رواية جديدة أحببتها دون أن أدري لأسماء عبد الهادي - الفصل 7 - الإثنين 22/9/2025
قراءة رواية أحببتها دون أن أدري كاملة
تنشر حصريًا على مدونة رواية وحكاية قبل أي منصة أخرى
رواية أحببتها دون أن أدري
رواية جديدة قيد النشر
من قصص و روايات
الكاتبة أسماء عبد الهادي
الفصل السابع
تم النشر الإثنين
22/9/2025
سيف اتنهد بزهق وراح ع مكتبه
وعلي وراه
علي
ممكن افهم ايه اللي انت هببته دا
سيف
ايه عملت ايه.. دا عقابا ليها علشان تتجرأ وتعمل حاجة من ورايا تاني
علي
سيف رنا معملتش حاجة من وراك ملفها كان عندك وانت اللي مكلفتش نفسك تشوفه انت حتى متعرفتش عليها من صوتها حتى
سيف
تعالى هنا بقا انت تعرف رنا منين انطق
علي
اعرفها منين ايه.. رنا قدمت زي اي حد وعملت ليها المقابلة ونجحت فيها حكتلي ظروفها وكل حاجة وانا قبلت بحكم منصبي دي كل الحكاية
سيف
يعني ملكش علاقة بيها!! شايفك بتقولها رنا كدا عادي يعني.. وورق ايه اللي كانت بتعطيه ليك دا
علي رفع حاجبه
انا ماشي وراجع نفسك ف قرارك دا يا سيف لانك هتندم عليه
سيف
استنى تعالى هنا انا بكلمك رد ع اسئلتي يا علي
علي مردش عليه وسابه ومشي
اما لي لي فدخلت والبسمة واسعة ع وشها
مبسوطة باللي عملته بجد انت عليت ف نظري اوي .. بنت عمك اتجرات اوي وكان لازم تتعاقب اللي عملته اقل واجب معاها
سيف كان زهقان
لي لي من فضلك مش عايز اي حد معايا دلوقتي انا مصدع من فضلك ارجعي مكتبك ولما احتاجك هكلمك
لي لي
اوك يا سيف
ومشيت وهي فرحانة ف رنا
...
في الفيلا
مريم لقت رنا راجعة
ايه دا يا رنوش رجعتي بدري ليه تعبانة ولا حاجة!! الجرح بيوجعك؟
رنا
لالا الحمد لله مفيش اي حاجة انا كويسة.. هطلع بس اغير هدومي وانزل ناكل لاني جعانة
مريم
استني يا رنا بتتهربي ليه فيه ايه
رنا
صدقيني مفيش حاجة مهمة امم يعني كانت غلطة واتعاقبت عليها وانتهى الموضوع
مريم
رنا بتحكي بالألغاز ليه في ايه اللي حصل موضوع رجوعك بدري دا مش مريحني وغلطة ايه اللي بتتكلمي عنها
رنا
غلطة ف الشركة يا ماما سيف عاقبني عليها بالطرد من الشركة
مريم بصدمة
ايه طرد مرة واحدة ... ليه يعني عملتي ايه كبير للدرجة دي علشان يطردك مش حتى يجازيكي بالخصم... وغلطة ايه متأكدة انك عمرك ما تغلطي غلطة كبيرة كدا
رنا
غلطت اني اشتغلت ف شركته بدون علمه... سيف ابن عمي شايف ان رنا مكانها ف البيت مش ف الشغل رنا الفاشلة الجاهلة الغبية وبس .. متبقلش فكرة اني انا الر ام الموهوبة اللي هو بنفسه اثنى عليها
❈-❈-❈
مريم مكانتش مصدقة اللي سمعته من رنا ازاي سيف يعمل كدا
رنا انسحبت بهدوء وطلعت على اوضتها من غير ولا كلمة
اما مريم فاتصلت بسيف
سيف من فضلك تعالى حالا عايزاك ومفيش اعذار يلا
سيف بزهق
هي لحقت تشكيلك يا امي وتسخنك عليا .. عامة تمام حاضر انا اصلا مبقتش في مود الشغل وجاي ارتاح
وبالفعل لما جه سيف كانت مريم قاعدة ع الكنبة بغضب
مساء الخير يا امي خير يا حبيبتي
مريم بحزم
اقعد يا سيف ولا اقولك اطلع غير هدومك الاول وبعدين نتكلم
سيف قعد جنبها
لا مش همشي غير لما اعرف ايه سبب التكشيرة الجامدة دي معقولة البنت دي كلامها زي السم قدرت تحول حضرتك بالشكل دا وتشتكيلي منك علشان تزعلي مني بالشكل دا
مريم كشرت اكتر
سيف رنا مشتكتش اصلا انا اللي سألتها فيه ايه وحكتلي اللي حصل
سيف
ايوا طبعا نزلت شوية دموع تماسيح من بتوع البنات قدرت تحرك عاطفتك ناحيتها علشان تقلبي عليا
مريم
كلام ايه اللي انت بتقوله دا يا سيف رنا مش كدا خالص
سيف
يا ماما انا فاهم النوعية دي كويس
مريم بزهق
انت متعرفش حاجة خالص عنها يا سيف اسكت
سيف
واضح انها عملت لحضرتك غسيل مخ فعلا وانها مهما عملت هتفضلي تدافعي عنها بردو
مريم
ممكن اعرف هي عملت ايه غلط علشان تطردها بالشكل المهين دا
سيف
يعني كل دا وهي مش عارفة عملت ايه يا امي... ماما دي واحدة كانت محبوسة وما صدقت تطلع مينفعش تتصرف كدا من نفسها مينفعش اتفاجىء انا بوجودها ف شركتي من غير اذني دا مش مسموح ابدا ومهما عملت مش هسامحها على دا
مريم
انت زعلان انها اتقدمت للشركة من غير اذنك يا سيف ولا زعلان علشان اتفاجئت ان رنا عكس توقعاتك بالمرة مكنتش تتوقع انها بنت شاطرة وموهوبة كنت فاكرها جاهلة وغبية مش كدا
سيف
يا ماما كل اللي حضرتك بتقوليه دا ملوش لزوم.. رنا غلطت غلط مش مقبول عندي وانا عاقبتها عليه بحكمي صاحب الشركة وانتهينا من فضلك بلاش تفتحي الموضوع دا تاني لان قراري مفيش رجعة فيه عن اذنك
مريم هزت راسها
ربنا يهديك يا سيف انت مكنتش كدا مش فاهمة البنت اللي اسمها لي لي دي عاملة زي الساحرة غيرتك حقيقي اتغيرت يا ابني
ولما قررت مريم تطلع علشان تقعد مع رنا وتواسيها
مريم
رنا حبيبتي معلش مش عايزاكي تزعلي صدقيني هو اللي هيندم ع قراره دا وبنفسه هيجي يطلب منك ترجعي لمكانك ف الشركة
رنا
اطمني يا ماما مش زعلانة ورجوع لشركة سيف تاني مش هيحصل
مريم
بتقولي ايه يا رنا لا طبعا انتي وصلتي للمنصب بمجهودك مينفعش تتخلي عنه
رنا
المكان اللي انطرد منه بدون سبب استحالة ارجعله تاني لو عمل ايه انا كرامتي فوق اي شىء حتى لو كان ابن عمي.. انا اسفة يا ماما... انا اتربيت طول عمري بطاطي لعمي وحلفت واخدت عهد ع نفسي ان ف اليوم اللي اخرج فيه من بيت عمي اني راسي متنحنيش لحد ابدا ولا اسمحله يتحكم فيا .. موضوع سيف وشركته دا انا نسيته تماما واكيد هلاقي فرصة شغل تانية بإذن الله
مريم بحزن
مش دا اللي انا كنت عايزاه يا رنا .. سيف غلطان وهخليه يجي يعتذر لكن انك تبعدي عن الشركة دا استحالة انتي لازم تتواجدي فيها لازم تكوني قدامه طول الوقت
رنا بعدم فهم
بالعكس سيف بقا اخر حد انا ممكن افكر اشوفه ماما انا بحب حضرتك اوي وسيف انا متتنه ليه لأنه خرجني من الجحيم علشان كدا مقدرش ازعل منه لكن صدقيني رجوع شركته مش هينفع كمان هو مش حابب وجودي فيها
مريم
هيهدى وهيفكر وهيعرف غلطته يا رنا هو بس متعصب دلوقتي ومصدوم من الحقيقة اللي عرفها هياخد وقته وهيتراجع صدقيني لكن وقت ما يحصل لازم انتي كمان تفكري وترجعي علشان خاطري يارنا
رنا حضنت مريم
سيبي كل حاجة لوقتها يا امي ربنا يسهل الامور ان شاء الله
مريم
ربنا يهديكم يا بنتي ويبعد عنكم الشيطان اللي ف صورة لي لي دي
رنا مقدرتش تمنع نفسها من الضحك
هههه دي كانت فرحانة وشمتانة فيا اوي ومش بعيد تمسك منصبي عندا فيا
مريم
دا شىء متوقع منها وتلاقيها سخنت سيف عليكي اكتر انا عارفاها كويس مش عارفة سيف اتلم عليها منين دي
رنا
صحيح يا ماما هما مخطوبين من امتا وليه واحد ف مكانة سيف يعني مش محتاج يكون نفسه ليه متجوزوش لحد دلوقتي
مريم
لا مش من كتير بقالهم سنة بس تقريبا وانا اللي طلبت ان الخطوبة تطول زي ما تقولي كدا اول ما شوفتها مرتحتلهاش فقولت يمكن لما تطول الخطوبة ميرتاحش ليها هو كمان وينفصلوا لكن للاسف دا لسه محصلش
رنا
من الواضح انه بيحبها فعلا يا ماما
مريم
حب اعمى.. غبي مش شايف الجوهرة اللي في ايده ماسك في حتة الماس مزيف معدنه مش اصلي صدقيني البنت دي مش سهلة
رنا علشان تخرج مريم من الموضوع دا قالت
طيب سيبك من لي لي دي يا ماما وساعديني محتاجة مساعدتك ضروري عندي بالليل مشوار مهم جدا جدا ولازم اختار فستان مناسب للمشوار دا ها اختار دا ولا دا يلا ساعديني
رنا مسكت الفستانين ف ايديها ورفعتهم علشان مريم تختار
مريم كشرت ونزلت الفساتين ع جنب
استني لحظة يا رنا مشوار ايه المهم دا وانا معرفوش
رنا بابتسامة
رايحة اقابل حبيبي يا ماما
مريم بانزعاج
نعم يا ختي مين دا اللي حبيبك غير سيف ابني ااا
قالتها بصوت واطي
وبعدين كملت
نعم حبيبك دا مين ان شاء الله رنا تعالي هنا واحكيلي بالظبط ف ايه ومين الشاب دا وعرفتيه امتا وازاي
رنا ضحكت
ههه واحدة واحدة يا ماما وهحكيلك كل حاجة بالتفصيل الملل كمان استني لحظة هوريكي صورته
ولما رنا حكت لها علاقتها بيوسف
رنا قالت
ها ايه رايك مش امور اوي البنات هتتهبل عليه... بس هو بتاعي انا وبس
مريم سكتت
رنا معلقتيش يعني يا ماما
مريم
وجود يوسف هيبوظ علاقتك بسيف يا رنا
رنا
ايه اللي دخل دا لدا يا ماما وسيف ملوش دعوة بيوسف ولا بيا حتى
مريم متكلمتش وفضلت تفكر شوية وبعدين قالت
خلاص سيبك من اللي انا قولته تعالي نختار سوا هتلبسي ايه
وبالفعل لما جه الليل
جهزت رنا وكانت مستعدة علشان تنزل
مريم
رنا متتأخريش علشان مقلقش عليكي يا حبيبتي
رنا
متقلقيش يوسف هيوصلني لحد الباب هنا واه ممكن نتعشى برا معلش ..
مريم
لا لحد الباب لا خليه بعيد شوية هو اه اهلا وسهلا بيه هنا ف اي وقت بس ااا
رنا
فاهمة قصدك يا ماما مش عايزة سيف يشوفه اوك هعمل حساب دا متقلقيش يلا سلام
مريم
خروجة ممتعة يا قلبي...
ولما خرجت رنا والسواق وصلها للمكان اللي هتقابل فيه سيف لقته قاعد ف انتظارها
رنا اسفو اتأخرت عليك!!
يوسف
لالا انا اللي جيت بدري... تعالي اقعدي انتي وحشاني اوي
رنا
جيت بدري قعدت هنا ليه يا يوسف ليه مش ف شقتك ولا انت لسه ف فندق
يوسف
لا دا ولا دا يا رنا .. انا اصلا مسافر..كمان ساعتين معاد الطيارة
رنا قامت وقفت بصدمة
انت بتهزر صح انا قايمة ماشية
يوسف
اسف يا رنا اقعدي بس وانا هفهمك
رنا بحزن
تفهمني ايه انت لسه هتسافر بردو وهتبعد انت مش قولت هتنزلوا خلاص بقا انا محتاجاكم يا يوسف طيب ليه نزلت علشان اتعشم وتمشي؟
يوسف لف ايده ع كتفها والله ما تزعلي انا عند وعدي انا قررت من زمان اصفي شغلي برا وانزل مصر واستقر فيها بس دا مش سهل لازم فيه اجراءات وترتبيات كتير واولها زيارتي النهاردة ولحد ما كل حاجة تخلص هنزل نهائي هنا وان شاء الله مش هطول بالكتير سنة ونكون كلنا هنا
رنا
حقيقي يا يوسف مش بتكدب
يوسف
مقدرش اكدب عليكي يا رنا صدقيني بتكلم جد
رنا بتفهم
تمام حيث كدا بقا بلاش اضيع وقت .. يلا احكيلي اخبارك ايه اخباركم كلكم
وبالفعل يوسف ورنا قضوا وقتهم مع بعض بمرح واتعشوا سوا وبعدين لما جه وقت طيارته قال
يلا تعالي اوصلك علشان ارجع ع المطار
رنا
لا لا روح انت للمطار وانا معايا السواق هرجع معاه
يوسف
لا مش هكون مطمن عليكي غير لما اوصلك بنفسي
رنا دمعت بتأثر
ياااه قد ايه يا يوسف كنت بحلم باللحظة دي الحمد لله اني عشتها
يوسف
حقك عليا يا رنا ان شاء الله هرجع وهعوضك عن كل اللي فات.. هتوحشيني اوي لحد ما ارجعلك تاني انا نازل الشهر الجاي
رنا سلمت عليه
بإذن الله يا حبيبي تروح وترجع بالسلامة
يوسف الله يسلمك يلا
رنا
يلا ايه قولت مش هتوصلني روح انت ع المطار الحق وقتك وانا اول ما اوصل البيت هرن عليك ها كدا ايه رايك
يوسف تمام في امان الله
رنا
لا إله إلا الله
يوسف
محمد رسول الله
تاني يوم
علي اتصل برنا
رنا اا انا اسف على اللي حصل بس اا
رنا قاطعته
لالا مفيش داعي للأسف محصلش حاجة يا مستر علي.. سيف ابن عمي وانا عايشة معاهم يعني مفيش حاجة كل حاجة ماشية بشكل طبيعي خالص متقلقش
علي
طيب الحمد لله طمنتيني انا كنت زعلان علشانك بس ف نفس الوقت كنت بتمنى ليكي مكان يقدرك
رنا
شكرا ع مشاعرك الطيبة دي يا مستر علي
علي
رنا انا اسف ف طلبي بس الملف محدش ينفع يكمله غيرك
رنا
الملف جاهز يا مستر علي انا خلصته قبل ما اسلمه ليك امبارح
علي فرح
لا مش معقول خلصتيه!! رنا انتي بجد خسارة للشركة لما مشيتي سيف غلط غلطة كبيرة بإبعادك عننا
رنا
انا تحت امرك ف اي وقت تحتاجني فيه مش هتأخر
علي
دا ظني فيكي يا رنا بالتوفيق
ولما خلص علي مكالمته مع رنا بعد شوية دخل سيف
علي ملف شركة فيوتشر معاه
علي
ايوا معايا خير!!
سيف
هاته
على
تمام هتطلع عليه يعني... هي رنا كانت اااا
سيف
اشش هات الملف من سكات يا علي ومتجبش سيرة رنا تاني مفهوم
قالها واخد الملف ومشي
علي هز دماغه بأسى
انت في وهم يا سيف في وهم
دخل سيف مكتب لي لي
لي لي فرحت اول ما شافته
سيف حمدا لله على السلامه نورت مكتبي
سيف بجمود
لي لي انتي هتكملي ملف شركة فيوتشر خلال يومين يكون جاهز مفهوم
لي لي
ايه يومين!! مش هلحق طبعا اظبط العك بتاع الزفتة رنا لالا يا سيف مش هيكفيني اسبوع
سيف بلهجة امرة
قولت يومين ويخلص الملف دا اخد اكتر من وقته
قالها وسابها ومشي لي لي فضلت تضرب ف الارض برجليها
اوف بقا ايه التدبيسة دي يعني انا ما صدقت اخلص منه علشان يرجعلي تاني لا واخلصه ف خلال يومين ازاي دا دا محتاج شهر كامل
ولما فضلت تتفحصه عنيها لمعت بفرحة
دا كامل... خلصان وبالتوصيات كمان .. معقول سيف ميعرفش دا .. ايوا انا لازم استغل دا .. لازم انسب الشغل دا كله ليا لازم اثبت لسيف اني قد المسؤلية وانه طلب مني اخلصه ف يومين خلصته انا ف يوم وبعدها اطلب بقا اللي انا عايزاه
وتاني يوم لي لي راحت وف ايديها ملف شركة فيوتشر وبكل ثقة سلمته لسيف
سيف انا خلصت الملف زي ما طلبته مني اتفضل اهو
سبف باستغراب
ياااه بالسرعة دي انتي لحقتي
لي لي
انت أمرتني اخلصه فأنا سهرت عليه وفضلت مطبقة طول الليل علشان اخلصه مش حابة مكونش قد المسؤلية يا سيف اتفضل راجعه
سيف
طيب اقعدي وانا هراجعه
ولما راجعه انبهر بالشغل اللي فيه وخاصة التوصيات
سيف بإعجاب
هايل هايل يا لي لي حقيقي شغل مبهر كنتي مخبية عننا الابداع دا فين
لي لي حطت رجل على رجل
اعمل ايه انت مكنتش عاطيني فرصتي وكانت غلطتي من البداية اني سبته لبنت عمك اللي بوظته ياااه شوفت فيه اخطاء كتير فضلت طول الليل اظبط اخطاءها كانت هتكلفنا كتير بس الحمد لله انك سلمتلي الملف ف الوقت المناسب
سيف استغرب من كلامها لانه بالرغم من انه طرد رنا الا انه شاف شغلها بنفسه ومتأكد انها موهوبة بس ف نفسه بينكر دا
وعلى كل حال معلقش ع كلام لي لي عن رنا
فلي لي استغلت الفرصة وقالت
سيف بم ان الملف عجبك مش هتكافئني بقا
سيف ابتسم
احلى عشا لأحلى لي لي
لي لي
طبعا العشا دا مفيش مفر منه بس انا عايزة امسك الإدارة المنصب خالي دلوقتي ودي فرصتي اظن اني اثبتت جدارتي وانت بنفسك اثنيت عليا ولا عندك شك ف دا
سيف
لا لا مفيش شك ابدا... تمام ماشي اللي تطلبه لي لي مجاب علطول
لي لي
حبيبي انت يا سيفو بجد هروح اجهز حاجتي علشان انقلها لمكتبي الجديد
وع اخر اليوم لما علي سمع عن ان لي لي مسكت الإدارة مكان رنا اتضايق وراح لسيف
سيف انت ازاي حطيت لي لي مكان رنا .. المنصب دا لرنا ومحدش يستحقه غيرها
سيف بغيرة على رنا بس هو مش واخد باله
لاحظ انك بتقول اسمها كدا عادي ولا كأنها صاحبتك اسمع سيرتها متجيش ف الشركة هنا تاني والمنصب انا المدير وانا اللي ليا الحق احط مين واشيل مين
علي
طيب يا سيف اعمل اللي انت عايزه بس خد بالك انك بتعمل غلط كبير اوي عن اذنك
سيف كان لسه هيتكلم لكنه جاله اتصال
الو ايوا يا مستر فؤاد! كان عندك معاد!!! مع مين.. اه رئيسة الإدارة وهي مجتش! اه اه ظروف خارجة هن ارادتها انا بعتذر لحضرتك... خلاص تمام بجدد المقابلة مع حضرتك النهاردة الساعا ٤ كويس كمان ان شاء الله هتلاقيها ف المعاد مع السلامه
ساب مكتبه بعد ما خلص المكالمة وطلع ع مكتب لي لي الجديد كانت ماسكة المرايا وبتظبط الميكاب
سيف
لي لي بتعملي ايه
لي لي
اا ها لا مش بعمل حاجة كنت بظبط المكتب الجديد
سيف
انا مش قولت بلاش الحاجات دي وخصوصا ف الشركة
لي لي
اوك اوك يا سيف دا حبة صغننة يعني مش واضح اوي بمناسبة اني مديرة الادارة وكدا
سيف
طيب بالمناسبة دي مطلوب منك تروحي تجهزي علشان عندك مقابلة عمل مع مستر فؤاد.. خدي دا الملف بتاعه ادرسيه كويس ورايت توصلي معاه لتفاوض مرضي للطرفين هتقدري ع دا ولا ابعت علي؟؟
لي لي بغرور
طبعا هقدر دا انا لي لي ابعتلي بس اللوكيشن وانا هكون هناك ف المعاد
وبالفعل راحت لي لي ع المعاد وقابلت مستر فؤاد لكنها مقدرتش تقنعه فقالت
اسمع يا مستر يا تقبل بشروطنا واالي بقوله لإما تشوف شركة تانية للتعاون معاها احنا اكبر شركة ف الشرق الاوسط وهتندم لو موافقتش
فؤاد كان هيتجنن
ايه الكلام اللي بتقوليه دا.. دا لوي دراع ولا ايه ... انا مقبلش طبعا
وقام سابها ومشي
لي لي
اوف انسان غبي اوي في داهية راجل معندوش زوق ولا بيعرف يتعامل مع الجنس اللطيف ابدا
ولما سيف اتصل بيها
ها يا لي لي عملتي ايه
لي لي بخداع
كله تحت السيطرة يا سيف خلصت كل حاجة وكان مبسوط اوي بس يارب محدش يعك علينا ويبوظ الاتفاق بتاعنا
سيف
لا ان شاء الله خير .. برافو عليكي يا لي لي اعملي حسابك نخرج نتعشى سوا بالليل
لي لي
وتجيبلي هدية تليق بيا
سيف
اكيد طبعا من غير نا تقولي ...
....
علي كان ف مكتبه بيستعد علشان يروح بيته فجاله اتصال من مستر فؤاد
علي قام وقف
ايه حضرتك بتقول ايه لا طبعا ازاي الكلام دا .. بس اهدى كدا يا مستر فؤاد وروق ارجوك وفهمني بالظبط ايه اللي حصل.. معقول ! اسمها ايه اللي قابلتك... لي لي
وقال ف نفسه
يخربيتها الغبية دي .. دي عكت الدنيا.. انا لازم اتصرف
وقال لفؤاد.. طيب يا مستر انا بعتذر عن سوء التفاهم دا واظن ان حضرتك اتفاقك ف الاول كان مع المدير ار ام .. ايوا بالظبط كدا الاتفاق مش هيكون غير معاها
يتبع...
إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية
رواياتنا الحصرية كاملة
