قراءة رواية البلطجي كاملة

تنشر حصريًا على مدونة رواية وحكاية قبل أي منصة أخرى

رقيه بدئت تخطط وتدبر ازاي توقع رأفت واتصلت بحد من معارفها القدام ايام مكانت شغاله في المحاماه 

بشله ست الكل عاش من سمع صوتك

رقيه بخير يا بشله عامل ايه 

بشله عامل خط وماشي عليه اؤمري ايه اللي فكرك بالعبد الغلبان 

رقيه عايزه منك خدمه

بشله اؤمري عيني دي قبل عيني دي 

رقيه طب فتح دماغك وطرطق ودانك معايا 

بشله كلي معاكي يا ست الكل 

رقيه عايزه حاجه كده اللي ياخدها يغيب بس يبقى فايق ويعمل كل اللي اقوله عليه من غير ما يفرهدني

بشله يبقى عليكي وعلى آل.....

رقيه وداه بيعمل ايه 

بشله كل خير بيعمل المطلوب وزياده حبتين وتلاته 

رقيه تمام عايزاه 

بشله بطمع بس داه مهره غالي 

رقيه ماشي عايزاه انهارده 

بشله عيني ابعتلك الطياره لحد باب البيت

رقيه برفض لاء هاقبلك في وسط البلد كمان ساعه

بشله وجب هتلاقيني في مستنيك على نار 

رقيه قفلت معاه وعلى وشها ابتسامه خبيثه لبست وخدت عربيتها ووصلت للمكان المطلوب في ميعادها بالظبط رنت عليه انتا فين

بشله في الدنيا

رقيه اخلص بروح امك 

بشله الله الله وليه الغلط داه يا ست الكل صحيح ليكي عندي جميله بس الغلط مش مقبول

رقيه اخلص مش هانحكي ونتحاكي انتا فين

بشله عند محل .... اللي عند شارع ..... 

رقيه تمام تمام انا قريبه منك خليك معايا ع الخط لحد ما وصلت فتحت الشباك انا قدامك وشيفاك كمل على طول هتلاقيني في وشك مشي على وصفها لحد ما وصل 

بشله شوفتك يا ست الكل 

ميل ع الشباك عاش من شافك 

رقيه واديك شوفتني جبت المطلوب

بشله وهو بيطلع لفه من جيبه 

رقيه مدت ايدها تاخده بشله رفع ايده لفوق لا احنا قولنا ايه هو في عروسه بتطلع من غير مهرها وداه الغالي الغالي اوي اوي اوي

رقيه مدت ايديها في التابلوه وطلعت ظرف ومدته ليه

بشله فتحه وبص ليه وابتسم 

رقيه بمكر المهر والشبكة كمان بس لا شوفتني 

بشله ولا اعرفك انتي مين يا مزمزيل

رقيه بغمزه عليك نور وسابته وطلعت بسرعه وصبت الفيلا وهي بتبص للفه اللي في ايدها بإبتسامه طلعت الموبايل واتصلت برأفت 

مره و اتنين ورد في تالت مره 

رقيه ايه يا رأفت حرقت الموبايل عليك في ايه

رأفت بخبث معلش مخدتش بالي منتي عارفه اني مشغول لشوشه عيني في الميزانيه دي الضرايب يعني الغلطه بفوره وكمل بتلقيح مبطن وغلطه الشاطر بفوره ولا انتي عندك راي تاني

رقيه ولا تاني ولا تالت 

رأفت طيب خير حرقتي التليفون رن زي ما بتقولي ليه

رقيه وهي بتلعب باللفه اللي في ايدها واتكلمت بثقه علشان تثبته كنت عايزه اقعد انا وانتا ورفعت نتصافى انا كلمت رفعت وقالي احنا مسميناش الشركه Triangle 3 R من فراغ احنا تلات أضلاع لمثلث واحد يعني مينفعش واحد فينا من غير التاني خلينا نتصافى

رأفت ببرود ايوه يعني عايزه مني ايه مش فاهم لحد دلوقتي

رقيه يا رأفت منا بقولك هنتجمع انا وانتا ورفعت عندي في الفيلا هانقعد ونتكلم ونتفاهم ومش هاتمشي الا وكل الأطراف مرضيه وانتا كمان هاتكون متراضي

رأفت بسخريه وغموض امممم تمام وماله شوفي الميعاد المناسب وانا اجيلك 

رقيه بسرعه خلاص خير البر عاجله نخليها انهارده 

رأفت لا انهارده صعب دلال تعبانه وميار معتزله في اوضتها وانا مش عارف في إيه خليها بكره او بعده 

رقيه بتسرع على غير عادتها خلاص نخليها بكره بس حاول متحتكش برفعت لحد ما نقعد ونتصافى والف سلامه ميار ودلال فيهم ايه لو كده هاجي ازورهم واطمن عليهم بنفسي

رأفت بوجع الله يسلمك فيكي الخير مش مستدعيه هي بس تعبانه من فراق ابنها وانتي اكتر من يحس بيها منتي سبق واتكويتي بنارهم

رقيه اه عارفه ومجربه ربنا يردهم لينا من تاني ويبعد عنهم الشيطان وشره 

رأفت بسخريه بانت على وشه بس قدر يتحكم في صوته :اللهم آميييين يكفيهم شؤ شياطين الإنس والجن 

رقيه بتغيير للحوار خلاص كده على ميعادنا بكره متنساش

رأفت بتهكم متداري لا ازاي متقلقيش خالص هتلاقيني عندك في الميعاد 

قفل المكالمه ورمى التليفون قدامه على المكتب وبص قدامه بتفكير وشرود هو اكتر الناس درايه بعقل رقيه وشرها 

خد مفاتيحه ورجع الفيلا ودماغه بتشتغل في كل اتجاه بيحاول يربط الأحداث ويوصل لحلول بس للأسف دماغه مع مشاكل بيته وضغطه شغله مش مسعداه خالص 

دخل وهو لسه على شروده 

دلال مالك يا رأفت داخل وانتا سرحان

رأفت بنظره غريبه لا مفيش متشغليش بالك

دلال بو مشغلتش بالي بيك هاشغل بالي بمين يعني 

رأفت بعيالك اللي واحد هج مننا والتانيه قافله على روحها فوق ولا حضرتك مش ملاحظه 

دلال قصدك إيه بتلمح لايه

رأفت بحده وصوت حاد وصارم سبق زمان وقولتلك متشيلنيش ذنب انا مش قده وانتي فضلتي تزني على دماغي لاء ومتسيبلهومش الجمل بما حمل اهو الجمل كله برك علينا لما ضيع عيل والتانيه شكلها عرفت والاكيد ان اخوها قلها انتي مش ملاحظه انها مبقتش بتقعد اصلا معانا ولا بتتعامل معانا من يوم غياب اخوها 

دلال بدفاع وهمي عن نفسها انتا عارف احنا قعدنا قد ايه ندور على عيال اخوك وعملنا المستحيل علشان نوصلهم وهما كأن الأرض انشقت وبلعتهم 

رأفت بصلها بنص عين متأكده دانتي كنتي اكتر واحده جات عليا وقلبتي البيت جحيم على دماغي 48 ساعه في اليوم 24 ساعه وكل ما اجيب سيره اخويا ولا عياله تقوليلي في ايه بينك وبين صابره ومهما احلفلك واشرحلك وانتي ابدا كأنك مصدقتي هما كدبو الكدبه وانتي صدقتيها وعيشتي وعيشتيني فيها بلاش نفتح في اللي فات علشان وجع ليا وليكي وسابها ودخل اوضه مكتبه وقفل على نفسه الباب بالمفتاح

وساب دلال واقفه تبص عليه بشرود ووجع وخوف من اللي جاي

هارون قاعدين متجمعين وبيضحكو ضحكه نسيوها من سنين ضحه مسروقه وسط كومه احزان ضحكة حنين لأيام راحت من سنين وصعب ترجع تاني والكل بيعافر علشان يقدر يرجعها تاني ويعيشها من اول وجديد بعد ما اخيرا قدر يرتاح من سوء التفاهم اللي بينهم بقاله سنين 

وفي عز ضحكهم هنا بقولك ايه يا هارون والنبي إلهي يسترك احنا كمكمنا يا اخويا من قعدت البيت ولا بنروح ولا بنيجي بره الحته أخرنا السوق واخواتك المدارس والدروس وعلى حطه ايدك لما كمكمنا ولا كمكمه الغسيل اللي نسيه صاحبه في الصيف وادينا على حطة إيدك اهو 

هارون اممم انجزي عايزه ايه مهي الدخله دي وراها إنا هاتي من ابو اخر يا هنا انتي عرفاني لا بحب اللت ولا العجن ولا كتر الكلام

هنا إلهي يسترك ناخد يوم نطلع نشم هوا ونروح عن نفسينا شويه ونشم نفسنا شويه سوئت عليك حبيبك النبي ما تقول لاء دانا خللت من قعدت البيت وحفظت الحيطان حيطه حيطه من قعدتي في وشهم 24 ساعه 

هارون عليه الصلاه والسلام بس يا هنا مينفعش هاروح بيكم فين بربطه المعلم كده بالصلاه ع النبي

جنا والنبي والنبي والنبي يا هارون وافق والنبي والنبي عشان خاطري

هارون بااااااس ايه يا بت نازله زن زن زن جار سرسور ودني لما اتخرم 

خلاص منا عارفكم عملتو روباطيه عليا شوفو عايزين تروحو فين وانا هاتهبب واوديكم

هنا بعفويه نروح جنينه الحونات 

حسام بتريقه جنينه الحونات هانروح نتفرج على ايه ع الحونات اللي هناك طب وعلى ايه المشوار اطلعي البلكونه وانتي تشوفي الحونات محنا عايشين وسطيهم

هنا لوت وشها وبعوجت بوقها يمين وشمال طب يا أخويا قول انتا يا ابو الافكار مادام انتا الواد الفتك اللي داير ولافف وعاملي فبها البورم مكان حلو نروح نتفسح فيه 

جنا هاتبص لحسام بخبث 

حسام بصلها بإبتسامه نصر

هارون خد باله منهم امممم استرها يارب انتوا حطيتو روسكم في روس بعض 

جنا بإبتسامه لا خالص والله هي فكره يعني كده 

هارون ايوه اللي هي ايه

جنا ايه رائيك نروح الملاهي 

هارون بصلها بإستغراب وكأنها تنين براسين قدامه نعم يا روح امك ليه شيفاني عيل في المدرسه لابس شورت وتيشريت المدرسه وطالع رحله معاهم 

جنا بتوضيح لا هو انتا فاكر الملاهي ايه 

هارون شويه مراجيح مهو بدل البهدلة يا اختي اخدكم المولد واهو اسهل واقرب واوفر

جنا بلماضه يا هارون بقى بطل رخامه داه هي خروجه يتيمه كل قرن 

هارون ايوه اعمل ايه انا معرفش الأماكن دي فين ولا بيتراح ليها ازاي اعمل ايه يعني

جنا بسيطه نروح دريم بارك 

هارون ايوه ودي فين دي 

حسام في أكتوبر 

هارون نعم أكتوبر ليه هي البلد هنا قصرت لما عايزينا نروح اخر بلاد المسلمين 

جنا يا هارون بقى في إيه منتا داير ولافف البلد من شرق لغرب جات على ارمط الغلبان وتقف وتعرض كمان

هارون بإصطناع الصعبنه حسبي الله ونعم الوكيل ادي آخرة اللي يبقى ابو أخواته وابو العيال يا شويه عيال ورمم كمان

جنا بزن وافق بقى والنبي والنبي والنبي عشان خاطري ورحمه ابوك ورحمة امك عشان خاطري والبني 

هارون بزعيق يابت بااااس ايه دبانه عماله تزن جار ودني كتك القرف عامله زي الدبانه الزنانه اللي عايزه ضرب الشبشب خلاص هاتنيل اوديكم الأمر لله وحسبي الله 

الكل هيص بضحك وانتصار 

هارون هو ليه حاسس اني اتبلفت صح

هنا هزتله رأسها بضحك 

هارون بكيفي على فكره ها

هنا طبعا هو حد يستجري يقول غير كده ومادام وافقت يادوب اللحق وقتي عشان اعملنا لقمه لبكره 

جنا تجهزي ايه يا حجه 

هنا منا لسه بقولك هاجهزلنا لقمه ناخدها معانا اومال هانروح هناك نجوع يعني ولا نجوع طب دنا هاقول اجهز التقليه وهاعملكم شويه محشي سكر كده سكر تاكلو صوابعكم وراه وهو جديد عليكم منتو ياما كلتوه من ايدي 

جنا بصدمه محشي محشي يا هنا في دريم بارك طب متعلميلنا شوبه ملوخية ودكرين بط كمان علشان تبقى كملت 

هنا بعفويه وتصديق طب انتي بتقولي فيها طب والنبي يادوب اللحق اللبس واخطف رجلي لحد السوق اجيب الطلبات واعدي ع الفررجي اجيب من عنده بط مادم نفسك فيه 

جنا خبطت على وشها اقعدي واهدي يا حاجه الله يسترك مش طالبه فضايح هانروح الملاهي بحلل يا هنا 

هنا اومال هناكل ايه نروح قلبنا يسقط علينا من الجوع يا اختي

جنا يا هنا اطمني المكان هناك مليان مطاعم 

هنا بقرف وكشه وش اخ اخ يا قرف بقى اخرها ناكل من اكل الدكاكين يابت دول محدش عارف عملينو كيف

ولا ازاي اخ دانا بسمع عنهم كلام يشيب يا اختي لالالا شيلي الموضوع داه من راسك ال نقعد ناكل في الدكاكين ونبقى فرجه للرايح والجاي

جنا بهزه رأسه بطريقه كوميديه دكاكين بقولك مطاعم ومش اي مطاعم دي بيدخلها الناس الهاي الهاي اوووي اوووي اوووي 

هارون بصلها بجمب عينه وانتي عرفتي منين الناس الهاي هاي اوووي دول يابنت صابره الله يمسي ابوكي بالخير عيشي عيشه اهلك يا بنت صابره 

حسام متظلمهاش يا هارون من سنتين طلعت رحله تبع المدرسه وزمايلنا جم فرجونا على الصور 

هارون ماشي ماعلينا المهم رسيتو على ايه

جنا يا هارون بدل الشيله والحطه والبهدله رايح راجع خلينا نروح خفيف خفيف ومش هانضيع نص اليوم في بهدله الشيل من هنا لهنا 

هارون بمطه شفايف اممممم عايزه ايه يعني انجزي انتوا بقالكم ساعه نازلين دش جار نافوخي

جنا يا هارون يا حبيبي دي خروجه القرن ها مش هانضيعها ولو على الاكل والشرب ملحوقه يعيني في كل حاجه هناك كريب بيتزا شاورما حتى الكشري موجود ولو عايز سوشي تمام 

هنا بلخفنه شو شش شا ايه يطلع ايه داه يا هارون 

جنا اسمه سوشي سوشي

هارون بخنفان سوشي 

حسام بضحك مالك بتقولها بقرف وخنفان كده ليه 

هنا ايوه هو ايه اسمه ايه داه 

هارون بتريقه وهو باصص لاخواته ورافعلهم حاجب ومنزل التاني سمك ني ملفوف برز 

هنا بكشه وش اخييييي عليكي وعلى زفارتك كتك القرف يا شيخه يلا يلا يا معفنه وبتتريقي على المحشي 

هنا وهي بتضرب كف بكف هو داه كل معرفتك بالسوشي 

هارون ببرود ايوه هو ليه وصف تاني 

جنا ايوه سوشي 

هارون ايوه اللي هو ايه ها سمك ملفوف برز وعليه شويه صوصات عشان تشيل زفاره السمك يبقى في الأول والآخر سمك ماليش دعوه بقى بالمسمى انا ليا دعوه بالمحتوى 

حسام خلاص يا هارون سمك سمك خلينا في المهم 

هنا انتا رائيك ايه يا هارون انتا عارف اني بقرف من أكل بره 

ونفسي بتلعى عليا 

جنا والله داه الأكل جميل جربي انتي بس ومش هاتخسري حاجه 

هنا طب انتي واحده بطنك حامضه وطفسه انا ذنبي ايه ها 

هارون بتفكير المشكله ان انتي وجهة نظرك صح وهما كمان وجهة نظرهم صح 

هنا ازي بقى يا ابو العريف

هارون ان احنا رايح مكان مطوح هانروح بشيله وحطه وبهدله ومين هايقعد جمب الشنط فهما هنا صح 

وانتي صح في حته نضافه الأكل 

هنا ايوه وبعدين هما صح وانا صح وبعدين بردوا مرسيناش على حل 

هارون اظن مش هاتيجي من يوم بدل البهدلة والمرمطه ناكل الاكل اللي نعرفه يعني مشاوي لحوم حاجه نكون نعرفها واظن الأماكن اللي زي دي بيكون تحت النظر  

هنا بتفكير 

هارون هااا عايز رد عشان بناء عليه اتصرف 

هنا بقله حيله خلاص لله الأمر من قبل ومن بعد ماشي كلامكم

استقروا اخيرا على اليوم بتفاصيله 

ونام الكل بيحلم بفرحه جديده ترجع إياك طفولتهم المسروقه في شقا الدنيا 

صحيت هنا وجنا من النجمه قايمين يتنططو زي العيال الصغيره 

هنا طلعت تجري على اوضه هارون 

وبوت عالي وبقت تهزه سا هارون اصحي يا هارون يلا هنتاخر

هارون وهو بيفتح عينه نص تفتيحه كده 

يا أولاد الكلب انا مصدقت عيني غمضت وانتوا ورايا ورايا 

هنا يلا بقى هنتاخر 

وجنا على اوضه حسام جنا وقفت جمب السرير وخدت نفس طويل حساااااااااااام اصحااااااا

حسام قام منطور ابو امك غباوتك يا شيخه

جنا طب يلا قوم يا حلو لسه هانلبس ونجهز

طلعت بهدوء مخالف للاعصار اللي دخلت بيه 

حسام قام بيخبط كف بكف 

وخلال نص ساعه كانو كلهم جهزوا 

ونزلو خدهم هارون بتاكسي لحد جراج عربيات

حسام احنا بنعمل ايه هنا المفروض نروح الموقف نركب 

هارون بصله اصبر يا بابا وانتا تفهم اخواتك معانا مش هانبهدلهم في المواصلات 

حسام هاتعمل ايه يعيني رسيني منخدنيش من ايدي زي العسل الصغير

هارون اصبر بقى ونادا بصوت عالي كاورك ولا يا كاورك

طلع شاب في حدود ال 14 سنه 

المعنم هاننون منون انمكان يا معنما 

حسام بتبرقه عنين هو بيقول ايه

هارون بضحك ياض يخربيت ام لسانك لخفنتني دانا كرهت اسمي بسببك

كاورك بضحكه عاليه عنا ايه يا معنما

هارون مش هجادل معاك المهم العربيه جاهزه

كاورك عنوسه غسنتها ونمعتها وبقت فله شمعه منونه

( عروسه غسلتها ولمعتها وبقت فله شمعه منوره)

هارون طب ايدك ع المفاتيح 

خدهم منه وفتح عربيه كيا اسبروتاج

حسام وهو بيبص للعربيه بصدمه بتاع مين دي يا هارون

هارون بصله وعلى صوته عشان الكل يسمعه ومحدش يسأله تاني دي بتاع واحد حبيبي معرفه وهو صاحب الجراج داه كان اتسرق كذا مره وطلب حمايتي وانا بقالي سنين بحميه طلبتها منه إمبارح والراجل كتر خيره وافق

حسام بعدم تصديق بالسهوله دي يديلك عربيته اللي بشيئ وشويات كده لله وللوطن 

هارون منا بقول يا متخلف اني بحمي المكان وأنه يديني العربيه يوم قصاد كل العربيات اللي قدامك دي تبقى في الأمان ولا حاجه 

حسام ازاي بقى

هارون طب اركبوا وانا في العربيه هافهمكم 

ركبو وهارون بداء يتحرك  

حسام ها فهمني بقى 

هارون بص يا سيدي الجراج داه مخصوص يعني لازم عليه حمايه فيه من اول الموتوسيكل لحد التريلا 

وكل حاجه ليها ارضيه غير التانيه يعني الموتوسيكل ارضيته في الشهر 200 جنيه والتوك توك يعمله بتاع 300 جنيه اما العربيات من 500 لحد الألف جنيه يعني المكان داه نهر فلوس داخلاله بس المال السايب يعلم السرقه

وطبعا عايز حمايه لان اللي بيضيع هو اللي بيلبس جاني من كام سنه وطلب حمايتي وانا الحمد لله اسمي زي الطبل وسمعتي زي البفته ورجالتي زي النمل وانا حميته مقابل انه يشغل كام عيل اعرفهم جدعان بيدورو على اللقمه الحلال ومنين ما بقصده في خدمه الشهاده لله عمره ماقال لا

هنا بفرحه بأخوها: ربنا يحميك لشبابك ويبارك فيك وفي دراعك 

حسام بص لهارون بفرحه واكتشف انه كان واخد فكره غلط عنه وارتاح ان كل يوم بيطمن عن اليوم اللي قبله ان اخوه جدع بجد مش مجرد بلطجي جاي ع الغلابه 

واخيرا وصلو أكتوبر بعد معاناه ووصلو دريم بارك نزل هارون وركن العربيه في الجراج المخصوص هناك   

جنا اتلفتت حواليها بإنبهار من شكل العربيات وميلت على هنا بهمس شايفه يا هنا العربيات حاجه تفتح النفس اهي دي الناس اللي عايشه وضاربه الدنيا صرمه

هنا بتعقل قولي الحمد لله احنا احسن من غيرنا وشاورت على واحد بيلم من الزباله شايفه داه يتمنى عيشتك ويحسدك عليها كمان وانتي بصيتي لدول ونسيتي دول

جنا لا والله الحمد لله طبعا انا بس بحلم واتمنى يمكن ربنا يستجاب انما انا عارفه والله اني احسن من غيري كتييير اوووي

هارون كان سامع حوارهم وابتسم انه اخيرا أخواته قدروا يفهمو معنى الحياه ويقدرو النعمه اللي هما فيها من غير اعتراض 

قطع التذاكر ودخلو هنا وهي بتتلفت حواليها الله إيه الحلاوه دي اتاري عندكم حق يا مواكيس اول مره تقولو حاجه عليها القيمه 

بدئوا يلعبو حتى هارون اتخلى عن كبريائه ورجع طفل تاني فرحان وسطيهم بس منسيش دوره في حمايتهم وعينه مغفلتش لحظه عنهم

جنا وحسام اصرو يركبو قطر الموت هارون تحت اصرارهم وافق وقطعلهم التذاكر وبداء يتحرك 

هنا بصوات يالهووووي الحقوني هاقع هاقع يا أولاد الكلب نزلوني 

الكل فصل يضحك عليها هنا طب والنبي عايزه اروح الحمام يخربيوتكم كانت شوره مهببه منكم لله انا ايه اللي خلاني اسمع كلامكم يا هارووون نزلني والنبي 

غمضت عنيها وبدئت توشوش

اش اش اش اش 

لحد ما نزلو ومحدش كان فاهم عي بتقول ايه

نزلت وهي بتسند ركبها بإيديها ياماما ياانا يا أبا منكم لله ومن شورتكم المنيله حاسه ان الدنيا بتلف بيا زي المروحه منكم لله كات شوره مطينه بطين

جنا وهي بتضحك اجمدي يا هنون ايه دي لعبه

هنا لعبت عليكي نفسك يا بعيده امشي من وشييييي

جنا بضحك وانا مالي يا لمبي الله 

هنا مهي شورتك

جنا والله مش كان من شويه اول مره نقول حاجه عليها القميه وهي بتقلد طريقه هنا 

هنا طب غوري بدل ما اطسك في وشك باللي في رجلي

جنا وعلى ايه 

حسام خلينا ناكل لقمه ونكمل لسه اليوم طويل 

هارون ماشي وطلعو لمطعم بيعمل ساندوتشات مشاوي وطلبو الأكل وقعدوا ياكلو 

جنا الا هو انتي كنتي بتقولي ايه وعماله توشي زي الراديو اللي اتقطع إرساله 

هنا كنت بتشاهد من الخوف قلبي كلن هايقف يا أولاد الكلب

جنا بضحك يا شيخه يعني اششششش دي اشهد ان لا إله إلا الله 

هنا ايوه يا اختي كنت حاسه اني نسيت الكلام 

الكل ضحك على هنا وعفويتها

خلصو وهارون دفع مبلغ محترم وطلعو يكملو لعب وهارون محاوطهم بحمايته زي اللي الصقر اللي محاوط صغاره بس منسيش روحه في الفرحه والضحكه معاهم وطول الوقت يتصورو كتييير اوووي

يا ترى فرحتهم هاتكمل على خير ولا للقدر رآي تاني

يا ترى رقيه هاتنجح ويقدرو يوقعو رأفت 

يا ترى رأفت مصيره ايه 

يا ترى آخره الطمع ايه.

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة