قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

البارت السابع  

نورهان وهي قاعده مع امها كعادتها 

نورهان مالك يا أما قاعده بتفركي ولا على حامي ولا على بارد ليه كده 

نحاج اسكتي يابت لحسن انا على اخري 

نورهان يا اختي منا عماله اقولك مالك في ايه متقولي يا وليه على طول مش هاشحت منك الكلام شحاته يا اختي 

نحاج الموكوسه مرات اخوكي حامل

نورهان بشهقه يالهوووي ايه هي لحقت 

نجاح ايوه مهي حملت قبل ما اخوكي يسافر 

نورهان لاء البت باين عليها مش سهله وناصحه بتبلف الواد بدري بدري 

نجاح: ايوه وانتي بتقولي فيها داه البت طلعت ميه من تحت تبن واخوكي الموكوس شقا الغربه يحوشه ويجري يجري وييجي يكبه في حجرها اول بأول البت طلعت ناصحه وعامله زي ابو قرش شطه مش زيك يا خيبانة الرجا مش عارفه تاخدي من جوزك لا ابيض ولا اسود 

نورهان اسكتي والنبي يا أما ايش تاخد الريح من البلاط وهو حيلته ايه عشان اخده 

نحاج بمصمصه ايوه عيني عليك يا بنتي انتي اللي اتظلمتي في جوازتك دي لا كانت ليكي ولا من مقامك بس هانقول ايه اهو نصيب في الاول والاخر 

نورهان خدت قعدتها وقامت يلا بقى فوتك بعافيه وابقى قولي لمرات ابنك مبروك وانا لما ابقى اكلم كريم هابقى اباركله 

نجاح ماشي يا حبيبتي الله يعافيكي يارب

اتجمع كل الحبايب وراحو يزورو الحاجه نداء سميه كانت نزلت من السعوديه وهدي وهناء وصابرين 

ومريم ونسمه علا وتقى 

اتجمعوا عند نداء في المستشفى  

اول من اتكلم كانت نسمه لا بأس طهور عليكي يا طنط نداء 

هدي قولي الحمد لله محدش عارف الخير فين ولا خيرة الا فيما اختاره الله 

نداء برضا الحمد لله اللهم لا اعتراض كملت بحرقه انا بس كان نفسي اكون ام لا كنت عايزه مال ولا جاه ولا اي حاجه الناس فاكرين اني سعيت للسفر علشان ألم فلوس وانا والله العظيم سعيت علشان مرض ابويا الله يرحمه خد اللي ورانا واللي قدامنا واتداينا لطول الارض وكان محتاج ومحدش بقى معاه حتى تمن الاكل مش العلاج كان اللي جاي رايح على الدكاتره والعلاج ومكانش مكفي غمضت عنيها بوجع الحمد لله الحمد لله يارب اللهم لا اعتراض كملت برضا محدش عارف يمكن لو كان جه الدنيا يطلع عيل عاق ويبهدلني محدش عارف الخير فين الحمد لله 

وبصتلهم بإبتسامه بس عارفين والله يا بنات فيكم الخير بجد دي جيتكم هونت عليا وحدتي وتعبي كتير والله حتى والله البت نورهان كمان اتصلت ولولا ظروف تعب ابنها كانت جات 

هدي بحده نورهان يا شيخه حرام عليكي الله يبتليها بمصيبه تتلهي فيها عن الناس بدل ما هي قاعده للساقطه واللاقطه 

نداء بطيبه لسه كده يا بنات حرام عليكم دي طيبه والله 

هدي طيبه والله ما طيب غيرك اسكتي اسكتي اصلك متعرفيش حاجه تحبي ابدئلك من عندي ولا تحكيلك سميه ولا هناء 

نداء ليه عملت ايه خلاكي شايله منها كده ايه اللي حصل لداه كله 

هدي ابدئلك انا كان يوم اسود مطلعتلوش شمس كانت عايزه اطمن على سميه بحكم ان بيت ابوها جمب بيت جوز نورهان وفضلت تقر على جهازي وفي يوم وليله كل اجهزتي اتحرقت وانفجرت وصرفت في ظرف كام يوم اكتر من عشرين الف جنيه تصليحات 

هناء والله العظيم وحياه أولادي جاتلي البيت وكانت عايزه فرختين وابني تعبان وعايز يتقوت خدتها وطلعت السطح عشان تختار اللي على كيفها خدت في وشها تاني يوم الأخضر واليابس وقعت من طولي وكنت هاموت فيها من قهرتي على تعبي وشقايا اللي راح الارض واترمى في الزباله 

سميه بتريقه وانا شرحكم روحت ازروها وياريتني ماروحت الله يقطعني اني روحت زورتها علشان اطمن على ابنها ولفيت معاها شويه محشي والتانيه ايدك وغوايشك مدققتش طلعت من عندها وتاني يوم كان ابن سلفتها اللي جالها صوابعه اتقطعت وايدي وقعت بكسر مضاعف عمل خلل وضمور في الاعصاب واديني اهو مبقدرش امسك حتى كوبايه الحمد لله انها جات على قد كده واهو بدئت اتعافى إلى حد ما 

علا بذهول ازاي انا مركزتش وربط الأحداث ببعضها 

هدي خير عملتلك ايه انتي كمان اشجيني 

علا يوم ما ايدي اتحرقت كنت بزور امي وشوفتها وفضلت تقولي بيتك وخواتمك وروحت ومكملتش كام ساعه وكانت ايدي اتحرقت اقسم بالله يا بنات زي ما بقولكم كده 

هناء بتريقه يخصك تعالي في حضن اخواتك يا حلوه تعالي ومين تاني يلا مهو مزاد 

تقى وانا كمان والله انا فاكره كويس يوم ما بنتي اتكسرت افتكرلها العافيه والخير يارب كنت لسه يادوب شيفاها على رأس الحاره عرفت ان جوزي سافر وفضلت تقولي ايوه السعوديه وفلوس السعوديه وريالات السعوديه وخدي من عندك آخر النهار البت كانت وقعت وايديها اتكسرت كسر مضاعف وعمليات وشرايح خدت في وشها الأخضر واليابس اقسم بالله 

هدي بتريقه وصوت عالي الله ادي كده خمسه في عين العدو مين تاني 

نسمه بشرود تصدقوا يا بنات يوم فرح مريم شوفتها في القاعه وفضلت تقولي دانتي زي البت اللي لسه متجوزتش وبطنك وكأني وماني وروحت وانا حاسه بمغص وانتقلت المستشفى وطلع عندي فتاء وعملت عمليه 

هدي سته مين يزود

نسمه اه دي فضلت طول الفرح تتكلم على الفرح والمصاريف وصرفوا وعملوا وعرفت لما فوقت ان مريم وجوزها عملو حادثه تفتكري هي السبب

هدي الا افتكر دانا افتكر وافتكر وابصم بصوابع ايدي ورجلي كمان اسأل مجرب وانتي يا طنط نداء مقابلتكيش انتي كمان ولا نفدتي منها 

نداء بصتلهم وسرحت وهي عينها مبرقه

هدي بتريقه الله مادام سرحتي يبقى قابلتك اطرشي اللي في جوفك 

نداء بحيره وتردد يا بنتي حرام مش عايزين نظلم حد داه الظلم وحش وظلمات في القبر ويوم القيامه

هدي نظلم مين لسه بتسالي وشاكه بعد كل اللي سمعتيه داه داه الوليه عينها شغاله مبتفصلش اربعه وعشرين ساعه قر وحسد 

تقى اسكتي يا طنط نداء لسه انتي متعرفيش بالعلقه اللي اخدتها هي وامها من ام سامح في عزا سيد ابنها الله يرحمه 

نداء لا أظن سمعت عنها بس معرفش ليه 

تقى اسكتي داه من يوم العزا واللي حصل وفضلت الستات لا على حامي ولا على بارد عايزين يعرفوا ايه اللي حصل 

هدي بفضول ايه اللي حصل بقى انا كمان هاموت واعرف 

تقى يا اختي على اللي حصل الوليه ام كمال اللي جوه الحاره كانت جايبه العيش من عند ام سامح والتانيه هي وامها لمحوها وفضلت تقر على ام سامح والوليه ربت عيال طول بعرض وعملت بيت وغيط وفرنها شغال لحد ما خدوا في وشهم راجل طول بعرض 

نداء بصدمه يا لهوووي معقول يا بنات اللي بسمعه داه العين ممكن تعمل كده بجد 

سميه لا يا طنط تعمل اكتر من كده انا سمعت خطبه في الحرم الشيخ بيقول العين تُدخل الرجل القبر، وتُدخل الجمل القدر.

ويرجع أصل مقولة "العين فلقت الحجر" إلى عهد الرسول عليه الصلاة والسلام، ويروى أن امرأة كانت مشهورة بالحسد جاءت إلى رسول الله، فخاف على حفيديه الحسن والحسين، فاستبدلهما بحجر ووضع عليه غطاء حتى لا تصيبهم عين المرأة، وبالفعل دخلت المرأة ونظرت إلى الغطاء، وبعدما غادرت أزال الغطاء ووجدوا الحجر انفلق إلى النصفين 

نداء بخوف يا ساتر يارب اللهم أجرنا يارب

هدي احكي بقى ايه اللي حصل ولا لسه شاكه 

نداء مش عارفه انا شوفتها فعلا كانت جايه للدكتور بإبنها وقولتها اني حامل باركت وسكتت مش اكتر 

هدي اااااه خدتي العين يعني حسبي الله ونعم الوكيل فيها 

نداء والله ما انا عارفه انا بقيت محتاره بجد بس مش معقوله كل اللي حصل معاكم ومعايا صدفه خصوصا ان حملي كان كويس ومستقر

علا بقلق طيب والعمل ايه يا بنات دي نتصرف معاها ازاي 

هدي بكره والله العظيم يا بنات الحل مع اللي زي دي ان اللي يشوفها من طريق يمشي من طريق تاني خلونا نأمن شرها 

سميه والله وانتي بها محدش فيه حيل يموت ناقص عمر بسببها دي شكلها مش هاترتاح الا لما تجيب اجل كل اللي حواليها دي ياساتر يارب من عينها وربنا يكفينا شر العين اللي زي دي وشرها هي والي زيها 

الكل بص لبعضه وهما فعلا في حالة ذهول 

روحت كل واحده على بيتها وصابرين كان جواها شك في اللي حصلها روحت على بيت امها بلهفه وخحيره ودخلت

ام صابرين مالك يا ضنايا شارده ليه من ساعه ما دخلتي

صابرين بقولك ايه يا ماما كنت عايزه أسألك على حاجه كده

ام صابرين قولي يا حبيتي عيني 

صابرين لما كنت مسافره انتي شوفتي البت نورهان او قابلتيها 

ام صابرين بتذكر ايوه يابت منا قولتلك يومها بش انتي شكلك نسيتي 

صابرين اتعدلت بلهفه طيب ايه اللي حصل 

ام صابرين ولا حاجه والله كنت رايحه اطل على بيتك زي ما بعمل وجات معايا ولا اتكلمت ولا نطقت حرام ليه بتسالي بعد الوقت داه كله

صابرين طيب مش فاكره يوم ما جوزي تعب ولا قبلها ولا بعدها 

ام صابرين والله منا فاكره بس اظن صباحيه ما جوزك تعب ايوه كان يومها حتى انا كلمت وانتي كنتي رايحه المستشفى 

صابرين هزت راسها وسكتت 

ام صابرين طيب فهميني بتسالي ليه 

صابرين ولا حاجه سلامتك مفيش اسيبك انا قولت اعدي اطمن عليكي بالمره

ام صابرين بصتلها وسكتت وحست ان فيه حاجه بنتها مخبايها ومش عايزه تقولها 

مرت الشهور والكل بيحاول يبعد عن طريقها تماما 

نورهان وهي داخله عند أمها بعد الشغل قابلت صابرين

نورهان صابرين ازيك يابت عامله ايه

صابرين الحمد لله ازيك انتي يارب تكوني بخير

نورهان رايحه فين كده شكلك خلصتي عند امك و مروحه

صابرين معلش والله يا نورهان مستعجله جايه ادي لأمي حقنه عشان بعيد عنك عيانه بالاذن منك شكلك مستعجله وسابتها ودخلت بسرعه وقفلت الباب وراها وهي بتحاول تاخد نفسها 

صباح اتصلت على بنتها ايه يا بت يا سميه مش هاتيجي تطلي عليا يا واطيه ولا الغربه قست قلبك على امك يابت 

سميه لا والله يا ام في التوك توك بس الله يخليكي اطلعي كده طلي لو شوفتي نورهان بره او قاعده قدام الباب قوليلي علشان لو كده انط من التوك توك على جوه جري او او احاول احود عليكي من اي طريق تاني

صباح ليه كده يا بنتي عملتلك ايه البونيه 

سميه اسكتي والنبي يا ماما خلي الطابق مستور بالله عليكي خليني عايشه بدل ما تاخديني في كفن بسببها وبسبب عينها اللي يندب فيها رصاصه 

صباح بخوف الشر بره وبعيد يابت تفي من بوقك ايه اللي بتقوليه داه بتفولي على روحك ليه 

سميه اسكتي والنبي يا ماما اللي بقوله داه اللي بيحصل بسببها دي ماسبتش حد من صحابنا في حاله الا وكومته 

طلعت صباح وبصت قدام الباب :مفيش حد 

نزلت سميه جري وقفلت الباب وهي بتتنهد براحه

مر ايام وراحت لهناء

هناء ببرود خير يا ام ادم

نورهان كل خير يا حبيتي كنت عايزه دكر بط وائل بقاله كام يوم عمال يقول عليه ونفسه ريحاله 

هناء كان على عيني يا حبيتي ماتو والسطح فوق بح فاضي واديني اهو على حطة ايدك هو لا بربي ولا عايزه اربي حلفت بعد ما رميتهم في اشوله لا مدخلاه ولا جيباه كان على عيني يا حبيتي لو عايزه روحي الشارع مليان بالكوم مش لاقي اللي يشيله ولا استني ليوم السوق هتلاقي على قفا مين يشيل 

نورهان طيب متعرفيش حد من حبايبك يكون بيربي

هناء والله ما اعرف نفسي مبتهفنيش عليه بالاذن منك بعمل الغدا جوزي زمانه جاي

قفلت الباب في وشها 

مرت الايام وكل ما تشوف حد من اصحابها او جيرانها يجروا منها ويتهربوا من الكلام معاها 

مرت الشهور وهي منبوذه من الكل وعلى نفس وضعها حتى جوزها اصبح بيخاف وبيتهرب منها وبيحاول انه ميقعدش معاها في مكان بكل الطرق 

وحماتها أصبحت خايفه منها كل ما تنزل تتهرب ولا عايزها تنزل تساعدها ولا تدخل عندها 

ام وائل قاعده سرحانه وبتفكر وبتفتكر اللي حصل من كام يوم لما شافت صباح

فلاش باك

ام وائل بعتاب ايه يا وليه مكانش بينا عيش وملح متجيش تكلي عليا ولا تسالي لو مسالتش 

صباح والله يا حبيتي دايما في بالي بس معلش انا بقيت بخاف اجي عندك

ام وائل بشهقه: ها يالهووي ليه حد داسلك على طرف يا وليه ولا ايه خايفه من ايه دانتي كنتي واكله شاربه طول اليوم عندي 

صباح بتردد اصل بصراحه كده بيني وبينك مرات ابنك سمعت عمها حاجات مش ولابد

ام وائل يالهوي مين فيهم

صباح مرات وائل 

ام وائل نورهان خير في ايه 

صباح بصراحه كده يوم ما ابن رشا جراله اللي جراله كان يومها عند مرات ابنك وكانت سميه بنتي هناك وقالتلي انها فضلت تقر على الواد وعلى بنتي ويومها الواد يا كبدي يا ابني صوابعه اتقطعت وبعدها بيوم بنتي ايديها اتكسرت غير اللي صاب ام سامح وأم كمال مسكتتش جرستها في الحاره غير البت تقى وعلا وغيرهم يا اختي انا وليه في اخر ايامي خليني كافيه خيري شري لا حمل رقده ولا تعب والواحد في تعبه بيبقى تقيل وانتي ست العارفين وانا بنتي الله يعينها على اللي فيها مش حمل خظمتي وربنا يكفيكي شر عينها 

نهايه الفلاش باك 

ام وائل بدئت تفتكر اللي حصل لضهرها من ساعه ما نورهان غسلته وبدئت تربط الأحداث ببعضها 

دخل وائل وهي شارده

وائل مالك يا حاجه قاعده سرحانه في ملكوت ربك ليه كده

ام وائل اتعدلت وبصتله كويس انك جيت انا عايزاك 

وائل خير يا ماما في ايه 

ام وائل حددت عليك بحد الله ووكلت فيك الله 

وائل خير يا ماما ايه اللي حصل بيخلكي تقولي كده

ام وائل تقولي الحق

وائل ومن أمته وأنا كدبت عليكي قبل كده 

ام وائل بصتله وهي مركزه في عنيه انا الدكاتره غلبو في تعبي وانتا حليته كيف وازي داه اللي انا عايزه اعرفه ومش هاتطلع من هنا الا لما اعرفه ولو طلعت من هنا من غير ما تقولي قلبي وربي غضابنين عليك ليوم الدين 

وائل بزعل ليه بس يا امي بتنبشي في اللي فات هاتسفيدي ايه

ام وائل بزعيق مش بنبش انا منستش يا ابني شهور وشهور وانا الوجع كان بينهش في لحمي نهش زي الكلب السعران في حتة لحمه انا فاكره كويس انتا جيت وجايب معاك قهوه ودهنت بيها ضهري فضلت كل يوم طالع نازل على نفس الموال داه وانا قولت يمكن طب شعبي مهو الادويه مجابتش نتجيه ولا كان ليها فايده وكنت كل ما اجيبلك القهوه من هنا تقولي ابدا الاقيك جايب الكوبايه في ايدك من فوق وتدخل تدهنلي بيها ضهري 

وائل بصلها وسكت

ام وائل غمضت عينيها وقالتله مراتك مش كده 

وائل بمحاوله لتغيير الكلام ليه بس بتقولي كده 

ام وائل فتحت عنيها بحزن بقلو كده عشان مراتك عينها مسابتش حد يا ابني دانا وصلني عنها كتير وكل حاجه اسواء من اللي قبلها من اول البت سميه لحد ابن ام سامح واللي جراله من تحت راسها وعينها وغيرها وغيرها 

وائل بصدمه ايوه هي يا امي وقتها عرفت ان العين ميكسرش سمها الا بحاجه يكون فيها ريق صاحبها وكان صعب اجيبلك ميه وضوئها كنت بجيب كوبايه القهوه بعد ما تشربها واجيب اثر ريقها عليه واجي ادهنلك بيه ضهرك

ام وائل بخوف وقلق على ابنها هاقول ايه مفيش في ايدي غير اني اقولك روح يا ابني ربنا يحفظك من شر عينها شغل يا ابني الرقيه الشرعيه والله يا ابني لولا معاك منها عيال كنت قولتلك طلقها لان اللي زي دي عينها يا ابني وحشه وممكن تمسك وتمس بيتك وساعه القضا يا ابني بيعمى البصر تصيبك وقتها وتجيب أجلك ولا اجل عيل من عيالك مهي النار لما مبتلاقيش حاجه تحرقها بتحرق في روحها دعيتله بقلب صادق روح يا ابني ربنا يسترها عليك وعلى عيالك 

وائل بحزن من كل اللي بيحصل حواليه واطمئنان من دعاء امه وهو داه اللي انا عايزه منك يا امي دعائك

ام وائل دعيالك يا ضنايا ويشهد عليا ربي ربنا يهديهالك مقدرش اقول غير كده عشان مينفعش اكون انا الست اللي بتسعى في خراب بيت ابنها 

وائل رفع راسه للسما وهو خايف من اللي جاي

مرت ايام وهي قاعده بالليل تليفونها رن 

نورهان ايوه يا أما ازيك

نجاح بصوت مرعوب الحقيني يا نورهان غتيني يا بنتي 

نورهان قامت منطوره من مكانها ايه في ايه حصل ايه انطقي متسبنيش كده

نحاج مرات اخوكي جالها الطلق وبتولد وانا لوحدي في البيت ولا عارفه اروح ولا اجي 

نورهان بإستغراب اومال ابويا واخواتي راحو فين 

نجاح ابوكي وإخواتك في شغل بره من ادان العصر ومش جايين الا متأخر 

نورهان اقفلي اقفلي انا هانط في العبايه وجايه لبست بسرعه ونزلت جري قابلت وائل عند مدخل البيت

وائل بصلها من فوق لتحت وبص في ساعته رايحه فين كده 

نورهان مرات اخويا بتولد وامي لوحدها في البيت ومش عارفه تروح فين وتيجي منين 

وائل طيب تعالي اركبي انا جاي معاكم مينفعش اسيبكم في وقت زي داه من غير راجل تتلطموا في الموصلات 

نورهان هزت راسها وركبت من سكات 

وصلو ونزلت سندت مرات اخوها هي وامها وطلع وائل بيهم على المستشفى 

نورهان وهي قاعده بتتلفت في المستشفى وبتعوج بوقها يمين وشمال مش كنا خدناها على المستشفى العام بدل المصاريف اللي على الفاضي في المستشفيات الخاص 

نجاح يا اختي وانا مالي هما اللي قالوا هاتولد هنا 

وائل بكشه وش وانتي مالك انتي دفعالها حاجه من جيبك جوزها اللي دافعلها بتحشري روحك ليه ها 

نورهان فلوس اخويا وخايفة عليها كفرت يعني ولا كلمتي وقفت في الزور وعرضت 

وائل بالظبط كده بتقف في الزور عندك كلمه حلوه قوليها معندكش وهاتقولي كلام يحرق الدم يبقى ابلعيها او ادعيلها ولو اني اشك نفخ بغيظ وبعد عنها مر الوقت وولدت 

نجاح طمنيني يا دكتوره دي بقالها كتير جوه

الدكتوره بإبتسامه اطمني يا حاجه ولدت وجابت ولد زي القمر وصحته كويسه وزي الفل والأم كمان في الآفاقه وشويه وهاتتنقل اوضه 

نورهان اومال فين الواد 

الدكتوره بينضفوه وبيلبسوه وشويه وهايجيبوه 

دقايق ودخلوا على مرات اخوها

نسرين وهي في بوادر فوقان ابني ابني فين طمنوني

نجاح اطمني يا بنتي ابنك زي الفل شويه وهايجيبهولك

وائل الف مبروك وحمد الله على السلامه يا مدام نسرين

نسرين الله يبارك في حضرتك يا ابو آدم 

دخلت الممرضه بالطفل مبروك ما جالكم 

نورهان مدت ايديها وشالته 

نجاح ناويه تسميه ايه ولا ابوه اللي هايسميه 

نسرين ابوه قالي هايسميه معاذ

نورهان معاذ حلو بردوا ربنا يخلي يا حبيتي بس انا عايزه اعرف انتي كنتي بتاكلي فيه ايه يا أما داه الواد مبغل سقط دراعي من عشر دقايق شيلته فيهم دانتي لو كنتي بتوكليه علف وهو في بطنك مهايطلعش زي البغل كده داه مش شكل عيل لسه مولود 

وائل اعوذ بالله من الشيطان الرجيم 

مد ايده وشال الطفل بسم الله الرحمن الرحيم وبصلها بغيظ محدش قالك شيليه وحطه على السرير جمب نسرين مبروك ما جالك يا ام معاذ شد ايد نورهان بغل بالاذن منكم طلع بيها بره الاوضه اعوذ بالله من سم لسانك يا شيخه إيه الناس تقول مبروك وانتي تقولي بغل عمال اقولك عندك كلمه حلوه قوليها معندكيش يبقى تتكمتي وترحمي الناس مش شرك انتي ايه يا شيخه إيه أنا تعبت وقرفت منك

نورهان انتا اللي في ايه بتزعقلي ليه 

وائل بزعق من شرك اللي ماشي يلطش يمين وشمال بزعق من سم لسانك اللي محدش سالم منه انتي مالك كنتي بتاكليها من جيبك داه ايه القرف اللي انتي فيه داه يا شيخه قرفتيني 

في عز زعيقهم وصل ايمن بلهفه في ايه يا جماعه طمنوني

وائل ابتسم برغم غيظه من مراته اطمن مبروك ما جالك يا ابو معاذ 

ايمن ابتسم بفرحه اللهم لك الحمد والشكر سابهم ودخل بفرحه قرب من سرير مراته وسمى الله وشال الطفل وكبر واذنله الممرضه دخلت 

هاغير المحلول للمدام

ايمن بعد شويه ولما خلصت طلع مبلغ من جيبه ومد ايده بيها داه حلاوه معاذ 

الممرضه ابتسمت وخدته ومشيت 

الكل اتجمع في الاوضه

دخلت الدكتوره تطمن عليها من أثر البنج

ايمن طمنيني يا دكتوره هي كويسه

الدكتوره اه هي تمام 

ايمن طيب هي هتبات ولا ينفع تروح

الدكتوره لا مادام اتحركت وكل حاجه تمام تقدر تروح عادي مع الراحه التامه طبعا 

وائل طيب كويس وانا موجود اهو. هاروحكم

ايمن هاتروح الجيش داه كله ازاي يا راجل حرام عليك داحنا كده عايزين عربيه نص نقل انتا مش شايف العدد 

وائل يا عم قول ماشاء الله بص يا عم انا هاخد حماتي ومراتي وأم معاذ معايا وانتوا بقى كرجاله اتصرفوا بدل ما تبهدلوا الحريم معاكم بالليل وخصوصا ان في ست والده ومحتاجه راحه وسواقه على الهادي 

ايمن بتقدير تسلم يا ابو انس كلك واجب وزوق من يومك رجوله يا جدع 

وائل عيب يا ابو معاذ إحنا اخوات وأصحاب قبل ما نكون نسايب 

سندت نجاح ونورهان نسرين وأيمن شال ابنه في حضنه 

وروحوا اخيرا البيت 

نسرين بقولك ايه يا ايمن متاخد الواد ينوبك ثواب توديه لدكتور يطمن عليه بردوا

ايمن ليه هما في المستشفى ما كشفش عليه دكتور اطفال ده انا حاجزلك في اكبر مستشفى في البلد.

نسرين لا كشف عليه الدكتور وقال زي الفل وكل حاجه بس بردو نطمن عليه وما تنساش انك بكره الصبح هتاخده عشان التطعيم عشان ياخدوا البذل من كعب رجله برده نبقى مطمنين ما فيهاش حاجه يعني

ايمن حاضر يا ستي ريحي انتي وانا بكره هاوديه التطعيم واعدي بيه على دكتور اطفال اكون شوفت احسن دكتور النهارده واحجز له وبكره اوديه بعد التطعيم.

نسرين غمضت عينيها بارتياح وراحت في نوم عميق من المسكن اللي اخذته

تاني يوم ايمن اخذ الولد وراح طعمه وغدى بيه على الدكتور عمل له تشيك كامل وطمنه وقاله ان الولد زي الفل وما فيهوش اي حاجه وصحته تمام التمام ووزنه كمان مناسب خده ورجع البيت مر يوم بسلام وخير والكل فرحان بقدوم الحفيد اللي مالا عليهم البيت 

وتاني يوم الولد عمال يصرخ ويعيط بطريقه غير طبيعيه 

نسرين بخوف يا حماتي الواد فيه حاجه ده عمال يصرخ وعلى لبه واحده من بالليل ده ما نامش لحد دلوقتي ولا اغمضله جفن 

نجاح يا بت ما يبقاش قلبك خرع العيال الصغيره كده هي في اولها بتفضل تنام طول النهار وتصحى طول الليل تقوم تصرخ وتنام تصرخ 

نسرين طيب نوديه لدكتور نشوف فيها بس ونطمن اللي فيه الواد ده مش طبيعي داه مبطلش عياط وصراخ لما قلبه وجعه 

نورهان بلاويه وش يا اختي وعلى ايه 

المصاريف مكفكش اللي صرفتيه ده كله ماكفكش عشره آلاف جنيه اتدفعوا للمستشفى اللي ولدتي فيها يا معدوله طبعا وانتى غرمانه حاجه ما هي فلوس بتتقطع من لحم الحي يا حبيبتي وانت قاعده مكانك لا شغله ولا عامله بتاكلي فى اته محلوله 

ايمن بزعيق وانتي مالك اما تيجي تديها حاجه من جيبك تبقى تتكلمي 

نجاح بمحايله عشان تلم الموقف يا حبيبي اهدى بس ما فيش حاجه هي العيال الصغيره كلها كده تلاقي بس عنده مغص ولا مراتك مكرعتشهوش بعد ما رضعته وبطنه فيها هوا هو اللي واجعه 

ايمن بخوف وهو باصص على ابنه يا امي صراخ الواد مهواش طبيعي 

نجاح باطمئنان يا اخويا ما تقلقش ده انا مربياكم سته 

ايمن قاعد مكانه بقله حيله وهو بيضرب كف بكف لا اله الا الله 

نجاح قامت انا قايمه اغلي له شويه كراويه يهدوا بطنه وانت يا حبيبتي اقلبيها على بطنه وطبطبي على ظهره عشان يتكرع ويطلع الهوا اللي فيها مهو ميصرخش كده الا من المغص هيرتاح ويهدى وينام 

ااكل بص لبعضه بقله حيله واستسلم لكلام نجاح ثلاث ايام مروا ومعاذ على صرخه واحده ما فصلش من العياط

نسرين بعياط ابوس ايدك يا ايمن والنبي لاجل حبيبك النبي خلينا نروح نطمن على الواد ده الواد يا ولداه 

بقاله اربع ايام اللي على حامي ولا على بارد مغمضلوش جفن وعلى صرخه واحده واللي بياخدوا بيجيبه

ايمن والله عندك حق وانتي بنا قومي البسي خلينا ناخد الواد ونوديه للدكتور نطمن ونشوف فيه ايه.

وهم بيلبسوا الواد صرخ صرخه شديده وبعدها ما نطقش تاني

نسرين يالهووي شكل الواد اغمى عليها شهل يا ايمن بسرعه انا مش هستني ولا هاسمع كلام حد تاني انا ادري التاس بإبني وقلبي بيقولي ان الواد فيه حاجه 

لبسوا الاتنين بسرعه وخدوا ابنهم وطلعوا جري على اول دكتور قابلهم

دخل ايمن ونسرين بلهفه 

الدكتور خد الولد وأقل من دقيقه بصلهم بصدمه البقاء لله 

كلمه اتقالت شقت قلب اب وام لسه يادوب بيفرحوا بإبنهم 

نسرين بصراخ وحرقه منها لله اختك حسبي الله ونعم الوكيل فيها هي اللي فضلت ماسكه الواد على لسانها وكل ما تبص في وشه تقولي انتي كنتي بتعلفيه كملت بسرعه ادينا اهو بدل ما بعلفه وبقيت بكفنه يااااارب الصبر من عندك يارب الهي يعميكي يا نورهان يا بنت نجاح ربنا يحسرها على نظرها ده عيل لسه رغاوي لبن فضلت حطاه في بقها يارب يرضى مين بعد تسع شهور حمل ووجع ولاد اقوم وحجري فاضي 

فضلت نسرين تصرخ بوجع وحرقه وهيستريا محدش بقى قادر يسيطر عليها 

ايمن واقف مكانه متسمر وعينه على ابنه ودموعه نازله بحرقه وبقى عاجز ومش قادر يتحرك كل كلمه اخته قالتها لسه بترن تاني في ودنه من اول وجديد نزل على ركبه على الارض وهو بيبص لابنه بحور او قرب حط راسه على صدر ابنه يمكن يحس بنفسه او يسمع دقات قلبه لكن محسش باي حاجه ولا سمع اي حاجه وقتها اتاكد انه خلاص خسر ابنه 

شال ابنه في حضنه ومتبيت عليه وماشي بخطوات زي اللي تايه في الدنيا مش عارف رجليه واخداه لفين وزراه مراته حالتها ما تقلش عنه محسش الا وهو واقف قدام باب بيت اهله ضم ابن الحضن قوي ودخل ومراته وراه كانها مش حاسه بالدنيا ولا حاسه باي حاجه خالص 

نورهان بلاويه وش وتهكم وسخريه ايه يا اخويا طمنا رحتوا وصرفتوا القرشانات قال لكم الدكتور اللي كنتوا مستعجلين واخدين الطريق في رجلكم جاري ما هو الواد نايم اهو مش سامعين له جعوره ليه ولا هو ما بيجيش الا على الصرف 

ايمن رفع عينيه في اخته وكانت نظرته تغني عن اي كلام وكمل ودموع نازله على وشه بحرقه اه هو نام بس نام ومش هيقوم كمل بحصره ارتاحتي ارتاحتي يا نورهان جبتي اجل ابني فضلتي حطاه في بوقك مبغل ولدتي في مستشفى ودفعتي قد كده بتاكلي من اته محلوله بتجيبوله بتودوله بيتكلم وهو بيلف حوالين نفسه وابنه في حضنه زي المجنون 

ووقف مره واحده في نص الصاله بعلو صوته بحرقه ابني مااااااااات 

وقرب من نورهان بكره وشر ابني مات بسببك 

نجاح بصتلهم بصدمه ودموعها نزلت بحرقه على حفيدها وحست لاول مره بغلطها وغلط بنتها وذاقت كأس وجع ومراراه الفقدان والخسارة ولكن بعد فوات الأوان قامت منطوره بزعيق متفولش على الواد تف من بقك تلاقيه بس نايم ده الدكتور حمار ما بيفهمش ايوه ايوه هو نايم.

ايمن هز راسه بحرقه ايوه ما هو الدكتور قالي نايم بس نام نام النوم الابديه النومه اللي ممنهاش قومه ارتحت يا امي دلوقتي ارتحت وبريده نارك انتي وبنتك فضلتي تقويها في الشر فضلتوا قاعدين قدام الباب على الارصفه للناس تقر دي جابت ودي عملت ومحدش سلم من شركم واذاكم

فضلتي تتريق على الناس وعلى وجعها

فضلتي تعدي على الناس خيرها وما تعرفيش هو جاي ازاي ولا رايح فين كنت بتستكثر على الناس فرحتهم وضحكتهم ولقمتهم ورزقهم لحد ما ما اخذتوني انا ومراتي وابني في الرجلين معاكم  

بصلهم لاول مره بكره وكانه شايف شياطين قدامه من النهارده انسى ان لكم ابن وانتي انسي ان ليكي اخ اعتبروني مت مع موت ابني 

خدت بعضه وهو شايل ابنه ومراته وطلع شقته فوق فضلو باصين على ابنهم بحرقه 

نجاح بصت لنورهان بغل انتي تحسدي الناس بره اه اقول وماله نفسها تبقى زيهم واتمني تبقى احسن منهم انما وصل بيكي الغل الحقد انك تحسدي وتقري على ابن اخوكي لحد ما تجيبي أجله يبقى لاء اقفلك واعرفك حدك ومقامك 

نورهان وانا كنت عملت ايه يعني هو انا كنت قباض الارواح ولا ايه 

نجاح وهي بتشدها من هدومها لاء علمتي من ساعه ما عينك اللي يندب فيها رصاصه جات على الواد وانتي فضلتي تغلي في قلبك لما جبتي أجله غوري غوري من وشي معدتش عايزه اشوف وشك تاني قدامي غوري منك لله ربنا يكفيني شر سم عنيكي

طلعت نورهان وهي شايطه من الغيظ

طلع ايمن اشترى كفن صغير لابنه رجع البيت وهو زي لسه على حالته زي التايه غسل ابنه ورفض ان ابوه اواخواته او اي حد من اهله يروح معاه وهو بيدفنه 

وائل عرف الخبر وجه جريء واصر يروح معاه المدافن وهو بيدفنه

خلصوا دفن الولد ورجع البيت قفل عليه شقته ورفض انه يستقبل اي حد او يسمع اي حاجه مرت الايام وايمن اخذ شقه بره ونقل فيها كل عفشه واستقر بعيد تماما عن بيت اهله

وائل حسن ان الموضوع فيه حاجه والكل بيخبي سال نورهان قالت ما اعرفش ابنه تعب ومات وسال حماته قالت نفس الكلام والكل بيبكي بحرقه معادا نورهان كانت بتتعامل ببرود

اصر يعرف الموضوع فيه ايه خد بعضه وراح لشقه ايمن واصر يقابله.

طلع ايمن وهو مكسور من الحزن ودقنه طويله 

وائل حاول يرتب كلامه البقاء لله ربنا يصبر قلبك و يعوضك عنه خير ملاك في الجنه قفل عنك باب من ابواب النار

ايمن هز راسه ونعم بالله عارف بس الفراق صعب قوي يا وائل

وائل عارف والله بس قول الحمد لله قدر الله وما شاء فعل

ايمن بصله وفهمه من نظره شكلك عايز تقول حاجه قول على طول لان انا لحمل لف ولا دوران واديك شايف حالتي وحاله مراتي من يوم اللي حصل 

وائل بصراحه اه انا عايز اعرف ايه اللي حصل بينك وبين امك وبين نورهان وخلاتك رفضت ان حد منهم يروح معاك وانت بتدفن وبعدها على طول تاخد شقه وتنقل فيها بعيد عنهم

ولا بتزورهم ولا سمحت انهم يجوا حتى يزورك ولا يطمنوا عليك

ايمن بصلي بوجع الدنيا في عينيه خد بالك من نفسك يا وائل ومن عيالك 

وائل بقلق هو في ايه اختك فيها حاجه وانتم مخبيين عني ومش عايزيني اعرفها 

ايمن بص له بحرقه اه فيها فيها حاجات كتير قوي فيها شر يكفي ويفيض فيها غل يحرق الأخضر واليابس فيها سم عنيها اللي لو أتمكن من جبل يجيبه تراب على الارض 

بقولهالك اهو نورهان شر يا وائل

وائل بخوف فيه ايه انت قلقتني ما تقول على طول 

ايمن بحرقه نورهان هي السبب في موت ابني حسدت ابني يا وائل موتت عيل لسه في اللفه عينها جابت اجل ابني

قهرت قلبي انا وامه على ضنايا عرفت في ايه ولا لسه عايز تعرف تاني 

وائل طلع وهو مذهول والخوف والقلق بقى بيسيطر عليه يوم هن يوم وشهر عن شهر بيتملك منه

يتبع

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة