قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

في فرح والكل فرحان وبيهيص واقفه بنت جميله لابسه فستان قشر سمك سيمبل وشيك وباين عليه قيمته مبتسمه وبتهيص وفرحانه من قلبها 

نسمه حست باللي بيحط ايده على كتفها 

نورهان بصوت عالي علشان دوشه الفرح بت يا نسمه عامله ايه يابت فينك مختفيه فين من زمان

نسمه بإبتسامه ازيك يا نورهان عامله ايه بنتي

نورهان يا اختي احسن منك مبتسأليش يا واطيه

نسمه بتبرير والله غصب عني انتي عارفه اني مش متجوزه في البلد وبنزل بصعوبه 

نورهان ايوه يا اختي ناس ليها بخت روحتي وقلتي عدولي يا ندله ولا بتسالي ولا تعرفي عني حاجه ولا حد يعرف عنك حاجه

نسمه بإبتسامه والله ابظا نزولي بيقي صعب بسبب بعد المسافه ثم يا بختي على ايه يعني والله يا بنتي دي تعتبر غربه على الاقل هنا انتي وسط اهلك وناسك وعزك وعزوتك لو تعبتي هتلاقي الف مين يسندك إنما هناك والله ما هتلاقي حد.الا من رحم ربي وكمان على ما اهلك يجولك يلا الحمد لله 

نورهان رفعت عنيها لفوق ورجعت بصت لنسمه بتقييم يا ستي مش هانحسدك بس إيه يابت الحلاوه دي انتي خلفتي ولا لسه

نسمه اه معايا تلات عيال ياستي 

نورهان بذهول تلاته و قد إيه دول بقى 

نسمه الكبير يا ستي عنده عشر سنين والوسطاني 8 سنين والصغير اربع سنين 

نورهان وهي بتبص على جسم نسمه بتقييم ولا يبان عليكي يا اختي انك لا حبلتي ولا ولدتي داه بطنك زي بنت البنوت مرسومه رسم لا كرش مدلل ولا بطن وجناب باظين زي حلاتنا 

نسمه بضحكه والله ابدا كل اللي محتاجاها تظبطي اكلك وتروحي الجيم شويه بعد الولاده وهتلاقي جسمك رجع زي ما كان

نورهان ايوه يااختي عيني عليكي بارده عيشتك ارتاحت وبقيتي بتروحي جيم 

نسمه يا بنتي ارتاحت ايه بس والله ابدا دله اشتراك الجيم كله كان 300 جنيه الموضوع مجتاج منك بس تظبطي اكلك وتربطي بطنك بعد الولاده وهتبقى زي الفل مع شويه تمارين في البيت

نورهان لا ايه بس دانتي لابسه فستان قشر سمك تمنه شيئ وشويات ايه خايفه لاحسدك لا ياستي انا الحمد لله عيني مليانه مبتحسدش 

نسمه بحب لا ياقلبي والله ابدا انا جايبه الفستان علشان فرح مريم انتي عارفه انها قبل ما تكون صحبتي فهي بنت ابن عم ماما

نسمه ايوه عارفه يا ستي وقعت واقفه جوزها هايخدها معاه المانيا 

نسمه الله اعلم علمي علمك

نورهان يا اختي البلد كلها عارفه هي البلد دي بيخفى فيها خفيه

نسمه ياستي دعي الملك للمالك

بقولك ايه متيجي نروح نهيص مع العروسه شويه بدل وقفتنا كده زي عواجيز الفرح 

نورهان ماشي اهو نفك عن نفسنا شويه

وطلعوا باركو للعروسه ووقفوا يهيصوا مع بعض والكل فرحان من قلبه واللي بيدعي واللي بيحقد واللي بيحسد ومستكتر على غيره النعمه

مشيت العروسه مع عريسها في عربيه الزفه

نورهان في العربيه شوفت يا وائل الفرح اهي دي الأفراح ولا بلاش

وائل الفرحه في القلب مش بكبر الفرح وصغره 

نورهان بنفخه ايوه يا اخويا كلامك اللي لا بيودي ولا يجيب صارفين ومكلفين شيئ وشويات عامله فرح في أكبر قاعه واغلاها فشخره كدابة على الفاضي صحيح اللي معاه قرش محيره يجيب حمام ويطيره 

وائل وهو بينفخ من تحت أسنانه لا حول ولا قوه الا بالله انتي عايزه ايه يعني

نورهان هو انا قولت حاجه انا مستغربه ايه كل الفلوس دي وسكتت شويه شوفت الفستان يالهووووووي حاجه كده وهم دول دافعين فيه قد إيه دول اه ناس ليها بخت بنت المحظوظه وناس ليها وسكتت

وائل ليها ايه ياست عرفيني ماله حظك ناقصك ايه ولا أخرت عنك ايه ولا طلبتي أمته وقصرت 

نورهان هو انا اتكلمت ولا نطقت انتا عايز تتخانق وخلاص لازم كل خروجه تنكد عليا انا بفك معاك بكلمتين 

وائل يا ستي فكي بس بلاش تنمي على الناس وتشيلينا ذنوب كل واحد كفايه عليه شيلته

نورهان انم ايه انا بتكلم في العموم انتا هاتجيبلي نصيبه 

وسكتت شويه ااااه اسكت اسكت عارف شوفت مين في الفرح

وائل وهو مركز على الطريق مين 

نورهان البت نسمه البت المعفنه اللي كانت ساكنه عند البنزينه القديمه اااه لو شوفتها البيت احلوت واتدورت وبقت ولا الممثلين والبلوجر لابسه فستان تمنه شيئ وشويات وال ايه اقولها عيشتك ارتاحت تقولي لا والله شوفت الكدب الناس بقت بتخبي على ايه يا حسره الكل بقى بيدس من تحت لتحت البت تلاقيهم مدكنين على قلبهم قد كده 

علي ايه يعني اللي عطاهم بإيد يدينا بالاتنين وكله كوم يا وائل والبت يا لهوي يا لهوي يا لهووي ولا يبان عليها لا حمل ولا ولاده وشاورت بإيديها كأنها بترسمله مانيكان في الهواء

بطنها مرسومه رسم

وائل هز رأسه ونفخ بغيظ لا حول ولا قوة إلا بالله عايزه ايه يعني في ايه يا بنتي مترحميني شويه بقى وارحمي الناس منك مش عاجبك كنتي مشيتي 

في العربيه عند نسمه شوفت مريم يا عماد كانت قمر اللهم بارك

عماد بصراحه ااه والله الواد محمد امه دعياله ادب وأخلاق وتدين وحسب ونسب

نسمه بصدق ربنا يسعدهم يارب

وخبطت على دماغها بصوابعها ااااخ نسيت اسكت مش قابلت واحده صحبتي من ايام الثانوي في الفرح

عماد بجد 

نسمه اه والله بس بقت بسم الله قمر والله يا عماد كنت مبسوطه وباين عليها طيبه طول الفرح كانت فرحانه لمريم كأنها اختها 

عماد ربنا يفرح خلقه بس تعرف مريم منين 

نسمه كانت معانا في ثانوي بيتها قريب من بيتنا 

عماد جيران يعني 

نسمه حاجه زي كده بس جدعه اوي وطيبه لما ننزل المره الجايه البلد عايزه اعزمهم في الشقه اللي هناك ومنها تتعرف انتا وجوزها على بعض

عماد ماشي يا ستي كلامك لما ننزل شوفي عايزه ايه وانا معاكي 

نسمه بكشه وش ان شاء الله 

عماد مالك يا نسمه بتتكى على أسنانك كده ليه 

نسمه بوجع مش عارفه والله يا عماد بطني واجعني اااوي 

عماد اتنفس بخشونه يا بنتي منا قولتلك مش لازم تقعدي تهلكي في نفسك طول النهار اصريتي تنضفي الشقه وكأنها تنضيفت العيد عاجبك دلوقتي كده وانتي الوجع ماسك فيكي محسساني ان العزومات مقطعه بعضها والناس داخله طالعه لما نحلت وبر البيت ولا أين 

نسمه غمضت عنيها من الألم وبدائت تتنفس بصعوبه :خلاص يا عماد كده ولا كده كانت هاتتنضف اهي خلصت وهمها اتشال من على دماغي وارتحت وانا كده ولا كده هاروح اخد قرصين مسكن متعملهاش حكايه من مفيش

عماد بقلق من وجعها طيب نعدي على اي مستشفى في طريقنا يا بنت الناس

نسمه لالالا والله ما محتاجه هي ديتها قرصين مسكن واريح شويه هابقى زي الفل 

عماد بصلها بجمب عينه بقلق وكمل سواقه لحد ما وصلو البيت دخلت نسمه وهو ساندها وغيرت هدومها واخدت مسكن 

عماد رقدها على السرير وشد الغكا علهيا حاولى تنامي شويه علشان ترتاحي وو حسيتي ان لسه تعبانه متجيش على نفسك نروح المستشفى ماشي

نسمه وهي بتغمض عنيها لما مفعول المسكن بداء و الألم بداء يروح ونامت 

عماد طفى النور عليها وغير وانضملها وهو راقد قلقان من تعبها المفاجئ لحد ما سحبه سلطان النوم

في عربيه الزفه السواق عمال يعمل خمسات بالعربيه ويضرب كلكسات 

مريم بخوف بالله عليك يا محمد خليه يبطل

محمد بضحك يا بت دي فرحه حد يكره الفرحه 

مريم بتعقل مقولتش حاجه بس بعقل وداه طريق سريع مينفعش فيه كده داه ساعه القضا يعمى البصر ارجوك قوله يوقف

محمد شويه وهتلاقيه بطل لوحده 

مريم يا محمد علشان خاطري 

محمد حاضر يا ستي 

وشاور لصاحبه يا ابني خف بقى راعي اننا عرسان جداد لسه خلينا نوصل بيتنا على خير

كمال ياض أفرح ومتخافش صاحبك سواق درجه اولى وفي لحظه تهور عمل خمسات بالعربيه والعربيه خرجت عن سيطرته وانقلبت بيهم والطريق اتقفل في لحظات اتحولت فرحتهم لدمار

وقفت عربيات كتير وقطعت الطريق والكل بيجري علشان يساعد ويعدل العربيه المقلوبه والكل بيضرب كف بكف لما شافو فيها عريس وعروسه سايحين في دمهم واتصلو بالاسعاف بسرعه البرق

صحيت نسمه بألم لا يطاق وهي بتصرخ بصوت عالي من شده الألم الحقني يا عمااااد

عماد قام منكرو من مكانه في ايه يا نسمه

نسمه بصراخ ودموع بطني بتقطع نار مش قادره اتحمل

عماد يلا نروح المستشفى انا قولتلك من الاول وانتي مسمعتيش كلامي سحب إسدال ولبسه ليها بسرعه ماهوله وسحب المفاتيح ومركزش حتى أنه نازل بالتريننج سند نسمه اللي وشهاوكله بقر عرق من كتر الألم لحد ما ركبو وساق بجنون لأول مستشفى قابلته في الطريق وشالها بسبب الألم اللي عجزها عن الحركه

دخل الطوارئ بصوت عالي دكتوووور بسرعه مراتي بتموت

ممرضه جاهله بسرعه خير يا فندم 

عماد مراتي بتموت

جابت ترولي بسرعه وحطوها عليه ودخلوها الطوارى اللي استدعت دكتور جراحه 

عماد واقف والقلق والخوف بينهشو فيه ومش فاهم هي حصلها ايه لحظات مرت اتقل من الجبال لحد ما فتحت الممرضه الباب ودخل لقي نسمه راقده وهي متعلق في ايدها كانيولامتوصله بمحلول 

عماد بلهفه طمني يا دكتور 

الدكتور بهدوء اطمن واضح ان المظام بقالها فتره مش مركزه في الألم لحد ما وصل للمرحله دي

عماد مرحله ايه 

الدكتور للأسف المدام عندها فتاء ومحتاج تدخل جراحي 

نسمه برفض انا عمري ما حسيت بألم ولا اشتكيت من بطني يا دكتور الألم داه مكملش كام ساعه 

الدكتور بصلهم بإستغراب مستحيل حجم الفتاء بيقول انه بقاله فتره لانه كبير جدا

نسمه والله العظيم داه اللي حصل انا لا اشتكيت ولا كنت بحس باي ألم في بطني اساسا

عماد طيب ودلوقتي الحل ايه 

الدكتور للأسف مفيش حل غير العمليه انا حاليا اديتها مسكن قوي علشان كده هدا الألم وبعد ما مفعوله يروح مش هايبقى الألم غير محتمل بالمره

نسمه بدموع ورفض عمليه لاء يا عماد بالله عليك بلاش عمليات وانا لوحدي 

عماد قرب منها ومسك ايديها بحب وانا روحت فين بس يابت منا موجود

نسمه عيالي يا عماد والنبي بلاش 

عماد بوجع من حالتها علشان عيالنا لازم تقوي وتقومي على رجليكي 

نسمه طيب اتصلي بماما مش عايزه ابقى لوحدي عشان خاطري 

عماد حاضر ارتاحي انتي بس وانا هاكلمهم 

وبص للدكتور طيب هي العمليه هاتتعمل أمته

الدكتور ممكن على بكره الصبح أقصى تقدير

عماد ماشي يا دكتور شكرا

وبص لنسمه بقله حيله وطلع من الاوضه اتصل بحماه اللي رد بسرعه

عماد الو سلام عليكن ازك يا حاج عامل ايه

جلال بصوت مرهق ونهجان شديد :الحمد لله يا ابني 

عماد بص بصراحه كده كنت عايز أبلغ حضرتك بحاجه بس اتمالك نفسك شويه

جلال بتعب عرفت يا ابني عرفت لا حول ولا قوه الا بالله الغلي العظيم 

عماد بإستغرب عرفت منين انا لسه مقولتش لحد اصلا

جلال البلد كلها عرفت يا ابني ومحدش ليه سيره غير اللي حصل

عماد هز راسه بعدم استيعاب للكلام البلد عرفت منين اصلا 

جلال الحادثه يا ابني كانت على الطريق 

عماد حس ان قلبه هايقف حادثه ايه 

جلال اومال انتا بتتكلم على ايه مش على حادثه مريم ومحمد

عماد حس ان قلبه هايقف من الخوف ها طيل هما عاملين ايه 

جلال ربنا يستر يا ابني بيقولو هاينقلوهم مستشفى في مصر علشان الامكانيات هنا مش كافيه 

عماد غمض عنيه طيب يا حاج لو ينفع تبعتلي طنط اكون شاكر ليك

جلال بقلق ليه يا ابني في ايه تاني 

عماد بتردد لا ولا حاجه اطمن يا حاج دي نسمه بس عندها شويه مغص والعيال هايطلعو عنيها وانا مش عارف اعمل ايه علشان شغلي 

جلال خبط كف بكف وهز راسه بوجع لا خول ولا قوه الا بالله العلي العظيم من كل كرب عظيم يارب ايه اللي بيحصل داه بس 

عماد بصبر وحد الله يا حاج في ايه داه في ابتلائه رحمه كا اخذ منك إلا ليعطيك انا اللي هاقولك

جلال صعبان عليا يا ابني الواد والبت اللي فرحتهم اتسرقت في لحظه واتلقبت الدنيا فوق روسهم 

عماد بحزن على صاحبه. حس انه متكتف ما بين مراته اللي داخله العمليات كمان كام ساعه وما بين صاحبه اللي راقد كامن بين الموت والحياه هو وعروسته :لعله خير 

جلال طيب طمني يا ابني نسمه بخير ولا بتخبي عليا انتا كمان

عماد عيب عليك يا حاج والله نسمه زي الفل 

جلال ربك يستر يا ابني انا هاتصل وابعتلك الحاجه مع حد من اخواتها 

عماد ماشي ورجع الاوضه لمراته وهو سرحان في ملكوت ربه 

نسمه مالك يا عماد 

عماد هز راسه وابتسم علشان يداري الألم الي جواه: ولا حاجه كنت بكلم ابوكي بس قولتله انه مغص علشان ميفصلوش في قلق 

نسمه اتنهدت براحه عندك حق 

ومر الليل على عروسه وعريس بينازعو علشان يفضلو على قيد الحياه وأم بتعافر علشان تعدي الألم وتكمل مسيره الحياه 

وصلت الحاجه صباح مع أول خيوط الشمس وجابها المستشفى 

صباح دخلت اوضته بنتها بلهفه :مالك يا ضنايا ودموعها نزلت ايه اللي بيحصلنا داه بس يارب اللهم لا اعتراض على حكمك ولا راد لقضائك هلاقيها منين ولا منين

نسمه بصلتها بإستغراب قصدك إيه 

عماد بسرعه قصدها على تعبك ومشوار سفرك

صباح بصتله وهزلها رأسه من غير ما نسمه تاخد بالها انه مقالهاش 

مر نص ساعه ودخلت الممرضه علشان تجهز نسمه للعمليات 

نسمه وهي طالعه دموعها نزلت عيالي يا عماد بالله عليك 

صباح بدموع هاتطلعي بخير يا ضنايا ان شاء الله ربنا مش هايوجعني فيكي 

عماد يابت بطلي عبط هاتطلعي زي الفل وكمل بهمس وياختك يابنت المفجوعه هاتكلي فرخه بلدي لوحدك

نسمه ابتسمت رغم خوفها وجعها لسه والده لسه جديد وبتقوت 

عماد بغمزه اطلعي انتي بس ونبقى نفكر في الموضوع داه على رواقه 

ضحكت برغم الوجع سندي بطنها بإيديها علشان تخفف الألم لحد وشها احمر زي الطماطم من الكسوف

 سحبتها الممرضه لحد ما اتقفل باب العمليات وانهار اخر ذره في ثبات عماد معاه 

لحظات ولحظات وبقت دقايق وساعات والكل قاعد مترقب لحد ما خرج الدكتور 

عماد جري بلهفه طمني 

الدكتور وهو بيشيل الماسك اللي على وشه اطمن هي هاتطلع على اوضه عاديه بس طبعا الأكل الفتره دي بحساب وللأسف من هنا وجاي ممنوع تشيل اي حاجه سواء تقيله او خفيفه 

عماد اخد نفسه براحه زي الغريق اللي ما صدق وصل البر الحمد لله مش مهم اي حاجه المهم هي 

صباح رفعت ايدها يا منتا كريم يارب

نورهان صحيت ولبست إسدال ونزلت تجيب الفطار وعدت على امها في الطريق لقيت لمت نسوان قاعدين

نورهان في ايه متجمعين عند النبي ان شاء قاعدين من النجمه كده ليه

واحده من الجيران اسكتي ولا علمك باللي جرا

نورهان بفضول ايه اللي حصل 

الحاره مش البت اللي كان فرحها إمبارح عملو حادثه ويا حبه عيني راقدين بين الموت والحياه 

نورهان خبطت على صدرها يالهوي أمته داه حصل 

امها إمبارح وهما مروحين من الزفه 

نورهان بتمصمصه شفايف شوفي ازي لا حول الله يارب هابقى اشوف وائل واروح اطل عليها 

امها فيكي الخير يا قلب امك بس بيقولو نقلوهم لمستشفى في مصر مش هنا اصل حالتهم خطره 

نورهان ربنا يشفيهم وياخد بيدهم 

جاره تانيه اسكتوا مش شوفت الحاجه صباح مرات الحاج جلال إمبارح بالليل بعد نص الليل طالعه هي وابنها على ملا وشها

نورهان ودي رايحه فين انصاص الليالي يا اختي 

امها ما يمكن رايحه للعروسه انتوا ناسيين انهم قرايب 

جارتهم تؤ مظنش اصلي قبلها شوفت جوزها طالع لوحده 

نورهان واحنا هانشغل بالنا لسه يا خبر بفلوس كمان شويه هايبقى ببلاش يلا خلوني اروح اجيب الفطار زمان وائل صحي 

جابت الفطار ورجعت قلعت الاسدال ودخلت تجهز الفطار ووارل كان صحي وغير هدومه قعدو يفطرو هما وعيالهم 

نورهان اللا بالحق مدرتش باللي حصل 

وائل هو بيبلع اللي في بوقه خير ايه اللي حصل

مش مريم اللي كنا في فرحها إمبارح 

وائل مالهم 

نورهان وهي بتأكل عملو حادثه وبيقول حالتهم خطر وفي المستشفى هي وجوزها ونقلوهم مصر

وائل بصلها بصدمه وبلع ريقه بصعوبه وعنيه حتى مبترمش

ياتري اللي حصل داه من ايه 

ونورهان عايزه توصل لايه 

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة