قراءة رواية أحببتها دون أن أدري كاملة

تنشر حصريًا على مدونة رواية وحكاية قبل أي منصة أخرى

رنا كانت قاعدة على الفطار مع مريم فجأة جالها مسدج ولما فتحتها فضلت تتنطط من الفرحة

واو انا مش مصدقة نفسي بجد انا انا فرحانة اوي يا ماما 

مريم بفرحة لفرحة رنا 

قبلوا مشروعك صح؟! 

رنا 

مش بس قبلوا المشروع يا ماما انا اترقيت من مجرد موظفة عادية لمدير إدارة يا ماما انا مش مصدقة نفسي اني وصلت بالسرعة دي ومن مجهودي مش واسطة ولا محسوبية ياااه انا هطير من الفرحة 

مريم حضنتها 

تستاهلي يا رنا انتي بنت مجتهدة وموهوبة الف مبروك يا روحي ومن نجاح لنجاح ان شاء الله عقبال لما تمسكي منصب المدير التنفيذي 

رنا ضحكت

 ايه يا ماما حضرتك عايزاني انافس سيف على منصبه ولا ايه 

مريم 

وايه المشكلة الأفضل والامهر يكسب ولو انتي قدها يبقة ليه لا 

رنا حضنتها بامتنان 

حبيبتي يا ماما مريم بجد انتي افضل حاجة حصلتلي في حياتي محدش آمن بيا وشجعني كدا زيك حتى امي كانت تفضل تخوفني لو عمك عرف هيعمل فيكي ايه 

مريم مسكت ايديها وشددت عليها 

اوعي تخافي تاني ابدا.. انا هنا معاكي وبدعمك اعملي كل اللي تحبيه وعافري لحد ما تحققي حلمك اوي تبصي وراكي ابدا 

رنا 

حاضر يا ماما هعمل دا 

مريم 

يلا اطلعي نامي انتي سهرانة طول الليل ع المشروع 

رنا ضحكت 

انتي متعرفيش ان سيف جه بالليل وزعقلي اني سهرانة وقفل النور وقالي نامي بلهجته الآمرة اللي مش بيعاملني غير بيها دي 

مريم بدهشة 

يا خبر!! سيف عمل كدا !! طيب ليه مقولتليش 

رنا 

لا عادي بسيطة انا اساسا كنت خلصت وبفنش وكدا كدا كنت هقفل وهنام 

مريم ضحكت 

مفيش فايدة فيه بس على فكرة هو مكانش كدا صدقيني طول عمره جنتل اوي وخاصة مع البنات 

رنا 

ومعايا انا بيقلب للوحش الكاسر هو انا ناقصة وحوش ما كفايا عمي 

مريم 

معلش يا حبيبتي حقك عليا انا 

رنا 

لا مش زعلانة خالص يا ماما ولا يهمك يا حبيبتي 

مريم 

مش بقول بنوتي عاقلة ورزينة يلا اطلعي ريحي شوية وهدي اعصابك 

 رنا 

امم حاسة ان فيه حاجة كدا ولا ايه يا ماما 

مريم بانزعاج 

اه للاسف الزفتة جايا النهاردة ع الغدا سيف عازمها تاني بدل امبارح 

رنا 

امم طيب كويس انك قولتيلي علشان منزلش من اوضتي 

مريم 

نعم يا ختي!! 

رنا بدهشة ايه بس يا ماما 

مريم بتحذير 

رنا انا قولت ايه

رنا 

ايه يا ماما انا قولت ايه زعلك بس!! 

مريم 

احنا مش اتفقنا اننا نطفشها البنت دي مش بحبها ومش لايقة ع سيف ابدا 

رنا 

يووه والله مش هنفع اصلي مش بعرف امثل صدقيني 

مريم 

ومين قال انك محتاجة تمثلي اتصرفي بطبيعية يا رنا مش اكتر ولا اقل 

رنا 

مش حابة اكون عزول بينهم انتي شوفتي لما شافتني امبارح عملت ايه 

مريم بمكر 

غارت منك ومن جمالك طبعا واضحة زي الشمس 

رنا 

على فكرة هي جميلة بردو.. بس اوفر اوي ف لبسها والميكاب بتاعها 

مريم مسكت خدود رنا 

اما حبيبتي انا جمال رباني مش محتاجة تحط ميكاب علشان تبان انها جميلة ولو حطت بتكون جميلة الجميلات 

رنا 

والله مش حاطة نفسي موطن مقارنة بيني وبينها انا مش فاضية للكلام دا اصلا 

مريم 

وهي تيجي ايه جنبك رنوش جمال ورقة وادب وأخلاق 

رنا 

حبيبتي يا ماما مريم دايمة رافعة معنوياتي 

مريم 

انا بستغرب عمك ليه سايبك لحد دلوقتي من غير ما يجوزك مش غريبة دي اعتقد عندكم هناك بيتجوزوا بدري!! 

رنا 

مش شرط بيتجوزوا بدري حسب النصيب يا ماما.. بس عمي مش عارفة الظاهر كان خايف العريس ياخد الورث اللي هو حاطط عينه عليه 

مريم ضحكت 

ههه صدقي صح ممكن يا نهار ابيض .. طب افرض مامتك مفكرتش تستعين بسيف كان ايه هيكون مصيرك 

رنا 

كل لما بفكر في كدا ببقا هتجنن والله بس لما سلمت امري لله ربنا حلها بسهولة بقدرته الحمد لله

 ...

سيف اتصل ب لي لي اللي كانت لسه نايمة 

الو ايوا يا سيف خير فيه حاجة 

سيف 

ايه يا لي لي انتي كويسة مجتيش الشركة ليه ؟ 

لي لي 

ايه الشركة ليه هي الساعا كام يا خبر انا الظاهر راحت عليا نوما معلش يا سيف كنسلني النهاردة 

سيف 

خلاص تمام مفيش مشكلة بس انا كنت حابب اعزمك ع الغدا عندنا النهاردة كتعويض للمرة اللي فاتت يعني علشان تقربي من ماما اكتر وكدا 

لي لي 

خلاص اوك يا سيف وكويس اني مجتش الشركة النهاردة علشان الحق اظبط نفسي على المعاد هتيجي تاخدني ولا ايه

سيف 

اه طبعا مجرد ما تجهزي كلميني وهجيلك علطول 

وبالفعل ع المعاد جهزت لي لي وسيف راح جابها بعربيته ووصلوا الفيلا عنده 

رحبت بيها مريم رغم انها مش طايقاها لكنها ف الاول والاخر ضيفة 

يلا اتفضلوا السفرة جاهزة

لي لي 

ميرسي يا طنط تعبتي نفسك ليه 

ولما قعدت كانت مبسوطة ان رنا مش معاهم ع الغدا 

لكن بعد شوية لقوا رنا نزلت بفستان هادي مناسب للبيت 

رنا 

مساء الخير جميعا 

مريم ابتسمت 

رنا حبيبتي انتي لسه منمتيش؟؟ انا فكرتك نايمة علشان كدا مبعتش للشغالة تقولك تنزلي 

رنا 

حاولت معرفتش مش جاي لي نوم مع اني منمتش كويس بالليل 

مريم 

اها اكيد من الفرحة ما انا قولتلك 

رنا 

اه الظاهر كدا .. اا ازيك يا ابن عمي .. ازيك يا لي لي 

لي لي بقرف 

اهلا 

وف نفسها قالت 

ايه اللي جابها دي

 وبعدين قالت بصوت عالي

 اوف الجو يخنق 

مريم كانت عارفا انها تقصد رنا فقالت

غريبة مع ان التكييف شغال 

رنا فهمت دماغها هي كمان وقالت 

اه فعلا الجو حر يا ماما مريم تقريبا التكييف فيه عطل انا ممكن افتح الشباك لو كانت لي لي مخنوقة

 ولما قامت تفتحه ايديها اتعورت وجابت دم 

ااه ايدي 

سيف بسرعة قام عليها 

رنا انتي كويسة 

رنا طول عمرها عندها فوبيا من الدم عيطت وخافت 

لا لا انا مش كويسة دم!!!! انا هبقى كويسة صح 

لي لي 

ايه الاوفر بتاعك دا .. دا مجرد خربوش صغير 

مريم 

رنا انتي كويسة يا حبيبتي الف سلامة عليكي مالك خايفة ليه كدا 

رنا عيطت 

دم دم يا ماما واغمى عليها 

سيف استغرب 

ماما هي اغمى عليها من مجرد دم صغيرين 

مريم 

مش عارفة ف ايه والله...ربنا يستر بسرعة خلينا نفوقها 

لكنها مفاقتش والدم مش عارفين يوقفوه 

مريم بسرعة يا سيف ع المستشفى 

ولما شالها سيف بسرعا وجري بيها للمستشفى 

وكل دا تحت انظار لي لي اللي هتموت من الغيرة لكنها راحت معاهم 

ف المستشفى 

مريم 

خير يا دكتور طمنا عليها ارجوك 

الدكتور 

الجرح الحمد لله مش عميق بس للاسف أخد خمس غزر 

مريم بصدمة

 ايه اتخيط للدرجة دي اتعورت؟ 

الدكتور 

من الواضح انها عندها رهاب من فكرة الجرح ودا ظاهر جدا في حالة الخوف الشديد اللي عملها الاغماء 

مريم 

مش عارفة حاجة عن الموضوع دا يا دكتور والله انا اول مرة اسمعه منك دلوقتي 

الدكتور

 عامة هي كويسة وعطيتها مهدىء ومسكن وان شاء الله هتكون كويسة 

ولما دخلت لها مريم ووراها سيف ولي لي 

مريم 

حمد لله على سلامتك يا رنا قدر ولطف يا حبيبتي مش عارفة الشباك كان فيه ايه عور ايدك كدا 

رنا بسرعة حضنت مريم بخوف 

هبقى كويسة مش كدا يا ماما 

مريم 

انتي كويسة يا حبيبتي مفيش حاجة مجرد جرح بسيط 

سيف 

الف سلامة عليكي يا رنا 

لي لي 

لتاني مرة تبوظي دعوة الغدا بتاعتي انتي قاصدة ولا ايه مجرد خربوش صغير مش فاهمة في ايه لكل الدلع دا 

مريم بحدة 

مش وقته يا لي لي انتي مش شايفة وشها اصفر زي الليمونة ازاي 

لي لي بغيظ 

سيف ممكن تروحني من فضلك 

سيف 

اسف يا لي لي مش هينفع اسيب امي وبنت عمي هنا ف المستشفى كدا 

لي لي بانزعاج 

انما ينفع تسيبني انا مش كدا.. ماشي يا سيف 

سيف 

لي لي ارجوكي قدري الموقف 

لي لي 

اوك يا سيف بس ابقا افتكرها عن اذنكم انا ماشية 

سيف 

استني اوصلك واوقفلك تاكسي

مريم مهتمتش وفضلت تطبطب ع رنا

رنا انتي ليه خايفة كدا 

رنا بدموع

وانا صغيرة عمي كان بيعاقبني بالسكينة كان بيعمل جرح في ايدي كان بيوجع اوي يا ماما 

مريم فتحت عيونها بصدمة 

ايه بالسكينة هو اتجنن دا ولا ايه ومامتك ازاي كانت ساكتة ع كدا 

رنا 

بعد موت بابا كنت بعيط كتير علشان كنت متعلقة بيه اوي عمي كان بيزهق من بكايا طول الوقت فكان بيهددني بالسكينة وف مرة من المرات عمل جرح كبير ف رجلي كنت هموت وقتها .. اهو بصي 

وكشفت رنا عن رجليها فلقت مريم فعلا جرح لسه اثره معلم فيها لحد دلوقتي 

مريم هزت راسها برفض للي بتسمعه وبتشوفه 

لا لا ازاي دا يكون بني ادم ازاي 

واخدت مريم ف حضنها 

متخافيش يا روح قلبي انا معاكي ومحدش هيأذيكي ابدا 

ف الوقت دا سيف رجع لقا امه حاضنه رنا فقال ف نفسه 

ايه الاوفر دا مبحبش انا دلع البنات البايخ دا بجد بقت حاجة مملة وشكلي بقا وحش قدام لي لي لتاني مرة رنا تكون السبب ف ان دعوة الغدا يبوظ 

وبعد شوية سيف قال بملل 

ماما اعتقد ان رنا كويسة مش هنرجع البيت بقا 

رنا 

اه انا مش حابة اقعد هنا ممكن نمشي يا ماما من فضلك 

مريم 

طيب تمام يا سيف نادي الدكتور يشوفها ولو سمح لنا بالخروج هنمشي 

وبالفعل جه الدكتور وطمنهم وعطاهم العلاج ورجعوا البيت وسيف كان منزعج من رنا علشان كدا كان بيتعمد يرجع متأخر علشان مييشوفهاش  

في اوضة رنا 

مريم 

هسيبك ترتاحي شوية يا حبيبتي تصبحي على خير 

فلما مسكت الفون لقت رسالة من علي بيقولها انها مدعوة لحفلة الترقي في الشركة 

رنا مكانتش عارفة تعمل ايه هل تروح ولا تعتذر عن الحفلة دي بس بم انها خلاص اترقت فهي مبقاش ينفع تفضل تشتغل اون لاين لازم تنزل وتروح الشركة فقررت انها تفاتح مريم في الموضوع دا بكرة الصبح 

ولما جت الصبح مريم تصحيها علشان يفطروا سوا وتشوف هتقدر تروح شغلها ولا لا 

قالتها رنا 

فقالت مريم 

ممم من رئيي ان خلاص لازم تظهري ف الشركة اما عن الشركة الجديدة فممكن تكملي فيها بس اون لاين لو وافقوا ولو موافقوش يبقى اكتفي بشركة سيف اللي هي شركتك يا رنا 

رنا 

حضرتك شايفا كدا؟؟ 

مريم هزت دماغها فابتسمت رنا وقررت تاخد بنصيحتها 

مريم 

هتقدري تنزلي النهاردة الشركة 

رنا 

مضطرة اروح علشان ابلغهم باللي اتفقنا عليه 

مريم 

انتي لسه تعبانة! لو تعبانة اعتذري يا رنا 

رنا 

لا الحمد لله انا كويسة 

وبالفعل راحت رنا الشركة والمدير وافق ع انها تشتغل اون لاين لانه كان معجب بموهبتها جدا وافكارها اللي ملهاش حدود 

ولما جه يوم الحفلة كانت رنا ف اتم الاستعداد ليه اختارت فستان انيق محتشم يليق بيها كمديرة ورئيسة الإدارة لكنها قررت تلبس قناع كنوع من الغموض وبردو علشان سيف ميعرفهاش 

يوم الحفلة لي لي كانت منزعجة وسيف لاحظ دا 

ممكن اعرف انتي ليه لاوية بوزك كدا النهاردة!! 

لي لي 

يعني عامل نفسك مش عارف يا سيف .. بقا ترقي حتة موظفة عادية لرئيسة إدارة وانا لسه زي ما انا رئيسة قسم !! 

سيف 

هي مش مجرد موظفة هي موهوبة ومبدعة وشايفة شغلها صح وتستحق فعلا وع العموم لو لقيت تقاعس هترجع لوظيفتها الاولى متخافيش 

لي لي 

يعني قصدك اني مش موهوبة ولا شايفة شغلي كويس يا سيف 

سيف 

مين قال كدا يا لي لي بس.. ليه تنكدي ع روحك مش يمكن انا سايب ليكي الترقية الأكبر بس انتي اللي مستعجلة 

لي لي فكرت انه عايز يعينها نائب ليه ففرحت وقالت 

بجد يا سيف ان كان كدا خلاص انا مش زعلانة وهصبر زي ما بتقول علشان خاطرك 

ف اوضة رنا 

ها ايه رايك يا ماما 

مريم 

رئيسة ادارة بجد لايق عليكي يا روحي زي القمر ربنا يوفقك يارب 

رنا 

ما تيجي معايا يا ماما الفرحة مش هنكون كاملة من غيرك 

مريم 

يا حبيبتي انا هكون معاكي بقلبي وبروحي وبعدين انتي ناسية عنصر السرية اللي انتي متمسكة بيه 

رنا 

معاكي حق يا ماما ربنا يستر انا قلقانة اوي

مريم 

اوعي تقولي كدا انتي مش اي حد دلوقتي انتي المديرة خلي الكلام دا لموظف عادي 

اخدت رنا نفس عميق ونزلت ركبت العربية وراحت ع الشركة 

الكل كان متواجد ومتشوق يشوف المديرة الRM المجهولة اللي محدش يعرفها من قبل وخاصة سيف 

ولما جت رنا الكل بصلها بزهول ماشية واثقة من نفسها رزينة وهادية وسلمت ع الكل واولهم علي اللي استقبلها بنفسه لانه الوحيد اللي يعرفها 

اهلا وسهلا يا RM نورتينا ومبروك الترقي تستاهليها بجدارة 

رنا 

الله يبارك فيك يا مستر علي ومبروك لحضرتك الترقي انت كمان فرحانة ليك بجد 

علي 

الحمد لله ... وانا كمان مبسوط اننا هنشتغل تيم واحد وانك خلاص هتنزلي ع ارض الواضح وهتبطلي شغل الاون لاين دا .. بس متوقعتش انك تفضلي لسه على غموضك دا 

رنا ابتسمت 

ههه معلش ليا اسبابي الخاصة اعذري يا مستر علي 

علي 

لا لا خالص ولا يهمك دا شىء يرجعلك انا مش هتدخل 

هنا سيف جه وقال 

مش تعرفني يا علي وبعدين المديرة الجديدة اتأخرت ليه 

علي 

المديرة قدامك اهي ... الRM اللي قولتلك عليها 

سيف بصلها باستغراب لكن رنا قالت 

تشرفت بحضرتك يا سيف بيه وفخر ليا اني اشتغل تحت ايد حضرتك ان شاء الله هكون عند حسن ظنك 

سيف ببعض البلاهة 

اها اهلا بيكي من الواضح ان الغموض يسيطر على شخصيتك بأمارة اسمك والقناع اللي ع وشك 

علي 

اا امور شخصية هتفصح عنها في وقتها اكيد 

سيف 

ميهمنيش كل دا يهمني الشغل وسير العمل وبس.. اظن انك ماسكة دلوقتي ملف شركة فيوتشر مش كدا 

رنا 

بالظبط كدا وان شاء الله هيتسلم ف معاده انا كنت سيبته علشان الملف الجديد لكن هرجعله تاني 

سيف 

تمام ودا المطلوب .. دلوقتي اتفضلي اعرفك ع الهيئة كلها .. الكل مبسوط بترقيكي 

هنا جه علي وقدم لها طبق الجاتوه هي وسيف 

اتفضلوا سيف باشا ايده كريمة النهاردة وعامل اوبن بوفيه 

سيف 

غصبا واقتدارا عامله علشان خاطرك انت يا طفس 

علي ورنا ضحكوا 

علي 

اشش اسكت انا دلوقتي مدير فرع الموظفين يقولوا عليا ايه مدير طفس تؤتؤ ميصحش 

والكل ضحك 

وهنا جت لي لي بغيظ 

سيف مش تعرفنا مين دي اللي سبتني وجيت تضحك معاها بعدين فين المديرة ولا مواعيدها من اولها بايظة

رنا بصوت جاد

المديرة بتاعتك هنا قدامك ومواعيدها بالثانية 

لي لي بهتت مكانها لأنها متوقعتهاش وخافت من حدة صوتها 

اا احم اهلا بيكي 

رنا عملت انها متعرفهاش 

وانتي مين بقا وظيفتك ايه هنا... انتي تبع قسم الاستقبال تحت اكيد ؟؟ 

لي لي بغيظ 

لا انا رئيسة قسم مش موظفة عادية وكمان خطيبة سيف 

رنا 

اها اهلا بيكي بس انا مسألتكيش تقربي ايه لسيف بيه... كونك خطيبته او خطيبة الوزير نفسه ملوش علاقة بشغلنا لو كنتي قولتي انك رئيسة قسم كانت تكفي ياريت متخلطيش المسائل الشخصية بالشغل لان معنديش وسايط للأسف... مع احترامي يا سيف بيه بس الشغل شغل

يتبع...

إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏