رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الثاني عشر 

تم النشر الجمعة

11/10/2024

وبعد حوالي اكتر من ٦سنين

ملحوظة انا جريت ف الأحداث لكن هرجع للأحداث المهمة بفلاش باك ف الوقت المناسب متقلقوش مفيش حاجة هتفوتكم 

❈-❈-❈ 

في مكتب خاص ف مقر القيادة العسكرية بالقوات المسلحة

 خبط العكسري وقال بعد ما سمع الاذن بالدخول 

سيادة الرائد مالك تحت امرك... سيادتك طلبتني 

لف مالك بالكرسي بتاعه اللي قاعد عليه بكل هيبة ووقار تخلي اي حد يخاف منه واتكلم بصوت جهوري جاد 

عملت ايه ف اللي طلبته منك يا اسامة 

العكسري أسامة

عملت اللي طلبته بالحرف يا باشا ودورت ع العنوان بنفسي وروحت بنفسي  لهناك وصلت الرسالة والأمانة زي ما طلبت وأكدت يا باشا 

سكت مالك شوية وبعدين قال اممم يعني كل حاجة راحت ف مكانها تمام والرسالة وصلت متأكد ؟؟

العكسري

متأكد مليون ف المية يا باشا زي ما انا متأكد اني واقف قدام حضرتك دلوقتي 

مالك بتفكير 

امم طيب روح انت يا اسامة شوف شغلك 

العسكري 

تحت امرك يا باشا عن اذنك 

واول ما مشي اسامة اتخلى مالك عن توب الجدية اللي كان لابسه قدام العكسري واتنهد بأسى وقال

 وبعدين يا آدم وبعدين... ليه بعدت وبعدت المسافات ما بينا كدا ليه

وافتكر اخر لقاء ليهم مع بعض 

فلاش باااك 

كان مالك ف مكتبه بيخلص شوية ملفات مهمة 

لقى الباب بيخبط وادم بيدخل منه وهو لابس لبسه العادي مش الفورمال 

فاستغرب مالك وقال 

ايه يا ابني انت رايح فين كدا وراك مأمورية ولا ايه مجاليش علم يعني احنا مش علطول في الهوا سوا 

ابتسم ادم بمرارة وقال 

انت الظاهر نسيت يا صاحبي ان سككنا من النهاردة مبجتش واحدة خلاص.. من النهاردة انت بقيت من سكة واني من سكة تانية خاااالص الله اعلم هتكون  السكة اللي هسلكها اني دلوك هتكون ازاي سكة لا كانت ع البال ولا ع الخاطر ولا عمرها جت حتى ف افظع كوابيسي بس اهو هي الدنيا اكده مهياش ع كيف حد والحمد لله على كل حال ماهو دوام الحال من المحال 

مالك  قال بانزعاج 

انت بتهزر صح انت عايز تمشي انت عايز تتخلى بسهولة كدا عن حلمك يا ادم انت اتجننت رسمي اكيد ولا جرا لعقلك حاجة فوق كدا واتعدل واظبط ف الكلام بدل ما افوقك بمعرفتي وانت عارف انا ممكن افوقك ازاي 

زاغت عيون ادم ومحاوش يظهر الضعف اللي فيهم قدام صاحبه وقال 

ياريته كان حلم وينفع افوق منه مكنتش هتردد اني اطلب مساعدتك في انك تفوقني يا ريته كان كابوس حتى انا كنت هتحمل لحد ما ينتهي لكنه للأسف حقيقة واقع مرير اتفرض عليا من غير ما يكون ليا رأي او فرصة ف التراجع وكأنهم خطفوا مني الحلم مرة واحدة  بعد ما بدأت احس اني خلاص قربت اقرب من حلمي واحقق نفسي واسمي ومستقبلي وخلاص هسد الدين اللي عليا لابلة شوق

جم هما فجأة قالولي خلاص كفاية عليك لحد كدا انت هنتهب استوب لحد هنا وكل حاجة بح فركش انسى مستقبلك وشغلك وحياتك المهنية اللي كنت بتحلم بيهم وحطتهم ف طي النسيان لأنهم خلاص مبقاش ليهم وجود .. ياريت كان ليا اختيار يا مالك يا ريت... مكنتش هختار طريقي اللي ماشي فيه دا... الطريق اصبح كله شوك طريق محفوف بمية نار وقنابل انا مش قدها هتهدني من اول خطوة هخطيها لكني هعافر هعافر علشان اعيش الكم سنة ف عمري واتمنى انهم ميكونوش كتير علشان اقضيهم واخلص من اللي بعانيه دلوقتي... عن اذنك يا صاحبي انا جيت بس اودعك وبقولهالك خلاص مبقاش ليك اي علاقة بيا انت خلاص بقيت ف سكة واني ف سكة متحاولش تختلط بيا ف يوم من الأيام لان وقتها لو حاولت تقرب انا اللي هبعدك سلام يا صاحبي 

ولسه مالك هيتحرك من مكانه علشان يمسك ادم 

ادم شاورله 

اثبت مكانك انا قولتلك ايه .. خلاص انتهى يا مالك كل حاجة انتهت سلام ياللي كنت صديقي سلام يا حلم انتهى قبل ما يبدأ 

بااااك 

رجع مالك من ذكرياته المؤلمة 

ودمعة حارة فرت من دموعه خرجت من محبسها جوة عنيه علشان تواسيه وتطبط عليه وتضمه بحنان يمكن تخفف النار اللي جواه واللي حاسس بيه 

فخرجت منه اهة ألم على صاحبه اللي مش عارف يوصله من وقتها 

اااه يا ادم اااه 

❈-❈-❈

في شركة الرؤساء جروب 

طرقع يزن صوابعه وفضل يحرك رقبته يمين وشمال وبعد كدا بدأ يدلكها بإيديه 

اااه لا مش قادر يخربيت كدا يا جدع انا رقبتي اتلوحت ومفاصلي زنهرت وضهري اتقسم نصين هو فيه كدا دا احنا اتسحلنا سحلة سودا متسحلهاش مسحول ف تاريخ المتسحولين كلهم ايه دا ايه دا يا جدع بجد 

ضحك اياد اللي كان قاعد ع مكتبه بهدوء ونضارته الطبية اللي ع عينه بتزينه وبتزيده وقار ورزانة 

انت بتقول كدا من اول مرة تتنزق فيها اومال انا اقول ايه اللي بقالي سنين ع الحال دا لما طلع عيني 

يزن قام وقف وهو بيلف يمين وشمال بيعمل تمارين لضهره 

لا يا عم انت الله يكون ف عونك انا مستغرب انت ازاي متحمل طول السنين دي كلها الوضع دا ... دا انت كدا مش عايش انت زومبي يا بني انت ازاي كدا وازاي ساكت انا من يوم وطلع روحي ما بالك انت.. ازاي عمو خالد بيعمل فيك كدا انت متأكد انك مش ابوه وانه مش ابنك !!! 

اياد بتقول ايه يا ابني انا اللي ابنه وهو بابا 

يزن ياعم سبت كل كلامي ومسكت ف دي انت ازاي ساكت على كدا مبتتكلمش ليه 

نفخ اياد بهم وخلع النضارة من ع عنيه 

وهيفيد بإيه كلامي يا يزن انا ياما اتكلمت وياما اشتكيت بس فكرك كلامي وشكوتي دي عملت حاجة او اثرت بل بالعكس اتهمت وقتها بإني مقصر وعديم المسؤولية ومش راجل وكتير الشكوى ومينفعش اكون ف منصب رئاسي واتنقلت من مدير ف الشركة لحتة موظف عادي بل اصغر من عادي كمان... انا تعبت بقالي سنين علشان ارجع لمكاني هنا من تاني ... شوف انا اكبر منك بكم سنة بس لسة معرفتش اعمل حاجة ولا حتى اكون نفسي زيك ولا حتى اخطب عسل بنت عمو عساف زيك .. انت قدرت تخطب لوجي وعندك عربيتك وبدأت تكون نفسك وحياتك الشخصية انما انا لسه قاعد محلك سر لا عارف اتقدم خطوة ولا حتى نص خطوة بحاول ع قد ما اقدر ما ارجعش خطوة لورا ومهدش اللي بنيته

 اكبر انجاز عندي اني اشتريت عربية بالتقسيط اهي عربية مهكعة كدا بتمشي بالزقة بس اهو الاسم معايا عربية ارحم من شحططة المواصلات او اني استلف عربيتك او عربية بابا كل شوية 

اشفق عليه يزن وع حاله وبصله ببؤس 

وقرب منه وحط ايده ع كتفه 

انا مش فاهم فيه ايه اللي بيجرى بجد 

انا مكنتش اعرف دا الا قريب اوي وقت ما مسكت الشغل ف الشركة بعد ما خلاص خلصت جامعة واستغربت معاملة عمو خالد الحادة ليك رغم انه معايا ومع اي حد ف الشركة ودود وكويس اوي 

اياد قاطعه وقال وهو بيتنهد وبيغمض عينه ثواني وبيفتحها 

ايوا عارف ومعايا انا بيركب الوش الخشب وبيشخط وبيزعق ويخصم من المرتب كمان دا عمره ما ابتسم في وشي حتى مع اني ابنه مش عارف ببعاملني كدا ليه

يزن حس ان اياد بدأ يتكلم بخنقة فحب يخرجه من المود وقال

ولا يكونش جوز امك يالا دا مش ابوك وغيران منك وعايز يطلع عقده عليك 

ابتسم اياد بسخرية 

تعرف اني ف يوم من الايام فكرت ف الفكرة دي انه مش ابويا اني مش ابنه اللي من صلبه!! تفتكر يا يزن انا مش ابنه الحقيقي !! 

يزن محبش ان اياد يخوض تفكيره ف الموضوع دا فقال وهو بيدعي انه بيضحك 

ياعم انت ايه ما صدقت عايز تطفش من ابوك علشان بيشد عليك شوية ما عندك اهو ابويا دنجوان زمانه منشفها عليا ع الاخر ومش موافق ع جوازي دلوقتي من لوجي وكل ما اسأله يقولي من غير ليه هو لأ وبس تحس يا عم انهم مخلفينا علشان يذلونا هو فيه كدا بجد

ظن ان اياد هيرد ع دعابته لكنه لقاه ساكت تماما فقال 

لااا الوضع دا ما يتسكتش عليه انا ياما قولتلك اكلم ماما شوق تدخل ف الموضوع دا والله العظيم كانت هتحله وابوك هتغير معاك تماما بس اسمع مني وخليني اقولها اللي بيحصل اسمع مني وخليني اقولها رافض ليه 

اياد لنفي تام

لالا تقولها ايه ... هقولها  ماما شوق بالله عليكي شوفيلي حل ف معاملة بابا ليا.. ليه  كنت عيل مثلا بيشتكي من قمع ابوه؟

يزن 

مش دا اللي بيحصل واللي انا وانت شايفينه بعنينا ولا ايه 

اياد 

لا لا مش انا اللي هشتكي انا عاهدت نفسي اني مهما حصل مش هشتكي ابدا واساسا شكوتي مش هتفرق معاه فريح دماغك بس اوعدني يا يزن ماما شوق متعرفش حاجة بالموضوع ده والا هزعل منك ومهعرفكش بعدها 

بصله يزن بانزعاج صدق يا يالا انك رخم وعكرت مزاجي 

ابتسم اياد وقال بمكر 

لو مزاجك متعكر روح لعمك امير يروقهولك ها 

قالها وغمز ليه 

يزن بمكر اه عمي امير ايوا دا بيحبي حب يا جدع من يوم ما خطبت لوجي بنته وانا كأني سارق سريقه منه بيبصلي وكأنه عايز يخنقني 

ضحك اياد المرة دي من كل قلبه وقال 

طبعا ما هو دا فعلا انت سارق قلبه منه عايزه يعاملك ازاي دي بنته الوحيدة وانت عايز تشاركه فيها ومش بس كدا  لا وتاخدها منه فتخيل انت بقا اظن اللي بيعمله معاك دا اقل واجب 

يزن يا راجل وانت عرفت كل دا لوحدك تكونش كنت اب قبل كدا ولا ايه 

قالها وفجأة صرخ بعلو صوته 

اوباااا روحت فطيس يا يزن انا نسيت معادي مع ماما شوق النهاردة معادنا من كل شهر نتجمع فيه وهي بتحب نكون هناك بالثانية ربنا يستر ومتقلبش عليا 

اياد بهدوء لا الحمد لله ماما شوق بتقدر تأخيري ومش بتقول حاجة 

يزن اه ما انا يزن ابن البطة السودا لو تأخرت لحظة بس بتقابل بالبلغة ع دماغي لحد ما تطرقع وتصوصو كدا من الضرب

ضحك اياد ومقدرش يتحكم في انه يمنع ضحته ضحكة خلته يتناسى كل وجعه وهمه للحظة 

وقال 

استنى انا جاي معاك انا خلصت اللي ورايا واقدر اجي معاك دلوقتي استنى بس احط الملفات المهمة ف الخزنة 

يزن تمام ماشي يلا بينا بس هتركب معايا ف عربيتي مش عربيتك المهكعة خلينا ننجز 

اياد طب وعربيتي ما انا عايز اجي بيها الشغل بكرة ان شاء الله 

يزن يا عم انت بتسمي دي عربية دي عايزة ونش يجي يشيلها يرميها ف مقلب الخردة .. متشلش هم انا هبقا اعدي عليك بكرة نروح سوا 

اياد 

لا يا عم حتة الخردة اللي مش عاجباك دي بتوصلني لشغلي ف معادي انت هتأخرني ومش هيهمك تأخير انت عايز بابا يجازيني زي كل مرة لا انا ما صدقت حالي يتعدل شوية 

يزن خلاص خلاص انت هتعيط ماشي وامري لله يلا ننزل وهحاول ازقك بعربيتي 

قالها وحط ايده ع كتف اياد ونزلوا من الشركة سوا 

اياد بحرج انت بتعمل ايه ما تنزل ايدك يا يزن 

يزن ايه في ايه مالك مكسوف ليه كدا انت محسسني اني بعمل حاجة غلط ولا يمكن بتحرش بيك يا جدع 

اياد وهو بيشيل ايد يزن 

لا يا زفت وبطل الفاظك دي بس احنا مدراء الشركة مينفعش نظهر بالمنظر دا قدام الموظفين مهما كان لازم يكون لينا هيبتنا بردو واحنا ماشيين 

يزن رفع حاجبه وقال باستنكار 

وانا لما احط ايدي ع كتف صاحبي يبقى كدا بقل من هيبتي ايه التفكير العقيم دا .. طب ايه رايك انا مش هنزل ايدي وهفضل ع وضعي لحد تحت ووريني هتعترض ازاي 

مقدرش اياد انه يتكلم لكن ظهر ع وشه طيف ابتسامة بسيطة لان يزن قدر بتلقائيته وروحه المرحة انه يكونله مكان ف قلب اياد البائس 

وبالفعل نزلوا لتحت وهما ع وضعهم دا 

لكن اياد اول ما شاف والده ارتبك ونزل ايد يزن بسرعة ووقف انتباه وكأنه عكسري ف الجيش بيقدم التحية العسكرية للظابط بتاعه 

فقال يزن باستغراب 

ايه يا عم مالك اتخشبت فجأة ولا كأن عقرب قرصك 

ولسه مكملش سؤاله لقا خالد قدامه ففهم بسرعة تصرف اياد 

فقال عمو خالد ازي حضرتك 

خالد بهدوء ازيك يا يزن عامل ايه يا حبيبي 

يزن تمام يا عمو الحمد لله 

خالد بحدة لإياد 

وانت نازل وسايب الشركة ليه دلوقتي ؟ 

اياد وهو متلخبط ومرتبك 

اا انا ما هو اا انا خلصت شغلي كله وااا اانا 

يزن اشفق ع اياد وارتباكه وخوفه من ابوه فقال 

عمو انا واياد خلصنا كل حاجة وكل حاجة تمام وتحت السيطرة ودلوقتي رايحين عند ماما شوق حضرتك محتاج مننا حاجة 

خالد بص شوية لابنه بحدة وبعدين وجه كلامه ليزن 

تمام يا يزن روحوا انتم وانا هروح اجيب فداء وكيان واحصلكم ع هناك 

ومشي خالد ع عربيته وركبها وبعد عنهم 

فهنا اتنفس اياد الصعداء ووقف باريحية الحمد لله عدت ع خير 

يزن هز دماغه وضم شفته بأسى 

مش فاهم هتفضل ع الوضع دا لحد امتا انت حقيقي بقيت بتترعب من ابوك 

اياد بعيون زايغة 

مش حكاية خوف دا احترام يا يزن انا مش بخاف من بابا 

يزن فتح باب عربيته وهو بيقول 

انا بحترم بابا ومش بعمل اللي بتعمله انا بتكلم معاه عادي وبكل اريحية مش بجدية ورسمية كدا علاقتك مع عمو خالد لازم تلاقي ليها حل بأسرع وقت يا اياد.. انا بتكلم علشان مصلحتك انت صاحبي ومصلحتك تهمني ومستعد اساعدك كمان بس انت قول بس 

اتنهد اياد وسكت شوية وقال 

خلينا نلحق وقتها ونروح لماما شوق يا يزن 

يزن هز كتفه 

ماشي براتحتك يلا بينا

يتبع