رواية جديدة البلطجي لولاء حامد - الفصل 5 - الأربعاء 28/5/2025
قراءة رواية البلطجي كاملة
تنشر حصريًا على مدونة رواية وحكاية قبل أي منصة أخرى
رواية البلطجي
رواية جديدة قيد النشر
من قصص و روايات
الكاتبة ولاء حامد
الفصل الخامس
تم النشر يوم الأربعاء
28/5/2025
أيام وظهرت نتيجه المناقصه ورسيت على شركه MHM للمعمار
رأفت عرف الخبر من بدري لانه كان مكلف ناس تتابع الموضوع
ووصله خبر قبل ما يوصل لرفعت خد عربيته وساق بجنون
واتصل برقيه
رأفت بعصبيه: ايوه يا رقيه ربع ساعه والاقيكي عند رفعت انا خلاص قربت اوصل سلام
ومستناش يسمع اي كلمه تاني
وصل وكانت رقيه ورفعت مستنيينه والأثنين محدش عارف رأفت عايزهم في إيه
رأفت دخل زي الإعصار بزعابيب امشير وبصوت عالي جمع كل اللي في الفيلا حواليه ويصادف وجود اولاد رقيه وابن رأفت مع سراج في نفس الوقت : المناقصه اللي خليتنا سيبنا حالنا كله علشانها رسيت على الشركه المنافسه
رفعت اتهبد على الكرسي: انتا بتقول ايه احنا مقدمين افضل مشروع وأفضل سعر وعندنا الإمكانيات الكافيه ازاي داه حصل
رأفت: كله من طمعك عماك فضلت اقولك بلاش بلاش خلينا نمشي زي الناس وانتا ابدا لازم ولابد نلعب زي اللي بيلعبوا اشرب بقى يا بيه ادي عشره مليون راحو الأرض
رفعت بتبرير: اكيد وصلو لحد أعلى ودفعو اكتر بس ازاي انا هاتجنن
رأفت: ولا دفعوا قرش واحد قدمو مشروع اكتسح بجداره حتى الشركات اللي خدتها بدون تعب مقدموش مشروع زيه وتم تقرير انه يكون الوجهه الايقونيه للعاصمه الجديده
رفعت بجنون :انتا بتقول ايه عارف معنى داه ايه معناه انهم في بسبب المشروع داه بقوا رقم واحد في سوق المعمار والكل هايجري عليهم
رأفت: لسه زي ما انتا الطمع عمى قلبك وعنيك
رفعت: قصدك إيه اعقل كلامك وبلاش تهلفط
رفعت: اهلفط بجد انتا طماع طمااااااع يا رفعت عايز تاخد الدنيا كلها ليك لوحدك
رفعت بإسلوب منافي للطبقه اللي عايش وسطها ةنسي حتى وجود الكل حواليه: الطمع فضيله لولا الطمع مكناش وصلنا للي بقينا فيه
رأفت: قصدك لولا الطمع عمى قلبك وعنيك مكنتش هاتكون رفعت بيه المالكي كان زمانك لسه رفعت الغلبان اللي عايش يوم بيومه
رفعت بجبروت :بتعايب عليا في ايه كلنا في الهوا سوا والدنيا عايزه اللي يكبش منها على قد ما يقدر
رأفت: وكبشت وعشت بس على حساب مين بص لرقيه على حساب اخوك اخوك اللي فضلنا كلنا على نفسه وياريت كنا نستحق انتا ايه يا اخي ضميرك مبيوجعكش
رفعت بشر : الضمير داه كلمه تافهه ملهاش معنى وسط رجال الأعمال والبيزنس لما بيوجعني قرصين مهدئ بينام تاني داه حقي
رأفت بوجع وتهكم: كدبتو الكدبه وصدقتوها بس انا لاء انا بتكوي بيها من سنين
رقيه: خلاص يا رأفت كدبه ايه بس وبتفتح في اللي فات ليه
رأفت: كدبه انه حقكم وهو حق أحمد وعياله احمد اللي كسر عمره وشبابه علشانا احمد اللي سرقتو ورث عياله وشردتوهم في الشوارع بعد ما ذليتوهم
وبص لرفعت :مفكرتش مره اولاد اخوك فين عايشين ولا ميتين
رفعت بسخريه وكأن الأمر لا يعنيه: عايشين واللي بتدور عليه بقى بلطجي قد الدنيا
رأفت بحزن وبص لرفعت: من عمايل ايدك وصرخ بجنون من عمايل ايدينا كان ممكن يكون احسن الناس كان ممكن يكون فوق الناس بس انتا لاء ازاي مبتحبش حد يكون احسن منك طمعت في اخوك طول ماهو عايش وطمعت في ماله بعد ما مات وبص لدودي وطمعت في مراته ولما معرفتش تطولها ذليتها انتا ومراتك لحد ما فضحتوها ورميتوها انصاص الليالي ف الشوارع لكلاب السكك تنهش فيهم وكمل بصدمه معنى كده انك طول السنين اللي فاتت دي كنت تعرف هما فين ومخبي علينا وكمل بجنون ليييه عايز اعرف لييه انتا ملتك إيه وكمل بهم: هما فين
رفعت: صدقني مش هاقولك ومش هاسمح ليهم انهم ياخدو جنيه من تعبي وشقايا طول السنين اللي فاتت دي كلها
رأفت بصدمه: بس سمحت لنفسك تاخد فلوسهم عادي يتبهدلو عادي انتا ايه جبروووت شيطان
سراج ومهدي وعادل وعاصم بصو لبعض بصدمه وكان اول من فاق هو مهدي
بهدي بعدم تصديق: بابا حضرتك بتقول ايه وأخ مين داه اللي بتتكلمو عنه
رفعت بص حواليه بصدمه وكأنه يادوب استوعب ان كل عيلته حواليه
رأفت بخزي ميل رأسه في الأرض
رفعت رفع رأسه بجبروت :مفيش حاجه حوار ميخصكمش اتفضلو روحو على الشركه واحنا هانحصلكم
سراج برفض لأول مره :لاء يا بابا محدش مننا هايتحرك الا لما نفهم الحقيقه والحكايه كلها
رفعت بزعيق: من أمته وانتا بتقولي لاء يا ولد
سراج :من وقت ما سمعت اللي سمعته يبقى لاء والف لاء كمان
محدش مننا هايتحرك من هنا إلا لما نعرف الحقيقه سواء منكم او من غيركم
رفعت رفع رأسه بصدمه: قصدك إيه
سراج بحده: يعني مشوار لحد السجل المدني وقيد عائلي اعرف تاريخ العيله المشرف بكل أرقام البطايق ومن خلاله اقدر اعرف مكانهم فين فا الأفضل نعرف منكم مش من غيركم
رفعت بوجع السنين اللي فاتت انا هاحكيلكم كل حاجه
فلاش باك
بعد ما خلص عزاء شافع المالكي الكل سحب ايده من عياله
رقيه بحزن طفولي: هو خلاص كده يا احمد معدش هايبقى عندنا بابا تاني
احمد بحزن وهو بيضمها لحضنه: انا مكان بابا يا قلب بابا ووعد وعهد عليا يا رقيه ليكم كلكم انتوا في الدنيا قبل مني
رفعت :احمد انا جعان
احمد بحزن على حال اخواته: خليك جمب اخواتك يا رفعت انتا الكبير من بعدي هانزل اجيب الأكل واجي ماشي
رفعت هز رأسه
احمد قفل عليهم الباب بالمفتاح ونزل عد الفلوس اللي معاه لقبهم قليلين اوووي طلع وجاب كام رغيف عيش وفول وجبه قريش ورجع البيت دخل المطبخ عمل الفول وحط العيش وقطع طماطم وحط الجبنه وقعد مع أخواته وخد رقيه جمبه وكان بيوكلهم قبل منه
تاني يوم لبس احمد وقبل ما ينزل
رافت: انتا رايح فين يا احمد
احمد نزل لمستواه :نازل اشوف معاش ابوك واشوف شغل علشان اجيبلك كل اللي نفسك فيه وتتعلم وتبقى حاجه كبيره انتا واخواتك
رأفت: هز رأسه وسكت وهو مش فاهم غير أن اخوه نازل يجيب ليهم الأكل
احمد :خليكم شاطرين واوعو تعملو شقاوه ماشي ولا تقرب من البوتجاز انا انا عملتلكم الاكل وقفلت الانبوبن ولا تخلي حد يقرب من الشباك ولا يلعب في الكهربا ماشي انا عامل حسابي ان انتا واخوك في غيابي رجاله البيت ماشي يا بطل
رأفت فرح اوي بالكلمه: ماشي ماشي متخافش انا راجل
احمد واحلي راجل
واستودعهم ربنا ونزل أيام بيجري على معاش ابوه وبيشتغل اي حاجه تقابله علشان يبقى معاه فلوس يكفي البيت
وخلص المعاش
عم رمضان صاحب شافعي: ازيك ياض يا احمد
احمد بود واحترام: الله يسلمك يا عم رمضان بخير نحمد الله على كل حال
رمضان بتبرير : عارف يا ابني اني قصرت بعد وفاة المرحوم بس والله يا ابني الدنيا تلاهي
احمد بتقدير: الله يعينك يا عم رمضان كل واحد فيه اللي مكفيه والله يعينك على شيلتك سؤالك بالدنيا ومافيها
رمضان بإستفسار: بتعمل ايه هنا
احمد بتنهيده حزن: والله بقالي مده اهو بحاول اخلص ورق المعاش بتاع ابويا الله يرحمه
رمضان: اخص عليك طيب ومجتش ليه لحد مننا منتا عارف يا ابني ان حبايب ابوك كتير والف من يتمنى يخدمك
احمد: تشكر يا عم رمضان خلاص انا الحمد لله خلصت الورق اهو
رمضان: الله يعينك يا ابني على شيلتك بكره اخواتك يكبرو ويشيلو عنك شويه
احمد برفض: اخواتي لحد ما يخلصو تعليم في رقبتي انا بعد ربنا ليهم
رمضان: يا ابني المعاش مش هايكفي ودول مشوارهم هم ما يتلم
احمد بإصرار: لو هاقطع من جسمي مش هتاخر بس اخواتي هايكونو احسن الناس
رمضان طبط على كتفه أصيل يا ابني ابن اصول صحيح اللي خلف مماتش
رمضان بتفكير :بقولك إيه انتا مش مخلص علام
احمد بحزن: خدت الثانوية العامة وتعب المرحوم ملحقتش اقدم كليه
رمضان :حلو بردو طيب بص بقى يا ابني انتا بكره تجيلي وتقبلي معاك صوره الشهاده بتاعتك وصوره شهاده وفاه ابوك وبطاقته وطابع بوسطه وانا هاتصرف
احمد :هاتعمل ايه يعني فهمني متسبنيش على عمايا
رمضان: ابوك الله يرحمه مات وهو في الخدمه يعني انتا ينفع تشتغل مكانه أبناء عاملين
احمد بفرحه: بجد يا عم رمضان
رمضان بهزة راس وابتسامه بشوشه: صحيح يا ابو حميد يلا بكره هستناك
احمد بفرحه: من النجمه
وعدت أيام واحمد استلم الشغل وطول النهار في الشغل واخر النهار في البيت
احمد : مالك يا رقيه زعلانه ليه
رقيه: عشان العيد قرب والفستان بتاعي وحش وانتا مرضتش تجيب ليا الفستان اللي عجبني
احمد بحزن: والله يا روقا غصب عني لو بإيدي اجيبلك الدنيا كلها
رقيه بدموع: ماليش دعوه انتا جبت لرفعت ورأفت لبس حلو
احمد :والله فستانك جميل
رقيه: ماليش دعوه لو بابا كان موجود كان جابلي اللي انا عايزاه
احمد بكسره: وانا قصرت معاكي في ايه بس
رقيه سابته ومشيت
احمد طلع وهو حزين وفضل يمشي في الشوارع ورجع اخر الليل وفي ايده كيس وبص لرقيه بحب صادق
وفتح ليها درعاته
رقيه فضلت واقفه بصاله بزعل
احمد ابتسم وفتح الكيس وطلع الفستان
رقيه جريت بلهفه ومسكت الفستان وضمت الفستان احمد ضمها لحضنه وهي حاضنه الفستان بلهفه
رفعت بمكر: مادام انتا معاك الفلوس ليه قولتلها ممعاكش كنت جبتهولها بدل ما هي قعدت تعيط اليوم بطوله
احمد ابتسم بحزن: انا جبته قسط وهاسدده من مرتبي كل شهر
رفعت: يعني هيتاخد من الفلوس اللي بناكل ونشرب بيها
احمد: لاء يا حبيبي متخافش اللي عايزه هايكون عندك
ومرت سنين وسنين خدت سنين واحمد مسخر كل جهده وماله لاخواته اتخرج رفعت من كليه التربيه واشتغل مدرس ورأفت اتخرج من كليه التجاره واشتغل محاسب في شركه المياه ورقيه في كليه حقوق
رفعت : بقولك ايه يا احمد انا عايز اتجوز
احمد بفرحه: داه يوم المنى
رفعت: طيب مهو الجواز يعني شقه يعني مهر يعني شبكه والذي منه
احمد متشلش هم من يوم ما اشتغلت وانا كل شهر كنت بقسم معاش ابوكم بينكم بشرع ربنا وشايل لكل واحد منكم فلوسه على جمب فمتخافش وبيني وبينك كنت بدكن قرشين من المرتب من وقت للتاني واعمل جميعه واشتريت الشقتين اللي فوق واحده ليك وواحده لرأفت يعني تختار العروسه وانتا قلبك جامد اخوك في ضهرك ياض
رفعت بخوف وقلق:بص هو بصراحه فيه بس يعني
احمد: بس إيه قول يا حبيب اخوك
رفعت:هي مدرسه معايا في المدرسه بس على قدهم شويتين
احمد بإبتسامه: طيب وايه المشكله انتا ليه محسسني اننا اولاد ذوات مولودين وفي بوقنا معلقه دهب يا حبيبي المهم البت واخلاقها وتربيتها فقير من غني بتاع ربنا احنا كمان يا حبيبي عايشينها بستر ربنا
رأفت بعدم رضي: البيه مكسوف يقولك ان ابوها شغال صبي فران
رفعت بحده وصوت عالي :وإيه يعني كان حرامي ولا نصاب
رأفت بعلو صوت :لاء يا معلم الاجيال مش لاقيين ياكلو وعامله نفسها لمونه في بلد قرفانه
احمد بحسم: في ايه منك ليه محدش عامل اعتبار لوجودي واقفين تناطحو بعض وبص لرأفت: ماله الفران لا هو حرامي ولا بيأكل اهل بيته مال حرام راجل تعب وشقر هشان يربي عياله في زمن ما يعلم بيه الا ربنا شايفها تنكه او مغروره
رأفت: بصراحه اه دي لا تطاق
احمد بحكمه: متخليش حكمك سطحي في ناس مبتحبش تختلط بغيرها خوف
رفعت ورافت بصوله بإستغراب
احمد هز رأسه بتأكيد ايوه خايفه تقول كلمه حد ياخدها عليها خايفه حد يقولها كلمه توجعها مش عايزه حد يعرف بفقرها يا ابني
ربنا سبحانه وتعالى قال في سوره البقره إيه
بسم الله الرحمن الرحيم
: ﴿لِلْفُقَرَاءِ الَّذِينَ أُحْصِرُوا فِي سَبِيلِ اللَّهِ لَا يَسْتَطِيعُونَ ضَرْبًا فِي الْأَرْضِ يَحْسَبُهُمُ الْجَاهِلُ أَغْنِيَاءَ مِنَ التَّعَفُّفِ تَعْرِفُهُمْ بِسِيمَاهُمْ لَا يَسْأَلُونَ النَّاسَ إِلْحَافًا﴾
انتا ممكن تشوف حاجه وهي جواها حاجه تانيه خالص متحكمش الا لما تعاشرها
رفعت ورافت بصو لبعض وسكتو ورقيه سقفت: الله عليم يا كبير والله المفروض كنت تطلع معيد في الجامعه
احمد بإبتسامه: كفايه عليا انتو بالدنيا وما فيها
رأفت: وانتا بقى مش نازي تتجوز وتستقر
رقيه: ويسيبنا لوحدنا
احمد بطيبه: مش وقته يا رأفت انا وعد وعهد خدته على نفسي وشاهد عليه ربنا انتو الأول لما اطمن عليكم الأول وبعدين يحلها الحلال لو كان في العمر بقيه
رأفت: طولة العمر ليك يارب
مرت الأيام ورفعت اتجوز واحمد شال كل مسؤليه جوازه
وبعدها خطب رأفت دلال واتجوز
احمد بحب لرقيه : والله والبيت فضي عليا وعليكي يا رقيه وبكره ييجي اللي ياخدك وأفضل بطولي
رفعت خلف سراج احمد بفرحه غير طبيعيه كأنه ابن ابنه مش ابن اخوه
ودلال حامل
رجع احمد من الشغل ولأول مره من سنين يشوف أخواته بيضربوا بعض
احمد شد كل واحد منهم من دراع وزقه بعيد عن التاني
احمد بعصبيه وزعيق غير عادته: في ايه منك ليك واقفين تقكعو في بعض
رأفت وهو بيمسح الدم اللي على بقه بكم قميصه: اسأل البيه ومراته اللي مش جايبينها لبر
احمد بعصبيه: ولا كلمه احنا على السلم قدامي يا بيه منك ليه على الشقه
وبص لدريه اللي شايله ابنها على ايدها ودلال اللي حامل وبطنها قدامها: كل واحده منكم تلزم شقتها يالا بصو الاتنين لازواجهم
احمد بعصبيه: مسمعتوش قولت ايه :يلا منك ليها والا اقسم بالله ما هايحصل طيب انهارده لما اشوف ايه اللي حصل واللي واثق منه انكم وراه من يوم ما دخلتو البيت داه وكل يوم خناقه ومشكله وانا مكبر دماغي واقول مشاكل عاديه انما توصل انكم تخلو الأخوات يقفو لبعض ويمدو ايدهم على بعض مش هاسكت يلا
شاور رفعت برأسه لدريه طلعت شقتها ودلال دخلت شقتها
احمد دخل البيت ووراه أخواته ورقيه اللي كانت واقفه بتحاول تسلكم بس فشلت
احمد في ايه يا بيه منك ليه ايه اللي حصل كل يوم خناقه وكل يوم مشكله وختمت تضربو بعض بالشكل داه
رأفت بعصبيه: اول لما اخوك قال يا جواز انتا قولت الشقه اللي في الدور التاني ليه واللي في التالت ليا صح
احمد : كمل من غير مقدمات
رأفت: حاضر رفعت مراته أصروا ياخدو الشقه اللي في التالت وانا متكلمتش بس من يوم ما اتجوزت مراته كل يوم خناقه كل ما تشوف دلال جايبه حاجه تلقح عليها كل ما تلاقيها ناشره تكب ميه حتى لو طلعت تهوي فرش الشقه يا مؤمن تكب عليه ميه وختمت انهارده كبت على هدوم شغلي وبيتي كلور هدومي كلها باظت يا احمد وياريت على كده انتا عامل مصطبه بين كل دور ودور في المنور كل يوم ترمي فيها زباله لما بتقلب بحشرات بضطر اطلع المها غير الريحه اجارك الله منها ايه اخي
احمد بص لرفعت: ايه قولك زي ما سمعت منه هاسمع منك
رفعت :يا احمد مش زي ما هو بيقول هي كانت بتمسح وكبت الميه من غير ما تشوف
احمد: والزباله اللي في المنور
رفعت بتبرير كاذب: والله يا احمد ما قصدها ممكن تكون بتطبخ وترمي الحاجه من الشباك من غير قصد والبيه ومراته فسروها على مزاجه
احمد بحده: كل يوم من غير قصد
رفعت: انتا صدقته.
احمد: انا لا صدقت ولا كدبت انا بسمع وزي ما سمعت منه بسمع منك والحكم في الاخر داه لعقلي انا وبس
بص يا رفعت انتوا مش اخواتي انتو ولادي زرعه عمري اللي رويتها بسنين عمري اللي راحت وشبابي اللي ضاع مش هاسمح لجنس مخلوق يفرقكم مهما ان كان اللي فوق دول ييجي ماكنهم واحده واتنين وتلاته وأربعه انما اخوك محدش هايعرف يرجعهولك عايزكم دايما في ضهر بعض سند وقوه عكاز وقت الضعف
رأفت: والحل يا احمد دي مبقتش عيشه
احمد بحكمه: شبابيك المنور انا هاركب عليها حديد بسلك واقفل الباب داه خالص اما البلكونه انا هاجيب ليك تاندا تغطيها وتعمل تحتها ما بدالك وبصلهم بحده متخلوش حد يفرقكم انتوا اخوات نفس الضهر ونفس البطن
رأفت: يا احمد انا عايز اعيش وكافي خيري شري مش عايز كل يوم حوار ومشكله ورفعت اتعود على الانانيه مش عايز حد لا هو ولا مراته احسن منه
رفعت : انا يا رأفت
رأفت: ايوه من يومك وانتا ورقيه عايزين كل حاجه ليكم حد منكم فكر في غير نفسه افكرك يوم ما جزمتك يا دوب اتقطع قطع صغير اتقمصت زي العيل واخوك استخسر في نفسه الجزمه وراح اشترالك الجزمه مع ان جزمته كانت مهريه بس اختارت نفسك على حساب اخوك ورقيه لما كانت الظروف طين قعدت يوم تعيط على فستان وخلته زنق نفسه عشان يفرحها وأول ما بصت بصت على الفستان بدل ما تحضن اخوها حضنت الفستان حتى انتا نفسك لما قالك جبته بالقسط قولتله هتاخده من الفلوس اللي بناكل ونشرب منها محدش فكر فيه وانه هايدفع الأقساط ازاي كان بيمشي للشغل لما رجليه تورم كل واحد فكر في نفسه وبس
رفعت: كنا عيال صغيرين مش فاهمين الدنيا
رأفت: ولما فهمتها عملت إيه زودت النار بنزين ووقفت تتفرج انا بقولهالكم اهو انا عايز اعيش في سلام وكافي خيري شري
احمد بص لرفعت :متقلقش يا رأفت اطلع شقتك ومن بكره كل حاجه هاتتحط في نصابها الصح
رأفت استأذن منهم ومشي
احمد بص لرفعت بحده: وبعدين آخرة اللي بيحصل داه كله ايه
رفعت :يا احمد والله مافي حاجه من اللي في دماغك انتا واخوك دريه أطيب خلق الله هو اللي كل تصرف ياخده بمليون طريقه
احمد بتعقل :يا رفعت انا لما اخوك اتكلم عليها باسلوب مش كويس قبل ما نتقدملها رديت عليه انه ميحكمش بظواهر الأمور بس لما روحت بيتهم وشوفت الكبر والتعالي استغربت وقولت جايز تكونو بتحاول تحسس نفسها انها انسانه مستقله بعيد عن الفقر طلباتها المبالغ فيها وجهازها اللي واثق انه من جيبك لما كنت كل يوم والتاني تطلب مني فلوس قولت يا واد وماله خليه يفرح واهو كله جاي بيته انما توصل انها تفرق البيت مش هاسمح بيه التنازل أوله خطوه والباقي بيكر لوحده مستحيل تقدر توقفه الا اذا قطعت اللي فات وعقدت اللي جاي مش عيب تحب مراتك مش عيب تحترمها داه ربنا كرمها انا مش بقولك لا سمح الله اتخانق معاها بقولك بالعقل حل بالعقل وناقش بالعقل خليك مسؤل عن كلمتك فكر في ابنك هاتربيه ازاي يحب الناس ولا يكرهم هاتربيه يفكر بالعقل ولا يصدر الشر فهمت
رفعت بإصطناع الاقتناع: عندك حق ومعلش حقك عليا
احمد قعد جمبه وطبط على كتفه: ما فيش بينا حقوق
انتا ابني البكري مش اخويا
يا ترى الماضي مخبي ايه ...؟
يا ترى ايه اللي حصل وخلى رفعت يكره اخوه.....؟
يا ترى مصير العيله إيه... ؟
يا ترى مين ظالم ومين مظلوم....؟
يتبع
إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
