قراءة رواية البلطجي كاملة

تنشر حصريًا على مدونة رواية وحكاية قبل أي منصة أخرى

هارون عدا على الفيلا اطمن ان كل حاجه بقت كويسه خد بعضه ورجع الوراق 

هنا حمد الله على السلامه يا هارون

هارون هز راسه الله يسلمك يا هنا 

وبص لجنا وحسام اعملو حسابكم وجهزوا شنطكم علشان خلال يومين تلاته هانسيب هنا ونروح الفيلا

جنا بفرحه اتشعلقت في دراع هارون بجد والنبي

هارون بإبتسامه اه بجد يومين اكون ظبط هنا علشان مسبش المنطقه سداح مداح لكل من هب ودب ييجي وينطط على الناس 

جنا عضت على شفايفها بطفوليه طيب عايزه اجي معاك الشركه بتاعتك اتفرج عليها عشان خاطري وطبطبت على صدرها بإيديها والنبي والنبي عايزه اشوف الشركه بتاعتك زي بتاع التلفزيون كده والبطل داخل لابس البدله والكل بيبص عليه بهيبه والساعه شايله الشنطه

هارون وهو بيزق ايدها بهزار ليه يا اختي واحدك المولد ولا فرح تقعدي تتفرجي اتهدي واقعد يابت 

وبص لاخواته اقعدوا عشان عندي كلمتين لازم اقولهم للكل قبل ما نمشي 

هنا قعدت جمبه خير يا اخويا وغوشتني 

هارون بتنهيده لا مفيش يا هنا اطمني بس فيه كلمتين لازم ولابد منهم علشان محدش يرجع ويقول اني بخبي ولا بستعر منكم ولا كلام ملهوش لازمه 

حسام بحرج خلاص بقى يا هارون قلبك ابيض منا فهمت واعتذرتلك 

هارون بتنهيده معلشان فهمتوا وعرفتو الماضي وكل اللي فات بقى على عينك يا تاجر فلازم تكونو معايا في اللي جاي على نور علشان محدش يقول كأني ولا يكرر الكلام تاني 

الكل بص لبعضه ورجعو بصوله 

هارون ركزوا معايا علشان الكلام داه هاقوله لمره واحده علشان مش عايز ارجع اعيده تاني بصوا بقى احنا هانتنقل من حياه لحياه تانيه خالص الحاره محدش منكم هايبقى ليه صله بيها وانا كفيل بيها لاني هنا كبيرها والكبير مبيسبش مكانه الا لما ييجي اللي بعده يشيل منه وعنه 

هنا بحزن يعني هانسيب جيرانا اللي عيشنا واتربيتا وسطهيم 

هارون اه لان معنى رجوعكم معناه ملي ن سؤال وسؤال انا فى غنى عن الاجابه عليهم للناس في الوقت الحالي على الاقل 

 وكمل بترقب وعنيه بتتنقل عليهم بالدور دلوقتي انا مضطر أظهر في الاعلام والسوشيال ميديا بقوه وداه غصب عني لان المشروع وظهوره للعلن اجبرني على داه وقبل ما حد يقول مستعر ومش مستعر تشيلو الهبل داه خالص من دماغكم لا ينفع تظهروا ولا ينفع اسم شافع المالكي يتربط بإسمكم في جمله واحده ولا يتذكر على لسانكم 

هنا بصتله بإستغراب وكشت وشها وكأنها بتحاول تقرأ اللي جواه 

هارون خد باله وكمل بدون رد فعل كل اللي يسأل اسمك ايه حسام احمد هنا احمد جنا احمد وبس لو ازمت اوووي شافع في أضيق الحدود داه لو فرضا اضطريتوا إنما لقي المالكي يتمحي تماما من لسانكم وحياتكم وكأنه لم يكن في يوم من الأيام 

حسام بفضول :اشمعني وليه بتقول كده ودلوقتي تحديدا ما الناس هنا عارفه اسمنا بالكامل 

هارون هنا الناس متعرفش أهلنا ولا ليهم صله بيهم ناس على الله حكايتهم واصبر للآخر وهاتعرف الإجابه عن كل اللي بيدور في دماغك من غير ما تقعد تسأل وتستفسر لاني مش هاعيد الكلام داه تاني 

هنا ماشي بس عايزين نعرف ليه بردوا

هارون بنفخه :لان بمنتهي البساطه العقارب اللي حوالينا لسه سايبه وانا لسه ملمتهاش ولا جه اوانهم

هنا بغضب بان على ملامح وشها ولح أمته هاتسيبهم مطلوقين في حياتنا وبيخربوها 

هارون بشر واجرام اترسم على معالم وشه :لحد ما يأون الأوان وبإيدي دي وخبط بإيده بعنف على التربيزه كسر الرخامه اللمهم في اوسخ مقلب زباله وأولع فيهم بفلق بناره واقف اتفرج عليهم وهما بيتشوو جواه لحد ما يبقوا كومه رماد ادوس عليها بجزمتي واعدي واعيش اللي جاي على نضافه وبص لحسام بحده فهمت 

حسام هزله راسه بالموافقه : اه فهمت خلاص يا هارون متشغلش بالك والي عايزه هايكون من هنا وجاي ومحدش لا هيسأل ولا يستفسر اللي هاتقوله هايكون وبس 

هارون براحه كويس اوووي انك فهمت وقدرت لان الوقت اللي جاي عايز عيني تبقى في نص راسي وعايز بدل العين مليون محوطاني في مليون اتجاه علشان الضرب هاييجي من كل مكان ومن تحت لتحت قبل ما يبقى في الوش كمان

هنا بإحساس بالمسؤولية واحنا في ضهرك وعينك اللي تشوف بيها في غيابك والضهر اللي يسند في ميلتك اطمن وطمن بالك

هارون غمض عنيه براحه وارتياح 

***************************

عادل طلع بالشاي : احلى كوبايه شاي وصايه حط الصينيه وخد كوبايته وشرب بوق عظمه على عظمه 

وبص لقي كل واحد شارد في ملكوت: مالك يا مهدي بقيت كل ما اشوفك الاقيك سرحان بقالك كام يوم على نفس الحال

مهدي :ميار عماله تدبل يوم عن يوم وانا مبقتش عارف اعمل ايه معاها بقالها شهور وشهور على نفس الحال لا بتخرج ولا بتتكلم مع حد وطول الليل والنهار في اوضتها حتى الفلوس بتنزل يادوب تاخدها وتجيب طلباتها وتحطها في اوضتها وترجع تقفل على نفسها تاني  

عادل طيب وانتا ناوي على ايه دلوقتي 

مهدي مش عارف عايز اخدها بعيد عن البيت لو فضلت كده ممكن يحصلها حاجه او تدخل في حاله نفسيه اسواء من اللي هي فيها اساسا

عاصم طيب ما تجيبها هنا

مهدي انتا اهبل اجيبها هنا فين في شقه مليانه رجاله ليه شايفني مركب قرون 

عاصم يا عم اهدا الشقه اللي فوق منا فضيت ممكن تأجرها ومنها تبقى تحت عينك تروح شغلك وانتا مطمن وتيجي تقعد معاها 

مهدي تفتكر هاينفع 

عادل وايه اللي يمنع نفعه 

مهدي لأننا طول النهار بنكون في الشغل وبنيجي على المغرب وطول الوقت داه هاتبقى لوحدها 

عاصم من النحيه دي اطمن الناس هنا اولاد بلد وجدعان وانتا كمان أكد عليها متفتحش الباب طول اما انتا مش موجود لحد ما نشوف الايام اللي جايه مخبيه ايه

مهدي مش عارفه انتا رائيك ايه يا سراج 

سراج وهو باصص في الموبايل

مهدي: يا سراج في ايه عمال اكلمك سيب التليفون اللي في ايدك داه ورد عليا يا اخي

سراج رفع وشه ومعالم وشه بارده انا عرفت مكان اولاد اونكل احمد عايشين في الوراق

الكل في صوت واحد :ايه 

سراج هز راسه بهدوء 

عاصم عرفته منين

سراج وهو بيرفع التليفون قدامهم عملت قيد عائلي ولسه اصل من شويه 

مهدي طيب كده كويس قطعنا نص الطريق 

سراج وكأنه فقد كل معاني الحياه مرات اونكل احمد ماتت

الكل بص لبعضه بصدمه 

مهدي اول من قدر يتمالك اعصابه 

انتا جبت الكلام داه منين 

سراج فتحله القيد العائلي 

مهدي بلجلجه مش يمكن عملو كده علشان يخبو وجودها مثلا

سراج ببوادر امل تفتكر

مهدي مش عارف ممكن ليه لاء متنساش ان اللي حصل معاها مش سهل 

عاصم يبقى نروح ونتأكد 

عادل ازاي 

عاصم نروح المكان داه ونسأل عليهم واكيد هو مشهور هناك مادام زي ما بيقولوا يعني انه احم احم بلطجي 

مهدي قصدك نسأل الجيران عليهم 

عاصم اه

سراج طيب يلا نروح

مهدي دلوقتي 

سراج اه مش هاتستني اكتر من كده 

عادل عندك حق دخل عاصم وجاب الملف اللي مركون من سنين في درج المكتب وطلعو مع بعض ونزلو راحو الوراق

********************************************

هارون كان وصل الفيلا الكل عمال يتلفت حواليه بإنبهار من جمال الفيلا

جنا الله يا ابيه المكان هنا تحفه اووي بجد

هارون بسخريه وهز راسه ابيه لسه مكملتيش ساعه وبتقولي ابيه ولسانك اتعوج اومال بعد كام يوم هاتقولي ايه وتعملي ايه

جنا وهي بتعدل ياقتها بطريقه وهميه وكوميديه مش لازم نشوفك ونبقى زيهم علشان محدش يقول اننا بيئه وغيرهم 

هارون بصلها بتركيز لاء اسمعي مني بقى الكلمتين دول انا لا عايزكم زيهم ولا شبههم خالص مش عايز تقلعي توبك وتلبسي توب مش توبك عايزك جنا بنتي اللي اتربت على ايدي اللي هنا كلهم مناظر كدابه وقنعره فاضيه خليكي في لونك اوعي الألوان المبهرجه اللي حوليكي دي تشدك وتاخدك لدوامه وسخهم دي الوان قشره وعيره يا جنا

جنا قصدك ايه

هارون وهو بيلف دراعه حوالين كتفها وبياخدها لجوه الفيلا قصدي ان حضرتك عندك دلوقتي مذاكره انتي ثانويه عامه عايز مذاكره من نار وانتي كده زي الشاطره تأملي الكتب أكل علشان مفيش كليات ولا جامعات خاصه عايز مجموع يشرف عايز اشوف تعبي وشقايا في مجهودك ونتيجتك تمام

جنا حاضر يا هارون هارون بتش جبهتها بحب ربنا يحفظكم ليا يلا 

جنا هزت راسها وطلعت اوضتها وكملت فرجه عليها بإنبهار 

هنا وهي حاكه ايديها فوسطها خلصت يا اخويا وصلت الحب والدلع مهي خلاص جنا اللي بقت على الحجر وانا راحت عليا

هارون بحب طول عمرك نصي التاني يا هنايا

هنا بحب ربنا يخليك ويجبر بخاطرك زي ما دايما جابر بخاطر الكل 

هارون اللهم امين اه على فكره انا كلمت مكتب تخديم يجيب بنت ولا اتنين يساعدوكي في شغل البيت 

هنا برفض شوحت بإيديها لا يا اخويا انا مبحبش حد غريب يدخل بيتي دول بتبقى عينهم وحشه ولا بيقدروا تعب الناس وعينهم على اللي في ايد غيرهم 

هارون يا هنا افهمي المكان هنا مش الشقه اوضتين تلاته الفيلا كبيره وتعب عليكي وهتحتاجي ناس كتير تساعدك فيها 

هنا لاء يا اخويا لما ابقى اشتكي ابقى اتكلم 

هارون بصبر يا هنا الموضوع ميتاخدش كده هاتتعبي وحيلك هايتهد

هنا لاء مهي المعدوله اللي فوق تبقى تساعدني بدل ما هي قاعده طول الليل والنهار على التليف ن والمدعوق النت 

هارون طيب فهميني فيها ايه لو جبتي بنت ولا اتنين يساعدوكي اختك ثانويه عامه يعني عايزه تركيز 

هنا بقلق مبرر: يا اخويا وانا ايش عرفني اللي جايه دي مين ولا بنت مين ولا مين اللي ممكن يكون زاققها علينا واديك بقيت قيمه وسيما وحاجه امله اهو 

هارون بتعب من المناهده: يا هنا يا هون افهميني الله يخليكي الموضوع مش بيتحسب كده انتي بنفسك هاتقولي جااااي مش ااااي بس

هنا :ريح روحك محدش غريب هايخطي البيت ولا حايتنا تبقى مشاع ولا اقعد وابقى متكتفه منهم لا يمسعوا ويفتنوا انا اتعودت منك طول حياتي أن مطرح ما اليمين تأمن الشمال تخون وانا من بعد نفسي مبأمنش غير ليكم وبس يعني منا فينا فأقفل الكلام بقى لانه لا هايودي ولا هايجيب معايا 

هارون بنفخه براحتك انتي حره بشوقك بس لو تعبتي ابقى قوليلي 

هنا متخافش لو تعبت اختك معايا تسد اهو تتعلم شغل البيت عشان ينفعها 

هارون بحده جنا عندها مذاكره

هنا بإبتاسمه بعد الامتحانات ارتاحت كده 

هارون وهو طالع من الباب براحتك هو كول ما انتي دماغك جزمه كده حد هايرتاح ولا يشوف راحه دانا ليا الجنه منكم والله 

****************************

وصلوا اخيرا الوراق ونزلوا الاربعه وبدئوا يسألوا عن هارون احمد شافع المالكي والكل دلهم على البيت حسو بإنتصار وصول المنطقه

سراج وقف شاب :لو سمحت فين بيت هارون

الشاب بيت المعلم هارون اهو 

سراج ماشي شكرا 

اتحركوا وقبل ما يدخلو البيت واحده من الجيران انتو عايزين مين

سراج عايزين هارون

الست بشهقه :هارون كده حاف اسمه المعلم هارون وهو اساسا ساب الحته 

سراج بصدمه ايه متعرفيش راح فين

الست:علمي علمك 

مهدي بسرعه طيب والست صابره طيب معاهم ولا لسه موجوده

الست بحزن :كبدي الله يرحمها دي ماتت من سنين بس بتسألو ليه 

مهدي بصدمه كنا عايزينهم في مصلحه  

عادل سحب مهدي وعاصم سحب سراج اللي كانوا في دنيا تانيه وركبوا العربيه ومشيو

كل داه تم تحت سمع ونظر رجاله هارون وأول ما مشيو رفع التليفون

هارون وهو واقف في الجنينه

 ايوه يا برنس 

البرنس كان فيه جماعه شكلهم من بره الحته وكانوا بيسألو عليك يا كبير

هارون بإستغراب جماعه مين دول 

البرنس علمي علمك هما فضلو يسالو عليك. على الست صابره

هارون بإستغراب امي وبعدين 

البرنس ولا قبلين لما عرفوا بموتها اتصدمو وخدوا بعضهم ومشيو

هارون شكلهم ايه دول ومين 

البرنس شكلهم بهوات كده بس باين عليهم لسه شباب يمكن من سنك اة أصغر معرفش بس باين عليهم العز

هارون بقلق طيب لو جم تاني تحرجم عليهم وتديني خبر. حذاري ينفدوا من ايدك 

البرنس وجب اعتبره حصل يا معلم 

هارون ماشي 

قفل معاه وكل عقله وتفكيره مين اللي جاي بعد سنين يسأل على امه

*****************************************

رأفت رجع الفيلا لقى دلال قاعده سرحانه ومحستش بوجوده

رأفت وهو بيخبط على كتفها مالك 

ظلال اتنفضت اتنهدت ويصتلهم كنت فين غايب بقالك كام يوم 

رأفت قعد على الكرسي اللي قدامها كان عندي شغل في اسكندريه في المينا كنت بخلصه انتي اللي قاعده كده ليه 

دلال بصتله بهدوء بفكر عارفين مين اللي جاه هنا 

رأفت كش وشه مين 

دلال اخواتك 

رأفت مين فيهم

دلال رقيه ودلال 

رأفت خير كانو عايزين ايه محراكين الشر دول 

دلال بتسرع :هو انتا صحيح يا رأفت عايز تفض الشراكه مع اخواتك

رأفت ميل راسه :آآآآآآه هي الحمايه كده بقى 

دلال جاوبني الكلام داه صح ولا كدب 

رأفت لاء صح وصح اووي كمان

دلال بصدمه ليه 

رأفت ببرود مزاجي كده 

دلال يعني ايه مزاجي كده فهمني ليه جاي بعد السنين دي وتفضها ما كنت بنيت لوحدك بقى 

رافت بحده لأنهم ناويين على الغدر والخيانه 

دلال بعصبيه انتا تقول ناويين على الغدر وهما يقولو ناوي على الغدر ايه العيله اللي كلها مخونه بعضها دي وعمالين يغدرو ببعض مين فيكم صادق ومين كداب في العيله الغداره دي كلها

رأفت بتهكم :وياترى لسه واخده بالك دلوقتي 

دلال لا يا رأفت خدت بالي من زمان بس قولي غيابك مع تداريتك عليا موضوع فض الشراكه داه سببه ايه ها كنت فين يا رأفت كنت بتدور على صابره وعيالها 

رأفت وهو بيشد هدومه بعصبيه تاني صابره تاني مش كبرتي على الكلام داه والغيره دي يا شيخه سيبوا صابره في حالها عايزين منها ايه تاني ها واطمن يا دلال انا لو شوفت صابره في طريق مهعرفهاش ايه عايزين تعيدو كدب زمان كتبتو الكدبه وصدقتوها وانتي اكتر واحده عارفه ومتأكده من جواكي امه كدب بس لازم تبرري لروحك علشان تريحي ضميرك كفايه كفايه اوووي اللي احنا فيه وكفايه اللي جرالنا من كتر الظلم وياعالم بكره لسه مخبيلنا ايه تاني 

دلال بخوف من زعيق رأفت قصدك ايه 

رأفت بعصبيه قصدي معروف وانتي عارفه كويس اوووي انا قصدي ايه فبلاش لف ودوران على بعض داحنا عشرة سنين يعني من بصه فوشك اعرف اللي في جوفك

في عز خناقتهم وكلامهم دخل مهدي وسمع كلامهم عن صابره وبصوت عالي طلع على حدته وعلوه ميار في البلكونه 

مهدي بزعيق وانهيار: انتا كنت عارف كنتوا عارفين 

رأفت بقلق مسك دراعه :عارف ايه في ايه وداخل بعد غياب شهور وشهور تزعق ليه اقعد وفهمني بتتكلم على ايه 

مهدي شد دراعه ونطر ايد رأفت بحده: كنت عارف ان طنط صابره ماتت صح

رأفت بصدمه وعنيه برقت وصوته طلع زي الهمس :انتا بتقول ايه ماتت ماتت قبل ما تسامحنا ماتت صابره ماتت وسابت زنبها في رقبتنا كلنا

دلال اترمت على الكرسي وحست ان رجليها هاتخونها وتقع اتكلمت بصدمه وعنيها مبرقه: اييييه

مهدي بزعيق ايه تمثيليه جديده دي كمان عايزين تقنعوني ان واحده ميته من اكتر من 15 سنه متعرفوش ومش اي واحده دي مرات اخوكم وأم عياله 

رأفت بصدمه وحرقه ودموعه ملت عنيه مسكه من دراعه بعنف بأمل انه يكدب اللي قاله واللي ودانه سمعته :انتا عرفت الكلام داه منين 

مهدي بصله بغضب لعمى وكره ولاد اخوك في الوراق بس على ما عرفنا وروحنا كانوا سابو المنطقه كلها ليه الله اعلم عملتولهم ايه تاني معرفش 

رأفت بزعيق انا بسألك عرفت منين

مهدي سحب ايده بحده وطلع القيد العائلي من جيبه اتفضل داه القيد العائلي اللي بيثبت ان طنط صابره ماتت من سنين من سنين السنين 

رأفت خطف الورقه وصدمه احتلت كل جسمه وقفت عقله اللي بقا خاااوي زي جزع النخله اللي نخره السوس فضل واقف مكانه وهو عينه بتعيد قرايه تأكيد وفاه صابره مره واتنين عشره وعشرين 

مهدي كمل بزعيق ايه انتوا ايه شياطين انا مبقتش عارف مدي بشاعتكم ايه بالظبط دانا بحمد ربنا اني خرجت من تحت جناحكم ورفع عينه للبلكونه على ميار اللي واقفه مصدومه ودموعها شلال نازل على وشها 

عندك حق دول ميتأمنش يتعاش معاهم وانا نفسي هخاف عليكي منهم جهزي نفسك يومين وهاجي اخدك بعيد عن نارهم

قبل ما يتحرك دلال مسكت دراعه بحرقه ودموع لا لا يا ابني متعملش فينا كده دانا مصدقت كحلت عيني بشوفتك تاني دانا كنت بموت من غيرك متظلمناش يا ابني 

مهدي بوجع بصلها وبص لابوه: ياريت كنت ظالمكم كان من باب اولى تقلق على اخوك و عياله طيب انا وخبط على صدره بقبضه ايده بعنف سهل تخلف غيري وغير اختي انما اخوك هاتجيب غيره منين عرفني يمكن يكون عندك اجابه تريحني وتطفي ناري بتقولي ظالم مين ظالم مين كل داه وشاور بإيده على الفيلا حرام في حرام في نار في جهنم كنتوا بتربونا على قيم إيه  

رأفت قدر يستوعب هز راسه بشرود وحزن متظلمنيش 

مهدي بحرقه دموعه نزلت انتوا اللي ظلمتو الكل وظلمتونا معاكم انا مش ظالم زيكم. برئ انا واختي من ذنبكم انا هابعد عن ناركم انا واختي مش هاسيبهالكم علشان متتاخدش في الرجلين بذنب غيرها وذنب مش ذنبها انسونا زي ما نسيتو الأغلى كان الأولى تلم لحم اخوك على الاقل احنا بقينا طول بعرض إنما اولاد اخوك متلطمين في الشوارع وهما عيال وياعالم جرالهم ايه من تحت راسكم 

وبص لأمه مظلمش دانتوا اساس الظلم سنين وسنين عايشين وبتاكلو وتشربو وتتفسحو وتشتغلو وتكنزوا فلوس خليها تنفعكم الله الغني عنها لما تبقى تعرفوا عيال اخوكم فين ابقوا اتكلموا عن الظلم سيبونا في حالنا بقى 

وبصلهم بإستحقار وطلع زي الإعصار اللي ساب وراه الخراب

ياترى رأفت هايعمل ايه…

ياترى مهدي هايسكت ….

ياترى هارون ناوي على ايه….

ياترى مصير دهب صابره هايتعرف ولا إيه….

ياتري اللي جاي لسه مخبي ايه تاني….

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة