قراءة رواية البطة السودا كاملة

تنشر حصريًا على مدونة رواية وحكاية قبل أي منصة أخرى

الصبح ربا صحيت واستعدت علشان تنزل ع جامعتها صبحت ع الدادة 

صباح الخير يا دادة 

الدادة 

صباح النور يا حبيبتي يلا تعالي افطري قبل ما تنزلي 

ربا 

لالا مش هلحق عندي محاضرة الساعة ٨ 

الدادة لالا هتلحقي يا حبيبتي بالعربية السواق هيوصلك علطول مفيش تاخير ان شاء الله 

ربا

مش حابة اعمل اي قلق لماما انتي شوفتي اخر مرة كنت نازلة فيها متأخرة وبجري لقيتها صحيت وفضلت تزعلقي علشان عملت دوشة وصحيتها من النوم وهي كانت لسه يادوب نايمة.. معلش يا دادا انا الفترة دي بحاول اركز ف مستقبلي ودراستي ومش عايزة مشاكل ولا اي حاجة تأثر عليها من فضلك 

الدادة 

لا من الناحية دي متقلقيش هما مش هنا اصلا 

ربا 

تقصدي مين بهما.. قصدك ماما لسه مرجعتش من برا 

الدادة 

لا كل العيلة مامتك وباباكي ومنار اختك راحوا الساحل يقضوا فترة هناك منار مزاجها وحش ومتخانقة مع صاحبها علشان كدا اخدوها تغير جو 

ربا رفعت حاجبها 

كدا من غير ما اعرف او يقولولي .. صحيح هيقولولي ليه وهما اصلا مش معتبرني فرض من العيلة دي... مم ماشي يا دادة هاتي الفطار علشان افطر وانزل ... اعمل دوشة براحتي بقا ما هو محدش هنا ف البيت 

وبالفعل قعدت تفطر وطلبت من الدادة تشاركها الفطار وجالها ف بالها فكرة فابتسمت وقالت 

دادا جه ف دماغي فكرة هقولك عليها 

الدادة 

قولي يا بنتي انا سامعاكي 

ربا 

بم ان ماما وبابا مش هنا ومحدش ف البيت غيري ايه رايك اجيب البت سماح هنا تقضي معايا يوم البت غلبانة وعمرها ما دخلت اماكن نضيفة كدا ولا قعدت فيها ايه رايك يا دادا 

الدادة 

وماله هاتيها مفيهاش حاجة بس اخاف حد من الطباخين هنا يفتوا عليكي لانغام هانم ودي لو عرفت هتبهدلك يا ربا 

ربا 

خلاص يبقى تعملي اجازة لكل اللي شغالين هنا مش عايزة غيرك اليوم دا علشان اقدر اجيبها بليز يا دادا 

الدادة بتفكير ماشي اللي تحبيه يا بنتي وانا هوصي البواب ميقولش اي حاجة لان اكيد فريد بيه هيسأله مين دخل ومين خرج 

ربا 

طب لو سألوكي مشيتي الشغالات ليه 

الدادة ايوا صح هقوله ايه 

ربا 

ممم قوليله بم ان مفيش حد منهم هنا فاحنا مش محتاجين ليهم وانا انتي بتطبخيلي اكلة بسيطة وخلاص... هتعجبهم الفكرة دي انا متأكدة هما مش مهتمين بيا اصلا 

الدادة 

ماشي يا بنتي اللي تشوفيه 

ربا قامت بفرحة تسلمي يا دادا انا همشي بقا وهكلم سماح ف الطريق اقولها 

وبالفعل اخدت شنطتها وخرجت ركبت العربية بعد ما سلمت ع السواق 

ازيك يا عم فتحي اخبارك ايه 

فتحي 

ازيك يا ست هانم صباحك هنا

ربا اتصلت بسماح اللي ردت بنوم 

ايوا 

ربا 

ايوا ايه كل دا نوم اصحي كدا عايزاكي ف حاجة مهمة 

سماح قامت بفزع 

ايه فيه ايه حد زعلك يا ربا مالك احكيلي 

ربا 

ايه مالك اتخضيتي كدا ليه لالا مفيش حاجة زعلاني كل الحكاية اني عندي ليكي خبر هيعجبك اوي 

سماح قولي ايه هو بسرعة ساكتة ليه جبتيلي عريس!! 

ربا انفجرت ف الضحك 

لا يا ستي لسه شوية ع الكلام دا انتي هتيجي تقضي اليوم معايا النهاردة هحاول اخلص محاضراتي بسرعا علشان اعدي عليكي واخدك معايا البيت نقضي اليوم سوا هناك 

سماح هرشت ف دماغها 

ها البيت لا ياختي الله الغني عن عيلتك دي لالا انا مش عايزة اجي المكان دا 

ربا 

لا لا متخافيش محدش منهم موجود اصلا اومال انا طلبت منك تيجي وتقضي اليوم سوا ازاي علشان هناخد راحتها محدش موجود يعكر صفونا 

سماح بفرحة 

قشطة يا بت مش تقولي كدا من الصبح انا هقوم ادور ع دور البسها وهستناكي يلا بسرعة خلصي محاضراتك وتعاليلي 

ربا بفرحة 

مبسوطة انك فرحانة كدا ربنا يقدرني واسعدك علطول يا قلب اختك 

وانهت ربا المكالمة وبصت قدامها وفضلت تفكر هتقضي اليوم ازاي مع سماح ف البيت 

...

اما عند عمر كان راكب ف طريقه للشغل فجاله اتصال من استاذ اشرف مسؤله ف الشغل 

الو ايوا يا استاذ اشرف خير اما متأخرتش ع معادي الساعة لسه مجتش ٨ 

اشرف 

ايوا عارف يا عمر.. انا قولتلك انك هتترقى علشان كدا بقولك هات شهادة التخرج معاك وانت جاي محتاجها 

عمر 

ما انا جايب واحدة ف السي في بتاعي 

اشرف 

لا محتاجين غيرها يا عمر السي في خلاص مش موجود معايا اتسلم خلاص انا محتاج واحدة علشان اوديها قسم الحسابات 

عمر بتفكير 

مأظنش عندي اي شهادات ينفع صورة منها 

اشرف 

لا الاصلية يا عمر ياريت تجيني النهاردة 

عمر 

طيب كدا انا هحتاج اروح الكلية اطلع واحدة تانية علشان اجيبهالك 

اشرف 

طيب روح وايه المشكلة 

عمر 

هروح ازاي وشغلي ما انا كدا هتأخر عليه 

اشرف اممم لو اتأخرت هيتحسب ليك يوم غياب بص تعالي ف معادك وبعدين اتأذن وامشي علشان تجيبها 

عمر 

تمام ماشي انا اصلا جاي ف الطريق 

وبالفعل راح عمر واثبت انه حضر اليوم دا علشان ميروحش عليه واستأذن من استاذ اشرف ومشي تاني وركب ميكروباص يوديه الجامعة 

ربا كانت بتتنقل من محاضرة للتانية بهمة ونشاط لحد ما ف البريك قابلت دكتورها اللي قال 

ربا لو فاضية تعالي المكتب عايزك 

ربا 

حاضر يا دكتور انا ف البريك فاضلي اخر محاضرة وخلاص كدا 

الدكتور تمام اوي علشان اقولك الخبر اللي قولتلك انتظريه 

راحت ربا مع الدكتور اللي قعد ع مكتبه وهي وقفت قدامه بكل احترام ووقار

الدكتور

ربا انتي طالبة نجيبة وكلك شغف للعلم وعنيكي مليانة طموح علشان كدا انا رشحتك لمسابقة على مستوى الجمهورية كلها بنختار ٣ من كل جامعة علشان يمثلوا مصر ف المسابقة وانا برشحك انتي لمدير الجامعة وان شاء الله الاختيار يرسى عليكي ايه رايك 

ربا بفرحة 

فخر ليا يا دكتور مجرد ترشيح حضرتك ليا والله دا لوحده عندي كبيرة اوي 

الدكتور انتي تستحقيها يا ربا بالتوفيق يا بنتي 

ربا شكرا لحضرتك بس ايه المطلوب مني دلوقتي 

الدكتور 

دا جواب الترشيح امليه وابدي رغبتك ف الاشتراك ف المسابقة علشان هنودي الجوابات كلها للادارة وانا والدكاترة بتوعك كلنا هنزكيكي هناك علشان تقبلي ان شاء الله... ادعي انتي بس تكون من نصيبك دي خبرة هتستفادي منها كتير 

ربا بحماس 

يارب يارب انجح يا دكتور انا متحمسة اوي حضرتك مش عندك فكرة انا فرحانة قد ايه 

الدكتور 

اكيد تستاهلي كل خير يا ربا يلا اتفضلي املي الجواب علشان تلحقي محاضراتك 

ربا 

تمام 

وبعد ما خلصت قدمته ليه ومشيت

شكرا لحضرتك عن اذنك 

وهي نازلة تحت ف الساحة وبتفكر ف المسابقة وانهم ممكن يختاروها من بين الطلبة كلها 

ياااه شعور حلو اوي يارب وفقني فيه يارب 

وهي ماشية خبطت ف حد فاعتذرت بسرعا 

اا انا اسفة اوي والله 

عمر اللي خبطت فيه من ضهره لانه كان واقف وبيخرج بطاقته علشان يصورها فوقت منه ع الارض

لا ولا يهمك بس خدي بالك 

ربا 

اسف مرة تانية والله 

عمر نزل بجسمه علشان يجيب البطاقة 

 حصل خير ..ااا بقولك تعرفي مكتبة تصوير قريبة من هنا 

ربا بتفكير 

امم اقرب واحدة هناك في قسم الاحصا على ايدك اليمين الدور التاني .. اا انا عندي محاضرة هناك اتفضل معايا اوريك المكان 

عمر

عارف قسم الاحصا انا خريج هندسة بس فيه حاجات اتختلفت كتير عن اخر مرة كنت هنا ... مكتبة التصوير كانت هنا ف المبنى دا 

ربا 

ااا لا الحقيقة انا جيت لقيتها ف قسم الاحصا .. اهلا بحضرتك نورت كليتك من جديد حضرتك هتتعين هنا معيد ؟ 

عمر 

كان فعل ماضي للاسف كنا اتنين المركز الاول اخدو ابن الدكتور وسابوني انا 

ربا حست بالاسف عليه 

معلش لعله خير يا باشمهندس محدش فينا عارف الخير فين 

عمر 

اه دا اكيد مفيش حاجة ف الدنيا بتحصل صدفة انما لحكمة لا يعلمها الا الله 

ربا ونعم بالله ربنا يوفق حضرتك يارب في حياتك وانا فخورة اني قابلت الاول على الدفعة ويارب اكون زيك ف يوم من الايام دعوات حضرتك 

عمر 

ربنا يوفقك الظاهر انك طالبة مجتهدة 

ربا 

يعني بحاول والله على قد ما اقدر .. اقدر استفيد من حضرتك بأي نصيحة كدا ع الماشي علشان مأخرش حضرتك 

عمر 

نصيحتي ليكي تحطي ربنا نصب عينك وانتي هتلاقي الفلاح والنجاح كله لو اتقيتي ربنا في كل اعمالك هيوفقك لكل حاجة حلوة 

ربا 

نصيحة غالية جدا شكرا جدا لحضرتك عن اذنك 

واتحركت ربا لمحاضرتها 

وعمر ابتسم مكانه واتحرك هو كمان علشان يصور البطاقة ويروح يجيب شهادة التخرج 

وبعد ما خلصت ربا محاضراتها خرجت من الجامعة وراحت جابت حلويات وشوكلاتات كتير وبعدين فاتت ع سماح واخدتها معاها علشان يقضوا اليوم سوا 

سماح اول ما وصلت الفيلا 

اوبا يا بت ربا ايه الجمال دا كله بس يا نهاري انت قاعدة ف مكان جميل زي دا ومكتئبة يا بت دا انا لو منك لو عملوا فيا ايه مش هزهق من هنا ابدا 

ربا تنهدت بحرقة 

مش بالمكان ابدا يا سماح لو المكان جنة وملكيش خليل فيه عمرك مت هتكوني مرتاحة صدقيني ميغركيش جمال المنظر... الفيلا رغم جمالها ووسعها الا اني ساعات بحس انها كتمت على نفسي كأنها خرم ابرة 

سماح لما لاحظت ربا متضايقة قالت بابتسامة 

ايه يا ربا انتي جايباني هزا تجوعيني ولا ايه دا انا حتى اول ما عرفت اني جاية محطتش اي حاجة ف بوءي علشان اجي اكل من أكل اولاد الزوات ولو لمرة ف حياتي 

ابتسمت ربا حالا الاكل هيكون جاهز تعالي نقعد ع السفرة 

سماح

 لا سفرة ايه وبتاع تعالي نفرش ونقعد هنا على الارض 

ربا

ليه هما اللي بيكلوا ع السفرة احسن منك تعالي بس 

سماح 

يا ربا اخاف اوسخ الدنيا انا مش عايزة ليكي المشاكل 

ربا 

يا بنتي متقوليش كدا بقا يلا تعالي يا دادا ممكن تجهزي الاكل

هنا جت الدادة ورحبت بسماح 

اهلا وسهلا نورتينا يا بنتي ربا مش بتبطل كلام عنك 

سماح 

اهلا بيكي يا ست يا طيبة ربنا بتحكيلي عن جدعنتك معاها ايوا بالله عليكي يا دادة خدي بالك منها دي غلبانة وطيبة اوي والله وو

ربا 

خلاص يا سماح 

سماح 

وملهاش بخت ف الدنيا بس انا واثقة ان ف الاخر حظها هيكون عنب ان شاء الله 

ربا 

ما خلاص يا سماح دادا عارفة كل حاجة اتتي ناقص تاخديني وتشحتي بيا ف حي السيدة زينب 

سماح 

زودتها صح 

ربا 

جدا جدا 

سماح ضحكت 

انا بقول نخلينا ف الأكل فين الاكل يا دادا.... الله من زمان كان نفسي اقولها 

الدادة جابت الأكل ورصته ع السفرة 

سماح صقفت الله الله ايه الجمال دا كله . كل دا علشاني الله الله 

لما لقت ربا ساكتة قالت بحرج 

انا عكيت تاني لالا خلاص مش هفتح بوءي 

ربا 

لالا خالص براحتك مفيش حد هنا واتصرفي ع طبيعتك خالص يا سماح متقلقيش من حاجة والدادة مننا وعلينا

...

بعد كم يوم ربا كانت خارجة من مكتب العميد وع وشها الفرحة باينة من غير ما تتكلم قررت اول حد تكلمه تقوله الخبر هي سماح فطلعت فونها من الشنطة واتصلت بيها 

الوا ايوا يا بت يا سماح انا عايزاكي ضروري تعرفي تجي حالا عند الكافيه اللي بتنقابل فيه 

سماح 

لا متقوليش انهم قبلوكي ف الترشيح 

ربا لا مش هقول حاجة الا لما تيجي يلا انا رايحة ع هناك اهو 

...

بتول كانت قاعدة ف الشركة فجالها اخوها سراج شمتان 

ايه يا بتول قاعدة ليه كدا ليه مبقاش في ايدك حاجة ابوكي سحب منك كل التوكيلات ومبقتيش لاقية حاجة تعمليها او تسحبيها لنفسك 

بتول بصتله بنظرة كلها حزن 

عمري ما عملت كل حاجة لنفسي بعمل كل دا علشان عمر.. علشان لما يرجع يلاقي حاجة تعوضه عن سنين الحرمان اللي عاشها 

سراج قال بحدة 

اه علشان كدا عمالة تنهبي ف الشركة واحدة واحدة عايزة تكتبيها لابنك اللي سابك وهرب من سنين وطفش منك 

هما بتول اتخلت عن هدوءها وزعقت ف الشركة لاول مرة 

عمر ابني مسابنيش وطفش عمر مهربش عمر كان راجل اختار اللي فكره صح لامه قرر يضحي بنفسه وبحياته وسعادته علشاني اللي انا فيه دلوقتي ورجوعي لبابا بسبب عمر... عمر الانسان الراجل اللي انت متعرفش حاجة عن المعنيين دول ولا مرة قولت هدور ع ابن اختي وانت اصلا السبب ف انه يمشي انت السبب واوعى تكون ناسي انك انت اللي بتنهب ف الشركة وف فلوس بابا من تحت لتحت اوعى تفكر اني مش عارفة دا انا شايفة وفاهمة وساكتة بس علشان مش عايزة اعمل مشاكل اكتر من كدا... انا كل اللي بتمناه الاقي عمر ابني واخده واختفي من وشكم للأبد .. اطلع اطلع برا يا سراج واللي عندك اعمله وسيبني ف حالي والنار اللي جوايا انا معنديش حاجة ابكي عليها غير عمر ابني وبس ياريت تطلعني برا لعبتك دي بقا 

سراج بصلها بانزعاج لانها عرته قدام نفسه 

لكن وهو لسه ع باب المكتب لسه مخرجش 

سمع مكالمة جت لبتول فاتلكأ علشان يسمع المكالمة اللي جتلها 

بتول 

الو ايوا مين 

...

ايه عمر ابني... انت متأكد من اللي بتقوله دا!! 

انا جاية حالا لا مش هتأخر مسافة السكة 

 سراج اول ما شافها بتتحرك من مكانها خرج بسرعا وهو بيقول بنفسه 

استحالة توصل لابنها عمر احنا لاظم نسبقها دي لو وصلتله بابا هيكتبله كل حاجة. ..

وجري بسرعة ع مكتبه كلم فتون مراته 

الو ايوا يا فتون ... بتول لقت عمر هنتصرف ازاي 

فتون كانت بتنشال وتنحط 

ايه انت بتقول ايه ازاي لقته احنا طول السنين دي كلها بنبعد اي أدلة توصلها بنحاول نخليها متعرفوش نهائى ازاي الاتصال دا جالها كدا مباشرة من غير ما نعرف لا سراج اتصرف اعمل اي حاجة 

سراج 

اعمل ايه قوليلي اتكلمي يا فتون 

فتون

طبعا تلحقها امشي وراها بالعربية اعرف هي رايحة فين وهتقابل مين بالظبط اتحرك انت لسه واقف عندك يا سراج وراها بسرعة 

سراج بتوتر اه طيب ماشي هنزل وراها اهو 

فتون إياها تغيب عن عينك نعرف هي لقته فعلا ولا ايه ولو لقته هنتصرف هنعمل ايه علشان نخلص منه يلا بسرعة 

....

عمر خلص شغله وركب الميكروباص علشان يرجع البيت وف الميكروباص 

سمع ام بتقول لبنتها 

بتول كفاية موبايل بقا عينك هتوجعك يا بنتي 

عمر التفت جنبه وبص ع البنوتة الصغيرة االي بتقول 

لأ يا ماما انا لسه عايزة اشوف الفيديو دا كمان 

الام 

طيب لما نرجع البيت يا بتول هعطيه ليكي ربع ساعة كمان بس هاتيه دلوقتي يا حبيبتي 

بتول 

يووه طيب ماشي يا ماما اتفضلي اهو 

الام 

حبيبتي يا بتول القمر انتي

عمر ابتسم ابتسامه صافية 

بتول بنوتة عسل والاسم جميل اوي بتول.. بتول انا بحب الاسم دا اوي .. لو اتجوزت وخلفت هسمي بنتي بتول

وفجأة ضحك لنفسه بسخرية 

ههه اتجوز!! مين اللي هترضى بواحد ملوش اي أهل مقطوع من شجرة ميعرفش اصله وفصله ايه ميعرفش جه بطريقة شرعية ولا نظامه ايه... وليهم حق بردو انا لو اب وجالي شاب كدا مش هوافق دي بنتي نور عيني مينفعش اديها لاي حد... يووه يا عمر انت رجعت تفكر ف الموضوع دا تاني ليه مش كنت مخرجه من دماغك هل ان الأوان اني ابدأ ادور على اصلي ولا اكبر دماغي .. ااه يا عمر بتجيب وجع الدماغ لنفسك كفاية اللي انت فيه 

ولما العربية وقفت نزلت الام وعي بتقول لبنتها 

يلا يا بتول هاتي ايدك علشان متقعيش 

عمر كان كمان نازل فمسك ايد بتول الصغيرة 

خليني اساعدك يا عسل يلا ننزل هوب 

وشالها من ايديها نزلها ع الارض جنب امها 

الام 

شكرا ليك 

عمر بابتسامة لبتول الصغيرة 

مع السلامة يا تولا 

وفجأة حس ان الاسم مش غريب عليه تولا!!! 

...

اما عند بتول كانت ركبت عربيتها وبتقول للحج سمير السواق 

بسرعة الله يكرمك يا حج سمير ع العنوان اللي قولتلك عليه 

وفضلت عيونها تدمع بغزارة وهي بتفتكر عمر ابنها وهما ف البيت بعد موت جوزها وهي كانت متأثرة ومنهارة 

تولا حبيبتي عملتلك الفطار يلا بقا علشان تفطري مش هينفع كل يوم عياط كدا بابا لو كان موجود مش هيحب يشوفك كدا لازم تبقي اقوى وبعدين انا معاكي مكان بابا هقف جانبك وهحميكي زيه بالظبط مش هخليكي محتاجة حاجة يا بتول بس علشان خاطري افطري انتي عايزة تزعلي عمر منك 

طلعت اهه مسموعة كلها وجع وشوق 

اااه يا عمر مشيت وسبتني ليه يا حبيب قلبي ..عمررر 

....

اما عند ربا 

روحت سماح ورجعت ع البيت كانت فرحانة ومقررة انها توصلهم الخبر جايز يفتخروا بيها 

فريد كان بيقرأ ملف ف ايده، أنغام بتشرف على الأكل والشغالة بترصه ع السفرة، ومنار بتتصفح موبايلها.

رُبا بلهفة طفولية اول ما دخلت

بابا… ماما… أنا جالي جواب ترشيح لمسابقة إلكترونيات على مستوى الجامعات!

هيختاروا ٣ طلاب بس من كل كلية… وأنا منهم!

منار ضحكت ضحكة ساخرة وهي بتتحرك كن مكانها تقعد ع السفرة

يعني إيه؟ هيدوكي ميدالية بلاستيك ولا شهادة PDF ع الإيميل؟

رُبا بتحاول تضحك

لا… ممكن فرصة لسفر أو منحة كمان. الدكتور قاللي إني لفتّ نظر اللجنة جدًا... وانه متفائل بيا

فريد حط الملف ع الترابيزة قدامه، يبصلها من فوق نظارته، وقال بنظرة كلها حدة

يعني هو ده وقت سفريات وكلام فارغ كن دا 

انتي ناسية إن مصاريفك مكلفة وانا اللي بدفع 

اللي عنده دم… بيحس شوية لكن انتي الظاهر معدومة منه 

رُبا اتجمدت مكانها الكلمة زي قلم نزل على وشها 

أنغام 

وإنتي يعني عايزة تسافري ليه 

وهتروحي فين وانتي لسه حتى متعرفيش تروحي مكان لوحدك

رُبا بصوت مبحوح 

أنا بس… كنت حابة أشارككم فرحتي وحماسي مش أكتر.

منار بسخرية 

ربنا ما يورينا حماسك لما تنجحي بجد بقى.

ربا بصتلهم ومش عارفة تقول ايه 

فريد 

انسي موضوع السفر والكلام الفارغ دا وخلصي كليتك علشان ننتهي من القصة دي انا مش ناقص وجع قلب بعدين اختك عندك اهي ليه مفكرناش نخليها تسافر تدرس ايه اللي فيكي مميز عنها 

منار 

والله مش عارفة قولها يا بابا كان انا اولى كنت سافرت كملت دراستي برا 

ربا بصوت اقرب للهمس 

دي كانت هتبقى منحة لو فوزت بيها مش هتكلفكم حاجة خالص 

انغام 

بنقولي ايه مبحبش البرطمة لا تتكلمي وتسمعينا لتاكلي وانتي ساكتة 

ربا مدت إيدها لطبق الاكل قدامها، بس لقت نفسها مش قادرة تاكل.

فقامت من مكانها واتحركت وسابت السفرة بصمت

 وهي في طريقها لبرا اوضة السفرة ، فريد قال من غير ما يبص لها

قولي للدكتور بتاعك… إنك مش فاضية للعب عيال دا

...

بتول وصلت للمكان المطلوب وقفت تبص يمين وشمال تدور عليه بلهفة 

ودماغها بيودي ويجيب يا ترى شكله بقا عامل ازاي... لسه زي ما هو ولا اتغير كان بياكل وبيشرب ولا لا عايش مبسوط ولا حزين كمل تعليمه ولا مقدرش يتعلم عايش لوحده ولا مع ناس كانت هتموت وحاسة ان قلبها هيقف 

لدرجة انها كانت هتقع فسندها 

شاب وهو بيقول 

خدي بالك هتقعي انتي كويسة؟؟ 

بتول نسيت تعبها ولفت وشها ليه بسرعة وقالت 

انت عمر اللي كلمتني دلوقتي!! 

الشاب 

ايوا انا عمر 

بتول 

عنيها دمعت ابني كان هيكون فعلا ف نفس عمرك 

الشاب 

انا شوفت اعلان حضرتك .. انا معرفش اهلي .. فتحت عيني لقيت نفسي طول عمري من وانا حتة ف اللفة متربي ف ملجأ كل اللي اعرفه عن نفسي ان اسمي عمر وبس 

سراج كان وصل بعربيته هو كمان وجري لحد عندهم وسمع اللي قاله الشاب عمر 

فاتصل بسرعا بفتون 

الو ايوا يا فتون دا باين الواد هو عمر ابن بتول فعلا بيقولها انه ميعرفش اهله وانه متربي ف ملجأ واسمه عمر هنعمل ايه 

فتون بشر 

ييي ظهر ليه دا اسمع يا سراج الواد دا مش لازم يعيش اتصرف كلم حد من معارفنا يخلص عليه بتول مش لازم تكون قوية ف الوقت دا بالتحديد ظهور ابنها هيقويها عايزينها ضعيفة لحد ما نخلص عليها وناخد منها كل حاجة احنا قربنا نكسب كسبنا جولة والجولة الاخيرة الفوز خلصنا من الواد دا بسرعا 

سراج ماشي يا فتون هعمل اتصالاتي واخلص منه 

في الوقت اللي سراج بيكلم فتون 

بتول قالت لعمر 

متأكدة انك ان شاء الله هتلاقي اهلك يا عمر ف يوم من الايام 

عمر 

انتي عرفتي منين انه انا مش اللي بتدوري عليه 

بتول 

عمر ابني مراحش مني وهو رضيع عمر كان كبير وفاهم وواعي يا عمر من اول وهلة عرفت انه مش انت... معرفش زي ما بيقولوا قلب الأم بيحس لكن مش عارفة فعلا لو شوفت ابني الحقيقي هعرفه ولا ايه بس كل اللي متأكدة منه انك مش ابني انا اسفة اوي 

عمر 

انا اللي اسف اني عطلت حضرتك 

بتول 

انت شاب مهذب يا عمر مقابلتوش من زمان معظم اللي بيتصل بيكون بلاغ كادب ومنتحلين شخصية مشوفتش حد بأخلاقك حقيقي علشان كدا انا حابة اساعدك يا عمر تقدر تاخد الكارت دا وتجيني الشركة بكرة هستناك ف مكتبي ف اي وقت 

عمر بامتنان 

شكرا لحضرتك هاجي بكرة ان شاء الله انا محتاج شغل بأي شكل 

بتول 

ان شاء الله هتشتغل وهتتحسن اوضاعك وبإذن الله تلاقي اهلك وانا الاقي ابني 

عمر 

هدعيلك تلاقيه زي ما انا بدعي الاقي أهلي 

بتول بابتسامة 

تمام يلا تعالى اركب اوصلك ولا انت بيتك هنا 

عمر 

لا ف الواقع انا كنت شغال هنا قبل ما اسيب الشغل بس دا مش بيتي لا مليش مكان معين ابات فيه 

بتول 

طيب اركب معايا يا عمر 

عمر 

مش عايز اتقل على حضرتك 

بتول 

انت زي ابني تتقل ايه بس تعالى اركب نتكلم شوية وتعرفني اكتر عليك 

عمر 

تمام 

وبالفعل ركبوا سوا العربية 

سراج كان انهى مكالماته ولما شافه بيركب

ضرب ع مقدمة العربية يييي دا ركب معاها يبقى هو فعلا 

فعمل اتصال وقال 

العربية دي مش لازم تفضل ماشية سليمة ع الطريق اتصرفوا ...