قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

نورهان بقولك ايه يا أما أنا عايزه اجيب فرخه بلدي بس تكون حلوه كده للواد يتقوت وترم عضمه بيقولو المحل اللي على أول الشارع عنده فراخ حلوه وأسعاره متهاوده هاروح اشوف كده 

نجاح طب وعلى ايه يا موكوسه تخبطي المشوار داه كله متروحي للبت هناء دي مربيه طيور عندها وبيقولوا فراخها عسل كده تاكلي منها متشبعيش واهي جمبنا يعني لا تروحي ولا تيجي 

نورهان وانتي بها هروحلها اهي اولى من الغريب يلا فوتك بعافيه

نجاح يعافيكي من كل شر يا ضنايا 

طلعت من بيتها ويادوب كام خطوه وكانت وصلت بيت هناء رنت الجرس 

وهناء فتحت بعد ما لبست الطرحه 

نورهان ازيك يا هناء عامله ايه يابت 

هناء بترحاب صادق: ازيك يا ام ادم عامله ايه يا اختي فينك وفين اراضيكي خطوه عزيزه يا بت ايه رجلك تقلت علينا ليه 

نورهان نحمدوا يا اختي اهو عايشه في الدنيا والله طالع عيني ابني تعبان عمل حادثه من قيمه كام اسبوع والحمد لله على كل حال قدر ولطف 

هناء خبطت على صدرها يا ساتر يارب طب وهو عامل ايه شاالله يكون بخير طمنيني يابت 

نورهان الحمد لله بقى احسن ومعلش يا اختي لو مقصره انتي عارفه الواحده مننا من صباح ربنا لمساه مبتقعدش لحد ما بيتهد حيلها وياريت عاجب 

هناء عندك حق والله يابت بس بردوا الله يعين العباد على المعايش يابت قولي الحمد لله بردوا داه العافيه للدوود المهم قوليلي ايه اللي هفك عليا يعني خير ولا ايه 

نورهان والله يا اختي عايزه من عندك جوز فراخ بلدي للواد انس يرموا عضمه بدل الفراخ البيضا اللي مرقتها عامله زي النابت ولا ليها طعم ولا فايده 

هناء عنيني يا حبيبتي دانا اجيبهم وادبحهم وانضفهم واجيبهم لحد البيت انا افديكي الساعه لما انس باشا يؤمر وانا عيني اليمين زاد وعيني الشمال ميه 

نورهان بإبتسامه صفرا تسلمي يا حبيبتي قد القول والله عارفه طول عمرك جدعه وصاحبه واجب

هناء قوليلي بقى انتي عايزاهم بلدي حر ولا بلدي احمر 

نورهان يا اختي وايه الفرق بقى بين الاتنين اي حاجه وخلاص اهي احسن من الفراخ البيضا 

هناء بصي هو يعتبر مفيش فرق غير السعر والاتنين والله واكلين مورعه بيت ولا واخده هرمون ولا دياولو وبطنه نضيفه بس الزبون وكيفه في اللي تقولك البلدي الحر غالي عليا وانا عايز حاجه على قدي وتكون مهاوده في السعر هما بيختلفوا بس في سعر الكتكوت وهو أخضر بس عقول بقى مريحه اصحابها 

نورهان والله منا عارفه طيب انهو احسن 

هناء هتحيريني و هتحيري روحك ليه تعالي معايا على السطوح وشوفي انتي عايزه ايه منهم واهو هايبقى داه وداه قدامك

نورهان ماشي يلا وطلعوا على السطح 

نورهان اول ما طلعت ودخلت شهقت بصوت عالي هاااا يالهوي ايه داه يا بت انا مش عارفه احط رجلي وانا بقى هاخطي كيف في اللهوه دي يابت دانا من ساعه ما طلعت وانا وقفت متسمره مكاني مش عارفه احرك رجلي يمين ولا شمال

هناء بإبتسامه بريئه وطيبه يابت سمي وصلي على النبي في قلبك اللي قدامك دول يعلم الله صارفين تقلهم فلوس غير ما بياخدوا من صحتي وعافيتي ووقت بيتي والله لولا الغلا وبدل الحوجه للناس اني امد ايدي ليهم بالسلف وشيله هم رده ما كنت تعبت روحي وربيت بس ربك عالم بالظروف قال ايه اللي رماك على المر قال اللي امر منه 

نورهان طيب الله يعنيك يا حبيبتي 

هناء تسلمي وتعيشي تعالي بقى شوفي اللي عايزاه يا حبيبتي علشان اوزنوهلك وبردوا هاعمل معاكي الصح واحلى واجب فيه 

نورهان تسلمي وتعيشي قد القول والله عارفه طول عمرك جدعه 

اختارت نورهان جوز فراخ كبار 

وهناء وزنتهم وقللت من تمنهم اكتر من النص 

هناء ادبحهملك ولا تدبحيهم انتي في بيتك

نورهان والله تعبانه وانا في الدبيح مش قد كده وبيني وبينك بخاف قلبي رهيف مبحبش اشوف الدم قصادي 

هناء طب تعالي مش هياخدوا معايا ربع ساعه على ما تشربي كوبايه شاي يكونو خلصوا

نزلو وهناء مخدتش ووقت وكانت خلصت وحطتهم في كيس نضيف اهم يا حبيبتي الف هنا وشفا يارب 

مطرح ما يسري يمري عافيه وصحه على بدنه يارب

نورهان تسلمي وتعيشي ومدت ايدها بالفلوس

هناء يابت خلي والله ومش عزومه مركبيه يابت في بيتها والله 

نورهان قد القول والله بس داه حقك كفايه انك نزلتي في تمنهم كتير وكفايه تعبك في تنضيفهم كمان 

هناء عيب يابت تقولي كده احنا اخوات وجيران وعشره عمر 

نورهان مهو داه العشم بردوا يلا فوتك بعافيه 

هناء يعافيكي 

روحت نورهان ويادوب غيرت هدومها وبدائت تجهز الغداء وعملت فرخه وشالت التانيه في الفريزر 

والكل اتجمع على الغداء 

وائل وهو بياكل بإستمتاع :الله الفراخ دي طعمها حلو اووي غير كل مره بتجيبي فيها انتي جيابها منين

نورهان اشمعني يعني مهي فراخ زي اي فراخ

وائل لا دي طعمها حلو اوووي ابقى هاتي منها على طول حلال فيها الفلوس دي طعمها في بوقي زي السكر داه حتى الشوربه تقيله ودسمه كده منوره وبتلمع في الطبق

نورهان تصدق عندك حق والله مرقتهم تقيله زي الزيت جبتهم من عند البت هناء اللي جمب بيت ابويا المضروبه يا اخويا يخصها بإيه السطح بتاعها يالهوي يالهوي يالهوي يا وائل متعرفش تحط رجلك ولا تخطي عليه ولا تديرها لا يمين ولا شمال البت السطح ملينا وبيشغي من بط لفراخ لحمام لوز لرومي داه حتى الأرنب كمان لما مربياه 

وائل بغيظ يا شيخه حرام عليكي قولي ما شاء الله تبارك الرحمن قولي اي حاجه غير يا لهوي بتاعتك دي لهو بالي لما يحط عليكي 

نورهان بلويه بوق وتعوجه يمين وشمال ليه يا اخويا وهو انا كنت هاحسدها ولا هاحسدها 

وائل بتريقه لا انتي هاتقوليلي دانتي عينك بركه لا مش بركه واحده دي السبع بركات كلها 

نورهان طبعا من يومي وانا عيني مليانه و شبعانه اومال ايه 

وائل اه صح يابت مش هانكدب الكدبه ونصدقها يا نورهان عيب داحنا عشره عمر 

نورهان قصدك ايه بقى يا سي وائل ها ان عيني وحشه وبحسد

وائل ببرود ولا قصدي ولا مقصديش سبيني بقى استمتع بالاكله الحلوه دي 

نورهان بصتله بغيظ وعدم رضا عن كلامه ولا تعليقه وجواها اقتناع حد اليقين انها مبتحسدش وان عينها مليانه 

مر اليوم بخيره وشره وتاني يوم خدت ابنها هي وجوزها وراحوا مستشفي خاص علشان يفك الرباط اللي على رجله 

حجزلهم وائل وقعدوا منتظرين دورهم 

وهي قاعده شافت وش مألوف عليها فضلت تركز وتدقق فيه 

وقربت منها علشان تتأكد منها 

رفعت الست وشها وابتسمت

نورهان طنط نداء ازيك يا طنط عامله ايه

نداء قامت وفتحت دراعاتها ازيك يا نورهان عامله ايه يا قلبي اخبارك واخبار دنيتك ايه يارب تكوني بخير 

نورهان الحمد لله على كل حال 

نداء خير يا بنتي ايه اللي جايبك المستشفي عساه خير ان شاء الله

نورهان بحزن شاورت على ابنها والله يا طنط جايه افك الرباط من على رجل ادم كان وقع عليه موتوسيكل من فتره والحمد لله قدر ولطف

نداء بصت على الولد يا قلبي الحمد لله معافى بإذن الله ربنا يحميه ويحفظه من كل شر وتشوفيه عريس قد الدنيا يارب 

نورهان بإستغراب هو حضرتك بتعملي ايه هنا 

نداء بكسوف ووش احمر اصل انا جايه اتابع الحمل 

نورهان بصدمه حمل هو انتي حامل 

نداء برضا اه شوفتي يا بنتي كرم ربنا قد ايه كرمني بعد صبر سنين 

نورهان ايوه ايوه منا عارفه انتي هاتقوليلي المهم انتي تخلي بالك من روحك

نداء بفرحه طفل طبعا يا بنتي ربنا عالم داه جالي بعد شوقه وعلى كبر 

نورهان من غير ما تاخد نداء بالها عوجت بوقها يمين وشمال اه طبعا ربنا يتملك على خير ويقومك مجبوره الخاطر وحجرك مليان قولي امين

نداء بلهفه: امين يارب

نورهان طب معلش بقى يا طنط نداء اسيبك عشان شكل دورنا جه واكيد هشوفك تاني يا حبيبتي

نداء بطيبه ماشي يا بنتي ربنا معاكي ويقوم لك ابنك بخير وبوسه لي كتير وانا كمان شكلي دوري بينادوا عليا 

خلصت كشف على ابنها والدكتور طمنهم ان هو بخير وهي في طريقها بقول لك ايه يا وائل انا عايز اعدي علي امي اريح شويه ومنها يطمنوا على الواد بالمره 

وائل ماشي وانس كده كده بيلعب عند جدته تحت يعني متشليش همه

وصلت بيت اهلها ونزلت شالت ابنها ودخلت حطت الواد على الكنبه وقعدت بتفك الطرحه بغيظ 

نجاح باستغراب نورهان خير يا بنتي في ايه كفا الله الشر 

نورهان بنفخه اصبري بس ياما ريح رجلي شويه واخد نفسي 

نجاح ماشي يا بنتي ريحي بس قولي لي جايه منين كده وجايبه الواد على كتفك وهو تعبان يا كبدي

نورهان جايبه من المستشفى ياما كنا بنشيل الرباط اللي على رجله 

نجاح اتنهدت براحه طب الحمد لله مش هو بقى كويس دلوقتي

نورهان الحمد لله الدكتور قال بقى كويس ويقدر يحركها بس بالراحه بلاش تنطيط وشقاوه يكش يفهم بقى البعيد ويبطل يغلبني ويطلعه على جتتي ما هو محدش شال المرار الا انا 

سكتت نورهان شويه وهي بتبص لابنها وبعد كده اتلفت لامها وشهقت بصوت عالي هااا اللا بصحيح اسكتي عارف شوفت مين هناك.

نجاح اتعدلت في قعدتها شفتي مين يا بت

نورهان وهي بتحرك ايدها نداء 

نجاح حطت ايدها على بقها وبتحاول تفتكر نداء نداء وبصت لبنتها بحيره نداء مين يا بت

نورهان وهي بتعوج بقها الحاجه نداء يا أما 

نجاح ااااه الحاج نداء مش دي يا بنت اللي بيتها على الطريق وعامل زي الفيلا اللي عاملاله جنينه كبيره بسور عالي ده 

نورهان ايوووه عليكي نور هي دي.

نجاح يا اختي ودي كانت بتعمل ايه في المستشفى يا بنت اللا تكون عيانه هي رخره مهو بردوا السن ليه حكمه وتلاقي اللي زيها ساكن المستشفى ومبيت فيها كمان

نورهان بضحكه خبيثه وهي بتشوح بايديها ساكنه ايه اسكتي اسكتي والنبي يا أما مش الوليه الشايبه العايبه حامل 

نجاح بشهقه وضحكه موازيه لضحكه بنتها ايه مين دي اللي حامل يا بت ده الوليه كركوبه ورجلبعا والقبر هي لسه فيها للحمل احيه دي اتجوزت كبيره يا بت دي يمكن متجوزه مكملتش كام سنه 

نورهان ايوه يا حبيبتي لسه متجوزه ما كملتش اربع خمس سنين اصل هي كانت مسافره طول عمرها الكويت راحت هناك عملتهم خميره على قلبها قد كده وستفتهم ولما جت بقى وهفها الشوق قالت يا جواز 

نجاح ايوه يا بت والله على قولتك اهي اللي زي دي بقى يا بت اللي من بختها سافرت واتفسحت وعملت فلوس لا تأكلها نار ولا حطب واتجوزت جوازت السعد والوعد والهناء والمنى كمان وهو دي اخره المتمه حامل وهتخلف كمان قال بطلوداه واسمعوداه يا ولاد 

نورهان وهي بتتحسر ايوه ما هو اللي زي دي من لقي بخته مش عايزه اقول الكلمه الثانيه عشان عيب اهو اللي زي نداء دي بقى اللي ليها بخت مش احنا

قليل البخت اللي طلع له العظم في الكرشه وعضه الكلب دون عن كل الناس في المولد 

نجاح بلوع ايوه يا بنتي حسره عليك وعلى حظك الوليه الكركوبه اتجوزت راجل مسكنها فيلا وانت يا صبيه يا اللي العين تشتهي تبصلك متجوزه جوازه اورديحي وساكنه في شقه عامله زي شق تعبان هنقول ايه نصيب

نورهان ايوه نصيبي اسود ومهبب ياما خليني ساكته والنبي وكاتمه في قلبي 

لحسن اللي جوايا لو طلع هيولع في الدنيا باللي فيها ويخليها رماد اهو مكتوم جوه الواحد احسن 

فضلت قاعده بغيظها ونارها وشرارها فتره لحد ما اتاخر الوقت يلا ياما بقى افوتك بعافيه واروح البيت ادي للواد علاجه وافرد جتتي عشان اتخمد شويه 

نجاح ماشي يا ضنايا ربنا معاكي ويقويكي

هناء من المطبخ بصوت عالي يا واد يا محمد انت يا واد

دخل طفل عمره لا يتجاوز ال 12 سنه ايوه يا ماما

هناء اطلع على السطح يا حبيبي وهات ديك كده ونقيه كبير وعمران عشان نتغدى بيه يا حبيبي

محمد حاضر يا ماما 

هناء يا واد نقي ديك عمران عشان هطلعك بيه لو طلع رفيع ابوك جاي من الشغل تعبان وهجيعان يا دوبك اللقمه دي اللي بتسند قلبه بيفضل عليها لتاني يوم

محمد بطاعه حاضر يا ماما والله هنقيلك اكبر ديك على السطح ولما تشوفيها تقولي محدش يجيب غيري 

هناء ماشي اطلع يا حبيبي

طلع محمد على السطح وفي اقل من 10 دقائق نزل وهو بيجري وبينهج الحقي يا ماما الحقي يا ماما الحقي يا ماما

هناء طلعت من المطبخ بلهفه في ايه يا واد نازل وصوتك جايب من على السطح انطق ياض فيه نشفت الدم في عروقي.

محمد وهو بيرتعش بخوف كل الفراخ اللي على السطح ماتت يا ماما كل اللي على السطح مات.

هناء برقت عينيها وشهقت بصدمه هاااا يا واد يخربيتك بتقول ايه بتفول عليهم ليه فراخ ايه اللي ميته فراخ مين اللي ماتت ها انطق يا واد 

محمد وهو بيرتعش شاور لها بايده على السطح والله مش بكدب عليك يا ماما اطلعي هتلاقيهم كلهم كلهم ميتين 

سابت ابنها وطلعت تجري على السلم من خوفها ورعبها بقت كل ما تطلع شويه تتكفي شويه وتقوم شويه وتكمل زحف وتسند على الترابزين لحد ما طلعت وهي قلبها قرب يقف من الخوف 

وصلت السطح ووقفت وهي عينيها مبرق ما بترمش ودموعها نزلت غصب عنها قدامها اصعب منظر ممكن تشوفه في حياتها كل شقاها وتعبها ميت 

هناء بحرقه وجعير وصوت طالع من جوه جوفها بحرقه يقطعني ده انا ما بخليش رجل تخطي ولا تعتب ولا تطلع عليه يا حورقتي يارب عوضي عليك يارب في حالي ومالي عوضي عليك يارب في تعبي وشقايا 

جلال خلاص يا هناء وحدي الله اهدي واستعيذي بالله 

هنا قعدت على الارض وبتبكي بحرقه ونعمه بالله والله يا جلال كانوا كويسين منها لله اللي كانت السبب وكملت بهزيان لا لا انا السبب انا اللي دخلتها بيتي انا اللي كشفت سترة بيتي عليها وخبطت بايديها جامد على صدرها انا انا السبب انا استاهل اللي يجرالي كملت بحرقه وصوت عالي ودموع مغرقه وشها والله ما صرفوا قليل والله العظيم ما صرفوا قليل ده خدوا من مالي وحالي وصحتي ما انتا عارف وكان على يدك 

جلال ميل على الارض وضمها لحضنه خلاااااص اللي يجي في الريش بقشيش يا هناء قولي الحمد لله مدام ما جتش لا فيا ولا فيكي ولا في حد من العيال نقول الحمد لله ان احنا بخير خلاص عمرهم 

هناء بنحيبه وهي بتلطم على وشها لا مش عمرهم ده العين العين العين يا جلال كوامتهم واستخسرتهم فيا يا جلال طب ليه دول جايين بتعب وشقى وقلع ضرس دول واخدين من صحتي وعافيتي يا جلال 

جلال وهو بيضمها لحضنه بيحاول يسيطر على حاله الانهياؤ اللي فيها فزع فيها بصوت عالي خلاص خلاص باااس اهدي ووحدي الله لو جرالك حاجه محدش هاينفعك هايبقى موت وخراب ديار فوقي 

هناء بصراخ وهو لسه ما بقاش موت وخراب ديار ما الموت قدامك اهو يا جلال وخراب الديار حل واللي كان كان يا رب العوض عليك يارب يارب العوض عليك يارب 

جلال سندها ونزل بيها لتحت ورقدها على الكنبه عشان يبعدها عن المنظر اللي طول ما هي شايفاه هتفضل تبكي وتصرخ وتجيب من قلبها 

سندها ونزلها ورقدها وهي عماله تبكي وتنوح بحرقه سابها وخد محمد ابنه وطلع لم كل اللي على السطح في اكتر من 8 شكاير كبيره شالوهم قصاد بعض وخدهم رماهم بعيد وكب عليهم بنزين 

هناء متحملتش اللي حصل ضغطها رفع من كتر العياط والنواح اغمى عليها جلال خلص ودخل الاوضه لقاها مرميه على الارض قاطعه النفس 

شالها ورقدها على السرير واتصل بدكتور معرفه جابه بسرعه

وصل الدكتور وجلال دخله بسرعه

جلال بخوف وترقب ممزوج بلهفه طمني يا رياض الله يخليك

رياض اطمن يا جلال واجمد كده هي ضغطها رافع اوووي وداخله على بوادر جلطه انا اديتها حقنه علشان تساعدها وهتاخد اسبرين مرتين في اليوم مع العلاج داه وهاتبقى زي الفل 

جلال اتنهد بحزن الحمد لله على كل حال شكرا معلش تعبتك معايا

رياض عيب متقولش كده احنا عشره عمر في اي وقت معاك يلا سلام وحمد الله على سلامتها مره تانيه 

جلال الله يسلمك 

نداء خلصت الكشف وروحت وهي فرحانه والفرحه مش سيعاها 

حسن ايه يا حاجه نداء جايه والبسمة مرسومه على وشك خير

نداء ابدا كنت عند الدكتوره وعملنا اشاعه انهارده واطمنا على البيبي

حسن طيب مستنتينيش ليه كنا روحنا مع بعض 

نداء والله يا حسن عملت اذن من الشغل وقولت اخطف رجلي صد رد واديني اهو متاخرتش وانتا كنت مشغول وشكلك كده لسه جاي اصلا

حسن ماشي يا حاجه نداء هاعديها المرادي بس علشان الفرحه اللي بتلمع في عنيكي 

نداء وهي بتحضنه :ربنا يخليك لينا ومنتحرمش منك يارب

حسن وهو بيلف ايديه حواليها اللهم امين ولا يحرمني منكم يارب المهم بقى قوليلي الدكتوره قالتلك ايه

نداء قعدت وريحت جسمها على الكنبه الحمد لله الدكتوره طمنتني وقالتلي ان كل حاجه تمام والوضع مستقر مفيش حاجه مقلقه هي بس كتبت على شويه فيتامينات وحمض فوليك

 حسن بفرحه ماشي ياستي ربنا يقويكي ويقومك بالف سلامه وييجي او تيجي سليم معافي يارب

وبصلها وابتسم بكره يا نداء هاتقلبظي وتبقلظي وتبقى عامله زي الكوره الشراب والواحد يدحرجك برجليه علشان يعرف يحركك من مكانك 

نداء بصتله واتخيلت نفسها وابتسم ودعت ربنا في سرها انها تشوف الايام دي 

مر خمس ايام والدنيا تمام ونداء مستمره على العلاج والوضع مستقر وهناء بدات تتقبل اللي حصل وتتعافى 

صحيت نداء وبدائت تحضر الفطار ليها ولجوزها قبل ما يروحو الشغل 

ومره واحده حست ببوادر مغص في بطنها 

حسن دخل المطبخ يساعدها شاف ملامح الألم مرسومه على وشها سألها بخوف مالك يا نداء فيكي ايه واقفه وكانك مش قادره تقفي

نداء خدت نفس وحاولت تنظم نفسها: مش عارفه والله يا حسن مره واحده حسيت كده بنغزه في بطني سمعت في ضهري وبطني من تحت

حسن بخوف طب سيبي اللي في ايدك وخلينا نروح للدكتور نطمن عليكي ونشوف داه من ايه

نداء ابتسم بحب :لا اطمن مش مستدعيه خالص منا حسيت بيها كذا مره ولما سألت الدكتوره وكذا حد قالولي ان الشكه دي بتبقي بسبب الدم اللي بيتسحب علشان الجنين يتكون يعني حاجه طبيعيه 

حسن بإصرار يا نداء مش هانخسر حاجه نروح ونطمن احسن متجازفيش بروحك 

نداء عدلت نفسها لما حست ان الوجع راح :لا لا صدقني مش مجازفه خالص والله داه وضع طبيعي واكيد يعني يا ابو على مش بعد صبر السنين هجازف بنفسي وبيه 

حسن استسلم لكلامها وسكت

فضل المغص يروح وييجي كل يوم اكتر من مره وهي بتتالم ولما يروح تحس انها احسن واتصلت بالدكتوره اكتر من مره من خوفها وقالتلها انه وضع طبيعي واسترم المغص اكتر من يوم على هذا الحال يروح وييجي 

حسن بحده وشخطه: يا بنتي حرام عليكي نفسك في ايه متحامله على نفسك في الألم ليه وعشان ايه 

نداء بدفاع عن نفسها والله يا حسن مبحامل ولا حاجه انا كلمت الدكتوره اكتر من مره وقالتي طبيعي وهو مغص بسيط يعني مش مستاهل كل الخوف والقلق اللي معيش نفسك فيهم دول والله لو كنت حاسه بوجع شديد كنت اكيد روحت وانا كده ولا كده بتابع مع الدكتوره مش ساكته 

حسن نفخ بعدم اقتناع وسكت

مرت ساعات بسيطه وحست بالوجع بيزيد ونزيف شديد نازل 

منها اتخضت بخوف وطلعت وهي بتتسند على الحيطان الحقني يا حسن انا بموت ابني يا حسن والنبي ابوس ايدك داه جه بعد شوق ولهفه والنبي يارب متسوقني فيه لجل حبيبك النبي يارب

شالها حسن لعد ما حط طرحه على شعرها وجري بيها على المستشفي اللي بتتابع فهيا وراح لدكتورتها بسرعه وكأنه بيسابق الزمن 

الدكتوره بإستفسار خير في ايه 

حسن مش عارف والله هي بقالها كام يوم بتقولي مغص بييجي ويروح

الدكتوره فعلا كلمتني وقولتها داه شيئ عادي بعد كام سؤال واستفسار عن طبيعه المغص فمش طبيعي النزيف داه وخصوصا ان مدام نداء حريصة جدا على الجنين بطريقه غير طبيعيه 

حسن كل داه مش مهم دلوقتي المهم شوفيها بالله عليكي دي بتنزف من بدري 

الدكتوره هزت راسها بتفهم ودخلت كشفت على نداء وحولتها للاشاعه بسرعه علشان تعرف سبب النزيف وتشوف حاله الرحم والجنين  

لحظات مرت اطول من السنين على حسن في انتظار وترقب 

واخيرا طلعت الدكتوره وكلها اسف

حسن بخوف من ملامحها طمنيني بالله عليكي انا قلبي قرب يقف من الخوف في ايه 

الدكتوره باسي للأسف كان نفسي اطمن حضرتك بس انا عندي خبرين اسواء من بعض 

حسن بخوف ووشه اصفر :في ايه يا دكتوره وقفتي قلبي 

الدكتوره بتردد: انا مش عارفه اجيبهالك ازاي 

حسن بحده يا دكتوره الله يرضى عليكي انا فيا اللي مكفيني قولي على طول انا مش حمل وجع قلب اكتر من اللي انا فيه

الدكتوره بإستفسار هي المدام اتعرضت لضغط عصبي او حاجه اتسببت في رفعة الضغط

حسن لا خالص يا دكتوره الله يخليكي قولي على طول انتي بتقولي الاتنين اسواء من بعض قولي على طول ومتلعبيش باعصابي اكتر من كده لاني خلاص مفييش اعصاب اساسا 

الدكتوره بعمليه شديده :للأسف الجنين ميت وحصل انفجار كلي في الرحم ومحتاجين توقيع حضرتك على إقرار بدخول مدام نداء العمليات لستأصال الرحم الحاله متستدعيش اي تأخير 

حسن بصدمه حس ان رجليه مش شيلاه كان لسه من كام يوم اسعد واحد في الدنيا والفرحه مش سيعاه ايه اللي حصل بين يوم وليله ليه كل حاجه حلوه تروح كده في غمضة عين ليه وايه السبب 

حسن دموعه خانته ونزلت وسلم الامر لله 

الدكتوره طلبت تجهيز نداء للعمليات وبعتت الورق لحسن لتوقيعه لحد ما تجهز 

حسن بحرقه مضى على الورق وهو مقهور ويا ما أصعب قهر الرجال 

مرت ساعات وخرجت نداء متخدره من أثر العمليه حسن فضل قاعد جمبها لحد ما فاقت 

نداء بخوف وهي بتحط ايديها على بطنها ابني قولي انه بخير يا حسن حسن ميل راسه في الارض وسكت ودموعه نازله

نداء بإنهيار انتا ساكت ليه رد عليا بالله عليك قولي انه لسه جوه وانه هاييجي وينور دنيتنا 

حسن مقدرش يرفع راسه ويقولها

دخلت الدكتوره وبلغت نداء 

نظء بصراخ وانهيار ابني انا عايزه ابني هاتولي ابني خدتوه ليه ياريتني كنت روحت معاه

الدكتوره تحت انهيار نداء عطتها مهدء قوي ونامت على اثره 

وحسن بص عليها بحزن وحرقه

سميه عرفت بتعب هناء وخدت بعضها وراحت تزورها 

فتح الباب ابنها ودخلت على هناء اللي راقده ومتعلق ليها محاليل بتعب

هدى مالك يا هناء كفا الله الشر يا حبيتي ايه اللي صابك

هناء بحرقه منها لله يا هدى يبتليها بمصايب الارض علشان تتلهي عن عباد الله يا هدى

هدى بشخطه في ايه يابت بتعددي على مين بس يابت حرام عليكي في ايه 

هناء : نورهان اللي منها لله

هدى ملامح وشها اتغيرت وكشت في بعضها واترسمت ١١١ على وشها واتنرفزت بحده وعصبيه مالها قطرانه الله يبتليها بلهوة الغفله 

هناء بدموع وقهره طلعت عندي على السطح

هدى قبل ما تكمل منك لله دانتي مبتطلعيش حد عليه ولا بتخلي رجل تهوب نحيته ولا تخطي عليه ملقتيش الا ام عين مدوره وتطلعهيا وتكشفي ستر بيتك عليها طبعا كومتلك اللي كان عليه صح

هناء بصتلها بصدمه وعنين مبرقه عرفتي منين 

هدى بضحكه وجع لاء منا ملسوعه قبلك وحياه امك شاورت على نفسها نحن السابقون وشاورت على هناء وانتم اللاحقون  

هناء ليه عملت معاكي ايه 

هدى بنت ال ولا بلاش اتصلت بيها عشان اطمن على البت سميه ويا حبيتي كنت بنضف و بقولها هاقفل المكنسه علشان اسمعك و كلمه جرت كلمه وجرت حوار وبعيد عنك والتانيه بقى جابت من قلبها تلاجتك وغسالتك وبتوجازك ومكنستك وامك وابوكي والي جابوكي وخلفوكي ومسابتش حاجه حاجه في البيت الا وقعدت تعد وتعدد فيها وعينك ما تشوف الا النور يومين اتنين مفيش غيرهم يا حبيبتي ومشوفتش الا الضلمه التالت كانت شقتي متكومه مبقتش ملاحقه اسد على التلاجه اللي انفجرت ولا الديب اللي ولع ولا المكنسه اللي اتحرقت والبوتجاز اللي اتكسر ولا السخان اللي انفجر أسد على الشفاط اللي باظ ولا المكنسه اللي اتحرقت ولا على الخلاط اللي فرقع وخدي من عندك بقة يت حبيبتي الوفات مؤلفه اتكعت من دم قلبي انا وجوزي بسبب اللي منها لله اللي الهي ييفخسلها عنيها الاتنين تعيش طول عمرها عميا تضبش في الارض يمكن تعتق خلق الله من سم عنيها 

هناء بنحيب وقهره ومقولتليش ليه يا هدي داحنا طول عمرنا اصحاب كنتي نبهيني منها

هدي وانا ايش دراني ولا اعرف منين يا منكوبه انك هاتتهفي في عقلك وتطلعيها على سطحك منا عارفه ان طول عمرك ناصحه ومحدش بيطلع على سطحك  

هناء وهي بتمسك راسها بوجع كلهم ماتوا يا هدي شقايا وتعبي راح الارض بسبب عنيها يا هدي

هدي بتهوين خلاص مادام انتي وجوزك وعيالك بخير نقول الحمد لله واحنا اللي بنعمل القرش مش القرش اللي بيعملنا يا بت هاتقفي على رجلك وترجعي تاني احسن من الاول كمان

هناء تاني هاعيده تاني وهو عاد المنادي ينادي تاني ولا ادخله بيتي بعد اللي حصل 

هدي وانتي تخسري اكل عيشك وزبونك اللي بيجيلك بالاسم ومخصوص ليه يا موكوسه 

هناء واعمل ايه معاها هي وامها مهي اكيد هاتعرف وتدرا داحنا جيران وانتي عارفه ان الشارع مبيتبلش في بوقه فوله

هدي لو هي أو المقطوعة امها جولك قوليها معنديش مفيش يابت دي عينهم يندب فيها رصاصه دي كومت الواد ابن ام سامح الله يرحمه ويصبر قلب أمه عليه 

هناء بندب: يا مررري يا حرقتي على شقا ايامي وتعبي 

هدي بزعيق خلاص خلصنا واللي كان كان المهم نفكر في اللي جاي لا التعدده والولوله هاتجيب نتيجه ولا هاتغير اللي حصل اديني عرفتك ووعيتك وانتي عقلك في راسك تعرفي خلاصك يلا اسيبك انا عشان اللحق اشوف بيتي وعيالي اللي سيباهم دول

هناء ماشي ربنا يكفيكي شر اولاد الحرام قادر يا كريم

هدي نحن وإياكم يارب

نجاح اتصلت ببنتها تبلغها اخر الاخبار: اسكتي اسكتي يا بت معرفتيش اللي حصل يابت 

نورهان فتحت الاسبيكر علشان تتكلم براحتها خير يا أما ايه اللي حصل 

نجاح مش البت هناء يا عيني عليها طيورها ماتت وجوزها فصل يحولهم اشوله اشوله ورماهم وطبت من طولها من قهرتها

نورهان والنبي ايه من ايه دانا طلعت كانوا زي الفل وواقفين زي القدح 

نجاح يا اختي علمي علمك زي ما يكون جالهم فره وشالت اللي على السطح لا خلت أخضر ولا يابس

نورهان الله يعوضها بكره يا اختي تجيب غيرهم هي دي بتتهد 

نجاح ايوه على قولتك ايوه بالحق مدرتيش باللي حصل للحاجه نداء كمان 

نورهان خير اللي جرالها دي كمان شهقت بتريقه ايه حامل في تؤم ولا ايه مهو داه اللي ناقص ايوه مهو اللي زي دي كل حاجه بتجيلها مجوز مش فرداني 

وائل واقف وراها وسامع الحوار والتريقه وهو مصدوم من اللي سمعه وقبل ما يطلع سمع صوت نجاح 

نجاح لا يابت داه بيقولو العيل مات وانفجر في بطنها ونزل ببيت الولد كله والدكتور شالها بيت الولد 

نورهان ببرود عادي اللي زي دي ميفرقش معاها بكره تبقى تخلف غيره عادي يعني مش عجبه هي 

نجاح لا يابت منا بقولك شالولها بيت الولد هاتجيب غيره منين يا معدوله 

نورهان وهما دول بيغلبو فلوسهم بتحل العقد ولو مخلفتش هاتفرتكهم في الفسح والخروجات هما هايهمهم عيل ولا تيل عايزين ياخدوا من الدنيا كل حاجه المال والعيال داه حتى يبقى طمع

وائل فضل واقف مكانه متسمر ومش قادر يستوعب اللي سمعه

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة