سلسلة أماكن مسكونة - بقلم الكاتبة سمر إبراهيم - الحلقة التاسعة (بئر برهوت)
سلسلة أماكن مسكونة
بقلم الكاتبة سمر إبراهيم
الحلقة التاسعة
بئر برهوت
سلسلة
أماكن مسكونة
النهاردة يا حلوين هنتكلم عن مكان من أشهر الأماكن المسكونة فى العالم.
المكان ده غريب جدا جدا اتقالت عليه أساطير كتيرة من قديم الأزل وإلى الآن.
هنتكلم عن بئر برهوت
البئر ده اتقال عليه كلام كتير جدًا حتى الرسول "صلى الله عليه وسلم" اتكلم عنه وقال عنه أبغض بقاع الأرض وبه أشر ماء على وجه الأرض.
البئر ده موجود في اليمن بس اللي كتير ميعرفوهوش هو إن موجود في اليمن ٣ أماكن يقال عليها بئر برهوت من ضمنهم مكانين عليهم خلاف كبير جدًا أي واحد فيهم هو بئر برهوت الحقيقي.
البئر الأول: هو بئر شوران الموجود في محافظة شَبْوَة في اليمن والبئر ده صحيح بيطلق عليه بئر برهوت بس الكل عارف إنه مش هو المقصود بالظواهر الخارقة لأنه امتداد لبحيرة يعني معيتبرش بئر من الأساس.
البئر الثاني: هو بئر الكَسَفَة أو الخسفة(خسفت فوجيت أو كسفة فوجيت) والبئر ده موجود في منطقة فوجيت _ مديرية شحن محافظة المهرة.
ويقال إن تم تسميته بهذا الإسم لأنه اتكون نتيجة ارتطام جرم سماوي بسطح الأرض نتج عنه البئر ده.
البئر الثالث: وهو مغارة برهوت وموجودة في قلب الجبال شرق محافظة حضرموت جمب قرية تنعة في وادي الأحقاف جمب قبر سيدنا هود عليه السلام.
المغارة دي بقى مغارة ضلمة جدًا وعميقة وبتعيش فيها الثعابين والخفافيش وبتخرج منها ريحة كبريت عالية جدًا
علشان كدا قال السكان المحليين إن المغارة دي هي المقصود بيها بئر برهوت الحقيقي.
ومن هنا بدأ الخلاف بين اللي بيقولوا إن بئر كسفة ده هو البئر الحقيقي وبين اللي بيقول إن المغارة هي المكان الحقيقي لبئر برهوت.
الحقيقة إن لحد إسبوع واحد بس مكانش فيه خلاف كبير أو خناقة كبيرة على أي بئر هو البئر الحقيقي مكانش فيه أي مشكلة خالص وكان معظم الناس في العالم بتعتقد إن بئر فوجيت هو بئر برهوت الحقيقي.
❈-❈-❈
قُطر فوهة بئر فوجيت من فوق ٣٠ متر ومكانش حد عارف عمق البئر قد إيه بالظبط ولا قُطر الفتحة من تحت قد إيه كانوا بيقولوا بالتقريب كدا ومعظم الآراء قالت إن طول عمق البئر ٢٥٠م بس الكلام ده مطلعش مظبوط أبدا.
إشاعات وأقوال كتيرة جدا اتقالت عن البئر ده؛ زي إنه بيطلع منه حمام أبيض ببهاجم أى حد بيمر من جنبه، ومليان بالأفاعي كبيرة الحجم وعجيبة الشكل، بيخرج منه ريحة نتنة، وأبخرة سامة، ومتقدرش تشوف أى حاجة جواه إلا لو اشعة الشمس متعامدة عليه.
لما الرؤية بتوضح وتقدر تشوف اللي جواه بتلاقي طبقة سميكة وغريبة من الخضرة تغطي قاع البئر وكمان بتسمع صوت المياه أكنها مياه بحر جارية أو شلال مياه مش مياه راكدة أبدا.
❈-❈-❈
من الكلام اللي تقال عنه إن بتتحبس فيه أرواح الكفار وتتعذب فيه.
فيه واحد زمان قال إنه كان بايت في وادي برهوت وسمع بالليل صوت طالع من البئر بيقول يا دومة يا دومة ولما سأل قالوله إن ده اسم الملك الموكل بعذاب الكفار.
كمان كانوا بيقولوا إن لما زعيم من زعماء الكفر بيموت كانوا بيشموا من البير ريحة وحشة جدًا لا تطاق.
كمان كان فيه رواية معروفة عند كتير من الناس الرواية بتقول إن كان فيه واحد غني جدا راح يؤدي فريضة الحج ولما لبس لبس الإحرام مكانش عارف يشيل فلوسه فين فراح سأل في الحرم عن أكتر واحد أمين موجود.
شاوروله على شيخ عجوز وقالوله دا أكثرنا أمانة راح الراجل وأعطى للشيخ ١٠٠٠ دينار على سبيل الأمانة وراح علشان يؤدي الفريضة.
لما رجع وراح يشوف الراجل ويسترد أمانته لقى فيه لمة من الناس حوالين المكان ولما وصل لقى الراجل توفي، طبعًا وقع في مشكلة كبيرة هيعمل إيه عايز فلوسه راح لورثة الراجل العجوز بس كلهم أجمعوا إن أبوهم مكانش معاه فلوس لما توفي.
الراجل بقى يضرب كف على كف وراح لشيخ من مشايخ الحرم اللي قاله يروح عند بئر زمزم الساعة ١٢ بالليل وينادي على اسم الراجل لو هو من أهل الجنة هيرد عليك وإسأله زي ما انت عايز وهيجاوبك.
لو مردش عليك يبقى تروح اليمن لحضرموت وتقف عند بئر برهوت وتنادي عليه لو رد عليك يبقى من أهل النار.
وفعلا الراجل راح لبئر زمزم ونده بإسم الراجل محدش رد عليه قام بسرعة شد الرحال لليمن ولما راح عند بئر برهوت ونادى على اسم الراجل رد عليه ولما سأله على مكان الفلوس قاله عالمكان اللي شال الفلوس فيه ولما سأله هو ليه هنا مش مع أهل الجنة قاله إنه كان قاطع لرحمه.
طبعا مقدرش أنفي أو اثبت الكلام ده فالعهدة على الراوي وإن كان معظم الكلام ده صعب التصديق.
من كام قرن كدا كان فيه جفاف شديد في حضرموت وندرة في المياه شديدة فقرروا ينزلوا واحد البير علشان يجيبلهم مياه فربطوا واحد بحبل ونزلوه ولما نزل قعد يزعق ويقولهم طلعوني طلعوني ولما شدوه مطلعش معاهم في الحبل إلا نصف جثته فقط لا غير.
كمان كان في واحدة بترعى الغنم وسابت ابنها الرضيع جنب البئر وفجأة الطفل اختفى من قدامها ومظهرش تاني أبدًا.
❈-❈-❈
من فترة شركة يمنية قررت تستكشف البئر ويصوروا اللي جواه فربطوا واحد بحبل ونزلوه ومعاه كاميرا فيديو ولما نزل على عمق ١٠٠ متر قالهم يطلعوه بسرعة ولما طلعوه وسألوه فيه إيه قالهم إنه شاف فوهة البئر بتقفل وهو فيه ولما جم يشوفوا الفيديو لقوا الصورة عبارة عن ظلام فقط لا غير مع إنهم نزلوه في وقت كان النور ضارب في البير.
من ضمن الأساطير والإشاعات اللي اتقالت عن البئر إن اللي بناه ملوك الجن علشان يعملوه سجن للي يتمرد أو يخالف الأوامر من الجن علشان كدا بيخرج منه الروايح والدخان السام ده.
فيه ناس بقى قالت لأ اللي حصل إن كان فيه ملك حِمْيَري كلف الجن يبنوله البئر ده علشان يخفي فيه الكنوز بتاعته ولما مات استوطن الجن البئر وعلشان كدا سموه برهوت ومعنى الإسم في اللغة الحميرية وادي الجن.
وطبعا فيه ناس أنكرت كل ده وقالوا كل دي إشاعات وأكاذيب وإن سبب ريحة المياه النَتِنَة إنها مياه راكدة مبتتحركش وطبيعي يبقى فيها أفاعي وحاجات مش كويسة إنما مش شرط تكون حاجة خارقة للطبيعة.
❈-❈-❈
هستعرض معاكم دلوقتي أحاديث الرسول صلى الله عليه وسلم والصحابة عن البئر ده
قال رسول الله صلى الله عليه وسلم «خير ماء على وجه الأرض ماء زمزم، فيه طعام من الطعم، وشفاء من السقم، وشر ماء على وجه الأرض ماء برهوت بقية حضرموت كرجل الجراد من الهوام، يصبح يتدفق، ويمسي لا بلال بها.»
قال الزمخشرى برهوت بئر بحضرموت، يقال إن بها أرواح الكفار،
كما رُوِيَ عن على بن أبى طالب رضى الله عنه قوله أن: «أبغض البقاع إلى الله تعالى وادي برهوت بحضرموت فيه بئر ماؤها أسود منتن يأوي إليه أرواح الكفار»،
ولقد ذكرها الامام الشافعى في مذهبه، حيث قال أنَّ الماء المكروه ثمانية أنواع: المشمس، وشديد الحرارة، وشديد البرودة، وماء ديار ثمود إلا بئر الناقة، وماء ديار قوم لوط، وماء بئر برهوت، وماء أرض بابل، وماء بئر ذروان .
وأخرج ابن أبي حاتم عن علي بن ابي طالب رضي الله عنه قال: " خير واديين في الناس وادي مكة ووادي إرم بأرض الهند، وشر واديين في الناس وادي الأحقاف وواد بحضرموت يدعى برهوت يلقى فيه أرواح الكفار، وخير بئر في الناس زمزم، وشر بئر في الناس برهوت، وهي في ذاك الوادي الذي بحضرموت.
وعنه رضي الله عنه انه قال أما المؤمنون فترفع أعمالهم وأرواحهم إلى السماء فتفتح لهم أبوابها وأما الكافر فيصعد بعمله وروحه حتى إذا بلغ إلى السماء نادى مناد اهبطوا به إلى سجين وهو واد بحضرموت يقال له برهوت .
❈-❈-❈
طيب كل الكلام اللي اتقال ده والغموض والألغاز اللي حوالين البئر في رأي ناس كتير اتحلت من إسبوع بالظبط.
اللي حصل إن فيه فريق من الجيولوجيين والمغامرين العمانيين قرروا يخوضوا تجربة استكشاف بئر فوجيت لأول مرة في التاريخ.
خدوا إذن من الحكومة اليمنية علشان يستكشفوا البئر ويحلوا اللغز بتاعه.
بالفعل جه الفريق العماني ونزلوا البئر في سابقة فريدة من نوعها والحمد لله محدش فيهم جراله حاجة وشافوا وورونا عجائب الله في خلقه سبحان الله.
البئر من جوة كان بديع أكنك في عالم تاني خالص عالم الخيال والأساطير بجد وهم.
أولًا فوهة البئر مخروطية الشكل من فوق صغيرة وبتكبر كل ما بننزل، عرض الفتحة من فوق ٣٠ متر، إنما عرضها من تحت حوالي ١١٦م، طول عمق البئر ١١٢ متر.
يعني الباحثين نزلو ١١٢ متر على ما وصلوا للقاع.
لقوا تحت إيه بقى مقولكوش؛ لقوا لؤلؤ كهوف بديع الشكل موجود في القاع دا غير أربع شلالات من ضمنهم شلال كبير في شرق البئر.
(علشان كدا كان فيه ناس بتسمع صول مياه جارية من فوق زي ميكون شلال وكانوا بيستغربوا جدا أهو طلع فيه شلالات بجد ومش واحد لا دا أربعة)
الشلالات بيتم تصريفها في تجويف داخلي للبئر طوله ٤ متر.
المياة داخل البئر عزبة صالحة للشرب، درجة الحرارة ٣٠° مئوية، نسبة الأكسجين طبيعية جدا.
فيه كائنات حية موجودة في قلب البئر زي؛ الأفاعي، والضفاضع، والعناكب.
جدران البئر عليها ترسبات كهفية شكلها روعة ودا طبعًا لأن الكهف بقاله مئات أو آلاف السنين.
حتة إن فيه حد نزل الكهف قبل كدا ولا لأ ففيه خلاف أنا شوفت فيديوهات كتير جدا قالت إنهم لما نزلوا البئر ملقوش أي دليل على إن فيه حد سبقهم ونزل على مر التاريخ زي الكتابة عالجدران أو آثار أقدام.
لكن فيه فيديو قال إنهم لقوا كتابة انجليزية على جدار من جدران الكهف مين الصح ومين الغلط فيهم مش عارفة بصراحة بس معظم الفيديوهات بما فيهم فيديوهات أصحاب الإكتشاف نفسهم قالوا مفيش أي دليل على نزول حد للبئر قبل كدا.
طبعا طلعت دعاوي كتير للحكومة اليمنية علشان يطوروا المنطقة ويخلوها صالحة لاستقبال السياح لأنها هتبقى مزار سياحي فريد من نوعه خصوصا السياحة البيولوجية والسياحة البيئية وسياحة المغامرات كمان.
البئر ده بقى يعتبر أرشيف طبيعي لكتير من البيانات العلمية؛ زي تغيرات المناخ خلال آلاف السنين.
لحد هنا وكله تمام والدنيا حلوة لكن اللي حصل بعد كدا اللي مش حلو أبدا.
الدنيا قامت بعد الإكتشاف ده ومقعدتش لحد النهاردة.
تضارب آراء وخناقات وتشكيك في الدين مقولكوش.
لدرجة إن ناس طلعت شككت في الأحاديث النبوية وكذبت كلام الرسول صلى الله عليه وسلم وقالوا إن العلم أثبت كذبه والعياذ بالله.
خصوصا وإن الرسول صلى الله عليه وسلم وصف ماء البئر ب أشر ماء ومياه البئر طلعت حلوة صالحة للشرب مفيهاش حاجة.
وفيه ناس تانية طلعت قالت الأحاديث دي كلها غير صحيحة ولم يثبت صحتها ما عدا الحديث اللي بيقول فيه الرسول صلى الله عليه وسلم «خير ماء على وجه الأرض ماء زمزم، فيه طعام من الطعم، وشفاء من السقم، وشر ماء على وجه الأرض ماء برهوت بقية حضرموت كرجل الجراد من الهوام، يصبح يتدفق، ويمسي لا بلال بها.»
بس فسروا الحديث وقالوا إنه الرسول قال على ماء البئر شر ماء مش منتنة أو غير صالحة للشرب وممكن نفسر الشر بأكتر من تفسير ممكن يكون كان يقصد انه أشر ماء لأنه صعب الوصول إليه وممكن الإنسان يهلك وهو بيوصله.
وأصحاب الرأي ده مش شايفين تعارض أبدا بين حديث الرسول صلى الله عليه وسلم واللي اكتشفوه في البئر.
فيه رأي تاني خالص بيقول إن أصلا البئر ده مش هو بئر برهوت الحقيقي ولا هو المقصود في أحاديث الرسول صلى الله عليه وسلم وأقوال سيدنا علي رضي الله عنه .
قالوا إن البئر الأصلي هو اللي موجود في مغارة برهوت اللي في حضرموت في وادي الأحقاف جمب قبر سيدنا هود.
قالوا إن البئر اللي في المغارة ده هو اللي بينطبق عليه أحاديث الرسول صلى الله عليه وسلم.
بيسكنه الخفافيش والأفاعي السامة وبتخرج منه رائحة كبريتية ريحتها نتنة دا غير إنه في نفس المكان اللي تم ذكره في الأحاديث أكثر من مرة وادي برهوت في حضرموت كل الأحاديث بتذكر إن موقع البئر في حضرموت.
علشان كدا طلعت دعاوي كتير عايزة الفريق العماني يقدم اعتذار رسمي عن التضليل اللي عملوه للناس ويتفضلوا مشكورين يستكشفوا البئر الحقيقية.
أصحاب النظرية دي استشهدوا كمان بكتاب "برهوت" للباحث صالح بن عبد اللاه بن حسن بلفيقة اللي صدر سنة ٢٠١٢م.
اللي قدم فيه الباحث شرح وافي وكافي عن بئر برهوت وقال في الكتاب بالأدلة والبراهين إن البئر الحقيقي هو اللي في مغارة برهوت في حضرموت مش بئر فوجيت خالص.
وأصحاب النظرية دي قالوا إن ده يعتبر تضليل للرأي العام وتشكيك في السنة النبوية وبالتالي الطعن في للإسلام.
طبعا الكلام ده معجبش أصحاب الاكتشاف ومؤيديهم وطلعوا ردوا وقالوا إن بئر فوجيت هو البئر الحقيقي وإن مغارة برهوت دي مفيهاش آبار هي مغارة وخلاص.
وكان الرد عالكلام ده إن الأحاديث تم ذكر فيها وادي برهوت مش بئر برهوت وكل الأوصاف بتقول إنه المغارة مش البئر خالص.
وطبعا فيه ناس طلعت وكذبت الموضوع كله على بعضه وقالت إن الصور متفبركة أصلا ولا فيه اكتشاف ولا نزول ولا مغامرة ولا أي بتنجان وكلها صور فوتوشوب.
طبعا أصحاب كل نظرية متعصبة جدا لرأيها وشايفين إنهم هما الصح والباقي غلط.
إيه الصح وإيه الغلط بقى الله أعلم أنا عرضت عليكم كل الآراء وانتوا احكموا براحتكم.
أتمنى أكون وضحت الصورة وجيبت كل الآراء.
دمتم بألف خير وإلى لقاء آخر إن شاء الله.
سمر إبراهيم
