رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الحادي عشر 

تم النشر السبت

5/10/2024

ضعفت وعد ونسيت كلام امها واللي عزمت نفسها عليه وقررت انها ترد على كلامه وتوضح ليه سوء التفاهم اللي حصل من وجهة نظرها 

ومكانتش تعرف ان بعملتها دي فتحت على نفسها ابواب كلها رياح عاتيه هي كانت في غنى عنها لو كانت اتمسكت بكلام امها شوق 

فكان ردها ليه 

لاء يا وليد انا مسافرتش مامي وبابي بس اللي سافروا لكن انا قاعدة عند خالو مهند لحد ما يرجعوا.. شكرا لاهتمامك ولاني جيت في بالك وانك حبيت تسأل وتطمن عليا "

بعتت الرسالة ورميت الفون ع السرير ومهتمتش ولسه بتلف وشها 

سمعت صوت رسالة وصلتها 

متوقعتش أبدا انها تكون رسالة من وليد او انه يرد عليها بالسرعة دي يعني قاعد ومستني منها ترد 

ففتحها لقت رده

بتشكريني ع حاجة واجبة عليا .. وعد انا بعتبرك مسؤلة مني ومن واجبي اطمن عليكي واتأكد انك كويسة وبخير.. وعد انتي متعرفيش انك مهمة اوي بالنسبة ليا ولو كان ينفع دلوقتي اني اتقدم ليكي واخطبك مكنتش هتردد لكني متأكد ان اهلك هيرفضوا لاني في نظرهم لسه عيل علشان كدا انا حابس حبي في قلبي لحد ما ندخل الجامعة ووقتها بقا مظنش انهم مش هيوافقوا ووقتها هيكون اسعد يوم في حياتي يوم ما افوز بيكي يا وعد... اوعي تكوني لحد غيري انا بعتبرك ليا من دلوقتي "

مع كل حرف وعد كانت بتقرأه قلبها كانت بيدق بشكل غير طبيعي بشكل مبالغ فيه كأن قلبها هيقف من الفرحة ايديها كانت تلج وبتترعش والابتسامة كانت مالية وشها كله 

فضلت تقرأ الرسالة اكتر من مرة ومع كل مرة كانت وكأنها بتقرأها لاول مرة فتتسع ابتسامتها اكتر واكتر وشعور غريب بيتملكها ف الوقت دا

وقالت ف نفسها

" وليد بجد طلع بيحبني ومعجب بيا زي ما انا معجبة بيه ومش بس كدا دا كمان عايز يتقدم لي وخايف مامي وبابي يرفضوا علشان احنا صغيرين ورسالته واضحة وصريحة بتقولي استناه لحد ما نكبر ووقتها يتقدملي ياااه انا اسعد واحدة في الدنيا دي كلها.... وانا كمان بحبك يا وليد.. بس لاء طبعا مينفعش اقوله كدا عيب.. يا خبر مامي لو شافت الرسالة دي هتزعل اوي انا الأفضل احذف الشات دا كله رغم اني مش عايزة احذف رسالته دي ابدا وافضل اقرأ فيها طول الوقت وليل ونهار... 

سكتت شوية تفكر وبعدين قالت 

لقيتها انا اسيب الرسالة علشان اقدر اقرأها وقت ما احب ولما مامي تكلمني تقولي انها راجعة احذفها علطول.. محدش هنا بيقدر يمسكن فوني ويفتش فيه غير مامي وبس علشان كدا اقدر اسيبها عادي دلوقتي

❈-❈-❈ 

في صباح يوم جديد 

على سفرة الفطار قالت شوق 

مالك عايزاك تعمل كم مشوار اكده توصل الحاجات دي لاصاحبها اللي هكتبهالك ف الورقة 

مالك عنيا حاضر يا ماما شوق هعمل كل اللي تطلبيه 

شوق ان شاء الله ربي يباركلي فيك يا غالي يا ابن الغالي ... وعايزاك بعد ما تخلص المشاوير دي وتوزيع الخير للناس تروح لادم وتطلب منيه يجهز نفسه علشان هنرجع القاهرة بكرة ان شاء الله.. عمك رائد الحمد لله قدر يظبط الامور اهنه ويسيب المركز ف ايد امينه هتحل محله وهيبقى ياجي يباشر الشغل ويشأر عليه من فترة للتانية 

مالك طب دا خبر كويس جدا.. علشان خاطر وعد اكيد متضايقة من تأخيرنا هنا لأكتر من اسبوع 

ضحكت شوق وعد بردو اللي متضايقة اننا اتأخرنا هنا ولا حد تاني 

مالك ضحك هو كمان 

قصدك ايه يا ماما شوق والله انا مش متضايق ولا حاجة بالعكس انا فعلا قصدي ع وعد 

شوق بابتسامة مطمئنة 

لاه متخافش ع وعد هي طول ما هي عند خالها مهاند هتكون مبسوطة اومال اني مبعتهاش عند اختها نغم ليه تقعد معاها لحد ما نرجع.. اولا لانها ونغم ناقر ونقير بالرغم من ان نغم اكبر منيها بياما بس منيش عارفة وعد حاطة نقرها من نقرها اختها ليه.. وثانيا ومهما كانت معزة يوسف جوز نغم عندي ومهما كنت بحبه لاني اني اللي مربياه مهينفش اسيب وعد تبات ف داره حتى لو كان يبقى جوز اختها وواثقة فيه مليون ف المية بس بردو.. انما مع مهند اني بنام وبحط ف بطني بطيخة صيفي ومطمنة على بنتي 

هنا اتكلم رائد ياريتني مسمعتش كلامها وغصبت عليها تيجي معانا بنت الاية وحشتني اوي حاسس اني من سنين مشوفتهاش البنت دي انا متعلق بيها بطريقة غير طبيعية اكتر كمان من نور ونغم رغم ان التلاتة بناتي وبحبهم جدا الا ان وعد حبي ليها له مذاق خاص ومختلف 

هنا قالت شوق بنوع من الدعابة 

طبعا يا رائد مش بنتي ولا انت عندك كلام تاني؟؟ 

 ضحك مالك وقال

اوباااا وقعت في شر اعمالك يادكتور رد بقا على زوجتك المصونة يا شووق يا جامد 

شوق بغضب بس يا واد انت بتقول ايه انت هتقلب زي يزن اخوك ولا ايه وربنا هديك بالبلغة

ابتسم رائد وقال 

وقعت ف شر أعمالي ليه .. دا حقيقي فعلا يمكن وعد ليها حب خاص ف قلبي لانها بنتك يا شوق بنت حبيبة قلبي اللي حبها مهما كبرت ف السن او انشغلت عنها بشغلي عمره ما اتأثر ولا اقدر اقلل اهتمامي بيها... انا بالرغم من اني كنت بحب مامة نور ونغم الله يرحمها الا اني معرفتش الحب اللي بجد الا ع ايد شوق.. شوق عاملة زي النسمة الجميلة اللي لما بتمر جنب حد بتسيب اثر طيب ف كل اللي حواليها بتلاقي الزهور بتتفتح... الجو بيتلطف .. الكآبة بتروح... الغمة بتنجلي... والشمس بتنور ... ايوا انا فعلا عرفت انا ليه متعلق بوعد لانها حتة منك يا شوق

وفضل رائد يبص لشوق بحب 

وشوق بالرغم سنين جوازهم اللي اكتر من ١٦ سنة لسه بتتحرج من اقل من كلمة غزل من جوزها 

علشان كدا وشها جاب الوان ونزلت وشها ف الارض 

اما مالك فاتسحب وقام خرج علشان يسيب لهم مساحة شخصية اكتر مع بعض 

وهو بيكلم نفسه بيقول 

طب ما هو لو الحب حلو كدا يبقى احط انا كمان الموضوع دا ف دماغي.. بس مش هقبل غير بواحدة تكون نسخة من ماما شوق .

شافه ادم اللي كان واقف قدام البوابة وبيتستعد علشان يدخل 

فضحك وقال 

ايه يا عم مالك... بتكلم نفسك ليه ع الصبح اللي شاغل بالك يتهنى بيه يا سيدي 

مالك صباح الخير يا آدم كويس انك جيت انا كنت لسه هجيلك 

ادم اديني جيتلك بنفسي اهو ... امي طلبت مني أجي علشان اساعدك ف توزيع شنط الخير بتاعة أبلة شوق لانها عارفة طبع ابلة شوق وعوايدها في كل مرة بتاجي اهنه وقبل ما تسافر لازمن تفرح حبايبها وتجبر بخاطرهم 

مالك 

الابلة شوق دي مدرسة كلنا بنتعلم منها 

هنا جت شوق وهي بتشوح مالك بفردة شبشبها

خد اهنه يا واد يا مالك يا بكاش يا مخادع انت 

مالك بتأوه من الضربة 

ااه فيه ايه يا ماما شوق انا عملت ايه بس وربنا انا بريء يا بيه 

شوق بقا يا واد اقولك تاخد الشنط وتوزعها ع الناس وتقولي عنيا ليكي يا ماما شوق وف الاخر تتسحب وتهرب علشان متوزعهمشي 

مالك وربنا أنتي كدا ظلمتيني يا ماما شوق يعني انا الحق عليا اللي اتسحبت ومشيت وخليت عندي زوق علشان يخلالك الجو مع الجو بتاعك تقومي تقولي اني بهرب منك 

شوق شوف الواد وعمايله اللي هتجنني يخلالي الجو ايه انت يا واد مفيش عندك خشا 

مالك ايه بس تنكري انها كانت لحظة شاعرية تتسجل ف التاريخ طب ياريت كنت سجلتها علشان اتعلم منها لاني معتقدش اني هعرف اقول كلام حلو للي هتجوزها زي ما عمو رائد كان بيقولك 

اتحرجت شوق اكتر وعنيها زاغت يمين وشمال 

فشد مالك الورقة اللي كاتبة فيها اسماء الناس وعناوينها 

ومسك ايد ادم وقال وهو بيبعد عن المكان

ادم بينا احنا من قدامها بدل ما تفوق من حالة الاحراج اللي هي فيها وتقلب عليا وربنا هلاقي فردة الشبشب التانية بتسلم ع وشي 

اما شوق لما لقته بيهرب 

ايوا اهرب اهرب مانت عارف انك عملت حاجة غلط بس مهمن هتهرب مسيرك هترجع اهنه وساعتها هعلمك الأدب يا ابن مهاند بس اما اشوف ابوك

.❈-❈-❈

في اليوم التالي 

كانت شوق بتسلم ع اهل البلد والكل جه علشان يودعها 

وخلاص جهزوا العربية والشنط وكل حاجة 

رائد ها لسه فيه اي شنط فوق يا شوق علشان اقفل البيت 

شوق لا أكده تمام كل حاجة في العربية خلاص الواد مالك فين هو وادم 

مالك انا هنا يا ماما شوق بس ادم اللي لسه مجاش 

شوق ليه يا واد انت مقلتلوش امبارح ولا ايه 

مالك لا قولتله اننا هنمشي بكرة ويجهز نفسه وقالي ماشي 

وف الوقت دا جه ادم 

وقال 

مع السلامه يا ابلة شوق نشوف وشك ع خير هنفتقدك بس متأكدين انك هترجعيلنا تاني 

شوق عتتكلم كأنك مش جاي معايا ليه يا واد يا ادم

ادم اجي معاكم فين يا ابلة شوق

شوق واه الواد ديه عايز يجنني هتيجي معانا علشان كليتك ودراستك ولا نسيت 

ادم قال بنبرة حاول يخليها عادية رغم الحزن اللي ف قلبه 

لا ما اني رجعت عن قراري يا ابلة شوق 

شوق ليه هو كلام عيال ديه ولا فيه فيه ايه يا واد يا ادم اركب يلا 

ادم مش هضحك ع نفسي يا ابلة شوق ان اتوسطولي وقدرت ادخل الكلية اللي انا عايزها هدفع فلوس دراستي واقامتي ف القاهرة منين .. انا هدخل اي معهد قريب من اهنه علشان اروحه واجي كل يوم واكون جار امي وابويا اللي ملهمش غيري 

هنا اتكلمت هناء بلهفة 

هنبيع القيراط اللي حيلتنا هنبيعه علشان تكمل علامك يا ولدي متشيلش هم هتقدر تصرف ع كليتك وسكنك ووكلك وشربك متقلقشي 

ادم لاه ياما الارض داي ارضك ورثاها عن ابوكي ابا عن جد ومحدش فيهم فرط فيها هاجي اني ع اخر الزمن وافرط فيها لاه مهقدرش اعمل اكده

شوق 

الارض هتفضل زي ما هي محدش هيفرط فيها وانت متشيلش هم لا وكل ولا شرب ولا مصاريف جامعة ولا اقامة اومال اني وعمك رائد روحنا فين 

ادم ربنا يبارك فيكم ويكتر من امثالكم يا ابلة شوق بس انا لو هفضل من غير ما كمل علام افضل عندي من اني اكون عالة ع غيري اني اسف يا ابلة شوق 

شوق واه عالة؟؟؟ انت بتتكلم جد .. ديه اني يفديك الساعة لما ادخل ابني الجامعة واصرف عليه وع تعليمه ولا انت متعتبرنيش كيف امك؟؟ 

ادم شوف ليا والله يا ابلة شوق بس دي حاجة ودي حاجة 

شوق مفيش بس .. وسيبك من كلامك العبيط ديه انت عندي كيف مالك تمام.. وهتفضل تحت رعايتي طول فترة دراستك لحد ما تخلص وتتخرج وتقدر وقتها تعتمد ع نفسك وتصرف ع نفسك وقتها هقولك يلا شوف حال سبيك

ادم طب انا موافق ع كلامك بس بشرط يا ابلة شوق 

شوق

 اشرط يا خويا لما نشوف اخرتها هي فين البلغة بتاعتي 

ادم ان كل مليم هتصرفيه عليا هيكون دين ف رقابتي هسده ليكي في اوانه 

شوق بابتسامة لرجولة ادم 

واني اموافقة يا ولا وانا يفديك الساعة لما اشوف ولدي عيصرف عليا من عرق جبينه وشغله بعد دراسته 

ادم ابتسم يعني انتي موافقة على شرطي؟ 

شوق موافقة طبعا وعلشان اكده هحسبها بالورقة والقلم وهسجلها قرش بقرش ايه قولك بقا اه ما هو اللي اوله شرط اخره نور

ادم مط شفته 

انتي بتاخديني ع قد عقلي يا ابلة شوق ولا ايه 

شوق بجدية 

لاه طبعا يا روح مامتك هناء اني بتكلم جد طالما انت هتمشيها ميري يبقى الحق ميزعلش هكتب كل مليم والمطلوب منك تسده ليا كامل متكامل ... بس مش دلوك ولا تفكر فيه دلوك ولا تشغل بالك بيه لكن اول ما تشتغل ويبدأ القرش يجري في يدك وبعد ما تأدي واچب امك وابوك عليك تبدأ تفكر ف الدين اللي عليك ديه ليا... ها ايه قولك اظن اكده عداني العيب 

ابتسم ادم وفرح اوي باقتراحها ومحسش ف الوقت دا انه رايح عالة عليهم او انهم بيمنوا ويعطفوا عليه وزاد اقبال ع الحياة وانه يتعلم علشان يقدر يحقق كيانه ومستقبله اللي طول عمره بيحلم بيه 

علشان كدا قال وهو بيجري يرجع ع بيتهم 

طب استنوني بس خمس دقايق بالثانية هندلى ع الدار اشد الكم هدمة بتوعي وچاي طوالي 

هنا نادت عليه امه هناء وهي بترفع الشنطة اللي ف ايديها 

استنى يا ولدي اني مجهزالك حاجتك وحالك ومحتالك من بدري يا حبيبي واني هغفل بردك ع مستقبل ابني وحلمه روح يا ولدي ربي يوفقك ويعطيك ما يحرمك

وقف ادم مكانه وبص لامه بامتنان وبعدين قرب منها وباس ايديها وقال 

ربنا ما يحرمني منيكي يا ماي انتي وابوي ويجدرني واقدر اردلكم جمايلكم عليا 

هناء عايزينك بخير وهنا يا ولدي ذاكر وانجح علشانا يا آدم 

ادم اوعدك ياما اني هعمل كل اللي اقدر عليه علشان ارفع راسكم لفوق 

هناء طول عمرك فخري ورافع راسي يا ولدي اني محظوظة اني عندي ولد زييك ربنا يخفظك ويخليك ليا يا حبيبي 

وبعد شوية سلامات وعياط من هناء لفراق ابنها 

سافرت شوق ورجعت ف طريقها لبيتها 

❈-❈-❈

بالليل وعد كانت ف اوضتها 

فجتلها رسالة ولما فتحتها كان مكتوب فيها 

" وعد انا جيت عندك قدام فيلا خالك مهند تعبت لحد ما عرفت اوصل بس مش مهم التعب المهم اني اطمن عليكي ممكن بس تخرجي ف البلكونة اشوفك واطمن عليكي وتدخلي تاني اسف اصل مش عارف انام او ارتاح او يهدا ليا بال غير لما اشوفك واتأكد انك كويسة بالله عليكي مترفضيش طلبي دا انا اول مرة اطلب منك حاجة"

وكأن وعد بقت منومة مغناطيسي فرحت بكلامه وكانت عايزة تتأكد فعلا انه جه لفيلا خالها حقيقي زي ما قالها ف الرسالة ولا لا 

طلعت بسرعا للبلكونة بعد ما حطت زعبوط بجامتها ع شعرها 

ولما شافته فعلا اتسعت ابتسامتها فلقته بيشاور ليها 

وبعد كدا بعتلها رسالة بيقول فيها 

ياااه انا مش مصدق نفسي القمر بذات نفسه اتكرم عليا وطل من الشباك لا كدا كتير انا مش مصدق نفسي حقيقي... النهاردة اجمل يوم في عمري انا كدا مش محتاج حاجة تاني خلاص... سلام يا وعدي 

قالها ومشي ووعد فضلت باصة ف الرسالة ومسهمة وحالة من العته والاكنشاح والفرحة واللخبطة والخوف ف نفس الوقت سيطروا عليها مفاقتش من حالتها دي غير ع صوت خالها مهند بيقولها ووشه كله غضب

مين دا يا وعد ..

يتبع