رواية رومانسية جديدة شوق الجزء الثاني

تنشر حصريًا على مدونة رواية وحكاية قبل أي منصة أخرى

رواية شوق الجزء الثاني

 رواية جديدة قيد النشر

من قصص و روايات 

الكاتبة أسماء عبد الهادي

الفصل السابع والخمسون 

تم النشر الخميس 

25/4/2025

رجع ادم لشقته مع وعد و مجرد ما فتح الباب اتفاجئوا بالمنظر اللي قدامهم الشقه متكسره تماما ومفيش فيها اي حاجة سليمة العفش كله اصبح شوية خردة 

وقفت وعد مصدومه من المنظر وبتبدل نظراتها بين ادم والشقة اللي ما لحقتش تتهنى بيها

 ادم بسرعه اخذها في حضنه بخوف عليها وعرف انهم في خطر وان اللي عمل كده في شقته حد مش سهل فمن قبل ما يعمل اي حاجة مسكها من ايديها وقفل الشقة ونزل بيها يوديها عند شوق

ركبوا العربية وطول الطريق وعد ماسكة في ادم وخايفة تسيبه ادم حاوطها بايديه وساق بإيد واحدة وهو بيقول 

ما تخافيش انا معاكي مفيش اي حاجة

 وعد

 مين عمل كده في شقتنا يا ادم 

 ادم

 فداكي مليون شقة يا روحي ما تزعليش

 وعد

 انا مش زعلانه على شقتي اللي اتبهدلت على قد ما انا خايفة عليك اللي عمل كده اكيد يقصد انه يهددك مش كده 

ادم

 مش عايزك تفكري في اي حاجة ولا تشغلي بالك انا هعرف اتصرف كويس قوي مع الناس دي انتي ناسية ان جوزك ظابط وليه اعداء كثير مش عايزك تخافي.. بس اوعديني لما نروح لماما شوق بلاش تحكي اي حاجة قولي انك هتقعدي عندهم فترة وخلاص اتفقنا يا حبيبتي

 هزت وعد راسها وكمل ادم مشواره لحد ما وصلوا بيت شوق

استقبلتهم شوق وهناء بفرحة كبيرة حمد لله على السلامة يا حبايب وحشتونا قوي ربي يسعدكم ويهنيكم يا رب

 ادم سلم على مامته وشوق وقال 

الله يسلمكم يارب معلش انا عندي مهمه لازم اعملها علشان كده انا سايب عندك وعد يا ماما شوق خدي بالك من نفسك يا وعد مش هتاخر عليكي يا حبيبتي 

وعد مسكت ايده وما رضيتش تسيبه لا يا ادم ما تسيبنيش مش عايزاك تمشي مش عايزاك تروح لهم انسى اللي حصل وانا هنساه انا كمان 

 ادم مسك ايديها وطبطب عليها

 متخافيش كل حاجة هتبقى تمام مش عايزك تفكري في حاجة قضي وقتك مع ماما شوق اكيد وحشاكي وانا راجع لك تاني هتوحشيني يا حبيبتي

 وعد هزت راسها بدموع وكانت رافضه انه يمشي كانت خايفة عليه حاسة انه هيكون في خطر علشان كده مكانتش عايزة تسيبه

 ادم 

اسمعي الكلام يا وعد مش هتاخر عليكي يا حبيبتي وعلشان ما تكونيش قلقانه عليا هكلمك في الفون دايما اتفقنا

وعد

 اوعدني انك ترجع لي كويس يا ادم ادم

 اوعدك يا حبيبتي لا اله الا الله

 وعد

 محمد رسول الله

 وبعد كده مشي ادم واول ما مشي انفجرت وعد في البكا

فاستغربت شوق وهناء الحاله اللي هي فيها فقابت شوق 

في ايه مالك يا حبيبتي ادم اكيد عنده شغل ولازم يروحه لازم تتعودي على ديه ما انتي عارفه ان ادم ظابط يعني ما ينفعش يتاخر عن مهمته

 وعد

 خايفه عليه قوي يا ماما 

شوق

 في ايه مالك حاساكي وشك مخطوف ليه هو في حاجه يا بنتي انا ما اعرفهاش؟؟ 

 قررت وعد انها تقول لمامتها لانها مش قادره تحبس خوفها في نفسها لوحدها فقالت

 مامي احنا لما جينا من السفر رحنا على شقتنا علشان نرتاح ونحط شنطنا لكننا اتفاجئنا بالشقة كلها متكسرة وما فيش فيها اي حاجة سليمة واكيد ادم رايح ينتقم من اللي عمل كده انا خايفة عليه قوي

 اتصدمت شوق وهناء باللي سمعوه 

هناء صاحت بصراخ

 يا مصيبتي يا بنتي حاجتك كلها بقت كوم تراب مين اللي عملت ديه 

 شوق

 لا حول ولا قوة الا بالله مين اللي اتجرأ وعملك اكده حسبي الله ونعم الوكيل فيه ربنا ينتقم منه 

وعد 

 انا خايفة على ادم قوي يا مامي

 شوق

 ما تخافيش جوزك عاقل وعارف هو بيعمل ايه مش عايزاكي تخاف يا حبيبتي ان شاء الله خير وربنا ينتقم من اللي كان السبب اني هروح اعمل لك عصير يروق دمك

  هناء 

خليكي انتي يا ابلة شوق مع بنتك وانا هقوم اعمل لها كوباية العصير يرجع لها الدم اللي هرب منيها ومنهم لله اللي كانوا السبب..

❈-❈-❈

 اما ادم ركب عربيته وبمجرد ما اركبها اتصل بمالك

 مالك

 اهلا يا عريس سمعت انك جاي النهارده من شهر العسل ها وصلت ولا لسه

 ادم

 مالك انت فين عايزك تكون على مكتبي حالا انا خمس دقائق واكون هناك في حاجة مهمة لازم نعملها سوا مالك

 ماشي يا صاحبي جاي لك على هناك

و بمجرد ما انهي ادم مكالمته مع مالك لقا عربيات كثير محوطاه وماسكين مسدسات وبيصوبوها ناحيته

حاول ادم يتفاداهم كلهم بأنه يسوق بسرعة لانه مش عايز يشبك معاهم دلوقتي ولوحده وبدون خطة لكن رصاصة منهم غاشمة صابت صدره فوقفت عربيته عن الحركة وقبل ما يروح ادم في اغماءه بعت انذار استغاثه لمالك 

❈-❈-❈

كانوا قاعدين كلهم سوا خالد وفداء وكيان فلقوا اياد نازل من اوضته وفي ايده شنطته فداء قلبها وقع في رجليها وقامت وقفت بسرعة وقالت 

 اياد انت ناوي على ايه وايه الشنطة اللي في ايدك دي

 اياد

 انا اسف يا ماما انا حاولت كتير بس مش قادر صراحة مش قادر افضل قاعد هنا انا حاسس اني قاعد على جمر مش مرتاح ابدا ارجوكي تفهمي الوضع اللي انا فيه وصدقيني انا مش هنساكم وهاجي لكم دايما والله

 خالد كان بيسمع وساكت ف قالت فداء

 خالد انت ساكت ليه اتكلم

 خالد

 اقول ايه بعد اللي سمعته انا مش عارف اقنعه ازاي ان هو قاعد وسط عيلته بس خلاص هو حر طالما عايز يعيش لوحده سيبيه يعمل اللي هو عايزه هو ما بقاش صغير هو دلوقتي قادر ان ياخذ قراراته بنفسه اهم حاجه تكون عارف انك ابني واني لا يمكن اتخلى عنك في يوم من الايام واني هكون جنبك في اي وقت تحتاجني فيه اعمل اللي انت عايزة يا اياد انا مش همنعك

 اياد قرب منه وحضنه وهو بيقول 

ربنا ما يحرمناش منك ابدا انا مبسوط انك اتفهمت موقفي

 خالد 

انت مبقتش صغير دلوقتي تقدر تاخد قراراتك بنفسك وتحدد الحياة اللي انت عايز تعيشها بس اسمح لي اقول لك كلمتين على انفراد علشان ابقى كده خلصت ذمتي وبعدها تعمل اللي انت عايزه ممكن تيجي معايا على المكتب؟

 اياد ساب شنطته و راح ورا خالد على المكتب خالد انتظر اياد لما دخل وقفل الباب وراه وقال

 اياد اظنك كنت عايز تعرف سبب تغير معاملتي ليك خليني احكي لك حكاية حصلت من سنين 

فلاش باااك 

خالد كان قاعد في مكتبه فجت السكرتيره وقالت خالد بيه في واحدة ست غريبة عايزة تقابل حضرتك 

خالد

 ست مين دي وهل ليها ميعاد مسبق السكرتيرة

 لا يا فندم بس هي بتقول انها عايزة تكلمك في موضوع مهم جدا

 خالد 

قفل الملف اللي في ايده وقال

 طيب ماشي دخليها

 ولما دخلت الست دي خالد قال

 احب اعرف انتي مين وعايزاني في ايه

 الست سكتت شويه وبعدين قالت

 انا عرفت انك لقيت طفل جنب المستشفى من ١٠ سنين 

خالد قام وقف بعصبيه وقال

 انتي جبتي الكلام ده منين وعايزة ايه اتفضلي اطلعي بره

 الست قالت

 اهدى يا خالد بيه من فضلك اسمعني للاخر 

خالد

 اسمع ايه وايه التخاريف اللي بتقول عليها دي 

فقالت

 دي مش تخالف يا خالد دي حقيقة علشان انا ام الطفل اللي انت اخذته انا كنت متابعة كويس قوي ابني واللي بيحصل واطمنت عليه لما لقيتك اخذته وربيته زي ابنك بالضبط

خالد بسخريه وانزعاج

 اه وانتي حضرتك بقى لسه فاكرة انك تبقي امه بعد ما رمتيه في الزبالة واتخليتي عنه وهو لا حول ليه ولا قوة مفكرتيش ان ممكن اي كلب شارد يؤذيه او انه يروح لمكب الزبالة بالغلط 

الست قالت 

انا قلت لحضرتك انا كنت متابعاه لحظه بلحظة 

خالد بعصبية 

 يا جبروتك يا شيخة رميتي ابنك في الزباله وشايفاه بيعيط قدامك من الجوع والتعب وتقولي لي ملاحظاه متابعاه لحظه بلحظه كنتي فين وابنك بيموت كنتي فين لما قعد في العنايه اكتر من شهرين بسبب رميك ليه في الزبالة وهو لسه يدوب عنده كم ساعة بس قلبك كان فين كل ده وليه تعملي في ابنك كده

 الست قالت

 كان غصب عني صدقني كان غصب عني انت مش عارف ظروفي كانت ايه وقتها 

خالد 

وجاية دلوقتي بعد 10 سنين تقولي لي الكلام ده ليه وعايزه ايه

 الست قالت

 انا مش جايه اقول لك رجع لي ابني لان ببساطه ما اقدرش اخده اربيه وانا شايفاه معاك متربي احسن تربية وعايش احسن عيشة انا جيت بس علشان اوضح لك اني ظروفي صعبة جدا ومش قادرة اعيش ومحتاجة انك قالتها وسكتت

 ففهم خالد انها جاية ومحتاجة فلوس فطلع من جيبه فلوس واعطاها ليها وقال اعتقد ان المبلغ ده ممكن يكفيك لفترة كبيرة و لو احتاجتي حاجة انا موجود ما تتردديش في انك تطلبي المساعدة 

الست عينيها لمعت واخذت الفلوس وقالت بفرحة

 كثر خيرك يا خالد بيه

 ومشيت

 كمل خالد كلامه وهو بيحكي لإياد 

وفضلت على الحال ده كل شهر تيجي تاخد مني اللي فيه النصيب وتمشي من غير حتى ما تسألني عليك انت عامل ايه او اخبارك ايه مش عارف بقى هل هي كانت بتابعك من بعيد لبعيد ولا ناسياك ومش فاكراك اصلا ما كانش دا يهمني

 وبعد 10 سنين كمان

 لقيتها جايه وبتقول لي 

خالد بيه انا عايزه ابني

 خالد بص لها بصدمه وانزعاج

 نعم عايزة مين ؟؟ابنك مين انتي هتستعبطي اياد ابني انا

 الست قالت

 خالد بيه انا عارفة ان انت اللي ربيته بس انا امه انا امه الحقيقية ولو عايز تتاكد بنفسك ممكن تعمل التحاليل وتتاكد ان انا امه ارجوك رجع لي ابني خالد كان هيتجنن ومكانش عارف يعمل ايه ازاي هيتخلى عن ابنه الوحيد اياد وازاي تيجي هي في غمضة عين وبعد كل السنين دي تقول انها عايزاه وهي عمرها ما سالت عنه ولا مره واحدة

 فقالت الست 

انا هسيبك اسبوع على لحد ما تظبط امورك وترجع لي ابني عن اذنك يا خالد بيه

 بعد ما الست مشيت خالد بعت رجالته علشان يعرفوا كل حاجه عنها وثاني يوم جه واحد من رجالته وقال خالد بيه جمعنا عنها كل المعلومات اللي حضرتك طلبتها وللاسف الوضع مش مبشر ابدا 

خالد باهتمام قال

عرفت عنها ايه يا سعيد اتكلم

 سعيد 

الست دي مش كويسه يا خالد بيه وحط تحت كلمة مش كويسة كل الخطوط الحمراء كلها

 خالد انصدم اكثر من اللي سمعه مبقاش عارف يعمل ايه ازاي يقول لاياد الحقيقه ازاي يقوله ان مامته ست مش كويسه وازاي يسيبها تاخده خالد فضل يكسر في كل حاجه في مكتبه 

لا استحالة استحالة اياد يرجع لامه الحقيقيه ابني كده هيضيع مني كل السنين اللي تعبتها في تربيته هتروح هدر بسبب الست دي استحاله اياد يعرف الحقيقه استحاله ارجعه ليها

 ولما خلصت المهلة اللي ادتها ام اياد ليه رجعت له تاني

 ها يا خالد بيه هترجع لي ابني اياد 

خالد بحدة

 اياد مش ابنك ومش هيرجع لك فمتحلميش بده وامشي اطلعي بره بدل ما ابلغ البوليس 

الست هنا قالت بعصبيه

 خالد بيه اياد ابني واظن ان سهله عليا قوي اروح له بنفسي واقول له الحقيقة اقول له ان انا امه وانت مانعني اني اشوفه وانه يعرف الحقيقة 

خالد فهم هي عايزه ايه فطلع شيك وقال ها عايزة كام مقابل سكوتك الست قالت

 مليون جنيه وانا هسكت و مش هطالب بابني تاني 

وبالفعل كتب لها خالد الشيك وقال مش عايز اشوف وشك تاني انتي فاهمه عشان انا لو شفتك تاني قدامي او اياد عرف بأي خبر هوديكي وراء الشمس 

 اخدت الشيك وهي فرحانة ومشيت وبالفعل خالد ما شافش وشها لاكتر من ست سنين لكن من بعد ما خالد عرف الحقيقة وهو ما بقاش عارف يعامل اياد زي الاول خايف يكون طبعه زي امه يكون مغروس فيه غرسة سودا اتورثت ليه منها علشان كده معاملته لاياد اتغيرت وكان بيحاول فعلا يكرهه لانه في يوم من الايام هيرجع لامه ويسيبه لكن قلب الاب اللي جواه انتصر وما قدرش انه يكره ابنه اياد ورجعه ليه من تاني

باك 

خلص خالد كلامه واياد كان بيسمع ومتأثر ودموعه نازلة

فقال خالد باسف

 انا اسف يا اياد اني خبيت عنك امك طول السنين دي بس صدقني يا ابني ما كانش ينفع تقابلها ما كانش ينفع ابدا سامحني انا خبيت عنك علشان كنت بحميك منها وانت كنت اخر اهتماماتها هي كل اللي بيهمها الفلوس وبس صدقني لو كنت قلت لك وقتها كنت هتعيش بقيت حياتك تعيس مش هتكون اياد الراجل اللي يعتمد عليه اللي انا شايفه قدامي دلوقتي انا كنت انا هقول لك بس في الوقت الصح في الوقت احس اللي احس فيه ان قرارك هيكون حكيم ومش متهور وهتختار الصح اعمل اللي تعمله يا اياد انا مش همنعك انا واثق في قراراتك يا ابني

 سكت اياد شوية كأنه بيستوعب اللي بيسمعه وبعدين قال 

انا عايز اعرف مين امي عايز اشوفها 

هز خالد راسه واحترم قراره 

تمام هكلمها اقولها انك عايز تقابلها واشوف ردها ايه وابلغك 

اياد كان محتاج ف الوقت دا يقعد مع نفسه فقال 

عن اذنك هطلع اوضتي ارتاح 

هزله خالد راسه وقعد على مكتبه براحة 

اما اياد فانطلق ف طريقه بسرعة لاوضته 

ولما خرج خالد لفداء وكيان استغربوا 

فداء 

خالد انت قولت لاياد ايه علشان يرجع في قراره وميمشيش دا حتى ساب شنطته ونسيها تماما 

خالد 

قولتله الحقيقة قولتله مين والدته بس لسه هعرفه بيها 

كيان وفداء بصوا لبعض وقالوا في نفس واحد 

انت تعرف أهل اياد الحقيقين!!! 

هنا قعدت فداء في صدمة وحسرة 

كدا اياد ابني راح مني للأبد هيروح لأمه وينساني....

❈-❈-❈

مادونا حست بالحنين لشوق فقررت انها تروحلها 

شوق كانت قاعدة في الوقت دا مع وعد وهناء 

واول ما شافت مادونا رحبت بيها ودا لانها عارفة انها مش زي قسمت ودنيا 

اهلا يا حبابة ليكي وحشة يا بت يا دوندن فينك اكده ناسياني 

مادونا 

مقدرش طبعا انساكي يا طنط شوق وعايزة اجيلك من زمان بس بصراحة مكسوفة 

شوق 

واه يا بت مكسوفة من ايه ديه بيتك يا خايبة 

مادونا 

عارفة والله ان حضرتك هتستقبليني احسن استقبال بس اللي ماما ودنيا عملوه ااا 

شوق 

اشش انتي ملكيش دعوة باللي عملوه هاخدك بذنبهم ليه اني عارفة انك غيرك ومش زييهم في طباعهم 

مادونا بهم وقالت وهي قصدها ع مالك

بس فيه ناس اخدوني بذنبهم وقطعوا علاقتهم معايا تماما لدرجة انهم فكروني زيهم وبعدوني عنهم 

فهمت شوق ان مادونا قصدها ع مالك فقالت 

بكره يفهم الحقيقة وترجعوا زي السمنة على العسل من تاني ونفرح بيكم قريب 

مادونا وشها بقا احمر وقالت بحرج وارتباك 

هو مين ااا حضرتك قصدك على مين يا طنط 

ضحكت شوق 

عليا اني يا دندن يا عسل انتي ديه اني افهمها وهي طايرة المهم اني دلوك لو طلبت منك طلب او رجاء يا بت يا دندن تعمليه؟؟ 

مادونا 

انا عنيا ليكي يا طنط شوق 

شوق 

لااا اول هام انسي كلمي طنط داي الكل اهنه بيقولي ماما شوق .. تعالي هاتي ودنك واني هقولك وليكي حرية الاختيار هو مجرد رجاء وبس...

❈-❈-❈

فتح ادم عيونه ودا لأن الطلقة اللي اخدها مكانتش اكتر من منوم ودا لأن دهشان مش عايز يموته بسهولة 

واول ما دهشان شافه فاق قال 

واخيرا فوقت يا .. يا حضرة الظابط!!! 

ادم بص حواليه وبص ع نفسه استغرب انه ازاي مفيش حاجة بتوجعه وانه ازاي مش متعور ففهم انه اخد منوم مش طلقة حقيقية فقال بحدة 

بتعمل اكده ليه يا دهشان وكمان دخلت شقتي من غير استئذان مش بس خربتها وديه لوحدها حسابها عسير اوي بتعمل اكده ليه 

دهشان بشر كبير 

وليك عين تتكلم بعد عاملتك السودا يا كلب!!! بقا مخبي ابني وحابسه وبعدها بتقابلني وبتحط عينك في عيني اكده بكل جرأة ولا كأنك عملت حاجة .. جبت الجبروت والجرأة داي منين يا واد انت ها... حتة صعلوك زيك ازاي يتجرأ على اسياده يا كلب.. بس اني هوريك هعمل فيك ايه هندمك ندم عمرك ع تجرؤك ع اسيادك زعلى خداعك ليا يا خاين 

شاور ع رجالته 

اضربوه دغدغوه متخلوش فيه حتة سليمة بس سيبوه حي 

رغم ان ادم كان مكبل ومتقيد بالحبال الا انه عرف يدافع عن نفسه كويس من الرجالة دي بل انه فك قيوده وفضل يضرب فيهم ويقاومهم كلهم 

وبعد عراك طويل ومجهد قدر ادم انه يتغلب عليهم كلهم... خوفه على وعد وانه لو الدهشان اتغلب عليه ممكن يصيبها شر اداله قوة ملهاش مثيل ولما قدر على رجالة دهشان اتحرك ناحية دهشان وقرر يخلص الناس من شره 

لكن ومن غير ما ينتبه هجم عليه كلب كبير متوحش ومفترس وعضه بقوة 

صرخ ادم على اثرها من الألم الشديد الغير محتمل 

ضحك دهشان من المنظر اللي شافه بعد ما كان خايف من ادم وانه بيقرب منه وقدر يهزم رجالته وقال 

شوفت الكلاب مخلصة عنك بتدافع عني كيف.. اهو انت دلوك هتبقى كلب زيك زييهم بالظبط هسيبك اكده لحد ما يجيك سعار الكلاب

يتبع