قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

كعادته كل يوم جمعه بتروح عند أمها 

نجاح بقولك ايه يا بت متيجي نقعد قدام الباب بدل قعدتنا هنا لما كمكمنا خلينا نطلع نشم هوا ربنا شويه ونشوف الرايح والجاي

نورهان عندك حق يلا يلا 

طلعوا وقعدوا على الرصيف وعنيهم رايحه مع اللي رايح وراجعه مع اللي جاي 

ام كمال وهي بتنهج :سا الخير عليكي يا ام نور سا الخير عليكي يابت يا نور عامله ايه 

نجاح: نحمدوا يا حبيبتي انتي عامله ايه يا وليه 

ام كمال وهي بتحاول تسند نفسها من التعب: الحمد لله يا اختي 

نجاح وهي بتبص للشيله اللي على راسها: ايه يا وليه جايه منين كده وايه اللي على راسك داه مخليكي قاطعه النفس وبتنهجي 

ام كمال بتعب : والله يا اختي كت بجيب العيش من عند ام سامح قولت اخبز اللا عيش الطابونه لا يتاكل ولا يتسطع حاجه كده استغفر الله مملح وطعمه استغفر الله الكلمه التانيه متتقالش 

نجاح طب يا وليه مكنتي خبزتي في بيتك بدل بهدلتك للرايح والجاي 

ام كمال نعمل ايه بس الصحه مبقتش مساعده يا اختي يادوب شويه العافيه اللي فيا بقضي بيهم حوايج البيت فقولت مبدهاش بقى ووديتهم لام سامح والشهادة لله الوليه زي الفل وخبيزها زي التفاح

نورهان بشهقه وتعوجه بوق: يالهوووي والله منا عارفه الوليه دي جايبه الصحه دي كلها منين دي الوليه ارشانه وكركوبه معديه الخمسين وداخله على الستين وعامله زي القدح فيها بقرش شطه دي الوليه ربت اربع رجاله طول بعرض غير البنات الوليه يا اختي فرنها ليل نهار مبيفصلش متعرفيش جايبه الصحه دي كلها منين انا معرفش لا شوفت ولا هاشوف زيها ولا ورد عليا من عينتها دي 

ام كمال بضيق: يا شيخه حرام عليكي اسكتي بقى دي بتربي في يتامى

ام نجاح بشهقه: يا اختي اسكتي اسكتي والنبي داحنا اللي جارها يتامي داه الوليه عملت بيت مرماح طول بعرض وعمدان حاجه كده من اللي تطلع من القلب الحزين شوكه 

نورهان ايوه يا أما على قولتلك مش زي حالاتنا احنا اللي منكوت في ضهرنا شوكه 

ام كمال بنفخه: لا إله إلا الله يا وليه دعي الملك للمالك

دي الوليه كسرت شبابها على عيالها عشان تربيهم بالحلال وتعبت وشقيت من صغرها حماله اسيه

نجاح بمصمصه: يا اختي على ايه يعني وهي كانت عملت اه اكتر من اللي بتعمله اي مرا هجاله دي فرتها شغال ليل نهار مبيفصلش لما استوت وسوت رجاله طول بعرض من وراه 

ام كمال لا حول ولا قوه الا بالله يارب اقوم انا ريحت رجلي وخدت نفسي شويه يلا فوتكم بعافيه

مشيت وهي مخنوقه وصلت البيت وهي الخنقه كل مادا بتزيد

ام كمال لمرات ابنها تعالي نزلي عني يا بنتي

رضا نزلت الكرتونه 

ام كمال قعدت وهي بتضرب كف بكف لا حول الله يارب لا حول الله يارب اعوذ بالله من الشيطان الرجيم اعوذ بالله من الشيطان الرجيم.

رضا باستغراب يا اختي مالك يا مرات عمي في ايه جايه من بره وشك مخطوف ولونك اصفر في ايه الله حصل.

ام كمال الوليه الوليه يا اختي لا اله الا الله مش سايبه حد في حاله.

رضا وهي بتهز راسها وليه مين يا مرات عمي ما تفهميني في ايه وايه اللي حصل مخليكي قاعده بتكلمي في روحك

ام كمال بتوه ها لا ما فيش يا بنتي مفيش حاجه خلاص 

رضا وهي بتبص على الكرتونه ايه ده انت خبزتي

ام كمال ايوه يا بنتي خبزت مش عارفه ابلع لقمه الطابونه بتقف في زوري وتعرض

رضا بزعل تؤ طب مش كنت تقولي لي

يا مرات عم ده انا كنت عايزه اخبز معاكي ما عنديش ولا لقمه فوق وانا كنت مجهزالك الدقيق اهو

ام كمال يقطعني طب معلش يا بنتي عندي دي طب هاتي الدقيق وانا هروح اوديهولك لام سامح 

رضا ماشي يا مرات عمي معلش هتعبك معايا

ام كمال بحب ما تقوليش كده يا رضا والله يا بنت ده انا بعدك بنتي ده انت اللي شايلاني

رضا بابتسامه ربنا يديمك في حياتنا يا مرات عم ده انت ونعم الام والله ده انت مش حما ده انت امي الثانيه

ام كمال شالت الدقيق وراحت لام سامح

ام كمال معلش والنبي يا ام سامح عايزه اخبز الدقيق ده لمرات ابني كانت عايزه عيش وما قالتليش

ام سامح عيني يا حبيبتي عيني اليمين زاد وعين الشمال ميه بس معلش سيبيني النهارده وبكره بمشيئه المولى هعملهولك بس قوليلي عايزاه طري ولا ملدن 

ام كمال اعمليلي نصه طري ونصه ملدن زي ما عملتيلي

ام كمال وقفت تبص لها وهي متردده وتبص لها وترجع تميل تاني في الارض

ام سامح يا اختي مالك يا ام كمال في ايه يا اختي كفالله الشر شكلك عايزه تقولي حاجه وشهقت بصوت عالي ها هو العيش فيه حاجه 

ام كمال بنفي لا لا والله ده العيش زي الفل ومورد زي التفاح

ام سامح طيب امال فيه ايه يا حبيبتي وغوشتيني

ام كمال بحسم بصي بقى انا هقولك واللي يحصل يحصل ورزقي ورزقك على الله 

بس بصي يا اختي ابقى بخري البيت وشغلي قران و ارقي البيت

ام سامح بعدم فهم يا اختي لا اله الا الله في ايه يا ام كمال ما تقولي على طول خليتي الفار لعب في عبي 

ام كمال ولو اني ما بحبش اجيب سيره حد بس الامر لله الوليه نجاح وبنتها يا اختي قاعدين على الرصيف قاطرين اللي رايح واللي جاي وعينهم عامله زي البومه يندب فيها رصاصه الجوز قاعدين زي غراب البين للساقطه واللاقطه 

ام سامح يا اختي وانا مالي ومالهم ربنا يسهل لهم حالهم بعيد عنا يكفينا خيرهم ويكفينا شرهم

ام كمال ما هو مش على كده يا اختي ما انا هو لو كان كده ما كنتش قلتلك ده الوليه شافتني وانا جايه بتقولي جايه منين بقولها جايه من عند ام سامح كانت بتخبز لي تسكوتشي ابدا تبلعش الكلمه في جوفها ابدا لقيت الوليه يا اختي هي وبنتها دي تغني ودي ترد عليها الوليه تقولي الوليه كركوبه وفرنها قايد ليل نهار وبنتها تقولي ده مربيه اربعه رجاله غير البنات الوليه تقولي ده عامله بيت بالعمدان اقولها ده كسرت شبابها عليهم بنتها تقولي ده عامله بيت بالعمدان يطلع من القلب الحزين شوكه

قلت لها دع الملك للمالك تقول لي ده احنا اللي في ظهرنا شوكه 

ام سامح بشهقه: ها يا شيخه يسيبوني في حالي هما يعرفوا عني ايه ولا عن حالي ولا عن مالي يعرف اني كسرت شبابي على عيالي وقلت اربيهم وحيجت ولميت عشانهم يعرفوا ان انا عدت عليا ايام كنت بربط الطرحه على بطني من قرصه الجوع عشان عيالي تاكل وتشبع كنت بشيل اللقمه من بقي عشان هما ياكلوها وكملت بندب بدموع يا اختي حرام عليهم يسيبوني في حالي عادين العيال ومعددينهم عليا على ايه 

ام كمال بحزن على حالتها والله يا اختي انا قولتلك وبريت ذمتى قدام ربنا 

ام سامح بكسره طيب يا حبيبتي تشكري وكملت بعفويه ربنا يسترها بقى من عنده ويكفينا شر العين ويبعد عنا الوحش احنا وانتوا وامه محمد يارب 

ام كمال طيب يا حبيبتي يلا فوتك بعافيه

ام سامح بوجع الله يعافيك من كل شر يا حبيبتي

نورهان بقول لك ايه بقى ياما انا مروحه عشان اشوف البيت واشوف المعدول اللي فيه

نجاح وهي بتعوج بقها يمين وشمال روحي روحي يا ضنايا كانت جوازه الشوم واللوم والندامه

نورهان بنفخه على قولتك

روحت البيت ودخلت قلعت عبايتها السوداء ورميتها على الكنبه وقعدت تبص في شقتها وهي مخنوقه ومش طايقه نفسها ولا طايقه حد 

مسكت التليفون وفضلت تقلب فيه ورمته جمبها تاني وبدئت تعمل شويه في شغل البيت 

وتليفونها رن بصت فيه وفتحت المكالمه بسرعه

نورهان ازيك يا بنت يا هدى عامله ايه

الحمد لله نحمدو على كل حال انت عامله ايه وابنك عامل ايه دلوقتي طمنيني عليه مش بخير

نورهان بتنهيده ايوه بخير الحمد لله

هدى بطيبه يستاهل الحمد على كل حال الحمد لله يا حبيبتي دايما ربنا يجعلك دايما حمده وشكراه 

نورهان بفضول اللا بالحق يا بت يا هدي ما تعرفيش حاجه عن البنت سميه

هدى لا والله ما اعرفش انا كل اللي عارفاه ان هي حالتها يا قلبي تقطع القلب وكل يوم من سوء لاسوء وجوزها اخر ما غلب جاله عقد تبع شغله في السعوديه واخدها هي و العيال وسافر يمكن ربنا يشفيها وياخد بيدها

نورهان بحقد ايوه يا اختي بيضالها في القفص يلا ربنا يسهلها

هدى طب استني مش سامعاكي هفصل المكنسه عشان اعرف اسمعك كويس لحسن صوتها عالي ومغطي على صوتك 

هدى فصلت المكنسه بتقولي ايه بقى يا نورهان

نورهان ما بقولش يا بنت المحظوظه طبعا امك في جهازك ما سابتش حاجه الا لما جابتهالك بدل الشاشه اتنين وبدل الخلاط كيتشن واثنين والعجان ومفرمه اللحمه ومضرب البيض والمكوه وجابت لك غساله فوق اتوماتيك من الكبيره اللي بتغسل البطاطين وغساله اطفال والتلاجه والديب وجابتلك بدل المكنسه اتنين واحده من اللي بتكنس وواحده من اللي بتغسل السجاد دا امك ماسابتش حاجه الا لما جابت لك منها الطاق اتنين وتلاته

هدى باستغراب ايوه وفين المشكله يعني هو حد قال لامك ما تجيبلكيش ما هو السوق مليان زي ما بيقولوا كده

بالبلدي فلوسك في جيبك والحمير في السوق

نورهان بتريقه ايوه يا حبيبتي انا ابويا على باب الله مش وارث زي ابوك ومتلتلهم على قلبه 

هدى بتبرير ابو مين اللي وارث يا حبيبتي احنا هنرسم على بعض ونعيش الدور ابويا موظف وابوكي موظف وانا ما ليش ذنب يا حبيبتي ان انت امك جلده واستبخلت عليك واسترخصتلك في الجهاز 

نورهان ايوه طبعا يا بنت المحظوظه انتي وامك بيضالكم في القفص جابت لك الحلو كله والغالي كله كانت بتكومهلك كراتين كراتين 

هدى ولا بايضه ولا فاقسه يا حبيبتي والله الحاجه جايه بالغالي ومقطوعه من لحم الحي وجايه في الغلا والكوا 

وحست بضيقه من اسلوب الكلام معلش يا حبيبتي بقى بالاذن منك عشان ورايا تنظيف الحق اخلص وقبل ما جوزي يجي من شغل والعيال يجوا من دروسهم ما انت ما انت ست العارفين البيوت ما بيفضلهاش من صباحها لمساها 

نورهان ايوه على قولتك يا حبيبتي يلا اذنك معاكي

هدى قفلت المكالمه ورمت التليفون جنبيها بضيق يا اختي ايه الناس دي بدل ما تقول بسم الله ما شاء الله عماله تعد وتعدد عليا جهازي استغفر الله العلي العظيم يارب الله يسامحك يا امي انتي اللي اصريتي تفرشي الجهاز في الشارع قدام الناس للرايح واللي الجاي اديني اهو حتى بعد ما اتجوزت وخلفت والناس لسه فاكره وبتعد عليا الحاجه بالواحده 

مر يومين والحال كما هو ما فيش حاجه جديده اتغيرت والوضع مستقر في كل بيت بس عند ام سامح قلبها مقبوض ومش قادره تنسى الكلام اللي سمعته من ام كمال عماله تدعي ربنا بحرقه وتستغفر عشان يحفظ لها عيالها ويحفظ لها صحتها ويحملها بيتها من كل شر 

هدى صحيت الصبح وفتحت الشبابيك وبدات تروق في شقتها لسه بتشغل المكنسه وسمعت 

صوت انفجار وريحه شياط جامده اتخضت ورمت المكنسه بسرعه وشدت الفيشه باسرع ما يمكن 

هدى بشهقه ها يا لهوي ده باين المكنسه اتحرقت استغفر الله العلي العظيم يا رب هو يوم باين من اوله 

لما يجي بقى اكرم يبقى يصلحها 

هكمل كنيس بالمقشه وامري لله

خلصت كنيس ودخلت عشان تبدا تجهز الغداء 

دخلت عند الديب فريزر تجيب لحمه سمعت صوت انفجار وميه كتيره طالعه من تحت منه صرخت بصوت حاد يا لهوي يا لهوي في ايه في ايه لا والنبي مش طالبه انت كمان تبوظ

ونفخت بغيظ استغفر الله العلي العظيم يا رب هو في ايه هو اللي بيحصل حسبي الله ونعم الوكيل في ايه بس يا ناس 

سكعت باب الديب فريزر بغيظ وطلعت المطبخ حطت الاكل على الرخامه وحطت ايدها على راسها يا الله الرحمه من عندك يا رب

فضلت قاعده مخنوقه وهي مش حاسه بنفسها ولا حاسه بالوقت

لحد ما اكرم دخل ونادا عليها بصوت عالي يا هدى يا هدى

هدى رفعت راسها من على الترابيزه انا في المطبخ يا اكرم تعالى

دخل اكرم واتلفت حواليه في ايه يا بنتي انت لسه ما جهزتيش الغدا لحد دلوقتي ليه

هدى بخنقه والله ما عارفه اكرم المكنسه الصبح اتحرقت والديب فريزر جوه رخر شكله اتحرق ما اعرفش ايه اللي حصل

اكرم بتعقل طيب وايه المشكله عمرهم الافتراضي وخلص يعني نبعت نجيب التوكيل يصلحهم

ولا احسن حاجه فيك ان انت بتاخد كل حاجه ببرود شديد

اكرم ايوه يعني وبعدين هقعد احرق في اعصابي على ايه

هدي بإبتسامه وتهكم والله على قولتك يا شيخ يا ربنا يديني نص هدوء الاعصاب اللي عندك ده

اكرم بضحكه طيب يا ست الكل قومي بقى جهزي الغدا عشان انا واقع وميت من الجوع

هدى حاضر اديني ساعه زمن والاكل يبقى جاهز

وقفت اعوذ بالله من الشيطان الرجيم وبدات تكمل في الاكل جت تشغل الخلاط انفجر 

هدى بزعيق يا اكرم

اكرم دخل جري في ايه يا هدي تاني

هدي وهي بتشاورله على الخلاط 

اكرم باستغراب من ايه في ايه اللي حصل

هدى رفعت له اكتفى والله يا ابني علمي علمك والعلم عند علام الغيوب

اكرم خلاص حصل خير يا هدى اعملي اي حاجه مش هتحتاجي فيها طماطم كده سريع سريع حتى لو شويه مكرونه من غير طماطم وقضي اليوم وانا هاخده اصلحهولك

هدى هزه راسها حاضر 

وبدات تجهز الاكل ولسه بتحط صينيه الفراخ في الفرن قزاز الفرن انفجر ونزل زي الرمل على الارض

هدى بعصبيه وصراخ اكرااااااااام

اكرم خرج من جوه ماسك التيشرت في ايده خير ثاني يا هدى في ايه

هدى بعصبيه ازاز الفرن انفجر

اكرم بص للقزاز على الارض لا بجد

هدى بتريقه بعصبيه لا بهزر

اكرم نفخ خلاص حصل خير وشغلي الشفاط ده عشان ريحه الدخان والشياط باينه قوي في الشقه

هدى حاضر ولسه بتمسك الفتله بتاعه الشفاط عشان تشغله سمعت صوت تكتكه وانفجار ودخان طالع منه

بصت لاكرم بص انا على اخري كده في حاجه غلط بتحصل

اكرم بصلها بذهول وهو مش مستوعب ايه اللي بيحصل ده كله ورا بعضه بس قدر يتمالك نفسه بلاش تحمري الفراخ طلعيها مسلوقه وانا هدخل اجيب عيشه وانتي قمري العيش وهناكل مكرونه وفراخ والحمد لله فضل ونعمه من ربنا 

هدى حاضر واتصل بالتوكيل يجي يلم ام اللعبكه اللي عماله تحصل في الشقه دي

اكرم هزلها راسو بموافقه حاضر 

دخل يجيب العيش من التلاجه وهو لسه بيسحب العيش كل الارفف بتاع التلاجه وقعت على الارض

كرم واقف وهو مبرق بيبص له في كل الحاجات اللي منطوره قدامه وخبط كف بكف لا حول الله يارب هو في ايه بالظبط

هدي من المطبخ وهي بتلم الازاز يا اكرم اخلص هات العيش علشان يلحق يفك 

اكرم ما ردش عليه وهو واقف باصص على الارفف بذهول

هدى لمت الازاز ورمته في الباسكت ودخلت في ايه يا اك و ما لحقتش تكمل الكلمه من صدمتها رفعت عينيها فيه وهي مبرقه لا اوعى تقول لي دي كمان عمرها الافتراضي وخلص

اكرم بص لها والله ما عارف اقول لك ايه علمي علمك

هدى قعدت على الارض بحسره لا اله الا الله ولا حول ولا قوه الا بالله هو احنا ايه اللي بيحصلنا ده بس يا رب اللهم لا اعتراض

اكرم خلاص يا هدى حصل خير اللي تيجي في الفلوس ثمنها رخيص المهم ان هي مجاتش لا فيا ولا فيك ولا في حد من العيال فداك يا ست زي ما بيقولوا اللي يجي في الريش بقشيش

هدى هزت راس بحزن عندك حق بس الحاجه دلوقتي بالشيئ الفلاني وده عشان يتصلح هياخد في وشه شيئ و شويات يا اكرم

اكرم برده نقول الحمد لله يا مدام معانا نصلح ونحمد ربنا يا هدى والحمد لله ربنا ساترها وفايض علينا بخيره

هدى الحمد لله وكملت بغيظ وحسبي الله

اكرم اتصل بالصيانه وجم تاني يوم بداوا يصلحوا الاجهزه اتكلفت مبلغ اكتر من عشرين الف جنيه تصليحات

هدى وهي قاعده سرحانه بتفتكر كل الحوار اللي دار بينها وبين نورهان وانها فضلت تعد عليها حاجتها وحاجتها كلها باظت خلال ايام غمضت عينيها ودعكت فيها بتعب استغفر الله العلي العظيم الله يسامحك يا شيخه في ايه بس مش سايبه حد في حاله والله انا حاسه ان اللي حصل للبنت سميه انت اللي وراه استغفر الله يا رب اللي انا بقوله ده اللهم لا اعتراض على حكمك ولا رد لقضائك منك لله يا شيخ خليتي الواحد عقله شت منه ودماغه راحت لسكك تانيه بعيده فضلت تفكر وتجيب الموضوع يمين وشمال واستقرت ان اللي بيحصل في بيتها حسد شغلت الرقيه الشرعيه وشغلت قران ومسحت البيت كله بميه بملح

ام سامح خلصت خبيز وبصوت عالي واد يا سيد يا واد يا سيد

دخل شاب طول بعرض نعم يا ام 

ابعت ياض لام محمد قول لها ان انا خلصتلها الخبيز تيجي تاخده

سيد ام محمد بعتت مع ابنها بتقول لك ان هي هتروح تشوف بنتها عشان تعبانه انا هاخد العيش في طريقي على الموتوسيكل واروح اوديه

ام سامح بقبضه قلب لا يا واد بص ابعتهم مع اي توك توك يوديهملها

سيد بضحكه ليه يعني يا امي في ايه ما تخافيش ده هي كلها فركة كعب مش هاعوق 

ام سامح معرفش يا ابني قلبي مقبوض والمدعوقه اللي انتا جايبها دي كل ما ابصلها قلبي بيتقبض منها لله في لله

سيد بضحك والله يا امي انت ظالمها طب دي مهونه علينا الشغل اللي بنوديه بعيد ما تشغليش انتي بالك بس وانا هوديها قرب منها وبس ايديها وضمها في حضنه قوي وتبت عليها بايديه 

وطلعها من حضن وهو بيبتسم لها يلا بقى سيبك واروح اوديه جمدي قلبك امال يا ام سامح ده اكل عيش واكل العيش ما فيهوش ياما ارحميني 

خد العيش على الموتوسيكل وتوكل على الله وطلع على الطريق وفي لحظه سهو عمل حادثه واختلط دمه بالعيش واتنطر على تراب الاسفلت

ام سامح قاعده وقلبها اتقبض مره واحده قامت منطور اعوذ بالله من الشيطان الرجيم اعوذ بالله من الشيطان الرجيم استغفر الله العلي العظيم جيب العواقب سليمه يا رب جيب العواقب سليمه يا رب اجعل الغيب خير اجعل الغيب خير

سمعت صوت صراخ من بره طلعت جري في ايه في ايه يا جدعان بتصوتو ليه كده ايه اللي حصل

واحد من الجيران الحق يا ام سامح سيد ابنك خبطته عربيه على الطريق وبيقولوا نقلوه المستشفى الكبيره

ام سامح بصراخ ابني يا ضنايا يا ابني خدوني ودوني لابني طمنوني عليه يارب شحتهم منك شحاته ما تسوني ولا تضمني فيهم يا رب 

الجيران اتلموا وخدوها في توك توك وراحوا مع بعض على المستشفى طلعت تجري ووصلت دخلت الطوارئ عند ابنها

وسالت كل حد كان بيقابلها في وشها لحد ما دلوها على الاوضه طلعت تجري عليها 

قبل ما تدخل طلع الدكتور من جوه مسكته بهذيان ابني ابني يا ابني بيقولوا له جه هنا في حادثه بيقولوا خبطوه هو كان راكب الموتوسيكل بيقولوا خبطوه على الطريق ابني طمني عليه 

الدكتور بص لها باسى وحزن وغمض عينيه بوجع انا اسف يا حاجه البقاء لله

ام سامح بهزيان في مين يا ابني 

واتلفتت حواليها للوشوش هو بيقول لمين ها هو قصده على مين هو انتم ساكتين ليه هو ما حدش بيرد عليا ليه وبصت للدكتور 

تاني هو انت بتقول لي مين يا ابني

الدكتور بحزن وهو كاتم دموعه في عينيه وحدي الله يا حاجه وشدي حيلك البقاء لله انا لله وانا اليه راجعون

ام سامح بصراخ وحرقه طالعه من قلبها يا ابنيييييي يا ولدددددي يا كبددددي يا ضناياااااا يا سيييد قوم يا ابني ما تحرقش قلبي عليك 

وزقت الدكتور بسرعه ودخلت جرى على اوضه ابنها لقيتوا راقد والممرضه مغطيه وشه بالملايه 

شالت الملايه من على وشه وبقت تحضنه ودموعها مغرقه وشها قوم يا واد قوم ما تحرقش قلب امك عليك ياض والله ده انا مش حمل الكسره والحسره دي ما تعيشنيش محصوره بيك طول عمري يا ابني يقطعني يا ريتني ما خبزت ولا وديتك ما انا قلت لك وديهم في توك توك يا سيد 

شفت يا سيد ما سمعتش كلام امك يا سيد طب انا زعلانه منك يا سيد مش بتقول لي ما عيطش اديني بعيط يا سيد قوم وامسحي دموعي زي ما اتعودت وكنت بتحضني وتودعني يا واد قومي يا واد قلبي هيقف يا واد 

وحضنت ابنها بصراخ يااااااااارب ابني يا رب يا حرقه قلبي يا رب اللهم لا اعتراض يا رب

بدل ما تكفني وتدفني ياا ابني انا اللي اكفنك وادفنك 

الكل بقى سامع كلامها ودموعهم نازله من صوت الحرقه اللي ماليه 

الممرضه بحزن يا حاجه وحدي الله

واستعوضيه عند الله

ام سامح بحرقه عندك يارب عوضي عليك يارب في شبابي اللي راح يا رب وفي ابني اللي كسر ظهري يارب عوضي عليك يارب اللي عندك يا رب احسن من اللي عندنا 

غسلوه وكفنوه وهي واقفه بحرقه ودموع منشفتش لحد ما اخدوه يدفنوه مسكت في النعش وهي بتصرخ بحرقه سيبوه والنبي ما تاخدوه سيبوه في حضني يا حصره قلبي يا حرقه قلبي نار نار يا سيد شعله في قلبي يا رب هونها عليا يارب

الكل قرب منها وشدوها بعيد عن النعش وقدر الرجاله ان هم يتحركوا بيوصلوا عليه ودفنوه

وتجمع الكل علشان يعزي ويواسي ام سامح في ابنها اللي راح في عز شبابه

نجاح اتصلت ببنتها بت يا نورهان ماعرفتيش اللي حصل

نورهان بفضول ايه اللي حصل يا أما 

نجاح بالصعبانيه مصطنعه مش الواد سيد ابن ام سامح بيقولوا خبطتوا عربيه وهو راكب الموتوسيكل على الطريق ويا كبدي مات الله يرحمه

نورهان الله يرحمه طيب هاللبس واعدى عليكم ونروح نعزي بردوا ما هو واجب

نجاح ايوه واجب وانا احط عليا العبايه السوداء والطرحه مستنياكي وكملت بمصمصه شفايف ربنا يصبر قلبها 

دخلت نجاح ونورهان وهم بيتلفتوا حواليهم في البيت وشافت ام سامح وهي قاعده بتبكي بحرقه وحواليها الستات كلهم بيحاولوا يعزوها ويواسوها 

نجاح بصعبانيه قلبي عندك يا ام سامح الله يرحمه زينه الشباب عريس الجنه 

نورهان الله يصبر قلبك يا ام سامح في الجنه يا ام سامح استعوضيها عند اللي خلقه واحنا لينا في نفسنا حاجه 

ام سامح رفعت عينيها وهي عنيها زي كاسات الدم الحمراء قامت منطوره ومسكت نجاح ونورهان بركتهم على الارض وبصرخ يا ولاد الكاااالب عديتوهم عليا واستكترتوهم عليا انتوا ايه شياطين وابالسه لا بتخافوا رب ولا بتهابوا عابد روحوا منكم لله الهي يحرق قلبكم زي ما حرقتوا قلبي يكويكم بنار الفرن اللي كويتوني بيها فضلتوا تقولوا فرنها قايد ليل ونهار فضلتوا تقولوا نارها قايده لما النار مسكت في جسمي وحرقت قلبي حرقت ضنايا يحرقكم في نار جهنم الهي يحرقكم بفلق بناره ويقيد عليكم في جهنم فضلت تندب وهي بتصرخ وكل كلمه طالعه بحرقه من قلبها وهي بتضرب فيهم بجنون وماحدش قادر يسلكهم من تحت ايديها لحد ما قدروا يتكاتلوا الستات عليها ويسلكوا نجاح ونورهان من تحت ايديها بالعافيه

نورهان قامت منطوره وهي بتنفض هدومها وبتلف طرحتها شرشحت ببجاحه جرى ايه يا وليه ليه يا اختي هو احنا اللي كنا موتناه ولا احنا اللي كنا خبطناه هو انت شايفانا ايه يا حبيبتي قباضين الارواح عمره خلص وموته وجات وساعته واذفت نعترض ده حتى يبقى كفر

وهو يا حبيبتي لا عاش فوق عمره ساعه ولا تحت عمره ساعه خد انفاسه من الدنيا كامله مكمله 

ام صابر بحرقه والستات ماسكينها الهي يزوقكم اللي فيا اللهي يكويكم بالنار اللي كويتوني بيها يسقيكم من اللي سقيتوني منه يارب يقعدهولكم يارب حنكم يسقط وحجركم يلقط قادر يا كريم 

الهي يسقيكم حرق الضناه يحرقكم الحرقه اللي فيا يارب

نجاح وهي بتلف طرحتها يلا يلا يا بت احنا اللي غلطانين اننا جينا نعمل الواجب على العموم انا مقدره اللي انت فيه يا ام سامح وعلى العموم البقيه في حياتك يا حبيبتي بردوا وخدت بنتها وطلعت ببرود وكانهم معملوش حاجه

روحت نجاحها على بيتها ونورهان بقول لك ايه يا اما انا مروحه لحسن انا عفاريت الارض بتتنطط في وشي من المرا دي

نجاح على قولتك يلا يا بنتي خيراً تعمل شراً تلقى اهو كله عند ربنا

روحت نورهان وهي مخنوقه دخلت البيت وائل بصلها بصدمه 

في ايه يا نورهان مال هدومك متربه كده ليه

نورهان بحده عصبيه سيبني دلوقتي يا وائل لحسن انا عفاريت الارض كلها بتتنطط في وشي

وائل من ايه ايه اللي حصل وعمل فيكي كده 

نورهان وكأنها مصدقت انفجرت المرا السو ام سامح اروح اعزيها تقوم تمسك فيا وتقولي انتي السبب وفين وفين عقبال ماسلكوني منها

وائل وانتي مالك 

نورهان يا اخويا علمي علمك 

كل داه عشان قولت الوليه فرنها قايد ليل ونهار طيب مهو حقيقي هو انا كدبت ولا اللي يقول كلمه الحق يكفروه 

وائل بصلها بصدمهو وعنيه مبرقه ووشه اصفر

ياترى نورهان اخرتها ايه تاني..؟

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة