رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الثالث والأربعون

تم النشر السبت

15/2/2025

خلص ادم شغله وعمل اتصال سريع وبعدين ركب عربيته واتوجه لوجهته المقصودة 

اما في المستشفى كان رائد هناك في انتظاره في مكتبه بحسب اتصاله من شوية 

ولما الممرضة بلغته بأن آدم منتظره قالها تدخله 

ادم 

 السلام عليكم ورحمة الله وبركاته.. دكتور رائد كيف حالك 

رائد رحب بيه 

وعليكم السلام ورحمة الله وبركاته اهلا وسهلا بحضرة الظابط المستشفى كلها نورت تعالى اتفضل اقعد 

قالها وطلب ليهم فنجانين قهوة 

ها يا ادم خير ايه الحاجة المهمة اللي عايز تكلمني فيها ومش عايز تقولها في البيت ايه الظاهر كدا خايف من ان شوق تعرف او انك عامل عاملة مش كدا 

قالها رائد وهو بيبتسم 

فقال ادم 

بصراحة اني فعلا عايز اكلمك في حاجة مهمة بس مش خايف من ابلة شوق ولا حاجة كل ما في الموضوع اني جاي وعايز اعرف رايك انت يا دكتور الاول قبل ما تشاور ابلة شوق فيه 

رائد بفطنته بدأ يستشف ادم عايز يتكلم في ايه فقال 

تمام اتفضل سامعك 

ادم اتنحنح بارتباك 

اا احم اني كنت بفكر اتجوز او بصراحة اكده مفكرتش في الجواز دلوك الا لما لقيت قلبي ميال للدكتورة وعد علشان اكده واول ما حسيت بالإحساس الجديد عليا ديه مكدبتش خبر وجيت طوالي علشان اخد راي حضرتك واطلب يدها منيك... اني عارف اني منيش نفس المستوى وان اهلي على قد المقام بس اوعدك يادكتور اني احاول اعيشها في نفس المستوى تقريبا بعون الله 

خلص ادم كلامه وسكت علشان يسمع رد رائد اللي طال شوية لحد ما اتكلم وقال 

انت شرف لاي عيلة يا حضرة الظابط ومش هقول انت فاجئتني بطلبك دا لاني كنت متوقع منك طلب زي دا في يوم من الأيام وبصراحة انا فعلا كنت بتمناك لوعد بنتي .. انا موافق يا ادم بس هشوف رأي وعد الأول لاني حقيقي معرفش رأيها ايه وطبعا هي ليها حرية الأختيار محدش يقدر يجبرها على حاجة 

ادم 

طبعا طبعا يا دكتور اني سعيد بكلامك ديه ومنتظر رد الدكتورة وعد على طلبي خليها تاخد وقتها في التفكير بس مطولش يعني علشان الوقت ديه هيكون اطول وقت هيعدي عليا في حياتي 

ضحك رائد وقال 

ههه ربنا يسهل ان شاء الله.. اتفضل اشرب القهوة بتاعتك قبل ما تبرد 

❈-❈-❈

رمش يزن اكتر من مرة وفضل يفرك في عينه كتير وهو بيقول 

لأ انا مش مصدق نفسي معقول دا بجد اللي بيحصل اكيد انا في حلم مش كدا 

ضحكت لوجي 

ايه يا يزن كل دا علشان جيتلك الشركة هنا طب ما انا جيت قبل كدا كتير ايه بقا الجديد 

يزن 

الجديد انك في كل مرة تبهريني بجمالك طلتك بتنور قلبي بتخليه يرقص من مكانه 

لوجي بحرج 

يزن وبعدين بقا 

يزن 

يااه قوليها تاني كدا يزن طالعة من بوءك زي العسل يااه امتا نتجوز بقا 

لوجي 

ما هو دا اللي انا جايالك علشانه يا يزن 

يزن بعبط 

ايه هنحدد معاد فرحنا اخيرا انا موافق على بكرة وجاهز كمان 

رفعت لوجي حاجبها وبصتله بانزعاج فقال 

خلاص اسف اتفضلي اتكلمي عايزة تقولي ايه 

لوجي 

بابي قالي اننا محتاجين نتكلم مع بعض ونتفق على عفش الشقة بتاعتنا ان شاء الله علشان يادوب تجهز 

يزن بفرحة 

لأ.. قولي والله كدا عمو امير بنفسه اللي بيقول كدا يا فرج الله والله حقيقي انا مش مصدق نفسي وحاسس اني في حلم فعلا

لوجي 

بص كدا يا يزن انا معايا ع التاب صور كتير ايه رايك نختار منهم  

يزن 

انا موافق على اي حاجة تختاريها اكيد زوقها هيكون قمر زيك كدا 

لوجي 

يزن بطل بقا كلامك دا دلوقتي احنا لسه مخطوبين بس مش هينفع كدا 

يزن 

حاضر اسف هستنى لبعد كتب الكتاب وامري لله وربنا يصبرني هاتي يا بنتي التاب دا وريني كدا مختارة ايه 

ابتسمت لوجي ابتسامة خفيفة 

فانفرجت اسارير يزن وقال 

ياااه على القمر لما يضحك يا نااس عسل اوي 

لوجي ادعت انها متضايقة رغم انها من جواها مبسوطة 

لااا انا هقوم امشي احسن 

يزن قام بسرعا علشان يلحقها 

لا لا تمشي دا ايه يا انسة انتي هنا جاية في مهمة رسمية هامة ولازم تخلص اتفضلي اقعدي نختار سوا بلاش دلع وانا هتنيل اقعد ساكت هقفل بوءي بالقفل كمان علشان تكوني مبسوطة

ضحكت لوجي وقعدت فقال

ناس متجيش الا بالعين الحمرا   

❈-❈-❈

مالك كان قاعد في الليفنج ببفكر في مهمته ولما لمح مادونا ماشية 

رفع وشه وبعدين رجع بص قدامه تاني 

وما هي الا ثانية ورفعها ليها تاني بصدمة

لما شافها لابسة فستان سهرة ومستعدة انها تخرج بشكلها دا 

فقال وقف بسرعة وقال 

رايحة فين بالنيلة اللي انتي مهبباها دي 

مادونا نفخت بضيق 

ممكن لما تتكلم معايا تتكلم بأدب وبأسلوب افضل من كدا 

نفخ مالك بانزعاج وقال 

رايحة فين يا مادونا 

مادونا ببرود 

خارجة عن اذنك 

تخطاها مالك ووقف قدامها وقال بحدة 

بلبسك دا استحالة انا كم مرة قولتلك لا... وكم مرة اكدت عليكي انه ممنوع تخرجي بلبس زي دا بعدين تعالي هنا انتي رايحة فين اصلا 

مادونا 

بطل بقا تحكماتك دي انت فاكر نفسك مين فاكر نفسك جوزي بجد وحتى لو جوزي انا عمري ما اسمحل ليه يتحكم فيا بالشكل دا

مالك 

لا تحكمات ولا بطيخ وبطلي انتي النفخة الكدابة اللي فيكي دي وانطقي قولي رايحة فين 

مادونا 

والله مش هرد عليك طول ما انت بتتكلم بقلة زوق كدا اوعى كدا من طريقي 

حاول مالك انه يكظم غيظه وحاول بتكلم بهدوء 

حاضر هتكلم بزوق .. رايحة فين يا حضرة الظابط مادونا ها كدا كويس؟ 

مادونا هنا ردت عليه بجدية 

ورايا معاد مهم ها كدا ارتحت على فكرة انت لما بتخرج مش بقولك رايح فين وجاي منين 

مالك 

معاد مهم مع مين علشان تلبسي فستان سهرة زي دا وانتي نازلة تقابليه !! 

مادونا 

مش انت بس اللي بيكون عندك مواعيد عمل انا كمان عندي معاد شغل ومهم كمان

مالك 

نعم ياختي معاد شغل ومع مين دا انتي وقعتك مطينة قال معاد شغل قال انتي اتجننتي يا مادونا!! 

مادونا 

ايه  مالك مستغرب ليه ما انت كان عندك معاد شغل مع بيري ليه مستنكر ان عندي معاد شغل زيك انت بقيت غريب اوي.. اتفضل بقا عديني لانك معطلني كدا 

اتحرك مالك من مكانه فظنت مادونا انه وسع لها الطريق علشان تعدي لكنها مكانتش تعرف انه أتوجه ناحية الباب وقفله بالمفتاح وحط المفاتيح في جيبه 

فقال بدهشة 

بتعمل ايه يا مجنون قفلت الباب ليه افتحه بقولك ورايا معاد مهم اخلص 

تجاهلها مالك وراح قعد على اقرب كنبة وقال 

مش فاتح واللي عندك اعمليه اقولك نطلي من شباك الفندق دا ياكش تقعي وتنكسر رقابتك وارتاح منك... لكن خروج من هنا بمنظرك دا او حتى مقابلات شعل مش هيحصل ومهما حصل 

انصدمت مادونا من ردة فعله ومبقتش عارفة تعمل ايه فقعدت قصاده على الكنبة وفضلا تهز في رجليها بعنف وغضب 

وهو يبصلها ببرود وحاطط رجل على رجل ولا كأنه عمل حاجة 

❈-❈-❈

خلصت لوجي اللي كانت جاية علشانه بعد ما اختارت هي ويزن اساس الشقة ويزن هينفذه ليها في اسرع وقت وهو مش مصدق نفسه مش مصدق أن عمه امير وافق على جوازهم وانه هيعمله خلال وقت قصير كمان 

قامت لوجي وقفت 

تمام كدا يا يزن انا اديت مهمتي مهمتك بقا تتفق مع بابي وتشتروه فاضل شوية تجهزيات تانيا هرتب ليهت ولما تيجي البيت هنتكلم فيها وكمان فستان الفرح والتجهيزات دي كلها 

يزن 

تمام يا قلب يزن هكون عندك الليلة ان شاء الله تعالي هوصلك بعربيتي 

لوجي 

لالا خليك في شغلك مش عايزة اعطلك انت هتتعطل كتير بسبب المشاوير اللي هنعملها في الايام الجاية وكمان انا لسه هروح بابي اسلم عليه واقعد معاه شوية 

يزن 

طيب براحتك لما تخلصي وتاخدي وقتك اتصلي بيا وانا هاجي اوصلك 

لوجي 

ممتعبش نفسك يا يزن انا ممكن امشي مع بابي لان خلاص قربنا على وقت الغدا وبابي متعود يرجع البيت في الوقت دا

يزن 

 ماشي يا لوجي بتقفليها عليا طيب حاضر يكون في علمك انا الزيارة الجاية ليكم هحدد معاد كتب كتابنا وهيكون قريب اوي وهعمل ما بدالي بقا ها 

اتحرجت لوجي من تلميحاته 

وخرجت بسرعا من المكتب 

اما هو ففضلت البسمة مزينة وشه وسرحان فيها وبيفكر في يوم كتب كتابه وهيشتري ليها فيه هدية ايه تكون مناسبة ليها 

لكنه فاق من شروده على صورة دنيا في وشه 

فاستغرب وفضل يفرك في عينه اكتر من مرة لانه ظن انه بيتوهم ولما اتأكد انها حقيقية قال 

انتي!! 

دنيا بابتسامة 

مفاجئة مش كدا 

قام يزن بسرعا من مكانه ومسك ايديها بغضب وبعنف 

انتي بتعملي ايه هنا ليكي عين تتجرأي وتيجي لحد عندي هنا تاني في مكتبي اتفضلي اطلعي برا برااااا 

دنيا جت تتكلم 

يزن انت ازاا

يزن بحدة ولا كلمة برا بدل ما انادي الأمن يجوا يشيلوا الزبالة امثالك 

قالها وزقها لبرا مكتبه وقفل الباب في وشها 

وهو بيقول منك لله يا بعيدة منك لله .. الحمد لله أن لوجي مشيت قبل ما تشوفها كانت هتبقى حكاية... اوف منك لاه عكرتي مزاجي وانا كنت مبسوط وسعيد ربنا يخدك

❈-❈-❈

مادونا كانت قاعدة تبص لمالك بغيظ 

فقال ايه هتفضلي تبصيلي كدا كتير اخدتي ليا كم صورة لحد دلوقتي ها 

مادونا 

عاجبك العطلة اللي انا فيها دلوقتي المعاد هيفوتني وحضرتك قاعد ولا على بالك على فكرة كله على دماغك في الاخر ولو حد كلمني هقولهم انت السبب

مالك 

اه قوليلهم انا السبب اني مش خارجة يعني مش خارجة 

في الوقت دا خبط علي وهو لابس هدوم الهوم سيرفس ولما فتح له مالك

 قال علي

 هوم سيرفس يا فندم

 مالك اتفضل دخله جوه

ولما دخل علي وقفل مالك الباب قال علي 

ايه يا مادونا انتي ناسيه ميعادك ولا ايه هتتاخري كده يا دوب تتحركي دلوقتي

مادونا شاورت على مالك وقالت 

البركه في الباشا قافل الباب ومش عايزني اخرج 

علي 

فيه ايه يا مالك باشا هو دا وقت هزار مادونا وراها معاد مع الجوكر ذات نفسه ومينفعش تتأخر عليه

مالك 

 انت واعي بتقول ايه انت عايز مادونا تقابل الجوكر اظنك عارف الجوكر ده اكثر مني وعارف كويس عينه الزايغة وانه بتاع ستات مادونا ما ينفعش تقابله وانا لا يمكن اسمح بدا 

علي 

بس دي مهمة ولازم تتنفذ على اكمل وجه مينفعش نقف هنا احنا اتخطينا كتير ومتبقاش غير القليل مش هنيجي في الأخر ونقول لا يا مالك 

مالك كان بيتكلم ومكانش عارف ولا فاهم ان احساس الغيرة متملك منه 

تولع المهمة على الشغل على كل حاجة استحالة اسيب مادونا تقابل الجوكر استحالة ودا اخر كلام عندي 

على 

يا مالك مقابلة مادونا للجوكر معناها حصولنا على دعوة رسمية للحفلة ولو معانا الدعوة دي هندخل من غير تفتيش ووقتها هتعرفوا تجسسسوا عليهم وتيجبوا المطلوب بسهولة غير كدا مش هينفع وهيكون فيه تفتيش ورقابة شديدة جدا علشان خاطري وخاطر المهمة وخاطر بلدك كمان سيبها تقابله بعدين متخافش عليها مادونا بمليون راجل مش كدا يا مادونا 

مادونا بصت لعلي بحدة 

عندك شك في كدا!؟ وكمان انا اعرف ازاي اوقف الجوكر عند حدة لو حاول يتعدى حدوده 

مالك هنا زعق 

وانا لسه هستنى لما يحاول يتعدى حدوده انتي بتستعبطي

علي 

عديها بقى يا مالك الوقت بيجري مننا انا لازم اوصل مادونا للاوتيل حالا 

مالك بعد وما جاتله فكرة 

انا موافق مادونا تقابل الجوكر 

فرحت مادونا وعلي وخرج علي علشان يبدل هدومه بسرعة ويقابل مادونا على انه سواق التاكسي 

اما مالك فابتسم بمكر ونزل وراهم وهو في دماغه حاجة معينة  

❈-❈-❈

وصلت مادونا لمطعم الاوتيل اللي هتقابل فيه الجوكر ولقته في انتظارها ...

ورحب بيها جامد 

سارااا اتأخرتي عليا كتير انا قولت مش جاية 

سارا 

سوري امجد بيه انت عارف علشان اجهز نفسي الوقت سرقني لكن اني مجيش لمقابلتك لا طبعا دا شىء مينفعش يتفوت وانا اكيد محظوظة بالدعوة دي 

جوكر 

انا اسعد سارا اتفضلي اقعدي وحشتيني اوي ايه الجمال دا كله انتي كل مرة بتكوني احلى سارا 

سارة 

ميرسي امجد بيه كلك زوق 

جوكر 

انتي لسه مشوفتيش الزوق كله انا في النقطة دي بالذات كريم اوي الاول نشرب اي حاجة وهوريكي المفاجئة اللي عاملها ليكي 

سارا 

اوه مفاجئة لااا انا كدا مش هقدر انتظر كتير 

ضحك جوكر 

ههه ااووه هي دي عادة البنات ولا هتشتريها هوريهالك اوك عارف انك مش هقدري تصبري 

سارا 

لا طبعا اصبر ايه وريهالي اكيد انا متشوقة 

جوكر 

علشان انتي جميلة سارا جايبلك هدية قيمة بمناسبة اول معاد ما بينا واكيد مش هتكون اخر مرة 

سارا 

اكيد امجد انا مبسوطة اوي اني قابلتك 

ولسه الجوكر بيفتح العلبة علشان يوريها لسارا 

جه مالك اللي كان لابس لبس الجرسون " الويتر" وحط العصير وهو بيرزع الصينية جامد على الترابيزة علشان مادونا تنتبه ليه فشهقت بصدمة مش متخيلة انه عملها وجه وراها 

فكانت هتضحك بعدها لكنها حاولت تكتم الضحكة 

فانتبه الجوكر 

فيه ايه سارا عايزة تقولي حاجة 

سارا 

لالا امجد بيه مفيش حاجة 

مالك 

اي اوامر تانية يا فندم

الجوكر 

لالا روح انت دلوقتي انت معطلنا يلا امشي 

قالها الجوكر وفتح العلبة القطيفة المربعة الشكل وقال 

ها سارا ايه رأيك في هديتي البسيطة دي 

صرخت سارة بفرحة حقيقية ودا لان العقد كان جميل كدا وقيم جدا جدا 

واو امجد بيه تحفة اوي حقيقي زوقك يجنن والعقد شكله غالي اوي ميرسي بجد 

جوكر 

 عجبك لو مش عاجبك ابدله فورا المهم انك تكوني مبسوطه

 ساره عجبني طبعا ميرسي اوي انا مبسوطة اوي اوي 

كل دا كان تحت نظرات مالك اللي هينفجر من تصرفات مادونا بقى عجبك هديته ومبسوطه قوي بها وبتتنططي من الفرحه غبيه ان ما وريتك

جوكر 

خليني البسهالك متشوق اشوفها عليكي هتاكل منك حتة اكيد 

هنا اتوترت مادونا وبصت لمالك اللي بصلها بحدة وعيون زي الصقر هتخترقها من قوتها 

فبلعت ريقها بتوتر اكتر وهي مش عارفة تعمل ايه وخاصة جوكر قام من مكانه واتوجه ناحية كرسيها ومد أيده ناحية رقبتها ففجأة ااااا

يتبع