قراءة رواية البلطجي كاملة

تنشر حصريًا على مدونة رواية وحكاية قبل أي منصة أخرى

احمد راح لعم رمضان 

رمضان بهدوء وترقب: هااا ولو انه باين على وشك من غير كلام بس احب اسمع

احمد بهدوء: فكرت وقررت 

عم رمضان: فكرت في ايه وقررت إيه بالظبط احب اسمع منك 

احمد: قررت اسمع كلامك واللحق قطر عمري اللي فات هاجري وراه بكل اللي باقي من جهدي وقوتي

عم رمضان طبط على رجله: هو داه الصح اللي كان لازم يحصل من سنين

ام محمد: يوووه بقى يا ابو محمد بركه انه فاق

عم رمضان: ها ناوي تعمل ايه 

أحمد: ناويت اشوف اللي ضاع في حياتي والحقه 

ام محمد بفرحه: يبقى تتجوز وتكمل نص دينك بقى وتخلفلك عيل يشيل اسمك بدل ما عيالك يموتو في ضهرك 

عم رمضان: يبقى من هنا وجاي تهتم بروحك جيب لبس ودلع نفسك وارمي يا ابني اللي رماك ورا ضهرك عيش مندفنش روحك بالحيا عشان غيرك ربنا هيحاسبك على نفسك

احمد هز رأسه 

ام محمد: طيب والنبي البت صابره دي اللي تدلعه وترجعله شبابه اللي ضاع

احمد بتريقه: وهاتقبل بيا على ايه دي لسه صبيه والعين عليها وانا راجل في آخر الأربعين يعني بقول مسك الختام دوريلي يا خاله على واحده مناسبه ليا ولسني بلاش اظلم بنات الناس معايا

ام محمد بشهقه: مالك يا اخويا كفا الله الشر راجل ملو هدومك والراجل ميعيبوش الا جيبه

احمد: الكلام داه يا خاله يتقال للجعانه بس دي شبعانه عينها مليانه متعشمنيش باللي مش ليا هتاخد واحد كلها سنه واتنين ويبقى ابن الخمسين تعمل بيه إيه تقعد تمرضه 

ام محمد بشهقه: الشر بره وبعيد دانتا اسم النبي حارسك وصاينك يا اخويا مش باين عليك سن اللي يشوفك يقول صبي ابن 30 بطل بطل يا واد الراجل راجل ولو كان عضميتين في قوفه

احمد بحب: الله يكرمك يا خاله 

ام محمد: طيب ومقام الحسين الطاهر اللي مجاوراه لكون مجوزهالك ومبقاش ام محمد رشيده ان معملتها وبكره تشوف

احمد بص لعم رمضان : مالك يا عم رمضان ساكت يعني على كلام خالتي ام محمد

عم رمضان: سيبها على الله وكل شيئ بأوانه حلو 

روح اصبغ شعرك كده ورجع شبابك واشتري هدوم ودلع روحك ياراجل حرام عليك وسيب الجاي على ربك 

احمد مشي وطلع من عنده وعدى على محل اشتري هدوم شيك تناسب سنه واشتري كوتشيات وجزم كان فرحان زي العيل الصغير اللي فرحان بلبس العيد وطلع على الحلاق هذب دقنه وظبط شعره وصبغه اغمق درجه في البني علشان ميبانش فرق اللون وطلع حس انه إنسان جديد اتولد من انهارده

ام محمد مكدبتش خبر وبعتت لصابره 

صابره جات وقعدت وقدامها عم رمضان وجمبها على نفس الكنبه ام محمد

صابره بقلق: خير يا عم رمضان جايبني انتا وخالتي علا ملا وشي وسيبت حالي ومالي وجيت 

عم رمضان: بصي يا بنتي انتي اتقدملك طوب الأرض ودايما تقولي انا عايزه راجل يخاف ربنا فيا لا طمعان ولا هفيه ولا يبص على شكل ولا مال

صابره: حصل بس بردوا في إيه منيش فاهمه السما من العما

ام محمد:جالك شاب زين وزين الرجال بالفعل مش بالقول والله يا بنتي ومقام الحسين انا بعتبره ابني جدع هايحطك في عنيه ويضلل عليكي برموشه جدع يستاهل تقله دهب 

صابره بحيره: يطلع مين داه اللي بقالك ساعه بتشعري فيه 

عم رمضان: احمد

صابره: مين داه ولا أبن مين في الحته 

عم رمضان: مهواش مم الحته هو من الشرابيه الجدع اللي وقع قدام البيت عندك

صابره بتذكر :ايوه بس داه شافني مرتين يخلوه يتقدملي انا معرفش عنه حاجه وهو يدري حياتي حاجه ومتأخذنيش يا حاج باين عليه الكبر

عم رمضان بتنهيده: بصي يا بنتي يعلم الله اني بعدك زيك زي بنتي ولو بنتي مكانتش اتجوزت واتقدم ليها احمد انا كنت اديهاله واشورها واوديها لحد باب بيه وانا مطمن انا مش بقولك كده عشان من طرفي حاشا لله بس هاقولك كلمتين بس واسيبك تحكمي الجدع داه ابوه مات وهو يادوب ابن 16 سنه ساب قي رقبته 3 عيال كسر عمره وشبابه وحلف انا ابوهم حرم نفسه من كل متع الدنيا عشانهم كان يقطعها من بوقه عشانهم رباهم وكبرهم وعلمهم وجوزهم واخر المتمه الكل نسيه اللي زي داه يا بنتي هايصونك اللي صان أخواته عمره ما يخونك اللي حاجي على اللي منه تأمنيله وتديله ضهرك وانتي مطمنه انه هايحميه مش هايغدر بيه أنا قولتلك عشان حقك فكري وخدي وقتك ورديلي خبر

صابره: هاصلي استخاره واللي فيه الخير يقدمه ربنا 

مشيت صابره وهي كلها حيره وفضلت يوم واتنين واسبوع كل يوم تصلي وتحس برااااحه شديده استغربت نفسها

قعدت في المكتبه شارده في راحتها وفي كلام عم رمضان وفي خوفها من فرق السن 

عم رمضان دخل المكتبه: ايه يا ست البنات انتي مقطعانا ولا ايه من يوم ما قولتلك وانتي روحتي وقولتو عدولي يا بنتي البت مورده بيجيها الزين والشين وانا رسول وما على الرسول الا البلاغ

صابره: لا والله يا عم رمضان انا بس محتاره

عم رمضان:قولي يا بنتي ولو في ايدي أدلك 

صابره خدت نفس وطلعت بنفخه: محتاره صليت وارتاحت وكلامك مطمني بس خايفه اصل يعني لامؤاخذه شكله كبير وخايفه يبقى عقله على قده داه بيقولو ابن الشيبه يتيم

عم رمضان: يا بنتي الأعمار بيد الله عز وجل انتي شوفتيه وقت تعب تعالي شوفيه دلوقتي هتلاقيه ولا الصبي ابن ال 30 

صابره: محتاره دلني

عمر رمضان: عقلك وقلبك بعد ربك سبحانه وتعالى دليلك قالولك ايه

صابره: قالولي داه العوض

عم رمضان: يبقى على بركة الله أبلغ الجدع وييجي يتقدم وابعت لأهلك يحضرو عشان الاصول 

صابره بشرود: ماشي ياعم رمضان 

رجع رمضان وزف البشرى لمراته ومصبرش وطلع على احمد في الشغل بلغه اللي فرحته بلغت السما والضحكه نورت وشه زي البدر في ليلة تمامه

احمد رجع البيت وهو مبسوط ونادا على أخواته من مدار السلم ينزلو وكان عدا ساب خبر لجوز رقيه تيجي هو وجوزها محضر للكل مفاجأه 

الكل حضر بسرعة في أتم استعداد للمفجأه الكل بص لبعضه بإستغراب من منظر احمد اللي لابس تيشيرت شيك وبنطلون ملائم عليه على غير احمد اللي دايما لبسه مبهدل

كان اول الفضوليين رفعت :ايه داه يا احمد دانتا صغرت ولا عشرين سنه يا جدع 

احمد بصلهم بصت ومركز عينه في تظراتهم اخد نفسه وطلعه: قولت اللحق بقى الباقي من عمري منا الحمد لله كبرتكم واطمنت عليكم اهو وكل واحد منكم بقى ليه بيت وعيال والحمد لله حياتكم مستقره من اكبركم لاصغركم 

دريه: قصدك إيه يا سي احمد 

احمد بهدوء: انا هاتجوز 

شهقه هي كانت رد الفعل 

رفعت بعصبيه: تتجوز ايه في سنك داه انتا عارف عندك كام سنه فاكر لما تصبغ شعرك وتلبش زي الشباب انك هاتبقى منهم فوق انتا كلها كام سنه وتقفل الخمسين بلاش تضحك الناس عليك

رقيه بغرور من غير متراعي مشاعر حد: هاتجيب واحده غريبه في بيتي وتاخد مكاني فيه وتنساني وهي تبقى الاحق بحبك وحنانك وحضنك وفلوسك وتتدلع عليك واحنا نتركن على الرف 

احمد حس بسكينه بتشق صدره بس قدر يداري وجعه جواه: اه يا رقيه هاجيبها واحده غريبه عنكم وتبقى كل ما ليا ما انتي جوزك جابك غريبه عنه ودلوقتي بقيتي كل دنيته ورفعت ورافت وانا شاور على نفسه وخبط على صدره بحده انا اتنسيت عمري ضاع عليكم وشبابي راح عليكم ومحدش بقى بيفتكرني الا لما يمدلي ايده ويقولي هات تعرفو ايه عني قعدت عشر ايام بين الموت الحياه الحمو بياكل في جسمي ومحدش حتى خبط باب البيت عليا مع ان بيني وبينكم كام سلمه اديتكم حياتي وحالي ومالي والنتيجه بقيت لوحدي زي الكلب الجربان محدش بيعبره وبص لرفعت هاضحك الناس ليه يا رفعت هاعمل حاجه حرام ولا عيب الناس هاتضحك على واحد هايتجوز ليه قولي

رفعت بسخريه: وانتا لسه فيك حيل للجواز يا احمد اللي زيك يقعد على المصليه ويعبد ربنا 

احمد بصله بوجع: حيلي وصحتي اللي شالوكم لما كنتو عيال لسه موجود صحتي اللي جريت بيها يمين وشمال وشرق وغرب عشان اجري على دروس ومدارس وكليات واخرهم جوزاتكم انتو التلاته لسه موجوده صحتي اللي عافرت بيها وانا بموت محدش جمبي والحمو بيأكل في جسمي لحد ما قومت وصلبت طولي ونفضت غبار التعب من جتتي لسه موجوده مستكترين عليا اني اعيش زيكم ان يبقالي بيت زيكم واللحق باقي حياتي اللي جاي وعايزيني اضيع اللي جاي عليكم زي اللي فات وقام وصلب طوله ووقف قدام رقيه يا ترى يا رقيه لو كنت مت من التعب والمرض اللي كان بينهش في جسمي كنتي هاتحسي وقلبك كان هايقلق عليا زيي لما كنت بحس بيكم وراح لرفعت يا تري كنت هاتبكي عليا زي ما بكيت عليك لما وقعت ورجلك اتكسرت وراح لرافت كنت هتاخد عزايا وبعديها تقفل بابك عليك وتنساني ولا هاتفتكرني زي ما افتكرتك حتى وانتا في حضن مراتك وتعبان 

بصلهم ولف حوالين نفسه انا ربيت طماعين كلو عمري اللي فات وعايزين ياكلو عمري اللي جاي وبص لرقيه بتهكم ياااااه يا بنت ابويا يا بنت قلبي يا زرعة عمري خايفه تاخد بيتك اللي هو بيتي تاخد حضني وحبي اللي غرقتكم فيه وغرقت انا في انانيتكم وطمعكم خايفه تاخد فلوسي اللي صرفتها عليكم وفي الاخر رميتوني زي الكلب مبتفتكرونش الا عشان تاخدو مهو البحر بيحب الزياده وماله مش خساره يعني في جهازك فضلتي تطلبي وتطلبي اللي ليه لازمه واللي ملهوش وانا مرضتش ازعلك جبتلك الطاق تلاته وطلبتي من الغالي وقولت عيني 

وبص لرفعت اللي زيي بقى كده عشان اللي زيك يعيش واحد غيري كان قال وانا مالي كنت بستخسر اللقمه في نفسي واحطها في بوقكم كنت بستخسر الهدمه على جتتي واستركم انتو بيها كنت بستخسر صحتي عشان انتوا ترتاحوا اللي زيي يقعد على المصليه ويعبد ربنا عشان في ضهره اللي يشيله بس انا في ضهري حيطه مايله او ما فكرت أسند ضهري عليها وارتاح وقعت على جدور رقبتي ودلوقتي اتهدت على راسي بصلهم بحسم انل هاتجوز بيكم من غيركم مش فارقه البيت داه بيتي عملته وشريته بتعبي وشقايا وسنين عمري اللي عايز يكمل اهلا وسهلا واللي مش عاجبه الباب يفوت فيل مش جمل ويروح يشقى بروحه 

عماد بصلهم وبص لمراته بصدمه بس قدر يفوق منها وقرب من احمد بحب اخوي صادق: الف مبروك يا احمد وبص لكل اللي حواليه داه حقك واللي ينكره يبقى وكز على اسنانه وسكت 

وانا في ضهرك شوف انتا بس العروسه وانا بنفسي هاروح معاك اخطبهالك وكمل بمزاح علشان يطلعه من جو الحزن اللي خيم عليه ولا تحب انا اختارلك العروسه والله ليك بت ايه ع الفرازه ورور كده 

دريه بسرعه: لاء عروسه سي احمد عندي 

احمد بصلها برفعه حاجب وسكت

دريه: البت سعاد بت خالتي بت جدعه وطيبه وغلبان ومنكسره واهي تليق بيك وتاخد بحسك وتونسك 

رقيه بتريقه: سعاد وغلبانه يا غلبانه سعاد اللي مطلقه مرتين بعد ما خدت الاخضر واليابس منهم وفضحتهم وغير كده معاها اربع عيال لا ريحي نفسك انا هاشوف لاخويا عروسه تناسب سنه وتمون بنت ناس منكسره وعايزه تعيش ولا تطلب ولا تتطالب 

احمد ابتسم بحزن وهز رأسه: ايه خلصتو وصلت السن والطمع دخلتو على العروسه اللي بقت بيعه وشروه اللي عايزه تجوزتي لقريبتها عشان تضمن تقش معاها ولا اللي عايزه تجيبلي كسر نسوان عشان تضمن انها توفر اهي واحده والسلام وزي ما بيقولو عندما يأتي المساء كلهن سواء وبص لرأفت ودلال اللي قاعدين ساكتين من اول القعده وانتا كمان يا رأفت معندكش عروسه نقاوه لاخوك عشان تكمل مهي بقت على البحري وكمل بهستريه يلا يلا مهو مزاد يلا الااونا الا دونا الا ترييي زود يا هانم زود يا بيه البيعه تستاهل واللي هايشتري حلال عليه 

عماد خده في حضنه: اهدا يا احمد اهدا صدقني نفسك أحق اختار وسيبك منهم 

احمد طلع من حضنه: انا فعلا اختارت وكلها كام يوم واروح اتقدملها رسمي اللي عايز ييجي اهلا وسهلا جميله ومتشاله واللي مش عايز الله الغني ويادار ما دخلك شر

رأفت انا ومراتي جايين يا احمد عماد وانا جاي يا احمد انا بعتبرك اخويا مش نسيبي 

رفعت بص لدريه بحرج 

دريه بمكر: واحنا طبعا واحنا نفديك الساعه دي عروسه الغالي 

عماد بص لرقيه:وانتي يا ام عاصم 

رقيه بخوف من نظره عماد: ها جايه اه جايه ان شاء الله 

الكل انسحب وزي واتبقى احمد اللي حس ان حتى فرحته بيحارب عشانها

ومرت الأيام واحمد أتقدم لصابره اللي كلهم تنحو من جمالها والامتر دريه لأنها أعلى منها وشكلها عضمه ناشفه مش هاتقدر عليها وفوق داه كله صاحبة ملك واحمد غير الشقه كلها وغير العفش اللي عفر عليه الزمن وبقت شقه تليق بعريس بجد

ومرت الأيام واحمد اتجوز واستقر وكان العوض لصابره وصابره كان العوض ليه وكلل حبهم بهارون ابنهم الكبير الفرحه اللي جات على كبر وبعدها ب 3 سنين جات هنا الأيام بنت زي القمر واخده جمال امها وفي يوم احمد رجع من الشغل قاعد سرحان

صابره قربت منه وقعدت جمبه:مالك يا ابو هارون من ساعه من جيت وانتا قاعد سرحان في ملكوت ربك 

احمد: بفكر في حوار كده شاغل بالي 

صابره قول وانا سمعاك وهاقولك رائيي زي ما اتعودت مني 

احمد: ليا واحد صاحبي اديله فتره يستأذن وانهارده اصريت اعرف رايح فين قالي انه بيشتغل على تريله وبيطلعه من كل نقله مية جنيه مره واحده 

صابره: بسم الله ماشاء الله رزقه واديك شايف الدنيا غلا طيب إيه اللي محيرك في الحوار داه يعني 

احمد :بيني وبينك بفكر اشتغل معاه لو طلعت معاه هاعمل 700 جنيه في الأسبوع يعني 2800 جنيه في الشهر قد مرتبي ييجي عشر مرات 

صابره بتفكير:بس تعب وشقى عليك يا ابو هارون

احمد بإبتسامه وهو بيضم رأسها على كتفه الشقى صابون الجسم يا بت والتعب واخدين عليه 

صابره:اللي تشوفه بس بقولك إيه اعمل حسابك تلم ايدك وتبطل تبعتي يمين وشمال فاهم يعني مش كل شويه لعب وشايل ومحمل للعيال لما هاتطلعهم زرعه خايبه 

اهم بضحك هز راسه: حاضر يا ماما

صابره بحب: والله بحسك ابني يا احمد مش جوزي بس

احمد: ربنا يديمكم في حياتي يا صابره دانتي الفرحه اللي ربنا فضل يحوشهالي لحد ما عطهاني ملفوفه في حرير

واحمد بداء يشتغل وصابره تتبتب وتحط القرش ع القرش وبقت تلم على قد ما تقدر 

احمد بقولك ايه يا ام هارون

صابره سابت مذاكره ابنهم:قول يا احمد خير

احمد في حاجه عايز رائيك فيها 

صابره عيني وبصت لهارون :روح اقعد مع اختك لحد ما أجي ونكمل الواجب 

صابره: ها قولي بقى في إيه 

احمد: انتي عارفه ان شغلي في المصلحه والعربيه الحمد لله ماشي زي الفل 

صابره: الحمد لله القاشيه بقت معدن بس في ايه شكلك عايز تقول حاجه قول علطول غمزتله بعينها

احمد بتردد: بصي انا من فتره كده عرفت ان حموله العربيه في النقله والواحده بتصفي ييجي 500 جنيه داه من غير السواق ولا 

صابره: رزقك ربك بيقسمه عايز تقول ايه يا ابو العيال

احمد ابتسم: بصي انتي عاينه معاكي فلوس قد إيه 

صابره يعني حوالي اللهم بارك ييجي 15 الف كده وشويه

احمد بإحباط مش هاينفعو خلاص خلاص

صابره: يا اخويا هو إيه اللي خلاص مش لما اعرف الأول اقولك خلاص ولا مخلصشي ولا انا بشم على ضهر ايدي 

احمد: كنت بفكر انا وصاحبي اننا نجيب عربيه شرك ولما سألنا واطقسنا لقينا العربيه عامله ييجي ميت الف قولت احسب حسبتي بس شخرمت من اولها انتي بتقول يكل اللي معاكي اول عن آخر 15 الف يعني عايزين قدهم الطاق طاقين وتلاته

صابره بتفكير وهي بتقرض شفايفها: طيب ما نبيع دهبي وانتا جايبلي كتييير اوي دي شلة دهب 

احمد : ولو بعناه هايجيب كام تلات اربع تلاف جنيه مهيعملوش حاجه ولا حتى نوايه 

صابره بلمعه عين :نبيع البيت

احمد بصلها وبرق:بيت مين يا مخبوله وانا واخواتي فيه انتي هبله يا بت

صابره: يا اخويا اصطبر على رزقك وانا مالي ومال بيتك انا بتكلم على البيت بتاعي اللي في الحسين مهو مقفول

احمد:منتي مأجراه 

صابره: يا اخويا داه بيجيب كل شهر ميت جنيه 

احمد: بس داه كل اللي حيلتك 

صابره:انتا حالي ومالي يا احمد وبعدين هو رايح لحد غريب داه رايح لبيتي وعيالي وانتا الحمد لله مش مخلينا ناقصنا حاجه واهو على حطة ايدك الفلوس راقده لا شغله ولا عمله 

احمد بتردد:بس يعني

صابره:ولا بس ولا مبسش عندك قلب عندك رزق

احمد:انتي شايفه كده

صابره :وابو كده كمان

احمد:على بركه الله وأول فلوس تيجي هاجيبلك البيت أو بيت غيره

صابره بحب :طول منتا معايا انا مش شايل للدنيا هم دانتا دنيتي 

صابره باعت البيت اللي كان عزيز عليها عشان عزيز قلبها 

صابره جات بفرحه وني حاضنه شنطه هاند باج كبيره 

احمد: ايه في إيه طول النهار بره وجايه ضحكتك شاقه حلقك من الودن للودن

صابره وهي بتفتح الشنطه قدام احمد اللي عنيه برقت 

احمد بصدمه ايه داه يا وليه

صابره........

يا ترى احمد شاف إيه ...؟

وياترى صابره فرحانه ليه وهاتقول إيه.....؟

وياترى اخوات احمد ناويين على ايه والماضي مخبي ايه تاني...؟