رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الخامس عشر 

تم النشر السبت

19/10/2024

اتضايقت وعد من انهم مش عايزين يقولولها العلبة فيها ايه وقالت 

بقا كدا طب والله لو مقولتش العلبة دي فيها ايه لاروح اقول لخالو امير يشوف شغله معاك 

وجت تتحرك من مكانها فوقف يزن قدامها علشان يمنعها من انها تتحرك 

استني يا وعد خدي هنا والله لو قولتي حاجة لازعل منك جامد وبعدين انتي من امتا وانتي فتانة يا وعد 

وعد مليش دعوة عايزة اعرف العلبة دي فيها ايه 

يزن وانتي مالك اما حاجة عجيبة اوي واحدة جايبة لخطيبها هدية انتي بتحشري مناخيرك ليه 

وعد 

بقا بتخبي عليا يا يزن يعني الحق عليا اني وصلت ليك الهدية 

يزن ياختي مش لما اعرف هي فيها ايه العلبة اساسا 

وعد يبقى افتحها نشوفها سوا يلا 

يزن لا مش عايز افتحها دلوقتي 

وعد صدق انك رخم 

يزن عارف روحي بقا ماما شوق بتنادي عليكي 

وعد لا مامي مش بتنادي عليا 

يزن يا باي ع اللزقة طب بتنادي عليا انا سلام 

قالها ومشي وسابها فقالت بضيق 

ماشي يا يزن بتخبي عليا انا بس لعلمك هعرف يعني هعرف 

ومشيت وهي بتنفخ 

رخمين اوي وربنا هعرف مسيري هعرف فيها ايه اممم طب اروح اجرب اسأل لوجي تاني 

❈-❈-❈

فاق ادم من اغماءته اللي مش عارف هي كانت طويلة ولا قصيرة لقا نفسه مكبل الايدين والرجلين وقاعد ع كرسي ف مكان بالرغم من أنه ضلمة الا ان الإضاءة الخافتة دي  كانت كافية لادم انه يشوف المكان حواليه 

ولما شافه دب الرعب ف عينه وعرف فورا هو فين وعرف انه مش هيخرج من هنا بسهولة 

وبالرغم من الخوف اللي جواه ودا طبعا لانه لوحده وضعيف ف الوقت الحالي ومكبل كمان والكترة تغلب الشجاعة الا انه حافظ ع رباطة جأشه وتحلى بالهدوء الشديد وهو قاعد بل وغمض عينه كمان وانتظر فترة لا بأس بيها منتظر تحرك منهم 

لحد ما بعد شوية بدأ يسمع خطوات اقدام بتقرب منه 

ففتح عينيه 

فلقا قدامه اربع اشخاص ملثمين ومش باين غير عنيهم ولابسين جلابيب فقدر ادم انه يتعرف عليهم ع الفور 

وقال ف نفسه المطاريد هو دا اللي كان ناقصني ... انا لو كنت ف احسن حالاتي كنت خلصت عليهم كلياتهم.. لكن حاليا مش هقدر او بمعنى اصح مبقاش ليا الحق ف اني اطاردهم دلوك.. بس هما عايزين مني ايه معقول عرفوا بموضوع طردي وجايبني اهنه علشان يشمتوا فيا؟؟؟ 

خرجه من حديثه مع نفسه صوت واحد منهم والأكيد انه زعيمهم 

فوقت بدري عن المتوقع حلو جوي لانك لو مكنتش فوقت لحالك كنا هنفوقوك بطريقتنا  

رد ادم بكل قوة وشموخ 

عايزين ايه يا مطاريد جايبني اهنه ليه وكيف تجرؤوا انكم تعملوا امعاي اكده انتوا مش عارفين اني مين ولا ايه 

ضحكة سخرية سمعها منهم وبلعها بمرارة وهما بيقولوا 

هههه تبقا مين يا ابن الجنايني ولا تكونش فاكر نفسك لساتك رائد زي ما كنت ولساتك باشا وينضربلك تعظيم سلام ههههه انت الظاهر لساتك مفوقتش من الضربة اللي كتلها ع نافوخك تولتك 

ادم قال ف نفسه 

كيف ما توقعت عيتمسخروا عليا وشمتانين والله ورجعت جربوع يا ادم واللي يسوا واللي ميسواش يتجرؤوا عليك 

كبير المطاريد 

عامة احنا فيها واني وانت عارفين انك منى عينك ترچع كيف ما كنت ليك قيمتك ومركزك وهيبتك اللي ضيعتها منيك الحربية وداست عليك تحت مداسها ... لو وافقت ع كلامي وبقيت واحد منينا كل اللي عتحلم بيه وبتتمناه هيرجع تاني واحسن مليون مرة واهو بالمرة هتقدر تنتقم براحتك من اللي خذلوك وخلو بيك ومن اول غلطة رموك رمية الكلاب طريد لا لاقي تاكل ولا عارف تعيط ولا حتى ترفع راسك بين اهل ناسك وحتتك ها ايه قولك 

بصله ادم بغضب شوية وبعدين قال بحدة 

اكون منكم انت انجنيت اني استحالة اكون كيف حثالة زييكم ومهمن عصفت بيا الحياة ورمت بيا لسابع ارض عمري ما هكون منكم لو انطربقت السما على الارض 

بصله التاني بانزعاج واكفهر وشه بغضب 

اوعاك تكون فاكر نفسك حاجة اياك انت حشرة ادهسها تحت مداسي.. اني بس اشفقت عليك وع حالك كيف اللقيط اللي مرمي ف الشارع قولت أرأف بيك واخليك تشتغل مع رجالتي معروف يعني هعمله فيك وهقولهالك ع بلاطة اكده ايوا اني عايزك تشتغل امعاي علشان هطلع بيك بموصلة عتلزمني... انت كنت امعاهم وواحد منيهم يعني هتعرف عنيهم كاتير وهتنفعني في شغلنا وتسهيل تنقلاتنا وشئت ام ابيت عتشتغل امعاي وكلامي امعاك ديه منيش بخيرك علشان تكون واخد بالك بس انت عتشتغل امعانا ورچلك فوق رقابتك انت فاهم 

بصله ادم بهدوء شديد وقال بكل ثقة 

وريني عتجبرني ازاي ع حاجة اني منيش عايزها 

بصله وهو بيهز راسه فظهر عدد كبير من المطاريد الملثمين وكلهم اتلموا حوالين ادم 

فقال الزعيم بنظرة سخرية عرفوه ازاي هيوافق يا رجالة، ما عاش ولا كان اللي يقول لزعيم المطاريد لاه 

والتلم المطاريد كلهم حوالين ادم واشبعوه ضربات مميتة لحد ما اغمي عليه شبه جثة هامدة لا حول ليه ولا قوة بينزف من كل حتة...

❈-❈-❈

تاني يوم 

عسل كانت ف الجامعة بتحضر للماجستير وكان عندها معاد هناك مع الدكتورة اللي بتشرف ع رسالتها 

وف طريقها لهناك وف ساحة الجامعة 

نادى عليها شاب تقريبا ف سنها او اكبر منها بسنة او اتنين وقال 

ااا انسة عسل انسة عسل 

وقفت عسل وبصت وراها وهي متضايقة مين اللي بينادي عليها كدا وسط الطلبة مكانش موقف محبب عندها انه يعمل كدا ويعرف الكل اسمها

فوقفت بانزعاج 

فلقته قرب منها وبيقول انسة عسل من فضلك معلش هاخد من وقتك ثواني بس 

قالت وهي بتنفخ 

هو انا اعرف حضرتك!! 

قال بسماجة 

اا لا بس انا طبعا اعرفك عز المعرفة 

عسل بضيق وانا معرفكش عن اذنك ولو سمحت متناديش عليا بالشكل دا تاني لاني وقتها هتصرف تصرف مش هيكون محبب بالنسبة ليك 

فرد فؤاد ااا انا اسف لو كنت ازعجتك مش قصدي والله بس انا كنت عايز اتكلم معاكي 

قالت عسل وهي بتمشي من قدامه 

اسفة مش هينفع عن اذنك 

مشي بسرعا ولحقها ووقف قدامها 

اا استني بس يا انسة عسل على فكرة انا والدي شريك والدك انكل عساف ف الشركة الجديدة يعني احنا يعتبر عيلة واحدة واصدقاء وحبا..يب وكدا 

قال كلمة حبايب بطريقة ماقطعة وكأنه محرج وهو بيقولها 

عسل وهي مازالت ع وجومها 

طب بابي وشريك باباك انا ايه دخلي في شغلهم ايه علاقة دا بدا مش فاهمة حضرتك موقفني ف نص الطريق ومعطلني علشان تقولي كدا؟؟ 

فؤاد ارتبك من حدة عسل وجفاءها ف الكلام معاه 

فقال ااا هو انتي متضايقة مني ليه؟؟ 

عسل مطت شفتها باستياء 

يا استاذ يا محترم انا معرفكش اصلا علشان اتضايق منك عن اذنك لاني مش فاضية وحضرتك معطلني 

فؤاد 

انا عارف انك مستعجلة علشان تلحقي دكتورة هناء علشان رسالة الماسجتير بتاعتك بس عايز اقولك ان دكتورة هناء اعتذرت ومش هتقدر تيجي النهاردة لانها حصلها ظرف صحي فمفيش داعي للاستعجال اما بالنسبة لنقطة انتي متعرفنيش فأنا مستعد اننا نتعرف وانا وقفتك علشان كدا!! 

عسل باستنكار 

وقفتني علشان تتعرف عليا؟؟ انت بتتكلم جد ولا بتهزر يا استاذ انت 

فؤاد بسذاجة 

اا فؤاد اسمي فؤاد بابا سماني ع اسم جدو الله يرحمه اا اصله بيعزه اوي وانا كمان كنت بحب جدو اوي الله يرحمه كان طيب جدا وعمره ما زعلني او حتى رفض ليا طلب وااا 

هنا قاطعته عسل بانزعاج اكتر كان واضح ع معالم وشها وصوتها اللي علي شوية 

وانا مالي... وانا مالي يا استاذ انت بعيلتك وجدك اما انت غريب بشكل هو فيه كدا 

فؤاد وهو بيعدل نضارته ع عينه 

ااا ايوا فعلا انا الكل بيقولوا عني غريب شويه ودا لاني معظم وقتي كنت بقضيه برا مصر علشان كدا هتلاقي طباعي شوية مختلفة بس ع فكرة انا لسه محتفظ بالأصول والعادات الشرقية بتاعتنا الجميلة وااا 

عسل نفخت بضجر 

اللهم طولك يا روح ااا عامة تشرفنا يا استاذ ااا 

فؤاد بلهجة سريعة 

اا فؤاد اسمي فؤاد يا انسة عسل لو حاسة الاسم تقيل شوية عليكي ممكن تقوليلي يا فوفو زي ما صوحابي والشلة بينادوني 

عسل ابتسمت بسماجة 

هو من ناحية تقيل فمش اسمك بس اللي تقيل الله المستعان... عن اذنك يا استاذ ااا 

ومشيت وسابته وهي بتكلم نفسها قال فوفو قال بقا مش مكسوف من نفسه وهو بيقولها 

قالتها وانخرطت ف الضحك وهي بترجع لعربيتها من تاني 

وفتحتها وركبتها ولسه هتدور العربية 

سمعت حد بيخبط ع باب العربية

ففكرته هو فلفت وشها 

بتأفف ولسه هتزعق 

انت تااااا...

لقت ....

❈-❈-❈

مادونا كانت ف مكتبها بتشتغل 

لكن كلام والدتها خلاها مش عارفة تركز ابدا 

فسابت شغلها وقامت وقفت 

وبعدين بقا ف الموضوع دا انا مش ههدى ولا هرتاح الا لما اخلص منه بس ازاي دا ذكي جدا ومش سهل ابدا 

ففضلت رايحة جاية ف المكتب تفكر هتعمل ايه 

اممم طب اعمل ايه انا فكرت اتجسس عليه وادور ع مكان معين احط فيه كاميرات المراقبة لكن ملقتش ولا مكان مناسب

 هيكتشفه بسهولة لانه فعلا مش سهل طب احاول اشوف طريقة تانية غير كاميرا المراقبة دي ولا اعمل ايه... وبعدين يا مادونا عمرك ما كنتي بالضعف دا فوقي كدا وركزي ومتخليش حزنك يسيطر عليكي انتي هتفرحي وقت ما تنتقمي منه ايوا الانتقام هو اللي هيرجعلك حقك وروحك التايهة منك ويحبب مامتك فيكي من تاني هو دا الحل 

واثناء شرودها خبط العسكري 

فقالت ادخل 

فدخل العسكري وادى التحية العسكرية 

تمام يا فندم البيانات اللي حضرتك طلبتيها كلها ف الملف دا 

مادونا تمام اوي يا صابر ناديلي ع حضرة الظابط امجد وخليه يجيلي حالا يسيب اللي ف ايده ويكون عندي دلوقتي 

العكسري تمام يا فندم هبلغه 

ولما مشي العسكري 

رجعت مادونا لشرودها 

انا وراك والزمن طويل يا اااا يا حضرة الرائد 

وما هي الا لحظات والظابط امجد كان وصل قدام مكتبها 

فخبط 

فقالت ادخل يا امجد 

امجد دخل وادى التحية 

تحت امرك يا باشا انتي طلبتيني خير 

مادونا لفت وقعدت ع مكتبها 

تعالى يا امجد اقعد 

فلما قعد 

انت طبعا عارف اني قد ايه بثق فيك وف قدراتك وولائك 

امجد الحمد لله يا فندم دي شهادة اعتز بيها 

مادونا تمام اوي دلوقتي هتسمع اللي هقولك عليه وتنفذه بالحرف مفهوم 

امجد مفهوم اكيد يا فندم هعمل كل المطلوب مني 

وقالتله مادونا ع كل حاجة 

ونسيبها ونروح لمالك 

❈-❈-❈

اللي كان بيكلم شوق ف الفون

مالك ايوا يا ماما شوق انا اتصلت ف وقت مش مناسب ولا ايه 

شوق 

لاه يا ضنايا انت تتصل ف اي وقت براحتك خير يا غالي عايز حاجة؟؟ انت كنت لسه عندي يعني واعتقد انك دلوك ف شغلك مش اكده 

مالك ايوا ف مكتبي فعلا بس اتصلت بيكي علشان ءأكد معادك اللي هتروحي فيه لآدم يا ماما شوق علشان ابعتله مع المرسال 

شوق في اي وقت اني متاحة بإذن الله شوف  انت الوقت اللي يناسبه هو 

مالك بهم 

ما انا مبقتش عارف ولا فاهم اي حاجة ادم كأنه اتحول لحد معرفوش عامة انا هبعتله انك هتروحي بعد بكرة بعد العصر كدا كويس؟؟ 

شوق مناسب يا مالك ماشي حتى اكون جهزتله شوية وكل يتأوى بيهم 

مالك سيبك من الأكل يا ماما ادم مش هيقبله اصلا 

شوق مالك انت يا ولا وبتتكلم بالنيابة عنيه ليه هيقبله غصبا عنيه كمان هو يقدر يرفضلي طلب .. طب خليه يرفض بس 

مالك ياريت ترجعيه لعقله تاني يا ماما شوق رجعيلي ادم صاحبي من تاني 

شوق هيرجع يا ضنايا هيرجع انت بس قول يا رب زي ما وصيتك 

مالك بدعيله دايما يا ماما اكتر ما بدعي لنفسي حتى 

شوق اصيل يا واد يا مالك تربيتي تمرت فيك ربنا ينفع بيك يا غالي 

مالك ربنا يخليكي لينا يا ماما شوق بعد بكرة هعدي عليكي بنفسي اوصلك لمكانه وانتظرك ف العربية لحد ما تخلصي 

شوق ماشي بإذن الله تعالى 

❈-❈-❈

يزن كان ف مكتبه بينفخ وزهقان علشان اياد أتأخر عليه 

وبعدين بقا اياد اتأخر ليه انا مش متعود اتزنق ف الشغل لوحدي كدا دا ضغط انا متحملوش ربنا يكون ف عونه متحمل دا كله ازاي انا لو منه اتجنن

قالها وفتح درج مكتبه وبص لمادلية المفاتيح اللي عملتها ليه لوجي والي كانت ف العلبة اللي بعتتها مع وعد .. كانت عبارة عن مادلية مشغولة يدويا مكتوب عليها اول حرف من اسمهم L&Y

يزن كان معجب بيها اوي وفضل يبص ليها باعجاب ويقول 

والله انتي اللي مهونة عليا الشغل دا.. لولا اني كان لازم اشتغل واثبت لعمو امير اني قد المسؤلية علشان يوافق اني اتجوزك مكنتش سألت ف اي حاجة ولا اي حد وسبت كل حاجة تضرب تقلب ... امتا بقا يا لوجي امتا انا بحبك من قبل ما افتح عيني ع الدنيا حتى

وف الوقت دا الباب خبط 

وقالت السكرتيرة مستر يزن ممكن ادخل 

فقال يزن 

ادخلي يا سامية 

سامية ... مستر يزن فيه واحدة عايزة تقابل حضرتك برا 

يزن باستغراب 

واحدة!! واحدة مين!! 

سامية.... مش عارفاها ومش معاها معاد مسبق 

يزن... ودي مين دي وعايزة ايه 

فدخلت هي ووقفت ع الباب جنب سامية وقالت بصوت كله ثقة وغرور 

انا يا يزن انت نسيتني ولا ايه !! 

كانت هدومها الملفتة وريحة البرفيوم اللي هي حاطاه طاغية جدا مع الفول ميكاب اللي ع وشها 

خلت يزن يدوخ لثواني معدودة قبل ما يرجع لعقله شبه كليا وهو بيقول 

انتي!!!!

يتبع