قراءة رواية عين الحسود  كاملة

تنشر حصريًا على مدونة رواية وحكاية قبل أي منصة أخرى

مرت شهور وشهور ونورهان منبوذه من الكل محدش راضي يتعامل معاها والكل اصبح خايف منها وبيتجنبها تماما 

راحت تزور امها 

نورهان سا الخير يا أما 

نجاح بقلبه وش ومنين هيجي الخير يا غراب البين جايه وجايه تنعقي على مين ثاني وهتجيبي اجله في وشك

نورهان بغيظ الله في ايه يا اما انتي كل حاجه تحطيها على راسي وانا كان مالي ومالها يعني ما هي اللي مهمله ما كانتش عارفه ابنها فيه ايه هو كل حاجه تحصل تجروا وتيجوا تكبوها في حجري انا ولا انا الجحش القصير بتاعكم

نجاح يا اختي نجاحش قصير ولا جحش كبير عايزه ايه يا نورهان بدخلتك اللي بقت عامله زي دخله المصيبه علينا 

نورهان بدموع تماسيح بقى كده يا اما انا الحق عليا قلت اجي اشق واشقر واطمن عليكي

نجاح وهي بتقوم بخنقه لا فيك الخير يا حبيبتي اطمني روحي على بيتك اطمني فيه هناك ولو عايزه حاجه ابقى رن عليا على التليفون يلا مش فاضيالك

نورهان يوه هو انا كنت عملت ايه فيه ايه فيه ايه يا اما للاسلوب ده

نجاح زعقتلها بشر عملك اسود ومهبب شبه خلقتك العكره بقى مش عارفه عملتي ايه يا بت ده انتي خدتي في وشك ابن اخوك الله يرحمه ويحسن اليه ويبرد قلبه قادر يا كريم واخوكي واهو طفش جايه ليه الساعدي اللا انا وكتاب الله مطايقه نفسي ولا طايقاك 

نورهان بصيت لها بغل وغيظ وسابتها ومشيت وهي بتحرق في روحها

روحت البيت وهي نارها بشرارها مسكت التليفون ترن على اصحابها تتكلم معاهم رنت على سميه لقيتها عامله لها بلوك قفلت المكالمه ورنت على هدى لقيتها عاملالها بلوك 

نفخت بغيظ وطلعت رقم صابرين ورنت علىها لقيتها عاملالها بلوك

نفخت بغيظ فيه ايه تليفوناتهم كلهم باظت ولا اولاد الكلب عامليني انا بلوك طب ماشي اصبروا عليا الصبر طيب يا اولاد الهرمه

قعدة بغيظ تهري وتنكت في روحها لا ما انا مش هقعد اكل كده في روحي اما انزل اقعد مع حماتي شويه هتاخد بحسي بدل ما انا قاعده زي قرد قطع في الشقه 

حطه الطرحه على راسها ونزلت سا الخير ازيك يا ماما عامله ايه

ام وائل الحمد لله

نورهان انا لقيت نفسي فاضيه قلت ان انزل اقعد اتونس معاكي شويه ولو في حاجه عايزه اقضيهالك اعملهالك من عيني 

ام وائل تسلمي يا حبيبتي والله بس يا كان على عيني والله اقعد معاكي دانا انا رايحه للبنت رشا اللا هي تعبانه وانا كنت لسه يادوب قايمه اللبس بالاذن منك يا حبيبتي البيت بيتك منتيش غريبه وسابتها وقامت تلبس هدومها بسرعه زي اللي لدعها عقرب

نورهان بصت لها بغيظ وطلعت وهي بتسكع بخطواتها على السلم ودخلت ورزعت باب الشقه وراها وقعدت تحرق في نفسها

مرت الايام وهي على نفس حالتها منبوذه من كل الناس 

كانت لابسه ونازله رايحه السوق تجيب طلبات للبيت وقبلت رشا وهي داخله عند امها 

نورهان رشا ازيك يا بت ما حدش بيشوفك ما عدتيش بتطلعي عندي ليه لما بتيجي تشقي على امك

رشا بخنقه وضيق معلش والله يا نورهان مشاغل ده انا بدخل يا دوبك اطل على امي عشر دقائق صد رد ان شاء الله المره الجايه اخذ بس اذن جوزي وابقى اجي اقعد معاكي باذن الله بمشيئه المولى ما تقاطعيش انتي بس وقولي يا رب

نورهان يا رب يا حبيبتي طمنيني ابنك عامل ايه دلوقتي كويس 

رشا عيان يا حبه عيني وراقد والله داه كانت حرارته أربعين وكان راقد بيفرفر والبنت جالها التهاب رئوي وانا والله يا حبيبتي ولا لك عليا يمين كان عندي دور برد كان مرقدني متكسحه ولا قادره اشيل ايد ولا رجل 

يلا بالاذن منك يا حبيبتي الاحق اطل على امي وارجع صد رد اصل انا ما قلتش لجوزي كنت معديه قلت اطل عليها وانت عارفه وليه كبيره وتعبانه وسابتها ودخلت بسرعه على امها

نورهان بصيت لها بغيظ وراحت السوق وهي النار قايده فيها اكتر من الاول 

روحت البيت وبصت لقيت لاول مره من سنين شقه حماتها مقفوله مش مفتوحه زي العاده 

طلعت شقتها وهي مش طايقه نفسها بدات تجهز الغداء وهي بترزع وتخبط في الحلل وفي كل حاجه بتقابلها وكانها بتخانق في دبان وشها فضلت تغل في روحها وعايزه تطلع غيظها في اي حد ما لقيتش قدامها الا وائل لقيته قاعد بيلعب على التليفون

زعقت بصوت عالي هو فيه ايه يا وائل طول اليوم بره طفشان طفشان ولو جيت ماسك المدعوق اللي في ايدك دي ما بقتش عيشه دي

وائل بص لها ببرود وخنقه والله مش عاجبك العيشه هنا بيت ابوكي مفتوح والباب وراكي يفوت جملين مش جمال واحد

نورهان حطت ايديها في وسطها واتخسرت ااااه قول بقى انك 

شايفلك شوفه تانيه ولا لايف على جرمه غثىي وطلعت رمرام وبصباص وعينك زايغه 

وائل بمنتهى البرود وهو باصص على التليفون والله عايزه تعتبريها كده براحتك 

نورهان بزعيق قصدك ايه ما بتردش عليا ليه وحاطط عينك في المدعوق اللي الالهي يندعق اللي في ايدك ده ليه رد عليا وكلمني زي ما بكلمك

وائل قام من مكانه انا غاير من وشك وسايبهالك مخدره يارب تشبعي بيها خليني انفد بجلدي بدل ما تقصفي اجلي انا كمان 

وسابها ونزل فضلت تكز على اسنانها بغيظ من تصرفات كل اللي حواليها معاها في الوقت اللي ولادها كانوا بيلعبوا فيه وبيتشاقوا عمالين يتنططوا وصوتهم علي وآدم قطع ورق وبيرميه على اخوه 

نورهان فشت خلقها في عيالها ومسكتهم ضرب وزعيق بصوت عالي بتقطع ايه يا ابن الكلب ما انا اصلي خدامه بيت ابوك طبعا وانت هامم اهلك ايه ما انت قاعد بتاكل وترعى في اته محلوله والجاموسه اللي ابوك جابهالكم هنا بتجري يمين وشمال وتجبد من شرق وغرب ومن هنا وهنا علشان تتبتب لكم وتجيبلكم فارق معاكم ايه الاسم متجوزه وفي الحقيقه متمرمطه كل واحد يجي وينتش من نورهان حته ويجي في الاخر يقولك كاني وماني كل اللي يجراله حاجه يجي يرميها على قفا نورهان ما هي نورهان الحيطه القصيره بتاعتكم الشماعه اللي الكل عمال يعلق عليها اخطائه ومصايبه من اول البيه ابوك اللي كان عايزني خدامه لامه تحت وخدامه ليه فوق 

ويا ريت بعد ده كله عاجب فيه ايه كان وزعوا الحظوظ وعطا لكل واحد منابه وجاه لحد عندي واتكسح وعرج ما هي الستات اهي متجوزه وعايشه ومتدلعه ومتبغدده وانا اللي متمرمطه ومتبهدله صحيح ما هو ادا الحظوظ لمكتكتين الروس صابرين السوداء الجربه متجوزه جوازه الهنا ونداء الكركوبه العرجه متجوزه جوازه المنى

وسميه اللي لا ليها لا طول ولا عرض وعامله زي زكيبة القطن جوزها شايلها من على الارض شيل وتقى المقشه اللي الفلق في رجلها طوله متر جوزها هياخدها معاه السعوديه ويجرها هو والعيال وتعيش وتتبغدد وترتاح وهدى اللي عامله زي خله السنان عامله زي المومياء المتصبره اللي طالعه من تابوت امها جابت لها الحلو كله وتقولها عيني اليمين زاد وعيني الشمال ميه مش زي امي اللي ما صدقت رامتني ورمت طوبتي ولا بتسال ولا بتكلمني واما اروح لها قالبه وشها صحيح ما هو وزع الهموم وطلع الكبير منابي وكومي 

العيال بصوا لها وكشوا في بعضه بخوف ودموعهم نزلت من حاله امهم وصوتها العالي وزعيقها اللي سمع الشارع كله والكل بره سامع صوتها وزعيقها والغل اللي مدفون جواها طلع في لحظات غضبها 

نورهان رفعت وشها للسما وداعت روح يا بعيد الهي يبتليك بسرطان يسحسح ويلم في جسمك قولتها النهارده ادفنك زي النهارده ما تطلع عليك بعديها شمس ولا تطل 

فضلت تدعي بصراخ وزعيق وقله ادب 

حماتها طلعت بزعق يا بنتي حرام عليك فيها ايه فرجتي علينا الناس وشرق وغرب سمع صوتنا كملت بحرقه قلنالك المره اللي فاتت لمي لسانك وبطلي دعا انتي ايه شيطانك سايقك مش هترتاحي ولا تهدي ولا تتهدي الا لما تجيبي اجل حد من العيال 

نورهان بيزعق وصوت عالي انتي مالك عيالي وانا حره فيهم اقطعهم اشرحهم اقروشهم اروح ابيعهم اعضاء انا حره خليكي في عيالك حليت دلوقتي نورهان ما انا كنت بنزلك بتسكي بابك في وشي وتقوليلي انا تعبانه انا عيانه انا مرضانه انا رايحه عند بنتي ولا هو لما غار على المقبره دلوقتي بقى سكره خليكي في نفسك وخليكي قافله باب بيتك تحت طالعالي ليه 

ام وائل بصت لها بقله حيله وبصت للعيال تعالى يا حبيبي تعالى يا انس تعالى يا ادم سيب امكم ربنا يهديلها حالها يا ابني ويقويها على شيطانها تعالي يا حبيبي اقعد مع ستك تحت 

وخدت العيال ونزلت وسابت نورهان تحرق بغيظ وتغل في نفسها

خدت العيال وفضلت قاعده مستنيه ابنها لحد ما جاه

وائل بص للعيال باستغراب في ايه يا امي العيال بيعملوا ايه هنا تحت السعادي

ام وائل بص يا ابني انا يعز عليا ان انا اقولك كده بس مراتك بقت لا تطاق دي ماسكه العيال ليها كام يوم دعا دعا والله يا ابني قلبي بقى بيوجعني كل ما اسمعها 

وائل بص لها بذهول وقرب منها وبص لعياله وهمس لها في ايه يا امي عملت او قالت ايه اللي عمل فيكي كده ويخليكي تاخدي العيال قبل وقت زي داه 

ام وائل بصعبانيه والله يا ابني ليها كم يوم عماله تدعي على العيال دعا وحش وكل ما تكلمهم تقولهم الهي يجيكم سرطان الهي يجيكم الوحش ودعا يا ابني من اللي يسقط جريد النخل 

يا ابني ليه يا ابني حرام عليكم العيال دي المره اللي فاتت ربك سترها ومش كل مره تسلم الجره يا ضنايا مراتك مش هترتاح ولا يهدالها بال الا لما تجيب اجل عيل منهم 

وائل بهم طيب اعمل معاها ايه يا امي ما هو على يدك سايب لها البيت وطفشان من وشها ومن كلامها اللي زي السم

ام وائل لا يا ابني انا لو فضل المرير على مريره انا هاخد بعضي واروح اقعد عند بنتي وهي جوزها مش هيقول لا انما مش هفضل قاعده في وجع القلب ده ده انا قلبي بيتقبض كل ما مراتك تقعد تدعي على عيل من العيال شوفلك حل معاها يا ابني انا عمري ما ساعيت لخرب البيوت ولا بحبه بس اللي بيحصل ده حرام انا بقيت قاعده على اعصابي يا ابني مش هستنى اما يتحرق قلبي على عيل تاني كفايه بقى حرام عليكم ذنب العيال دي ايه بهدلتوهم ومرمطوهم وسطيكم  

وائل بعصبيه ماشي يا امي اهدي انتي بس وانا ليا كلام تاني معاها 

وائل بص لعياله انس ادم اسبقوني على فوق وانا جاي وراكم على طول يا حبيبي 

العيال بص لابوهم بطاعه وطلعوا بسرعه جري على شقتهم 

ام وائل هتعمل معاها ايه يا ابني انا تعبت والله يا ابني وكيلي طفح منها الناس بقت كل يوم بتسمع صوتنا قاديلنا على الحال ده لينا كام اسبوع اهو

وائل وهو باصص قدامه بغيظ هتكلم معاها واشوف اخرها ايه وبتعمل ده كله ليه منا لازم احط ليها حد مش هافضل في وجع القلب وحرقه الاعصاب دي كتير

ام وائل حطت ايدها على راسها بتعب

ربنا يهدي سرك يا ابني مهقولش غير كده 

ساب امه وطلع فوق يتكلم مع مراته 

قبل ما يفتح الباب سمع صوت صراخ العيال من جوه فتح الباب بلهفه ودخل جري لقي نورهان ماسكه العيال ونازله فيهم ضرب بالخرطوم

زقها بحده وقعها على الارض وزعق بصوت عالي انتي اتهبلتي انتي اتجننتي انت عايزه ايه بالظبط انت حكايتك ايه بالظبط ونظامك ايه فهميني عشان انا جبت اخري انتي عايزه توصلي لايه بكل اللي عماله تعمليه داه 

نورهان بزعيق فيه ايه جاي وفارد قلوعك عليا ليه

وائل بيزعق وصوت اعلى انا افرد قلوعي براحتي زي ما انا عايز ده بيتي واقول واعمل ما بدالي فيه ده مش بيت ابوكي ده بيتي انا لو عايزه تفردي قلوعك روحي بيت ابوكي هناك مش هنا ده اتقبلوكي وطاقوكي او دخلوكي اساسا البيت يا شيخه ده انا ليا الجنه ان انا متحملك ومتحمل قرفك ده انتي كبني ادمه لا تتطاقي ولا تتعاشري حاشره عينك في حياه ده وحياه ده وحياه ده وتحسدي ده وتقري على ده وتحقدي دي على ده وتجيبي اجل ده وباصه لداه وداه وداه بصه في حياه كل الناس الا حياتك عمرك في يوم بصيتي وركزتي في حياتك زي ما انت باصه ومركزه على اقل تفاصيل حياه غيرك يا شيخه ده انا نفسي مره الاقيك بصه ومركزه في حياتك انتي بس نفسي مره من نفسك بس ترضي وتقولي كلمه الحمد لله نفسي اسمعها من بوقك نفسي ترضي طول عشرتي معاكي تمن سنين عمري ما سمعتها من بوقك عارفه ليه عشان عمرك ما رضيتي بحياتك وعايزه حياه غيرك ولو ملكتي حياه غيرك هتعوزي اللي اعلى منها لان اللي زيك اكاله نكاره 

نورهان بزعيق انا انا بعد صبري عليك وعلى فقرك جاي تقولي الكلمتين دول

وائل ايوه بقولك انتي الكلمتين دول واسمعي بقى اخر ما عندي يا تعيشي هنا بما يرضي الله وعلى قد اللي معايا وتقولي الحمد لله يا اما زي ما دخلنا بالمعروف نخرج بالمعروف دي 

مابقتش عيشه ده انا مابقتش طايق البيت بسببك ده انا بقيت خايف على نفسي وعلى عيالي منك شوفي وصلتي الحياه بينا لايه 

نورهان بصيت له بصدمه وسكتت

ماقدرتش تنطق

وائل بص لها وبص لعياله يلا يا عيال اسبقوني على تحت وانا نازل معاكم عند جدتكم 

وخد عياله ونزل وسكع الباب وراه

نورهان بصت على الباب قدامها بصدمه قامت وهي مصدومه من كل اللي سمعته من جوزها مسكت التليفون واتصلت على امها تشكيلها ما ردتش فضلت ترن مره ورا مره ورا مره والتليفون بيفصل وامها مابتردش رمت التليفون على طول ذراعها وفضلت تصرخ بجنون 

وائل نزل تحت وقعد هو وعياله وبيت اربعه ايام ما طلعش شقته خالص وساب نورهان فوق عماله تغل وتحرق في روحها 

وائل خد باله ان خلال الايام اللي فاتت ابنه راقد تعبان ومهمد 

قرب منه بحب مالك يا دومي راقد كده ليه 

ادم بتعب مش عارف يا بابا جسمي كله واجعني

وائل وهو بيطبطب عليه سلامتك يا حبيبي مالك

ام وائل داه تلاقيه دور برد روح هاتله مضاد حيوي من الصيدليه وهو هيقوم ويبقى زي الحصان 

وائل وقف على السلم ونادا بصوت عالي يا نورهان انزلي عايزك 

نزلت وهي مش طايقاه وقفت على السلم بصوت عالي خير في ايه لسه فاكر ان ليك ست فوق 

وائل معبرهاش ابنك بياخد مضاد حيوي نوع معين

نورهان بلويه شفايف ليه كان جاله سل ولا جاله سرطان 

وائل زقها من وشها بقرف طب غوري من وشي يا نورهان علشان انا اقسم بالله على تكه وهارمي عليكي يمين الطلاق 

نورهان بصتلهم بغيظ وطلعت وسكعت باب شقتها وصوته سمع لفوق 

طلع وهي بيحاول يتمالك اعصابه وراح الصيدليه 

وائل لو سمحت ابني تعبان ومهمد 

الصيدلي في سخونه

وائل لاء 

الصيدلي تمام داه مضاد حيوي وداه علاج للبرد هياخده كل 12 ساعه

وائل اخده وبداء يدي العلاج لابنه ولكن مفيش اي تحسن خالص وكل يوم من سوء لاسواء 

وائل لامه: لاء الواد مبيتحسنش انا هاخده اوديه للدكتور 

ام وائل وانا بردوا شايفه كده طيب مش هاتقول لأمه 

وائل امه مين الله يكرمك دي بقالها اكتر من اسبوع داخله في عشر ايام مسالتش على عيالها اسكتي والنبي يا امي 

ام وائل بصت له بقله حيله وسكتت

شال ابنه واخده وطلع على المستشفى

الدكتور خدوا كشف عليه وطلب اشاعات وتحاليل كثير جدا طلع وائل وهو مش فاهم حاجه من مركز اشاعه لمعمل تحاليل خلص وروح بإبنه مر اليوم بخوف وقلق على وائل اللي مغمضلهوش جفن وثاني يوم راح استلم الاشاعه والتحاليل واخذ ابنه ورجع للدكتور تاني في المستشفى 

الدكتور بعد ما بص على الاشاعات والتحاليل اتصدم وبص لوائل بقله حيله للاسف يا فندم ابن حضرتك عنده كانسر في المراحل الاخيره وتعد حالته متاخره ازاي انت كل ده ما حسيتوش بيه

وائل بعدم استيعاب وغباء كانسر ايه يا دكتور اللي بتقول عليه الواد كان زي الفل وبيلعب وبيتنطط وما فيهوش اي حاجه كان كويس مشتكاش عشان احس او اعرف انتا اكبد مش فاهم

الدكتور بعمليه وتقدير للموقف والله يا فندم حضرتك تقدر تاخد الاشاعات والتحاليل وتعرضها على اكتر من دكتور للاسف الولد حالته متاخره جدا كل اللي قدامه ايام ان ما كانش ساعات 

وائل ماصدقش كلامه خد ابنه وخد الاشاعات وطلع على دكتور واثنين وثلاثه والكل قال نفس الكلام 

رفض انه يستسلم طلب من واحد يعرفه انه يحجز له في معهد الأورام 

محمد اخوه اصر يروح معاه ساق عربيته بجنونه طلع على المستشفى وهو في ايده الاشاعات وفي حضنه وابنه ما فارقهوش 

الدكتور قال نفس الكلام ان الولد في مرحله متاخره وللاسف ملهوش علاج كله هيبقى وجع ليها على الفاضي واللي قدامه ساعات 

وائل بجنون يعني ايه يعني ايه الكلام ده اكيد في علاج اكيد ليه حل ماحدش يقولي ان ملهوش علاج ما حدش يقولي انه هيموت اكيد ربنا مش هيحرق قلبي على ابني 

محمد طب ما تيجي يا وائل نروح مستشفي 57 بيقولوا الدكاتره البي هناك دارسين بره وفي ايديهم الشفا 

وائل ايوه ايوه يلا نروح على هناك انا مش هستنى وخد ابنه وطلع على مستشفى 57357 

دخل بجنون وابنه في حضنه الدكاتره اخذوا الولد منه ودخلوا بسرعه وهما لسه بيكشفوا عليه سمعوا صوت جهاز القلب بيدي الارم وصوت صفاره عاليه

الدكاتره اتجننوا حاولوا يعملوا انعاش للقلب بصدمات كهربائيه مره واثنين وثلاثه ولكن للاسف كان سهم الله نفذ 

الدكتوره اتلفت لوائل وميل في الارض انا اسف البقاء لله 

وائل في اللحظه دي كانه انفصل عن الواقع خد ابنه من سكات وضمه لحضنه وركب العربيه محمد اخوه حس بيه وساق هو وطول الطريق وهو ضامن ابنه لحضنه ومغطيه وكانه نايم 

محمد اخوه بصله بصعبانيه في قراره نفسه سبحان من نزل على قلبك الصبر وائل اتنهد وبصله شد حيلك 

وائل فاضل على وضعه ساكت وهو باصص قدامه وما نطقش

محمد بخوف يا وائل اتكلم انت اعمل اي حاجه ما تفضلش ساكت كده كده غلط عليك 

وائل ميل راسه وبص لجثه ابنه اللي في حضنه ورفع راسه وبص لاخوه بقهره وكلام نورهان ودعاها بيرن في أودانه زي الطبله   

رفع راسه تاني ورجع على وضعه وما نطقش تاني محمد خاف على اخوه ساق بسرعه علشان يوصلوا في اقرب وقت حس ان لما يكون الكل حواليها يقدر يهونوا عليها اكثر 

وصل البيت ونزل حاول يساعد وائل رفض وهو لسه متبت في جثه ابنه دخل عند امه وقاعد على الكنبه وابنه في حضنه ورفض انه يطلع شقته 

ام وائل بخوف وقلق من منظر ولادها الاتنين في ايه يا ابني خدت الواد من امبارح ولحد دلوقتي ما جيتوش وما حدش طمني عليه قولي الدكتور قال لكم الواد ماله فيه ايه 

هو هيبقى كويس ما هو اكيد ليه علاج يا ابني صح ما هو اخوك قال لي اللي حصل في التليفون 

وائل سمع كلامها وضم ابنه لحضنه اكتر ودموع نزلت

ام وائل يا ابني فرفط ايدك من على الواد شويه وشيل الجاكيت اللي على وشه ده عشان يتنفس 

وائل تبت على ابنه اكتر بحرقه وصوت عياطه بقى عالي 

ام وائل بصيت لهم الاتنين باستغراب وبصت لابنها محمد في ايه يا محمد اخوك ماله هو بيعيط ليه 

محمد ميل راسه في الارض الله يصبر قلبه يا امي سيبيه باللي هو فيه الله يصبره على اللي فيه 

ام وائل بدموع ورفعت ايدها في وش ابنها وشاورتله بصباعها لا لا يا ابني اوعى تقولها ودموعها نزلت وكملت بحرقه يا ضنايا يا ابني يا ولدي يا حبيبي يا ابني 

نورهان نزلت على صوت عياط وصراخ ام وائل زعقت بصوت عالي ايه فيه ايه كملت بجعير بتعددوا على مين 

وائل في اللحظه دي كانه استوعب ورجع لوعيه من تاني رقد ابنه على الكنبه وهو لسه مغطيه بالراحه وقام جاب نورهان ومن شعرها بصراخ وجنون وضرب هستيري ما حدش قدر عليه 

وائل بصراحه بيعددوا على ابنك اسمعتي فضلتي تدعي عليه بالموت والمرض اهو مات ارتحتي نارك بردت لما مات سحبها من شعرها ورماها قدام الباب قدام الناس على اللرض وبصوت عالي بره وقف قدام الباب بعلو صوت عنده انتي طالق طالق طالق وكمل بهذيان زي المجنون بصوت عالي يا ناس نورهان طالق يا ناس اسمعوها مني واشهدوا عليها نورهان طالق 

وبص لنورهان بكره وغل انت طالق طالق يا نورهان بالعشره مش بالتلاته بس فضلت تدعي عليه فضلت تقولي يجيله سرطان ابنك جاله سرطان ومات يا نورهان ما لحقتهوش مات في حضني عرفت بيعددوا على مين دلوقتي بيعددوا على ابنك اللي مات فضل يصرخ واترمي على الارض وهو بيسكع على الارض بإديه بحرقه مات وحرق قلبي وروحي معاه

محمد حاول ان هو يوقفه ويدخله جوه ماقدرش بسبب حاله الهيستريا اللي صابته 

الكل اتجمع حواليه لا اله الا الله وحد الله انا لله وانا اليه راجعون

وائل حط راسه بين رجليه وعيط زي طفل صغير تاه من امه 

الجيران كذا ست منهم قربوا من نورهان ووقفوها واحده منهم اديتها طرحه بعد ما قدروا يبعدوها عنه بصعوبه 

الخبر وصل لبيت اهل نورهان وابوها وامها واخواتها جم جريء وهم مش فاهمين في ايه كل اللي وصلهم ان في خناقه بين نورهان وجوزها في الشارع 

نجاح ضمت نورهان لحضنها وشافت منظر بنتها اللي مضروب زعقت في وائل بصوت عالي فيه ايه انت واخدها من من الشارع دي بنت رجاله وليها اهل

وائل ام منطور بصراخ خدوها وامشوا خدوها وغوروا بنتكم انا طلقتها روحوا منكم لله بليتوني بيها وبشياطينها اترمى في حضن اخوه بحرقه فضلت تدعي على ابني الاول انس وقع الموتوسيكل وكانت رجله هتتقطع لولا ستر ربنا ودلوقتي ادم ومات 

كمل بحرقه موتت ابني موتت ابني يا ناس بنتكم موتت ابني بنتكم دي شيطان وشر ماشي ياخد في وشه الناس نفض نفسه من حضن اخوه بشر وامسكها من شعرهم من حضن امها مش هتشوفي ضفر انس يا نورهان مش هتشوفوا ضفر الثاني الا على جثتي على جثتي لو لمحتيه ولا شفتيه

اهلها خدوها وروحوا البيت وهي دخلت في حاله صوت وصراخ هيستيري تلطم على وشها وتصوت ابني انا عايزه ابني هاتوا لي ابني 

ايمن نزل ضرب فيها وهو بيزعق ويصرخ فيها دلوقتي بتصوتي وبتعيطي بتعيطي على ايه و ليه  

بتعيطي على ابنك اللي مات افتكري كل عيل مات في حضن ابوه وامه بسببك فضلتي تغلي وتحقدي وتحسدي وتقري وكان لازم تلف الايام وتشربي من نفس الكاس ما انتي لازم تنكوي بالنار وتجربيها يا نورهان ما هو طباخ السم لازم يدوقه وادي نصيبك فيه اخدتي طبق سم محترم زي ما سميتي حياه الناس كلها خليكي بقى كده مرميه في اوضتك تنكوي بنارك وبقهرتك لوحدك اقعدي بقى كده يا نورهان وجربي كويت وقهره الضانا بتبقى عامله ازاي 

سابها وطلع وهي فضلت تكمل صراخ ولطم عند وائل غسل ابنه بايديه وكفينه وهو حرفيا دموعه ما وقفتش حس ان هو بيغسله بدموعه مش بالميه واخيرا ودعه في مثواه الاخير وحاول انه يتمالك نفسه عشان يقدر يكمل مسيرته مع انس 

اما نورهان فضلت قاعده في اوضتها من بوزه من الكل والكل خايف ومشمئز منها خي وامها كانهم جربا اهلها واصحابهها جيرانها

نورهان بزعيق في ابوها انا هرفع قضيه واخد ابني انا امه انا اولى بيه يعوضني عن حرقتي في ضنايا اللي راح

ابوها بشخطه ولا هسمحلك يا نورهان ويوم ما تفكري تعمليها انا اللي هقف في المحكمه قدام القاضي وهقول له انك بني ادمه غير سويه وغير مسؤوله وهشهد مع جوزك ضدك علشان اللي زيك لازم تحصد زرعتها وانت زرعتي شوك في حياه كل الناس فكان لازم تزوقي الوجع منه انتي كمان 

ايمن وانا كمان معاك يا بابا اقسم بالله يا نورهان زي ما حرقتي قلبي بسم عينيك على ضنايا خليكي كده مكويه بفراق واحد مات وفراق الثاني اللي مش هتقدري حتى انك تلمحيه 

مرت الايام ونورهان قاعده في الاوضه قدام الشباك وهي بتفتكر كل اللي فات

وبتكلم نفسها اشمعنى انا اللي جرالي ده كله انا ماكنتش بكره حد انا كنت عايزه حياتي تبقى احسن بس انا ماكنتش بحسد حد انا كنت بتمنى ان يبقى عندي زي الناس اللي عندهم واعيش زي عيشتهم ده انا طول عمري غلبانه وفي حالي 

تمت

إلى حين نشر الفصل الجديد للكاتبة ولاء حامد، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة