رواية جديدة البلطجي لولاء حامد - الفصل 2 - الأربعاء 28/5/2025
قراءة رواية البلطجي كاملة
تنشر حصريًا على مدونة رواية وحكاية قبل أي منصة أخرى
رواية البلطجي
رواية جديدة قيد النشر
من قصص و روايات
الكاتبة ولاء حامد
الفصل الثاني
تم النشر يوم الأربعاء
28/5/2025
فيTriangle 3 R شركه يتضح علي أصحابها الثراء
في مكتب رئيس مجلس الإداره قاعد راجل كبير مش باين عليه السن
دخل شاب في أواخر العشرينات لابس بدله ونضاره طبيه
سراج: خير يا بابا حضرتك بعتلي
رفعت بحده: بابا دي في البيت انما هنا احنا في شغل
سراج اتنحنح وعدل نضارته الطبيه: تمام يا فندم حضرتك بعتلي
رفعت طلع ملف من الدرج وحطه قدامه
سراج بص على الملف بعنيه فقط: ايه داه
رفعت زق الملف عليه :داه ورق المناقصة الجديده مشروع ضخم يعد مشروع القرن عايزك تفصص الورق داه ورقه ورقه وتدرس السوق بالمملي وتعملي دراسه جدول محترمه عايز على اخر الاسبوع تكون جاهزه في إجتماع أعضاء مجلس الإدارة
سراج وهو بيبص في الورق بتدقيق وهز راسه: تمام هاشوف الورق داه الأول وبعد كده ابداء
رفعت معاك وقتك من هنا لآخر الأسبوع اجازه مفتوحه عايزه خطه كامله متكامله للمشروع بكل الاحتماليات والصعوبات والحلول المتاحه والغير متاحه
سراج: يعني خطه وخطه بديله تحسبا لكل ظروف السوق
رفعت :بالظبط مع ميزانيه كافيه تحت العجز والزياده وحصر لكل السيوله المتاحه وفي حالة احتياجنا لسيوله اضافيه ايه الحلول المطروحه البديله لسد العجز
سراج بتفكير: بس كده الوقت قصير انا ممكن احتاج معايا تيم كامل
رفعت بحده:لاء المشروع داه يعتبر سر لحد ما نطرحه قدام أعضاء مجلس الإداره غير كده ميطلعش برايا انا وانتا بس
سراج: بس عامل الوقت مهم وانا يادوب معايا اسبوع وداه يعد وقت مش كافي
رفعت: معاك اجازه مفتوحه اسبوع ومعاك كل الصلاحيات للإطلاع على السيوله والميزانية وكل اللي تحتاجه وكمل بفخر انتا دراعي اليمين وبجهزك خليفتي عشان تمسك الشركات انا مبأمنش لحد وانتا كمان اوعى تأمن لحد واوعى ورقه تعدي من تحت ايدك الا لما تقراها مره واتنين وعشره اوعي الغدر الغدر طعنه مبتجيش الا من اقرب ما ليك
سراج بعدم فهم: ليه حضرتك بتقول كده الشركه دي شركة العيله وكلنا شركاء فيها
رفعت :متشغلش بالك خليك بس في المشروع عايز كل تركيزه عليه وليه والباقي يخصني انا
سراج: حاضر يا فندم عن اذنك عشان يادوب ابداء اجهز واشوف الي ورايا
***********************
في داخل شركه MHM للمعمار شركة كبيره ليها اسمها واثبتت كفائتها غيةالسوق واصبح اسمها مسمع في مجال المعمار اجتماع اخر مصغر بين الشركاء الثلاثه
مالك: مشروع العاصمه الجديده داه ضربه العمر واللي هاياخده هايترفع لسابع سما داه للطبقه المخمليه يعني اقل وحده فيه هتتباع بملايين الملايين غير أن اسم الشركه اللي هتاخد المشروع هاتتنقل نقله تاني وكل أصحاب المعمار هايجرو وراها يعني بالمختصر اللي هايقدر يحط ايده في المشروع داه هايبقى كتب اسمه بحروف من دهب مترصعه بالالماظ في مجال المعمار
مصطفي بتكمله وتوضيح: ونسيت ان العاصمه الجديده هي المستقبل تعتبر القلب الجديد للبلد
المهندس: بس المشروع داه محتاج سيوله ماهوله هل السيوله المتاحه تكفي اننا نغامر وندخل المشروع داه
مالك: موضوع السيوله متشغلش بالك بيه
المهندس: ازاي مشغلش بالي احنا شركا ولازم كل كبيره وصغيره يكون معمول حسابها
مصطفي بتأكيد لكلام المهندس: فعلا يا مالك البشمهندس كلامه صح مينفعش نقول متشغلش بالك ولا حد يحتفظ بمعلومه لنفسه حتى لو كانت صغيره ما بالك بقى بمعلومه مهمه هايتبني على أساسها كل شغلنا اللي جاي
مالك بتفهم وتوضيح: بصوا بقى في تلات حلول الأول اننا نحسب السيوله لو كافيه يبقى تمام او ناخد قرض والوحدات دي بتتباع وهي اصلا لسه قيد التنفيذ او نشوف الشركات اللي داخله وندخله معاها شركا
مصطفي: كلام مقنع ولا انتا رائيك ايه يا بشمهندس
المهندس: مش مقنع للأسف
مالك :ليه بقى
المهندس بتوضيح: اولا مستحيل السيوله اللي معانا تكفي حتى لتنفيذ وحده او وحدتين حتى لو زي ما بتقول الوحدات بتتباع وهي قيد التنفيذ لأنك نسيت تغير سعر السوق ما بين الحديد والأسمنت والمعدات والعمال داه اول هام
تاني هام القروض كلها خراب من اولها لاخرها ومجازفه كبيره لأننا لسه منعرفش ولا عملنا حصر لكل احتياجاتنا يعني عامل زي اللي ماشي بيجري وسط بيت ضلمه وممكن يخلينا نخسر طل االي بنيناه في سنين لو لا قدر الله عجزنا ومقدرناش نسد
وتالت هام انك تشوف شركا منافسه وتدخل فأنت بتسلمهم رقابينا لان الأكيد لازم نندمج معاهم وداه في حد ذاته خطر لأنك متعرفش نواياهم ولو الشركه دي اكير مننا الأكيد هايكون ليها النصيب الاكبر ووقتها هانكون تحت رحمتهم ومنقدرش ناخد قرار إلا بموافقتهم يعني لازم نطاطي ليهم
مالك بإقتناع: كلامك مقنع جدا كده اتقعدت يعني ننسحب من المشروع ولا نعمل ايه
مصطفي: طيب ما احنا ممكن نشوف شركه في نفس المستوى وتكون النسب متساويه
المهندس: مشكلتك التسرع لو فرضاً زي ما بتقول كل واحد هايبقى عايز فريقه اللي ليه الاسبقيه يعني دخلنا في غرق المشروع
مصطفي: يعني ايه
المهندس: يعني المركب اللي ليها ريسين بتغرق
مصطفي بتهكم: طيب ما احنا تلاته شركا ليه مغرقناش
المهندس: لان ببساطه كل واحد مننا ماسك جزء وتخصص غير التاني انا ماسك التصاميم الهندسيه ومالك ماسك الشؤن الماليه والتخطيط وحضرتك ماسك الشؤن القانونيه والصفقات والاداره مشتركه بينا فهمت انما شركه تاني فيها كل دول عايزه يكون ليها الاسبقيه والاحقيه في كل دول
مالك بنفخه: طيب والحل احنا كل ما بنقولك حل بتقفله في وشنا
المهندس: لاني ببص لبعيد مش ببص تحت رجلي بشوف بعين السوق مش بعين المكسب بس
مصطفي: قصره يعني هانشوف المشروع ونشتغل عليه ولا نصرف نظر
المهندس بغموض: مين قالك نصرف نظر الأول عايز اعرف كل الشركات اللي دخله قصادنا في المشروع وحجمها والمشروعات اللي نفذتها سواء حكوميه او خاصه
مالك: اعتبر عندك ملف كامل بكل داه
المهندس: تاني حاجه عايز حصر لكل السيوله المتاحه بدون التأثير على المشروعات اللي شغالين عليها
مالك بهدوء: اعتبره برضو عندك
المهندس كمل بغموض: تالت حاجه عايز حصر لكل الشركات اللي شغالين معاهم واللي نثق فيهم
مصطفي: سهله كل داه سهل بس فهمني دماغك فيها إيه
المهندس: لما استلم كل الملفات دي اقدر بعدها بس اقولك اللي في دماغي وبص لمالك: الملفات دي تحتاج كام يوم منك
مالك بتفكير: كل حاجه موجوده على سيستم الشركه يعني ممكن يومين مش اكتر
المهندس: يبقى كمان اربع أيام اقدر أبلغكم بكل التفاصيل اللي تضمنلنا المشروع بمنتهي السهوله
مصطفي : يا ابني انا لسه قايل لمالك قدامك مينفعش حد يخبي معلومه لو صغيره ايه اللي في كلامي مش مفهوم احنا في مركب واحده مش منافسين لبعض
المهندس بهدوء: بص يا مصطفي دي مش معلومات دي خطه لازم ادرسها قبل ما اطرحها لان بمجرد ما اقولها وتقتنعو بيها هنبدأ التنفيذ على طول لأننا هانكون بنسابق الزمن
مالك بقوه: يا بشمهندس انا واثق اننا هانقتنع انا قولتهالك زمان وهقولهالك دلوقتي
المهندس كش حواجبه بعدم فهم ومحاولة انه يفتكر
مالك:انتا دماغك دي حتة الماظ ومن بختنا انك بقيت معانا
المهندس ابتسم بحب للذكرى القديمه وهز رأسه يبقى ميعادنا كمان اربع أيام ان شاء الله المهم كل اللي طلبته يكون عندي خلال يومين مش اكتر
مالك: متشغلش بالك من دلوقتي انا هابداء ولو جهزتهم قبل يومين هابلغك
المهندس: تمام يبقى على بركة الله
خلص الاجتماع وكل واحد من الشركاء الثلاثه بداء يجهز نفسه
************************
هارون رجع اخر الليل بيته الكل كان نايم الا هنا
هنا بلهفه: ايه يا هارون كنت فين لحد دلوقتي من ساعة ما طلعت الضهر وخدت في وشك زي القطر ومحدش عارف اراضيك فين
هارون اترمى على الكنبه بتعب :ولا حاجه كنت مخنوق اوووي يا هنا وحسيت ان صدري طبق عليا
هنا بخضه: اسم الله عليك شا الله العدوين
هارون: متخافيش عليا انا جبل والجبل راسي في الارض محدش يقدر يهزه
هنا :بس ممكن يتهد يا ابن ابويا
هارون بجبروت: حتى دي لو حصلت بياخد في وشه الأخضر واليابس متخافيش يا هنا اطمني وطمني قلبك قلبي بيقولي انها هانت وقربت معرفش ليه
هنا بخوف: هارون في ايه انتا مخبي عليا ايه
هارون بهدوء: صدقني يا هنا والله ما مخبي عليكي حاجه ولو فيه حاجه انتي اول واحده هتعرفي لأنك شريكتي واكتر واحده قاسمتني الظلم والوجع
هنا: يارب برد نارنا اللي قايده ليها سنين
هارون بغموض: هااانت
هنا بصتله بترقب وسكتت هي ادرى الناس بأخوها وعارفه انه مش هاينطق مهما ان عملت مادام مش عايز يقول بس دعت بقلبها ان حقهم يرجع ويحفظ اخوها من كل شر ومن كل كيد
هنا :طيب يلا ادخل افرد جسمك ولا اغرفلك تاكل بقمه تلاقيك على لحم بطنك من الصبح
هارون برفض: ماليش نفس وانا جاي كلت لقمه وبص على اوض أخواته هما لسه مقموصين
هنا :سيبك منهم بكره مسيرهم يعرفو مهو المستخبي مش هايفضل متداري طول العمر
هارون بتنهيده وجع: سبيها على الله كل وقت وله ادان ولسه مأنش الأوان يعرفو
وسابها ودخل اوضته وهي دخلت والأفكار كانت زي الطاحونه بتطحن في عقل الاتنين
مرت الأيام وجنا وحسام واخدين جمب من هارون
وفي صباح يوم جديد حضرت هنا الفطار وحت جنا وحسام يفطرو وهارون صحي بدري وقعد جنا وحسام بصو لبعض وقامو
هنا بحده: رايحين فين
حسام بدون ما يبص لهارون داخل اوضتي نفي اتسدت وورايا مذاكره
هنا بحده: من أمته منتا من شويه كنت ميت من الجوع
هارون بتهكم: من ساعه ما جيت اقاسمهم اللقمه
حسام: ايوه بسببك زي ما كل الناس بطلت تتعامل معانا بسببك كمل بقهر كل اصحابي قاطعوني بسببك الناس بقت بتخاف تتكلم قدامي بسببك وبسبب عمايلك
هارون بوجع متداري بص لجنا وانتي كمان اتسببتلك في ايه
جنا بعصبيه: اتسببتلي في فضيحه ان كل الناس متعرفش غير اني اخت هارون هارون البلطجي اللي واخدها فرده وبالدراع
اصحابي مبقوش يرضو يقفو معايا يببصولي بإستحقار مهو مين اللي هايصاحب واحده اخوها بلطجي ويا عالم ممكن يكون سوابق ومحدش يعرف
هنا بعصبيه ضربت جنا بالقلم :مادام شيفانا مش قد مقام جنابك العالي فارقينا انتي واخوكي ووريني هاتعملو ايه لما الدنيا تنهش لحمكم وتدق عضمكم وكملت بإنهيار تعرفو ايه عننا تعرفو شوفنا ايه عشان حضراتكم تعيشو تعرفو جرالنا ايه لا طبعا البهوات اتولدو وفي بوقهم معلقه دهب طلباتهم مجابه مجربتوش نومه البلاط مجربتوش قرصه الجوع وربطه الحزام على بطنكم مجربوش الظلم
جنا وحسام بصو لبعض
حسام بتشتت: قصدك إيه ياريت نخلي الكلام على المكشوف
هنا بعصبيه وجنون :حاااضر بس كده بس بعدها تنسو ان ليكم اخت اسمها هنا ولا اخ اسمه هارون
جنا وحسام بصو لبعض واستغربو من انهيار هنا بالشكل داه
قعد حسام وجمبه جنا هنا بدموع
قبل ما تنطق هارون بصوت حاد: هنا بس كفايه خلاص
هنا بدموع: لحد أمته قولي لحد أمته كل واحد منهم عمال ينهش فيا وفيك
هارون بنفس الحده: لحد ما انا اقولك خلاص وانا بنفسي اللي هاقولهم
حسام :يعني ايه عمالين تشوطونا لبعض زي الكوره
جنى بزعيق وصوت عالي :لحد أمته هانفضل عايشين في اللغاز
هارون: متقلقيش يا بنت صابره وكمل بقسوه وتهكم شكلها هانت وهانت اووووي كمان ووقتها كل المستخبي هايبقى على عينك يا تاجر بس يارب وقتها الاقيكم بنفس وضعكم وسابهم وطلع
هنا اترمت على الكنبه حطت رأسها بين ايديها ودموعها نزلت زي الشلال
حسام بص لجنا قربو من هنا
حسام بتبرير:يا هنا انا عارف انك زعلانه مني بس انا زعلان منه انتي متعرفيش احنا بنسمع ايه ولا الناس بتعاملنا ازاي
هنا بإنهيار: الناس ملعون ابو الناس سمعتو كام كلمه مشوفتوش اللي احنا شوفناه معشتوش اللي احنا عشناه انا وهارون اللي دفعنا التمن عشان انتو تعيشو احنا دفعنا من عمرنا اللي بتنكروه دلوقتي يا خساره والف خساره
جنا بدموع من حاله هنا: يا هنا طيب فهمينا متسيبيناش على عمانا
هنا بسخريه رغم دموعها اللي مغرقه وشها: الكلام عند هارون بس افتكرو ان هارون البلطجي اللي مش عاجبكم حاطط روحه على كفه عشانكم حاطط روحه تحت رجليكم عشان يحميكم هارون بقى بلطجي عشانكم عشان احنا الثلاثه وشاروت على نفسها وعليهم نقطة ضعفه وهو لازم يبقى قوي وقوي قوي كمان
وسابتهم في حيرتهم ودخلت اوصتها وقفلت الباب عليها ودموعها نازله زي المطر في عز نوة شتا
حسام وجنا قاعدين يبصو لبعض ويحاولو يحلو الالغاز اللي سمعوها ومش عارفين يربطو الكلام ببعض
جنا: وبعدين يا حسام هانفضل كده زي الأطرش في الزفه
حسام بشرود: مش عارف يا جنا بس قلبي بيقولي ان في حاجه وحاجه كبيره اوي خلينا نصبر ونشوف فيه ايه اصل الحوار كله مع هنا وهارون وانتي عارفه يعني ايه هنا وهارون هنا ضل لهارون وهارون درع لهنا والأثنين سر لبعض ومادام منع الكلام محدش هايقدر يعرف منهم كلمه الا لما يقرر هارون خلينا نهدي الجو اليومين دول ونشوف اللي جاي فيه إيه
جنا بإقتناع ماشي خليني ماشيه وراك لما نشوف اخرتها
***********************
في اجتماع أعضاء مجلس الإداره اللي بيتولاه رفعت قعد على كرسيه وحواليه أعضاء المجلس اللي في الأساس أخواته
واولادهم
رفعت بغرور: انا طلبت الاجتماع داه لان مستقبل الشركه هايكون في حته تانيه
رأفت بنفي غرور اخوه: بدون مقدمات ياريت تدخل في صلب الموضوع
رفعت بصله بحده وبص لابنه يشرح الخطه
بداء سراج يشغل شاشه العرض ويشرح كل خطوات المشروع وبعد اكتر من ساعتين شرح مفصل لكل تفصيله ابتداء من فكره المشروع للميزانيه للتسويق للخطه البديله لكل الاحتمالات
رفعت ابتسم بفخر لابنه
رأفت :وليه المجازفه مش شايف انك بتجازف بالقوي قوي كمان
رفعت: ليه شايفها مجازفه العاصمه الجديده استثمار مضمون
رأفت :معاك بس السيوله المطلوبه ضخمه حتى لو سحبنا كل السيوله المتاحه في البنوك مش هانقدر نسد ولو ربع تكلفه المشروع
رفعت: اظن سراج شرح كل المطلوب وكل الشركات الكبيره بتاخد قروض
رأفت: وايه اللي يجبرني اني اجازف بالاصول مادام شغلنا ماشي كويس ليه الطمع
رفعت بسخريه: الطمع فضيله لو مطمعتش مش هاتعيش
رافت: لسه مشبعتش
رفعت بجشع: حد يقول للفلوس والخير لاء
مهدي ابن رأفت: طيب يا اونكل حضرتك مش خايف من احتماليه الخساره حتى لو بنسبه قليله بس هاتفضل موجوده
رفعت: طبعا موجود ومعمول حسابها ولو كنتو ركزتو كنت هاتعرف ان فيه دراسه جدول شامله في حاله الخساره وجدوله الديون وازي نقدر نسددها وازاي نقدر نطلع منها
رأفت: وانا رافض ومش هجازف
رفعت: رافض لمجرد الرفض ولا عند
رأفت: احسبها زي ما تحسبها مشروع زي داه ضخم محتاج عماله ماهوله ومعدات حديثه وإمكانيات جباره وعندك شركات حيتان في السوق وداه مش مشروع هين لا داه مشروع القرن يعني اللعب هنا مع الحكومه والغلطه بفوره
رفعت بعصبيه: واظن كل داه معمول حسابه وبما اني رئيس مجلس الإداره انا موافق
رأفت بتحدي وعند: وانا رافض ومتنساش ان نسبنا متساويه يعني حق اتخاذ القرار مش ليك لوحدك
رفعت بص لاخته:وانتي قولك ايه قرارك اللي هايحدد
رقيه: الفكره حلوه والمشروع مغري مفيش كلام والأرباح تخض وعلى حسب ما سمعت بتركيز وبصت ل رأفت كتأكيد لكلامها ان معمول حساب كل صغيره وكبيره
رفعت: معنى كده انك موافقه
رقيه :موافقه وقبل ما تتحدو بعض لازم تعرفو اننا أضلاع مثلث واحد مينفعش نعادي بعض لازم نقف في ضهر بعض مش في وش بعض اجنا بنكمل بعض وبصت ل رأفت المشروع كبير واللي هايقدر ياخد حتى لو مبني واحد منه هايبقى اسمه في العالي فكر بعقلك زا ما طول عمرك بتعمل
رأفت مسح على وشه بكف ايده بعنف نفخ بغضب: تمام سبيوني كان يوم ادرس الموضوع لاني مش هاجازف بكل اللي أملكه
رفعت بعصبيه: يعني ايه احنا في سباق مع الوقت
رقيه بحكمه: حقه يا رفعت شوف الإجراءات وإبداء لحد ما رأفت يقول قراره وبصت ل رأفت بتأكيد: اللي واثقه انه هايكون الموافقه
وانتهي الاجتماع المدمر لاعصاب الاخوه والأبناء
يا تري مين دول ....؟
ومين دول كمان...؟
يا ترى ايه السر اللي بين هارون وهنا....؟
يتبع
إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
