رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل السابع

تم النشر الثلاثاء

17/9/2024

اياد معلش يا عمي اعفيني انا المرة دي انا اسف 

الا ان عساف كان مصر لانه لاحظ التعب اللي  في عنيه 

ولد انت مش هتسمع كلامي ولا ايه قلت اقعد اتعشى وبعدين امشي انت ليه محسسني انك عند حد غريب 

فقال اياد بقلة حيلة حاضر يا عمي هقعد علشان متزعلش بس والله انا مليش نفس 

عساف ملكش نفس ازاي وانت شكلك مهبط كدا ومكلتش حاجة من الصبح 

اياد ايوا ما هو انا جعان نوم 

هنا جت توبا وقالت وهي بتحط الاطباق ع السفرة طيب يا اياد اتعشى وبعدين روح  علطول نام وارتاح يلا تعالوا اتفضلوا الأكل جهز 

هنا جت عسل وجابت بقية الأكل ولما شافت اياد 

اهلا يا اياد حماتك بتحبك ونش بتحبك ف نفس الوقت... جيت ف وقت العشا بس للاسف انا اللي محضراه يعني تاكل من هنا وتجري ع المستشفى علطول 

هنا اياد نسي همه كله وكل اللي مضايقه اول كل شافها وسمع كلامها دا 

فضحك من قلبه وهو بيقول بابتسامة عريضة غيرت موده تماما 

لا طبعا انا واثق انه هيكون ممتاز جدا وتسلم ايدك مقدما 

توبا.. عسل يا سيدي بتحب تجرب فينا شوية افتكاسات كدا من ع الفيس بس تعرف بتطلع حلوة ف الاخر .. ونفسها في الأكل حلو اوي 

اياد بكلام خارج من قلبه 

طبعا عسل متعملش حاجة وحشة دا كفاية اسمها عسل وهي زي العسل .. اا قصدي الأكل يعني وكدا 

اتحرجت عسل من كلامه وقعدت وحطت وشها ف الارض 

عساف كان فاهم من زمان ان اياد معجب ببنته بس عامل مش واخد باله 

فقال طيب يلا يا اياد اقعد علشان تلحق تنام ساعتين قبل معاد الشغل 

اياد حاضر يا عمي 

وبعد الأكل لقا توبا وعساف بيضحكوا 

فقال اياد باستغراب 

اا هو فيه حاجة ولا ايه مالكم بتبصوا ليا كدا ليه 

قال عساف وهو بيضحك 

هو دا اللي ملكش نفس دا انت ناقص تاكلنا يا اياد انت نسفت الأطباق يا ابني عسل مش هتحتاج تغسلهم خلاص نضفوا 

هنا انتبه اياد للي عمله وبص الأطباق اللي بقت بتلمع ودا لان اياد اكل كل حاجة حرفيا 

وضحك هو كمان 

اعمل ايه بقا يا عمي اكل عسل تحفة ولا يعلى عليه مقدرتش اقاوم بقا وبصراحة كنت جعان بس بعاند فانطلقت ومتنساش انت حضرتك اللي اصريت 

جت عسل وف ايديها صينية وعليها القهوة وقالت بابتسامة رقيقة 

بالهنا والشفا اتفضل القهوة علشان تظبط مزاجك انا عارفة انك عاشق للقهوة زي بابي 

اياد وقلبه بيتنطط من الفرحة بجد تعبتي نفسك يا عسل تسلم ايدك 

عسل ولا تعب ولا حاجة انا اصلا بحب اعمل العشا ومتعودة اعمله كل يوم 

بصلها اياد وشرب قهوته كلها دفعة واحدة وهو حاسس انه ملخوم ومش مركز ولا ع بعضه 

فقال عساف طيب يلا يا باشا اتعشيت وشربت قهوتك يلا ع رأي شوق يلا بيتك بيتك علشان تنام 

قام اياد وقال 

حاضر يا عمي يلا تصبحوا ع خير 

شوحله عساف المفاتيح بتاعه زهو بيقول 

الوقت اتاخر مش هتلاقي مواصلات امسك مفاتيح عربيتي روح بيها 

اياد مسك المفتايح

عربيتك!! طب وحضرتك يا عمي 

عساف متشغلش بالك انت يلا يا عم عايز انام وانت معطلني 

ابتسم اياد واستأذن ومشي 

وهو بيتمنى ان عساف هو اللي يكون والده مش خالد لان الفرق ف المعاملة واضح جدا 

فاتنهد بأسى وساق العربية ووصل البيت 

ساب الانوار مقفولة زي ما هي ودخل ع اوضته وغير هدومه ونام علطول علشان ميفكرش ف حاجة تزعجه تاني ..

❈-❈-❈

تاني يوم في بيت مهند 

 قال يزن  لميار

ماما حضرتك عاملانا اكل ايه النهاردة  

ميار وهي بتجهز السفرة مع الشغالة ملوخية وفراخ 

يزن لالا مبحبش الملوخية اناا رايح اكل ع عمي الاكل اللي هنا مليش فيه سلام 

ميار يزن استنى بس مش هينفع تعالى هنا 

يزن سلام يا ميار يا عسل معايا انا كل حاجة بتنفع وبعدين انا بخليلك الجو علشان تاكلي براحتك مع حبيبك شوفتي انا عندي نظر ازاي وابقي ابعتي القردة وعد تيجي تتغدا معانا عند عمو امير 

بصتله ميار بقلة حيلة وسكتت 

اما مهند اللي خرج من اوضته وسمع الحوار ابتسم بمكر 

ولما راح يزن لبيت عمه اللي جنبهم 

فتحتله أيات 

اهلا يا يزن تعالى ادخل 

 يزن وهو بيبص ع السفرة  طنط انتوا هتتغدوا مش كدا طب عاملة اكل ايه النهاردة ماما عاملة اكل مبحبوش يرضيكي اموت من الجوع 

ايات فهمت قصده وعارفه انه بيتحجج علشان يجي عندهم 

 قالت قول انك عايز تتغدى معانا وخلاص مكنتش هقول لا ع فكرة 

يزن طب قولي كدا من الصبح دا انا ع كدا اجي كل يوم بقلب جامد ها يا طنط  طابخة ايه 

ايات نفس الملوخية والفراخ اللي انت مش بتحبهم عندكم اخد بالك انت يا يزن 

يزن بحرج اوبااا بقا كدا يا ماما لحقتي فتنتني ع ابنك 

هنا جه امير وقال اقعد يا يزن اقعد اتغدى انا كدا كدا انا وايات هناكل لوحدنا النهاردة 

يزن بخضة ليه فين لوجي هي كويسة مالها تعبانة ولا ايه لوجي فين يا لوجي 

وقام من مكانه يدور عليها 

فمسكه امير ايه ياابني انت رايح فين لوجي كويسة اقعد اقعد 

يزن اقعد ايه وانا معرفش مراتي فين اا قصدي لوجي فين 

ضحكت ايات وقالت لوجي قررت تتغدى النهاردة مع وعد 

يزن 

ووعد قاعدة عندنا معنى كدا ان لوجي عندنا ف البيت صح ولا انا غلطان 

امير ايوة فعلا لوجي عندكم والدتك عزمتها ع الغدا النهاردة

هنا اتسعت ابتسامة يزن وقام يجري يرجع بيتهم 

ايه دا بجد طب اطير انا ع البيت سلامو 

امير لا انت رايح فين 

يزن رجعت ف كلامي يا عمي اصل اكتشفت اني بحب ملوخية ماما اوي عن اذنك معلش بقا يا طنط ايات الأم مهما كان بردو سلااام 

امير الواد دا طالع لابوه مفيش فايدة فيه

ضحكت ايات بس دمه خفيف اوي يا امير 

امير بغزل لزوجته انتي اللي قمر يا قمر انتي 

ايات اتحرجت وحطت وشها ف الارض 

فقال امير بحب هتفضلي زي ما انتي رقيقة وخجولة حتى لو مر ع جوازنا مليون سنة وهفضل احبك كل يوم اكتر من اليوم اللي قبله 

نسيب امير وايات ياكلوا براحتهم ونرجع ليزن

اما يزن فجري بسرعة ولقا مهند وميار قاعدين ع السفرة بيتغدوا بكل بهدوء  وبيتكلموا 

ففضل يتلفت يمين وشمال هي فين 

مهند بمكر ايه.. جيت ليه مش قلت هتتغدى عند امير 

يزن هي فين يا بابا 

مهند باستعباط 

هي ايه فردة شرابك تلاقيه ف اوضة اخوك مالك ما انتوا دايما كنتوا بتتخانقوا ع كل حاجة حتى فرد الشرابات

يزن شربات ايه بس يا بابا لوجي بنت عمي فين 

ميار قالت وهي مش قادرة تمسك نفسها من الضحك 

ههه علشان كدا جيت تجري عامة يا سيدي لوجي عملت حساب لوجودك ودخلت هي ووعد يتغدوا سوا جوة ف اوضة وعد 

يزن باحباط ايه ليه كدا يعني هناك عمي امير مزنق عليا وهنا سيادتها داخلة تتغدى جوا هتحسوا بيا امتا يا عالم 

مهند عمل انه مستمتع بالأكل الله الملوخية من ايدك تحفة يا ميار تسلم ايدك 

يزن اه دلوقتي يا بابا عامل من بنها ماشي ماشي كل كل الله يرحم  ايام زمان لما كنت بتزحف كدا علشان تتجوز ماما 

مهند زعق ولد انت ازاي تكلمني بالاسلوب دا 

يزن بلا ولد بلا بتاع انت المفروض تكون اكتر واحد تحس بيا.. وانت منفضلي خالص ولا كأنك مش ابني ولا كأني مش ابوك 

مهند نعم انت بتقول ايه ياد انت 

يزن مبقولش صبي ملوخية يا ماما صبي خليني اتوب

...

وصلت شوق للصعيد وتحديدا لبيتها اللي والدها  غريب اعاد بناءه من تاني بعد ما هده .. لكن طبعا الفرق واضح البيت كانت كبير ودورين وفخم جدا 

فقالت شوق وهي بتسترجع ايام زمان وبنتبص ع البيت 

يااااه سبحان مغير الأحوال يارب.. مين كان يصدق البيت المتهالك اللي كان مصنوع من الطين ومتعرش بالخشب وماية المطرة كانت بتنزل ترف كدا كل يوم فوق دماغي لما تسطلني والباب بتاعه مخلع كيف درس عيل صغير ما هيتخلع من اللثة بتاعته .. بقا دلوك البيت اللي قدامي وربنا كانت اخر طموحاتي فيه ان يكون فيه فرشة زينة علشان الضيوف اللي تاجي تقعد عليها.. الحمد لله رب العالمين ربنا فضله كبير ولما بيعطي بيدهش بعظيم فضله الحمد لله دائما وابدا

ولسه يا دوب شوق بتخطي اول خطوة في بيتها لقت ناس كتير من اهل البلد جايين يسلموا عليها 

اهلا وسهلا يا ابلة شوق نورتي بلدك من تاني والله البلد زارها الهنا والسرور يا مرحب يا مرحب 

ابتسمت لهم شوق وقالت بشوق والله وليكم وحشة يا اهلي وناسي وحبايبي  عاملين ايه يا ولاد واخباركم ايه 

..  احنا بخير يا ابلة طول ما انتي بخير مش تقولي يا ابلة انك جاية كنا فرشتالك الارض ورد وجهزنا استقبال يليق بمقامك

شوق ليه يا بت كني كنت السفيرة عزيزة ولا ايه

.. ايوا يا ابلة لا هو انتي شوية ف البلد ولا ايه انتي حاجة كابيرة عندينا اوي وكلياتنا منقدرش نستغنى عنيكي واصل 

شوق والله انا مليش اي قيمة من غيركم ووجودي وسطيكم زادني الشرف والرفعة ربنا يخليكم ليا عزوتي وناسي وحبايبي 

.. فكرناكي هتروحي وتنسينا يا ابلة بس الحمد لله طلعتي عند وعدك وبتيجي كل فترة علشان نشوفك ونطمن عليكم 

شوق طبعا انتم جزء من حياتي واهلي هو فيه حد بينسى اهله بردك ولا ايه 

.. ربنا يخليكي لينا يا ابلة شوق ولا يحرمناش منك ابدا.. اتفضلي ادخلي ارتاحي من السفر وهي ساعة زمن هيكون العشا جاهز علشانك انتي والدكتور والشاب الحيلوة اللي معاكي .. نورت يا داكتور رائد والله 

رائد تسلموا دا نوركم اكيد 

شوق لاه لاه وكل ايه وعشا ايه اللي هتحضروه لاه متتعبوش نفسيكم 

.. اهيه واحنا فديك الساعا لما نتعب علشان ابلة شوق وبعدين هو فين التعب دي داي لقمة بسيطة كدا ع ما قسم تاكلوها بالهنا والعافية انا عارفة انكم راجعين من السفر تعبانين 

شوق بس علشان خاطري متتعبوش نفسكم والله معانا الأكل 

.. لاه طبعا وربنا ما هيحصل أبدا لازمن ولابد تتعشوا يعني هتتعشوا 

شوق ماشي يا حبابة ربنا يخليكم ليا يارب

ولما مشيوا قالت شوق لمالك يلا يا مالك طلع الشنط داي ع الاوض 

مالك حاضر.. هطلعهم وهنزل اخرج انا 

شوق ليه رايح وين 

مالك هتمشى شوية وهرجع متنتظرنيش وابقي نامي انتي ها متسهريش لحد ما ارجع انتي راجعة من السفر تعبانة 

شوق وانت مش تعبان من السفر ان كمان وكمان انت سمعتهم هيجيبوا العشا مش هتتعشى 

مالك بعدين لما ارجع هبقا اكل الموجود وخلاص عادي 

شوق طيب يا ابني زي ما تحب اني هشيل ليك نايبك ف اوضتك لحد ما ترجع بس قولي انت رايح يعني تعمل حاجة مهمة او تقابل حد 

مالك لالا هتمشى عادي في البلد مش هقابل حد 

شوق ماشي يا حبيبي روح براحتك ربنا يحفظك 

❈-❈-❈

تاني يوم بيت شوق كان مليان نشاط وحيوية ودوشة وناس داخلة وناس خارجة وكلهم جايين يسلموا عليها ويشوفوها

وكذلك المطبخ كان مليان بنات مشغولة ف تحضير الأكل 

شوق يلا يا بنات المهمة عايزين نجهز اكبر كمية من الوكل النهاردة علشان كل الحبايب تاكل وتتهنى

ام السعد ربنا يجعله عامر يا ابلة شوق ويجعله ف ميزان حسناتك تقريبا أكده المعظم اتغدى وخد نصيبه لعياله او لقريبه اللي مجاشي خيرك فاض ع الناس و زاد كمان يا ابلة شوق 

شوق ربنا يزيد ويبارك علشانهم والله  انتي متعرفيش يا ام السعد ان ديه احب ما ليا اني اشوف اهلي وناسي فرحانين وراضين

ام السعد ربنا يرضى عنيكي دايما يا ابلة شوق 

في الوقت دا جه مالك وهو شايل قفص وبيقول الحاجة اللي طلبتيها يا ماما شوق 

شوق ان شالله يخليك ويباركلي فيك يا حبيبي 

شوق يلا يا ام السعد دخلي الفاكهة دي جوة للبنات تغسلها وتقدمها ف اطباق للناس برا يلا 

ام السعد عقبال ما نشوف مالك عريس قد الدنيا ونعمله الحلو كله والله اني بنفسي اللي هرقصلهم في الفرح بس طبعا عند الحريم يعني 

ضحكت شوق يا شيخة هو انتي فيكي حيل تصلبي طولك خلاص كبرتي وعجزتي يا ام السعد 

ام السعد ايهيه يا ابلة شوق ديه اني لسه شباب.. ديه اني بدور ع عريس بعد مسعود جوزي الله يرحمه ..عريس يستتني ويهنيني ما اني لسه شباب 

ضحكت شوق اكتر 

جتك ايه يا ام السعد ضحكتيني يا بت يلا زي ما بيقولوا بعد ما شاب ودوه الكتاب هندورلك ع عريس حاضر

❈-❈-❈

كانت قاعدة ف اوضتها بتستعد انها تنام بعد ما رجعت لوجي بنت خالها على بيتهم 

فسمعت صوت ماسدج ع الفون ولما فتحتها لقتها رسالة ع الماسنجر من وليد بردو 

وعد يووه هو عايز ايه مني دا .. انا مردتش يبقى يسكت بقا ايه الرخامة دي 

ولما فتحتها لقتع كاتب

"ايه يا وعد مش بتردي ليه والله انا مش داخل اتسلى بيكي او اضحك عليكي او حتى اضيع وقت انا كل الحكاية اني حابب اطمن عليكي اخبارك ايه علشان يهمني انك تكوني كويسة" 

هنا حست وعد ولأول مرة ان قلبها يدق بشكل سريع وتفرح اوي بكلام زي دا حتى لو كان  مجرد كلام عادي د

فقالت ف نفسها 

معقول انا مهمة اوي كدا عنده؟ وعايز يطمن عليا هو بصراحة انسان محترم وانا مشوفتش منه حاجة وحشة خالص وعمره ما كلم بنات.. معقول يكون معجب بيا 

ابتسمت وعد ف نفسها وفضلت تقرأ ف الرسالة اكتر من مرة 

ولما جت ترد افتكرت كلام مامتها فحذفت اللي كتبته وقفلت الرسالة والماسنجر كله وحاولت تشغل بالها بحاجة تانية لكن كل شوية كلام وليد ينط ف دماغها فترجع تبتسم وتفرح..

وقررت انها...

يتبع

إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة