قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

نورهان وهي راجعه من عند أمها وقبل ما توصل بيتها سنعت صوت جارتهم واتلفتت

بت يا نور انتي يابت

نورهان اتلفتت بإستغراب اختفى اول ما ركزت في صاحبه الصوت

نورهان خالتي ام صابرين ازيك يا خاله عامله ايه 

ام صابرين نحمدو علي كل حال

نورهان فينك يا خاله وفين اراضيكي 

ام صابرين في الدنيا يا اختي مرزوعه في بيتي طيب يا واطيه عدي واغلطي مره من نفسك وقولي اطل على خالتي ام صابرين داه اللي بينا يابت عيش وملح وانتي حبيبه صابرين الروح بالروح

نورهان بتعوجه بوق بصعبانيه منتي عارفه اللي فيها يا خالتي دانا متجوزه في بيت عيله وطالع عيني وعين أهلي من مشرقها لمغربها 

ام صابرين بنفي لا والله يابت داه حتى حماتك غلبانه وبلسم يتحط على الجرح يطيب 

نورهان برفض قاطع اسكتي اسكتي والنبي يا خاله داه اللي باين قدام الناس اسألي اللي عايش معاهم ومعاشرهم والوش في الوش دي وليه برويه ومفتريه وقويه دي كل يوم والتاني تقوم ابنها وتقويه عليها

ام صابرين بدفاع يابت يابت داه راجلك غلبان وعقبته سليمه 

نورهان بشحتقه والنبي ابدا يا خاله دانا طالع عيني معاهم ولا حمد ولا شكرانيه وفي الاخر باخد الكلمه قد الطاعون تعكر بحر 

ام صابرين بإستغراب والنبي ايه دانا كنت مفكراهم طيبيين وفي حالهم شوفي ازاي

نورهان ايوه والله يا خاله اللي يشوف الباب وتزويقه ما يعرف من جوه نشفان ريقه 

ام نجاح هانقول ايه يا بنتي ربنا يصلحلك الحال قادر يا كريم ويهدي سرك ويهديلك راجلك

نورهان امين يا خاله امين لحسن خلاص تعبت وجبت اخري اللا انتي كنتي رايحه فين كده اريحه السوق هاتستقضي حاجه ولا ايه 

ام صابرين بطيبه لاء مش راحه السوق دانا كنت راحه اطل على بيت صابرين بنتي منتي عارفه هي وجوزها في الغربيه وانا من وقت للتاني كده كل كام يوم بخطف رجلي واروح اشق على البيت واهويه واشغل القرآن شويه واعاود بيتي تاني 

نورهان ايوه احسن يا خاله وكمان عشان الناس تعرف ان الرجل رايحه جايه على البيت لحد ينط عليه ولا يسرق منه حاجه كده ولا كده 

ام صابرين منا بعمل كده فعلا طب بقولك ايه يا بت ماتيجي معايا اهو تونسيني وتاخدي بحسي لحد اما اخلص

مشيو لحد ما وصلو البيت ام صابرين يلا يابت خشي معايا 

نورهان لاء يا خاله لحسن اعوق ووائل هايطين عيشتي

ام صابرين يابت خشي خشي داه بينك وبين بيت جوزك فركه كعب كام خطوه وتبقى هناك خرمي من الشارع اللي ورا تلاقي روحك قدام البيت طوالي وهي كلها نص ساعه 

نورهان طيب يلا 

دخلو ونورهان بتتلفت حواليها بإنبهار من كبر مساحه البيت وأم صابرين سابتها وبدئت تفتح الستاير والشبابيك اقعدي يا نور يا حبيبتي على ما افتح الشبابيك واشغل القرآن وهارجعلك طوالي مش هاعوق عليكي 

نورهان وهي لسه بتتلفت حواليها لاء براحتك يا خاله  

ام صابرين فتحت الشبابيك وجات تشغل السماعات لقت السلك مقطوع خبطت كف بكف :لا حول الله يارب

نورهانمالك يا خاله في ايه

ان صابرين داه السماعات سلكها مقطوع بصي شكل في فار ولا مش عارفه ايه اللي حصل انا بكره وانا جايه هاجيب مصيده واجيب حد يصلح السلك لحسن لو فيه فار ياكل الحاجه ولا يقرض الخشب وداه تعب غربه وقرب شقى 

نورهان معلش خلاص مش لازم انهارده يعني 

ام صابرين على قولتك 

قعدت نورهان وهي عماله تتلفت على كل شبر وفي نفسها: حسره علينا هي دي البيوت ولا بلاش مش حجر الفيران اللي المعدول مقعدني فيه ويقولي دنا عاملك شقه داه شق تعبان ومصمصت شفايفها هي دي الناس اللي عايشه كتنا وكسه علينا وعلى حظنا الهباب 

ام صابرين طيب هاقوم افتح الاوض ريحي انتي يا ضنايا

نورهان لا انا جايه معاكي ودخلت معاها من اوضه لاوضه وعينها عماله تلف وتتحسر كل ما تشوف حاجه لحد ما الحسره ملت قلبها 

نورهان طب معلش بالاذن انا بقى يا خاله انا مرضتش اكسر بخاطرك وجيت معاكي عشان يادوب اللحق اروح اجهز لقمه لجوزي والعيال وحماتي اللي هاتسود يومي لو عوقت في الأكل 

ام صابرين بطيبه : ماشي يا حبيتي ربنا يجبر بخاطرك دايما ويجعل عيشتك هنيه ورضيه قادر كريم

نورهان من تحت ضرسها وهي كازه على اسنانها: امين امين يا خاله والسلام امانه لصابرين

ام صابرين: يوصل يا حبيبتي 

وطلعت وهي نارها قايده مصدقت وصلت البيت ومسكت التليفون اول ما دخلت الشقه ورنت على امها 

نجاح الو ايوه يا بت انتي وصلتي ولا لسه عوقتي كده ليه على ما رنيتي مش قولتي فل ما تمشي اول ما اوصل هاتصل بيكي عوقتي كده ليه بقى 

نورهان بزعيق وقهره: كنت بتحسر كنت بتقهر كنت بتفرس 

نجاح بشخطه في ايه ية بت يخربيتك وبيت جعورتك ايه اللي جرا هي هبت منك ولا إيه عماله ةهبي وتهبهبي في وشي زي الباجور اللي فونيته خربانه 

نورهان بحرقه اسكتي والنبي ية اما سبيني باللي انا فيه

نجاح يا اختي مالك يادي البت فيكي ايه منتي كنتي ماشيه من عندي زي الفل ايه اللي جرا مسافه الطريق 

نورهان اسكتي يا أما عارفه انا شوفت مين 

نجاح مين يا معدوله 

نورهان بتقصعه ام صابريييين

نجاح ام صابرين مين يابت 

نورهان بتريقه ام صابرين يا اختي وكملت بشهقه صابرين اللي في الإمارات مع جوزها 

نحاج ايو ايوه ايوه عارفها مالك بيها دي 

نورهان بردح وحرقه كانت وخداني معاها بتهوي بيت بنتها صابرين بقى صابرين السوده الجربا المقيحه ساكنه في البيت داه كله داه بيت ولا الفيلا يجري فيه الخيل ميجبش اخره داه فيه صاله مرماح وخبطت على رجليها بإيديها بندب ولا البيت من يالهوووي يالهوووي عينك ما تشوف الا النور عفش ايه وفرش ايه ونجف ايه داه حتى الستاير عملاها بلتكانات من الغاليه دي مش سايبه حاجه الا وجيباها طب داه اوضه النوم لوحدها قد شقتي دي ويمكن أكبر ييجي الموكوس خايب الرجا اللي عندي يشوف البيوت والشقق بدل ما عمال يفرد قلوعه عليا وطالع السما ويقولي الشقه وكاني وماني دانا طلعت عايشه في شق تعبان داه البت جايبه المرجيحة ان سلسله والمطبخ يالهوي يا أما يا اني جايبه كل حاجه حتى غساله الاطباق وانا اللي ايديا قشفت واتهرت من كتر الغسيل ودعيك الحلل وياريته عاجب 

نجاح :امممممم مهو بيقول يا بت جوزها في الإمارات 

نورهان بروح ايوووه يا اختي في دبي عقبال امالتك اوما ايه ال ايه مقدرش على بعد الجربه وخدها هي وعيالها هناك يا اختي دول هناك عمالين يعبو في الفلوس شكاير شكاير لما بقت زكايب ومبقوش عارفين يحطوها فين وكملت بحرقه يا اختي انا منيش عارفه بيلحقو يصرفو داه كله أمته وفين وكيف وازاي على ايه 

نجاح بتعوجه وهي بتندب:معلش يا حبيبتي باااختك وطووول عمره مايل هانقول ايه يا حسره 

نورهان بضيق ولا هانقول ولا نانعيد كفايه اللي الواحد فيه مكفيه لحد ما طفح على اوطيته خليني اقوم اعمله الطفح عشان لما ييجي اسد حلقه بدل ما يتفتح عليا زي الباكبورت 

نجاح ماشي يا بنتي ربنا يعينك على اللي انتي فيه 

نورهان :على قولتك وعلى ما ابتلاني 

وقفلت ودخلت المطبخ وبصت فيه وعوجت بوقها يمين وشمال هو داه المطبخ اللي طالعلي بيه السما اومال اللي هناك داه ايه حسره عليا وعلى حظي الهباب تلاجه خربانه مش عارفه اجيب واحده حتى بالقسط والسوده المقشفه اللي كانو بيشيلو الجلح من على جتتها بالكيلو عندها تلاجه من ام بابين 

فضلت تندب حظها لحد ما خلصت الأكل 

دخلت غيرت وسمعت الباب بيخبط 

فتحت 

نورهان خطوه عزيزه يا حماتي خير في حاجه ولا ايه

سعاد : يعز مقدارك قادر كريم يا حبيبتي كنت عايزه منك حاجه كده بس محروجه منك 

نورهان بشهقه خبطت على صدرها :يا ندامتي ليه كده يا حماتي قولي يا حبيتي وعنيا ليكي. 

وهمست لروحها: ايوه شايله روحها وطالعه ومتعشمه اصل المشرحه ناقصه قتلا هي 

سعاد تسلمي من كل شر يا حبيبتي كسبانه وربحانه كنت هاخش استحمى ورشا مجاتش انهارده وعايزاكي بس تدعكيلي ضهري مبطولوش 

نورهان لاء بسيطه ماشي

نزلو شقه حماتها

نورهان خشي ولما تيجي لضهرك نادمي عليا

سعاد ماشي يا بنتي 

ربع ساعه وسعاد نادمت عليها

نورهان شمرت درعاتها وبدئت تدعك ضهر حماتها 

وهي واقفه في سرها يخص اما انتي وليه قرشانه بصحيح الوليه معديه الخمسين وضهرك عامل كده ازي وشهقت بصوت واطي حسره علينا يالهووي الوليه ضهرها عامل زي البفته يشف ويرف شوفي الوليه ضهرها عامل زي شق اللفت 

فضلت نورهان تهري وتنكت مع روحها لحد ما خلصت وشطفت ايديها 

طلعت حماتها من وراها: تسلمي يا بنتي يقعدلك خير في صحتك وعافيتك يباركلك في صحتك وميحوجك ابدا قادر يا كريم ويجعل القليل في ايدك كتير ويباركلك في عيالك ويرزقك برهم ويهدي سرك بينك وبين جوزك بحق المغارب والوقت كارب قادر يا كريم 

نورهان بإبتسامه صفرا وطلع الكلام من تحت أسنانه تسلمي وتعيشي يا حماتي يادوب اطلع اروق الشقه اوام اوام قبل ما وائل ييجي 

سعاد ماشي يا حبيتي روحي ربنا معاكي

نورهان وهي طالعه بتعوج بوقها ال الوليه لاحسه الحجر الأسود ال بتدعيلي ال بلا وكسه

طلعت وهي مغلوله فضلت تنفض وتروق بغل 

نورهان وهي بتروق اوضه النوم يا حسره عليا وعلى حظي هي اوضه النوم اللي طالعلي بيها السما وجبتلك عفشك من دمياط الاوضه زي الحوء واخده السرير الدولاب بالعافيه والكومودينو مزنوق جمب الحيط ييجي يشوف الاملا اللي صابرين فيها هي فيها ايه احسن مني علشان تعيش عيشه زي دي وانا اشوف المر الوان

فضلت تغل في روحها لحد ما خلصت

صابرين وهي بتكلم امها 

ام صابرين البت نورهان بعتالك السلام امانه 

صابرين يا ابويااا نورهان فينها البت دي يا ماما وفين ارضيها

ام صابرين متجوزه وشكلها يا حبه عيني تعبانه ربنا يهديلها الحال 

صابرين على قولتك البيوت يا أما فيها المهم أخبار البت تقى بنتها عامله ايه مش بقت احسن

ام صابرين ايوه يا بنتي وهاتفك الجبس كمان كام يوم والله يا بنتي ما عارفه ايه اللي صابها ربنا سترها الحمد لله انها جات على قد كده 

صابرين نقول الحمد لله يا ماما

ام صابرين ايوه يا بنتي نحمده على كل حال بس اللي صعبان على يا ولداه البت علا ايدها اللي لسه عايزالها وقت ياما على ما تقدر تحركها البت ايدها اتشوت ربنا يجيرنا من النار وعذابها 

صابرين يا الله مش عارفه في ايه والله يا ماما بس هانرجع ونقول الحمد لله نصيب ومكتوب المهم انتي روحتي واطمنتي بروحك عيب يا ماما بالله عليكي دول عشره عمر

ام صابرين :ايوه المكتوب على الجبين لازم تشوفو العين لاء لاء يابت ازاي والله روحت واطمنت وخدت معايا شويه طلبات اه اومال ايه يابت عيب ادخل بردوا وايدي فاضيه 

صابرين طول عمرك تفهمي في الأصول يا ست الكل 

ام صابرين طبعا يا بنتي داه واجب

المهم بقولك ايه انا هاخد كهربائي بكره البيت اصلا لقيت السلك بتاع السماعات مقطوع وهاخد مصيده فيران لحسن يكون فيه فار ولا حاجه تبقى مصيبه وانتي يا ولداه ملحقتيش تتهني بالعفش 

صابرين ماشي بس خدي حد معاكي متروحيش معاه بطولك 

ام صابرين ايوه طبعا يالهوي اروح مع راجل لوحدي يا دي العيبه 

صابرين طيب اسيبك بقى عشان يادوب اللحق اروح الشغل 

ام صابرين ماشي يا حبيبتي روحي ربنا يخبزلك العيش 

خلصت ولبست وطلعت 

صابرين بقولك ايه والنبي يا علاء اما رايحه المستشفى وعندي انهارده نبطشيه روح جيب العيال من السنتر الله يسترك وانا مجهزه الأكل جوه يادوب على التسخين سخن ووكلهم ماشي

علاء وهو بيفرك دماغه ماشي يا صابرين اتوكلي على الله وإنا هاروح اجيبهم متشليش هم

صابرين مالك يا علاء فيك ايه يا اخويا

علاء بنفي لاء مفيش حاجه هو شويه صداع ودوخه كده وهايروحو لحالهم

صابرين شكل الضغط عالي عندك انتا كلت حادق من ورايا ولا إيه 

علاء لا والله انتي عارفه لو كلت هاقولك انا بش شكلي كده تعبت علشان شربت قهوه على الريق 

صابرين بقلق طيب معدتش تعملها تاني ولو تعبت في مسكن في الصيدليه اللي في الحمام خدلك قرصين وهاتبقى زي الفل ولو ازمت اوي ابقى كلمني وانا هاتصرف ماشي

علاء ماشي روحي انتي اتوكلي على الله 

صابرين ماشي لا إله إلا الله 

علاء محمد رسول الله 

طلعت ووقفت دقايق واتصل بالسنتر الو مستر ابراهيم 

ابراهيم: ايوه انا 

صابرين انا وليه امر فادي وفدوه وفارس كنت بس ببلغ حضرتك لو في استاذ أيمن أولاده معاهم هنا في نفس منطقة السكن لو سمحت خليه ياخدهم معاه لاني في الشغل وعندي نبطشيه في المستشفى ووالدهم تعبان واخاف يسوق وهو مريض يحصل حاجه لا قدر الله

ابراهيم لاء خلاص مفيش مشكله انا هابلغه وان شاء الله يصير خير 

صابرين شكرا لحضرتك

ووصلت شغلها وغيرت هدومها وبدئت تشوف شغلها وفي عز شغلها حست بقبضه قلب

حطت ايديها على صدرها وحاولت تاخد نفسها

نهي بلهفه سندتها:مالك يا صابرين وشك اصفر كره واحده كده ليه 

صابرين بخنقه مش عارفه والله يا نهي حسيت زي ما يكون مره واحده كده قلبي اتقبض وكأن في حاجه طابقه على صدري 

نهي بقلق: لعله خير يابت قولي يارب

صابرين سارب اجعل الغيب خير لعله خير ان شاء الله 

وفي عز كلامهم سمعو صوت الإسعاف وانزار الطوارئ 

اكتر من دكتور طلعو يجروا ومعاهم اكتر من ممرضه بما فيهم صابرين

الدكتور بإستفسار : شو صار

المسعف: حادث تصادم بين سيارتين واحده انقلبت والتانيه دخلت بعمود نور ولسه لهلا ما بنعرف شو الوضع 

الدكتور جهزو الاشاعه بسرعه 

صابرين وهي بتنزل المصابين مع المسعفين شافت جوزها خبطت على صدرها بوجع ورقعت بالصوت : يالهووووي علاء مالك ايه اللي صابك ردي عليا يا علاء ايه اللي جرالك  

الدكتور :انتي بتعرفيه لها الريال

صابرين داه جوزي في ايه حالته ايه حد يطمني يا ناس

الدكتور هدي حالك وروقي شوي يا ميس صابرين هلا هو بحاجتك مو بحاجه لكل ها الوجيج خلينا بالأول نطمن عليه وبعدها بيصير خير 

صابرين وهي بتلف حوالين روحها فيه ايه ايه اللي جراله حادثه ايه حد يطمني ويطمن قلبي ولطمت على. شها العيال العيال فين حد يقولي حد يطمن قلبي ويبرد ناري

نهي اهدي يا صابرين وان شاء الله كل حاجه تبقى بخير 

صابرين بحرقه :يارب يارب متسوقني فيهم يارب 

الدكتور هلا مو قت ها الحكي نشوف شو بيه لنعرف اللازم ونسويه

اخدوه منها على غرفه الكشف وطلع بسرعه على غرفه الاشاعه 

وصابرين شارده

نهي طيب ما يمكن العيال في البيت

صابرين لاء العيال عندهم درس وكان لسه شويه على خروجهم 

صابرين مسكت التليفون بسرعه ورنت على ام إياد جارتهم

صابرين بلهفه ام إياد بالله عليكي العيال عندك جوزك جابهم طمنيني

ام إياد ايوه العيال لسه واصلين حتى ايمن رن الجرس محدش عندكم رد

صابرين علاء في المستشفى عمل حادثه ابوس ايدك خليهم عندك اكمن عليه وهاجي اخدهم 

ام اياد: لا حول ولا قوه الا بالله العلي العظيم حاضر متشليش هم هما قاعدين وهاديين وزي الفل اطمني انتي ومتشليش همهم خالص عيالك في عنيا 

صابرين ربنا يخليكي معلش احنا في غربه لا ام ولا اي ولا اخ ولا اخت

ام إياد عيب تقولي كده الناس لبعضيها ربنا يقدرك وان شاء الله جوزك يطلع سليم معافى بإذن الله 

صابرين بدموع يارب ادعيله بالله عليك

قفلت وفضلت واقفه قدام اوضه الاشاعه اول ما خرج الدكتور صابرين بلهفه طمني الله يطمن قلبك

الدكتور عنده كسر بالقدم اليسرى وكمان خلع بلوح الكتف وكسر بالساعد الأيمن وخد نفس وكمل وللأسف كسر بالضلوع وفي منهم اخترق الرئه

صابرين يعني ايه 

الدكتور هلا راح يدخل عمليات لحتى نوقف النزيف وبعدها ان شاء الله راح يصير منيح بس راح يحتاج وقت طويل ليطيب ويقدر يوقف على رجليه

صابرين قعدت على الكرسي اللهم لا اعتراض يارب اللهم أجرني في مصيبتي خير وأخلف لي خير منها 

نهي اهدي يا صابرين الأول نطمن عليه 

صابرين ايوه هو الأهم وبصت للدكتور بدموع اعمل المطلوب ابوس ايدك هو الأهم 

الدكتور ما تشيلي هم راح نعمل كل اللي بإيدنا وان شاء الله راح يكون منيح

صابرين يارب يارب 

طلع علاء على الترولي ودخل العمليات ومر الوقت على صابرين زي الجمر القايد في جسمها ودموعها نزلت من عجزها وقله حيلتها 

نهي وحيد الله ليه الدموع دي بتفولي على الراجل ولا إيه 

صابرين بحزن ببكي من قله حيلتي الغربه تربه يا نهي لا اب ولا ام ولا حد معايا اتسند عليه انا في مكان وعيالي في مكان والله اعلم بكره كمان فيه ايه

نهي بحزن قولي يارب وأم شاء الله يكتبلك الخير

صابرين بحرقه يارب مليش غيرك 

طلع من العمليات على اوضه عاديه لحين الافاقه 

صابرين طمني يا دكتور الله يطمنك

الدكتور لا تشغلي بالك هلا طلع وشوي وراح يفيق احنا سوينا جبيره ووقفنا النزيف وبمشيئة الله يريح يطيب وما يصير عليه شر

صابرين يارب يسمع من بوقك ربنا 

مرت ايام وصابرين ملازمه علاء في المستشفى وكل يوم بتروح تطمن على أولادها وترجع تأتي لجوزها وبعد اسبوع جاله زياره من زميله

معاذ كيفك يا ام فادي

صابرين بخير الحمد لله

معاذ اومال فبن استاذ علاء بقاله اسبوع غايب عن الشغل ومبيجيش ولما روحت البيت محدش رد وجيتلك هنا

صابرين علاء عمل حادثه من اسبوع وراقد في المستشفى 

معاذ لا حول ولا قوه الا بالله العلي العظيم طيب هو اخباره ايه كويس ولا حالته ايه

صابرين الحمد لله على كل حال احنا كنا فين وبقينا فين 

معاذ بتردد لاء لا بأس طهور عليه

صابرين شكل حضرتك جاي وعايز تقول حاجه خير قول انا سمعاك

معاذ : كان نفسي اقولك خير بس للاسف امتي عارف ان الشركه اللي شغالين فيها قطاع خاص وعلاء غايب بقاله اسبوع من غير ما يقدم سبب فللأسف بسبب غيابه الغير مبرر اتفصل من الشغل 

صابرين قعدت بحزن ولسانها لا بنفك عن الابتهال الحمد لله ولا اله الا الله والحمد لله على كل حال 

معاذ بتهوين ان شاء الله لما يقوم بالسلامه الف شركه تتمناه وتجري وراه كمان والله داه الشركه هي اللي خسرته مش هو اللي خسرها والله داه كان من اكفأ الموظفين و ممشي الشغل زي الالف 

صابرين كله خيره كله خير يقوم هو بس بالسلامه والباقي فدا ضفره 

مرت الايام وصابرين لسه مقيمه مع جوزها

في بيت اهل جوز نورهان قاعده حماتها ورشا جمبها 

ام وائل :اااه ضهر اااه يا اني اااه 

رشا بقلق مالك يا ام فيكي ايه من صباحيه ربنا قاعده تفركي وتتوجعي وتجضي من الألم

ام وائل : والله منا عارفه يا بنتي ضهري ضهري كأنه قايد نار وفي حاجه عماله تنأح في ضهري ضهري واجعني ومش طايقه حتى الهدمه عليا

رشا بخضه بسم الله بسم الله مالك بس فيكي ايه بس طيب لفي كده خليني اشوف في ايه

لفت ورفعت الجلابيه 

رشا شهقت وخبطت على صدرها: يالهوووي ايه اللي في ضهرك داه يا ام 

ام وائل في ايه ايه اللي واجعني

رشا ضهرك مليان دمامل ومبدوره فيه زي الدره 

ام وائل طيب ينوب ثواب ادهينهولي مرهم اسود موجود عندك جوه في الضرفه  

رشا مرهم اسود ايه بس داه عايز دكتور 

ام وائل لاء المرهم الأسود طول عمري برتاح عليه 

رشا بقله حيله حاضر اللي يريحك 

ودخلت جابته ودهنت ضهرها 

متنزليش الهدوم لحد ما ضهرك يمصه 

ام وائل يالهوي واقعد مشلحه لاء حطي كيس بلاستك عليه وهو هايمصه عيب يابت

رشا هاقولك إيه حاضر منا عارفه دماغك 

وخلصت ونزلت هدوم امها بالراحه 

وائل دخل ولقى امه تعبانه ايه يا جماعه في ايه

رشا امك ضهرها واجعها

ام وائل بسرعه يابت متكبريش الموضوع دي حبايه وحطيت عليها مرهم اسود وبكره هاتبقى زي الفل

وائل بص لرشا وسكت ماشي يا ام لو تعبتي متخبيش زي عوايدك انا ماليش غيرك

ام وائل تسلم وتعيش يا ضنايا حاضر 

طول الليل ووائل قلقان على امه نزل وهي حاولت تتعامل عادي ورشا جات 

رشا يا ام ضهرك زاد حرام عليكي روحك

ام وائل يابت وانا بيا ايه مكانوش كام حبايه اللي واكله دماغي بيهم

رشا كام حبايه ايه بس دانتي ضهرك مليان من أوله لاخره

ام وائل جات تتعدل صرخت بوجع: آآآآآه 

وائل سمع الصوت دخل بلهفه ايه في ايه

ام وائل مفيش يا حبيبي دانا اتزملت في ضهري

رشا لاء مبدهاش بقى امك ضهرها مليان دمامل وعماله تقاوح مع روحها

ام وائل يابت هاحطله مرهم اسود واحط عليه قشر بصل هايخف ويبقى عال العال 

وائل مرهم اسود ايه وزفت ايه لبسها يا رشا وهانروح للدكتور دلوقتي 

رشا عين العقل 

ام وائل اكتمي يابت هي كتر مصاريف اخوكي وراه بيت وعيال اتلمي ولمي روحك 

وائل بيت ايه وزفت ايه انتي الأول والدنيا تيجي بعديك لبسيها وانا هاطلع اوقف توتوك 

لبستها رشا بحرص وخدهم لدكتور جراحه

وائل ها يا دكتور طمني 

الدكتور للأسف دي خراريج ولازم تتفتح لأنها كتير وممكن تعمل تسمم في الجسم 

وائل شوف المطلوب واعمله بس من ايه داه كانت زي الفل

الدكتور والله ممكن يكون سموم متراكمه في الجسم وممكن يكون عندها مقاومه انسولين على العموم مش هانسبق الأحداث هانعمل اتشيك كامل وبعدها نقدر نجزم

وائل ماشي دلوقتي اعمل اللازم 

الدكتور ماشي خدروها وفتحهم زلف ضهرها بفتيل وشاش طبي معقم 

شالها وائل ورجع البيت وهي لسه غايبه عن الدنيا من تأثير البنج 

وائل فضل قاعد جمبها هو ورشا بدئت تفوق بوجع 

ام وائل آآآآآه نااار ضهري نار 

وائل مسك ايدها معلش يومين وهاتبقى زي الفل ان شاء الله

رشا انا هاقوم اعملك لقمه تتقوتي بيها

مرت الايام وحال ام وائل من سوء لاسواء ومحدش عارف السبب

وائل بزعيق في ايه معقول بين يوم وليله بقت كده مهو اكيد في حاجه

رشا بحزن وهي باصه على امها والله علمي علمك ما احنا على يدك مسيبناش دكتور الا وروحناله ولا سيبنا تحليل وإشاعة الا وعملناه 

وائل مهو داه اللي هايجنني ايه لوحدها كده في ايه حد يفهمني انا قربت اتجنن 

بعد اكتر من شهرين رجع علاء البيت وقاعد في اوضته حزين وحاطط ايده على خده 

دخلت صابرين وفتحت النور وقعدت قصاده وبعدهالك يا علاء هاتفضل قاعد وحاطط ايدك على خدك كده ليه 

علاء بهم يعني هاعمل ايه عاجبك حالتي وانا قاعد كده زي الولايا في البيت لا شغله ولا مشغله 

صابرين كفا الله الشر عليك من القعده في ايه بس يا ابو فادي روق يا راجل

علاء لحد أمته ها دانتي حتتين الدهب اللي كنتي شيلاهم للزمن بعتيهم واستلفتي الطاق عشره من طوب الارض عشان تسدي فلوس المستشفى 

صابرين بحب يا ابو فادي شد حيلك انتا زاصلب طولك والباقي يتعوض يا راجل داحنا اللي بنعمل القرش مش القرش اللي بيعملنا وحد الله كده وروق

علاء ونعم بالله مقولناش حاجه بس احنا في الغربه وبطننا مفتوحه يعني مش وسط اهلنا وناسنا واللي سلفنا عايز فلوسه ان مكانش انهارده هايبقى بكره 

صابرين طيب مش معاذ قدملك في شركه تانيه 

علاء ايوه انا اديته الورق وجابلي شهاده خبره من الشركه اللي كنت فيها معاه كل الورق

صابرين طيب رن عليه وشوف هايقولك ايه 

علاء وانتي بها وطلع التليفون ورن على معاذ مره واتنين لحد ما رد 

علاء بلهفه ها يا معاذ طمني 

معاذ ان شاء الله خير لسه والله مردوش عليا اول ما يردوا هابلغك على طول 

علاء بإحباط ماشي 

صابرين بصتله وسكتت 

مرت الأيام وشهرين علاء استنزف ماديا ويادوب صابرين قارده تسد مصاريف البيت وجزء من ديونهم 

علاء بحزن :بقولك ايه يا صابرين 

صابرين قول يا علاء في ايه

علاء انا بفكر ننزل مصر الشركه اللي كنت شغال فيها هناك لسه عايزيني بدل قعدتي هنا وادينا الحمد لله سدينا اللي علينا وانتي كمان شغلك في مصر موجود 

صابرين ماشي عين العقل كفايه غربه لحد كده واهو هناك نتونس بأهلنا وناسنا

وبدئوا إجراءات الرجوع لمصر

وائل عدا على امه زي كل يوم يطمن عليها وهي لسه حالتها على وضعها وجسمها خس وتعبت وبقت لا تسر عدو ولا حبيبت طلع الشقه وهو كله هموم

نورهان في المطبخ فاتحه الاسبيكر وبتكلم امها وهي بتطبخ

نجاح مدرتيش يابت باللي حصل مش البت صابرين هي وجوزها رجعو مصر وسابو الإمارات 

نورهان بشهقه ليه الموكوسه حك يسيب الامله دي كلها وييجي للهم اللي هنا 

نجاح لا يابت داه بيقولو جوزها تعب هناك ورقد في المستشفى وجه مصر مديون لطوب الارض

 نورهان بتمصمصه يا اختي بلا وكسه يطلعو من اللي مكنزينه وصرينه على قلبهم مهم عاملينهم على قلبهم قد كده داه تلاقيهم بيقولو كده عشان يخزو العين عنهم ومحدش يطمع فيهم داه تلاقيهم نايمين على خميره كبيره جات على كام جنيه 

نجاح ايوه على قولتك يصرفو من اللي صروه داه كله 

نجاح ايوه اللا بالحق عامله ايه حماتك يابت 

نورهان بشهقه هاتعمل ايه هي على حطه ايدك كبدي على وائل رايح من عند دكتور طالع من عند الدكتور

رايح مركز الاشاعه طالع على معمل التحاليل يطلع من الدكتور داه للمستشفى دي ومن الدكتور داه للدكتور داه وكل دكتور يكتب شأله علاج شكل ولون لما بقينا وبنصطبح بالمستشفى وبنتمسى بالعلاج لما ما بقيتش عارف اقعد ولا اتلم عليه 

نجاح ومعرفتش يابت ايه اللي صابها

نورهان بتمصمه: والله يا اما معرف علمي علمك يا اختي مع ان الوليه كانت زي القدح طب والله وانا بسحمها قبل كده الوليه والله يا أما ظهرها زي الدبلان الأبيض ولا يبان عليه سن ابيض زي شق اللفت 

وائل وقف مصدوم وخبط ايده على راسه حسبي الله ونعم الوكيل فيكي يا بعيده هي جات منك الله يسامحك يا ام ملقتيش الا دي وتخليها تسحمك دانا نفسي بقيت بخاف منها 

يا ترى وائل ناوي على ايه ونورهان هاتعمل ايه

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة