قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

نورهان نزلت تتسوق وعدت على امها لقتها قاعده قدام الباب زي عوايدها حطت المسواق وقعدت جمبها 

نورهان عامله ايه يا ماما

نجاح نحمدو انتي عامله ايه

نورهان بنفخه كويسه هاعمل ايه يعني على حطة ايدك يعني ايه مفيش جديد 

نجاح اسكتي معرفتش 

نورهان بإنصات ايه اللي حصل 

نجاح وهي بتعوج بوقها وبتشوح بإيديها البت تقى 

نورهان حاولت تفتكر تقى مين 

نحاج وهي بتشاور يإيديها البت تقى تقى اللي جوه الحاره بنت مصطفي

نورهان ايوه ايوه عارفها البت الحلوه ام عنين ملونه دي 

نجاح عليكي نور هي 

نورهان ايوه مالها 

نجاح يشهقه مدرتيش مش جوزها سافر 

نورهان بشهقه خضه وحطت ايدها على دقنها والنبي ايه

نجاح بإستكتار وهي بتهز جسمها ايوه يا اختي راح السعوديه عقبال امالتك

نورهان بتعوجه بوق ايوه يا اختي الناس كلها الدنيا عماله تجيلهم جري وتيجي لحد عندي وتعرج ولا المكسحين 

نجاح ايوه الناس عماله تكبش وتعبي وانتي كبدي عليكي حسره عليكي وعلى حظك

نورهان ايوه الدنيا في الحظ بتجريلهم بالمشوار وتيجي لحد عندي انا وتتقطع رجليها  

نجاح بولوله حسره عليكي يا بنتي وعلى حظك معرفش حظك ماله ولا إيه اللي صابك ولا اللي نابك من الهم داه كله

نورهان بتحسره بختي يا ماما مهي ناس ليها بخت وناس ليها ترتر وانا زي ما بيقولو قليل البخت يطلعله العضم في الكرشه 

نجاح ايوه بختك من بخت امك يا بت انتي كنتي رايحه فين كده 

نورهان كنت في السوق بستقضى شويه طلبات هاعوزي حاجه اجيبهالك قبل ما ارجع

نجاح لا يا ضنايا تسلمي 

نورهان طيب يلا فوتك بعافيه بقى وشالت المسواق ومشيت وشافت جارتهم وهي داخله بيتهم 

نورهان بصوت عالي: بت يا علا انتي يابت

علا اتلفتت قبل ما تدخل: نورهان ازيك يا بنتي عامله ايه وحشتيني فينك يابت عامله ايه يا واطيه

نورهان احسن منك اهو في الظتيا عامله ايه يابت فينك وفين اراضيك منتوا بتروحو وتقولو عدولي مبشوفكمش الا في المناسبات بس وكل فين وفين لو اتطست الوشوش واتقابلت

علا بضحكه وانتي وحشاني اكتر والله بس انتي عارفه ان الدنيا تلاهي وكل بيت فيه اللي مكفيه وزي ما بيقولو اربع حيطان وباب مداريين وراهم هم ما يتلم 

نورهان بشهقه على ايه يا اختي يعني مهو كلنا متجوزين اهو 

علا والله يا بنتي مش على بيت بس عيال وطلبات بيت وشغل بيت وراجل ودينا ودين وسته وستين لما طالع عينا يلا الحمد لله والله يا نورهان انا من كتر الضغطه باجي لماما يوم في الأسبوع وياجيت يا مجتش كمان لو جيت بقعد كام ساعه زي الضيفه انتي عارفه اني متجوزه وقاعده في آخر البلد 

نورهان بحده بس قدرت تداريها ايوه منا دريت ان جوزك خدلك بيت لوحدك بعيد عن أهله 

علا بتبرير والله ابدا مجاش بالساهل داه بعد وفاه ابو جوزي الله يرحمه اخوه الكبير قال اللي عايز نصيبه انا شاري وخلص البنات والرجاله وقعد في البيت هو ومراته وعياله وحالتي مرضتش تبيع نصيبها وقعدت فيه والفلوس مكفتش روحت بعت دهبي ومكفتش دهلت في كام جميعه كنت اتبهظلت في الايجار على ما كملنا وجيبنا بيت هو صحيح دور واحد بس اهو ساترك من مرمطه الإيجار ولا كل شهر شايله همه ويخبط عليكي ويقولك هاتي وكفايه اني مستقله ولا حد شايف جبتي مجبتيش عملتي معلمتيش ولا مراته قالت ولا مراتك عملت كده احسن 

نورهان بتمصمصه بعتي دهبك يا اختي بتخزي العين ولا إيه اومال الخواتم المنوره في قد الطاعون دول يابت دول منورين زي لمب النجفه 

علا بعفويه ولا ابدا دول قرشين قولت اهم مركونين للزمن بعد ما خلصنا البيت كنت بتبتب من هنا ومن هنا وربيت طيور على السطح اهو منها بتنضف المطبخ ومنها بناكل منها وتسد طقه ولو زنقت كنت ببيع منهم ولما اتكسر معايا قرش حلو جبت بيهم خاتمين وقولت اللبسهم واتمتع بيهم بدل ركنتهم في الدولاب 

نورهان برفعه حاجب :ايوه يا اختي طول عمرك ناصحه وزي القدح القليل في ايدك كتير وطبطبت على ايديها لا بس حلوين يابت وباين عليهم عمرانين وتقال حاجه تملا العين وتنورها كده 

نورهان بغيظ :ايوه يا اختي اتمتعي اتمتعي هو حد واخد منها حاجه داه حتى اللي يلاقي دلع وميدلعش ربنا يحاسبه 

علا طيب يلا فوتك بعافيه بقى انا رايحه اشق على امي مجتش الجمعه اللي فاتت وكنت قريبه من هنا قولت اعدي اطل عليها 

نورهان ماشي الله يعافيكي

ودخلت علا ومشيت نورهان 

زهره: عامله ايه يا بت

علا الحمد لله بخير

زهره وجوزك عامل ايه 

علا احسن الحمد لله الدنيا هديت اهي من بعد ما سيبنا بيت حماتي 

زهره بحنان امومي صادق ربنا يهدي سركم يا ضنايا ويصلح حالكن مجبتيش العيال معاكي ليه 

علا في المدارس والله وانا كنت قريبه من هنا قولت اعدي اطمن عليكي 

زهره فيكي الخير  

قعدت مع امها شويه وقامت

زهره رايحه فين انتي لحقتي 

علا يادوب اللحق اروح واعمل لقمه للعيال وابوهم انا قولت اطمن عليكي وبركه انك بخير

زهره ماشي يا ضنايا وابقى بوسيلي العيال وهاتيهم الجمعه الجايه بقى 

علا حاضر وقبل ما تمشي اللا بصحيح البت مريم عامل ايه دلوقتي طمنيني عليها 

زهره الحمد لله يا بنتي داه سبحان من نجاها من جوف الموت هي وراجلها وبركه انها طلعت بالسلامه

علا الحمد لله معرفش ايه اللي صابها بس نقول الحمد لله على كل حال

زهره عين والله يا بنتي وامها غلطانه الفرح كان يخض وصارفين جامد والعين فلقت الحجر

علا على ايه بس يا ماما داه الناس ما بتصدق وتتنشق وتقول يارب فرحه 

زهره ماشي مقولناش حاجه بس الناس بقت بتستكتر على غيره رزقته 

علا ماشي يا ماما بس الناس مش كل يوم بتتجوز وبتعمل فرح 

زهره انا عارفه بس الناس يا بنتي مش شايفه كده الناس ليها الظاهر قدامها مش الباطن ولا المستخبي حتى لو كان القرش جاي بطفح دم ليهم اللي قدام عينهم 

علا عندك حق نرجع ونقول الحمد لله على كل حال طب والبت نسمه عامله ايه مفيش اخبار عنها

زهره : الحمد لله طلعت من المستشفى وجات عند امها عشان تاخد بالها منها هي وعيالها راجلها يا حبه عيني كان متبهدل ما بينهم وامها كمان 

علا طيب الحمد لله على خير هتبقى اقول لعادل واروحلها او اعي عليها هي ومريم في بيت جوزها

زهره ماشي يابنتي ربنا يقعدهولك خير 

علا اللهم امين في صحتي وفي عيالي يارب يلا اسيبك بقى الكلام خدنا والوقت سرقنا 

روحت بيتها وبدأت تجهز الأكل 

عادل ايه خلصتي 

علا الفراخ في الفرن اهي يعني على سوا يعني نص ساعه واكون خلصت 

عادل ماشي اكون غيرت وخدت دوش وصليت على ما تخلصي براحتك 

علا ماشي. انا مش هاتأخر معلش انا مش اعجل من النار

عادل ولا يهمك

روحت نورهان وجهزت الغدا وهما قاعدين ياكلو 

نورهان مدرتيش باللي حصل

وائل خير يا نورهان ايه اللي حصل

نورهان مالك يا اخويا الكلام طالع من تحت ضرسك ليه 

وائل بنفخه مفيش ايه اللي حصل منتي مش هاتسكتي الا لما تقولي 

البت تقى اللي في الحاره اللي جمب بيت ابويا جوزها سافر عقبال امالتك 

وائل بلا مبالاه وهت بيكمل اكله الله يعين عباده أكل العيش مر 

نورهان بغيظ أيوه على رائيك 

وسكتت شويه اسكت مش شوفت البت علا اللي جمبنا البت عيشتها ارتاحت دي اشترت بيت لوحدها ولابسه دهب الخاتم قد اللمونه من كبره 

وائل بنفخه ربنا يرزق عباده انا شبعت 

نورهان يا اختي ماله داه كل ما اقله كلمه يقلب وشه بلا حسره 

خلصت وشالت الأكل وبصت لعيالها بقولك ايه ياض منك ليه انزل اللعب في الشارع وخد بالك من اخوك

ماشي يا ماما 

نورهان لبست عبايه سوده بقولك ايه يا وائل انا راحه عند امي شويه

وائل شاورلها بإيده ماشي روحي 

خدت البوك ونزلت ووصلت بيت أهلها وقبل ما تدخل شافت تقى على رأس الحاره  

نورهان بت يا تقى ازيك يابت

تقى ازيك يا نور 

نورهان بخير الحمد لله انتي ايه اللي جايبك هنا يابت

تقى والله جايه اقعد مع ماما شويه 

نورهان بلوع اوعي تكوني جايه مغبونه يابت 

تقى لالالا داه جوزي سافر وقولت اجي اقعد مع ماما شويه لحد ما اتعود

نورهان بخبث سافر سافر فين يابت

تقى سافر السعوديه مشوه من الشغل هنا في مصر وقعد اكتر من سبع شهور في البيت لا شغله ولا مشغله ولا يادولو 

نورهان اومال كنتو بتصرفي على البيت منين يابت

تقى بعفويه والله مخبيش عليكي كنت شايله قرشين للزمن كنت بصرف منهم ولما خصلو خد من اخوه 15 الف سلف ولما الحمل زاد قال مبدهاش بقى وسعى في السفر

نورهان بفضول بس اللي اعرفه ان السفر بيصرف شيئ وشويات جبتيله من داه كله

تقى والله بعت الاسوره بتاعت الفرح بتاعتي

نورهان اممم وانتي شبكتك كانت لسه موجوده 

تقى ايوه مهو مكانش فيه حاجه مستدعيه يبقى كنت هابيعها ليه كانت الدنيا الحمد لله بس منين ما احتاجها قولت هو اللي جابها ومش خساره فيه وبكره ربنا يرزقك. يعوضني احسن منها كمان ان شاء الله 

نورهان بكره سنان مخدتش بالها منها تقي ايوه يا اختي بكره يجيبلك الحلو كله السعوديه وفلوس السعوديه وريالات السعوديه ودولاراتها ودهب السعوديه ايوه يا اختي بيضالك في القفص يابت داه سنه والتانيه وياخدك معاه عيشتك ارتاحت يابنت المحظوظه 

تقى بنفي والله العظيم ابدا الناس فاكره ان اللي جوزها مسافر دي عيشتها مرتاحه تبقى غلطانه دي بتبقى راجل وست البيت في غيابه داه كافيه تكت المفتاح لما يقفله وهو وسطيكم بتبقى مطمنه ان لو عيل من عيالك جراله حاجه في اللي يجري ويشيل معاكي إنما في غيابه انتي مش عارفه تعملي ايه وتسوى ايه عايزه اللي يجري بيكم انتوا الاتنين وياخد بايدكم 

نورهان وهي بتتخصر ايوه ايوه انتي هاتقوليلي منا عارفه وكملت بشهقه هنا بيدوهم الفلوس هناك بالساهل 

تقى ايوه والله الناس فاكره انه هناك بيعبي الفلوس في شكاير داه الغربه تربه

نورهان ايوه منا عارفه 

تقى طيب اسيبك زمان العيال جننو امي 

نورهان وهو انتي مطوله هنا على كده 

تقى بحزن لاء شويه بس على ما اتعود وهارجع شقتي تاني 

نورهان طب متخليكي يابت قاعده مع امك واديكي اهو قاعده واكله شاربه قايمه نايمه ببلاش واللي يبعتهولك حوشيه يا موكوسه 

تقى برفض لا طبعا مينفعش انتي عارفه ان معاش ابويا كله يادوب ع القد هايقضي امي ولا هايقضيني باربع عيال يابت الواحد بردوا لازم يخلي في عينه حصوه ملح ويبقى حسيس 

نورهان وهي بتخبطها على كتفها وكملت وسوسه يا موكوسه امك طلعلها مكافأه نهايه خدمه من ابوكي الله يرحمه قد كده 

تقى لا إله إلا الله يا شيخه هو في بيت مفتوح بيقضي ولا بيسد من فواتير لأكل لشرب لعلاج لمصاريف لدا لداه موال يا بنتي الله يعين كل عبد على شيلته اجي انا كمان وازود الطين بله 

نورهان وهي بتعوج بوقها وسكعت بإيديها على كتفها بحده خليكي انتي كده طول عمرك هبله وعبيطه

تقى يا اختي ربنا يجعل لينا ما يجعل علينا يلا بقى خليني اروح اشوف امي زمانها قالت جااااااي من العيال 

ولا بصوت عالي من المطبخ والنبي يا عادل انده للعيال انا خلصت على ما اغرف تكون الفرخه وشها تحمر

عادل ماشي لو غرفتي ناوليني الاطباق احطها على الترابيزه اللي في الصاله

علا وهي بتشوف صور فرخه طيب خد اللي عندك على الرخامه وعلى ما اخلص الباقي هندهلك تاخده

عادل ماشي وخد الاطباق وطلع حطها بره على الترابيزه

علا بصت على الفرخه وبتقفل باب الفرن وفي لحظه اتقفل الباب على ايديها زي المغناطيس علا بصوات الحقني يا عادل الحقوني يا ناس

غيتوني

عادل دخل جري على ملا وشه من صوت صراخ مراته في ايه مالك ايه اللي حصل بتصوتي ليه

علا بصوات ايدي طلع ايدي والنبي والنبي طلع ايدي يا عادل نار قايده فيها والنبي حد يطلع ايدي

عادل بص على منظر ايديها واتصدم وقرب بسرعه على البوتاجاز وحاول يفتح الباب معرفش

عادل وهو بيشد فيه باقصى قوه وسطه صراخ علا ابوس ايدك هموت ايدي يا عادل مش قادره والله يا ناس ما بقيت قادره حد يطلعها خلصوني

عادل بخوف المفصله قفشه يا علا اصبري بس هحاول افكها اتلفت حواليه واول ما جاجه في ايده ايدي الهون مسكها بسرعه وخبط الازاز نزله كله على الارض وقدر يفتح الباب بصعوبه كانت ايد علا اتحرقت جامد

عادل بصدمه مسك ايدها والمنظر كان كفيل عن أي كلام 

علا بدموع ونحيب ايدي مش قادره نار 

عادل بسرعه حط الإسدال عليها وخد العيال في ايده وسابهم مع جيرانهم

 وركب توك توك اطلع على المستشفى بسرعه الله يكرمك 

في أقل من ربع ساعه كانوا وصلو سحب علا بحرص ودخل بسرعه على الطوارئ 

الدكتور خير في إيه 

عادل شاوله على ايدها 

الدكتور بصلها بصدمه من إيه داه 

علا دموعها ووجعها خلوها مقدرتش تتكلم 

عادل فرن البوتاجاز اتقفل على ايدها 

الدكتور بتفهم طيب تعالوا معايا قسم الجراحه 

دخلو الدكتور بص على الجرح 

الأول لازم نشيل الدهب الأول 

عادل لسه 

الدكتور علشان هانقص الجلد داه حرق من الدرجه التانيه الحمد لله انه موصلش للدرجه التالته كان وصل للاعصاب لا قدر الله 

عادل بصلها بحزن وسكت الدكتور حط ورقه تحت الخواتم وقطعهم لحد ما قدر يفتحهم ويشيلهم خالص وبداء يشيل الجلد وصت صراخ علا وعياطها اللي موقفش لحظه ووجع قلب عادل عليها 

الدكتور بعد ما خلص اتلفت لعادل اللي ايده مفارقتش ايد علا السليمه 

وبعمليه شديده انا سبق وقولت لحضرتك ان الحرق من الدرجه التانيه يعني طبقتين كاملين من الايدي اتضررو فللأسف علاجها هيحتاج فتره طويله جدا اكتر من شهر وعلى حسب استجابه الجسم بردوا بس خلال الفتره دي مش هينفع ايدها تتعرض لميه او تحركها كتير والغيار مرتين في اليوم ومع المضاد الحيوي ان شاء الله هاتبقى زي الفل

عادل بحزن الحمد لله على كل حال المهم هي 

الدكتور ان شاء الله لو التزمتو بالتعليمات مش هايسيب اثر كبير ويقدر يروح بالكريمات فيما بعد

عادل ماش يا دكتور شكرا  

الدكتور مد ايده بجوانتي بلاستيك دي الخواتم بتاع المدام 

عادل هزله راسه بحزن وخدهم حطهم في جيبه من سكات

وطلع ودفع حساب المستشفى وسند علا ورجعوا البيت 

عادل بأس رأسها خلاص بقى يا لولو قدر الله وماشاء فعل المهم انتي عامله ايه دلوقتي

علا بدموع حاسه بنار في ايدي يا عادل نار بتاكل فيها وكملت بنحيب دي ايدي اللي شايله البيت وخدماه 

عادل معلش نقول الحمد لله في ابتلائه رحمه 

علا اللهم لا اعتراض اللهم اكفنا نار جهنم يارب

عادل ايوه عايزك كده دايما ادعي ربنا واوعي تقنطي من رحمته يابت 

علا هزت رأسها بوجع وسكتت

تقى بزعيق يابت اقعدي بقى فرهدتيني بطلي تنطيط زي القرد داه ايه الغلب داه بس يارب 

تقى بزعيق يابت اتهدي هاتقعي

صفاء يابت سبيها بتلعب هي جات يميتك 

تقي يا ماما البت عماله تتنطط زي فرقع لوز ومش قاعده لا على حامي ولا على بارد 

صفاء يابت سبيها مهو تحت منها سجاده متخافيش بقى وسبيها تلعب 

وهما بيتكلموا البنت نطت مع على الكنبه للترابيزه رجليها خلت ووقعت بتقلها كله على دراعها على الترابيزه ونزلت على العمود اللي جمبها وصرخت صرخه شقت قلب تقى نصين 

تقى قامت منطوره بصرخه بنتييييي 

وبصت على منظر بنتها ويدها اللي حرفيا كأنها مفيهاش حته سليمه اترمت على الأرض ومن كتر الخوف فضلت ترجع ومش قادره تاخد نفسها 

صفاء وهي بتزق فيها قومي وفوقي مش وقت دروالك ده مش وقت تتصدمي البت خلينا نشوف البت وبصراخ عالي يلاااااا 

صفاء شدت الاسدال عليها وعلى تقى وطلعت كان كذا حد من جيرانهم اتجمع قدام الباب 

في ايه يا جماعه خير صوتكم جايب اخر الشارع 

صفاء بنحيب البت وقعت ودلعها باينه اتكسر 

واحد من الجيران اركبوا التوك توك انا هاخدكم المستشفي بسرعه البت قاطعه النفس 

تقى قعدت وهي بتتنفض من الخوف والقلق وجمبها امها وناولهم البنت بحرص وخوف شديد خدتها منه صفاء على حجرها وطلع بسرعه على المستشفى ونزلوا كلهم ومعاهم جارهم ودخلو جري وهما شايلين البنت 

الممرضه بلهفه في ايه 

صفاء البت كانت بتلعب ووقعت على ايدها وباين دراعها اتكسر 

الممرضه طب تعالوا معايا بسرعه قسم العظام من هنا 

ودخلو وهما بياكلو الارض من سرعه خطاويهم 

دخل الدكتور وبص على البنت ورجع بص للمرضه خديها على اوضه الاشاعه بسرعه 

نص ساعه عدت على تقى وصفاء كأنها سنين تقى دموعها موقفتش وصفاء لسانها منفكش عن ذكر الله 

طلع الدكتور ومعاه الاشاعه 

تقر بلهفه وخوف وشحتفه من الدموع : طمني الله يطمن قلبك قلبي هايقف

الدكتور حاول يبسط الموضوع 

هي عندها كسر في المفصل وتمزق في الاربطه ولازم تدخل عمليات خلال اربعه وعشرين ساعه لان للأسف النبض اتوقف في كفة الايد

انا هاعملها جبيره مؤقته لحد بكره الصبح علشان اضمن ان المفصل ميتحركش من مكانه ووضع الايد ميسؤش عن كده وسابهم واتحرك يعمل الجبيره 

تقى محستش برجليها واترمت على الارض وبصوت مبحوح بنتي اقول لابوها ايه بنتي يا ماما بنتي ياناس 

صفاء نزلت لمستواها وحدي الله أن شاء الله خير هانتصرف لو جات علل الفلوس سهله

تقى تغور الفلوس فلوس ايه ونيله ايه بنتي ياناس انتي سمعتي الدكتور بيقول ايه اقول لابوها ايه داه سايب العيال امانه معايا اقوله جرالها ايه حد يقولي اقوله ايه حد يقول اعمل ايه 

صفاء بس يابت اهدي كده واجمدي اومال مش وقت ندب دلوقتي نتصرف الأول ونشوف البت وبعدين يحلها الحلال 

فضلو قاعدين لحد ما الدكتور خلص وشالت بنتها ورجعت البيت بدموعها اللي مغرقه وشها رقدت البت في سريرها وقعدت جمبها

صفاء وحدي الله يا بنتي 

تقى لا إله إلا الله 

صفاء بتردد بصي يا بنتي احنا هانتصرف في الفلوس مش معضله هي بس متجبيش سيره لجوزك داه في غربه هاتشيليه الهم وهو بلد وانتوا في بلد ليه لا هايعرف ينزل ولا هايقدر يعمل حاجه غير انه هايشيل الهم همين وهو يادوب لسه متوكل على الله وقاصد باب كريم 

تقى وهي بتخبط على رجليها بإيديها مش هاقوله يا ام هاقوله ايه ها هاقوله البت كانت قدام عيني وجرالها اللي جرالها 

صفاء خلاص مش وقت ندب داه ساعه القضا يعمى البصر والعيال يااما بيحصلها نقول الحمد لله انها جات على قد كده 

تقى وهي بتهز جسمها يمين وشمال الحمد لله والله ما معترضه ياريتها كانت جات فيها ومجات فيها 

صفاء بحده يابنتي حرام عليكي قولي الحمد لله على كل حال وقدر الله وما شاء فعل

تقى هزت رأسها وسكتت

صفاء انا هاتصرف دلوقتي في الفلوس 

تقى سابتها سحبت الشنطه وقامت

صفاء رايحه فين الساعدي 

تقر رايحه اجيب الفلوس يا ام رايحه اتصرف

صفاء منين داه جوزك لسه مبعتش قرش داه يادوب مسافر من اسبوع 

انا قولتلك هاتصرف متعتليش هم

تقى بزعيق مش هاستلف مش هاحط على راسي الهم همين اخدهم دلوقتي واسدهم بكره منين 

صفاء بقله حيله طيب عرفيني راسك فيها ايه

تقى هابيع الحلق والخاتم اللي معايا عند حل غيره دلوقتي 

صفاء بصتلها وهزت رأسها 

تقى يبقى سبيني اتصرف وستبتها وطلعت باعت الخاتم والحلق ورجعت طول الليل بتتقلى على جمر من نار واول ما طلع النهار وفرد خيوطه شالت البت وطلعت هي وأمها ومعاها التلات عيال التانين في ايديهم  

اخدو البنت على العمليات وتقى قاعده شارده من الوجع والخوف 

الممرضه لو سمحتي حد ينزل الحسابات 

تقى انا جايه معاكي 

ونزلت الحساب من فضلك وناولته الورق اللي معاها

الموظف: خمسه وعشرين الف 

تقى بحزن طلعت الفلوس ودفعتهم وخدت الإيصال  

واخيرا خلصت العمليه وانتظروا لحد ما البنت فاقت ورجعو البيت بيها 

نورهان بقولك ايه يا وائل انتا لابس كده ورايح فين 

وائل عندي شغل 

نورهان طب خدني في سكتك وديني عند امي 

وائل ماشي بسرعه بس علشان متاخرش 

نورهان دقيقه هاحط الإسدال عليا وجايه اهو 

ونزلو مع بعض ووصلو عند بيت أهلها 

نجاح في نفس قاعدتها قدام الباب ايه يا وائل مش تعدي تشق على حماتك الكلب اللي عضك يا اخويا قتلناه

وائل ابتسم والله ابظا يا ست الكل معلش مشاغل. الله العظيم يادول باجي اريح ساعتين وارجع تلني انزل الشغل 

نجاح ربنا يخبزلك العيش طب خش اشرب معانا الشاي ولا عايزني ازعل 

وائل من عنيا بس الله عليكي متعوقو عشان عندي شغل وفي ناس مستنياني

نجاح ماشي خش خش 

ودخلو وحطت صنيه الشاي وقعدوا 

 وائل وهو بيشرب الشاي بسرعه علشان يخلص 

نجاح مدرتيش باللي حصل يابت

نورهان ايه اللي حصل 

نجاح عزجت بوقها على جمب مش البت تقى بنتها اتكسر

نورهان خبطت على صدرها لا حول الله يارب من ايه دي كانت مقبلاني إمبارح زي الفل 

نجاح النسوان جوه الحاره بيقولو وقعت وهي بتلعب 

نورهان شوحت بإيديها بتعلب لا دي هي اللي مهمله تلاقيها سايبه العيال ورمياهم في الشارع 

نجاح يلا الحمد لله قدر ولطف 

اسكتي اسكتي مش البت علا امها يا كبدي طلعت تجري على المستشفى عشيه

نورهان مالها كانت في المستشفى ليه

نجاح كبدي ايدها اتحرقت وطبطبت على صدرها بإيديها يالهوي يالهوي يالهوي يابت ايدها بقت عامله كيف داه امها وهي بتقول بقى جسمي يقشعر وجتتي بقت تتنفض كده نفض 

نورهان بتمصمه ربنا معاهم مش عارفه يا اختي في ايه فره ودايره دي ولا ايه هابقى اتصل اطمن عليها واقبل ما امشي فكريني ادخل اشوف البت داه بينا يا دوب فركه كعب والنبي وصى على سابع جار 

نجاح طول عمرك سباقه بالواجب 

وائل سمع كلامهم وشرق وبرق

يا ترى علا وتقى مصيرهم ايه 

واللي جاي مخبي ايه

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة