رواية جديدة أحببتها دون أن أدري لأسماء عبد الهادي - الفصل 6 - السبت 20/9/2025
قراءة رواية أحببتها دون أن أدري كاملة
تنشر حصريًا على مدونة رواية وحكاية قبل أي منصة أخرى
رواية أحببتها دون أن أدري
رواية جديدة قيد النشر
من قصص و روايات
الكاتبة أسماء عبد الهادي
الفصل السادس
تم النشر السبت
20/9/2025
سيف هزلها دماغه باعجاب
ولي لي اتغاظت
انا ليه حاسة ان الصوت دا مش غريب عليا .. ماشي يا بتاعة انتي بتترسمي عليا من اول لحظة ليكي انا هوريكي لما سيف يرقيني هعمل فيكي ايه
سيف بصوت عالي للكل
يا شباب عايزكم ترحبوا بالمديرين الجدد طبعا مستر علي غني عن التعريف اصبح رئيس الفرع والاستاذة RM مديرة الإدارة الجديدة
الكل بدأ يصقف ويهنيهم والحفلة كانت هادية وبسيطة لمدة ساعة وبعد كدا كله رجع لشغله من تاني
علي لرنا
تعالي اتفضلي هوريكي مكتبك الجديد اللي هو كان مكتبك
ولما رنا راحت معاه علي قال
دا يا ستي مكتبك الجديد لو حابة اي تغيرات فيه عيشي براحتك محدش هيمنعك دا بقا عالمك دلوقتي بالتوفيق
شكرت رنا علي وقعدت على مكتبها بفرحة
ياااه انا مش مصدقة نفسي معقولة معقولة انا رنا بقيت مديرة إدارة في اكبر شركات مصر يااه حلم بعيد واتحقق
بعد كدا خلعت القناع وقررت انها مش هتلبسه ف مكتبها الا قدام سيف ولي لي بس
بعد كدا طلبت السكرتيرة تجيلها
السكرتيرة
تحت امرك يا فندم
رنا
عايزة كل الملفات وتعالي وضحيلي كل حاجة كان مستر علي بيعملها
السكرتيرة
اه اوي اوي مستر علي طلب مني دا فعلا بس انا انتظرت حضرتك لما تطلبيني
رنا ابتسمت
شكلك شطورة وهتعجبيني يا..
وبصت للاي دي اللي معلقاه وقالت
يا سلمى
سلمى شكرا لثقة حضرتك بس ااا هو حضرتك
رنا
قولي عايزة تقولي ايه
سلمى
حضرتك نسيتي تلبسي القناع
رنا ضحكت
ههه لا منستش انا فاكراه كويس بس اظن ملوش لزوم البسه ف مكتبي ولا انتي ايه رايك
سلمى
لو عايزة الصراحة يا فندم حضرتك جميلة اوي والقناع مخبي جمالك دا رايي الشخصي حضرتك متلبيسهوش تاني
رنا ابتسمت
ميرسي ليكي بس انا ليا اسبابي يلا نبدأ شغلنا
وفضلت رنا تشتغل لحد وقت انتهاء العمل
بعدها لبست قناعها و كلمت السواق ولما خرجت لقته واقفلها بالعربية ورجعت البيت ورحبت بيها مريم
حمدا لله على السلامة يا روحي اتاخرتي اوي مش متعودة تغيبي عني كل دا الظاهر اني هغير رايي ف موضوع الشغل دا انا عايزاكي تفضلي جنبي علطول
رنا ضحكت
حبيبتي يا ماما مريم وانتي كمان وحشتيني اوي والله ... اما موضوع افضل جنبك دا فأنا الظاهر كل اللي يعرفني بيبقى عايز يحبسني ف البيت
مريم
بعيد الشر عنك مقصدش طبعا دا
رنا بابتسامة
عارفة يا ماما والله انا بس بهزر معاكي هطلع اغير هدومي وانزل ندردش سوا واحكيلك عملت ايه طول اليوم
مريم
تمام وانا هطلب من الشغالة تجهز الغدا لحد ما تنزلي
ولما طلعت رنا اوضتها
نزل سيف وهو بيقول
ايه يا ماما رنا لسه مرجعتش من برا بردو... انتي بتقولي خارجة من الصبح كانت فين دي
مريم
لا رجعت من شوية وهي فوق ف اوضتها ونازلة دلوقتي علشان نتغدى كلنا سوا
سيف
امم واضح ان حضرتك معندكيش مانع من خروجها دا وانها تتأخر برا كل الوقت دا
مريم
لا اطلاقا البنت طول عمرها محبوسة خليها تاخد فرصتها بعدين انا واثقة فيها مليون ف المية
سيف باحباط
يا ماما .. بلاش ثقتك الزايدة دي حضرتك طيبة وبتصدقي الناس بسرعة لكن معتقدش ان الأسلوب دا ينفع نطبقه طول الوقت
مريم
انا عارفة بعمل ايه كويس وليا نظرة ف الاشخاص .. زي نظرتي ف لي لي كدا عمري ما ارتحت ليها ولا هرتاح ليها ابدا
سيف هنا انزعج من كلام امه وقال بنبرة شبه عصبية
انما مرتاحة للجاهلة الغبية رنا مش كدا ماما حضرتك بتفكري ازاي
مريم
سيف متنياش ان رنا بنت عمك وف امانتك متقولش عليها كدا تاني
رنا هنا جت وسمعت كلام سيف لكنها ردت ببرود
سيبيه يا ماما يقول اللي هو عايزه احنا مش هندخل جو دماغ الناس وتفكيرهم علشان نصحح مفهومهم عننا كل واحد بيشوفنا بعين طبعه .. ان كان هو شايفني كدا فأنا هحترم ضعف نظره معلش
سيف بصلها بانزعاج وزعق
واخيرا البرنسيسة رجعت وليها عين تتكلم وتتفلسف كمان .. ممكن افهم كنتي فين يا انسة يا محترمة
قالها سيف بنبرة أعلى شوية
رنا قالت بنبرة جادة
الانسة المحترمة كانت ف مكان محترم وماما مريم عارفة انا كنت فين كويس اوي وانا مش مضطرة اقولك عليه ومش هتجبرني على دا.. يا ريت تفهم كلامي كويس
قالتها وبصت لمريم
يلا يا ماما انا واقعة من الجوع
هز سيف دماغه
البنت دي جايبة الثقة دي كلها منين بس
هنا مريم نادت على سيف
يلا يا سيف الأكل هيبرد ورنا جعانة
اتنهد سيف واخد نفس طويل وهو بيضغط على أسنانه ببعضها
وراح قعد معاهم وبدأ ياكل بهدوء تام
ورنا كمان بدأت تاكل وتضحك وتهزر مع مريم ولا كأنه موجود
سيف بص لأمه وقال ف نفسه
ماما بتكون سعيدة معاها وبتضحك من قلبها بعكس مع لي لي بشوف وشها متعكر اول ما تشوفها وكمان بتعاملها برتابة... لكن لا .. استحالة اسيب لي لي علشان رنا بنت عمي حتى لو كانت جميلة .. لي لي مش وحشة لي لي جميلة بردو والشكل مش كل حاجة اكيد
في الوقت دا جه اتصال لرنا فمعرفتش ترد وسيف موجود فاستاذنت
معلش يا ماما مريم... اتصال مهم لازم ارد عليه
سيف
ما تردي هنا في مكانك ولا الاتصال من حد مش عايزانا نعرف مين هو
رنا رفعت حاجبها بعند
بالظبط كدا كويس انك عرفتها لوحدك يا ابن عمي
قالتها ومشيت ترد ع الفون برا
الوا ايوا يا مستر فؤاد... اممم حضرتك فاجئتني .. لا لا انا مش ممانعة لكن انا ااا .. لا صدقني مش الموضوع كدا خالص انا بس محتاجة وقت افكر ممكن .. اا شكرا جدا لحضرتك.. مع السلامة
قالتها ورجعت مكانها تاني ع السفرة
معلش يا ماما اسفة لكنه كان اتصال مهم
مريم
ولا يهمك يا حبيبتي خدي راحتك
ف الوقت دا جه اتصال لسيف من لي لي
فرد وهو بيبص لرنا بتحدي
شوفتي مش خايف ولا قلقان من حاجة وبرد عادي في مكاني
رنا شاورتله يتفضل يرد مش هاممها
فقال
الو ايوا يا لي لي... دلوقتي.. امم طيب خليها بالليل محتاج ارتاح دلوقتي علشان اكون فايق.. طيب تمام هجيلك هناك .. سلام
رنا قالت بسخرية
على الأقل مكالماتي مهمة مش حاجات تافهة
سيف
نعم!! تافهة!! انتي قد الكلمة دي
رنا ولسه ع سخريتها
لا لا اسفة يا ابن عمي .. مش هعتبر خطيبة ابن عمي هيافات هو هيكتشف دا بنفسه
سيف زهق من رنا فقال وقف وهو بيرمي المنديل ع السفرة بانزعاج
انا شعبت يا امي وطالع انام سلام
رنا بصوت مسموع ليه
نام كويس يا ابن عمي علشان معادك بالليل لازم تكون مركز.. ها
سيف بصلها بغيظ ومريم مقدرتش تكتم ضحكتها
فرنا انفجرت ف الضحك وهي بتقول
اسفا يا ماما بس بجد ابنك انسان مستفز بيقارن لي لي بشغلي هو اللي جنى على نفسه وانا مش من طبعي اسمح لحد انه يجي عليا بأي شكل من الاشكال
مريم رفعت الابهام باعجاب👍
استمري يا رنا كل مرة بكون فخورة بيكي اكتر
تاني يوم
في الشركة رنا كانت بتعمل شغلها فاكتشفت تأخير ف بعض الملفات فطلبت السكرتيرة
سلمى تعالي حالا
ولما جت سلمى
تحت امرك يا فندم
رنا
ممكن افهم ايه الاحصائيات اللي انا شايفاها قدامي دي ليه العجز الكبير دا ف البيانات والداتا المطلوبة!!
سلمى
والله يا فندم الخطأ مش من عندي انا عملت فحص لكل اللي وصلني وسلمته لحضرتك تراجعيه وتمضي عليه وسجلته عندنا كمان
رنا
ايوا يعني المشكلة من عند مين اكيد انتي عارفة مين مسلمش الاحصائيات والبيانات في معادها
سلمى
ايوا يا فندم عارفة ومنتظرة تبعتها علشان اسجلها وابعتها لحضرتك
رنا
يعني ايه مستنياها دي احنا هنعطل نفسنا علشانها .. فيه مواعيد وفيه التزام بالوقت ابعتي ليها انذار ولو اتكرر الخطا دا تاني هتتحول للتحقيق وممكن اتخذ إجراءات صارمة ضدها.. اتفضلي ابعتي لها الانذار
سلمى بتردد ايوا بس ااا
رنا بس ايه اتفضلي يا سلمى وحاجة زي دي تبلغيني بيها فورا
سلمى
بس يا فندم ااا هي ااا
رنا بزهق
اتكلمي مش فاضية للتأتأة دي فيه ايه... لا اقولك خليني احذر انا التأخير جاي من رئيسة قسم العلاقات العامة مش كدا
هزت سلمى راسها فقالت رنا
وخليني اخمن كمان تبقى خطيبة سيف بيه مش كدا
سلمى هزت دماغها وهي بتأكد كلام رنا
بالظبط يا فندم هي وطبعا علشان كدا ليها صلاحيات خاصة
رنا
مين قال كدا ملهاش اي صلاحيات عندي زيها زي أي موظف هنا مش مسموح بالتقاعس اتفضلي بلغيها ولو جت هنا بلغيني قبل ما تدخل
وبالفعل سلمى عملت المطلوب منها فبعد كم دقيقة سلمى كلمك رنا
حضرتك عرفتي منين انها جاية هي وافقة برا بالفعل وعايزة تدخل لحضرتك
رنا
خليها تدخل يا سلمى انا ف انتظارها اصلا
قالتها رنا ولبست القناع علشان لي لي متتعرفش عليها
لي لي دخلت باندفاع وانفعال
انتي ازاي تتجرأي وتعملي حاجة زي كدا انتي اتجننتي
رنا قامت وقفت وقالت بحدة وهي بترفع صوباعها ف وش لي لي
سبق وقولتلك الأمور الشخصية مش مسموح بيها ف الشركة هنا .. دا غير دخولك بالشكل دا وتجرأك على مديرك الأعلى منك دا يعرضك للتتحقيق والتأديب الفوري .. اتفضلي اطلعي برا ولما تتعلمي أصول التعامل ارجعيلي تاني... اتفضلي
لي لي اتوترت وخرجت وهي بتنفخ
واتصلت ع سيف وهي بتعيط
سيف انت فين انت لازم تجي هنا حالا
سيف فيه ايه يا لي لي واجي فين انتي مش ف مكتبك يا بنتي
لي لي
انا قدام مكتب المديرة المتسلطة اللي انت معينها عليا يا سيف ارجوك تعالى حالا انا اتهنت
سيف
قام وقف
ايه هي وصلت للدرجة دي انا جاي حالا
لي لي ابتسمت بمكر وخرجت تستناه ف الطرقة
سلمى سمعت المكالمة جريت بسرعا ع رنا
يا فندم الحقي دي كلمت سيف بيه والظاهر جاي ع هنا.. علشان كانت فرحانة... الموضوع شكله كبر ومش هيعدي ع خير حضرتك ليه بس شبكتي معاها محدش بيقدر يتعامل معاها علشان كدا... ربنا يستر
رنا ابتسمت
اهدى يا سلمى اطلبي بس لمون فريش وكملي شغلك ومتقلقيش
سلمى بصت لها باستغراب فرنا هزت دماغها بمعنى كل حاجة هتبقة تمام
ولما وصل سيف قالت لي لي بمسكنة
سيف تعالى شوف الموظفة الجديدة اللي انت موظفها علشان تهين خطيبتك
سيف
مش فاهم بس فيه ايه وهي ليه هتهينك بس
لي لي
كل دا يا سيف علشان لسه مسلمتش التقرير المطلوب مني بالبيانات والاحصا... على فكرة انا والله خلصته وكنت هبعته بس تعبت .. تعمل فيا كدا وتهيني وتحولني للتحقيق
سيف
مالها شادة حيلها عليكي كدا يعني
لي لي
شوفت انا مش عارفة انا عملت لها ايه انا حتى لسه مفهمتش أسلوبها ف التعامل علشان امشي ع اساسه..مستر علي كان سلس وعمري ما اشتكيت منه ولا هو اشتكى مني
سلمى قالت ف نفسها
طبعا وهو كان بينجز كل شغلك بنفسه علشان يريح دماغه ويتجنب المشاكل
سيف
طيب خلاص يا لي لي من فضلك ارجعي ع مكتبك وانا هتصرف بس بلاش الشوشرة دي مش كويسة وانتي عارفة مبحبش كدا اتفضلي
لي لي حاضر يا سيف بس انا منتظرة تاخدلي حقي
سيف شاور لسلمى فقامت وقفت علشان تدخله
ولما خبطت سلمى وبعدها فتحت الباب
رنا كانت لبست القناع وقامت قابلته
اهلا وسهلا بحضرتك يا سيف بيه اتفضل
سيف فضل واقف
ممكن افهم فيه ايه وليه تهيني لي لي بالشكل دا
رنا
دا افضل رد تستحقه بعد اللي عملته وعلى فكرة انا كدا اتساهلت معاها
سيف
اتساهلتي معاها تهنيها؟؟ هل دا مسموح يا حضرة المديرة... المفروض ان موظفينك لسه مفهموش طبعك فوضحيه من البداية مش تدخلي بأسلوب صارم كدا دا مش مقبول
رنا
اعتقد يا سيف بيه لو فيه مشكلة تسمع من الطرفين مش من طرف واحد وكمان من خطيبتك بس حضرتك كدا متحيز ومش جاي تحل مشاكل
سيف بصلها بتعجب لجرأتها ف قال
طيب اتفضلي قولي اللي عندك
رنا
دلوقتي انسة لي لي متأخرة ف تسليم المطلوب منها ولما بعت لها انذار مع السكرتيرة لقيتها دخلت هنا ع مكتبي وتزعقلي وتقول انتي ازاي تتجرأى وتعملي معايا كدا انتي اتجننتي؟؟ فطبعا انا مكانش ينفع اسكت لها وطردتها من المكتب لحد ما تتعلم ازاي تتعامل كويس مع المدير بتاعها بس كدا
سيف ابتسم لانه عجبه اللي عملته رنا وعرف ان لي لي غلطانة فقال
تمام حصل خير انا هتصرف ف الموضوع دا
رنا
الملف لو مجاليش حالا يا سيف بيه انا هحولها للتحقيق انا اسفة دا شغل
سيف هز دماغه وخرج
وراح ع مكتب لي لي اللي اول ما شافته قامت تجري
ها يا سيف عملت ايه طردتها صح او عينتني انا بدالها مش كدا!!
سيف بهدوء
لي لي خلصي الملف المطلوب منك وابعتيه للإدارة حالا
قالها وسابها ومشي
لي لي
ايه!!! الزفتة دي مش سهلة ابدا ان ما وريتك يا زفتة يا غامضة انتي
رنا كانت ف مكتبها فجالها اتصال ففرحت وقامت من مكانها بسرعة ونزلت على برا الشركة
اما لي لي اضطرت تكمل الملف وقامت علشان تسلمه وهي ماشية متغاظة بصت من الشباك لقت رنا بتحضن شخص ومتعلقة ف رقبته
فابتسمت بخبث وطلعت فونها وصورتها وهي بتقول
الصورة دي هتنفعني ف الوقت المناسب يا سيادة المديرة وراكي وراكي لحد ما تغوري من هنا كنت ناقصاكي انتي كمان ...
اما عند سيف فقرر انه يشوف ملف المديرة الجديدة ويعرف تفاصيل عنها لانه كل مرة بيعجب بشغلها وشخصيتها
فطلب علي
الو ايوا يا علي تعالالي ع مكتبي حالا وهات ملف الار إم وانت جاي
علي
ليه يا سيف خير حصل حاجة
سيف
هو مش من حقي اعرف اللي شغال عندي ولا ايه ؟
علي اتوتر
ها لا ابدا حاضر هجيبه واجيلك حالا
اما رنا فكانت تحت بتسلم على يوسف
مش مصدقة نفسي اخيرا رجعت وامتا وليه مقلتليش وانت عامل ايه طمني عليك وخالتو كلكوا نزلتوا ولا انت بس احكيلي
يوسف
ايه يا بنتي حيلك حيلك كل دي اسئلة .. المهم سيبك من دا كله وحشتيني اوي عاملة ايه انا لما روحتلك البيت افاجئك هناك وخالتي قالك انك اتجوزتي كنت هتجنن كدا تتجوزي من غير ما تقوليلي
رنا
هفهمك والله يا چو كل حاجة بس مش هنا هروح اجيب شنطتي واجيلك نتكلم براحتنا
يوسف
لا لا خلصي شغل واستريحي ونتقابل بالليل نتكلم على رواقة ونتعشى سوا ايه رايك لاني ورايا كم مشوار كدا بس جيت علشان اشوفك متحملتش مشوفكيش اول حد
رنا
خلاص تمام يا حبيبي اوك هكون ف انتظارك
يوسف غمز لها بس ايه القناع دا يا غامض انت
رنا ضحكت ههه انت اخدت بالك هحكيلك كل حاجة لما نتقابل
يوسف باس راسها
تمام سلام مؤقت لحد ما نتقابل
ولما ركب يوسف عربيته ومشي ورنا كانت ف طريقها للشركة ولمكتبها جالها اتصال من علي
ايوا يا مستر علي خير
رنا
رنا سيف طالب يشوف ملفك حقيقتك هتتكشف
رنا
يااه اخيرا اتحرك اتأخر اوي ف الخطوة دي وبصراحة طالما مكانش طلب الملف من الاول اتوقعت أنه مش هيطلبه ف الوقت الحالي بس عامة مش مشكلة كدا ولا كدا كام هيعرف ..
ولما علي راح لسيف بالملف وسيف بدأ يفحصه ولما شاف الاسم والصورة وقف مكانه بصدمة
ايه!!!! الار ام دي رنا المحمودي بنت عمي!!! طيب ازاي وهي عمرها ما خرجت برا البيت ومش متعلمة اصلا
علي
مش متعلمة ايه يا سيف عندك شهادة التخرج بتاعتها والكورسات والجوايز اللي اخدتها كمان
سيف رفع حاجبه
كمان وانا اخر من يعلم؟؟
علي بتريقة
والله اسأل نفسك بقا بنت عمك ومتعرفش عنها حاجة
سيف بصله بغضب بعلي كتم الضحكة
اا اسف اسف
سيف ناوله الملف بحدة وخرج بسرعة ع مكتبها
رنا كانت ف انتظاره ومن غير القناع خلاص هويتها اتكشفت بسرعة
لكنها اتفاجئت بيه بيفتح باب مكتبها بحدة وهو بيقول
انتي ازاي تخبي عني حاجة زي دي
رنا بهدوء
والله يا ابن عمي انت مسأ...
قاطعها وقال
انا هنا مش ابن عمك انا سيف بيه مدير الشركة اللي انتي شغالة فيها دي
رنا اتحلت بالهدوء اكتر
حضرتك يا سيف بيه مسألتش علشان اجاوب حضرتك مكنتش مهتم بالشخص قد ما مهتم بالشغل فتفرق ايه معاك كوني انا رنا بنت عمك ولا حد تاني
سيف زعق
لا طبعا مش هسمح بدا... انتي اتجرأتي اوي وعاملة فيها المديرة الغامضة بس كل دا مش عليا فاهمة انا محدش يعمل حاجة بدون رغبتي
رنا
قصدك ايه مش فاهمة
سيف
قصدي تاخدي بعضك وشنطتك وترجعي ع البيت حالا
رنا
اظن اننا هنا ف الشركة يعني حضرتك مديري مينفعش تعاملني كابن عمي وانت لسه قايل دا
سيف بعند
وعلشان انا مديرك بقولك انتي مطرودة اتفضلي
هنا جت لي لي وعلي على الصوت العالي
لي لي اول ما سمعت كدا فرحت انه طردها ولما عرفت انها رنا اتصدمت بعدين فرحت اكتر
اما علي اللي اتصدم زي رنا بالظبط
رنا
ايه حضرتك بتطردني ليه عملت ايه غلط ف الشغل
سيف
انتي كلك على بعضك غلط اصلا مش مسموح بيكي هنا اتفضلي ارجعي ع البيت يلا
رنا كرامتها نأقحت عليها
فبهدوء اخدت شنطتها ومسكت الملف وسلمته لعلي
اتفضل يا مستر علي مبقاش ينفع اكمل الملف اهو عن اذنك
علي
استني بس يا رنا انتي رايحة فين سيف انت بتقول ايه ممكن تهدى تعالى بس معايا.. رنا خليكي هنا
رنا
لا طبعا مش هفضل هنا ثانية واحدة سيف بيه مش موافق ع وجودي ف شركته واظن دا حقه اسفة يا مستر سيف الغلطة غلطتي من البداية اني جيت من غير اذنك.. عن اذنكم
علي
استني بس يا رنا .. سيف قول حاجة يا ابني
لكن سيف كان ساكت ورنا مشيت
فلي لي لحقتها وقالت
بعد كدا متبقيش ترفعي مناخيرك اوي لان سيف جابها الأرض ... ههه كان منظرك مسخرة اوي بس بجد تستحقي دا... مكانك مش هنا ابدا
رنا
فعلا مكاني مش هنا مع حثالة زيك
قالتها ومشيت وسابتها
لي لي بعصبية وصوت عالي
انتي مجنونة ازاي تكلميني كدا انا هخلي سيف يشوف شغله معاكي ان ما وريتك يا فلاحة انتي مبقاش انا لي لي
يتبع...
إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
رواياتنا الحصرية كاملة
