رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الأربعون

تم النشر الثلاثاء

28/1/2025

مالك لقاها بتقرب منه بالفعل وماسكة السكينة ف ايدها ومستعدة للهجوم والانقاض عليه 

فرجع هو بمهارة فائقة لورا واخد وضع الدفاع عن النفس وهو بيقول 

فيه ايه يا بنتي انتي ما صدقتي ولا ايه وبعدين استني هنا انتي عايزة تخلصي عليا علطول كدا مرة واحدة مش اللي بيخلص على حد بيسأله الاول نفسك في ايه قبل ما يموته!! 

اخدت نفس طويل بضيق ونزلت سلاحها الابيض  وهي بتقول بانزعاج

ها نفسك في ايه خلصني 

مالك برخامة 

لا قوليها بنفس مالك بتقوليها كدا وانتي متضايقة اوي دا اخر طلب ليا يعني لازم تطلبيه بأسلوب افضل من كدا 

مادونا 

اللهم طولك ياروح 

مالك 

يارب طول في عمري يارب 

مادونا 

عايز ايه اخلص 

مالك 

هتنفذيه ليا يعني ولا اي كلام ف الفاضي 

مادونا 

عايز ايه يعني تاكل 

مالك 

لا انا ابقا طفس اوي لو عارف اني هموت خلال دقايق وافكر في اكل 

مادونا بصتله بغيظ 

طب عايز ايه يعني خلصني

مالك 

انتي خلقك ضيق ليه كدا مالك كدا قلبتي على ابو موتة مرة واحدة 

مادونا 

لا انت ناوي تهزر بقا وانا مش هستنى لحظة واحدة خلاص عطيتك فرصة وانت ضيعتها 

مالك 

لالا استني خلاص هقول... انا كل الحكاية عايز اعرف انتي عايزة تقتليني ليه عملت فيكي ايه يا شيخة بس دا انا غلبان 

مادونا 

انت غلبان انت... انت مجرم وقاتل وحقير ومتستحقش تعيش لحظة واحدة اتشاهد على روحك يلا 

مالك 

ياااه كل دا في جملة واحدة ... لا وفيكي الخير انك هتسبيني اتشاهد بس قوليلي عملت ايه بس لكل دا 

مادونا 

طبعا حضرتك مش فاكر عملت ايه 

مالك 

لا والله لا فاكر ولا عارف عملت ايه.. ايه يمكن كسرت واحد من ضوافرك الصناعية المقرفة دي وانا مش واخد بالي 

مادونا بعصبية

 نعم!! 

مالك 

اوبا يبقى هو كدا فعلا يبقى انا كسرته بجد معلش اسف ممكن اشتريلك علبة كاملة بس سيبيني اعيش دا انا حتى لسه مدخلتش دنيا يرضيكي 

مادونا هما فقدت السيطرة ع نفسها وقالت بعصبية وحرقة 

انت كنت السبب في موت بابي انت اللي قتلت بابايا

مالك 

نعم يا اختي قتلت باباكي ليه انتي هتتبلي عليا ولا ايه 

مادونا 

متحاولش تنكر لان الانكار مش هيفيدك ومحدش هينجدك من ايدي دلوقتي انا خلاص قررت مش هفوت الفرصة حتى لو وديت نفسي ف داهية مش هتفرق المهم انتقم من اللي قتل بابي 

مالك 

يا بنتي وانا اقتل باباكي ليه كنت قتال قتلة انا ولا ايه هو باباكي دا بيشغل في الممنوع في المخدرات او الحشيش او غيره!! 

مادونا 

لا طبعا 

مالك 

طب مجرم خطير مطلوب للعدالة تاجر اعضاء زعيم مافيا 

مادونا 

لا طبعا بابي مش كدا 

مالك 

طب مختلس اموال او عميل سري او عميل مزدوج خاين لوطنه 

مادونا بانزعاج 

انت بتقول ايه 

مالك 

 ما انا بقولك الاسباب اللي ممكن من خلالها تخليني اطارده ويؤدي غصب عني لوفاته غير كدا هقتله ليه

مادونا 

معرفش أسبابك ايا كانت ايه كل اللي اعرفه انك اللي قتلته 

مالك 

يا بنتي هو اي هري وخلاص طب فين دليلك على كدا هل معاكي اثبات اني عملت دا 

مادونا 

مش معايا دليل بس انت الأكيد انت الفاعل 

مالك 

مفيش الكلام دا يا ماما معاكي دليل ادانتي كان بها انا قدامك اهو اقتصي مني لموت والدك غير كدا مش هسمحلك ابدا. 

مادونا 

ايوا بقا انا مش هعرف اجيب الدليل دلوقتي ع الاقل لما اخلص المهمة وارجع لمامي 

مالك 

يبقى ترجعي سكينتك دي مكانها وتركزي كدا وتهدي وتهمدي لحد ما تخلص المهمة وتجيبي دليلك وتقدميه ووقتها نتكلم وكل واحد ياخد حسابه ولا انا اللي هعلمك يا حضرة الرائد أصول الشغل هل احنا ينفع نقبض او نحاكم حد من غير دليل ملموس ضده 

ارتبكت مادونا واتوترت 

هو فعلا معاه حق هي مفيش عندها دليل واحد يثبت كلامها دا ... لكن والدتها قالتلها كدا وهي فكرة الانتقام عمتها عن انها تطلب ادلة 

علشان كدا اقتنعت بفكرة مالك وبعد المهمة ترجع تجيب دليلها وتجدد انتقامها من تاني ..

❈-❈-❈

اياد وصل شركة خالد واول ما وصل 

كل الموظفين قربوا منه 

اياد باشا حمدلله على السلامة اول مرة تغيب عن الشركة المدة دي كلها مش متعودين منك على كدا علشان كدا كلنا شكينا ان حضرتك تعبان انت كويس يا اياد باشا

هزلهم اياد دماغه واتخطاهم 

فقابله موظف تاني في أيده ملفات عايزه يمضيها 

اياد باشا معلش لو سمحت امضتك هنا لانها شحنة مستعجلة واقفة ع الامضا بس 

هنا اياد حس بنغزة جامدة في قلبه 

بعد ما كان ابن صاحب الشركة والمدير فيها ومسؤول عن كل حاجة فيها والكل بيشتغل تحت امره 

فجأة كل دا طلع مجرد حلم جميل كان عايش فيه وفاق من الحلم ع كابوس لا الأهل طلعوا الأهل ولا البيت بيته ولا حتى الشركة شركته 

بلع ريقه بصعوبة وبصعوبة خرج صوته 

ررو رووح لخالد بيه يم.. يمضيها يا ايمن 

ايمن 

حاضر يا اياد بيه اللي حضرتك تشوفه وحمدا لله على السلامة

اياد حاول يبتسم بجهد كبير اوي منه ازاي هيعرف يبتسم بعد الحقيقة المرة اللي فاق عليها قلبه بقا مكسور ونفسه بقت حزينة 

تابع في طريقة لحد ما وصل لمكتب خالد 

وهنا اول ما شافته السكرتيرة قامت وقفت ورحبت بيه زي ما الكل ما عمل فالكل هنا بيحبه بسبب معاملته الطيبة ليهم 

حمدا لله على سلامتك يا اياد بيه اتفضل ادخل خالد بيه جوا في مكتبه 

اياد بصوت خال من الحياة 

بلغيه يا نسرين اني برا وعايز اقابله من فضلك 

استغربت نسرين كلامه ودا لانه كان بيدخله علطول من غير ما يستأذن فهو مش غريب مش هستأذن زيه زي اي موظف عادي يعني 

لكنها ع كل حال اتحركت من مكانها ناحية الباب وقالت 

حاضر هبلغه

ولما دخلت لخالد 

خالد بيه.. اياد بيه برا وعايز يدخل لحضرتك 

رفع خالد وشه عن الملفات اللي في وشه وقال 

اياد مين!! 

نسرين 

اياد ابن حضرتك يا خالد بيه 

خالد باستغراب 

مستني ايه ما يدخل واقف برا ليه 

نسرين خرجت لاياد 

اتفضل ادخل يا اياد بيه خالد بيه منتظر حضرتك 

ولما دخل اياد قال خالد بصوت كله حماس 

اخيرا فوقت وعرفت انك غلطان وجيت علشان تصلح غلطتك 

اياد بأدب 

حضرتك معاك حق انا كنت غلطان انا اسف جدا 

خالد مفهمش قصد اياد ولا بتأسف على ايه وفكره بيتأسف ع انه سايب الشركة وسايب البيت 

فقال 

طب اتفضل خد مكانك يلا فيه ملفات كتير متأخرة ومحتاجة تتراجع ولينا كلام وعتاب كتير تاني مع بعض لما نرجع البيت 

استغرب اياد كلامه فبيت ايه بقا وشركة ايه بعد ما عرف الحقيقة خلاص 

علشان كدا متحركش من مكانه فقال خالد بضيق 

ايه واقف مكانك مبتتحركش ليه يا ابني انت سمعتني!

اياد 

ايوا سمعت حضرتك لكن اتحرك اعمل ايه ما خلاص الشركة مبقتش تخصني 

خالد بضجر 

انت بردو لسه مصمم ع اللي ف دماغك يا اياد مكانتش كلمة يا اخي يلا اتفضل خد مكانك بلاش دلع انت عارف اني مبحبش الدلع 

اياد 

خالد بيه انا جيتلك النهاردة علشان اعتذرلك 

خالد بصله باهتمام 

تعتذرلي!! 

اياد كمل كلامه 

واا واشكرك على كل حاجة عملتها معايا انا لو قضيت عمري كله مش هعرف اوفيك حقك ولا اللي عملته معايا انت وماما فداء علشان كدا سامحني لو كنت زعلت حضرتك في يوم من الايام 

هنا ادرك خالد كل الحكاية وعرف ان شوق حكت لاياد الحقيقة خلاص وانه خلاص عرف كل حاجة 

فكمل اياد كلامه 

انا جيت النهاردة علشان اطلب منك تسامحني لو كنت غلطت في حقك او اسأت بتصرفاتي بدون قصد مني وجيت كمان علشان اودعك اشوف وشك بخير يا  خالد بيه اتمنى لحضرتك دوام الصحة والعافية 

خالد بصدمة متوقعهاش 

تودعني!!! اشوف وشك بخير!!! انت ناوي تسافر ولا ايه 

اياد 

في الوقت الحالي لا معتقدش لكنها في الخطة ان شاء الله ربنا يهون.. استودعك الله يا خالد بيه 

وجه يتحرك علشان يمشي 

خالد وقفه 

استنى انت رايح فين 

اياد 

ماشي 

خالد 

ماشي رايح فين انت مش خلاص رجعت الشركة!! 

اياد 

انا جيت علشان اسلم على حضرتك انما هعمل في الشركة هنا ايه .. انا عرفت كل حاجة ماما شوق حكتلي الحقيقة 

خالد 

والحقيقة هتغير ف الواقع ايه 

اياد بحزن 

هتغير حاجات كتير اوي واولهم ان حضرتك مش مجبر انك تفضل شايل همي ومتحمل مسؤليتي بعد النهاردة مش مجبر ان حضرتك تتحمل وجودي في بيتك و لا في كل مكان تروحه .. عن اذنك يا خالد بيه 

قالها اياد ومشي بسرعة من غير ما يعطي خالد فرصة انه يرد او يفوق حتى من صدمة كلامه 

ولاول مرة يحس خالد بالندم ع قرار اخده ندم انه طلب من شوق تحكيله الحقيقة 

ياريتني ما طلبت من شوق تقولك الحقيقة متوقعتش انك هتمشي دا كان اخر حاجة ممكن تيجي في دماغي 

قالها وقعد مكانه بحزن 

لانه متوقعش ابدا اللي هيحصل من اياد رغم انه كان شىء متوقع 

❈-❈-❈

رجع اياد شقته متأخر بعد ما كان بيلف شوية بالعربية بلا هدف وع اخر الليل رجع 

فلقا فداء وكيان لسه موجودين في الشقة فقال باستغراب 

ايه يا ماما فداء انتوا لسه مروحتوش ليه

فداء اتجاهلت سؤاله لانها مش عندها النية ف انها تمشي وتسيبه فقالت 

اتأخرت ليه يا اياد قلقتنا عليك يا حبيبي يلا تعالى علشان نتعشى 

اياد 

نتعشى !! لالا مليش نفس انا هوصلكم يلا للبيت اتفضلوا 

فداء 

لالا لسه مش دلوقتي ااا البيت لسه محتاج شوية ترتيبات كدا اا صح يا كيان 

كيان 

اا اه اه صح يا مامي لسه مخلصناش شغل هنا في البيت يا اياد .. يلا نامل بقا انا جعانة من بدري ومنتظراك 

نفخ اياد بضيق 

يا جماعة اللي بتعملوه دا ملوش فايدة كدا كدا ان مكانش النهاردة هترجعوا البيت بكرة انا مش هسمح لحد يقعد معايا هنا من فضلكم بلاش تتعبوني اكتر 

اتنهدت فداء بقلة حيلة 

حاضر يا اياد طالما انت عايز دا بكرة الصبح هنمشي بس خلينا نقعد مع بعض الليلة علشان خاطري 

اياد 

حاضر يا ماما حضري يا كيان العشا علشان ماما اكيد جعانة 

كيان بابتسامة 

حاضر يا ايدو 

اتنهد اياد بأسى وقعد مكانه والحزن مسيطر على ملامح وشه 

وبعد العشا حولت فداء الكنبة اللي هما قاعدين عليها لسرير وقالت 

هنام هنا مع بعض الليلة يا اياد 

اياد 

اللي تشوفيه يا ماما زي ما تحبي 

وباتوا ليلتهم سوا ع الكنبة وجواهم حزن بيحاولوا يخفوه بأي طريقة 

❈-❈-❈

تاني يوم الصبح صحى اياد من النوم 

لقا كيان بتقوله 

صباح الخير يا ايدو اول مرة تصحى متأخر مش متعودة منك ع الكسل دا طول عمرك زي النحلة شعلة من النشاط 

اياد بهم 

هقوم اعمل ايه مفيش ورايا حاجة اعملها .. انا هقوم البس علشان اوصلكم 

هنا جت فداء وحطت الفطار ع السفرة 

يلا يا ايدو يا حبيبي علشان نفطر 

اياد 

هنفطر وهوصلكم للبيت يا ماما ومفيش اي اعتراض 

فداء بضيق 

ماشي يا اياد خلينا نفطر ع رواقة بقا 

وع السفرة 

اياد لكيان 

انتي مش عندك جامعة النهاردة ولا ايه 

كيان 

لا عندي وكنت هفطر وهمشي 

اياد 

تمام هوصلك في طريقنا بس انتي كدا متأخرتيش

كيان 

اول محاضرة مش مهمة اوي مملة ومش بفهم من الدكتور حاجة وبصراحة كدا مكانش ليا مزاج أحضرها 

اياد 

عايزك تهتمي بدراستك ومستقبلك اكتر يا كيان من فضلك 

كيان 

حاضر والله انا بذاكر وبحضر كل محاضراتي بس النهاردة بس اللي كسلت 

اياد 

خلاص تمام مفيش مشكلة ربنا يوفقك

وبعد الفطار وصلهم اياد بعربيته وصل اخته الاول لجامعتها وبعدين وصل امه لبيتها 

فداء 

نفسي تنزل معايا يا اياد هفرح اوي 

اياد 

مش هينفع يا امي ارجوكي تفهمييني 

فداء اخدته ف حضنها 

انت ابني يا اياد وهتفضل طول عمرك ابني انت فاهم والبيت دا هيفضل مفتوحلك طول الوقت لانه بيتك بيتك اللي اتربيت وعشت فيه طول حياتك هنتظرك ترجعله يا اياد 

اياد 

ربنا يسهل يا امي يلا مع السلامة اشوف وشك بخير 

وبمجرد ما نزلت فداء 

طار اياد بالعربية الى حيث المجهول بالنسبة ليه 

ولما دخلت فداء البيت .. كانت خالد بيستعد علشان ينزل على شركته 

واول ما شافها مصدقش نفسه ورمي شنطته السودا بتاعة الشغل واللي فيها الاوراق المهمة من ايده 

وجري عليها اخدها في حضنه جامد 

فداء واخيرا واخيرا رجعتي بيتك وحشتيني اوي اوي انا مكنتش عايش من غيرك حمدا لله على السلامة يا روحي 

بعدت فداء عنه بجمود وقالت

وانا مش هعرف اعيش من غير اياد علشان تكون عارف يعني اياد ابني انت السبب في بعده عني اتمنى تكون كدا مبسوط بعد اللي عملته ممكن اعرف انت كدا استفدت ايه لما بعدت ابني عني لما دخلت الحزن والكسرة لقلبه السر فضل مستخبي معاك طول السنين دي كلها ليه ليه تطلب من شوق تفصح عنه مكانش لازم اياد يعرفه وفي الوقت دا بالذات اللي عملته مش هقدر انساه ليك ابدا يا خالد ولا هسامحك عليه لحد ما اياد ابني يرجع لحضنس انت فاهم 

قالتها وسابته وطلعت على اوضتها وهو وقف مصدوم من كلامها وكل مرة بيتأكد ليه انه فعلا غلط.. غلط في اللي عمله مع اياد 

❈-❈-❈

مادونا شافت مالك لابس ومتشيك ومتأنق اوي في لبسه فأعجبت بالشياكة اللي هو عليها واللي اول مرة تحس انه ليه جاذبية غير معهودة 

فدا خلاها تقول 

مالك انت رايح فين

مالك استغرب سؤالها لكنه قرر يرد عليها 

عندي بخصوص المهمة اياها

مادونا 

ايه دا الحفلة النهاردة طب استنى انا هروح البس وجاية معاك 

مالك 

لا انا هروح الحفلة مع بيري انا خلاص اتفقت معاها وهي منتظراها دلوقتي 

 مادونا بانزعاج 

انت ليه رايح مع البنت دي ليه مش المفروض اننا متجوزين وانا اللي اجي معاك ... ااقصدي يعني المهمة بتقول كدا 

 مالك ببرود 

المهمة محتاجة تلبسي فستان سهرةوانا عمري ما هسمح بكدا علشان كدا هاخد بيري الحفلة دي لاني لازم احضرها 

 مادونا بغيرة 

ليه يعني ما انا عندي فساتين جميلة وااا 

بطرت كلامها لما لقته وشه كشر  وقال بغضب 

كرريها تاني وشوفي هعمل فيكي ايه 

قالها وسابها ومشي 

وهي  فضلت مكانها تبص للباب بغيظ 

اوف بقا 

❈-❈-❈

طلعت شوق علشان تصحي وعد لشغلها 

واه وعد اتأخرت النهاردة ف النوم اول مرة يعنى هي راحت عليها نومة ولا ايه 

اني هطلع اصحيها واطمن عليها طامت تعبانة ومرهقة امبارح 

ولما دخلت اوضتها لقتها نايمة 

فقربت منها وصحتها بحنان 

وعد يا حبيبتي كل ديه نوم يا قلبي 

اتقلبت وعد ف السرير بكسل وفتحت عيونها 

صباح الخير يا مامي 

شوق 

صباحك هنا وقشطة يا قلب ماما ايه مش ناوية تروحي شغلك النهاردة ولا ايه 

وعد كانت حاسة ان كل جسمها بيوجعها 

بصراحة لا يا مامي مليش مزاج حاسة اني مش في المود ولسه تعبانة من امبارح 

شوق 

ايوا اني حسيت باكده يا بنتي وقولت الظاهر لساتها تعبانة اني كم مرة نبهت مترهقيش نفسك في الشغل 

وعد 

والله يا مامي مأرهقتش نفسي عادي زي كل يوم بس مش عارفة تعبت ليه كدا 

شوق 

يا قلب امك سلامتك الف سلامة ع بالليل اكده نروح نعمل صورة دم شاملة نطمن ع انميتك لأني حاسة انك هفتانة اليومين دول 

وعد 

حاضر يا مامي .. صحيح يا مامي نغم ويوسف مش هيرجعوا بقا وحشوني اوي 

شوق 

اديكي مرتاحة من اختك نغم بدال ما انتي كل شوية ناقب ونقير معاها 

وعد ضحكت 

والله بحبها يا ماما بس مش عارفة لما شوفها بحب اضايقها 

ضحكت شوق 

وهي بتحبك وخايفة على مصلحتك دايما وعد متزعليهاش منك.. ولما ترجع من السفر هي ويوسف هقولها انك بتحبي تضايقيها علشان تطلعهم عليكي 

وعد عملت انها خايفة 

لاااا ارجوكي 

ضحكت شوق اني هنزل اشوف اللي ورايا وانتي هتكملي نوم ولا اطلعك الفطار اهنه 

وعد 

لا هنام انا جعانة نوووم 

شوق 

طيب يا قلبي نوم الهنا والعافية 

ولما نزلت شوق  تحت شافت ادم جاي وشكله مستعجل 

صباح الخير يا ابلة شوق انا عارف اني اتأخرت النهاردة ع وعد بس والله غصب عني كان عندي كام مشوار كدا تبع الشغل مينفعش يتأخروا 

شوق 

صباح الخير يا حضرة الرائد لاه ولا يهمك وعد مهياش رايحة الشغل النهاردة مش عنديكم بردك اجازات عارضة واكده زي عندينا في المدرسة 

ادم بقلق 

مش جاية ليه خير يا ابلة شوق هي تعبانة ولا ايه طمنيني ارجوكي 

ابتسمت شوق لقلقه ولهفته دي عليها وقالت 

اطمن يا حبيبي وعد كويسة بس مرهقة شوية وقررت تغيب النهاردة 

ادم اتنهد براحة 

طب الحمد لله طمنتيني 

شوق 

الله يطمن قلبك يا رب... الا قولي يا ادم هو  همام واد الدهشان فين؟؟ 

ادم رفع حاجبه 

حتى انتي يا ابلة شوق بتسأليني عنه 

شوق 

بعتلي مرسال وبيسأل عليه وبيوصيني اعرفله طريق ولده منيك 

ادم بمكر 

هيعرفه قريب لانه هيحصله بعون الله 

شوق 

ادم يا ولدي بلاش تلعب بالنار مع الراجل ديه .. ديه شراني ميعرفش ابوه خايفة يأذيك يا ولدي وخاصة انه باعتلك تحذير لانه شاكك انك السبب في اختفاء ولده 

ادم 

متخافيش يا ابلة شوق انا عارف بعمل ايه كويس وعارف بلعب مع مين وعامل حساب لكل حاجة متقلقيش عليا 

شوق 

ربنا يحميك ويحفظك يا ولدي 

ادم 

ابلة شوق انا عايز اتجوز وعد ...

يتبع