رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل الرابع والخمسون 

تم النشر السبت 

12/4/2025

شافه داخل من البيت ومتجاهل وجوده وطالع على اوضته فوق من غير اي سلام ولا كلام 

فقال ايه شايفك يعني داخل واخد في وشك ولا كأنك شايفنا دا انت حتى مبصتش علينا ولا سلمت على والدتك 

وليد رد من غير ما يبص عليه 

عادي تعبان وعايز اطلع ارتاح سلام

اتصاب بالانزعاج وقال 

استنى هنا انت حتى بتكلمني من غير ما بصيتلي فيه ايه مالك وايه حكايتك بالظبط بقالك فترة مش مظبط ومش مختلط بينا ولا كأنك عايش وسطنا 

وليد

 مفيش يا بابا عادي انا مش صغير يعني انا اعمل اللي اعمله 

شبيب 

لأ طبعا انت فيه حاجة مضايقاك هو انا تايه عنك!!! انطق قولي مالك 

هنا انفجر فيه وليد 

دلوقتي بتسأل مالك وفيا ايه... انا بقالي سنين بقولك بحب وعد وعايز اتجوزها واطلبهالي وانت وعدتني انك تحاول تعمل المستحيل علشان تكون ليا وعشمتني وفي الاخر الااقيها اتجوزت غيري!! انا عارف انها مش بتحبني ولا عمرها حبتني ولا هتحبني علشان كدا بحاول ارضى بالامر الواقع وبتمنالها السعادة من كل قلبي بس العشم وحش العشم وحش اوي يا بابا وانا كنت اتعشمت خلاص انها ليا عن اذنك 

قالها وليد وطلع ع اوضته من غير ما يزود حرف واحد زيادة

اما شبيب مكانش عارف يرد يقول لابنه ايه فقال ف نفسه

انا مش عارف ايه اللي حصل المفروض انها كانت تتجوز وتتفضح بعدها وسيرتها تكون ع كل لسان ويجي وليد يتجوزها بعدها بحجة انه هيسترها ويسكت الالسن اللي بتنهش فيها ووقتها يذلها زي ما هو عايز وهي متلاقيش عندها وش لانها تتكبر او تتنك عليه وتعيش بقية عمرها خدامة تحت رجليه وطوع أمره لكن دا محصلش فات اسبوع على جوازها ومفيش لا حس ولا خبر .. معقول معقول جوزها عنده مشكلة علشان كدا غطى على الللي حصلها بالمشكلة اللي عنده!! انا مبقتش فاهم حاجة الدكتور اكدلي ان كل حاجة تمت زي ما قولتله بالظبط واتنفذت المهمة بالتمام يبقى فيه ايه انا لازم اتصرف واشوف حل تاني والا وليد هيدخل ف حالة اكتئاب ويروح مني وانا معنديش غيره

❈-❈-❈

رجع ادم شغله بس اسبوع اجازة بس كان قرر يمد اجازته اكتر وخاصة بعد رجوع مالك هيشيل مكانه لكن بعد اللي حصل لوعد مقدرش انه يستنى لحظة تانية بعد كدا ورجع شغله من تاني اول ما رجع 

كل الزملا والضباط وحتى العساكر قربوا منه وبدؤا يهنوه 

مبروك يا ادم باشا الف الف مبروك 

ادم كان باله مشغول بالللي حصل لوعد فمكانش في مود كويس انه يرد على مباركاتهم لكنه ع اي حال ابتسم وسلم عليهم 

الله يبارك فيكم

وبعد شوية انتظرهم يمشوا لكن الكل كان واقف ويبصوا ليه بابتسامة 

ففهم ادم هما عايزين ايه 

واول ما شاف مالك قال 

ابعت جيب جاتوه وبيبسي بمناسبة جوازي ووزعه على الكل يا مالك متسبش حد حتى العمال هنا فرحهم بردو 

ابتسمله مالك وقال 

تمام يا عريس بينا بينا يا رجالة ننسف الجاتوه 

فالكل راح مع مالك وعلى وشوشهم الفرحة لآدم 

اما ادم فاستغل انشغال الكل وعمل شوية اتصالات يعرف فيها كل الاخبار اللي عايزها عن المستشفى اللي بتشتغل فيها وعد والدكاترة اللي فيها 

❈-❈-❈

 نسرين اول ما شافت الدكتور خارج من اوضة الكشف جريت عليه بلهفة 

خير يا دكتور اسامة بنتي مالها بالله عليك طمني قدرتوا تسيطروا على النزيف انا اعصابي مش على بعضها علشان كدا مدخلتش معاكم مكنتش هقدر اشوف بنتي في وضعها دا 

الدكتور بتعب 

ايه اللي حصلها انا اول مرة في حياتي اشوف نزيف عنيف بالشكل دا البنت فقدت دم كتير جدا وبصورة مفاجئة عملت المستحيل علشان اوقف الدم دا بشكل مؤقت لو استمر النزيف دا ممكن نضطر نشيل الرحم بالكامل والا هنفقد البنت 

نسرين بصتله بصدمة وكانت هتقع من طولها ايه؟؟ 

تشيل الرحم لبنتي !! دي لسه بنت متجوزتش ولا دخلت دنيا تشيل الرحم ازاي لاء مش هينفع ارجوك يا دكتور اتصرف اعمل المستحيل بالله عليك أنفذ بنتي بس بلاش تشيل الرحم دي لو عرفت تروح فيها 

أسامة 

دا لمصلحة بنتك يا نسرين البنت فقدت دم كتير انا هعملها نقل دم ومعلق لها محاليل مغذية وربنا يستر والنزيف ميرجعش تاني لان لحد دلوقتي السبب غير معروف عملت لها تحاليل ونتيجة تحاليلها الى حد ما كويسة يعني مفيش سبب مقنع للنزيف دا ومش عارف اقولك ايه 

نسرين 

انا عارفة انك مش هتقصر مع بنتي بس بالله عليك اعمل اللي تقدر عليه بس من غير ما نشيل الرحم 

هنا قالت سامية لامها 

تشيل الرحم يعني ايه يا ماما!! يعني اختي لو اتجوزت متعرفش تخلف يعني عمرها ما تكون ام!! 

نسرين صرخت في بنتها 

تفي من بوءك يا سامية اختك مش هتشيل الرحم وهتخف وهتبقى زي الفل وهتتجوز وهتبقى ام كمان اوعي تقولي كدا 

قالتها واخدت بنتها في حضنها وفضلت تبكي 

اوعي تقولي كدا اوعي تفولي على اختك ابدا 

يا ترى فهمتهم ايه اللي حصل وليه حصل لبنتها كدا وبشكل مفاجىء والسبب غير معروف!!! من أعمالكم سلط عليكم واكيد دي دعوات شوق وهنوضح اكتر ف البارتات الجاية نسرين عملت ايه

❈-❈-❈

 ادم كان بيحاول يشغل نفسه بشغله لحد ما الاخبار اللي هو منتظرها تيجيله 

جاله مالك وقاله في ايه مالك بالرغم من انك لسه جاي من اسبوع العسل الا انك وشك مهموم بتحاول تداريه بس انا شايفه كويس اوي فيه ايه يا ادم انت متخانق مع وعد!!! ازعل منك دي وعد اختي مش عايزك تزعلها مهما حصل 

هنا سرح ادم في وعد ورقتها وقال بحب وهيام

وعد!! هو فيه زي وعد ورقة وجمال وعد اني. ازعل من الدنيا كلها ومزعلش منها اني لو طايل اجيبها نجمة من السما منيش هتأخر 

مالك ابتسم واطمن على علاقة ادم بوعد فقال 

يا سيدي يا سيدي طب ايه بقا ايه اللي شاغل بالك ومعكر مزاجك بالشكل دا .. ينفع تسمح لحاجة تعكر مزاجك في الوقت دا يا عريس بعدين انت رجعت لشغلك بدري ليه مأخدتش اسبوع اجازة كمان واخدت وعد وسافرتوا 

ادم 

هيحصل بس مش دلوك قدام شوية في ايدي حاجة اهم دلوك 

مالك 

حاجة ايه الدهشان عملك حاجة تاني!! 

ادم 

لاا الدهشان ديه خلاص انتهى باختفاء ابنه اتغير ومبقاش زي الاول من خوفه وقلقه عليه خليه يموت ونرتاح منيه ربنا يجحمه ما طرح ما هو 

مالك 

طب فيه ايه شاغل بالك انا عايز افهم 

اتنهد ادم بهم واحساس بالعجز متملكه 

ادعيلي يا مالك انا تعبان وتقريبا مش بنام فيه موضوع اكده شاغل بالي ومأرق نومي ومهعرفش اقولك عليه علشان متسألنيش ايه هو كل اللي عايزك تعمله تدعيلي وبس 

قلق مالك على صاحب عمره لكن مقدرش يسأله ايه هو الموضوع طالما انه مش حابب يقوله فقال 

ربنا ييسرلك امرك يا صاحبي ويزيح همك وينولك اللي في بالك 

اخد ادم نفس عميق وقال 

يارب يارب 

❈-❈-❈

شوق كانت قاعدة وساندة راسها بإيديها بهم بتفكر في بنتها واللي حصلها وبتحسبن على اللي عمل في بنتها كدا ولسانها مبطلش في انه يقول ربنا ينتقم منيه ربنا ينتقم منيه 

في الوقت دا جه مهند وقال بمرحه المعتاد 

ام العروسة القمر عاملة ايه البنت وعد وحشتني ايه مش ناوية تزوريها تعالي يلا اطلعي البسي ونروح لها سمعت من مالك ان ادم نزل شغله فخلينا نستغل الفرصة ونقعد معاها براحتنا 

لكنه لقى شوق بتتنهد بوجع وقاعدة ف مكانها متحركتش

فاستغرب اللي عملته 

وقعد جنبها وقال بقلق 

شوق مالك!! في حاجة مزعلاكي!! 

شوق وهي على نفس وضعها 

مفيش يا مهاند مفيش فوتني لحالي دلوك الله يباركلك 

مهند 

لاء الموضوع كدا كبير فيه ايه احكيلي!! 

شوق 

مفيش يا مهاند صدقني اللي فيا مينفعش يتحكى ولا يتقال ولا حول ولا قوة الا بالله يارب لا حول ولا قوة الا بالله 

قالتها شوق ومقدرتش تتحمل فنزلت دموعها غصب عنها رغم انها حاولت تمسكها كتير لكن مصابها جلل فمقدرتش تتحمل رغم قوة اكتافها وياما شالت عليهم جبال هموم لكن همها المرة دي حنى اكتافها وضهرها بالكامل دي بنتها مش حد تاني

مهند هنا عرف ان فيه حاجة كبيرة حصلت فبص لشوق بإصرار 

شوق انا مش هسيبك الا ما اعرف فيه ايه وايه سبب بكاءك دا انتي عمرك ما وصلتي لحالتك دي الا لحاجة شديدة وشديدة اوي كمان انتي طول عمرك حمالة قسية! 

شوق حاولت تمسح دمعاتها وبصت لأخوها 

الله يباركلك فوتني لحالي دلوك يا مهند معايزاش اتكلم او احكي ف حاجة دلوك 

مهند بإصرار 

لاء طبعا مش هسيبك الا لما اعرف فيه ايه انا مش هسيب اختي في موقف زي دا واقف اتفرج فيه ايه يا شوق اتكلمي انتي هتخبي عليا هتخبي عل اخوكي مهند!!! 

شوق هزت راسها 

يا ريت كان ينفع كنت هتكون اول واحد استعين بيه لكن اللي حصل لا ينحكي ولا ينقال الله المستعان يارب ربنا يصبر قلبي ويعينه على ما بلاه 

مهند 

لاء كدا كتير يا شوق اتكلمي فيه ايه.. اقولك انا هتصل على دكتور رائد اعرف منه فيه ايه دلوقتي حالا طالما انتي مش عايزة تتكلمي 

هنا شوق مسكت ايديه وقالت برجاء 

لاه لاه يا مهاند اوعاك اوعاك تتصل برائد هو بالذات مينفعش يعرف حاجة عن الموضوع ديه هو بالذات لو عرف ممكن يروح فيها 

اتسعت عيون مهند وزادت حيرة لانه مبقاش فاهم حاجة خالص 

شوق انا كدا اتبرجلت اكتر فيه .. وعد فيها حاجة اتكلمي بالله عليكي متسبنيش كدا 

بصتله شوق بعيون كلها دموع وزادت في النحيب 

فأخدها مهند بين ايديه وحاول يهديها 

طب اهدي بس يا شوق انا مش هتحمل بكاءك دا انتي عارفة انتي غالية عندنا كلنا قد ايه بس ريحي قلبي وقوليلي ان اللي تاعبك دا ملوش علاقة بوعد مش كدا طمني قلبي على بنتي يا شوق 

انتفضت شوق في البكا اكتر

فهنا اتأكد مهند ان الموضوع ليه علاقة بوعد فعلا فبعدها عن حضنه وقال 

شوق مالها وعد!! ادم عملها ايه اقسم بالله اجيبه دلوقتي اخلص عليه قدامك لو كان زعل وعد 

شوق 

ادم!! ادم يا حبة عيني ربنا يعينه هو راخر على اخره وكاظم غيظه وتكة وهينفجر بس سايبها لوقتها .. ادم ربنا بعته لبنتي نجاة ولله الحمد والمنة

مهند بغيظ 

لاء انا كدا اتبرجلت فيه ايه يا شوق بالله عليكي اللي فهمته انه موضوع ليه علاقة بوعد بس ادم ملوش دعوة بيه فيه ايه اتكلمي انا فاض بيا خلاص

شوق 

صدقني يا خوي مينفعش يتحكي مينفعش 

هنا مهند بصلها بعمق وتفكير كله شك 

اوعي تقولي ان اللي جه في بالي صح يا شوق اوعي تقولي ان اللي بالي حصل!! 

شوق بهم 

معارفاشي ايه اللي جه في بالك بس ايا كان ايه هو ادعيلي اقدر اتخطى اللي حصل 

هنا متحملش مهند اكتر فزعق 

شوق انتي منتظرة ايه تاني علشان تتكلمي مش فاهم هتخبي عليا انا من امتا واحنا بنخبي على بعض وعد بنتي قبل ما تكون بنتك وأمرها يهمني وان كان حاجة حصلت محدش هيقدر يحلها غيري انتي فاهمة!

سابته شوق يتكلم ويزعق ولفت وشها الناحية التانية من غير ما تنطق ولا حرف 

❈-❈-❈

عساف نزل من البيت وركب عربيته وف طريقه للشركة

 فلمح من مراية العربية عربية توبا ماشية وراه فقال بانزعاج من تصرفاتها

بردو يا توبا مش عايزة تتراجعي عن اللي في دماغك دا واللي بتعمليه قصدك ايه من كل دا قصدك ايه من مراقبتك ليا هل بعد السنين دي كلها وعشرة العمر بتخونيني مش بتثقي فيا مش فاهم شاكة فيا ليه عملن ايه خلاكي تفقدي الثقة فيا... بس انا لازم أعلمك درس مش هتنسيه ابدا درس عقابا ليكي على خروجك من غير اذني ولا مراقبتك ليا وعدم ثقتك فيا .. الثقة هي اساس العلاقات وانتي دمرتيها بسذاجتك ... انا عارف انتي بتراقبيني ليه كل دا علشان فقدتي ثقتك فيا بسبب وزنك اللي زاد تاني وانا ياما قولتلك ان دا ميهمنيش لكن انتي مصرة على اللي ف دماغك وبسببه فقدي ثقتك فيا انا كمان . علشان كدا انا هنولك اللي ف بالك 

قالها وعمل اتصال مع عميلة بتعامل معاه 

الو... مدام ليندا... انا بقدم معادنا اللي المفروض هيكون بعد يومين فلو حابة او فاضية نتقابل دلوقتي كمان ساعة هتلاقيني في انتظارك في المطعم اللي بنتقابل فيه 

ليندا 

اوك مفيش مشكلة انا في انتظارك عساف بيه مبسوطة انك افتكرت معادنا ولما جه وقت مناسب قدمته علشاني ميرسي اوي 

عساف 

العفو طبعا انا في انتظارك 

وغير عساف وجهته وراح على المطعم وقعد في انتظار ليندا وبدأ يعمل اتصالاته ويتابع شغله ع النت لحد ما توصل 

❈-❈-❈

مع إصرار مهند وتصميمه انه يعرف الحقيقية وايه اللي حصل لوعد خلى شوق تنهار بالشكل دا ... علشان كدا اضطرت شوق انها تحكيله الحقيقة وكل اللي قاله ادم 

انصدم مهند وكان هيتجنن بل انه اتجنن فعلا فقد عقله وفضل يصيح وهو بيهز راسه رافض يصدق اللي سمعه 

لاء لاء اكيد اللي بتقوليه دا مش صح وعد بنتي يحصلها كدا لاء لاء انا عقلي مش قادر يستوعب وعدددد.. قالها وفضل يكسر في كل حاجة قدامه الفازة وطبق الفواكه والزهريات الصغيرة والانتيكات 

وشوق مقدرتش تتحرك من مكانها وتهديه 

مهند بص للمراية وكأنه بيفكر في اللي حصل لوعد ففجأة قال 

هو هو مفيش غيره اللي ممكن يعمل كدا او ليه مصلحة يعمل كدا وليد الكلب وقسما بالله لأجيبه وادفنه مكانه حي 

قالها وانطلق ف طريقه لبرا 

جريت وراه شوق 

مهاند مهاند استنى استنى بالله عليك اني منيش عايزة شوشرة وعد بنتي نفسها متعرفش اللي حصلها بالله عليك ما تفتح المواضيع مش علشان حاجة علشان وعد نفسيها ونفسيتها بالله عليك يا مهند امسك اعصابك لما اشوف ادم هيعمل ايه بالله عليك معايزاش وعد تعرف ابدا وتعيش حياتها عادي طالما ادم مبينلهاش متوجعش قلبي اكتر عليها بالله عليك 

وقف مهند مكانه وهز راسه بانزعاج 

لاء يا شوق لاء مش هقدر اقف اتفرج سامحيني انا هجيبه وهعاقبه من غير ما وعد تعرف صدقيني 

قالها ومشي بسرعا كبيرة مقدرتش شوق انها تلحقه 

فجريت بسرعة ع جوا ودورت على فونها واتصلت بآدم 

اللي جاله بعد الاخبار اللي طلبها وكان بيفحص فيهم بس لسه محصرش المعلومات المطلوبة لكنه قال في نفسه 

معقول الدهشان!!! الدهشان حب ينتقم مني على خطف ابنه واختفاءه فعمل اكده في وعد معقول طلب من حد من الدكاترة او العاملين ف المستشفى!! معقول ليه يد 

قالها وكور قبضته ايه بغضب شديد 

دا لو فعلا ليه يد وقسما بالله وقسما برب الكعبة ما هيفضل حي 

في الوقت دا جاله اتصال من شوق 

فرد بسرعا 

ماما شوق 

شوق 

ادم ادم الحقني يا ادم مهاند اخوي اصر انه يعرف الحقيقة فحكيتله وياريتني ما حكيتله يا ادم .. اخد في وشه وطار ومعارفاشي اوقفه الحقه بالله عليك قبل ما يعملنا مصيبة 

ادم بانزعاج 

ايه؟؟؟ قولتيله يا ماما شوق.؟؟؟ ليه ليه بس دا كان سر ما بينا مينفعش حد ثالث يعرفه 

شوق 

اني عارفة اني غلطانة بس مقدرتش امسك نفسي قدامي ففهم وفضل مصر انه يعرف الحقيقة اني السبب 

ادم 

طب انا هلحقه حالا طالما أنه اندفع كدا يبقى يعرف حاجة... ومعرفته هتفيدني اكيد عن اذنك يا ماما شوق 

قفل معاها واتصل على مهند وقال خال مهند انت فين اني لازمن اقابلك حالا قبل ما تعمل اي تصرف ارجوك متتصرفش من غير ما نتكلم 

مهند كان خلاص وصل للجامعة اللي وليد شغال فيها فقال 

استناني على اللوكيشن اللي هبعته ليك يا ادم هجيبه في ايدي واجيلك 

ادم 

هو مين. استنى متتصرفش من غير ما نتكلم 

مهند 

هجيب اللي عمل كدا في وعد اقفل خليني ادور عليه انا وصلتله خلاص 

ولما وصل مهند الجامعة فضل يسأل عن وليد لكنه ملقاهوش

ففضل يزعق 

يعني ايه مش موجود ما هو كل يوم بيجي هنا اشمعنى النهاردة مش موجود 

دكتور في الجامعة عارف مهند 

يا مهند بيه هو فعلا بيجي بس بقاله كم يوم مجاش مش عارف ليه 

مهند في نفسه 

اكيد خايف من اللي عمله وعارف أنه هيتكشف في يوم من الأيام علشان كدا مستخبي وهربان بس هيروح مني فين مسيري الاقيه ولو وقع تحب ايدي وربنا ما هرحمه 

في الوقت دا ولما جه مهند يمشي ويدور عليه ف مكان تاني سمع الدكتور بيقول 

اهو جه يا مهند بيه... وليد هناك بيركن عربيته تقدر تروحله زي ما حضرتك عايز 

بصله مهند من بعيد ولما شافه اتنهد براحة انه لقاه فشكر الدكتور 

تمام شكرا ليك عطلتك معايا انا رايحله 

واول ما راحله مهند حاول يمسك اعصابه علشان قدام الناس فقال 

وليد ازيك عامل ايه 

وليد اول ما شافه خاف لانه بيخاف منه لانه عارف ان مهند مش بيحبه 

فاتوتر وقال 

اا اهلا مهند بيه انا تمام الحمد لله .. اا الف مبروك لوعد 

بصله مهند بغضب ونظرة وليد مفهمهاش 

تعالى معايا عايزك في كلمتين كدا 

استغرب وليد طلب مهند وبصله بعدم فهم 

فقال مهند وهو بيضغط ع اسنانه 

عارف هتقولي انك مشغول وانك لسه جاي بس هما كلمتين هنقولهم في مكان هادي بعيد عن الجامعة وهترجع لشغلك 

وليد 

تمام مفيش مشكلة انا مع حضرتك 

 مهند اخده وراح على عربيته 

اركب هنروح بعربيتي 

وليد 

 مفيش مشكلة 

وبالفعل ركب وليد مع مهند وهو مش عارف ايه اللي منتظره 

يتبع