رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الثالث والعشرون

تم النشر الأربعاء

27/11/2024

وصل اياد للفيلا وهو في قمة غضبه 

اول ما شافته فداء قالت 

اياد اول مرة ترجع بدري حمدا لله على السلامة يا حبيبي بس خير انت نسيت حاجة ولا ايه 

دخل اياد على اوضته وقال بنبرة سريعة 

لا منستش حاجة كنت ناسي نفسي ودلوقتي افتكرتها 

فداء مفهمتش حاجة فقالت 

بتقول حاجة يا اياد 

اياد وهو بيخرج الشنطة من الدولاب 

لا يا امي سلامتك مش بقول حاجة 

راحت وراه علشان تعرف بيعمل ايه فلقته بيخرج هدومه من الدولاب وبيحطها ف شنطة السفر فقالت باستغراب 

انت بتحضر شنطة سفرك ليه خير وراك سفرية شغل ولا ايه 

اياد وهو مش بيبص ع امه وبيكمل حط هدومه في الشنطة 

حاجة زي كدا يا ماما 

فداء قربت منه

يعني ايه حاجة زي كدا ما تفهمني يا اياد فيه ايه انت رايح فين بالظبط ومالك كدا شكلك متضايق 

اياد بعصبية 

وحضرتك من امتا بتهتمي اروح فين او اجي منين 

فداء 

لا طبعا يا اياد امرك يهمني وكل تحركاتك لازم اكون عرفاها انت متضايق ليه انا زعلتك في حاجة انا عملت حاجة ضايقتك؟؟

اياد 

مشكلتك انك معملتيش يا ماما معملتيش

فداء 

مش فاهماك يا اياد من فضلك سيب اللي ف ايدك واقعد كدا وفهمني فيه ايه 

اياد 

مبقاش يفرق خلاص يا ماما انا بلم هدومي وماشي مش قاعد هنا ثانية واحدة 

فداء بصدمة 

ايه!! حصل ايه لكل دا انت اتخانقت مع خالد ف الشركة مش كدا انا حاسة بدا باين ع وشك .. اتكلم احكيلي يا اياد 

خلص اياد لم هدومه وقال وهو بيقفل الشنطة وبيدور ف المكتب ع اي حاجة تخصه من اوراق وغيرها علشان يحطه في شنطة الايد الصغيرة 

والله ابقي اسألي جوزك وهو يقولك كل حاجة 

فداء 

ايه جوزي!! اياد ايه كلامك دا انت مكنتش كدا مهما كنت متضايق مينفعش تتكلم بالاسلوب دا 

اياد قال بضجر 

اسلوب ايه اللي ينفع ها... طب بالله عليكي قوليلي كدا الراجل اللي احنا عايشين معاه دا يقربلي ايه ما هو مش معقول يكون بابا ابدا... دا لو كان لاقيني في الشارع او قدام باب جامع كان هيعاملني معاملة افضل من كدا... انا كنت شاكك انه مش بابا فعلا  ودلوقتي اتأكدت ياريت تقوليلي الحقيقة وريحيني 

حركت فداء راسها بعدم تصديق 

انت بتقول ايه يا اياد خالد باباك ليه بتقول كلامك دا انا مش قادرة استوعب 

اياد بعصبية

 مش قادرة تستوعبي ايه بالظبط مستغربة كلامي ليه يا ماما ومش مستغربة معاملته ليا بيعاملني معاملة جوز الام مش معاملة أب دي ابدا 

فداء 

معاك حق خالد مزودها معاك جدا وانا ياما اتكلمت معاه بس مفيش فايدة فيه مش بيهتم لكلامي حقك عليا يا اياد علشان خاطري انا 

هز اياد راسه 

خلاص مبقاش يفرق دلوقتي خالص يا ماما انا ماشي ومش هقعد في مكان هو فيه تاني 

فداء 

انت بتقول ايه يا اياد انا مقدرش استغنى عنك انت ابني يا اياد 

اياد 

جايز انا ابنك بس مش ابنه مش ابنه ابدا 

فداء 

طب من فضلك احكيلي عمل ايه المرة دي وانا هحاول احل الموضوع 

اياد 

مبقاش ينفع خلاص كل حاجة انتهت انا اتحملت كتير لحد ما فاض فيا 

فداء

 اللي بتعمله دا مش حل ابدا ارجوك متسبش البيت مش هقدر اعيش فيه وانت بعيد عني 

اياد 

لا هتقدري يا امي عندك كيان وجوزك خالد هيعوضوكي عن غيابي لكن قعاد هنا بعد النهاردة لا مش هيحصل

فداء 

الظاهر ان الموضوع المرة دي كبير 

اياد 

اشوف وشك على خير يا ماما ابقي سلمي على كيان كان نفسي اسلم عليها قبل ما امشي بس هي  ف الجامعة مرجعتش لسه 

لحقت بيه فداء وهي بتقول 

طب انت هتروح فين قولي متسبنيش كدا 

اياد 

لحد اللحظة دي انا مش عارف بس متقلقيش ارض الله واسعة هلاقي مكان وبالتأكيد هيكون افضل من هنا سلام يا امي 

❈-❈-❈

مالك وصل شوق ووعد للفيلا 

حمدا لله على السلامة يا ماما شوق حمدا لله ع السلامة يا وعد هانم مواصلة ببلاش اهي ابقي عدي الجمايل 

وعد 

ما خلاص يا حضرة الظابط انت هتزلنا ولا ايه مكانتش مواصلة دي اصلا سواقتك وحشة 

مالك

 بقا كدا شايفة يا ماما بنتك دي كلمة الشكر اللي بتقولهالي 

شوق 

لااا مش هخلص من مشاكسات الاخوات دي اني هدخل جوا ارتاح المشوار كان طويل النهاردة وعايزة ارتاح 

مالك 

اسف اني تعبتك النهاردة 

شوق 

لاه يا ضنايا متقولش اكده ديه ادم ولدي وأن مكنتش اتعب علشانه اتعب علشان مين يعني 

وعد  بحماس 

مامي انتي كنتي عند ادم؟؟ روحتي هناك بجد ووافق يقابلك؟؟ ها احكيلي عملتي ايه وقالت ايه هيرجع مش كدا؟؟

مالك 

ومالك بتقوليها كدا وانتي فرحانة اوي كدا انتي مالك اصلا بيه 

وعد 

اصلا عادي بسأل مامي عملت ايه ادم مهما كان ... كان واحد مننا واكيد يهمني امره وهل هيرجع لعقله ولا لا 

مالك بمكر 

يا شيخة 

وعد تجاهلت تلميحات مالك وقالت 

مامي سيبك من مالك وقوليلي يلا 

في الوقت دا جه اتصال لمالك 

فرد 

ايوا يا فندم تمام جاي حالا لا مسافة السكة وهكون عند حضرتك 

وبص لشوق 

معلش يا ماما انا لازم استأذن وامشي طلبوني دلوقتي حالا 

شوق 

ماشي يا ولدي ربنا معاك ويحرصلك  طريقك 

ولما انطلق مالك بعربيته بعيد عنهم قالت شوق 

وعد عايزاكي تكلمي مالك باسلوب افضل من كدا ... دا مهمن كان ابن خالك واكبر منيكي وليه هيبته ومركزه 

وعد 

دا اخويا يا مامي فعادي 

شوق 

لاه يا قلبي مهواش اخوكي بدليل انك بتقعدي معاه بالحجاب يعني تتكلمي معاه براحتك في وجودي بس بحدود فهماني يا وعد 

وعد 

حاضر يا مامي اسفة بس حضرتك عارفة مكانة يزن ومالك ف قلبي قد ايه والله مش قصدي حاحة انا كنت بتعامل بتلقائية وحسن نية 

شوق 

عارفة يا بنتي وهما كمان بيعتبروكي اختهم الصغيرة وبيخافوا عليكي من النسمة بس مهمن كان مينفعش نتجاوز في الكلام ما زالوا ميحلوش ليكي يا بنتي 

فهمت وعد كلام مامتها وهزت دماغهت بالموافقة وبعدين افتكرت ادم وقالت 

طيب يلا يا مامي قوليلي عملتي ايه مع ادم 

شوق 

طب تعالي ندخل جوا ارتاح واقولك 

❈-❈-❈

يزن كان قاعد في مكتبه بيخلص ورق في ايده 

وبعدين بقا ف الورق اللي مش عايز يخلص انا افضل حاجة احوله على اياد وهو يخلصه بمعرفته انا زهقت ومليت وصدعت ياما قولتلهم انا مش بتاع شغل جوزوني وقعدوني في البيت اكرم محدش صدقني 

في الوقت دا خبطت السكرتيرة وقالت 

مستر يزن اا 

يزن قال 

لااا لو شغل انا مش موجود حوليه على اياد انت خلاص كدا النهاردة انا ماشي 

فسمع صوتها بتقول 

حتى انا يا يزن مش هتقابلني وهتسيبني امشي؟؟ 

ريحة البرفيوم النفاذة سيطرت تاني ع كل حواسه وكأنها بتتعمد تحط النوع دا لانها عارفة تأثيره كويس اوي  

مهند وقف مشدوه لفترة وهو بيبص قدامه 

ها!! 

عملت دنيا انها زعلانة وهتمشي 

لا الظاهر فعلا انك مش مستعد تقابل اي حد واني جيت ف وقت مش مناسب انا اللي غلطانة اني جيت من غير معاد سوري بااي 

يزن اتخلى عن بلاهته وقال 

لالا استني يا دنيا انا اسف مش قصدي تعالي اتفضلي نورتي الشركة 

وشاور للسكرتيرة 

اتفضلي انتي وابعتي اتنين لمون بالنعناع 

السكرتيرة 

حاضر يا فندم 

قعدت دنيا واتعمدت انها تقعد بدلع 

صباح الخير يا يزن عامل ايه 

يزن قعد ع كرسيه ورد بعملية 

تمام الحمد لله انتي اخبارك ايه 

دنيا 

اكيد كويسة علشان شوفتك يا يزن تعرف انك وحشتني من اخر مرة شوفتك فيها 

يزن بعملية شديدة

 اها كانت من كم يوم بس 

دنيا 

وانت مستقل بالكم يوم دول انا مش عارفة مالي الفترة دي حاسة اني عايزة اشوفك علطول يمكن علشان هنبدأ شغل مع بعض ولا ايه مش عارفة 

يزن 

 جايز ها تحبي نحكي ف تفاصيل الشغل واوريكي الملفات والاوراق المطلوبة تتطلعي عليها !! 

دنيا بمكر 

هنا في الشركة لا بتخنق بسرعة من الأماكن دي خلينا نخرج نتكلم برا وبالمرة نفطر انا لسه مفطرتش 

قالتها وقامت وقفت وهي بتمسك شنطتها

يلا بينا اوعى تقول مشغول انت كنت خارج اصلا يلا انت ناسي انك ودعتني نخرج نفطر سوا ولا نسيت المرة اللي فاتت!! 

مقدرش يزن أنه يرفض فاتحرك من مكانه علشان علشان يقوم معاها 

لكن جاله اتصال فرد عليه وهو بيقول لدنيا 

طب معلش ارد على الفون 

دنيا 

تمام خد راحتك 

ولما رد لقاه عساف اللي قاله 

يزن اتصل بإياد واساله هو فين وتروحله وتخليك معاه واوعى تسيبه مهما كانت انت فاهم 

يزن 

اياد ؟؟ هو مش ف مكتبه؟؟ 

عساف بحدة 

يزن سمعت انا قولت ايه يلا كلمه حالا وطمني عليه 

يزن 

خلاص يا عمو حاضر هكلمه حضرتك كدا قلقتني 

ولما قفل مع عساف ورن ع اياد لقا فونه مغلق القلق دب ف قلبه اكتر 

فساب اللي ف ايده ونسي دنيا تماما وقال 

معلش انا مضطر امشي حالا زي ما انتي شايفة حالة طارئة سلام يا دنيا 

وشد جاكيته ومشي بسرعة 

في حين ان دنيا نفخت بغيظ 

اوف بقا وبعدين انت ليه صعب كدا 

❈-❈-❈

عساف اتكلم بعصبية مفرطة 

ممكن اعرف انت ايه اللي هببته دا وايه كلامك الفارغ اللي قولته لإياد دا انا مش مصدق ان الكلام دا يطلع منك انت من ابوه معقولة تشك ف اياد ؟؟؟ دا انا اشك في نفسي ومأشكش ف اياد انت اول حد عارف اخلاق اياد كويس ازاي تقوله الكلام دا يا متخلف 

نفخ خالد بضيق 

انا عارف اني اتسرعت ف الحكم عليه بس لما اكتشفت ان الفلوس ناقصة وهو مبلغنيش بدا وكمان سحب الملفات فربطت دا بفكرة جوازه من عسل فعقلي هيىء لي انه هو اللي اخدها 

عساف 

علشان انت غبي .. غبي يا خالد انت كدا ضيعت اياد منك ابقى وريني هترجعه ازاي 

خالد

 ليه يعني عملت ايه يعني 

عساف 

انت لسه بتسأل ؟؟ لسه بتسأل عملت ايه في اياد انت مش شايف معاملتك ليه ازاي 

خالد 

 مالها معاملتي انا ابوه ومن حقي اعمل اللي انا عايزه واقوله اللي انا عايزه وهو يقول حاضر ونعم وبس 

عساف 

ليه كان عبد عندك استعبدته ؟؟؟ ملوش اي مشاعر او احاسيس انا من زمان شايف طريقتك واسلوبك النيلة معاه ومش عاجبني وكلمت اياد لكنه اصر اني مقولكش اي حاجة فسكت على ام انك تتغير لكن للاسف انت كل مرة بتسوء فيها وبتبقى اسوء والله العظيم انت ما تستاهل اياد يا خالد متستحقش تكون ابوه من اساسه 

خالد قعد ع الكرسي بانزعاج 

ليه يعني انا عملت ايه انا كل الحكاية اني خايف ع الشركة واتعصبت شوية وجت فيه ايه ميستحملش ابوه هو خلاص هيمسك فيها ويعملها حكاية 

عساف 

خايف ع الشركة ومش خايف ع مشاعر ابنك حقيقي انا مش عارف افهمك 

خالد

 متكبرش الموضوع يا عساف ايوا هيزعل شوية بس بعد كدا هيصفى يا عم انا معترف اني غلطان ها كدا مرتاح 

عساف 

متقوليش انا الكلام دا قوله لابنك دا لو سامحك اصلا انت مسمعتش انت قولته ايه ولا وجعته وكسرت قلبه ازاي مترجعش تندم بقا ع اي رد فعل منه انا ماشي 

خالد

 قايم رايح فين احنا ورانا شغل 

عساف 

شغل ايه بفا هو بقا فيه مزاج للشغل اشتغل انت لو قدرت او جالك قلب تقعد كدا وتسيب ابنك بعد اللي عملته 

قالها وسابه ومشي

خالد اتنهد بانزعاج 

هيعملها حكاية بقا مكانوش كلمتين خرجوا ف وقت غضب يعني 

❈-❈-❈

وقف وليد متضايق ومش عارف يعمل ايه مع وعد علشان تكلمه تاني زي الاول فقال 

انا احاول ارجع اراسلها تاني من حسابات تانية حتى لو حظرتي مليون مرة 

وفي الوقت دا جاله واحد بيقول 

اي خدمة يا وليد بيه اتمنا يكون اللي عملته عجبك انا في الخدمة دايما وتحت امرك 

وليد استغرب مين دا 

انت مين هو انا اعرفك يا عم سيبني ف حالي انا مش فايقلك 

الراجل واسمه محسن

انا اللي وقعت الخشبة من فوق المبني يا بيه ..بس انت طلعت نمس وجيت ف الوقت المناسب وعملت شجيع السيما وانقذتها .. انا لما شوفتك ماشي وراها قولت استغل الفرصة واخليك تقرب منها 

انصدم وليد من اللي بيسمعه وبرق عينه ولما فاق من صدمة اللي سمعه مسك محسن من هدومه 

انت بتقول ايه ياض انت... انت اللي كنت قاصد توقع الخشبة على وعد ؟؟؟ يخربيتك انت كنت قاصد تموتها دا انا هوديك في ستين داهية تعالي معايا 

محسن اتراجع بخوف 

لالا يا باشا مقصدش اموتها انا كنت عارف انك متابعها بعينك واخد بالك منها فعملت الحركة دي علشان تنقذها وتظهر قدامها بمظهر الواد اللي مفيش منه وبيظهر في المواقف الجامدة 

وليد بعصبية وهو لسه ماسك هدومه 

تقول ترمي عليها خشبة من فوق السطح ؟؟ افرض انا ملحقتهاش افرض وقعت فوقيها واتأذت او جرالها حاجة كنت اعمل ايه انا دلوقتي انا هوديك ف ستين داهية 

محسن

 يا بيه انا غرضي شريف انا طبعا مش عايز اموتها والله زي ما بقولك كدا بعدين انت زعلان ليه ومتعصب كدا ما حبيبتك صاغ سليم ومحصلهاش حاجة وانت انقذتها والحركة نفعت وجابت نتيجة 

وليد بصله بشك 

ولا انت مين ومالك بيا ويهمك بإيه اني اظهر قدامها منقذ ولا حتى اقرب منها ؟؟ 

محسن 

دي أوامر شبيب بيه والد حضرتك يا وليد باشا 

هنا وليد ساب محسن وبص قدامه وقال باستغراب 

ايه بابا؟؟ ... بابا يبعتك انت علشان تقربني من وعد ؟؟؟ 

بعدها فرح وابتسم 

وقال طالما بابا اتدخل يبقى فيه امل ان وعد ترجع تحبني تاني.. ايوا هتحبني وبأي طريقة هترجعلي انا هستعين ببابا الظاهر ان دماغه تقلها دهب 

❈-❈-❈

مالك رجع شغله وفي طريقه لمكتب اللوا ولسه هيدخل المكتب لقاها في وشه فوقف مكانه وقال 

تمام مصرة تدخلي قبلي يعني اتفضلي مش باللي يلحق هو مش هيعطيكي يعني حاجة حلوة خلي عقلك اكبر من كدا ولا هو عقل اطفال؟؟ 

مادونا بصتله بانزعاج 

نعم!!!

يتبع