رواية جديدة شوق الجزء الثاني لأسماء عبد الهادي - الفصل 59 - الأربعاء 7/5/2025
رواية رومانسية جديدة شوق الجزء الثاني
تنشر حصريًا على مدونة رواية وحكاية قبل أي منصة أخرى
رواية شوق الجزء الثاني
رواية جديدة قيد النشر
من قصص و روايات
الكاتبة أسماء عبد الهادي
الفصل التاسع والخمسون
تم النشر الأربعاء
7/5/2025
الفصل التاسع والخمسون
تم النشر الأربعاء
7/5/2025
هناء كانت زي اللي فقدت عقلها اول ما سمعت اللي قاله
لاه احب على يدك متعملش ف ولدي اكده ولدي الحيلة هيروح مني اني معنديش غيره بالله عليك
دهشان بص لرجالته وقال بصوت آمر كله غضب
خدو الولية الخرفانة داي من اهنه ارموها برا واياني اشوف وشها اهنه تاني لو لمحتها هي ولا جوزها قرب السرايا اهنه هتندموا فاهمين
قربت منه هناء وحاولت تبوس ايده
لاه بالله عليك ولدي أكده هيموت مش هيفيدك موته بحاجة يا دهشان بيه عاقبه اي عقاب الا الموت اقولك اقتلني اني بداله اا اني مستعدة بس ولدي لاه
طلعت ضحكة ساخرة من دهشان
ههه هو اكده ولا اكده ميت خلاص الكلب عضه وانتهى الأمر ولو وانتي عايزة اچيبلك نفس الكلب ديه يعضك انتي كمان ونرتاح من زنك اني معنديش ايتها مانع
برقت هناء بعنيها بخوف على ابنها ولسه هتتكلم لقت رجالة الدهشان بتشدها تخرجها برا
ففضلت تصرخ وتزوم
لاه ولدي ااااددم ولدي هيموت اني عايزة اشوف ولدي يا ادم يا ضنايااا لاااا
في الوقت دا وصل مالك بفرقته لسرايا الدهشان مكانش قدامه حل غير انه يقتحم سرايا الدهشان حتى لو مكانش عنده اي اثبات ان ادم عنده حتى لو مكانش معاه اذن بالاقتحام دا المهم انه ينقذ صاحبه
مالك
سلم نفسك انت وهو ومفيش داعي للمقاومة المكان كله محاصر
هناء اول ما شافت مالك كأنها شافت طوق النجاه لابنها فجريت عليه قربت منه
حضرة الظابط مالك الحمد لله انك جيت احلق ولدي ادم بيقولك الكلب المسعور بتاع الدهشان عضه وحابسه وياه ولدي هيموت يا مالك الحق صاحبك وخليه يخرجه ...ادم لازمن ياخد المصل المضاد قبل ما يفوت الأوان
مالك بص لهناء بهدوء ظاهري رغم القلق والخوف اللي جواه ع ادم
متقلقيش هنلحقه بإذن الله
وبص لدهشان وقال
ادم فين يا دهشان بيه اظن ابنك همام وصلك.... الأخبار جتلي انه معاك دلوقتي
دهشان بغضب
همام هو فين همام قصدك الهزيل الجبان ديه .. مهواش ولدي صاحبك قضي على ولدي وديه لوحده مهيكفيش ولا عشرة زي ادم علشان يبرد ناري على ولدي
بص مالك لهمام فلقاه فعلا شكله غريب ملامحه باهتة وضعيف
فهمام قال
سيبك من طريق الشر ديه يا بوي ورجع لكل صاحب حق حقه الطريق اللي عتسلكه واعر جوي ونهايته هلاك
دهشان بحسرة ع ابنه
لاه وكمان عملك غسيل مخ واد الجنايني اني بنفسي هدخله ان مماتش بالسعار هخلص عليه بيدي وياريت اكده يشفي غليلي منيه
هنا انهارت هناء وكانت هتفقد صوابها فقررت انها تتخلى عن سرها اللي اقسمت ان محدش يعرفه غيرها هي وجوزها وبس
وفضلت تصرخ
عايز تقتل ولدك يا دهشان ادم ولدك
هنا انصعق الكل وبالأخص دهشان اللي بص لهناء وبرق بصدمة
ولدي!!!
مالك مكانش فاهم حاجة
ادم ابن الدهشان ازاي !!
بص الدهشان لهناء بغضب وقرب منها ومسك رقابتها في ايده
عتقولي ايه يا ولية يا خرفانة انتي !!
هناء وهي بتحاول تاخد نفسها
ادم .. ادم ولدك يا دهشان
مالك لما فاق من الصدمة اللي سمعها وانتبه للي بيعمله دهشان في هناء
جري بسرعة وخلصها منه وشدها ورا ضهره يحميها
لو مديت ايدك عليها تاني هقطعهالك
هناء
ادم ولدك البكري يا دهشان اقسملك بالله انه ولدك .. الحق ولدك قبل فوات الأوان
دهشان بصلها بنظرة ذات مغزى بمعنى انتي متأكدة من كلامك ديه ولو كنتي بتعمليها حيلة علشان تنقذي ولدك يا ويلك مني
لقاها بنتبصله بنظرات كلها تأكيد انها مش بتكدب في ولا حرف
فبلع ريقه برعب ولجلجة
ااا اددم ولدي!! كيف ديه واا ازاي تخبي عني حاجة واعرة كيف داي ازاي تخفي عني الحقيقة طول العمر ديه
هناء وهي بتعيط
خفيتها علشان أحمي ابنك منيك علشان ميطلعش شراني زييك خفيت الحقيقة علشان معيزاهوش يكون نسخة من الدهشان اللي قلبه مهيرحمش
مالك قال في نفسه
ادم ابن دهشان طب ازاي؟؟ طنط هناء كانت مرات الدهشان !!! مأظنش ادم نفسه يعرف الموضوع دا
دهشان فضل يلف حوالين نفسه بيحاول يستوعب الحقيقة اللي عرفها
يعني ايه!! يعني ادم ولدي ومن صلبي!!! طول عمري كنت عتمنى ان يكون عندي واد من صلبي زييه طول عمري شايفه راجل من صغره رغم فقره وقلة حيلته الا اني كنت بشوف نظرة الأنفة والأبية والقوة في عيونه كنت بتمناها في ابني همام كنت بستكتر ادم على سلمان الجنايني واقول لنفسي خسارة فيه واد زي ديه يكون ابنه ديه يستحق يكون ابن واحد من كبارات البلد .. وكنت كل لما اشوف نظرات القوة في عنيه احاول اكسره واذله علشان اطفي النظرات دي لكنها كانت نتزيد قوة في كل مرة كنت مفكره انه اكده بيعاديني وبيتحداني فأزيد من ظلمي ليه وبطشي عليه وهو بيتحمل كان عنديه قوة تحمل تهد جبال اتاريه مكانش بيتحداني ولا حاجة وديه خصلة وارثها مني طالع قوى وشخصيته قوية متلي تمام... اه يا ادم طلعت ولدي واني معارفش
ففرح وابتسم وانفرجت اساريره
ادم طلع ولدي اللي اتمنيته لقيته
لكنه فجأة فذ ونط من مكانه
ادم ولدي واني رميته للموت بيدي؟؟؟ الكلب السعران كل يده قدامي وسبته يموت وياه حبسته وسبت الكلب يكمل عليه ... لااااه ادددم
ونادى رجالته بسرعة
اتصل بالاسعاف والدكاترة بتوعنا حالا
وبص لرجالته التانين
بسرعة طلعوا ادم ولدي من حبسه بسرعة اطمنوا على ولدي حالا
فرحت هناء انها قدرت تنفذ ابنها وبدأت اعصابها تهدا شوية لانها متأكدة ان دهشان هيعمل كل اللي ف وسعه علشان ينقذ ابنه
وكذلك مالك امر كل رجالته بالانسحاب ومشاهم وفضل هو منتظر يطمن على ادم
لكن بعد كم دقيقة جت رجالة دهشان وقالت
دهشان بيه روحنا الاوضة اللي حبسناه فيها ملقناش حد فيها واصل حتى الكلب مهواش هناك ومفيش اي اثر ليه في المنطقة اهنه
الكل كان على رؤسهم الطير وقع الخبر عليهم وقع الصاعقة ادم مش موجود وهو بحالته دي يبقى مش هيلحقوا ينقذوه ويعطوه المصل المضاد
متحملتش هناء ووقعت من طولها فلحقها مالك وبدأ يفوق فيها فكان لسان حالها
ولدي ولدي الحقوا ولدي.. ولدي هيروح مني ديه روحي اللي عايشة بيها جيبلي ولدي يا مالك اه يا حسرة عليك يا ادم
اما دهشان كان هيتجنن الولد اللي طول عمره بيحسد سلمان الجنايني عليه وبيتمناه ابنه وقت ما يعرف أنه ابنه يضيع كدا منه في غمضة عين وكأن الحلم اتبخر قبل ما يتحقق فصرخ في رجالته
دوروا عليه في كل حتى متسيبوش قشاية الا لما تدورا عليه فيها ادم ولدي لازمن تجيبوه وتنقذوه انتوا فاهمين
هنا متحملتش هناء ويمكن دي فرصتها ف انها تطلع كل غلها وكل اللي جواها في وش دهشان
انت السبب انت اللي عملت في ولدك اكده انت اللي ضيعت ولدي وانت اللي موته بيدك
دهشات بعصبية
اخرسي قطع لسانك ولدي مضاعش ومهيموتش اني ما صدقت لقيته ما صدقت عرفت انه ولدي.. ديه احسن خبر سمعته في حياتي ... انتي السبب انتي يا ملعونة لو مكنتيش خبيتي عني الحقيقة مكانش هيجراله كل ديه قبر يلمك اطمن على ولدي وهعرف ازاي احاسبك على انك تخفي عني ولدي طول السنين دي كلياتها
قالها وفضل يكلم في رجالته يدوروت ف كل مكان من
بعد فترة مالك لما لقا ان وجوده في المكان دا ملوش اي لازمة قرر يمشي ويدور على ادم بنفسه
فقال لهناء
طنط هناء انا همشي من هنا هروح ادور على ادم بنفسي تحبي حضرتك تيجي معايا واوصلك لبيت ماما شوق!!
هناء مكانتش متحملة ف
تقعد في مكان فيه الدهشان فقالت لمالك وهي بتبص لدهشان بغضب
ايوا خدني وياك يا مالك اني هتستنى ولدي مع وعد مرته روح انت دور ع صاحبك وانقذه اني عارفة ولدي حمال قسية هيعرف يخرج منيها وهيرجعلي سالم بإذن الله.. يارب يارب
مالك
ان شاء الله هيكون كويس وهنلحقه
جت هناء تخرج مع مالك وف جنينة سرايا الدهشان وقبل ما يطلعوا برا تماما شافوا سلمان الجنايني واقف في طريقهم وبيبص ليهم بيعيون غرقتها الدموع ونظرة عين مش بس كسرها الفقر لا كسرها اللي سمعه من شوية من هناء وقال
بقا اكده يا هناء هو ديه السر اللي ءاتمنتك عليه وحلفتيلي على المصحف انك مهاتقوليه لجنس مخلوق على وش الأرض.. دلوك عرفتيه ان ادم ولده .. بعد العمر ديه كله وبعد ما ربيته اني بين يدي وبقا راجل كد الدنيا ويعتمد عليه ويسحدوني الناس اني عندي واد زيه والدهشان بنفسيه بقا يسحدني عليه ومستكتره عليا وهو كان فخري وتاج راسي وكل اللي طلعت بيه من الدنيا جاية دلوك وبكل سهولة اكده تقوليله ان ادم ولده علشان ياخده مني ويحرمني منيه دلوك هياخده ويرميني رمية الكلاب اني من غير ادم ولدي ولا حاجة ايوا اني بتحامى ف ولدي ايوا اني روحي فيه.. ادم اني بتقاوى فيه مهواش عيب.. دلوك اتحامى واتقوى في مين قوليلي اتفاخر بمين واعيش لمين دلوك ..اني اتحملت الذل والمهانة علشان ادم ولدي اعيش كيف من غيره دلوك قوليلي منك لله يا هناء منك لله
❈-❈-❈
فرحت اول ما خالد اتصل عليها عرفت منه ان اياد عرف الحقيقة وطالب يشوفها
صحيح!! صحيح اياد ابني عرف الحقيقة عرف اني امه انا مش مصدقة نفسي اخيرا اخيرا هضمه لحضني واقوله انا اهو امك
لكنها فجأة ابتسامتها اختفت وقالت بصوت بيجاهد علشان يطلع
انت بتقول انك حكيتله الحقيقة كلها حكيتله حقيقة امه واللي عملته فيه وبعدي عنه السنين دي كلها!!!
خالد
دا حقيقي انا حكيتله كل حاجة مخبتش عليه اي حاجة خالص اياد من حقه يعرف الحقيقة كاملة من غير اي تزييف او تجميل قولتله الحقيقة علشان يعرف ياخد قراره صح ورغم دا كله اختار انه يشوفك ويقابلك
قالت
رغم انه عرف دا كله الا انه مصر يشوفني!! يعني مش زعلان مني اكيد يا حبيبي يا ابني ايوا انا هموت واشوفه واخده في حضني
خالد
تمام شوفي المعاد اللي يناسبك وانا هبلغه وهرتب ليكم مقابلة
ردت
لالا استنى هيشوفني كدا ازاي ويقابلني كدا ازاي لا مينفعش مينفعش اقابل ابني كدا وانا على حالتي دي استحالة وبأي وش يشوفني كدا لالا يا خالد بيه مينفعش... اياد ابني بقا ليه مركزه وسمعته استحالة بعد العمر دا كله ابوظ سمعته وادمر مستقبله انا عملت دا كله علشان اءمن ليه مستقبل افضل من مستنقع الزبالة اللي انا عايشة فيه لالا قوله اني مش عايزة اقابله اقولك قوله اني مت
خالد
الهروب مش الحل .. كدا انتي هتكسري ابنك اكتر واكتر... يمكن جه الوقت علشان تتغيري علشاني تتوبي من اللي انتي بتعمليه دا علشان ترجعي عنه وتمشي في الطريق الصح
ردت بحسرة
بعد ايه يا حسرة بعد ايه بعد العمر دا كله وبعد السمعة اللي طلعت عليا ولازمتني طول عمري مينفعش خلاص ومهما عملت وتوبت الناس مش هترحمني بكلامها ومش هتسيبني في حالي مينفعش اسيب اللي بعمله تعرف افضل حل ليا اني اموت .. انا طول عمري منتظرة اللحظة دي هموت واشوف ابني ويعرفني ويتربى بين ايديا كنت براقبه واطمن عليه من بعيد لبعيد وخايفة من اللحظة اللي يعرف فيها امه ويعرف حقيقتها كل مرة بشوفه ببقا هاين عليا اجري عليه واخده في حضني واضمه لصدري بحنان لكن ف اخر لحظة بتراجع بأي عين وبأي حق اقرب منه انا كدا بدمره... كل لما افكر في لحظة المواجهة دي بحس اني هموت الموت اهون عليا من اللحظة دي لا لا يا خالد بيه قوله اني مش موافقة اقابله مش موافقة اعرفه ولا يعرفني قوله كدا خليه يكرهني اكتر واكتر يا خالد بيه عايزاه ينساني ميفكرش فيه تاني . خليه معاك انت يا خالد بيه انا متأكدة انك بتحبه انت ومراتك وهتهتموا بيه قوله اني مت خلاص ومبقاش ليا وجود ف الدنيا
❈-❈-❈
الباب خبط واول ما فتحت الباب ولقت توبا بنتها في وشها ومعاها شنطة هدومها
بصتلها باستغراب
توبا الشنطة اللي ف ايدك دي بتعمل معاكي ايه.. دي مش زيارة عادية مش كدا
توبا قالت وهي بتعيط
ايوا يا ماما انا مش راجعة البيت تاني مش راجعة لعساف تاني
صرخت فيها امها
نعم ياختي يعني ايه مش راجعة البيت تاني وبعد العمر دا كله جاية تقولي الكلام دا.. هو انتي لما بتكبري بتتهطلي وتتعبطي ولا ايه.. خدي بعضك وارجعي ع بيت جوزك يلا بلاش عبط
توبا
ماما من فضلك دخليني انا مش قادرة اقف على رجلي يادوب صالبة طولي بالعافية
جت توبا تدخل لقت امها مدت ايديها علشان تمنعها انها تدخل
انسي ان دا يحصل يا توبا... انا مجوزتكيش علشان ترجعيلي بعد العمر دا ارجعي لبيتك واقفلي بابك عليكي وع مشاكلك وحاولي تحليها بنفسك
توبا بعياط
حاولت حاولت كتير يا ماما مش قادرة مش قادرة اتحمل اكتر
الام
ليه .. ليه يعني دا عساف جوزك بيتمنالك الرضا ترضي ولو لفيتي الدنيا بحالها عمرك ما هتلاقي ضفره حتى هو ايه اللي مش قادرة اتحمل اكتر
توبا
ماما عساف اتجوز عليا
الام بسخرية
يعني انتي عاملة الحوار دا كله وسايبة بيتك يا هبلة علشان اتجوز وايه يعني دي سنة الحياة وشرع ربنا مفيهاش حاجة حتى لو اتجوز اربعة ميعيبوش في حاجة طالما راجل مقتدر وهيقدر يعدل ما بينكم في المصاريف والأكل والشرب وليكي بيتك لوحدك عايزة ايه
توبا
ياريتها كانت حكاية اكل وشرب كنت عيشت معاه عمري على العيش الحاف انا مش متجوزة عساف علشان فلوسه انا بحب عساف ومقدرش اتحمل انه يكون لواحدة تانية غيري مش قادرة اتحملها يا ماما انا بموت من وقت ما قالي هتجنن
الام
ما انتي اللي خايبة بصي لنفسك كدا ف المراية شوفي رجعتي كرومبة ازاي ياما قولتلك حافظي على نفسك ووزنك مفيش فايدة فيكي غبية لحد ما ضيعتيه منك
توبا بحسرة
معاكي حق هو سابني واتجوز عليا علشان كدا بس والله العظيم غصب عني الهرمونات رجعت باظت عندي تاني مش بإيدي انا مش باكل كتير خالص
الام
طب ياختي روحي عالجي نفسك وفوقي لنفسك كدا وزبطيها ورجعي جوزك لبيتك وتحت جناحك... حد يضيع من ايده واحد زي عساف بيه.. امشي يلا من هنا
قالتها امها وقفلت الباب في وشها
فوقفت توبا مكانها بصدمة من تصرف امها و...
يتبع
إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص أخرى تضمن حكايات وقصص جديدة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
