رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الثالث والثلاثون

تم النشر الثلاثاء

7/1/2025

خلص صلاته وقرر يتصل تاني بشوق يمكن ترد عليه 

ولما اتصل فرح ان شوق ردت وهي بتقول 

السلام عليكم ورحمة الله وبركاته يا نن عن ماما شوق عامل ايه يا مالك حمدا لله انك وصلت بالسلامة يا قلبي 

مالك 

الله يسلمك يا ماما شوق مكنتش عارف اقعد من غير ما اطمنك عليا عارف انك هتفضلي قلقانة 

شوق

 ايوا يا حبيبي الحمد لله انك بخير اطمنت لما شوفت اتصالك بس كان فيه كام حاجة اكده بعملها معلهش انشغلت عنيك اعذرني 

مالك 

لا يا ماما ابدا انا عارف ومقدر انتي بتتعبي قد ايه وعلطول مشغولة ف حل مشاكل كل اللي حواليكي

شوق 

الحمد لله ربنا يعينا على قضاء حوائج الناس ونكون في عونهم دايما.. المهم طمني عليك انت كيفك اكده يا عريس ايه اقول صباحية مباركة !!! 

ضحك مالك 

ما بلاش انتي يا ماما شوق خليها تيجي من حد تاني قال عريس قال 

شوق ضحكت 

ههه شكلك بتعزها اوي يا ولا باين عليك انك مبسوط 

مالك 

بتقولي فيها يا ماما تصدقي ان دي ارخم مهمة قومت فيها على مدار شغلي مهمة تقيلة بشكل 

شوق 

ليه يا واد دا هما مجوزينك ومقعدينك مع وجه حسن في اوضة واحدة يعني مدلعينك اهو بس اني عارفاك ملكش في الطيب نصيب 

مالك 

طيب دي طيب يا ماما قولي كلام غير دا دي دي عاملة زي اااا 

ولسه مالك هيكمل شاف مادونا خارجة من الاوضة وجاية ناحيته 

طب طب اقفلي دلوقتي يا ماما لانها جاية هنا اهنه مش عارف جاية تهبب ايه دلوقتي ولا عايزة ايه مني 

ضحكت شوق 

طيب ربنا يعينك يا ولدي على ما بلاك 

مالك 

ربنا يسمع منك يا ماما بلوة فعلا 

قفل مالك مع شوق وبص لمادونا 

خير واقفة ليه كدا عايزة ايه 

مادونا

جعانة وعايزة اكل مأكلتش اي حاجة من امبارح 

مالك بسخرية 

ما تأكلي هو انا ماسك الأكل ولا كنت مخبيه مثلا ولا انتي طفلة مش عارفة تجيبي اكلك ... ولا يمكن بتستأذني مني انا سمحت لك انك تاكلي اتفضلي 

مادونا كشرت لان كلامه معجبهاش 

نعم انت بتهزر صح 

مالك 

واهزر ليه كنتي من بقيت اهلي علشان اهزر معاكي 

مادونا 

انا غلطانة اني واقفة معاك فعلا انا اللي جبته لنفسي اوعا كدا من وشي 

مالك

وربنا ما واقف في وشك ما تتفضلي المكان واسع اهوه 

مادونا 

 اوف 

اتحركت مادونا قدامه 

فانتبه مالك للي هي لابساه منامة بيتي شكلها رقيق عليها وكمان بكت 

فغض بصره بسرعة وهو بيقول 

يخربيت كدا البنت دي عايزة تجيبلي مصيبة لا انت مش هينفع اسكت ع كدا هي هنا مش لوحدها علشان تلبس زي ما هي عايزة 

اتحرك مالك من مكانه وراح وراها 

مادونا كانت واقفة ف وسط المطبخ مش عارفة تعمل ايه وفين الأكل وباين عليها محتارة 

فقال باستغراب 

واقفة ليه كدا كأنك تايهة 

مادونا 

ملكش فيه شوف انت جاي تعمل ايه واعمله وامشي 

مالك فهم بسرعة بديهته انها مش عارفة تجيب الأكل منين 

فقال 

اهي التلاجة عندك فيها العشا طلعيه وحطيه ف المايكرويف وعيشي انتي شكلك فافي اوي ليه كدا انتي  محسساني انك  مش ظابط وسلختي تعالين واكلتيها 

مادونا

لا طبعا اما عمري ما اسلخ تعابين واكلها لكني اقدر اعمل دا مع الناس اللي تستحق واعمله بجدارة كمان 

قالتها وبصتله بكره شديد ونظرات كلها وعيد 

فاستغرب مالك نظرتها دي 

وهي اتحركت ناحية التلاجة وطلعت الأكل وحطته ف المايكرويف 

ولما لقته واقف مكانه قالت

لسه واقف عندك بتعمل ايه 

فقال 

لبسك دا يا ماما يتغير ها يتغير انتي مش لوحدك هنا علشان تلبسي على راحتك راعي ان معاكي راجل في الشقة 

مادونا بلا مبالاة 

براحتي البس اللي يعجبني ثم ان دي هدومي البيتي عايزني البس ايه  وانا في البيت البس جلابية مثلا ؟؟ 

مالك 

يا ريت اهي تسترك شوية بدل انتي مفيش اي حياء كدا 

مادونا بغضب 

احترم نفسك انا مسمحلكش والبس اللي انا عايزاه مش هخنق نفسي علشان خاطرك انا مش معتبرة انك موجود اساسا 

مالك بغضب مماثل 

بقا كدا يا مادونا النيلة انتي طب هتشوفي انا هعمل ايه وربنا الظاهر كدا تربيتك هتكون على ايدي ما انا مش هتشل على الفاضي كدا صبرك عليا

❈-❈-❈

اتصلت كيان بشوق وقالت وهي بتعيط 

ماما شوق 

شوق بقلق 

واه يا قلب شوق مالك يا حبابة عتبكي ليه خير حد زعلك اوعاك يكون خالد زعلك انتي راخرة 

كيان 

اهو يعني كدا حضرتك عارفة ان بابي مزعل مامي وسابت البيت مش كدا 

شوق 

مش بالظبط أكده يا بنتي بس هي يومين وهترجع متزعليش 

كيان 

عايزة اروحلها يا ماما شوق عايزة اطمن عليها مش هينفع تكون في موقف زي دا ومطمنش عليها ومكونش جنبها يا ماما  بس بابي رافض دا ارجوكي ارجوكي كلميه واقنعيه اروح لها 

شوق 

حاضر يا حبيبتي بس والله فداء كويسة اطمني بصي انا في كل الاحوال كنت هكلم خالد ويمكن اعدي عليكم كمان اما النهاردة او بكرة ربك يسهل 

كيان 

بس انا عايزة اروح لمامي دلوقتي يا ماما شوق انا مش هقدر اقعد ولا يهدا لي بال الا اذا روحت عندها 

شوق 

طالما ابوكي رافض يا بنتي يبقى تسمعي كلامه والصباح رباح يا غالية تقدري تتصلي بيها وتطمني عليها هي واياد والصبح هكلم اياد يجيلك الجامعة ياخدك لحد فداء ها كدا مرضية يا روح قلبي 

كيان 

بس كنت عايزة اروح لمامي النهاردة صدقيني مش هعرف انام 

شوق 

لاه نامي وحطي في بطنك بطيخة صيفي كل الحكاية انك مامتك محتاجة تغير جو مش اكتر يا حبيبتي وكلها مسافة الليل وتشوفيها اني عارفة انك كبيرة وعاقلة وهتقدري ها يا كيان قولتي ايه 

كيان باستسلام 

حاضر يا ماما شوق هصبر للصبح وامري لله 

شوق 

حبيبة ماما شوق اللي بتسمع الكلام يا ناس 

❈-❈-❈

وصل يزن باسرع ما يمكن لبيت عمه امير ولسه هيخبط 

سمع صوت مهند وميار بيضحكوا ومهند حاطط ايده ع كتف ميار وبيهمس في ودنها 

كانت احلى خروجة خرجتها مع روح قلبي ما تيجي نرجع تاني ونفصل عن العالم لسنتين تلاتة عشرة كدا 

فضحكت ميار 

مهند انت بجد ملكش حل 

مهند 

ولا كتالوج يا روحي لما بكون معاكي كأني ملكت الكون كله مش بكون عايز غيرك وبس 

هنا يزن رفع حاجبه 

يا سيدي يا سيدي على اللي شاب ولسه بردو بيوهم نفسه انه لسه شباب وعايز يعيش حياته سبت ايه لابنك الغلبان دا 

مهند بغضب 

ولد!! قال شاب قال انا لسه في عز شبابي وبصحتي واعمل اللي انا عايزه عارف لو كررت كلامك دا هعمل فيك ايه 

يزن 

يا عم لا تعمل ولا متعملش انا هطلع منها خالص ربنا يسهله يا عم 

مهند لميار 

شايفة ابنك لو دغدغت راسه دلوقتي مهبقاش ملوم 

ميار 

معلش يا حبيبي بيهزر مع باباه مفيش مشكلة 

مهند

 رايح فين يالا كدا ولابس ومتشيك ولا يخربيتك انت مستعمل البرفيوم بتاعي دا انا هولع فيك 

قالها ومسك يزن من هدومه 

يزن 

 حاسب البدلة يا والدي ترضاها لابنك يعني

مهند 

ولا انطق رايح فين كويس اني جيت في الوقت المناسب علشان اقفشك 

يزن 

اه والله انا محتاج فعلا فلوس علشان الخروجة دي هتتكلف وخايف اللي معايا ميكفوش ايدك بقا على اللي فيه النصيب ولا اقولك هات الكريديت  بتاعتك وانا هتصرف 

مهند 

ولا قولتلك رايح فين مش هعيد كلامي تاني 

يزن 

هكون رايح فين دا انا حزين وبائس عمو امير ولاول مرة وافق اني اخرج انا ولوجي فعازمهم على العشا هي ووعد الزقردة 

ميار فرحت 

كويس يا حبيبي سهرة ممتعة خد بالك من البنات واوعا تزعلهم 

يزن 

حاضر يا قمر انتي بس وربنا مش مطمن للخروجة دي خايف عمو امير يتصل بيا بعد خمس دقايق يقولي هات لوجي وارجعوا وربنا يعملها 

ضحك مهند وقال بشماتة في يزن 

هيعملها فعلا دا اخويا واهبل وعبيط وانا عارفه 

يزن 

طب ما تعقله كدا يا مهند هو انا مليش نفس اعيش حياتي زيك يا عم ولا ايه 

مهند

 حظك كدا امير بيغير على بنته الوحيدة 

يزن 

اه يغير عليها وتيجي على راسي انا 

مهند 

احمد ربنا انه سايبهالك ووافق انها تتخبطلك انا لو منه وعندي بنت عمري ما كنت هجوزها ابدا هتفضل كدا جنب ابوها ومدللة وحبيبة ابوها للعمر كله 

حط مهند ايده على راسه 

ياختااااي دي ايه  العيلة اللي انا وقعت فيها دي.. دول كلهم مجانين قال هتفضل جنب ابوها طول العمر والله ما انا عارف هلاقيها منين ولا منين هات يا مهند الفلوس هات وركز انت مع ميار بتاعتك وسيبلي البرج العاقل اللي ف دماغي بدال ما يطير هو كمان الله يكون في عوني 

خرج مهند محفظته وناول ابنه الفيزا بتاعته 

خد ياكش يطمر بس كله علشان خاطر البنات دلعهم وجبلهم كل اللي هما عايزينه ومن غير ما يطلبوا حتى خليك كريم ولماح ها فاهم يلا 

يزن 

لا في دي بقا انا طالعلك متخافش هشرفك يا والدي سلام انت 

❈-❈-❈

ضرب يزن جرس  شقة عمه امير 

ففتحت ليه ايات وهي لابسة حجابها 

تعالي يا يزن اتفضل البنات لسه بتجهز جوا 

يزن 

مساء الخير عليكي يا طنط ايات ...براحتهم خالص انا مش مستعجل 

ايات 

 طيب ادخل واقف ليه تعالى هعملك قهوة مع عمك امير  هو قاعد ف الفراندة روح اقعد معاه لحد ما تخلص القهوة واجيلكم 

يزن 

مممم خليني اخمن عمي امير مش طايقني مش كدا 

ابتسمت ايات 

معلش بقا يا يزن المفروض انك اتعودت 

يزن

 طب انا رايحله 

وراح لعمه الفراندا وقال 

امير الامرا واحشني والله يا غالي 

امير مردش عليه 

فقال يزن 

ياااه يا امير الامرا فيه ايه يا عم هو انا قاتلك قتيل دا انا خطيب بنتك وبس 

هنا انفجر فيه امير

وخطيب بنتي دي شوية... عارف يالا لو زعلتها ف يوم من الايام هعمل فيك ايه انت متعرفش معزة لوجي عندي دي روحي وكياني كله 

يزن 

وربنا عارف وزي ما هي روحك هي روحي انا كمان حد بيأذي او بيزعل روحه متقلقش عليها طول ما هي معايا اوعدك هاخد بالي منها 

امير 

انا مش عارف انا ايه اللي خلاني اوافق على الفكرة المهببة دي ما كنتوا تتعشوا هنا وهطلبلكم احلى اكل 

ضحك يزن 

مش حكاية اكل يا عمو ما انت اكيد فاهم بقا يعني ايه احساس انك تخرج مع خطيبتك 

امير بضيق 

ولا غور من وشي السعادي 

يزن 

وربنا هغور بس البنات تخلص لبس علشان ننزل 

هنا جت البنات وقالت وعد 

احنا خلاص جهزنا 

يزن 

ما بدري ياختي كل دا ليه بتخترعي الذرة 

لوجي مساء الخير يا يزن معلش اتأخرنا عليك 

يزن بهيام 

ولا يهمك يا قمر براحتك اعملي اللي انتي عايزاه  

وعد 

يا سلام دلوقتي براحتك صدق انك منافق يا يزن 

يزن 

اطلعي منها انتي

وبص للوجي 

ها مستعدة علشان ننزل؟؟ 

لوجي بصت لامير 

بعد اذنك يا بابي ممكن ننزل 

امير قرب من بنته واخدها ف حضنه 

خدي بالك من نفسك يا روحي ولو حصل اي حاجة كلميني علطول 

يزن 

ما خلاص بقا يا عم مكبر المواضيع ليه

بصله أمير بحدة 

فتراجع يزن علطول وقال وهو رافع ايده باستسلام 

خلاص خلاص هسكت خالص يالا يا بنات نخرج قبل ما يرجع في كلامه 

❈-❈-❈

وفي المطعم 

قال يزن 

ها يا بنات يلا اتفضلو اطلبوا كل اللي انتوا عايزينه... بصوا اعتبروا ان النهاردة يوم الامنيات واطلبوا اي حاجة بعون الله هعملها ليكم 

هنا ابتسمت وعد وجت تتكلم 

بجد يا يزن طب انا عايزة اااا 

قاطعها يزن 

استني كدا انتي عينك لمعت ووشك نور كدا وبدأتي تتحمسي وتتخيلي كل اللي انتي عايزاه استوب يا ماما انا بوجه كلامي للوجي مش ليكي لما تبقي تتخطبي وتخرجي مع خطيبك ابقي خدي فرصتك دي لكن الفرصة النهاردة للوجي وبس 

وعد بصتله بتوعد 

بقا كدا يا يزن طب والله لأقول لخالو مهند يشوف شغله معاك ومش هتنازل عن اني اشوفه بياخدلي حقي 

يزن قال بخوف مصطنع 

لا لا اوعي تقوليله خلاص يا ستي بهزر معاكي هعملك كل اللي انتي عايزاه بس اصبري اشوف لوجي عايزة ايه الاول وعنيا ليكي يا دودي 

وعد 

ايوا كدا اتعدل 

يزن

خلاص بقا اسكتي خليني اشوف لوجي ها يا لوجي 

لوجي بحرج

لاء مش عايزة حاجة خلينا بس نرجع بسرعة علشان بابي ميزعلش 

يزن 

لوجي ممكن تنسي امير الامرا دا النهاردة خالص ومتفكريش فيه وركزي في خروجتنا وبس وازاي نستمتع بيها.. يلا اتفضلي دا المنيو واختاري الأكل اللي تحبيه ولا تحبي اطلبلك المنيو كله انا مستعد 

لوجي 

لالا تطلب المنيو كله ايه استنى بس

يزن 

خلاص اختاري اللي يعجبك 

لوجي 

حاضر 

يزن 

يحضرلك الخير يا اميرة يا بنت امير الأمرا 

ضحكت وعد وكذلك لوجي بس من غير صوت زي ابتسامة عريضة كدا 

وبعد لما اختاروا الأكل ويزن طلبه من النادل قال 

في الوقت دا بقا ممكن يا لوجي نستغل الفرصة دي وتبتدي تحكيلي عن نفسك اكتر احنا تقريبا منعرفش كتير عن بعض انا حابب اسمع منك حابب تحكيلي عنك اكتر 

لوجي 

انت عايز تعرف ايه عني اكتر من اللي انت تعرفه اظن انت عارف عني كل حاجة ومش محتاج تعرف اكتر من اللي انت عارفه 

هنا اتدخلت وعد 

اا معلش يا يزن اعذرني اني هتدخل بس انا حابة اوضح للوجي النقطة دي 

لوجي مش معنى ان يزن بيقولك انه عايز يعرف عنك اكتر انه فعلا محتاج يعرف لاني متأكدة ان يزن عارف كويس اوي كل حاجة عنك سواء سأل طنط ايات او ماما شوق او حتى طنط ميار يعني جمع كل حاجة تقريبا عنك الفكرة انه عايز يسمعك عايز يسمعك بتحكي معاه بتشاركيه اهتماماتك والحاجات اللي بتحبيها وايه هي الحاجات اللي بتضايقك او اللي ممكن تضايقك منه مثلا ..اتكلموا اتعمقوا ف شخصيات بعض اكتر مش حاجات سطحية 

يزن 

دا صحيح يا لوجي انا معرفش الا قشور سطحية زيي زي اي حد غريب محتاج اسمع منك انتي محتاج اعرف ايه اللي بتتمني تشوفيه فيا وايه اللي مش عايزاني اعمله 

لوجي بحرج لانها عمرها ما اتكلمت مع ولد قبل كدا حتى يزن كانت بتكلمه ف حضور والدها ومجرد عامل ايه واخبارك ايه وبس 

فقالت 

ااا اعتقد ان الكلام دا سابق لأوانه يا يزن!! على الأقل لما نبقى نكتب الكتاب 

يزن 

انا معرفش هنكتب كتابنا امتا ومعتقدش دا هيحصل قبل يوم فرحنا انا تقريبا فهمت دماغ عمو امير علشان كدا احنا محتاجين نتعرف ع بعض اكتر ارجوكي افهميني 

وعد 

اتكلموا يا لوجي وانا هلعب بالفون ومش هكون منتبه كأني مش موجودة خدي راحتك تمام 

يزن حاول يشجعها 

ها يا لوجي قوليلي ايه هي مواصفاتك اللي عايزاها فيا وكنتي بتتمنيها وهل لقتيها ولا لا وايه اللي حابة يتغير فيا علشان احوز رضاكي 

بدأت لوجي تتخلى عن حرجها وجمودها شوية وتقول بنوع من الحياء 

ااا انت شاب كويس ومحترم يا يزن لكن. ااا لكن يعني اا هو ااا 

يزن اتعدل ف قعدته 

ها قولي لكن ايه انا سامعك وعلى فكرة انا متقبل كل كلمة هتقوليها ومستعد اغيرها 

لوجي خدت قرارها انها تتكلم 

حاساك متساهل اوي مع البنات زيادة عن اللزوم 

يزن مفهمش قصدها هي كانت بتتكلم على دنيا مش قصدها وعد 

فقال يزن ان كان على كلامي مع الزقردة دي اوعدك اني اقاطعها بت يا وعد انا ولا اعرفك من النهاردة انسي ان ليكي اخ اسمه يزن المهم اميرتي ترضى 

وعد عملت انها متضايقة وكشرت  

نعم !!! 

لوجي 

لالا مش قصدي على وعد اقصد ف الشركة علاقتك مع العملا الستات م عاجباني يا يزن 

يزن 

ااه فهمت بس دي علاقات شغل لا اكتر ولا اقل وكلامي معاهم مجرد مجاملة لا تعني اي شىء ولا اقصد بيها اي شىء 

لوجي 

لا معلش مش حابة كدا ممكن تحط حدود اكتر!! 

يزن 

اممم اقدر اسمى دا غيرة عليا مثلا ايوا بقا حبيبتي بتغير عليا يا ناس 

لوجي بحرج 

يزن من فضلك  بلاش كلام من دا 

يزن بجدية 

حاضر يا لوجي اوعدك اني هحط حدود اكتر واقلل من التعامل معاهم ها وايه تاني مش عاجبك فيا قولي كل اللي ف نفسك 

وعد 

اقول انا اقول انا 

يزن 

اخرسي انتي 

وعد 

يوووه هخرس اهو حاضر 

لوجي 

اممم اقدر اقول حاجة ايجابية فيك!! 

يزن مطت شفته وقال 

حاجة واحدة بس امممم طيب ماشي اتفضلي قولي سامعك انا يفيدك الساعة لما خطيبتي تمدحني ياااه

لوجي 

عاجبني اوي علاقتك بطنط ميار بتحبها وبتحترمها جدا جدا وبتخاف عليها من الهوا الطاير عمري ابدا ما سمعتها بتشكتي منك او متضايقة منك بالعكس علطول بتمدح فيك وبتدعيلك ودا شىء ف حد ذاته مطمني من ناحيتك يا يزن 

يزن بجدية 

دي امي يا لوجي ميار دي حتة من قلبي لا قلبي كله وحبي كله معتقدش اني هحب حد زيها ابدا بالرغم من حبي ليكي لكنه بردو ميشاويش حبي لماما مقدرش ابدا اقولها ع حاجة لا حتى لو مش عاجباني بابا اقفله واقوله لا مش عايز مثلا انما ماما لأ استحالة 

ابتسمت لوجي لانها حبت دا في شخصيته ودا اللي علقها بيه اكتر 

فقالت وعد بمرح 

اوبا يا لوجي يزن بيحب طنط ميار السكرة اكتر منك 

لوجي 

ودا شىء يزيدني شرف على فكرة يا وعد 

يزن بصلها بفرحة واعجاب ف نفس الوقت 

❈-❈-❈

مالك خلص قراءة ورده في تطبيق المصحف على الفون وبعدين قرر ينام تاني ما هو مش لاقي حاجة يعملها 

لكنه فجأة وهو نايم والدنيا ضلمة فتح عينه وبص ع الحيطة للضل اللي عليها شاف ايد ومرفوعة وفيها سكينة 

فقال مفزوووع وبسرعة بص حواليه وااااا

يتبع