رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الخامس والخمسون 

تم النشر الثلاثاء 

15/4/2025

وصل مهند للمكان اللي قال لأدم عليه 

ادم كان قاعد على نار ف انتظار مهند وصل قبليه وصبره نفذ مش قادر يستنى اكتر من كدا عايز يعرفه مين اللي عمل كدا في وعد مراته

ففضل رايح جاي في مكانه لحد ما سمع عربية مهند فاتحرك من مكانه بسرعة وخرج يقابله وقال

خال مهند اخيرا جيت 

نزل مهند من العربية وبص لوليد وقال بلهجة امرة 

انزل

وليد خاف من نبرة صوت مهند فقاب بتوتر 

اا هو فيه ايه حضرتك.. ااا انت جايبنا هنا ليه حضرتك قولت عايز تتكلم معايا 

مهند 

حصل انا عايز اتكلم معاك واسألك كم سؤال علشان كدا بقولك انزل نتكلم 

اضطر وليد انه ينزل واول ما شاف ادم عرفه علطول 

مش دا جوز وعد !!! هو بيعمل ايه هنا انا مش فاهم حاجة 

مهند مشي في طريقه لجوا البيت وقال لوليد تعالى واقف عندك ليه 

ادم كان واقف مش فاهم حاجة 

مين الواد ديه!! 

مهند بص لوليد بسخرية 

الاستاذ دا دكتور ف الجامعة حاليا وكان زميل الدراسة مع وعد 

هنا ادم فهم تلميح مهند فاتحولت عيونه لعيون وحش كاسر وهو بيبص لوليد بس علشان هو مش متعود ع التهور وانه ياخد الأمور بالعقل والأدلة متحركش من مكانه الا لما يتأكد ويسأله هل هو فعلا اللي عمل دا في وعد ولا لا 

لكن مهند كان متسرع اول ما شاف وليد دخل البيت مسكه من قفاه وقال وهو بيزقه 

ادخل يا حلو ادخل وقعت ولا حدش سمى عليك ادخل 

وليد كان هيقع لكنه لحق نفسه واتعدل في وقفته 

ااا مهند بيه هو فيه ايه حضرتك ليه بتكلمني كدا .. انا حاسس ان فيه حاجة مش طبيعية بتحصل 

مهند فتح درج الجزامة اللي قدامه وطلع منها حبل وقال وهو بيقرب من وليد اللي اتراجع بخوف ناحية الباب 

هتعرف كل حاجة دلوقتي وهتعترف بكل حاجة عملتها وسواء هتتكلم من نفسك او بالاجبار هتتكلم بردو 

وليد 

اا استنى انت حضرتك ناوي تعمل ايه انا مش فاهمك هو فيه ايه .. انت اا انت عايز تربطني هو انا مخطوف ولا ايه هو فيه ايه يا مهند بيه 

مهند قرب منه وقال وهو بيحاول يربطه 

انا سبق وقولتلك ابعد عن وعد وأنها خط احمر مبتهاونش فيه حصل ولا لا 

وليد بلع ريقه 

اا حصل بس انا اقسم بالله ما جيت جنبها من يومها ولا ليا اي علاقة بيها صدقني 

ادم رفع حاجبه وقال بغضب

الواد دا يعرف وعد من زمان!!! 

هنا وليد خاف ع نفسه من ادم وهيئته المرعبة في الوقت دا فقال 

اقسم بالله دا كان من زمان من ايام الثانوي ااا اا كك ككنت بحبها بس اقسم بالله ما كنت بسرح بيها كنت بحبها بجد ونفسي اتجوزها 

سكت علشان يشوف ردة فعل أدم لكنه لقاه ساكت ومش بيتكلم 

فخاف اكتر 

والله هي دي الحقيقة ااا انت ساكت ليه 

ادم ربع ايده حوالين صدره

 انا سامعك كمل وبعدين 

وليد بخوف 

ولا قابلين هي دي كل الحكاية والله العظيم 

مهند 

عايز تفهمني انك محاولتش تكلم وعد ولا مرة من ايام الثانوي ولا دخلت صيدلية علشان تطاردها في كل مكان 

ادم اتفاجىء باللي بيسمعه فقال 

ايه!! 

وليد بتوتر 

ااا حصل حصل فعلا انا دخلت صيدلية زي وعد وعلشان اكون جنبها في كل مكان علشان تشوفني وتعجب بيا زي ما انا معجب بيها .. بس اا بس للاسف هي ولا مرة شافتني ولا مرة عبرتني حتى واخيرا اتجوزتك انت 

مهند بغيظ 

سامع يا ادم الواد دا يستاهل الحرق حي علشان يندم على كل حاجة عملها 

ادم كان صدره بينتفض بيعلى وينزل بصورة مش طبيعية 

اما وليد فصرخ فيهم بغضب 

هو فيه ايه انتوا ليه بتحاسبوني بالحدة دي 

انا عملت ايه يعني هو الحب حرام ولا بأيد حد... انا حبيت من طرف واحد لا انا ولا اول واحد يحصله كدا مش ذنبي اعمل ايه يعني انتوا اكيد كنتوا معرضين لكدا 

مهند ضربه بالقلم على وشه 

اخرس يلا ومسمعش نفسك انت فاهم 

قالها وقرب منه وبدأ يربطه بالحبل 

وليد حاول يفلت منه ويفك نفسه 

انت بتعمل ايه اوعى سيبني انا مش هسمحلك تعمل فيا كدا انا دكتور جامعي محترم سيبني من فضلك قولتلك انا مليش دعوة بوعد ما هي خلاص اتجوزت 

مهند باستهزاء 

سامع يا ادم بيقولك دكتور جامعي محترم وسلملي على المحترم 

قرب ادم منه هو كمان فقال وليد بخوف 

انت بتقرب مني ليه انت كمان وقسما بالله ما عملت حاجة انتوا بتعملوا ليه كدا هو فيه ايه 

ادم متظاهر بالهدوء رغم أن جواه بركان بيغلي 

انا هديك فرصة واحدة تعترف بكل اللي عملته ووقتها هيكون عقابك فيه رحمة شوية عن اللي كنت ناوي اعمله فيك 

وليد كان هيعيط من الخوف 

اعترف بايه والله العظيم ما عملت حاجة يا ناس انتوا مش مصدقني ليه بس.. اانا انا صحيح حاولت اتقرب منها واكلمها واتودد ليها لكنها كانت بتصدني ودا اللي خلاني اتعلق بيها اكتر لانها كانت محترمة بزيادة ومتربية ١٠٠ مرة كنت عارف اني نادر الاقي بنت بالأخلاق دي علشان كدا كنت مصمم عليها هي وبس لكن . لكن اول ما اتجوزت ولقيتها خلاص اختارت حياتها اللي انا مش جزء فيها بعدت.. صحيح زعلت بس بعدت اقسم بالله ورضيت بنصيبي انها مش ليا هي دي كل الحكاية 

مهند فكره بيكدب علشان كدا متحملش فقال لادم 

الواد دا مفيش فايدة فيه هيفضل يحور كتير انا بقول نشوف شغلنا معاه وانا متأكد انه هيعترف من اول قلم لانه مش حمل اللي هنعمله فيه 

وليد صرخ بخوف

 اقسم بالله ما بكدب معملتش حاجة ف وعد 

مهند 

ايه رايك يا ادم شايفك ساكت ليه انت هتصدقه ولا ايه 

ادم 

للاسف هصدقه لانه فعلا مش بيكدب 

مهند 

نعم هتصدقه!! قالو للحرامي احلف قال جالي الفرج دا كداب هتصدقه ازاي يا ادم..

ادم 

نبرة صوته وحركة بؤبؤ عينه بتأكد ليا انه صادق بس مش معنى كدا انه بقا بعيد عن قفص الاتهام 

وليد 

والله انا صادق وما بكدب وعمري ما حاولت ولا هحاول ءأذي وعد.. بس ارجوكم فهموني هو فيه ايه لاني والله ما فاهم حاجة

ادم اتحرك من مكانه علشان يمشي وقال 

خال مهند اني همشي معنديش استعداد اضيع وقتي مع واحد زييه هروح اكمل بحثي في المستشفى الواد ديه ملوش علاقة باللي حصل لوعد 

مهند كان هيتجنن فقال 

بس انا متأكد انه هو وابوه ليهم علاقة استنى بس متتسرعش

ادم 

بم اننا اختلفنا دلوك يبقة انت تدور من جانب واني ادور من الجانب التاني ايه رايك 

مهند 

ماشي يا ادم اعمل اللي انت عايزه وانا هعرف ازاي اخلي الواد دا يقر بكل حاجة 

ادم 

ماشي سلام 

قالها ادم وركب عربيته ومشي بيها 

اما وليد فافتكر ابوه لما قاله 

هجيبهالك لحد عندك وتتمنى منك انك تتجوزها وتترمي تحت رجليك 

هنا وليد بلع ريقه بخوف 

معقول معقول بابا عمل فيها حاجة وايه اللي كان يقصده بكلامه 

❈-❈-❈

نسرين كانت قاعدة قصاد بنتها وهما بينقلوا ليها دم عمالة بتدعي وعنيها بتتحسر ع بنتها 

يارب يارب ما تخسرني بنتي يارب يارب نجيها يارب 

في الوقت دا صرخت سامية اللي كانت قاعدة جنبهم ع الكرسي 

اااه اه يا ماما الحقيني اااه 

نسرين اترعبت وقالت 

فيه ايه يا سامية مالك بتصرخي ليه فيكي ايه يا بنتي 

سامية وهي حاطة ايديها على بطنها 

 بطني يا ماما بطني سكاكين بتقطع فيها بطني هتنفجر ااااه 

قالتها وصرخت صرخة اتلم على اثرها كل اللي كان في المستشفى من الوجع 

الكل ساب اللي ف ايده وجري يشوف مين بتصرخ 

فاتفاجئوا بسامية نايمة ف الارض بتدبدب بايديها من قسوة الألم 

ونسرين بتصرخ بخوف ع بنتها

بنتي بنتي يا ناس الحقوها بنتي التانية هتروح مني هي كمان 

جه كم دكتور يشوفوها والممرضات حاولت تشيلها تنقلها ع الترولي بس الموضوع كان صعب لانها مش قادرة تتحرك كانت بتتلوى من الألم 

فبسرعة الدكتور طلب يتعمل لها فحوصات دم واشعة علشان يعرفوا هل دا بسبب المرارة ولا لأ وعطوها حقن مسكن 

لكن الألم مسكنش وفضلت تصرخ بدون توقف

❈-❈-❈

وصل ادم مكتبه تاني وهو متضايق وعلى اخره 

وبعد شوية جاله واحد من رجالته وف ايده ملف 

اتفضل يا ادم باشا دي المعلومات اللي طلبت تعرفها جبتها من سجل امن المستشفى نفسه

اخده منه ادم بسرعة وفتحه

ولما قرأه عرف ان كان فيه ٣ دكاترة في اليوم دا بس... دكتور اسامة ودا دكتور باطنة ودكتورين تانين بس مدة وجودهم في المستشفى اليوم دا كانت قليلة بعكس دكتور اسامة اللي كان متواجد طول اليوم 

اتكلم ادم 

عايز اعرف كل حاجة عن ال٣ دكاترة دول حتى حياتهم الشخصية اعرفها بالتفصيل وكمان تجيبلي اسماء الممرضات والعاملات في اليوم دا ولو عرفت تجيب اسماء المرضى اللي كان ليهم علاقة بوعد او اتعاملوا معاها عايز كل حاجة اللي جبته دا مش كفاية اتحرك باسرع وقت 

ــ تحت امرك يا فندم علم وينفذ 

❈-❈-❈

بعد ما عدى حوالي ساعة بتصرخ فيها سامية بشكل متصل من الألم اللي مفيش اي مسكن قدر على انه يسكنه اغمى عليها من التعب ونامت جنب اختها لا حول ليها ولا قوة 

ونسرين واقفة جنبهم بين السريرين بتتحسر على بناتها اللي هيرحوا منها ف غمضة عين 

جت زميلة نسرين اللي سمعت باللي حصل لبنات صاحبتهم فقطعت اجازتها وجت تشوفهم 

نسرين نسرين فيه ايه يا حبيبتي بناتك مالها كفا الله الشر 

نسرين عيطت اكتر 

الحقيني يا دعاء الحقيني بناتي هيرحوا مني معرفش جرالهم ايه الاتنين تعبوا ف غمضة ايه ومش عارفة ايه اللي حصلهم فجأة 

في الوقت دا جت ممرضة تانية وقالت لنسرين 

الحمد لله المرارة كويسة ومش ملتهبة ولا حاجة ومفيش اي مشكلة في المعدة ولسه الدكاترة بيعملوا فحوصاتهم علشان نشوف ايه سبب المغص المفاجىء اللي عندها دا 

دعاء باستغراب 

الله اكبر الله اكبر دا ايه دا اللي بيحصلهم ربنا يبعد عنهم الشر يارب 

الممرضة 

ممكن محسودين الله اكبر العين حق وممكن العين تجيبهم الارض ربنا يحفظهم ويحميهم ليكي يارب ارقيهم يمكن ربنا يشفيهم 

قالتها وسابتهم ومشيت ففضلت دعاء تفكر شوية ف كلام زميلتها الممرضة ودماغها تودي وتجيب فقالت وكأنها بتفكر بصوت عالي 

مش يمكن مش حسد زي ما ابتسام بتقول مش يمكن بسبب اللي عملناه في الدكتورة مش يمكن دا ذنبها وربنا بينتقم مننا بسبب اللي عملناه فيها... ايوا هو ذنبها وربنا بيعاقبنا عليه وحصل لبناتك كدا بسببه والدور هيلف ويجي على بناتي انا كمان يا مصيبتي يانا 

اتفزعت نسرين وقالت 

انتي بتقولي ايه يا دعاء وطي صوتك لحد يسمعك احنا معملناش حاجة ف الدكتورة ولا نعرف حاجة 

دعاء 

احنا هنكدب الكدبة ونصدقها دا احنا دافيين السر وتاويناه سوا وقبضنا تمنه كمان واديكي اهو هتصرفيه على علاج بناتك وهتصرفي قدهم اضعاف واضعاف كمان... انا لازم الحق نفسي وبناتي قبل ما يحصل لهم اللي حصل لبناتك 

قالتها وكانت بتتحرك زي اللي مسها الجنون 

فمسكت فيها نسرين 

استني هنا انتي رايحة فين يعني ايه تلحقي نفسك هتعملي ايه يعني هتروحي تعترفي باللي عملناه هتروحي تقوليلها انا عملت فيكي كذا وكذا انتي اتجننتي انتي عايزة تودي نفسك ف داهية 

دعاء بخوف على بنفسها وبناتها 

ايوا هروح احكيلهم ع كل حاجة انا مش حمل غضب ربنا ودعوات المظلوم انا خايفة اغمض عيني وافتحها الاقي بناتي حصلهم زي اللي عملناه ف دكتورة وعد انتي تحمدي ربنا اننا لسه مستورين ربنا مفضحناش بسبب اللي عملناه الحمد لله ان ربنا مد في عمري علشان اتوب عن اللي عملته واكفر عنه في حياتي قبل ما اموت ووقتها مش هينفع الندم هيبقى جنهم وبأس المصير ربنا يغفر لي ذنبي انا عملت ذنب كبير اوي كنت عامية كنت مغيبة لما سمعت كلامك لما حليتي الفلوس في عيني وقولتي اني هفك بيها ضيقتي واجوز بيهم بناتي .. انا هروح ابيع الحاجة اللي اشتريتها واروح اعطيهم الفلوس واعترف بكل حاجة واتمنى منهم يسامحوني ولو حصلت هفضل خدامة تحت رجليهم لحد ما يسامحوني وياريت انتي كمان تيجي وتعملي زيي اما رايحالهم دلوقتي 

نسرين 

اروح فين انا لا رايحة ولا انا جاية ويكون في علمك اي حاجة تقوليها انا هنكرها تماما هنكر اني عملت اي حاجة وتشيلي المسؤلية لوحدك روحي يا دعاء وسيبيني في حالي كفاية اللي انا فيه يا خسارة فكرتك صاحبة عمري وهتقفي جنبي جاية في شدتي عايزة توشي بيا هي حصلت يا خسارة العيش والملح 

دعاء 

انا هعمل كدا علشان مصلحتك علشان تلحقي بناتك انا خايفة عليهم من عقاب ربنا ربنا يمهل ولا يهمل اللي عملناه لازم نتوب منه وتوبتنا منه اننا نعترف لأهلها بدال ما البنت تتخرب بيتها وياريت بيتها بس دا بيوتنا كلها

نسرين 

وانتي فكرك لما تروحي تعترفي هيسيبوكي تمشي ع رجليكي هتترمي ف السجن وهتتشرد بنتاتك من بعدك دا غير الفضايح وسيرتنا هتكون على كل لسان لا لا انا مش حمل دا كله 

دعاء 

انتي عاجبك الحال اللي انتي فيه دلوقتي وبناتك مرمية في المستشفى لا حول ليهم ولا قوة محدش عارف مالهم ولا عارف يعالجهم.. مبسوطة لما تشوفيهم بيموتوا قدام عينك وحياتك بتبوظ هي دي الحياة اللي انتي منتظراها... احنا غلطتنا ولازم نتحمل نتيجة اخطاءنا .. عقوبة الدنيا اهون مليون مرة من عقوبة الاخرة هتتحملي عذاب القبر وظلمته!! هتتحملي النار!! .. سجن كم سنة وربنا راضي عني اهون مليون مرة انا رايحة يا نسرين اعترف ع نفسي وانتي راجعي نفسك قبل فوات الأوان 

قالتها دعاء ومشيت وسابتها 

❈-❈-❈

مهند قرب من وليد وفضل يضرب فيه 

انت هتتكلم بالزوق ولا اعمل من وشك شاورما .. ليه ليه عملت في وعد كدا.. اعترف ازاي قدرت تعمل كدا من غير ما حد ينتبه ولا هي كمان تعرف بدا .. عملت كدا ازاي روحت لها المستشفى وخدرتها واتفقت من الممرضات هناك يغطوا عليك مش كدا؟؟؟ 

فضل وليد يهز في راسه 

لا لا والله العظيم ما عملت حاجة اقسملك بالله ما اذيت وعد 

منهد فضل يضربه تاني 

بردو مصر تنكر الانكار مش هيفيدك ادم جوزها بيدور ع الأدلة وهيجيبها وهنعرف كل حاجة ووقتها هتتمنى مننا بس اننا نرحمك فأحسنلك تقول كل حاجة عملت ايه في وعد انطق 

وليد مكانش عارف يخلص نفسه من قبضة مهند ازاي فقال 

اا استنى استنى انا هقولك كل حاجة بس اسمعني 

مهند اتوقف عن ضربه 

ها انطق والا هقتلك في ايدي 

وليد 

اقسملك بالله اني ما عملت فيها حاجة 

مهند 

بردو هترجع لكلامك الخايب دا!! 

وليد 

بس بس انا عايز اتصل ببابا اتأكد من حاجة 

منهد 

ولا هتصيع عليا انا اصيع منك يلا قال اتصل ببابا قال 

وليد 

بابا ممكن يكون هو اللي عمل كدا بس انا مش متأكد هو وعدني انه هيجوزها ليا وكان بياكد على انه هيعمل المستحيل علشان يجوزهالي هل ممكن يكون هو السبب في اللي بتقول عيله وانا اقسم بالله يا مهند بيه ما اعرفه ولا ليا علاقة بيه اسمحلي اكلم بابا قدامك واسأله هل شكي في محله ولا لأ 

عيون مهند اتسعك وبؤبؤ عينه كان بيتحرك في كل مكان مش مصدق ان شبيب ممكن يعمل كدا علشان يجبر وعد تتجوز ابنه 

فقال 

كلمه وسمعني هيقولك ايه 

وبالفعل مسك مهند فون وليد وطلبله رقم والده فرد شبيب 

ايوا يا وليد اخيرا عرفت انك غلطت لما بعدت عن ابوك .. طمني عليك انت رجعت البيت انا هرجع بدري علشان اقعد معاك النهاردة ها ايه رايك 

وليد بص لمهند وبعدين اتكلم 

بابا انت عملت حاجة في وعد!!! 

شبيب 

انت عرفت ازاي اخيرا جوزها فضحها!!! كلمتك تستغيث بيك!!! بشرني

هنا وليد بلع ريقه واتأكد فعلا ان ابوه هو السبب فقال بتماسك 

ماشي يا بابا نتقابل ف البيت تحكيلي كل حاجة 

مهند كان ساكت تماما من هول الموقف اللي هو فيه 

فبلع وليد ريقه اكتر لانه كان عارف ان دا هدوء ما قبل العاصفة وقال بخوف 

للل ليك حق تزعل وتغضب كمان انا كمان مصدوم من اللي بابا عمله بس اقسملك بالله انا معرفش ان نيته كدا معرفش اصلا انه عمل حاجة في وعد اخر توقعاتي انه هيبتزك انت في شغلك ويخسرك علشان توافق ع جوازي منها لكن اذى لوعد والله العظيم ما كنت هوافق بيه والله لازم تصدقني 

مهند بكل غضب

جايز انت صح مش بتكدب وزي ما ادم عرف يفهم انك ملكش دعوة بس اللي ابوك عمله لا هسامحه ولا هسامحك عليه 

مسك مهند الفون بكل عصبية علشان يبلغ ادم باللي عرفه 

❈-❈-❈

ادم كان قاعد منتظر اي اخبار لحد ما جاله اخبار بتقول 

ادم بيه وصلتنا اخبار ان مدام وعد في اليوم دا تعبت واغمى عليها وفيه ممرضتين دخلوها اوضتها وفضلوا معاها وقت مش قليل لحد ما فاقت وخرجت من الأوضة وهما وراها بس في كاميرات المراقبة كانت تصرفاتهم مريبة دخلوا وخرجوا وفي ايدهم اكياس ورموها في باسكت الزبالة بسرعة وبيتلفتوا في كل مكان خايفين ان حد يشوفهم 

قام ادم وقف بسرعا لان دي معلومات جديدة اول مرة توصله وقال 

اتأكد هل فيه اي دكتور كان جوا الاوضة او دخل او خرج بعدها!!!! 

الظابط 

لالا يا فندم مفيش حد دخل او خرج غير الممرضين بس لكن فيه دكتور كان بيكلمهم من على الباب بس مش ظاهر صورته ف الكاميرا ومش هيكون بعيد عن واحد من الثلاثة لو تحب نعرفلك هو مين 

ادم 

طبعا اعرفلي هو مين وهاتي كل اخبار الممرضتين كل حاجة عنهم بسرعا متتأخرش عليا قدامك ساعتين يا حسين 

حسين 

تحت امرك يا ادم بيه 

في الوقت دا دخل مالك ولسه هيتكلم بخصوص الشغل 

ادم انت قبلت قضية حسين كارم ولا لا... اللوا قالي انك اخدت الملف تدرسه 

لسه ادم هيرد ع مالك جاله اتصال من مهند فرد بسرعة 

ايوا يا خال مهند الواد اتكلم ولا ايه 

مهند 

ادم اسمعني انا عرفت اخبار جديدة اللي اسمه شبيب تجيبه دلوقتي حالا 

وحكاله كل اللي حصل 

ادم قام وقف تاني ودب بإيده على المكتب بحدة 

ابن الكلب ابن الكلب موته على أيدي وقسما بالله ما هسيبه حي 

في الوقت دا عرف مهند ان ادم هيضيع نفسه فكان هو اللي بيهدي فيه 

ادم اوعى تتصرف تصرف مجنون البنت متعرفش مش عايزين الموضوع يوصل ليها خليك فاكر دا... ابعت جيبه وعرفه غلطه بس من غير دم يا ادم انت فاهمني اياك تتهور 

ادم كور قبضة ايده وبعدين مررها بغضب ومسح على وشه بيحاول يهدي نفسه 

هاتي عنوان الكلب دا هبعت رجالتي يجيبوه 

مهند

 ماشي هبعته بس ارجوك اوعى تتهور 

مالك اتأكد ان فيه حاجة مش طبيعة فقال 

ادم انا كنت شاكك ان فيه حاجة بس ايه دخل بابا في الموضوع ؟؟ 

ادم مردش عليه وفضل باصص في الفون لحد ما مهند بعتله اللوكيشن 

فطلب واحد من رجالته اللي جه علطول 

تحت امرك يا ادم بيه 

ادم بكل غضب كأنه وحش كاسر 

هبعتلك عنوان كلب تاني تجيبه وتوديه ورا الشمس اظنك عارف اقصد ايه بورا الشمس 

 مالك فهم ان الراجل اللي يقصده ادم عمل مصيبة وانه خلاص هالك لا محالة فقال 

فهمني يا ادم مين دا وعمل فيك ايه علشان تعمل فيه نفس اللي عملته في همام 

ضحك ادم بسخرية 

اللي عملته ف همام ميجيش حاجة قصاد اللي هعمله ف الكلب التاني ان كان همام غلط فدا غلط فيا انا ودا هين انما الكلب التاني غلطته متغتغرش ابدا والدم هو الحل سامحني يا خال مهند 

قالها ادم وخرج من المكتب 

حاول مالك يوقفه لكن ادم مسمعلوش ولا كأنه سامع او شايف اي حاجة قدامه غير حبيبته بيتم الاعتداء عليها وهو واقف يتفرج فخرج زي الطور الهايج مصمم انه يقتل كل اللي اشترك ف الجريمة دي 

❈-❈-❈

وصلت دعاء بيت شوق واول ما عرفت ان وعد تبقى بنت الابلة شوق انصدمت لأن شوق ليها فضل كبير عليها وعلى امها قبل رحيلها 

فنزلت راسها بأسف وانكسار من اللي عملته 

جت الشغالة وقالت لدعاء 

انا اسفة يا فندم أبلة شوق مش قادرة تقابل حد النهاردة تعبانة شوية تقدري تيجي تقابليها يوم تاني بس النهاردة مش هينفع 

دعاء بحسرة بسبب اللي عملته 

لا ارجوكي انا لازم اكلمها النهاردة ارجوكي قوليها أن الموضوع خاص ببنتها وعد وهي هتقابلني 

واول ما الشغالة قالت كدا لشوق 

شوق طلعت تجري على الباب واول ما شافت دعاء 

هو انتي دعاء!!!! انتي ليكي علاقة بوعد بنتي 

نكست دعاء راسها وقالت بخجل من نفسها 

انا اسفة يا ابلة شوق بس انا جيتلك النهاردة اعترف بكل حاجة وقسما بالله ندمانة ع كل حاجة عملتها ومستعدة لاي حاجة تعمليها فيا 

شوق تلقائيا رفعت ايدها وضربت بيها دعاء على وشها 

بنتي !!!! بنتي اني تعملوا فيها اكده ليه يا ظلمة ياللي معندكمشي ضمير.. معندكيش بنات يا دعاء وخايفة من عقاب ربنا وانه ممكن يتعمل في بنتك اكده 

عيطت دعاء بحسرة 

والله ما كنت اعرف انها بنتك يا أبلة شوق مكنتش اعرف 

شوق بغضب ملوش مثيل 

حتى ولو مش بنتي ليه تعملي في بنات الناس اكده ليه تأذيها وتسلميها للشيطان اكده ليه 

هزت دعاء راسها 

لا لا والله يا ابلة شوق مش زي ما انتي فاهمة احنا مسلمناهاش لحد انا انا هحكيلك كل حاجة وهخلص ضميري.. انا ندمت على اللي عملته علشان كدا جيت احكيلك بنفسي واطلب منك العفو والغفران..

يتبع