قراءة رواية البلطجي كاملة

تنشر حصريًا على مدونة رواية وحكاية قبل أي منصة أخرى

هارون راح شغله زي كل يوم بس صابره من اول اليوم وهي حاسه بتعب بس معندهاش رفاهية التعب والراحه اتحاملت على نفسها وكملت شغلها وفي لحظه القضا عمى البصر حست ان عنيها زغللت

هارون:مالك يا ماما شكلك تعبان ووشك عرقان

صابره مسحت وشها بطرف الطرحه وابتسمت بتعب لابنها: لنا زي الفل يا حبيبي الشمس بس حاميه شويه 

هارون:طيب اقعدي ارتاحي انتي وانا هاكمل شغلي وشغلك

صابره:لو حسيت بتعب هاقعد يلا بقى خلينا نشهل اومال ورانا شغل ومصالح ناس متعطله 

هارون رفع شيكارة الرمل على كتفه وطلع بس التعب كان أتمكن من صابره وحست ان الدنيا بتلف بيها وقبل ما حد يلحقها كانت وقعت من على السقاله 

هارون بفزع: ماما ماما فوقي يا ماما والنبي هارجع اقول لاخواتي ايه

ايوب: اهدا يا بني خلينا ننقلها المستشفي ربك يستر وهي موقعتش من مسافه عاليه اوووي

هارون شال امه ورفض ان حد يلمسها 

ايوب: يا ابني خلينا نساعدك علشان نلحقها

هارون بحده وحسم: محدش يلمس امي انا منيش عويل

وراحوا المستشفي 

هارون وهو شايل امه بجنون: دكتور دكتور امي بتموت يا ناس 

الدكتور:هاتها بسرعه على الطوارئ 

دخلو وهارون واقف هو وعم ايوب هارون ساند راسه على الحيطه والخوف والرعب بياكلو قلبه الخوف من اللي جاي الرعب من فقدانها زي ابوهم مش هايقدر يعيش مراره اليتم تاني

ساعه مرت بعمر كامل على هارون لحد ما الدكتور طلع اخيرا 

هارون بلهفه: طمني يادكتور امي عامله ايه 

الدكتور :الحمد لله وبص لعم ايوب اتفضل حضرتك معايا دقايق

هارون مسك الدكتور من دراعه: اللي جوه دي امي انا مش امه هو قولي اللي فيها مانيش عيل قدامك

ايوب هز رأسه للدكتور

الدكتور: للأسف الوقعه عملت كسر في العمود الفقري ونزيف داخلي والامكانيات هنا متسمحش بحالتها محتاجه مستشفي خاص ودي تكلفتها عاليه جدا

هارون:كام يعني

الدكتور: مش اقل من ربع مليون جنيه

هارون بتصميم هانقلها بإذن الله وخد بعضه وطلع من المستشفى 

ايوب: رايح فين يا ابني وهاتنقلها ازاي دول مش كام جنيه دول الوفات مؤلفه هاتجيبها منين يا ابن إمبارح

هارون بشموخ:من مال ابويا المسروق وسابه ومشي

ايوب حاول يلحقه لكن معرفش

هارون مشي بنار بتحرق قلبه وروحه محسش بطول الطريق وطول المشوار ورجليه خدته لحد بيته بيت ابوه اللي اتسرق واتنهب واطردوا منه طردة الكلاب 

فضل واقف قدام الباب وذكريات حياته كلها بتمر قدام عنيه دخلت ابوه شقاوه أخواته حنيه امه دفا البيت كل داه خدوه بدون وجه حق

هارون بغضب: لحد هنا وكفايه اوووي وخبط على الباب برزع 

رفعت فتح الباب ووراه رقيه ودريه 

رفعت بسخريه: ايه اللي رجعك يا ابن صابره 

هارون برأس مرفوعه:انا ابن أحمد المالكي اللي ان قل جسمي ما يقل اسمي 

رقيه بسخريه:والله وطلعلك صوت ياض وبقت العيال تيجي تتنطط على اسيادها

هارون بغمزه: سيدي في القبر من ايام مكنتو عيال متعلقين على كتف ابويا 

دريه: شوفي يا اختي الواد بجح ولسانه زي الطرطقه 

هارون:راجل من ضهر راجل زمان ابويا شال شيلتكم وابنه شال شيلته لولا ابويا كان زمانكم على الله حكايتكم 

هارون نجح انه يعصبهم 

رفعت بعصبيه وصوت عالي: عايز ايه واخلص عشان تغور من هنا

هارون بحده: عايز فلوس من شقى ابويا اللي شفطوه في كروشكم امي بين الموت والحيا ولولها لا كنت جيت ولا خطيت عتبتكم 

رفعت زقه وقعه على الأرض غور ياض روح اشحت في حته تانيه بعيد عن هنا يحنن يا ابن امك

رقيه بسخريه: تؤتؤ كده يا رفعت الواد جاي يشحت واحنا قلبنا كبيير اوووي 

 وطلعت خمسه جنبه ورمتها على هارون اهي اول صدقه ابقى روح كمل الباقي على أبواب الجوامع 

هارون بجبروت:هاخدها بس عارفه ليه عشان عجلة الدنيا خدتكم على حجرها وبكره تلف وتجيبكم على حجري ويومها هاحطها في ايدك وتتردلك من تاني ويبقى الحق رجع لأصحابه ولفت ضهره ومشي وسابهم مبرقين وراه

رفعت بحده سكع باب البيت 

رقيه بقلق: الواد يتخاف منه الواد شوكته قويه ولازم تتكسر عشان يعرف ان الله حق وميفكرش الواد داه جبروت وقلبه ميت 

دريه نبعتله بلطجيه يدقو عضمه في لحمه

رفعت عفارم عليكي دماغك صحيح متكلفه

رقيه بتهكم: اتوكس منك لهيا عشان يقدم فينا ويخلي اللي ما يشتري يتفرج علينا ومتنساش اننا اقنعنا رأفت بعد مرار طافح بلاش تهدو كل اللي بنيناه السنين اللي فاتت دي كلها

دريه خلاص نلبسه مصيبه ونغوره ع اللومان 

رقيه اكتمي خالص متنسيش انه شايل اسمنا ويعرنا 

رفعت حيرتيني معاكي اومال عايزه توصلي لايه اصل الواد داه مينفعش يتساب كده طايح في الكل

رقيه بخبث سهله وديتها امها وابوها الفلوس

رفعت رسيني على الدور واللي بيدور في دماغك 

رقيه الواد داه عايز يتروق عليه بس من بعيد لبعيد ومن غير ما يتمس اسمنا فيها 

رفعت: ايو اللي هو ازاي يعني 

رقيه انا اعرف امين شرطه في القسم قرشين يجروه من قفاه ويعملو معاه الصح هناك يطلعوه ناسي اسمه

رفعت طيب مهي دريه قالت كده وانتي قولتي الاسم السمعه وكلام عامل زي طظ فش

رقيه طول عمرك غبي وعقلك في كعب رجلك انا بقول نروقه من بعيد لبعيد يعني قرشين يترمو لأمين الشرطه ورشه على المساجين واروصتين سجاير والواد يدخل هناك يتروق من غير ما اسمه يتذكر في ورقه يعني دخل وطلع من غير اي إثبات 

رفعت: يخربيت شيطانك يا بت دانا بقيت بخاف منك 

رقيه لو فكرت تخون خاف طول ما انتا ماشي في السليم تمام 

رفعت :ماشي كلامك بس هانعملها ازاي

رقيه انا عارفه الواد داه عايش فين هو وأهله 

رفعت بصدمه:ازاي 

رقيه بغموض هو انتا فاكر اني بسيب حاجه تعدي من تحت رجلي تبقى غلطان يوم ما اطردوا كنت باعته اللي قاطرهم نعرف بس الواد هايبقى لوحده أمته عشان نضرب ضربتنا ومحدش يحس اصل لو حد حش لو شم خبر هاييجي ويسأل ويطقأس والموضوع يتفضح 

رفعت:يابت انتي دماغك دي فيها إيه

رقيه بمكر: فيها كتير من كتر اللي شوفته في الدنيا

رفعت بضحكه عاليه: يا بت يا بت عليا انا الكلام داه انتي عشتي الحلو كله دانتي مشوفتيش يوم وحش ولا دوقتي المر حتى لما كبرتي مكنتيش بتشلي الياسمينه من الأرض واحمد اللي كان بيعمل

شغل البيت 

رقيه بإنهيار: شوفت الكسره لما جوزي طلقني بسببها دوقت حرقه القلب لما خد عيالي من حضني واختفى بيهم 

دريه بمكر: خلاص يا حبيتي قطعتي قلبي اهي خلاص هاتغور ونرتاح منها ادعي بس ربنا ياخدها بدري بدري

هارون مشي وهو متبت على الخمسه جنيه في ايده وعنيه عامله زي النار رجع المستشفى 

عم ايوب: طمني يا ابني عملت إيه 

هارون بوجع وحزن : العمل عمل ربنا يا عم ايوب

عم ايوب بحزن من حاله: معلش يا ابني كنت عايز اقولك قبل ما تمشي ان اللي ياكل مال اليتيم وهو عارف ان نار في جوفه عمره ما يخاف الله ولا يهاب عباد الله

هارون بشر: كل قوي وفيه اللي اقوي منه كل جبروت وفيه اللي يكسره ويذله داه وعد وعهد خدته على نفسي 

عم ايوب طبطب على كتفه سلمها لله وانا هحاول اتصرف 

الدكتور: المريضه فاقت 

هارون اتحول حاله في ثانيه للهفه:عايز اشوفها ارجوك 

الدكتور: تمام بس مطولش عشان كتر الكلام غلط عليها 

هارون بلهفه: متخافش اطمن عليها بس 

دخل هارون جري شاف امه راقده لا حول ليها ولا قوه 

هارون بصوت مبحوح من كتمه الدموع: ماما فوقي اوعي تسيبيني لسه الطريق طويل يا صابره

صابره فتحت عنيها بتعب وابتسمت بضعف: قول يارب خلي إيمانك في ربك كبير واوعى تيأس مهما قفلت الدنيا أبوابها اعرف ان ربك هايسخرلك كل عباده طول ما انتا ماشي في طريقه

هارون :حاضر ارتاحي انتي بس ومتجهديش نفسك

صابره: روح اخواتك لوحدهم انتا راجلهم 

هارون برفض:مش هاسيبك

صابره:عشان خاطري انا مش حمل مناهده الله يكرمك فكر في اخواتك هايعملو ايه وانا وانتا غايبين

هارون تحت اصرار صابره :حاضر بس الصبح من النجمه هاجيلك

صابره:ماشي بس خد اكل لاخواتك وانتا مروح اوعى تنسي

هارون شاور على عنيه:من عنيا عيني اليمين زاد وعيني الشمال ميه

صابره بإرتياح: روح يا ابني الله يرضى عليك

مشي هارون ووجع الدنيا بينهش فيه وخد الاكل لاخواته 

هنا اومال ماما فين يا هارون

هارون بتعب لما اخواتك ينامو هاقولك 

هنا طيب مش هتاكل لقمه معانا

هارون بنار طالعه من جوفه:ماليش نفس

هنا بصتله بقلة حيله وسكتت 

هنا طيب طمني ماما بخير 

هارون بص لاخواته الصغيرين وهمس بصوت واطي :ماما في المستشفي العام 

هنا بشهقه: يالهوي ايه اللي حصل

هارون حط ايده على بوقها: هوششش ايه تعبت واتحجزت هناك الصبح هاخدكم ونروح لها

هنا بخوف :ماشي طيب طمني 

هارون بتنهيده اطمني ان شاء الله خير 

طول الليل وهارون بيتقلب على جمر برغم التعب والشقى لكن الخوف اكبر من انه يستسلم لراحه جسمه

هنا صحيت مالك يا هارون انتا لسه منمتش لحد دلوقتي ليه 

هارون بشرود ما ينام إلا خالي البال

هنا ضمته بأمومتها الفطريه الصغيره مش قولت ماما كويسه

هارون غمض عنيه يمسك دموعه ان شاء الله 

مر الليل ومع اول خيوط النهار صحى اخواته وفطرهم وجهزهم وشال جنا ومسك ايد حسام وهنا مسكت ايد حسام التانيه لحد ما وصلو المستشفى وهارون دخلهم عند امهم

هنا بإستغراب:مالك يا ماما هارون قال انك تعبتي مقالش انك تعبانه اوي كده

صابره بإبتسامه طلعت بضعف:متخافيش انا كويسه خلي بالك من اخواتك يا هنا

هنا بدموع: مالك يا ماما كلامك بيخوفني اوووي

صابره:اللي معاه ربنا مبيخافش واحنا مؤمنين بربنا صح ولا ايه يا هنون

هنا هزت رأسها: انا هاصلي كتير وادعي ربنا يشفيكي وترجعي تاني لينا

صابره بإرتياح:ايوه عايزاكي دايما لما الدنيا تضيق بيكي تروحي لربنا تصلي وتدعيله وتشكيله اوعي تشتكي للناس فهمتي يا هنا

هنا بطاعه: فهمت يا ماما بس انتي خفي بسرعه

صابره:قولي يارب

هارون:هنا خليكي مع ماما وانا هاروح اشوف عم ايوب

هنا حاضر

هارون:وخلي بالك من اخواتك 

هنا حاضر هاخليهم جمبي مش هاسيبهم لحد ما تيجي

مشي هارون وقابل عم ايوب

عم ايوب: امك عامله ايه يا ابني

هارون:هاتعمل إيه على حطت ايديك وانا واقف عاجز في النص 

عم ايوب بحزن للي صابه: انا كلمت كذا حد من معارفي وبمشيئة المولي نقدر ندبر جزء من الفلوس

هارون بكسره:على اخر الزمن هانشحت

ايوب: ربنا خلقنا نكمل بعض القوي عشان يحمي الضعيف 

الغني عشان يساعد الفقير 

هارون:الله كريم هاروح انا عشان اخواتي مع امي في المستشفي وانا عوقت عليهم

عم ايوب:ماشي وانا على اخر النهار هاعدي عليكم هاروح بس اطل على العمال واشوف الشغل ماشي ازاي داه مال وأرواح ناس يا ابني متعلقه في رقبتي 

هارون: الله يعينك ويقويك يا راجل يا طيب

وسابه ومشي كل واحد في اتجاه

 وأول ما بعد وبقى لوحده لقى نفسه مشدود في عربيه

محسش الا وهو في الحبس 

 هارون حس بخبط في جسمه بداء يفوق ويتلفت حواليه لقي اكتر من 5 رجاله مرسوم على وشهم الإجرام 

بشله بصوت اجش غليظ: قوم قوم يا حيلتها انتا وقعت ياض ولا الهوا رماك الباقيين ضحكو كل داه 

وهارون واقف ثابت متهزش ثانيه : اللي زيي وقوعه زي وقوع الجبل يتهد فوق رأس اللي يعاديه 

شلاطه بسخريه: ايه يا نوعه توهت من ماما متخافش احنا هانهننك وندلعك ونوديك لماما 

هارون بنفس السخريه :طب الحمد لله انا عارف ابويا وامي انتا بقى تعرف ابوك وامك ولا لقيوك في مقلب زباله 

جنش: الله الله الله الحقوا يا رجاله داه العيل طلعله لسان وبيرد ايه ياض ابوك وامك مقالولكش عيب ترد على الاكبر منك

هارون بشر: لاء ابويا قالي عيب عليك ماتردش على ابن الحرام اللي امه مردتش باب بيتها

حكوره: مين اللي ابن حرام ياض انتا عارف بتتكلم مع مين 

هارون: بتكلم مع واحد محدش عارف اورعة راس ابوه مين 

سنجه: عليا الحرام ما هحلك ياض

حوكشه دانتا جيت لقضاك

هارون: العمر واحد والرب واحد وبدئت معركه دمويه قدر يتصدى هارون ليها بعض الوقت بس الكتره تغلب الشجاعه 

واتضرب هارون بعنف والغريب انه كان متحمل على نفسه لأقصى درجه استغرب منه الكل 

شلاطه بعصبيه: ياض انتا ايه جبروت

هارون بسخريه وهو بيمسح الدم اللي نازل من بوقه ومناخيره بكمه: انا والوجع حبايب وأصحاب وعشرة سنين يعني اعمل ما بدالك اخرك هاتكسر هاتجبر واقوم على حيلي تاني اصلي اتعودت ان الضربه اللي متكسرش تقوي

بصو لبعض 

جنش: كفايه عليه كده يا شلاطه لو تقلنا العيار الواد هايموت في ايدينا قالولنا ربوه مش موتوه

هارون بصلهم بتهكم وقعد وسند ضهره على الحيطه ببرود وسكت بس عقله مع أمه وأخواته 

عم ايوب راح اخر النهار يشوف صابره ويطمن عليهم

عم ايوب: عامله ايه يا بنتي 

صابره بتعب: رضا الحمد لله اومال فين هارون مجاش معاك ليه 

عم ايوب بإستغراب :ازاي داه داه سابني مم الضهر وقالي انه جايلك

صابره بقبضه قلب: ابني الواد راح فين يا عم ايوب

عم ايوب بتهوين: اهدي يا ام هارون هاتلاقيه هنا ولا هنا بيحاول يتصرف ويدبر فلوس 

صابره بصراخ رغم تعبها:مش عايزه فلوس ولا زفت عايزه ابني احب على ايدك شوفه فين وهاتهولي

عم ايوب: حاضر يا ام هارون 

صابره بصت على عيالها ودموعها خانتها

عم ايوب فهم اللي في دماغها :متخافيش انا هاخدهم معايا يقعدوا مع ام مصطفي لحد ما اشوف هارون فين واجيبهولك 

صابره وافقت غصب عنها متقدرش تسيب العيال لوحدهم في المكان اللي سكانين فيه 

خدهم عم ايوب وراح بيته

ام مصطفي :خير يا ايوب ايه اللي جاب عيال الست صابره معاك

عم ايوب قعد على الكنبه: الست صابره في المستشفى وقعت من على السقاله امبارح وابنها الكبير محدش عارف راح فين قولت يقعدوا هنا لحد ما نشوف صرفه 

ام مصطفي بصتلهم بحزن:كبدي يا بنتي ملحقتش تفرحي في دنيتك لا حول الله يارب انا هاقوم احطلهم لقمه يسندو بيها قلبهم ويتقوتو بيها والصباح رباح

مرت 4 أيام وهارون في الحبس كل يوم يتضرب ومقالشي مره أي 

وداه جننهم اكتر وبقوا يزودا الضرب وهو ولا كأنه معاهم كأنهم بيضربوا في حيط لفت انتباه كبير السجن من اول يوم 

شلاطه قام يكمل فيه ضرب وقفه صوت ثبته مكانه زي المسمار

جابر بفزعه:مكانك لو خطيت خطوه هاخلي رجلك تحت الارض وانتا فوقيها تتحسر عليها

شاور جابر لهارون:تعالي ياض

هارون بعزه نفس :اللي عايزني يجيني مبقومش لحد 

جابر بصله بإعجاب:طب تعالي ومش هاتخسر قوم قوم وليك الأمان 

هارون:أماني دراعي وخسراتي في صحتي 

جابر قام لاء عجبتني وكيفتني وتستحق اجيلك ولو انها كبيره اني اروح لحد بس عقلي بيقولي انك عصب وتستاهل

وراح وسنده لحد ما قام تعالي اقعد معايا وقعدوا في مكان المعلم جابر اللي مفيش نفر في السجن يستجري يهوب يميته

جابر :ايه حكايتك بقالك اربع أيام بيتصبح ويتمسى عليك وكلت ضرب لو كله حرامي جزم في جامع يوم جمعه كان تاب

هارون :ليه 

جابر :مش هانخش لبعض افيه محسوبك جابر الحنش 

هارون:حنش

جابر بفخر:اه اصلي كت حاوي قبل ما ادخل الكار كان كيف عندي اربي التعابين والعقارب ومحوي منهم وعلموني وشوش الناس 

هارون غريبه مع ان شكلك يعني

جابر بتكمله: سوابق وكمل بفخر ومسجل خطر وانا واللومان حبايب وأصحاب داه بيتي التاني اه وليه فيه بورش مخصوص 

هارون مط شفايفه برغم ورمها: امممم 

جابر ايه حكايتك بقى جاي ومتوصي عليك ومدفوع فيك كتير 

هارون بصله وسكت

جابر كمل: طلع اللي في جوفك لو فضل جواك هايفضل حمل والحمل لو زاد يخلي صاحبه ينخ لحد ما يبرك 

هارون خد نفس ومحسش الا وهو بيحكي لجابر كل حاجه في حياته من اول ابوه اللي ربى أخواته لحد ما استخسروا فيه الحياه ولحد ما مات واللي جرالهم من بعده 

جابر قام منطور: يا دين النبي ايه داه يا جدع انتا متأكد من انهم اخوات ابوك دول اولاد حرام يا جدع ايه من نسل ابليس مش من نفس الضهر والبطن ولا ايه 

هارون من نفس البطن بس البطن قلابه جابت كلاب وجابت ديابه

جابر عندك حق بس مستغرب ايه اللي رماك هنا وجاي في إيه تهمتك إيه 

هارون رفع كتافه:معرفش كنت رايح لأمي المستشفي ولقتي عربيه خدتني ومحستش الا وانا بفوق هنا 

جابر:يعني لا فيه محضر ولا دياولو

هارون:لاء

جاير يعني لا روحت لظابط ولا مأمور

هارون:بردوا لاء

جابر يا أولاد الابالسه انا كده فهمت الفوله

هارون كش حواجبه:فهمت إيه 

جابر جابوك مدفوع فيك يعني لا دخلت ولا عتبت هنا يروقوك من غير ما يمسهم غبار يعني يوم ما تشتكي اثبت فهمت

هارون :يا أولاد الكلب

جابر مش بقوله تفكير ابالسه 

هارون :والعمل امي عايز اطمن عليها زمانها هاتموت عليا

جابر: متخافش اللي بلغنا انك قاعد اسبوع يتروق عليك بس من الساعادي انتا في حمايتي وعالى صوته هارون في حمايه المعلم جابر الحنش واللي امه فقدته يقرب ويمس طرفه

سنجه بس يا معلم الأمين اللي جابه مش هايكست 

جابر بإجرام آخره معايا عربيه طايشه ويبقى قضاؤً وقدر

وبص لهارون اسمعني ياض الدنيا دي فريسه وصياد الضعيف يعيش طول عمره خايف فريسه لغيره والقوي صياد وصياد شاطر يعرف يختار فريسته ويصطادها صح فأنتا اختار تبقى فريسه غيرك ياكل ويتمرمغ فيها ولا تبقى صياد تختار عدوك وتجيبه على طبق من دهب وتقعد وتتكيف وتتسلطن وانتا بتفصصه وتتمزج وانتا بتمصمصه

هارون بصله بنظره غريبه

جابر ابتسم: جوابك بان في عينك قبل ما ينطقه لسانك براو عليك اسمع مني زوبد الدنيا القوي فيه الاقوي منه الغبي اللي يحسب نفسه قوي واخد الحق حرفه ومعلمنه لو خدته بالدراع يا هاتكسر سا هاتتكسر ولو خدته بالعقل هاتفضل صاحي 24 ساعه تحسب وتفكر يبقى ايه

هارون بإنصات:إيه 

جابر:تخلي عدوك يأمن انك ضعيف ويطمن وانتا مرقدله من تحت لتحت ميغبش ولا يخفى عن عينك لحد ما تعرف زواريقه وتدخل تخبط خبطتك وتقعد تتفرج وتضحك ولا من شاف ولا من دري 

خليك جبروت منين ما يتذكر اسمك يرعب اللي قدامك يتعمله الف حساب خلي ليك شنه ورنه اكبر واحمي واتحامى في الكبير خليك نصير الضعيف وجبروت على الظالم اتقوى برجالتك 

هارون بعنين بتلمع بالاعجاب هز رأسه من غير كلام 

ومرت ال 3 أيام الباقيين على هارون في هدوء كان جزء من كدمات

وشه خف بس قلبه هايموت ويطمن على امه وأخواته 

يا ترى هارون مصيره ايه...؟

وصابره هاتعرف باللي صاب ابنها ولا لاء....؟

يا ترى اللي جاي مخبي ايه تاني......؟