودا اللي بعمله مع وعد بنتي 

هنا اتت شوق والتي استمعت عن عمد للحديث الذي يدور بين وعد وابيها وذلك لأن بابا الغرفة ما زال مفتوحا عندما اتت لتدعوا ابنتها لتناول الغداء 

وقالت والابتسامة تملأ شفتيها 

واه يا وعد يا بتي بقا اني اشتكي من بتي حبيبتي ونور عينا كماني ديه اني دايما اقول لنفسي وعد بنتي هي جبر ربنا ليا ولو فضلت طول عمري احمد ربنا على النعمة داي لوحديها مهكونش بردك اديت شكر النعمة داي أبدا 

طالعتها وعد بابتسامة فرحة مما تسمعه من امها وقالت 

فكرك اني لما بقول هشكيكي لأبوكي اني فعلا هعمل اكده لاه ابدا أني كل مرة بعديها بروح اصلي ركعتين لله وادعيلك يا بتي 

اسرعت وعد الخطى لامها واختضنتها بحب 

حبيبتي يا مامي 

بادلتها شوق العناق وهي تقول بالك انتي واني اصغيرة لما كنت ازهق امي ولا اعمل موقف اكده ميلدش عليها كيف العيال الصغيرة ما هتعمل.. ستك الله يرحمها كانت تعمل ايه 

هتفت وعد بفضول بتعمل ايه يا مامي

شوق 

كان تحدفني بالشبشب على نافوخي وترجع تقولي لافيني يا بت الشبشب وتديني تاني ع نافوخي لحد ما يطرقع اكده ويزنهر ويطلع دخان كيف التنين

لم يستطع رائد تمالك نفسه من الضحك بينما وعد تطالع امها بزهول واستغراب 

مامي حضرتك بتتكلمي جد 

شوق مالك مستغربة ليه يا وعد ايوا ستك ديه كانت معاملتها ليا بس وربنا كان على قلبي زي العسل بالك انتي لما راحت كنت اتمنى ترجع تاني وتضربني كيف ما هي عايزة كانت كل حياتي ودنيتي معنديش غيرها كان قبل ما اعرف اخواتي وابوي ربنا يهديه ويحبني.. امي الوحيدة اللي كانت امعاي ومتخلتش عني بالرغم من ظروفها وقلة حيلتها ومهمت عملت ولا قلت عمري ما هقدر اوفيها حقها أبدا 

طالعتها وعد بتأثر وهي تقول ربنا يرحمها يارب 

في تلك اللحظة اتت نغم وقالت ايه يا ماما شوق اتأخرتي ليه قلتي هتنادي وعد علشان نتغدى انتظرتك لكن طولتي فوق... ايه دا بابا كمان هنا.. يعني كلكم قاعدين هنا وسايبين مالك قاعد تحت هيموت من الجوع 

هنا انطلقت للخارج وهي تقول 

ياختاااي يلا يا جماعة كله ينزل يلحق مالك قبل ما ينسف الأخضر واليابس واااد يا مالك سيب حاجة لخالتك يا واد 

هنا انفجر الجميع ف الضحك على هيئة شوق التي لا تمل عن رسم البسمة ف وجوه من حولها

...

في المساء وبعد تناول العشاء 

وقفت وعد في شرفة غرفتها 

فلمحت مالك يجلس على منضدة ف حديقة المنزل 

فقالت مالك قاعد ليه كدا 

رفع مالك صوته لتسمعه وعد 

عادي بغير جو 

وعد طب خليك مكانك انا جايالك 

واسرعت خطاها تركض ع الدرج ومنه للخارج حتي وصلت لمكانه جلوسه 

السلام عليكم 

مالك وعليكم السلام ايه يا بنتي سهرانة ليه منمتيش زي الكل ما نام ليه 

وعد عادي كنت لسه هنام شوفتك قلت اجي اعرف مالك ها قولي في ايه اللي مضايقك بقا 

مالك عادي يا وعد مفيش حاجة 

وعد ايه يا مالك انت هتخبي عليا انا وعد .. دا انت كمان سايب بيتكم وجاي قاعد هنا فأكيد الموضوع كبير كمان 

مالك لا ولا كبير ولا حاجة كل الحكاية اني حسيت اني مخنوق شوية فجيت وبعدين انتي ناسية يا بنت انتي اني بحب اقعد هنا مع ماما شوق ولا نسيتي ايام زمان لما كنت بقعد هنا اكتر من الفيلا عندنا 

وعد دا لما كنت صغير بتعمل كدا فعلا انما دلوقتي لا متخبيش عليا 

مالك والله عادي يا بنتي انا بس اتخانقت مع بابا شوية فقلت اجي هنا يمكن يقتنع برايي ويخليني ادخل شرطة

وعد واو انت عايز تبقى ظابط الله يا مالك بجد اه ادخل شرطة انا نفسي اوي يكون حد قريبي ظابط وكدا واالي يكلمني اقوله والله لاقول لحضرة الظبوطة قريبي 

مقدرش مالك انه يمنع ضحكته فقال 

ههه الظبوطة ههه ماشي يا مجنونة انتي بس للاسف بابا مش موافق ابدا ع دا 

وعد خالو مهند مش موافق طب ليه؟؟ اممم وانت بقا جيت هنا كنوع من الضغط عليه لو موافقتش يبقى مش راجع البيت مش كدا 

مالك مش بالمعنى الحرفي.. يمكن عملت كدا بس علشان ابينله اني زعلان واني مش موافق ع قراره لكن موضوع لوي الدراع ومش راجع البيت الا لو وافقتي دا لا خالص ومش انا اللي اعمل دا 

وعد اممم طب خلاص متزعلش خالو مهند دا عسل والله ومش بيزعل حد وان كان ع موضوعك دا سيبهولي انا وانا هتصرف فيه وهجيبلك الموافقة ان شاء الله 

مالك ابتسم  يعني اعتمد عليكي يا وعد 

وعد طبعا دا انا وعد دلوعة العيلة يا ابني وبالأخص خالو مهند حبيبي 

❈-❈-❈

عاد من عمله مرهقا للغاية فتح الباب وهو يتنهد بتعب وبطنه تقرقر من الجوع 

فوجد امه امامه تجلس ع الكرسي وقد غلبها النعاس 

فتوجه تجاهها وقال 

ماما ايه اللي مقعدك كدا يا حبيبتي ليه مش بتطلعي تنامي فوق 

انتبهت هي لعودته فقامت مسرعة وهي تقول بفرحة لعودته 

اياد انت رجعت يا حبيبي حمدا لله ع السلامة اتأخرت ليه كدا 

لم يشأ اياد ان يخبرها انه كان مجبرا ع التأخر بسبب تحذيرات ابيه بألا يغادر العمل الا بعد الانتهاء منه 

فقال معلش يا حبيبتي قلقت حضرتك واخرتك عن معاد نومك لكن كان ورايا شغل كتير ومتعطل فكان لازم اخلصه كله علشان ميتراكمش عليا 

فداء 

الله يعينك ويقويك يا اياد.. ها اكلت ولا احضرلك الاكل يا حبيبي 

اياد لا والله لسه مأكلتش حاجة من وقت الفطار يا امي بس مش مشكلة حضرتك اتفضلي اطلعي نامي انتي وانا هروح اشوف ايه الموجود وهاكله وخلاص 

فداء لا طبعا انا هروح حالا اجهزلك اكلك واجيبه ليك ف اوضتك كمان اطلع انت خد شاور يريح اعصابك وعضلاتك المرهقة دي وبدل هدومك ع ما اجهز الأكل 

اياد مش عايز اتعب حضرتك يا ماما الوقت أتأخر 

فداء يا حبيبي تعبك راحة يلا اطلع وانا جاية وراك بالأكل 

❈-❈-❈

في اليوم التالي وع طاولة الافطار تجمعت اسرة خالد هو وزوجته فداء وابنته كيان 

كيان صباح الخير يا مامي صباح الخير يا بابي 

فداء صباح الخير يا كيان يا حبيبتي 

اما خالد فنهض من مكانه وعانق ابنته بحب 

صباح الخير ع قلب وروح بابي نمتي كويس 

كيان بابتسامة رقيق اه يا بابي نمت الحمد لله 

خالد الحمد لله يا روح قلبي يلا اقعدي علشان تفطري 

ولما قعدوا كلهم 

خالد قال فين اياد اتأخر ليه كدا هيتأخر ع الشركة هو فيه مواعيد للشغل ولا ايه 

كيان صحيح ايدو مشفتوش خالص امبارح وحشني اوي 

فداء باشفاق ع ابنها

روحت اطمن عليه لقيته لسه نايم فقلت اسيبه يقوم براحته دا يا قلبي  راجع تعبان امبارح ومرهق ومكنش شايف قدامه 

خالد بصرامة

وايه يعني دا ميديلوش الحق ابدا انه يتأخر ع شغله تاني يوم ما كل الناس بتتعب ف شغلها وبترجع متأخر هل معنى دا انهم يغيبوا تاني يوم عن شغلهم لا دا اسمه دلع انا مقبلش بيه ابدا اتفضلي يا فداء اطلعي صحي ابنك وخمس دقايق الاقيه قدامي هنا

في ذاك التوقيت حضر اياد الذي قال 

ملوش لزوم يا بابا انا صحيت اهو وجهزت كمان .. صباح الخير عليكم 

 نهضت كيان لترحب بأخيها 

ايدو وحشتني اوي عامل ايه 

مد اياد يده ليحيط عنق اخته بحنان 

صباح الهنا يا كوكي انا كويس يا حبيبتي انتي اخبارك ايه وحشتيني فعلا مش متعود مشوفكيش بس معلش جيت متأخر امبارح وانتي كنتي نمتي 

كيان ربنا يعينك يا ايدو بس مش تتأخر تاني لانك بتوحشني 

اياد حاضر يا قلبي 

فداء يلا ايا حبيبي اقعد علشان تفطر 

هنا تكلم خالد وقال بحدة لا يقعد ايه هو لسه هيفطر مش كفاية سيادته صاحي متأخر وكمان هيقعد يفطر ولا كأن وراه حاجة انت يا استاذ مش وراك شغل ومواعيد ولا ايه حكايتك بالظبط 

فداء مفيهاش حاجة يا خالد لما يقعد يفطر ع السريع ويانا وبعدين تنزلوا مع بعض لشغلكم بعدين هو هيتأخر على ايه وهو اصلا المدير 

خالد وعلشان المدير يبقى يسيب الشركة تضرب تقلب ويروح اخر واحد ولا ايه دا تسيب واستهتار مقبلش بيه 

فداء يا خالد كل الحكاية خمس دقايق بس مش هيجرى حاجة 

طالع اياد ابيه بضيق لكنه لك يبديه وقال بهدوء 

خلاص يا ماما مش مشكلة انا هبقى أفطر ف الشركة اي حاجة يلا سلام 

فداء ازاي دا وايه اللي يجبرك يا اياد ما الاكل موجود اهو معلش بقا يا خالد انت ليه مكبر الموضوع اوي كدا وعاملها حكاية 

 طالع اياد فرآه يرمقه بحدة فقال بقلة حيلة 

يا ماما عادي انا اصلا مليش نفس دلوقتي كنت هقعد معاكم بس.. بس طالما بابا عايزني اروح ع الشركة دلوقتي فأنا همشي ولما اجوع هاكل متخافيش يا حبيبتي 

فداء برقة قلب الأم 

اه زي امبارح يا قلبي لما نسيت نفسك ف الشغل ورجعت بعد نص الليل وان من الصبح من وقت وجبة الفطار محطتش حاجة ف بوءك؟؟ عايز دلوقتي تروح على شغلك وانت ع لحم  بطنك علشان تنسى نفسك تاني وتيجي من غير اكل خالص وتقع من طولك لا انا مش هسمح بكدا ابدا .. خالد من فضلك سيبه يقعد يفطر معلش الشغل مش هيطير 

لم يستطع خالد رفض طلب لحبيبته 

فقال لاياد بانزعاج 

اقعد افطر بس ع السريع ها 

اياد حاضر يا بابا

❈-❈-❈

كان يتابع عمله ف جز أوراق الشجر بينما عقله ف مكان اخر يحلم بأن يكون ضابطا في الشرطة يرتدي الزي الابيض والنجوم فوق كتفه يساعد المحتاج ويحفظ الأمن ويساهم ف حماية المجتمع 

لكن قطعه من شروده صوت ابيه وهو يقول 

واد يا ادم انت يا واد.. الواد ديه ماله امتنح اكده ليه وكيف السرحان واد يا ادم 

انتبه ادم لنداءات ابيه فترك من في يده وتوجه نحو أبيه 

ايوا يابا خير رايدني في سامعك عتنادي عليا 

سلمان ايوا يا ولا خد الفلوس داي وجيب الطلبات لستك مرت الدهشان بيه يلا هم بسرعة اندلى جيبلها اللي ف الورقة ديه كلياته 

كشر ادم بوجهه وقال بامتعاض 

واه يا بوي اندلى اني ايه اجيبلها الطلبات ما هم عندهم الخدم والغفر ياما اني اهنه بصفتي جنايني اوبس وجاي اشتغل اهنه جنايني مالي اني ومال المشاوير داي فيه مليون حد يقوم بالمهمة داي غيري 

سلمان بحنق 

كلام ايه ديه يا واد المخروب انت كنك ياعني عايزني ارفض طلب لمرت البيه اتخبلت ف عقلك اياك.. اللي تقوله الهانم يتنقذ فورا ومن غير نقاش يلا هم يااد اعمل اللي قلتلك عليه ومتعوقش

ادم من غير نقاش ليه يا بوي كنا عبيد عنديهم يمشوا كلامهم علينا واللي يقولوه كلام مقدس لازمن نسمعه ونعمله ف التو والحال لاه يا بوي احنا شغلتنا اهنه محددة وزي ما قلتلك فيه الف واحد اهنه غيرنا يجيبلها طلباتها 

سلمان شوف الواد هيفضل يآوح ازاي انت عايز تقطع عيشنا اللي عايشين من خيره يا ولدي وبعدين نشرد ف الشوارع وندور نشحت ف النجع 

طالع ادم ابيه باستياء من رد فعله السلبي دائما ومحاولته في التقليل من شأن نفسه 

خلاص يا بوي هات الورقة هروح اجيب الطلبات والله المستعان يارب. ربنا يارب يتوب عليا من الشغلانة اللي تقصف العمر داي

يتبع

إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة