قراءة رواية جبل النار كاملة

تنشر حصريًا على مدونة رواية وحكاية قبل أي منصة أخرى

رواية جبل النار

 رواية جديدة قيد النشر

من قصص و روايات 

الكاتبة رانيا الخولي

هدئت ارتعاشتها قليلاً وتمتمت بألم 

_انا قولتلك إن اللي حصله هدى النار جوايا بس…..

قطب جبينه بحيرة وسألها 

_بس ايه؟

رمشت بعينيها مرات متتالية وتمتمت برهبة 

_في حاجات هتجبرني إني أكمل معاه بس ياريت متسألنيش عنها، دلوقت على الأقل.

تلاعب الشك بداخله وسألها بتوجس

_ازاي عايزاني اساعدك ضد ابني، اه انا معاكي وهجبلك حقك منه بس قدامه مش من وراه، ده مهما كان ابني ومليش غيره، انا هكلمه وأخليه يتجوزك…..

قاطعته برجاء ونحيب

_لأ أرجوك أوعى تعمل كدة، مش عايزاه يعرف بوجودي ولا حتى عايزاه يتجوزني، انا شاركت في الغلط زيه بالظبط لما وثقت في شاب مهما كان غريب وآمنتله وده كان جزاتي فصدقني انا مش عايزه حاجة منه.

تنهد خليل بيأس

_طيب عرفيني انتِ عايزة توصلي لأيه، ومن غير أذيه له لأني مش هقبلها تحت أي مسمى.

أغمضت عينيها تحاول التحكم في بكاءها وقالت 

_طيب خلينا نأجل أي كلام دلوقت وأنا اوعدك إني هقولك على كل حاجة.

وافق خليل مستسلماً كي لا يضغط عليها وهي بتلك الحالة

_خلاص اللي تشوفيه.

❈-❈-❈

في المشفى

_حمل ايه يا حازم اللي بتتكلم عنه، انا مش معرفك كل حاجة من الأول.

كان هذا رد الطبيب عندما أخبره حازم بحملها 

عدل حازم من وضع نظارته وقال بتسويف 

_انا اتفاجئت زيك وهي مأخدتش احتياطها كويس لأنها متعرفش.

رد الطبيب باحتدام

_ودي غلطتك يا دكتور حازم وقولتلك الكلام ده لو تفتكر، وأدي النتيجة، دكتورة هايدي كانت لازم تعرف الحقيقة عشان نتفادى اللي حصل.

زم حازم فمه دلاله على قلة حيلته وقال 

_اعمل ايه بس يا احمد خفت عليها من الصدمة.

_مش احسن من اللي انت فيه ده دلوقت واديها برضه هتعرف.

زم وجهه باستياء

_اللي حصل بقا، المهم هعمل ايه معها؟

تعجب الطبيب من سؤاله

_انت بتسأل لازم الجنين ينزل طبعاً 

ملس حازم على جبينه يحاول السيطرة على آلام قلبه وسأله

_امتى؟

_النهاردة إذا امكن.

تنهد حازم وقال 

_ربنا يسهل.

خرج حازم من المكتب ثم توجه إلى مكتبها يطرقه حتى سمحت له بالدخول

دلف فيجدها تعاين احد الأطفال وهي تداعبه ببهجة

يعلم جيدًا مدى عشقها للأطفال وأنها اختارت هذا التخصص لشدة تعلقها بهم.

انتظر حتى انتهت وخرجت الأم بطفلها ثم تطلع إليها 

_هايدي في حاجة لازم أقولك عليها.

علمت من نظراته ما يود التحدث به لذا قالت بثبوت

_لو جاي تكلمني في موضوع رجوعي….

قاطعها حازم باندفاع

_هايدي انا عايز الحمل ده زيك ويمكن اكتر منك كمان بس في ظروف بتحتم علينا اننا ننزله.

قطبت جبينها بدهشة وسألته بتهكم

_وايه هو السبب ده اللي يخليك تغضب ربنا وتقتل ابنك؟

تنهد بضيق وهو يرى صعوبة في نطقها وفي الأخير قالها

_لأن ده كلام الدكتور مش كلامي ولو مش متأكدة اسألي دكتور احمد وهو هيأكد كل كلمة بقولها وهو إن الحمل ده خطر عليكِ.

عقدت حاجبيها بحيرة وعقلها لا يستوعب ما نطق به وقالت بعدم استيعاب 

_يعني ايه كلامك ده؟

رد بدون مقدمات اخرى

_يعني ولادة التوأم كانت صعبة زي ما انتِ عارفة وأصريتِ على الولادة الطبيعية وده عمل مشاكل في الرحم وخلته غير قادر على تحمل حمل تاني، ولو عاندتي والحمل ده كمل هتبقا اضرارة شديدة وممكن لا قدر الله يحصل مضاعفات خطيرة.

رمشت بعينيها وقد الجمتها الصدمة للحظات ودن إرادتها وضعت يدها على جوفها لتتمت بتية

_بس انا مش حاسة بأي فرق.

_لسة الحمل في أوله فبالتالي لسة مضغطش على الرحم ولا الرحم هاجمه وكل ما الحمل نزل بدري كل ما كان أفضل.

هزت راسها برفض وتطلعت إليه قائلة بإصرار 

_لأ.

❈-❈-❈

ترجل داغر الدرج وهو ينادي

_سلوى.

ردت سلوى وهي تخرج من المطبخ

_نعم يا داغر بيه.

سألها بجمود

_هي فين؟

قطبت جبينها بحيرة وسألته

_هي مين حضرتك؟ اه تقصد الممرضة

انفتح باب المكتب وخرجت منه أسيل

_اهي جات، محتاجني في حاجة؟

هز رأسه بنفي 

فانصرفت سلوى وأخذ هو ينصت لخطواتها والتي شعر بها تدوس على قلبه في كل خطوة تقربها منه، ورائحتها التي ظل محتفظ بها طوال أعوام تهفو حوله منذ عودتها

إذًا عليه أن يعترف جيدًا بأنه مازال عاشقًا لمعذبته

وحتى إن فعلت أكثر من ذلك سيظل قلبه الغادر يسامح ويغفر.

وكان للعقل رأي آخر إذا رفض ذلك الهوان

وتحلى بالجمود وهو يقول

_عمي فين؟

ردت بفتور بدأ يعتاده

_في المكتب.

_جهزي الفطار.

رد باقتضاب مماثل وتركها متوجهاً إلى مكتب عمه.

طرق الباب ودلف حينها ورغم أنه لا يرى نظرات العتاب في عين عمه إلا إنه شعر بها في صوته منذ عودته.

_صباح الخير يا عمي.

رد خليل وهو يجاهد ليخرج صوته ثابتًا ورد باقتضاب 

_صباح النور.

تعجب داغر من فتوره وسأله بحيرة

_عمي انت كويس؟

أغمض خليل عينيه بضيق من نفسه، فمهما حدث هو الآن بحاجته ولا يجوز أن يحمل عليه الآن 

سينتظر حتى يعود إليه بصره وحينها سيلقي بوجهه ذلك الخبر الذي قصم ظهره هو قبل تلك المسكينة التي قضى عليها وتركها تعيش ذلك الهوان.

تنهد بتعب شديد وقال

_اه كويس بس تعبان من الطريق مش أكتر.

شعر داغر بالقلق عليه وقال باهتمام

_طيب اطلع ارتاح في اوضتك.

عاد خليل بظهره للوراء وتمتم بثبات 

_هطلع بس في موضع مهم لازم آخد رأيك فيه.

سأله باهتمام

_خير يا عمي؟

قص عليه كل ما حدث من تلك المرأة حتى انتهى

_هي طالبة مني اقف جانبها بس أنا حقيقي مش عارف إن كنت هقدر ولا لأ، المصنع متضرر أوي ومحتاج مجهود مضاعف ومظنش إني هقدر عليه.

رد داغر بحكمة وعقل

_لا يا عمي هتقدر انت قدها وانا واثق من ده، غير كمان الست دي محتاجة حد أمين يكون معها يعني انت انسب واحد للموضوع ده.

_بس انا لو وافقت هيكون صعب أوي أسافر معاك للعملية، وبرضه تواجدي هنا هيكون صعب فعشان……

قاطعه داغر بإصرار 

_خرجني مرة واحدة بس من حساباتك واعمل اللي فيه الصالح، مينفعش إن تسيب واحدة استنجدت بيك في ظروفها دي

مسح خليل بيده على وجهه متحير من حديث داغر 

فذلك هو ابنه الذي رباه على يده وجعل منه رجل يفتخر به، لكن ما رآه جعله يحتار

لم يكن هذا داغر مؤكد لم يكن هو

_عمي انت سامعني.

_اه يا داغر سامعك، هشوف الموضوع ده وأول ما أوصل لقرار هبلغك، المهم ايدك عاملة ايه؟

تحسس داغر يده المصابة وقال

_احسن، هي جروح بسيطة مش مستاهلة قلقك.

تحرك خليل ليجلس على المقعد المقابل له وتحدث بحنو

_ولو مقلقتش عليك انت اقلق على مين.

ربت على يده وتابع بمغزى 

_انت ابني اللي ربيته وعلمته يكون راجل يعتمد عليه ويكون ثقة وفوق مستوى أي شبهات 

حتى إن غلط اكيد هيكون بدون إرادته.

لاحظ داغر إن هناك كلمات بين السطور وأن عمه يتحدث معه بمغزى هم بالاستفسار منه لكن دخولها جعله يلتزم الصمت 

_الفطار جاهز.

اومأ لها خليل ورد بتهذيب

_تمام.

خرجت أسيل وتطلع خليل لداغر التي تبدلت ملامحه فور دخولها

فسأله بمكر

_كويسة أوي البنت دي، مش كدة؟

لاحظ خليل انه يعافر كي يحافظ على هدوءه فتابع بمكر

_بفكر كدة لما نسافر للعملية ناخدها معانا.

رد داغر بوجه لا يعبر شيء

_اللي تشوفه يا عمي انا مش فارق معايا.

تحدث خليل باستسلام

_ماشي يا سيدي يلا خلينا نفطر ونقعد على البحر شوية.

على السفرة

وضعت أسيل الطبق أمامه وبدأت تبين له نوعية الطعام وأماكنه 

كان خليل ينظر إليها بتعاطف لما وصلت إليه 

وما آلمه أكثر أن ابنه من اوصلها لذلك الهوان الذي يراه أمامه

تحولت نظراته لعتاب يرمقه بها

لكن هو على ثقة تامة ان هناك شيء خفي من اوصله هو لذلك

من رآه بالفيديو لم يكن ابنه مطلقًا وهو على يقين من ذلك وسيعرفه بأقرب وقت 

استأذنت أسيل بالانصراف ثم تحدث خليل

_ناوي تسافر أمتى؟

_سؤال غريب أكيد وراه حاجة

قطب خليل جبينه بحيرة وسأله

_ليه بتقول كدة؟

رد داغر بفطنة وهو يترك الشوكة من يده

_بعرفك لما بتراوغ معايا او عايز توصلي حاجة، اتكلم على طول أفضل.

لم يندهش من فطنته لذا تحدث بمغزى

_هتكلم على طول بس هأجله دلوقت لحد ما نخلص من العملية، وبعدها هيكون في كلام كتير أوي.

عاد يتناول طعامه ورد بعدم اكتراث

_اللي تشوفه.

هز خليل رأسه لتبدل حاله حتى شعر بأنه شخص آخر 

وبعد الانتهاء جلسا معًا على الشاطئ 

بدأ داغر بالحديث

_هتعمل ايه في العرض اللي اتقدملك؟

عاد خليل بظهره للوراء وتمتم 

_انا بفكر أوافق بس بعد ما نرجع من برة، لو نظرك إن شاء الله رجع هقبل الشغل ده لأنك أكيد هترجع لشغلك وهتبعد تاني، ولو لا قدر الله محصلش مش هسيبك تحت أي ظرف.

_بس انا من رأيي توافق من دلوقت وإن كان على سفري فأنت طلبت إن الممرضة تروح معايا.

عقد حاجبيه متسائلاً 

_لوحدها؟ ده ازاي ده؟

رد داغر ببساطة 

_ايه المشكلة؟

اندهش خليل من البساطة التي يتحدث بها 

_بصفتها ايه؟

رد بمراوغة

_بصفتها ممرضة.

_وافرض رفضت، ولا اهلها رفضوا يسمحوا بده هتعمل ايه؟

رد بثقة

_مش هترفض.

_وجايب الثقة دي كلها منين حضرتك.

رد بنفي

_مش ثقة ولا حاجة بس مستني لما اتأكد من حاجة كدة وبعدين هقولك.

لم يريد الضغط عليه وتركه كما يريد.

في غرفة داغر

دلفت أسيل الغرفة وهي تحمل الحقيبة كي تغير الضمادة له

كان جالسًا على الفراش وعينيه الواجمة ثابتة على الفراغ أمامه

تطلعت إليه بوجل وقدميها ثابتة على الأرض لا تساعدها على التحرك

انتفضت فجأة على صوته

_هتفضلي واقفة عندك كتير؟

رمشت بعينيها وهي تحاول الثبات كي لا يشك بأمرها ثم تقدمت منه بأقدام واهنة وعقل مشتت تحاول صد تلك الذكريات كي لا تلقي الحقيبة من يدها وتلوذ بالهرب من أمامه الآن وتفشل خطتها.

وما إن تقدمت منه حتى صدحت منها صرخة عندما جذبها ملقيًا إياها على الفراش.

يتبع...

إلى حين نشر الفصل الجديد للكاتبة رانيا الخولي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة