رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الثامن

تم النشر الخميس

27/9/2024

كان قاعد عند البحر بيحب دايما يروح عنده يستمتع بالمنظر الساحر للبحر وحواليه الزرع والنخل فقرر يكلم والدته يطمنها عليه 

اتصل بيها وانتظر الرد 

واول ما فتح ماما حبيبتي عاملة ايه 

فسمع صوت مهند وهو بيقول 

يا حيوان متصل بوالدتك ليه انا قلتلك انت واخوك متتصلوش بحبيبتي حصل ولا لا والا لازم ءادبكم التأديبة التمام علشان تفهم انت واخوك انا بقول ايه.. اقفل واياك تتصل بيها تاني ولما تحب تطمن عليها تكلمني انا ....فاهم 

قالها وقفل السكة 

 اما اياد اتفزع من صوت ابوه ومن هول المفاجئة مكانش متوقع ان ابوه هو اللي يرد ف اتزحلق من مكانه فوقع ف المية 

....

فرح بنت عساف كانت قاعدة ف اوضتها وماسكا الصبغة بتاعة مامتها

وبتحاول تحط منها على شعرها الكيرلي 

مامي بتحط منها ازاي دي.. انا مش عارفة استعملها ازاي.. اه صح افتكرت انا ابحث ع الفون الطريقة الصح 

وبالفعل مسكت فونها وبدأت تبحث وتقلد الفيديو اللي هي شايفاه 

لكنها معرفتش وبهدلت شعرها خالص باللون الأحمر 

ف الوقت دا دخلت اختها عسل اوضتها

فرح ماما كانت بتسأل عليكي بتقول انك في اوضتك بقالك فترة كبيرة ومخرجتيش انتي بتعملي ايه 

واول ما شافتها جالها الرد ع سؤالها فورا

فقالت وهي مبرقة 

فرح يا نهار ابيض انتي بتعملي ايه انتي بهدلتي نفسك خالص 

فرح وهي بتبص ف المراية وايديها ع شعرها 

لا انا بأصبغ شعري لسه لما اخلص واشطفه بالمية هتشوفيه هيكون حلو اوي انا متأكدة استني بس انا قربت اخلص وهتشوفي النتيجة بعدها 

عسل بجدية 

فرح مش هينفع كدا مين سمحلك انك تصبغي شعرك اصلا هل انتي استأذنتي من مامي اساسا من الواضح فعلا انك معملتيش دا بدليل انك مطلبتيش المساعدة من حد وبتعمليه بنفسك وبهدلتي الدنيا كدا 

فرح لا انا كبرت ومش محتاجة مساعدة من حد بطلوا بقا تعاملوني ع اني طفلة انا رايحة اولى اعدادي خلاص 

عسل بضيق فرح ايه اسلوبك دا متتكلميش بالاسلوب دا تاني مفهوم 

فرح اسفة يا عسل بس انا كنت حابة اصبغ شعري زيك وزي مامي 

عسل وهل انتي طلبتي مني او من مامي دا وقولنا لا... بالعكس عادي مأظنش مامي مكانتش هترفض وكمان انا لما باجي اصبغ شغري بستعين بمامي لاني معرفش اعمله لوحدي وكذلك مامي انا اللي بعمله لها 

فرح بجد ممم مجاش في دماغي دا.. انا قولت حاجة سهلة وهقدر اعمله 

عسل 

طب تعالي معايا ع الحمام علشان نغسل الفوضى اللي عملتيها دي يلا 

في الوقت دا جت توبا ولما شافت شعر بنتها قالت يا خبر!! فرح عاملة في نفسك ليه كدا... انا كان لازم اتوقع طالما انتي فى اوضتك من بدري يبقى عاملة مصيبة فرح انتي امتا هتكبري على تصرفات الاطفال دي بابي كدا هيزعل منك 

فرح سوري يا مامي 

توبا من فضلك يا عسل حاولي تظبطي شعر فرح وتنضفوا الفوضى اللي حصلت ف الاوضة دي من تاني 

عسل حاضر يا مامي هعمل دا 

توبا اه صح نسيت اقولكم ان اياد بابي عزمه ع الغدا معانا النهاردة فابقي اعملي حسابك ف الحجاب يا عسل 

عسل فرحت بجد يا مامي اياد جاي يتغدى معانا 

توبا باستغراب 

ومالك فرحتي اوي ليه كدا 

اتكسفت عسل وقالت وهي لسه مبتسمة اا يعني علشان عمو خالد وطنط فداء وكيان مش موجودين وهو لوحده فحرام ياكل لوحديه 

توبا رغم انها فاهمة بنتها بس قالت 

اه علشان كدا بابي عزمه ع الغدا بس يارب يوافق يجي لان دماغه ناشفة 

عسل باندفاع لالا هيوافق اكيد انا هكلمه اقنعه 

توبا ايه دا بقا انتي بتكلمي اياد في الفون قبل كدا 

عسل لا والله ابدا يا مامي لو حبيت اكلمه بكلمه من فون بابي 

توبا قالت بارتياح طب ماشي لما بابي يرجع كلميه 

عسل او اكلم بابي واقوله يعطيني اياد اقنعه ما هما مع بعض ف الشركة 

توبا فكرة بردو تمام ماشي بس خلصي الفوضى اللي اختك عملتها 

عسل اوك يا مامي 

❈-❈-❈

كانت قاعدة على البلاچ سرحانة وكيان وخالد بيضحكوا وبياكلوا باستمتاع

كيان الله بجد المكان هنا خرافة يا بابي والجو روعة انا مبسوطة اوي ان حضرتك جبتنا هنا 

خالد وهو بيبص ع فداء 

انا جبتكم هنا علشان تكونوا مبسوطين وتغيروا جو يا كيان بس الظاهر ان والدتك ليها راي تاني 

كيان يا بابي ما حضرتك عارف ان مامي بتقلق علينا اوي انا واياد وطالما اياد مش موجود معانا هتفضل قلقانة عليه 

خالد ليه يعني هو صغير علشان تقلق عليه.. ايه يا فداء هتفضلي ع وضعك دا كتير ولا ايه 

اتنهدت فداء ورغم انها منزعجة من تصرفات خالد الا انها حاولت تتكلم بهدوء 

مكانش فيها حاجة لو ساب الشغل يومين وجه اتفسح مع اهله يا خالد هو الشغل عيطير بعدين ما انت جيت اهو وسبت شغلك 

خالد انا جيت وسبته علشان معتمد ع اياد هيسد مكاني مينفعش نسيب الشركة ونسافر احنا الاتنين 

فداء كنا بنسافر كلنا زمان عادي يا خالد ايه اللي جد انت ليه اتغيرت من ناحية اياد بالشكل دا 

خالد بزهق بردو هنفتح ف الموضوع دا دلوقتي يا فداء هو دا وقته ولا مكانه وعامة هقولك ليه.. علشان يا ستي اياد خلاص كبر مبقاش صغير بقا راجل يعتمد عليه ووقت ما يحب يخرج هيخرج مع اصحابه في اي وقت يحبه

فداء فين الوقت دا اللي هيخرج فيه مع اصحابه حتى يروح النادي فيه او يفره عن نفسه دا.. انت محاوطه بالشغل والشركة من كل اتجاه دا يا حبيب قلبي مفيش اي وقت عنده خالص علشان يتغدى بيرجع يتغدى نص الليل ولوحده ومبقيناش نقدر نشوفه ولا نقعد ولا نتكلم معاه 

خالد 

فداء من فضلك خلينا نستمتع بوقتنا هنا واياد كويس ومش بيشتكي انتي ليه تابعة نفسك كدا ابنك مبقاش صغير ولا هو جه واشتكا ليكي 

فداء مشكلته انه مبيشتكيش يا خالد عمره ما اشتكى من حاجة بيفضل حابس في نفسه ومتحمل وبس 

خالد مشبيشتكي لانه ببساطة مش تعبان انتي اللي قلبك رقيف وتاعبة نفسك ع الفاضي من فضلك انا جاي هنا علشان اغير جو واروق مزاجي ومزاجك فبلاش تعكنني على نفسك ويلا شاركينا في الأكل 

فداء حاضر يا خالد بس الاول هتصل بيه اكلمه اطمن عليه 

خالد انتي لسه مكلماه النهاردة الصبح هتكلميه تاني دلوقتي 

هنا اتكلمت كيان 

معلش يا بابي مامي مش هترتاح غير لما تكلم اياد وتطمن عليه طالما انه بعيد عنها فخليها براحتها 

خالد بانزعاج حاول يخفيه 

ماشي يا فداء اعملي اللي انتي عايزاه 

❈-❈-❈

ادم كان زهق من قعدة البيت ومن حياته كلها وكان على اخره من كل الي بيحصل معاه وخاصة اخر موقف حصله مش قادر يتخطاه أبدا.. وبالرغم من انه منع الأكل والشرب الا القليل اللي يخليه على قيد الحياة.. الا انه قرر يخرج ويتحامل ويقعد عن البحر متنفسه الوحيد المكان اللي بيحب يروحه لما يكون تعبان لما يكون موجوع زي دلوقتي ومهما اتكلم مفيش حد هيفهمه ولا هيقدر يحس بيه ... 

جه قعد في مكانه المفضل قصاد البحر وتحت ضل شجرة متعود انه يقعد عندها 

واثناء ما هو قاعد ومهموم شاف شاب بيقع ف البحر أثناء ما كان بيتكلم ف الفون 

فجري بسرعا من مكانه من غير تردد 

وراح ناحيته بيحاول يطلعه 

مد ايده وقال مد ايدك امسك ايدي هتعرف تمسكها ولا انط جوة البحر اطلعك؟؟ 

مالك حاول يمد ايده يمسك ايد ادم 

فآدم قال ايوا مدها كمان قربت يا واد عمي هانت اهي 

وبالفعل عرف مالك انه يوصله وشده ادم وخرجه من الماية وقعده تاني ع البر ع النجيله اللي جنب البحر 

ادم حمدا لله ع السلامة يا واد عمي معلهش ما يقع  الا الشاطر اني شايفك وانت بتتكلم في التلافون وفجأة وقعت في المية 

مالك شكرا جدا ليك اه انا فعلا كنت بتكلم ف الفون ومأخدتش بالي وقعت 

ادم يا خبر ابيض التلافون بتاعك وقع هو كمان في المية 

مالك ايه دا بجد وقع هو كمان متأكد؟؟ 

ادم مهواش باين اهنه اهو.. استنى هنزل المية ادورلك عليه بس للاسف هيكون زي قلته مهيشتغلش تاني 

مالك لا عادي هيشتغل فوني بيعامل مع الماية  عادي مش بيجرا ليه حاجة 

ادم حيث كدا بقا انزل وادور عليه وارجعهولك 

مالك بس انت كدا هتبل نفسك استنى انا هنزل انا بقدر اعوم انا بس كنت فقدت اتزاني فوقعت 

ادم لاه اخاف عليك الماية تندلى بيك لبعيد اني متعود ع المية اهنه هرجعه ليه بسهولة ان شاء الله 

ولما نزل ادم يدور عليه مكانش لاقيه 

هو راح فين ديه مهواش موجود 

هنا قرر مالك أنه بنزل معاه المية 

طب انا هنزل انا كمان أدور معاك 

وبالفعل نزلوا الاتنين للماية يدوروا

❈-❈-❈

اما عند شوق فكانت قاعدة مع اهل منطقتها وبترحب بيهم وبيضحكوا ومستمتعين بوقتهم 

فلاحظت ان هناء قاعدة على جنب ومش بتشاركهم وباين على وشها الهم

فاستأذنت شوق منهم وقامت قعدت جنب هناء 

فيه ايه مالك يا بت يا هناء فيه حد مزعلك اوعاك يكون اتهاوتشي مع سلمان جوزك يا بت ديه طيب ولا ليه ف المشاكل ولا الحديت الكتير وزي ما بيقولوا اهنه لا بيهش ولا بينش 

هناء بهم ايواا اهو زي ما بتقولي اكده يا ابلة شوق .. ديه حتى شاف ابنه بينجلد اكده قدامه ولا اتحرك ولا اتهز فيه شعره ولا فكر حتى انه يرد عنيه الظلم اللي بيجراله 

برقت شوق بصدمة ايه ينجلد ازاي ديه ومين اللي يستجرا انه يعملها ليه هي سايبة ولا ايه 

هناء دهشان المفتري ربنا ينتقم منيه ويردله نفس اللي عمله في ولدي قادر يا كريم 

شوق ليه اكده يعمل فيه اكده ليه كننا لساتنا ف زمن العبيد ولا ايه علشان يمد يده على آدم مش كمان يجلده 

هناء راچل ظالم مستبد مستقوي بماله ربنا يكفينا شره يا ابلة شوق والواد يا حبة عيني من وقتها لا بياكل ولا بيشرب ولا بيخرج من الدار ولا بيحدت حد ونفسه مكسورة منه لله اللي كان السبب منه لله 

ابتأست شوق باللي سمعته عن آدم وخاصة انها عارفة ادم كويس عنده عزة نفس مهياش عند حد فقالت 

وطبعا اللي زاد وغطى وكسر نفس الواد اكتر هو ان ابوك متكلمش مدافعش عنيه من اكده 

هناء ايوا يا ابلة شوق هو ديه اللي حصل ومنيش عارفة ارجع ولدي كيف ما كان ولا حتى اخليه ياكل او يشرب الواد هيموت مني يا ابلة شوق بالله عليكي اعملي حاجة انا قلبي بيتقطع علشانه 

شوق بألم وكأنه ابنها 

اني هجيله اتكلم معاه متقلقيش واول حاجة هعملها اني مش هخليه يرجع يشتغل مع الراجل الظالم ديه تاني ابدا 

فرحت هناء واستبشرت خير 

والنبي صحيح يا ابلة شوق يا ما انت كريم يارب ايوا اكده شوفيله شغلة تانية الله يرضى عنيكي 

شوق 

قولي لا إله الا الله متقوليش والنبي تاني الرسول صلى الله عليه وسلم قال من حلف بغير الله فقد اشرك 

هناء لا اله الا الله محمد رسول الله..متآخذنيش يا ابلة شوق لساني متعود ع اكده دايما 

شوق لاه عوديه ع الصح يا هناء هتلاقي لسانك اخد عليها علطول اما بالنسبة لادم فمتشليش هم جايز ربنا بعتني ليه مخصوص من القاهرة علشان الزنقة اللي هو فيها داي

❈-❈-❈

فضلوا يدروا على الفون شوية من الوقت وبردو مفيش ليه اثر 

لحد ما سمعوا صوت الفون بيرن على النجيلة 

ف الاتنين بصوا لبعض بصدمة وبعدين انخرطوا ف الضحك مع بعض وبصوت عالي ولا كأنهم اصحاب من سنين 

مالك الفون قدامنا طول الوقت واحنا تعبنا وغرقنا واحنا بندور عليه 

ادم احمد ربنا انك لقيته اني قولت خلاص هيستعوض ربنا فيه 

مالك مد ايده يسلم عليه 

شكرا ليك جدا على مساعدتك 

ادم ع ايه يا عم هو اني عملت حاجة على العموم هات يدك اسلم عليك خلينا ناخد حسنات كانت ابلة شوق دايما تقولنا لما تقابلوا حد سواء قريب ولا غريب وتسلم عليه  علشان تحط عنكم خطاياكم 

زي ما قال رسول الله صلى الله عليه إن المؤمن إذا لقي المؤمن فسلم عليه، وأخذ بيده فصافحه؛ تناثرت خطاياهما، كما يتناثر ورق الشجر"

مالك سلم عليه بحرارة وهو بيقول 

عليه الصلاة والسلام... انت بقى تعرف ماما شوق 

ادم ايوا طبعا اعرفها حد اهنه في البلد ميعرفهاش .. استنى لحظة انت قولت ماما شوق انت ولدها؟؟ يا اهلا وسهلا وميت مرحبا 

مالك لا في الحقيقة انا ابن اخوها بس بعتبرها زي ماما وبحب اناديها بماما شوق لانها قريبة لقلبي 

ادم عندك حق ابلة شوق قدرت تخطف قلوبنا كلنا بجدارة فعلا 

مالك على كدا بقا انا ليا الشرف اننا نكون اصحاب انت صحيح اسمك ايه انا اسمي مالك 

ادم الشرف ليا يا مالك عاشت الاسامي  يا غالي بس اصحاب ايه اني فين وانت فين .. انت لو عرفت اني مين مهتقولش اكده واصل

مالك ليه يعني انت مش ابن تسعة زينا ولا ايه .. ايه يا عم مالك فيه ايه هو دا اللي عملته لك ابلة شوق برده انا هقولها ع فكرة ومترجعش تزعل بقا وتقول عليا فتان 

ابتسم ادم وعرف قد ايه مالك متواضع وانسان طيب ويستحق انه يكون صاحبه فعلا 

فقال لا خلاص كله الا زعل ابلة شوق.. ليا الشرف اني اتعرفت عليك اني اسمي ادم 

مالك ايوا كدا يا جدع قول اسمك انا فكرت اسمك وحش ومكسوف منه مثلا 

ضحك ادم وقال ضحكتي واني مليش نفس اضحك والله

مالك اه اخدت بالي .. شايف لمعة حزن ف عينينك بتحاول تداريهم ورغم الهم اللي ف قلبك اول ما شوفتني ف ضيقة مكدبتش خبر و تناسيت اللي فيك وجيت ساعدتني علطول هو لسه فيه ناس زيك كدا 

ادم يا عم اني معملتش حاجة اي حد غيري كان هيعمل اكده واكتر كمان 

مالك اهو هو دا التواضع بقا المهم يا ابني كبر مفيش حاجة مستاهلة للهم اللي انت شايله دا حاول تتخطاه وتتعلم من المواقف واطلع منها بدرس هيفيدك قدام .. دا كلام ماما شوق مش كلامي ع فكرة هي لسه مسمعاني الكلام دا لما كنت مخانق مع بابا وسايب البيت علشان مكانش موافق ادخل كلية الشرطة..

يتبع

إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة