رواية جديدة البلطجي لولاء حامد - الفصل 3 - الأربعاء 28/5/2025
قراءة رواية البلطجي كاملة
تنشر حصريًا على مدونة رواية وحكاية قبل أي منصة أخرى
رواية البلطجي
رواية جديدة قيد النشر
من قصص و روايات
الكاتبة ولاء حامد
الفصل الثالث
تم النشر يوم الأربعاء
28/5/2025
خلال يوم ونص اعتكف فيهم مالك على الكومبيوتر هو ومصطفي يجمعوا كل الملفات ونص اخيرا قدرو يجمعوا كل المطلوب
مالك وهو بيفرك في عنيه بعد ما بعد اللاب توب من قدامه :اوووف يا الله اخيرا خلصت دانا خلاص خلصت محتاجلي شهرين أجازه
مصطفي وهو بيتمطع وبيحاول يفرد ضهره على الكرسي: ياشيخ ينعل ابو كده ايه داه لما احنا كده وجبنا أخرنا اموت واعرف البشمهندس داه بيقدر على الهري داه كله ازاي تحسه عامل زي الإنسان الآلى يا جدع يعني الشغل اتقسم بينا وطلعت عين ابونا وهو هايستلم داه كله ويقرئه ويحدد المطلوب وخطه شامله في يومين
مالك :بصراحه جباااااار يا جدع
مصطفي :بصراحه اه ودماغه ابن الايه بتجيب التايهه بتحس انه عامل زي الكومبيوتر بيترجم كل حاجه ويحللها في ثواني
المهم هاتبعتله الملفات
مالك بهزة راس: ايوه هابتعتهومله على الايميل واتصل بيه أبلغه
مصطفي وهو بياخد جاكيت البدله مع على ضهر الكرسي :تمام اروح انا بقى علشان جسمي مكسر محتاج انام اسبوع مطبقين بقالنا اكتر 36 ساعه يا كافر
مالك بتهكم: حكم القوي يا اخويا يلا خليني ابعتهم ونريح اليومين الجايين لحد ما نشوف الاجتماع اللي جاي هايقول ايه
وخلال دقايق كان انتهي من إرسال الايميلات وقفل اللاب توب وخد جاكيت البدله على دراعه وقفل وطلع من الشركه واتصل بالبشمهندس
مالك :ايوه يا ابني انا بعتلك كل الفايلات على الميل بس خد بالك كل اللي دخلين المشروع عتاوله كبار ليهم شنه ورنه ومنهم اللي مسنود واللي واصل وواصل اوي اوي كمان
المهندس: متقلقش اشوف الموضوع الأول وادرسه كويسه علشان احط خطه صح
مالك :تمام اول ما تخلص هانستنى اتصالك لان الاجتماع المره دي هايكون على مستوى
المهندس: مش المره دي الأول نناقش الخطوط العريضه والباقي
في وقته متستعجلش الأمور
مالك بإرهاق: خلاص تمام اسيبك بقى علشان سايق ومحتاج ارتاح انا بقالي يومين مطبق انا ومصطفي علشان نجمعلك كل الداتا
**********************************
هارون بقاله من ساعه ما جه وهو معتزل كل اللي في البيت قافل على نفسه حتى الاكل بطل يشاركهم فيه وبيطلع ويدخل من غير ما يتلفت لحد قاعد على سريره هادي وباصص للسقف بهدوء
تليفونه رن بص على الرقم واتعدل في رقدته
هارون بلهفه: ها يا سيد في جديد
سيد :عيب عليك يا معلم هارون لما تسألني السؤال داه
هارون بحده: اخلص وهات اللي في جوفك ومره واحده
سيد:......
هارون بيسمعه بإنصات لحد ما خلص تمام تمام
ومتعرفش اتاخرو قوي كده ليه
سيد: علمي علمك اللي اعرفه انهم قفلو عليهم لحد ما الموظفين مشيو ومحدش عارف حاجه ويادوب روحو من كام ساعه
هارون:تمام اتكل انتا
سيد: امر يا معلم
هارون بشرود: يا ترى بتخططو لايه يا أولاد المالكي يخليكم تقعدو أيام قافلين على روحكم
**************************
رجع رفعت و رأفت ورقيه كل واحد على فيلته ساكنيين في 3 فيلات جمب بعض
نزل رأفت ودخل ورا اخوه وشده من دراعه في جنينه الفيلا
رقيه شافتهم ودخلت وراهم ووراهم عادل ابنها ومهدي ابن رأفت
رأفت بحده: اقف هنا وكلمني
رفعت بصوت عالي: اتجننت في اقلك يا رأفت بتشدني بالشكل داه
وبتعلي صوتك على اخوك الكبير
رأفت بتهكم: كبيري الله يرحمه وماليش من بعده كبير
رقيه وقفت في النص بتحجز بينهم: ايه اتجننتو بتقفو لبعض الند بالند احنا لسه قايلين اننا لازم نكون في ضهر بعض مش في وش بعض ايه الكلام اتنسي خلاص
رأفت بسخريه مبطنه: خليكي انتي يا حنينه يا ام قلب رقيق على جمب لوحدك وبص لرفعت: قولي يا رفعت ليه خليت ابنك بس اللي يشتغل على المشروع وماشاركتش حد تاني معاه وسمحتله يطلع على كل أوراق الشركه والي فيها يعد سريه تامه ومش من اختصاص ابنك
رفعت بمكر: لان المشروع في منتهي السريه وكان لازم اضمن أعلى سريه لا كلمه تتنطر كده ولا كده وأول ما خلص عرضته عليكم
رأفت بمكر موازي: وليه ماشركتش حد منا او من اولادنا مع ابنك
رفعت: لأن الصفقات والمشروعات انا المسؤل عنها ولا نسيت
رأفت: لاء انتا اللي نسيت اننا كلنا مسؤلين مع بعض وزي ما بتجيب صفقات احنا كمان بنجيب وزي ما بتشتغل احنا كمان بنشتغل ولعلمك المشروع داه انا كنت شغال عليه من قبل ما انتا تعرف عنه اصلا ولو كنت قولتلي كنت وفرت عليك اللف والدوران داه كله ثم قولي كده ليه معرضتش الميزانيه كامله قدامنا مع انك عطيت صلاحيات مش من اختصاص ابنك ولا مسموح ليك انك تدي امر بيها لوحدك بدون الرجوع لينا
رفعت بتبرير: لان الميزانيه محتمله مش مؤكده وأرقام قابله للتغير لأنها تحن العجز والزياده
رأفت ضحك بصوت عالي واتحولت نظراته لسخريه: والله بجد الكلام داه تضحك بيه على حد غيري متنساش اني خريج كليه تجاره يعني الأرقام والحسابات دي لعبتي اي مشروع بيتعمل لازم يتعمل ميزانيه مفتوحه ولازم يتعمل بند موازي في حابة العجز يسد الزياده المطلوبه وبص لرقيه بتهكم ورجع بنظره لرفعت: اقولك انا بقى انتا حبيت تخبي علشان الكل يفضل تحت رحمتك واديت لابنك الصلاحيات الكامله علشان بتجهزه يقعد مكانك على كرسي مجلس الإداره منتا خدته ورث متوارث وغمز بعنيه لرفعت
رقيه بتدارك للواقع اللي كان غايب عنها: قولي يا رفعت الكلام داه بجد انا ازاي مفكرتش فيها كل المشاريع ابنك كل التخليصات ابنك انا كنت فرحانه ومعميه بالمكسب والصفقات والمشروعات اللي بتتعمل ومخدتش بالي انك انتا وابنك ماسكين الشركات كلها لوحدكم ودورنا تنفيذي فقط يعني الإداره محدش عارف عنها أي حاجه الا اللي انتا عايزنا نعرفه
رأفت: هو طبعه ولا هايشتريه
رفعت بعصبيه: خلاص كل واحد منكم نصب نفسه قاضي وجلاد
رافت: بلاش انتا تتكلم عن الحكم
رفعت :ومتكلمش ليه بص لاخته فارق معاكي كرسي مجلس الإداره ونسيتي ان الشركه الصغيره بقت شركات وفي مجالات كتيره بصيتي للإدارة ونسيتي ان المكسب اهم ونسيتي ان نسبنا كلها واحده وقد بعض يعني انا قعدت او انتي او البيه وشاور على رأفت قعد عليه مش مهم المهم الشغل يمشي والنسب كلها متساويه
والبيه في جيبه كل حسابات الشركه الجنيه وعارف كل صغيره وكبيره ومبيتمش الاعتماد البنكي لأي مشروع من غير موافقه ثلاثيه يعني دوري إداري فقط لاغير
احتد الخناق بين الأخوات
طلعا دودي مرات رفعت: في ايه يا جماعه صوتكم مسمع جوه لو فيه كلام مهم وبالشكل داه مش قدام الخدمين عندكم ملحق كامل منعزل او حتى روحو اوضته المكتب عيب كده احنا أكبر وارقى من كده خلينا في مركب واحده علشان المكسب والمصلحة اهم كل واحد ليه دور المهم ادواركم تكمل بعضها
الكل بص لبعضه ومشيو من غير كلام وكل واحد مقتنع انه ليه الاحقيه
دخل رفعت بيته واترمي على الكنبه في الليفنج روم
سراج :مكانش ليه داعي كل الكلام داه يا بابا انتا عارف عمي رأفت مش هايسكت واحنا داخلين على نقله كبيره
رفعت: اسكت انتا رأفت طمع وروقيه دلوقتي خدت صفه المفروض نفكر ازاي نكسب نفسنا
انضمت ليهم رهف بنت رفعت: عندك حق يا بابي بس المهم ازاي وكيف واضح اوي ان اونكل رأفت مش هايسكت وممكن يعمل مشاكل في الشغل
دودي بخبث: سهله لو ازمت اوي كل واحد ينفصل بنصيبه
رفعت بطمع: ازاي مجموعه الشركات دي تسوى ملايين ان ماكنش مليارات مين هايشيل مين
دودي: واحده واحده الأول تشوف الطرف الأضعف مين رقيه ولا رأفت
رفعت بتفكير: الاتنين بنفس القوه ونسبهم متساويه ودلوقتي رقيه انضمت لرأفت
دودي بغمزه عين: يبقى فرق تسد فرق الاتنين عن بعض وتستفرد بكل واحد فيهم واللي تقدر تنطره الأول تبقى اتحلت معرفتش يبقى خليهم بعاد عن بعض لأنهم لو اتحدوا هايبقوا جبهه قويه ممكن يشيلوك من مكانك
رفعت بصوت عالي: الكلام داه مش ممكن يحصل ولو على جثتي
دودي :منا بقولك علشان كده مش لازم رقيه ورأفت يكونو جبهه واحده
رفعت: ودي اعملها ازاي
دودي بتفكير: هانلاقي ليها حل كل حاجه وليها حل اهدي بس لان التفكير وقت الغضب غلط وبيخسر ويخسر كتير اوي
سراج: ازاي يا مامي دول مهما ان كان أعمامي
رفعت بغموض :اوعي تعمل حساب للمشاعر المشاعر بتكسر صاحيها كتيييير اووووي اووووي اسمع مني الزمن علمني مأمنش لحد مهما ان كان علشان كده كل حاجه حاطط نفسي فيها مهما ان كانت صغيره او تبان تافهه
رهف: عندك حق يا بابي مش مهم اي حد المهم انا لاني لو فكرت في غيري هيكون هو الأول وانا بعده الصح انا الأول والباقي بعدي
رفعت بفخر هي دي بنتي ياريت اخوكي يفكر زيك اقعدي معاه كتير يمكن يتعلم منك مصلحته قبل مصلحه غيره
********************************
رأفت دخل فيلته ومهدي معاه
مهدي قعد قدام ابوه :يا بابا اللي حصل اكبر غلط احنا طول عمرنا شغالين وبنكمل بعض
رأفت: رفعت اتفرعن اسألني انا داه حوت وحوت كبير يبلعك من غير ما يرفله جفن
دلال زوجه رافت: في ايه يا جماعه ايه اللي حصل جايين اخر الليل وقاعدين بالوضع داه
مهدي: بابا و اونكل رفعت اتخانقو وشدو مع بعض
دلال بإستغراب: ازاي دله دول طول عمرهم مع بعض زي الشخص وضله مبيتفارقوش
رأفت: رفعت طمع يا دلال رفعت بيجهز ابنه يقعد مكانه حط كل أسرار الشركات في جيب ابنه وبيشرب ابنه الإداره كل أسرار الإداره منفرد بيها لوحده
دلال: مش معقوله طيب وانتا ناوي على ايه
رأفت بتفكير: ناوي اتغدا بيه قبل ما يتعشى بيا
دلال: قصدك إيه اخوك مش سهل
رأفت: ولا انا كمان لو هو حاوي فأنا جرابي مليان اقعدي واتفرجي انا دقيت اول مسمار في نعش رفعت انهارده
دلال :ازاي
رأفت: رقيه الفيصل رفعت طول عمره واخدها تحت جناحه يمين معاه شمال وراه كل اللي عملته فتحت عنيها على حقيقه رفعت
مهدي: انا مش معاك بصراحه شايف ان كل واحد منكم مسؤل عن جزء مهم مش مهم مين الإداره المهم ان الكل في الصوره
ومادام محدش يقدر ياخد خطوه بدون التاني يبقى خلاص محدش كاسر عين حد
رأفت بص لابنه بغموض: وتفتكر انا هابقى مبسوط لما ابن رفعت يبقى أعلى منك ولا ان انا وانتا ناخد اوامرنا منه ولا هستني عيل ييجي ياخد تعبي وشقايا سنين وسنين على الجاهز تبقى غلطان
ميار :يا بابي انا معاك بس بردو لازم نعمل حساب الشغل المشاكل لما بتدخل بتوقف الدنيا واونكل رفعت محدش ينكر انه بيجيب صفقات كبيره وقدر ينقل الشركات لمكانه كبيره جدا
رأفت: وانا كمان زي ما جاب صفقات انا جبت وزي نا اشتغل انا اشتغلت وزي ما كبر الشركات انا كنت في كتفه كتف بكتف
يعني مش لوحده محدش فينا ليه فضل على حد
دلال: خلاص اهدا وفكر بالعقل
*****************************
رقيه روحت فيلتها
عادل :مالك يا ماما
رقيه: خايفه اعمامك واقفين لبعض رفعت قوي و رأفت ذكي بس مرات عمك رفعت شرها كبير
عاصم: مالكم
رقيه :مفيش وبصت لأولادها من هنا وجاي عايزه عنيكم مفتحه ومحدش ياخد قرار إلا لما يرجعلي ونشوف الأيام اللي جايه شايله إيه
عاصم :ليه داه كله
عادل: علشان اونكل رأفت و اونكل رفعت اتخانقو مع بعض
عاصم بسخريه: مش اول مره يعني كل مره بيتخانقوا وبيرجعو
يومين وتلاقيهم زي السمن على العسل
رقيه بتعب وخوف: المرادي غير المرادي كل واحد الطمع عمى عنيه والجلاله وخداه قلبي بيقولي ان اللي جاي مش خير وربنا يستر من غلهم لبعض
*************************
هارون فضل أيام على حاله لا بيتكلم مع حد ومعتزل بنفسه
هنا دخلت اوضته لقيتها مدخنه والنور مطفي فتحت النور وفتحت البلكونه وقعدت جمبه على السرير
هنا بحب اخوي صادق: وبعدين معاك يا هارون هاتفضل قافل على نفسك عشان كلمتين خايبين من عيال
هارون بتنهيده طالعه نار من جوفه : مهماش كلمتين يا هنا وبطلي تهوني الأمور
هنا وهي بتطبط على كتفه بحنان ام :هونها تهون دانتا دايما كنت بتقولي كده
هارون بحزن ظاهر في عنيه مش بيبان الا قدام تؤم روحه :كان زمان لما كنا عيال مكنتش فاهم من الدنيا حاجه كنت بهونها عليا وعليكي عشان نقدر نعيش ونكمل اخواتك يا هنا بيستعرو مني
هنا بشخطه: قطع لسانهم داه لولاك كان زمان كلاب السكك نهشتنا يا واد دانتا ابويا اللي ملحقتش اشبع منه واخويا اللي ضهري وسندي سيبكم منهم
هارون بوجع: خايف يا هنا خايف من اللي جاي وخايف عليهم خايف من النار اللي هاتطلع اخواتك بينفخو في رماد الماضي واللي تحت بركان مش نار طلعت هاتحرق الأخضر واليابس انا سيبت دنيتي عشانهم انا حطيت عمري تحت رجليهم
هنا بحزن من حالة اخوها: بكره يفهمو ويعرفو وهما بذات نفسهم اللي هايكونو ضهرك صدقني
هارون بحزن: اتمني داه يحصل وأكون متفائل زيك انا حرمت نفب عشانهم بديتهم على نفسي كبرت بيهم وعطيتهم كل اللي اتحرمت منه
هنا: عارفه والله العظيم عارفه وشاهده ويشهد ربي انك ما قصرت
هنا بمحاوله لتغيير الحوار: بقولك ايه قوم اتشطف كده وانا عملالك كشك المظيه من اللي بتحبه ومعاه لحمة راس
هارون : لاء عايز انام لما اصحى ابقى أكل اطفي النور واقفلي البلكونه اللي فندقتيها دي هاريح جتتي شويه
هنا:هاطفي النور بس سيب البلكونه تطلع الحريقه اللي في الاوضه دي
هارون بتعب وارهاق باين من صوته: انتي عارفه اني مش بنام وفي أي نور
هنا :طيب هاشيش البلكونه اهو نص العمى ولا العمى كله
هارون: ماشي عشان خاطرك
وطلعت هنا وهارون قلع التيشيرت ورماه واترمى على السرير بيحاول ينام ولكن منين ييجي النوم وما ينام إلا خالي البال
طلعت هنا بعد ما قفلت الباب كان وصل حسام وجنا من الدرس
حسام قعد على الكنبه وجنا جمبه
حسام بتعب: هنا انا واقع من الجوع وعندي كومه مذاكره انا واختك
هنا بحرقه متداريه: قومو غيرو :وانا يا دوب اغرف
دخلو ودقايق وكان الأكل على طربيزه صغيره في نص الصاله
حسام بص للأكل وابتسم بتهكم: كشك طبعا معمول عشان هارون
هنا: كل وانتا ساكت هارون سابلكم الدنيا مفججه يارب تكونو هديتو
حسام: انتي ليه دايما في صفه ظالم ومظلوم
هنا بشرود: عشان انا اكتر واحده عارفه ان هارون عمره ما كان ظالم طول عمره مظلوم ظلم نفسه عشانا ساب علامه واشتغل واتبهدل واتمرمط عشانا عشان انتوا تكونو في المكانه دي
جنا بتفكير: تفتكري يا هنا لو هارون كان كمل تعليمه كان بردو هايبقى بلطجي ولا كان هايبقى ليه شنه ورنا
هنا خبطت على الترابيزه جامد خلت الصحون عملت صوت ورنت المعالق مكانها: هارون ساب تعليمه علشان انتي تلاقي تتعلمي هارون اشتغل عشان انتي تلاقي تاكلي هارون بيلبس لبسه القديم علشان انتي واخوكي تلبسو الجديد وهارون لو كان كمل تعليمه كان زمان اسمه زي الطبل منين ما يمشي يرن
حسام: محدش قاله يسيب تعليمه كان يقدر يشتغل ويتعلم ناس كتير بتعمل كده يعني
هنا برفعه حاجب: والله تصدق عجبتني بس مدخلتش زمتي ببصله معفنه اللي بيعمل كده بيبقى بطوله انما لما يبقى متشعلق في رقبته تلات عيال يبقى يا يختار نفسه يا يختاركم
وزقت الكرسي بحده: عارفين غلط هارون فين غلطه انه اختاركم على حساب نفسه وبداكم على روحه وزقت حسام في كتفه :انزل انزل اشتغل واتبهدل ويطلع عين اللي خلفوك وتعالى هلكان وجتتك بتأن عليك من الوجع واقعد ذاكر مش هاقولك حط قرش في البيت لاء هاقولك كفي روحك اكل وشرب ودورس ولبس ومصاريف انتوا اكتر ناس انانيه فعلا العرق دساس وانتوا فعلا سلسال المالكي
الكل بيتكلم ونسيو اللي في اوضته سامع كل كلمه بتنزل على قلبه تكويه وكأنها كرباج من نار
ولأول مره من سنين دمعه غداره نزلت من عين هارون اللي عاهد نفسه انه لا يتوجع ولا يتكسر
يا ترى مين فيهم المالكي...؟
وياترى مين اللي هايكسب الحرب رأفت ولا رفعت...؟
وياترى هارون هايعمل ايه مع جحود أخواته...؟
يتبع
إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
