رواية جديدة البلطجي لولاء حامد - الفصل 1 - الأربعاء 28/5/2025
قراءة رواية البلطجي كاملة
تنشر حصريًا على مدونة رواية وحكاية قبل أي منصة أخرى
رواية البلطجي
رواية جديدة قيد النشر
من قصص و روايات
الكاتبة ولاء حامد
الفصل الأول
تم النشر يوم الأربعاء
28/5/2025
على سرير نايم شاب زي القتيل صوت خبط على الباب بطريقه مفزعه دخلت بنت من غير ما تستني يصحى
وهزته بطريقه جامده
هنا بحده وصوت عالي :يا هارون قوم اخوك هايروح تحت
هارون بعدم فوقان: يا بت اتهدي عايزه انام جاي وش الصبح هلكان
هنا بزعيق: قوم العيال تحت متكاترين على اخوك ونازلين طحن فيه
هارون قام منطور من على السرير: بتقولي ايه يا بت يا مخبوله اخو مين اللي اخويا انا مين اللي امه فقدته في يومه ويستجرا يعملها
هنا: عملوها انتا لسه هاتحكي وتتحكى
هارون زقها وميل سحب سنجه طويله من تحت السرير وطلع جري
هنا : استني اللبس حاجه استر بيها جسمك
هارون متلفتش وكمل نزول السلم حافي وسحب اخوه زي اللي بيسحب شعره من عجين وزقه على جمب ووقف في نص الحاره لابس بنطلون شروال اسود ونص الفوقاني عريان بيبين جسم عريض لشاب في الاخر العشرينات من عمره.
هارون بصوت عالي وهو بيلوح بالسنجه في الهوا بطريقه مرعبه وصوت يحبس الأنفاس: ايه يا حاره ما فيهاش راجل ايه حاره مره تربيه مره ده لسه ما خلقوش ربه ولا ابوه فرك في ليلته علشان امه تجيبوا ويقف قدامي اللي يدوس على طرف حد من بيت اهله هارون المالكي يا حاره غجر اللي شايف نفسه الحكومه كتبت له دكر في البطاقه صح ما اتطبعتش خطا مطبعي يوريني نفسه واديني واقف اهو وخبط على صدره بحده وبص لاخوه بعنين بتقدح شر
هارون :ايه اللي حصل ياض
حسام بص للي كان بيتخانق معاهم شاف الرعب موشوم في عنيهم ورجع بنظره لاخوه:مفيش خناقه شباب حاجه هايفه
هارون بزعيق: اسمع وانا اللي احدد مقلولكش لسه الرياله نازله
حسام بخوف من منظر اخوه وصوته اللي جايب اخر الوراق: صدقني مفيش
هارون اتلفت للشباب اللي كان بيتخانق معاهم اخوه: هو منطقش وانا مسمعتش وميل رأسه نحيه كتفه اليمين يبقى مفيش غير حاجه من اتنين يا تنطقوا يا تاخد لسانك تذكار متعلق في رقابتك واللي نفسه ييتم عياله ويرمل ان عياله يتدخل وخبط السنجه على الأسفلت سابت اثر في الارض مع شرار وصوت خلى كل اللي واقفين اتفزعو
الشباب كلهم بصو لبعض وبصو لحسام يعتذرو بعنيهم
حسام فهم نظراتهم وقرب من هارون: خلاص بالله عليك لما نطلع اما هاحكيلك
هارون بصوت رج الشارع: انا شوفتك في الشارع واتضربت في الشارع يبقى اسمع واحكم في نفس الشارع ومش هارون المالكي اللي حد يخصه يتعلم عليه مابالك بقى بأخوه وكمل بصوت ولا فحيح التعبان اللي بيجهز نفسن لالتهام فريسته: تنطق انتا ولا انطقهم انا بمعرفتي قال كلامه وخبط بالسنجه على كف ايده
نطق بسرعه واحد من الشباب الواقفين علشان ينجد نفسه:
الولا عبده خيري كان جاي من الدرس وحسام وقفه يسأله على نمره الموبايل بتاع المستر اللي بياخد عنده قاله ميستنضفش يدخل بلطجيه وسوابق عنده داه مبياخدش إلا ولاد ناس
كلمه من حسام وكلمه منه مسكو في بعض لما حسام خرشمه بعت جاب أهله
هارون بص لعبده وأخوه اللي واقفين ركبهم بتخبط في بعضها وقرب بخطوات بتهز الأرض من تحت رجله وميل على عبده: بقى عبده انبوبه بيلقح على سيده وتاج رأسه ورفع وشه وبصوت سمع كل اللي حواليه
عبده انبوبه ابن خيري الدجال اللي ممسوك مرتين ودلوقتي في ابو زعبل بيقول على اخويا بلطجي وسوابق طيب بص لأهل بيتك يا بيت سايب ابوك نصاب وامك اللي ممشيه البيت يعني ياض البيت االي تحكمه مرا ميبقاش فيه راجل
وبص لعبده وكمل ولا قصدك انا وهز رأسه عندك حق والبلطجي بيعمل إيه وخبطه بالروسيه خلى منخيره طرشقت دم وقرب من اخوه اللي يعلم عليك علم على عيلته وكمل بصوت عالي اللي يرش أهلى بيتي بالميه مش هارشه بالدم لاء هارش الشارع بدمه هو وأهله
ورمي عبده وقرب بخطوات ثابته ناحيه سالم اللي واقف بيحاول يكون ند لهارون
هارون طقطق عضم رقبته وابتسم بسخريه :والله الزمن جرى والايام عدت الواد اللي كان ماشي ريالته مغرقة وشه والدبان عافف عليه كبر وبقى عايز يناطح المعلم هارون وانا ميرضنيش
سالم بحقد: لو فاكر البوقين دول هدوني ولا خوفوني تبقى غلطان وزي ما علمت على اخوك بكلمه مني اعلم عليك جمب منه ومتنساش انتا نفر بطولك وشاور حواليه بإيده واحنا قد الطاق عشره
هارون بص حواليه ونظره سخريه بانت على وشه وخبط على صدره وانا أهو الدكر اللي شايف نفسه راجل يهون مني وعمل حط بالسنجه على الأرض
سالم بغل: طلبتها وهاتنولها يا ابن وكمل بتهكم الاكابر وعلى صوته اشهدي يا حاره هارون هو اللي بداء وجر الشكل وانهارده نهايه المعلم هارون نطقها بسخريه وشاور لأصحابه
وفي اقل من ثواني وكان اكتر من عشر شباب اتلمو عليه
وقبل ما يهجمو كان الشارع اتقفل برجاله هارون
هارون بشخطه: ولا حد يقرب الحق داه يخصني واللي هايتدخل يعتبر نفسه معاديني اما نشوف العيل ابن امبارح اللي شنبه لسه خاطط أخضر في وشه هايعمل معايا ايه
وبدئت خناقه الكل واقف مترقب
هنا واقفه حاطه ايدها على قلبها الكتره تغلب الشجاعه
وجنا واقفه خايفه جمبها
وحسام في موقف لا يحسد عليه
والشارع كله واقف على رجله والستات والعيال ماليين البلكونات
هارون وقف زي الأسد اللي مستعد وفي اقل من ربع ساعه كان مكومهم على الأرض وكل اللي طاله كام خربوش وكدمات بسيطه
خلص منهم ونفض ايديه
وقرب من سالم ورفع كفوفه بعد ما رمى السنجه من ايده: كدا عداني العيب حتى رجالتي محدش أتدخل
والمعلم هارون اللي يفكر يرفع ايده عليه يقطعها فمبالك باللي استجرا ورفعها
وشاله وهبده على الأرض
هارون بسخريه: تؤتؤتؤ لا لا لا كده ازعل دانا لسه بقول يا هادي تقع من زقه ياض
وقبل ما سالم ينطق كان البونيه منيماه على الأرض هارون ميل وسحبه لا اصلب طولك كده اومال دانتا يومك طويل خناقه وبعدها مستشفى وبعون الله كفيل اخليهم يحتارو يدخلوك قسم العظام ولا قسم الجراحه الاول واخلي الدكاتره تحتار تجبس فيك ايه ولا تخيط فيك ايه ولا ايه
وخبط على صدره بحده وهو بيوصل رساله لكل اللي حواليه انه لا بيتهد ولا بيتهز
وشاط سالم بالشلوت كومه على الأرض حاول يزحف وينجد نفسه من غضب هارون ولكن تأتي الرياح بما لا تشتهي السفن
قرب هارون الكام خطوه اللي طارهم سالم بهدوء مميت ولعب بالاعصاب:تؤتؤتؤ يا راجل كده تزحف مع انه مقامك بس مش خساره فيك كفايه انك نولت شرف ان ايد المعلم هارون تعلم عليك وقعد فوق منه وكمل فيه ضرب لحد ما قطع النفس
هارون سحب السنجه ومسك ايد سالم وكمل بجبروت ايدك دي اللي لمست سيدك وتاج راسك حسام المالكي ابن الاكابر هاقطعها وعلقها في رقبتك عشان كل ما تبصلها وتتحسر تفتكر انتا مين وهو مين ومسك ايد سالم بإيده الشمال
ورفع السنجه لفوق بإيده اليمين بطريقه مفزعه وقبل ماينزل بيها
لقي اللي ماسكه رجله وبتبكي بحسره:
سعاد ام سالم: احب على رجلك يا معلم هارون عيل وغلط وانا اللي محقوقالك لجل العيش والملح ورحمه المرحومه انا ماليش غيرهم ربنا ابتلاني بأبوهم وعيال وراثه منه قلة الأصل بس عيالي ربنا نجدني منهم متحرقش قلبي عليه سوقت عليك حبيبك النبي وأهل بيته انتا مهتحرقش قلبي بس لاء دانتا هاتحسرني على عمري اللي كسرته عليهم من بعد ما سيبت ابوهم ونفدت بجلدي وهما على كتفي
هارون غمض عنيه وفتحها بسرعه وبحده: ابنك غلط يا ام سالم واللي غلط يتربي
سعاد بدموع: يتربي وانتا ربيته وكسرته وانا كمان هاكمل عليه بس ابوس ايدك اغزي الشيطان
هارون لجل خاطرك وخاطرك وبس ورمي السنجه
وقبل ما تبتسم سمعت صوت كسر عضام ابنها
هارون اللي في نفس اللحظه اللي رمى السنجه لف نفسه جامد كسر ايده وصوت كسر عضمه سمع كل اللي حواليه وقرب منه مسح بكفه الدم من على وشه وقرب من بيته اللي الخناقه كانت قدامه ووشم بالدم على ضرفه الباب اليمين وقرب من عبده اللي مرمي ووشه كله دم ومسح الدم من على وشه بكفه التاني ووشم بالدم على ضرفه الباب الشمال
وبصوت رج الحيطان: داه عشان اللي شيطانه يوزه يبص على باب البيت ويفتكر المعلم هارون هايعمل فيه إيه
بصوت عالي رعب كل اللي حواليه: اولاد المالكي بره بدنتهم مالهومش غالي واللي ييجي عليهم بينهشوه
وسحب السنجه من على الأرض وسحب اخوه في ايده وطلع البيت وكأنه مش لسه مسيح دم للركب تحت
وأول ما طلع هارون كل اللي ليه عيل سحبه وطلع على المستشفى ومحدش قادر ينطق
هارون دخل البيت وزق اخوه
هارون بصوت يرعب: ايه ياض خيخه مش عارف تقف لشويه يعال هفأ
حسام بحزن: وانتا شايف انك كده وقفتلهم
هارون بجبروت: اللي يدوس على ضلي او ضل حد يخصني ادوس على رقبته بأوسخ جزمه لحد ما تطلع روحه واحسب ربنا ما خلقه
حسام: وهاتفضل عايش بالبلطجه والدراع لحد أمته
هارون: لحد ما أموت يا ابن ابويا
جنا بدموع: ليه ليه منعش زي باقي الناس ليه نعيش والكل كارهنا
هارون بحزن جواه بس قدر بجداره تحسب ليه يداريه: عشان الناس تخاف منك احسن منتي تخافي منهم لما يعملولك حساب يخافو يزعلوك او يخونوك واوعي سامعين اوعو تأمنو لحد الا لنفسك ومطرح ما رجلك اليمين تأمن مطرح ما الشمال تخون
حسام بص لجنا وسابهم ودخل اوضته وجنا دخلت اوضتها المشتركه مع هنا
هارون اترمي على الكنبه
وهنا واقفه بصاله بجمود
هارون : ايه في كلمتين محشورين في زورك زي اخواتك لسه مقولتهومش
هنا بنفس الجمود: لا بس شايفه قدامي رجل طول بعرض اسمه بيرعب رجاله بشنبات وعضمه نشف وبقى عصب بس شكله نسي تاره التار اللي ناره قايده بتحرق في روحي سنين وسنين لما قرب ياكلني التار اللي نسيته يا هارون وشكله لما بات مات جواك
هارون وهو باصص قدامه بشر :مين قالك كده هارون ابن ال 16 سنه مش هو هارون دلوقتي بس اخد الحق حرفه وبص لاخته والشر قاد جواه لا نسيت ولا سهيت ولا غفلو عن عيني لحظه بس سايبلهم الحبل على آخره لحد ما يلفوه حوالين رقابيهم عشان لما أشده أشده مره واحده اخد فيها روحهم كلهم ولا اخلي منهم ديار ولا نفاخ نار لان النار اللي هاتتفح هتاخد في وشها الكل اصبري اصبري يا بنت صابره خليكي زي اسم أمك خدت منابها من الصبر
هنا قعدت جمبه: ناوي على ايه ريحني وبرد ناري
هارون: ناوي احرقهم بالبطيئ واحده واحده وانا واقف اتفرج واخليهم يلفو حوالين نفسهم ومحدش منهم يبقى عارف الضربه جياله منين ولا من مين
هنا بصت على اوضه اخواتها: وهما مش حقهم يعرفو
هارون: لاء مش وقته لما ييجي وقته كل الدفاتر هاتتفتح
دخل اوضته ولبس تيشرت كوتشي وخد مفاتيحه وموبايله ونزل خد الموتوسيكل بتاعه وساق بجنون لحد ما وصل عزبة الصفيح في الدويقه دخل اوضه صفيح مفيهاش ملامح تدل على أنه ممكن انسان يقدر يعيش فيها اتلفت حواليه وغمض عنيه بيحاول ياخد نفسه ووقف صالب طوله
من هنا بدئت الحكايه هارون احمد شافع المالكي ابن أحمد شافع المالكي وصابره عبد الرحيم الجوهري
ابويا عاش محبوب ومات محبوب عاش عشان غيره وأول ما مات اللي عاش عشانهم نهشو عياله
صابره اسم على مسمى صبرت وصبرت ولما ارتاحت الدنيا اسكترت عليها الراحه ورجعت للصبر ومعاه العذاب
الضربه لما بتيجي من الغريب بتوجع بس لما تيجي من اقرب قريب بتكسر وهنا اتكسرت وبردوا اتجبرت
وحلفت وعاهدت ان حقي راجع راجع مهما طال الزمن
واخد نفي وبص لزاويه الاوضه شاف طيف امه بتفتح درعاتها ليه جري زي العيل تاني واترمى في حضنها
صابره: مالك يا ضنايا
هارون: تعباااان الدنيا كلت شربت من جسمي لا القريب رحمني ولا الغريب سابني في حالي
صابره: اصبر اصبر يا ابني داه بعد الصبر جبر
هارون: صبرت وصبرت كتيييييير اوووي والصبر طال لحد ما اشتكى مني
صابره: هااااانت يا ابن عمري
هارون: تعبت
صابره بصتله بلوم :مينفعش في امانه في رقبتك اوعي تضعف تضيع معاك زرعه عمري يا هارون
هارون :عارف وداه اللي ملجمني بس مش ساكتين شايفني وحش الناس كلها شيفاني وحش اوووي وقاسي
صابره: بكره لما يعرفو هيساعدوك بس اوعى والظلم يا ابني
هارون: عمري ما ظلمت ولا جيت على حد الا اللي ييجي عليا
صابره ابتسمتله: راجل من ضهر راجل قلبي وربي راضيين عليك يا ضنايا
فتح عينيه على رنة التليفون
هارون بهدوء: ايوه
وسكت ثواني يسمع
هارون: تمام ساعه زمن وأكون عندك
قفل المكالمه واتلفت حواليه يشوف امه راحت فين اكتشف انه نام مكانه وكل اللي شافه حلم حلم جميل يتمنى يرجع تاني
اتنهد وطلع بهدوء وكأن كل النار اللي جواه انطفت تماما وقفل الباب وخد الموتوسيكل بتاعه وراح لطريقه
يا ترى تار ايه....؟
وياترى ليه هنا بس اللي تعرف....؟
ويا ترى مين اللي كلم هارون.....؟
يتبع
إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
