قراءة رواية أحببتها دون أن أدري كاملة

تنشر حصريًا على مدونة رواية وحكاية قبل أي منصة أخرى

رنا رفعت حاجبها بزهول من اللي سمعته من لي لي 

مش مصدقة كمية الكدب اللي بيجري ف دمها والحيلة والخداع اللي هي فيه ...بسهولة كدا وبسرعة عرفت تخترع عذر علشان تخرج بيه من المأزق اللي هي فيه 

لكنها سكتت علشان تشوف رد فعل سيف هيقول ايه 

سيف 

معقول يا لي لي.. طبعا مصدقك انتي استحالة تأذيني انتي خطيبتي وقريب اوي هتنجوز الدور والباقي ع الهانم اللي بتشتغل من نفسها.. حد قالت يا بني ادمة انتي اختبري لي لي انا واثق فيها من غير ما تحاولي تثبتيلي حاجة واهو انقلب السحر ع الساحر وظهرلي غيظك وغيرتك من لي لي علشان هي خطيبتي واللي بتحظى باهتمامي وانتي لا ... لي لي اتفضلي انتي روحي وانا هتصرف مع رنا وهعرفها عقابها كويس 

لي لي فرحت واخدت نفس عميق بعد ما كانت خايفة سيف يكشفها بعد كلامه حست براحة وانتشاء وبصت لرنا بغرور وتكبر بمعنى ان مهما عملتي هفضل انا التوب 

ومشيت بسرعة وركبت عربيتها وطارت 

زياد كان هيتجنن من اللي سمعه من سيف

انت بتقول ايه يا عم انت معقول صدقتها كدا بسهولة صدقت كلمتين تافهين منها وسبت قدامك الشاهد والدليل اللي واضح قدام عينك.. صدقتها وكذبتنا احنا انا حقيقي مش عارف افهمك انت بتفكر ازاي لا انت مبتعرفش تفكر لان انت معندكش عقل اصلا 

سيف 

اسكت انت انا عارف أنا بعمل ايه كويس 

زياد بانفعال 

انت مبتعرفش تعمل حاجة من اساسه انت انسان مغرور مخدوع في اللي ما تتسمى اشرب خليها تخدعك اكتر وتبيعك كمان وكمان لحد ما تاخد اللي قدامك واللي وراك انت حر كل واحد يشيل شيلته بقا 

رنا 

سيبك منه يا زياد متزعلش ولا تحط ف دماغك دا مش اول مرة يحصل منه التفكير العقيم دا سيبه بقا يتحمل اللي هيحصله محدش هينصحه بعد كدا 

قالتها ومشيت وسابته 

وزياد كمان اخد عربيته وسلم ع رنا ومشي 

رنا يادوب اتحركت بعربيتها ومشيت ف الطريق لقت كم عربية بيمشوا وراها استغربت 

هو فيه ايه بيلعبوا دول ولا بيتسلوا اعمل معاهم ايه دول 

فقررت تقف بالعربية لحد ما يمشوا 

ولما لقتهم لسه واقفين بدات تخاف لان ممكن يأذوها طالما قاصدينها بالشكل دا 

فطلعت موبايلها ولسه هترن ع حد لقت اللي بيقرب من ازار العربية وبيرش ع وشها بخاخ مخدر فالفون وقع منها ونامت ف الحال 

صاحب البخاخ دخلها لجوة وقعد هو مكانها وساق العربية واتوجه بيها لوجهته المقصودة 

ولما وصل بيها وبعد فترة صحيت رنا لقت نفسها متقيدة وقاعدة ع كرسي 

استغربت هي فين ومين اللي عمل فيها كدا وغرضه ايه خافت انه يكون شخص بيحاول يعتدي عليها وعنيها فضلت تزوغ ف كل مكان 

لكن وبعد ما أدركت انها ف اوضتها في بيت امها 

اتنفست الصعداء لكن سرعان ما خافت تاني لان معنى كدا ان عمها اللي عمل كدا 

رنا 

عمي اللي جابني هنا بالطريقة دي طيب ليه وليه رابطني كدا كأنه مجرم وانا المخطوفة معنى كدا ان عمي مش ناوي ليا ع خير ابدا 

بعد شوية من السكون وتفكير رنا ف كل الاحتمالات اللي تخلي عمها يعمل فيها كدا 

دخل عزت الاوضة ولما لقاها فاقت قالت بحدة وصوت كله شر 

اخيرا فوقتي يا وش النحس يا بوما 

رنا مردتش عليه لكنها اتنهدت بأسى فقرب منها ولطمها ع وشها بحدة خلت الدم يخرج من مناخيرها من قسوة الضربة 

عزت 

وبتنفخي في وشي كمان انتي صحيح متربتيش ولا لقيتي حد يربيكي.. بس انا اهو موجود علشان اربيكي من اول وجديد ... بقا بتضحكي عليا انتي وابن عمك وتعملي فيها انكم متجوزين علشان تاخدوا الورث وتشبعوا بيه وتطلعوني من المولد بلا حمص 

رنا حاولت تتكلم بعد الصفعة القوية اللي اخدتها 

احنا متجوزين بالفعل يا عمي وانت بنفسك اللي جايب المأذون والشهود كمان... اما بالنسبة للورث فهو بتاعي يا عمي وحقي شرعا وقانونا 

هنا انهال عليها عزت بالضرب المبرح في كل وشها وسط صرخات رنا علشان يسيبها في حالها واللي جه عل اثر الصوت امها سماح اللي جت تجري وهي بتقول بخوف 

دا صوت رنا بنتي .. بنتي ايه اللي جابها هنا وبتصرخ ليه يالهوي يكون جرالها حاجة ولما دخلت 

شافت عزت بيضرب فيها وبيقول 

الفلوس دي كلها بتاعتي ومن حقي يا بنت الك..ب انا اللي تعبت فيها وكبرتها والحق عليا اني ربيتك واويتك انتي وامك بدل ما كنت ارميكوا في الشوارع لكلاب السكك ينهشوا فيكم انا اللي غلطان 

هنا صرخت سماح وجريت ع بنتها 

بنتي رنا بنتي انت بتعمل فيها ايه ورابطها وبتضربها كدا ليه عملت فيك ايه الغلبانة اليتيمة دي حرام عليك حسبي الله ونعم الوكيل فيك طول عمرك ظالمها واكل فلوسها ربنا ينتقم منك 

عزت ازداد شر اكتر بسبب كلام سماح ومسكها من دراعها زقها بحدة ع الارض 

بقا بتدعي عليا في وشي يا بومة انتي كمان طب وربنا لاوريكي انتي وبنتك النجوم ف عز الضهر 

رنا خافت ع امها فصرخت باسمها 

ماما.. انت عايز مننا ايه حرام عليك بقا انا بعدت عنك عايز ايه تاني 

عزت 

عايز فلوسي يا ختي لكن وشك اتمنى يتمسح من وش الدنيا 

رنا 

الفلوس دي ورثي انا وامي من بابا الله يرحمه... انت مكنش ليك اي حاجة فيهم وانت محنتش علينا ولا حاجة ولا دفعت مليم من جيبك كله كان من فلوس بابا وبالعكس فلوس بابا هي اللي عملتك بدونها كنت ولا حاجة .. اتجوزت ماما واوهمتها انك هتحافظ عليها وع بنتها وع فلوسها وانت ف الحقيقة طمعان فيهم وعايزهم لنفسك انما احنا مكنتش مهتم بينا وعايزنا نخرج من حياتك للابد... اا انا مستعدة اعطيك نص اللي املكه كله بس بشرط تسيبنا ف حالنا وتطلق ماما واحنا هنمشي من هنا 

عزت 

هيحصل يا حلوة بس مش هاخد نص الفلوس وانتي تاخدي الباقي ع الجاهز من غير ما تعبتي فيه وتروحي تعطيها لابن عمك اللي شبعان فلوس وع قلبه قد كدا ومش راضي حتى يحن ع عمه ويدخل معاه ف مشروع يدخله ملايين زي ما بيدخل لنفسه 

رنا 

الفلوس دي حقي ورثي من بابا يا عمي انا هتفضل عليك بنصها بكل رضا ومستعدة دلوقتي لكنها مش من حقك ابدا 

عزت مسكها من شعرها وقال بكل عنف 

الفلوس هتكون ليا وهتعملي دا حالا امضا بخط ايدك عن تنازلك الكامل عن كل ممتلكاتك وكل اللي هتورثيه لما تتمي الواحد وعشرين سنة 

رنا 

اللي بتقوله دا جنون حرام عليك 

سماح 

حرام عليك تاكل مالنا كدا عيني عينك 

عزت 

ملكيش دعوة انتي اخرجي منها بدل ما اخلص عليكي دلوقتي حالا ...ايوا صح اسمعي يا بت يا رنا لو ممضتيش حالا انا هخلص ع امك قدامك هربطها هنا زي الك..بة وهمنع عنها المية والأكل لحد ما تموت من الجوع وكله بسببك وقدام عينك كمان 

رنا قالت بخوف وبدون تردد 

لا وع ايه خد الفلوس اشبع بيها كلها مش عايزاها احنا اللي بنعمل الفلوس مش هي اللي بتعملنا بس قولي انت عايزها ف ايه بتحوش وعايز تكوش ليه ع كل حاجة لا عندك ابن يورثك ولا اي حاج..ة هتاخدهم معاك قبرك لما تموت ؟؟ولا هتشفعلك عن ربك لما تقوله انا سرقتهم من بنت اخويا وامها قولي هينفعوك ف ايه يا عمي ؟؟

هنا عزت اتحول لشيطان ف صورة انسان وبدا يضرب ف سماح 

شوفي بنتك اللي معرفتيش تربيها بتقول عليا ايه 

رنا فضلت تصرخ باسم امها 

سيبها سيبها بالله عليك قولتلك همضي هات الورق امضيه والله العظيم همضي هتنازل عن كل حاجة بس متضربهاش 

سماح 

لا لا يا رنا اوعي يا بنتي انا اتحملت دا كله علشانك علشان تلاقي حياة كريمة بدل اللي شوفناه طول عمرنا اوعي تفرطي ف فلوسك علشاني ان شاء الله يموتني حتى انا راضية بس فلوسك ترجعلك وتأمنى مستقبلك يا بنتي 

رنا 

تولع الفلوس على الميراث ع كل حاجة الا انتي يا ماما لو فلوس الدنيا اتحطت ف كفة وانتي في كفة ميجوش حاجة جنبك اعمل ايه من غيرك والفلوس هتفيدني ف ايه وانتي مش معايا.. مش عايزاهم ياخدهم يشبع بيهم 

سماح لا لا يا بنتي بالله عليكي متفرطيش ف حقك 

عزت 

اخرسي انتي .. امسكي يا زفتة انتي امضي يلا اخلصي 

رنا اخدت الورق بعد ما فك ايديها 

وبدأت تمضي ع كل الورق وقالت 

اتفصل سيبنا في حالنا بقا 

اخدهم عزت وهو في قمة فرحه وسروره باستيلاءه ع مال اليتيم وخرج 

سماح جريت ع بنتها وفكتها من قيدها وفضلت تعيط 

ليه ليه كدا يا رنا تسبيه ياخدهم كل اللي عملته راح راح ف الفاضي سنين تضحيتي راحوا هدر حسبنا الله ونعم الوكيل حسبنا الله ونعم الوكيل 

قالتها واغمى عليها 

رنا اتفزعت وحاولت تفوق فيها 

ماما ماما فوقي يا ماما ارجوكي ماما ردي عليا ماامااااااا 

جريت بسرعة زي المجنونة تجيب مية تفوقها لكنها مقدرتش.. حاولت ترفعها ع السرير لكنها مقدرتش حاولت تفوقها تاني تضرب ع وشها بخفة لكن مفيش فايدة.. حاولت تجيب برفيوم وتشممها لكن امها مش بتفوق ابدا 

ف الوقت دا سمعت جرس الباب بيرن فحست انه طوق النجاة ليها ف وقت عقلها اتشل عن التفكير خافت امها تروح منها 

لما فتحت لقته سيف فرحت وقالت 

سييف سيف ماما ماما اا 

سيف اتصدم لما شاف وشها 

رنا مين اللي عمل فيكي كدا مين بهدلك بالشكل دا 

قالها وحضن وشها بايديه بخوف حقيقي عليها 

رنا عيونها كانت بتزوغ ع جوا الاوضة عايزة تنطق تصرخ بس صوتها بقا رايح وقوتها بتنهار 

ما... ما.. ماما.. جوة الحقها يا سيف... مش بترد

سيف عيونه اتسعت وجري بسرعة على جوا مكان ما بتشاور رنا لقها سماح واقعة ع الارض ومغمى عليها 

فقال 

مين عمل فيكم كدا .. عمي عزت مش كدا اتكلمي يا رنا 

رنا بصوت بتجاهد انه يطلع بعد ما نفسها راح من خوفها ع امها 

مش وقته مش.. وقته.. امي.. الحقها .. المستشفى بسرعة ارجوك 

سيف بسرعة شال سماح وجري بيها ع العربية ورنا وراه 

ركبها العربية وركب رنا معاها 

وطار ع المستشفى وهو بيقول وهو شايف رنا بتنهار هي كمان من التعب ووشها منفوخ من الضرب 

عزت اللي عمل فيكم كدا وقسما بالله لأندمه علشان مس بس شعرك منك .. ازاي يتجرأ ويمد ايده ع مراتي هدفعك تمن دا غالي اوي يا عزت صبرك عليا اطمن عليهم واجيلك يا ويلك مني 

ولما وصل للمستشفى زعق ونادى ع الممرضات 

اتنين ترولي هنا بسرعة 

وبالفعل ف الحال جت الترولي وتم نقل سماح ورنا قالت لا انا همشي انا هدخل مع ماما 

سيف 

انتي مش قادرة تصلبي طولك نامي هنا ارتاحي وهندخلك مع امك متقلقيش 

لكن رنا رفضت تماما فقرب منها سيف وحاوطها بدراعها وسندها وهي ماشية مع الترولي اللي عليه امها 

ولما دخلوا الاوضة وبدأ الدكتور والممرضات يشوفوا شغلهم ويحاولوا يفوقوا سماح 

سيف قرب من رنا وطلع منديل وبدأ يمسح بحنان اثار الدم من ع وشها 

الممرضة ناولته كمادات وبدأ يعمل لرنا مساج ع وشها بخوف وحب 

لكن رنا مكانتش معاه قلبها وكيانها مع امها 

سيف 

متخافيش هتفوق اطمني الدكاترة بيعملوا اللازم 

رنا عيطت 

خايفة تروح مني متحملتش اني ضحيت بفلوسي علشانها اتصدمت واغمى عليها بسببي بس اعمل ايه انا اخترتها هي مش عايزة حاجة المهم امي تقوم بالسلامة 

هنا اتغير وش سيف وقال بصدمة اكبر 

هو مضاكي ع تنازل!!! وانتي مضيتي اه يا كلب يا حقير وقسما بالله نهايته على أيدي 

قالها وقعدها بهدوء وطلع فونه وكلم زياد 

اللي مردش ف البداية وبعدها رد 

ايه يا زفت اسمع الغي صلتك بيا خالص 

سيف 

ولا مش وقته رنا وامها ف المستشفى عايزك تجيب ماما وايه يقعدوا معاهم وانت تفضل برا تحرسهم لحد ما احاسب الكلب اللي عمل فيهم كدا وارجع بسرعة انا ف انتظارك مش همشي واسيبهم الا لما تيجي اخلص 

وبعد نص ساعة بدأت سماح تستعيد وعيها 

فجريت عليها رنا 

ماما ماما حبيبتي حمدا لله على السلامه 

سماح بضعف وبكا

رنا بنتي.. قولي ان اللي حصل مجرد كابوس وانتهى وانه مفيش حاجة منه حصلت ف الحقيقة 

رنا 

ماما متفكريش ف حاجة دلوقتي المهم صحتك بالله عليكي ارتاحي ومتشليش هم 

سيف قرب منها 

حمدا لله على سلامتك يا حماتي متخافيش فلوس رنا هترجعلها محدش هياخد منها جنيه واحد وانا ع وش الدنيا واللي عمل فيكم كدا هيتحاسب هيتحاسب علشان يفكر بس يمد ايدك ع مراتي اقسم بالله لاجيبهولك راكع وبيعتذر كمان 

سماح بفرحة 

سيف .. بنت عمك الحقها... اقف جنبها عزت منه لله ربنا يورينا فيه يوم اخد منها كل حاجة ضربها وبهدلها واستولى ع كل حاجة منه لله

سيف 

متخافيش مفيش حاجة من دي هتحصل وانا عارف ازاي هتصرف معاه 

ولما وصل زياد قال سيف لرنا 

انا سايبكم ف امانة زياد لحد ما ارجع هجيبلك حقك متخافيش 

رنا 

مش عايزة حاجة متحاولش معاه انا عايزة اعيش انا وامي بسلام بعيد عن اي حاجة سيبونا ف حالنا بس 

سيف بصلها بأسى ومشي 

اما رنا اول ما شافت مريم اترمت ف حضنها وفضلت تعيط 

ماما مريم احنا اتبهدلنا يا ماما.

يتبع...

إلى حين نشر الفصل الجديد للكاتبة أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏