قراءة رواية البطة السودا كاملة

تنشر حصريًا على مدونة رواية وحكاية قبل أي منصة أخرى

عدى اكتر من اسبوع ع اخر احداث حصلت للابطال 

ربا اشتركت ف المسابقة من غير ما اهلها يعرفوا وسماح كانت بتشجعها والنهاردة كانت نتيجة المسابقة 

في اوضة ربا 

كانت بتكلم سماح في الفون 

الو ايوا يا سماح 

سماح بفرحة 

باين من صوتك انك فرحانة قوليلي انكم كسبتم في المسابقة 

ربا كانت هتطير من الفرحة 

ايوا الحمد لله فوزنا يا سماح فوزنا انا مش مصدقة نفسي لسه النتيجة اعلنها عنها حالا والله مش مصدقة نفسي.. ومش بس كدا الجامعة اللي فازت اخدت منحة انها تعمل الدراسة برا انا حاسة ان هيغمى عليا من الفرحة 

سماح بسعادة ملهاش نظير

لا بتهزري ياااه اخيرا اخيرا حلمك هيتحقق هتسافري بعيد عن اهلك هنا وهتحققي مستقبلك هناك وترجعيلنا الدكتورة ربا ياااه انا بجد فرحانة اوي 

ربا 

الحمد لله يا سماح اخيرا هبعد عن هنا انا مش مرتاحة معاهم لازم ابعد ودا الوقت المناسب الحمد لله ربنا كرمني وجبر بخاطري 

سماح 

الحمد لله صبرتي ونولتي يا حبيبتي ربنا يوفقك يارب 

ربا 

اه يا سماح لو تعرفي نفسي اخدك معايا هناك ياريت كان ينفع مش هقدر ع بعدك ابدا 

سماح 

هستناكي يا ربا هستناكي علشان تنتشليني من الفقر والوحدة اللي انا فيها 

ربا 

وانا عند وعدي بعون الله اول ما اخلص دراستي واشتغل هجيب شقة ونسكن فيها سوا ونشتغل ونستقل بنفسنا منحتاجش لحد 

سماح 

ان شاء الله يا حبيبتي ربنا كبير واحنا طمعانين ف كرمه 

....

اما عند عمر 

عمر كان واقف وسط زحمة الأسلاك والآلات في المصنع بيصلّح لوحة كهربية عطلانة 

واحد من العمال قال بهمس

هو عمر ده مخلوق من حديد؟ ده ما بيقومش حتى يشرب بق ميه 

عامل تاني

آه، بس شوف… صبحي المدير بياخد كل الشغل بتاعه ويقدّمه للمدير التنفيذي على إنه من عنده! 

 في الوقت دا جه المدير صبحي، خبط على كتف عمر بيثني عليه

يا عمر! اللوحة اللي صلّحتها امبارح… جبنا عميل كبير شافها وانبهر!

برافو يا ابني، بس طبعًا، دي اتسجّلت باسم القسم ككل مش باسمك فاهمني 

عمر بابتسامة مكسورة لان معندوش حل تاني 

مش مهم الاسم… المهم إنها اشتغلت 

صبحي بخبث

 هو ده الكلام! خليك كده دايمًا… نجم في الضل.

عمر رجع يكمل شغله وهو ساكت… بس عينيه بتتكلم بحاجات كتير 

المرارة... الكسرة... قلة الحيلة … واخيرا الذكاء.

بعد شوية، وهو قاعد لوحده، خرج من جيبه الرسمة اللي عملها لدايرة كهربية جديدة… حاجة متطورة.

بص لها، وبعدين خباها في جرابه

همس لنفسه باصرار 

مش هفضل طول عمري شغال عند اللي بياخدوا تعب غيرهم… لازم أعمل حاجة باسمي أنا.. عمر 

...

بعد المغرب

منار كانت قاعدة على الكنبة، إيدها بتترعش، عينيها مفزوعة ... أنغام ماشية رايحة جاية، باين إنها متوترة.

فلاش باك 

منار كانت سايقة عربيتها وراجعة ع البيت جالها مسدج ع الفون مسكته وبدات تقرأ الرسالة ومأخدتش بالها من الطريق لسه بتبص قدامها لقت بنت معدية الطريق ف وشها جت توقف العربية علشان تتفاداها مقدرتش تتحكم ف الفرامل ف الوقت المناسب فخبطها 

منار شهقت بصدمة 

ايه انا خبطتها !!! يا نهار اسود يا نهار اسود... خافت فجريت بسرعة من غير ما تعرف مين اللي خبطتها أو هي عايشة ولا ميتة ولا جرالها ايه لكن كان فيه شهود عيان اخدوا نمر العربية قبل ما تهرب بيها منار 

باااك 

منار

ماما… أنا خبطتها فعلاً… بس مش قصدي… كانت طالعة فجأة قدامي، و... وأنا…

أنغام بحزم

مش وقته تبرري! شوفي أنا هقولك إيه… لازم نلمّ الموضوع بسرعة قبل ما الشرطة توصل."

منار مرعوبة

بس الناس شافوني! شافوا وشي… شافوا نمر العربية هيعرفوا انا مين 

أنغام بتحاول تهديها رغم ان جواها مرعوبة

الناس مش واثقين، بيقولوا احتمال.

لكن لو فضّلنا ساكتين، الشرطة هتيجي وهتحقق، وأنتي اللي هتتبهدلي.

منار

"يعني أعمل إيه؟ أهرب؟! اسافر بسرعة برا مصر اعمل ايه يا ماما انا هموت من القلق

أنغام

لا.. مش هتتحركي من مكانك إحنا هنقلب الترابيزة عليهم…

إحنا هنقول إن رُبا هي اللي كانت سايقة.. مش انتي 

منار انتفضت ولأول مرة تقول كلمة صح ف حياتها 

"

إيه؟! لا لا لا… دي أختي! أنا مش هعمل فيها كده!...

أنغام بعصبية

إنتي مش قد الحبس والزنزانة يا منار!

رُبا متعودة… اتبهدلت في شغل، وسكن ملاجىء ووقف في طوابير… هتعرف تتصرف.

إنتي لو مرة شوفتي كمين ممكن تنهاري!"

منار دموعها تنزل

بس دي بريئة…معملتش حاجة ربا علطول في حالها عمرها ما اذتني في حاجة 

أنغام مسكت وشها بقسوة وبصت في عنيها بحدة 

وانتي مش مذنبة انتي مكانش قصدك ... وبعدين مافيش حاجة اسمها بريء أو مذنب. في حاجة اسمها اللي يقدر يشيل، واللي لأ.

إنتي متقدريش. هي تقدر... وهنعوضها اكيد 

منار سكتت مش عارفة ترد بس دموعها سايلة على وشها زي الشلال

في نفس اللحظة، صوت جرس الباب رن…

أنغام بصت لبنتها، بنظرة فيها حسم وحدة

أنغام

روحي أوضتك… وسيبي الباقي علي اوعي تتكلمي بأي حاجة الا لما اطلب منك 

منار سمعت كلامها وطلعت على اوضتها بسرعة وانغام راحت تفتح الباب 

شافت الشغالة قالتها

استني انتي انا اللي هفتح 

ولما فتحت لقت ضابط ومخبر واقفين وملامحهم رسمية وجادة

الظابط 

مساء الخير… إحنا من قسم الشرطة... فيه بلاغ بحادث تصادم بنت شابة في الطريق وشهود عيان معاهم نمر عربيتكم ... نمر العربية ٥٦٧ ابجد! 

أنغام ببرود ظاهري

أهلاً بيك يا حضرة الضابط… آه، العربية بتاعتنا فعلاً… خير؟

الضابط

شهود قالوا إن واحدة شابة سايقة هي اللي خبطت البنت… اسمها منار، صح؟

أنغام رتبكت لحظة، وبعدين بسرعة غيرت لهجتها

لا لا، حضرتك متأكد؟

منار ما كانتش سايقة خالص بنتي مخرجتش النهاردة من البيت لانها نايمة في اوضتها تعبانة… اللي كانت سايقة هي بنتي التانية… رُبا... بنتي الكبيرة 

المخبر كتب اللي قالته في دفتره والظابط بص لها باستغراب

الضابط

ربا او منار مش هتفرق عندنا وصف إن اللي كانت سايقة كانت لابسة

  جاكيت بيج…واا

أنغام قطعت كلامه بسرعة

أيوه أيوه، هو ده بالضبط… رُبا كانت لابسة كده فعلاً، وخرجت بالعربية بعد العصر

الضابط

فين هي دلوقتي؟ محتاجين نكلمها..ونستجوبها لان دا بلاغ رسمي وممكن تيجي معانا ع القسم 

أنغام بسرعة

أجيبها لحضرتك حالًا

أنغام دخلت بسرعة لجوة، لقت منار واقفة ورا الباب برعب بتسمع بيقولها ايه ووشها شاحب اصفر زي اللمونة 

أنغام بهمس شديد

 نزلتي ليه دا اللي انا قولتلك عليه كمّلي الكذبة… ما تنطقيش كلمة واحدة… خلّي رُبا تشيل الليلة هي 

منار بعياط

أنا خايفة…

أنغام

خوفك مش مبرر يدمر مستقبلك... اسكتي وخلاص... قولتلك انا هتصرف هلبسها لربا وتخرجي انتي منها اهدى بقا انتي فاهمة اي تصرف عبيط منك هتروحي ف داهية

...

ربا كانت قاعدة بتفكر تعمل ايه بحماس فجالها رسالة على الماسنجر من المحامي اللي كان معاها ف الملجأ 

ازيك يا ربا عاملة ايه وحشاني اوي اسف اني انشغلت عنك كان عندنا شغل كتير وكمان عارف انك مشغولة بدراستك .. عايز اقولك اني فاكر وعدي ليكي ومش ناسية وهكلم فريد بيه قريب علشان اتقدملك قولتي ايه يا ربا هنتظر ردك 

ربا قرات الرسالة وبعدين ردت بصوت عالي لنفسها 

لا مش وقته خالص مش وقته ارتباط وخطوبة وجواز انا عايزة اكمل دراستي واحقق حلمي وبعد كدا ابدأ افكر ف الموضوع دا انا هطلب منه ينتظر عايز ينتظر براحته مش عايز هو حر يشوف غيري 

حسمت قرارها ولسه هتبعت ليه الرد 

 كانت أنغام طلعت بسرعة على أوضتها وفتحت الباب بدون استئذان.

أنغام

ربا قومي… في ظابط عايزك.

ربا بصت لها بريبة

ظابط؟ ظابط مين وليه 

أنغام بهدوء شيطاني

علشان تعترفي إنك اللي كنتي سايقة العربية النهاردة… مش منار اختك 

ربا قامت وهي مش مصدقة اللي بتسمعه

إنتي بتقولي إيه؟ سايقة عربية ايه بدل منار انا مش فاهمة حاجة

أنغام بهمس حاد

هتعملي الصح يا ربا علشان تكوني فخر لينا وترجعي حبنا ليكي… أو تعيشي ندمانة طول عمرك.

ربا بصتلها بزهزل وعدم فهم وعيون كلها حيرة

انا مش فاهمة حاجة حضرتك بتتكلمي عن ايه 

انغام 

انا هقولك ع السريع كدا وبعدين نتكلم بعدين علشان الظابط واقف تحت منتظرك 

منار اختك من شوية خبطت بنت بالعربية بدون قصد 

ربا هنا شهقت وقالت بصدمة 

ايه دلوقتي فهمت كل حاجة عايزاني انا اقول اني اللي خبط البنت بدالها!! اشيل انا ذنب منار اشيل ذنب معملتوش ؟؟ 

انغام 

اعملي الصح وضحي علشان خاطر اهلك ولو لمرة واحدة ف حياتك يا ربا لو عايزة ترجعي حبنا ليكي لو عايزة نعتبرك جزء من عيلتنا ومنقدرش نستغنى عنك اعملي اللي بقولك عليه 

ربا معرفتش تمسك دموعها 

ليه.. ليه عملتلكم ايه ليه اشيل ذنب مش ذنبي انا طول عمري ماشية جنب الحيط بحاول ارضيكم ومش عارفة لو عايزني امشي من البيت همشي بس متعملوش فيا كدا 

انغام بمسكنة 

بس متقوليش كدا تمشي دا ايه ومين هيسمحلك انتي بنتنا نسيبك تروحي فين.. اسمعي الكلام منار مش حمل تحقيق واقسام... احنا هنعين ليكي اكبر المحامين هيطلعوكي بكفالة لانه مش قصدك بس بلاش منار مش هتتحمل هتنهار وانا خايفة على نفسيتها 

ربا 

طب وانا انا سمعتي هتبوظ والمنحة ممكن تروح مني لو عرفوا اللي حصل لا انا اسفة مش هينفع كان بودي اساعدها لكن مستقبلي اهم من اي حاجة 

في الوقت دا الشغالة خبطت ع باب أوضة ربا 

انغام هانم الظابط بيستعجل والا هيطلع بنفسه 

هنا دخلت منار تعيط وتمسك ايد ربا 

ابوس ايدك يا ربا انقذيني انقذي اختك انا لو روحت معاهم هموت والله العظيم هموت مش هقدر انتي هتتحلمي والله والله بابا وماما مش هيسيبوكي هيقوموا محاميين كتير وهتطلعي منها علطول مش هتقعدي هناك يوم واحد بس .. بس روحي معاهم التحقيق وبلاش انا والنبي 

ربا 

لا إله إلا الله.. 

ومع اصرار انغام ومنار واصرارهم مقدرتش ربا انا ترفض وخاصة بعد ما سمعت الظابط بيخبط ع الباب... انسة ربا انتي لازم تيجي معانا التأخير مش هيفيدك 

ربا اخدت نفس عميق 

ماشي موافقة بس متسيبونيش هطلع منها صح 

انغام مسكت ايديها برجاء 

حالا فريد هيجي وراكي بالمحاميين مش هيمشوا غير وانتي معاهم متقلقيش 

ربا لبست بسرعة وخرجت للظابط 

الظباط 

انتي ربا فريد 

ربا بكسرة 

ايوا يا فندم 

الظابط 

اتفضلي معايا عايزين اقوالك ف القسم 

ربا مشيت معاهم وهي بتودع بعنيها بيتها واهلها ودراستها واحلامها وحاسة انها هتخرج مش هترجع ابدا 

وف الوقت دا انغام اتصلت بفريد اللي جه بسرعة اول ما عرف الخبر 

فريد 

برافو عليكي يا انغام انتي اتصرفتي صح مينفعش منار تتحبس ربا هتتحمل بنتنا مش هتتحمل 

منار اللي تحت الضغط 

ربا بنتكم بردو 

انغام مسكت ايديها 

انتي بنتي اللي ربيتك طول عمرك في حضني هيا لا مش هتحمل يحصلك حاجة يا نور عيني 

منار 

طب بسرعة يا بابا روحلها وابعت معاها محامين انا مش متحملة الضغط دا لازم ربا تخرج منها ارجوك 

فريد 

ماشي انا هتصل بالمحامي يسبقني على هناك

.....

وف قسم الشرطة 

الظابط 

انتي ربا فريد 

ربا 

ايوا يا فندم

الظابط 

انتي متهمة بإصابة شابة ف الطريق العام وفيه شهود عيان ضدك ايه اقوالك 

ربا 

انا مش هتكلم الا ف وجود المحامي بتاعي يا حضرة الظابط بعد اذنك 

الظابط 

وهو فين 

ربا 

جاي دلوقتي مع بابا ورانا 

الظابط 

هننتظر المحامي ...

وبعد شوية جه المحامي وقال زي ما فريد فهمه 

يا حضرة الظابط الانسة ربا كانت سايقة ع سرعة عادية واقل من العادية كمان المجني عليها هي اللي كانت ماشية غلط هي اللي ظهرت فجأة قدام العربية مكانش قدامها حل معرفتش توقف الفرامل ف الوقت المناسب 

الظابط 

انا هضطر احجز الانسة لحين الانتهاء من صدور الأدلة واخذ اقوال الشهود 

فريد 

قرب من ربا وقال 

انا مننون ليكي اوي يا ربا مش هنساها ليكي ولا امك واختك هينسوها كلنا فخورين بيكي دلوقتي انتي بنتي حبيبتي 

ربا 

انا عملت كدا علشانكم 

فريد 

كنت واثق انك هتصوني الدم اللي بتنتمي ليه 

ربا 

بس دول هيحبسوني ع زمة التحقيق 

فريد 

يوم واحد بس بكرة الصبح هترجعي معانا البيت متقلقيش 

ربا 

عندي سفر ومنحة 

فريد 

ولو ملحقتيش السفر دا هسفرك ع حسابي متقلقيش مش هنسيبك من النهاردة انتي بنتنا بجد 

..

اما عمر فكان في أوضته بيرتاح من تعب الشغل 

وافتكر لما راح المكان اللي شافه فيه ناجي اول مرة وكمان وداه عند مكان موقع البناء اللي بقا عمارة دلوقتي 

فلاش باك 

ناجي 

هنا دا المكان اللي لقوك فيه محدش قدر يتعرف عليك وقتها كنت غريب وواضح جدا انك مش من المنطقة هنا وانك مغترب جاي لشغل

عمر فضل يبص للمكان مش فاكر حاجة 

وديني موقع البناء اللي بتقول عليه 

ناجي وداه للعمارة 

فضل عمر يبص عليه بيحاول يفتكر اي ذكرى تفكره بماضيه بس مش فاكر حاجة كل حاجة ع اقوال ناجي متغيرة مكانتش زي زمان صعب انه يفتكر 

اخد عمر نفس عميق باحباط مش فاكر مش فاكر اي حاجة....طيب لما لقوني مكانش معايا اي حاجة تثبت انا مين محدش وقتها كان بيدور ع ابن تايه 

ناجي للاسف طول السنين دي كلها معرفناش نوصل لاهلك ودا لانك فاقد الذاكرة مش عارف تدينا معلومة واحدة بس توصلنا لأهلك 

عمر بأسى 

لا حول ولا قوة الا بالله لا حول ولا قوة إلا بالله يعني ايه يعني كدا الخطوط كلها اتقطعت اني اوصل لاهلي!! 

بااك لعمر 

اعمل ايه استسلم لحد هنا وبلاش اوجع دماغي واديني عايش ولا اعمل ايه

فكر شوية وبعدين قال 

ممم لو ينفع ادور ف الارشيف ع الناس اللي في عمري اتولدت ف نفس السنة واحاول اوصل للي اهله فقدوا ابنهم اللي بنفس العمر... اكيد ينفع بس صعب انا لازم اشوف حد معرفة ف المجال دا يعملي الخدمة دي يارب تفلح 

صادف تاني يوم لربا 

انه يوم الجمعة ودا اجازة ففضلت ربا ف الحبس لوحدها 

وسماح بترن عليها ومش عارفة توصلها وكانت هتنفجر 

لا مبدهاش انا مش عارفة اوصل لربا مش بترد ع الفون ولا ع النت البت جرالها ايه عملوا فيها ايه اللي ميتسموش يمكن اذوها لما عرفوا بموضوع المنحة لا انا لازم اروحلها بتفسي لهناك اطمن عليها 

ولبست فعلا وراحت ع فيلا فريد وهناك طلبت من البواب انها تدخل 

البواب 

انتي عايزة مين وتدخلي ازاي كدا هي عمارة من غير بواب اومال انا لازمتي ايه 

سماح 

يوه ما انا بستأذن منك اني ادخل اهو صاحبتي جوا وعايزة اقابلها 

البواب بصلها من فوق لتحت 

انتي ليكي صاحبات من بنات فريد بيه اللي جوا لا اشك 

سماح كشرت

بتبصلي بقرف كدا ليه يا خويا جتك الهم ايوا ربا هانم ستك تبقى صاحبتي وعايزة اقابلها روح ناديلها يلا 

البواب انا هناديلك البوليس امشي من هنا يلا 

سماح 

يا راجل ميبقاش دماغك ناشفة بقولك صاحبتي طب اطلع قولها اني تحت وعايزة اقابلها 

البواب محدش اداني علم ان حد جاي دلوقتي مش متحرك من مكاني 

سماح اما راجل ثقيل بصحيح 

فقررت هي أنها تنادي بنفسها على ربا 

يا رباااا يا رباااا انا سماح صاحبتك ؤا ربااااا 

هنا جت انغام وقالت بانزعاج 

ايه فيه ايه.. ايه صوت الدوشة عندك دي 

البواب 

يا ست هانم دي بنت مش عارف جايالنا منين دي

انغام 

إنتي مين وعايزة ايه يا شاطرة اديها يا ابني اي حاجة خليها تمشي من هنا

سماح بانزعاج وعزة نفس

انا مش جاية اشحت يا هانم انا جاية اقابل ربا صاحبتي 

انغام 

صاحبتك مش هنا 

سماح 

لا ربا عايشة هنا انا متأكدة 

انغام 

ايوا دا بيتها لكنها مش موجودة دلوقتي في البيت 

سماح 

طيب راحت فين وهترجع امتا او اوصلها ازاي 

انغام 

معرفش واتفضلي امشى من هنا كفاية دوشة وعطلة لحد كدا يلا 

سماح 

عرفت انها مش هتعرف تاخد منها حق ولا باطل فمشيت ييأس وهي بتبرطم 

جتك الهم ولية كئيبة اعوذ بالله طب اعمل ايه واوصل لربا ازاي دلوقتي بس يا ترى انتي فين يا ربا هل انتي فعلا مش ف البيت ومشغولة لدرجة مش عارفة تردي عليا ولا سافرتي من غير ما تقوليلي بس مش بالسرعة دي لا 

بعد كم يوم من التحقيق مع ربا وسماع اقوال المحامي 

وف الجلسة اللي اتعملت لربا 

الظابط قال 

بناءً على أقوال الشهود، والاعتراف غير المباشر، ونظرًا لعدم وجود إثبات واضح بالعكس…

المتهمة رُبا فريد تُدان بالقيادة بدون رخصة والتسبب في إصابة عمد غير مباشر…

بالحكم .. بالحبس لمدة سنة 

الصوت نزل زي قنبلة ف ودن رُبا…

بتبص حواليها تدور على حدّ يسندها... مش دا اللي اتفقوا عليها ابوها كان بيأكد ليها انها هتخرج النهاردة معاهم وجم كلهم يحضروا معاها علشان يخرجوا كلهم سوا يحتفلوا بأن الكابوس دا انزاح... لكن مفيش حاجة من دي حصلت ربا شالت الليلة وهتتحبس لمدة سنة 

بصت عليهم 

منار واقفة بتعيط

أنغام منزلة راسها

وفريد… واقف ووراه المحامي، وملامحه ميتة

ربا بصوت مهزوز

بابا 

إنت كنت عارف؟ انا هتسجن ؟؟ 

فريد بتلعثم

أنا… أنا والله ما كنتش متوقع الحكم…

كان المفروض تخرجي بكفالة مالية وكنت مستعد ادفعها علشانك 

ربا

كنت فاكراك جنبي…

إنت طلعت متفرج زيهم.. انا هتسجن ظلم انا والكل عارف اني معملتش حاجة هشيل ذنب مش ذنبي زي ما شيلتوه ليا لما تهت منكم زمان ودلوقتي بتقرروا نفس الغلطة

فريد بصلها بأسى ومعرفش يتكلم 

ربا عيطت

...دراستي جامعتي عندي منحة برا كل دا هيضيع حرام عليكم 

الشرطية قربت منها وسحبتها علشان تخرج معاها 

ربا اتحركت معاها ومحدش اتكلم بصتلهم بألم لكنها مسحت دموعها

وقالتلهم 

مش هبكي قدامكم…

أنا داخلة السجن… بس هطلع منه أقوى منكم كلكم...

ومشيت معاها بخطوات بطيئة، والباب الحديد بيتقفل… صوت الصدى يدوي.

الكل واقف ساكت وكأن على رؤؤسهم الطير 

انا عند عمر كان 

 داخل ومعاه شنطة صغيرة فيها العدة بتاعنه ، يسلّم على البوّاب وعلى العمال وهو معدّي زي عادته، الكل بيبتسم له وبيحييه كأنه شخصية معروفة ومحترمة في المكان...

العامل بمزاح

يلا يا باشمهندس! المصنع ما بينوّرش من غيرك.

عمر بضحكة 

لو المصنع بيعتمد على وشي… يبقى المصنع هيقفل بدري بدري

ودخل القسم اللي شغال فيه، ولبس الجاون، وركّز فورًا على الترابيزة اللي فيها دوائر إلكترونية مفتوحة

بعد شوية المشرف قرب منه

المشرف

عُمر، الجهاز اللي في خط الإنتاج التاني عامل مشكلة تاني.

المهندس لسه ما وصلش، تقدر تبص عليه؟

عمر

أكيد…بس المرة دي هسيب لكم تقرير مفصّل...

مش كل شوية هنصلّح كدا مش هينفع عايزين ننجز ف شغل تاني 

وراح معاه يشوف المشكلة، وفعلاً خلال دقائق قدر يفك الجهاز ويلاقي العيب ويصلحه، وكل اللي حواليه بيراقبوا وهو شغّال، معجبين بتركيزه وسرعته.

مشرف ثاني بهمس لزميل تالت

الولد ده… لو كان خد فرصة تعليم، كان زمانه مهندس كبير.

زميله

بس هو بيفهم أكتر من نص المهندسين اللي بيجوا هنا.

عمر خلص شغله، وكتب ملاحظات فنية دقيقة في كراسة صغيرة وعطاها لأشرف اتفضل دا تقرير فيه توضيح للمشكلة وحلها 

أشرف اخدها وهو فرحان بعمر لكنه مش راضي يعترف بيه كمهندس للقسم 

اما عمر فقرب من المشرفين وقال بصوت هادي كله ثقة 

انا الباشمهندس عمر ناجي الاول على دفعتي طول الخمس سنين دراسه وكنت مرشح علشان اكون معيد كمان

المشرفين والكل بصوا ليه بصدمة 

مهندس؟؟؟ طب ازاي ومش بتشتغل بشهادتك ليه ... ليه بتشتغل زيك زي اي عامل عادي 

عمر 

والله اسألوا الادارة عندكم قرارات الشركة اني اطلع السلم درجة درجة مش اشتغل بشهادتي 

المشرف 

مين قالك الكلام دا 

عمر 

المشرف اشرف 

المشرف 

ايه اشرف!!! .. اسمع يا باشمهندس عايزك ف مكتبي لما تخلص شغلك علشان اشرف ميعملكش مشكلة لو سبت شغلك 

عمر حس ان فيه امل ان حد يخلصه من اللي هو فيه 

تمام جايلك بعد الدوام او ف وقت الاستراحة 

المشرف منتظرك يا عمر

يتبع

إلى حين نشر الفصل الجديد للكاتبة  أسماء عبد الهادي، لا تنسى قراءة روايات و قصص كاملة أخرى تضمن حكايات وقصص جديدة ومشوقة حصرية قبل نشرها على أي منصة أخرى يمكنك تفقد المزيد من قصص وروايات و حكايات مدونتنا رواية وحكاية

رواياتنا الحصرية كاملة‏