سلسلة أماكن مسكونة

 بقلم الكاتبة سمر إبراهيم 

الحلقة العاشرة 

مثلث برمودا

سلسلة

أماكن مسكونة 

هنتكلم النهاردة عن مكان من اكتر الأماكن المثيرة للجدل في القرن العشرين ولحد دلوقتي بيحاول العلماء حل اللغز المحيط به (مثلث برمودا)

مثلث برمودا ‏ هو منطقة جغرافية على شكل مثلث متساوي الأضلاع ومساحته حوالي مليون كم²، يقع في المحيط الأطلسي بين برمودا، وبورتوريكو، وفلوريدا .

الغريب أن مش مثلث برمودا بس هو الوحيد المثير للجدل فيه مثلث تاني في المحيط الهادى جنب اليابان اسمه مثلث التنين انتشرت حواليه هو كمان الأساطير بس ده عايز نتكلم عنه في حلقة لواحده .

اتسمى مثلث برمودا بالاسم ده نسبة إلى جزر برمودا البريطانية ودي عبارة عن ٣٠٠ جزيرة لكن ٣٠ منها بس هي اللي مأهولة بالسكان .

بدأت شهرة مثلث برمودا من عام ١٩٥٠م لما بدأت مجموعة من الصحف تنشر عدد من المقالات عن المثلث ده وإن فيه لغز حواليه هو الذي يسبب غرق السفن وتحطم الطائرات التي تمر به ورصدت هذه الصحف  مجموعة من الحوادث المرتبطة بالمثلث. 

بدأت الحوادث في عام ١٤٩٢م لما عدا كريستوفر كولومبس من المكان وهو بيكتشف الأمريكتين وقال انه لما قرب من مكان المثلث البوصلة بتاعته اتعطلت ودى حاجة استغربلها جدا .

بعد كدا توالت الحوادث الغريبة ففى ٣٠ ديسمبر ١٨١٢م غرقت السفينة باتريوت ودي كان عليها بنت نائب رئيس الولايات المتحدة الأمريكية أرون بور وكان اسمها ثيودوسيا بور ألستون فيه ناس قالت السبب في غرق السفينة مثلث برمودا وفيه ناس قالت لأ السبب القراصنة ولسة لغز اختفائها متحلش لحد دلوقتي.

سنة ١٨٤٠م اختفت السفينة الفرنسية روزاني وبعد كام شهر لقوها لكن من غير الطقم بتاعها كله.

تكرر الوضع سنة ١٨٧٢م مع السفينة ماري سيليست التي اختفت هي الأخرى ولما لقوها بعد كام شهر كانت مفيش عليها أي حد من الطقم بتاعها.

أما بقى سنة ١٨٨١م دي كانت اللغز الكبير اللي حصل إن مجموعة من البحارة كسبوا جايزة الجايزة دي كانت عبارة عن سفينة كبيرة اسمها إلين اوستن وبعد ما ابحروا بيها اختفت السفينة زيها زي غيرها اللي مش طبيعي بقى إنها ظهرت بعدها بكام شهر سليمة من غير خدش لكن من غير ولا واحد من الطقم بتاعها ولما أبحر عليها مجموعة تانية من البحارة اختفوا هما كمان من غير أي أثر.

في ٤ مارس ١٩١٨م وأثناء الحرب العالمية الأولى حصلت أكبر فاجعة في تاريخ البحرية الأمريكية حيث اختفت حاملة الجنود يو اس اس سايكلوبس بقيادة الجنرال جورج ورلي  في منطقة مثلث برمودا وكان عليها حوالى ٣٠٩ شخص ومظهرش ليهم أي أثر . 

٥ ديسمبر ١٩٤٥م خرجت ٥ قاذفات صواريخ أمريكية لتدريب روتيني عادي جدا كان كل الطيارين اللي على الطيارات من المتدربين عديمى الخبرة ما عدا قائد السرب هو اللي كان طيار متمرس وكان اسمه تشارلز تيلور واشتهرت الرحلة دى باسم الرحلة ١٩  وكالعادة اختفت الطيارات بغير رجعة والجدير بالذكر أن آخر اتصال لاسلكى بالطيار قال أنهم في خطر وان المياه قدامه بيضاء وبعدين قال انها اتحولت للون الأخضر وبعدين انقطع الاتصال ولما طلعوا طيارة إنقاذ علشان تلحقهم اختفت هيا كمان من غير أثر وراح في الموضوع ده ٢٧ شخص ومظهرتش حتى حطام للطيارات دي ومن ضمن الكلام اللي اتقال عنها إن الكائنات الفضائية خطفت الطيارات وخدتها المريخ..

٢٨ ديسمبر ١٩٤٨م اختفت الطيارة  دوغلاس دي سي ودي كانت خارجة من سان خوان في بورتريكو رايحة ميامي ودي راح ضحيتها ٣٢ شخص.

وفي سنة ١٩٦٣م اختفت طيارتين من نوع كي سي ١٣٥ بنفس الطريقة.

مش ملاحظين إن معظم الحوادث كانت في شهر ديسمبر يا ترا فيه سبب لكدا ولا مجرد صدفة.

دى كانت بعض الحوادث إللى حصلت في مثلث برمودا مش كلها طبعا إنما دي كانت أشهرها تعالوا بقى نشوف ايه الكلام اللي اتقال عن أسباب الحوادث دي سواء أسباب منطقية أو أسباب أسطورية. 

فيه ناس قالت ان سبب الحوادث دى هو غرق قارة اطلانتس داخل المثلث ده وان الاهرامات اللي كانت موجودة على قارة اطلانتس واللي دلوقتي موجودة في قاع المحيط يصدر منها اشعاعات هي الاي تسبب الحوادث دي، فيه اللي قال إن الاهرامات دي كانوا اهل اطلانتس بيستخدموها لتوليد الطاقة، وفيه اللي قال لأ دى كانت بتستخدم كبوابة للعبور لأزمنة مختلفة آلات زمن بمعنى أصح.

رأي تاني قال  ان المثلث ده بيقع فيه عرش الشيطان ومليان بالشياطين والجن وهما اللي بيوقعوا الطيارات ويغرقوا السفن.

رأي ثالث  يقول لأ دول يأجوج ومأجوج هما اللي ببعيشوا في المثلث ده وهما اللي بيعملوا كدا.

وفيه اللي شطح بخياله وقال لأ دا المهدى المنتظر وعيلته وأتباعه هما اللي عايشين هناك.

وطبعا فيه اللي طلع وقال دول الكائنات الفضائية اللي بتعمل كدا لأن المثلث ده هو بوابة عبورهم من وإلى الارض.

وفيه اللي قال ان فيه وحش ضخم يعيش في المكان ده وهو اللي بيعمل كدا، منهم من قال انه اخطبوط ضخم، وفيه اللي قال إنه كائن محدش يعرف نوعه، وفيه اللي قال إنها مجموعة من أسماك القرش بس أصحاب النظرية دي أحب أقولهم طب ده بالنسبة للسفن طب الطيارات بقى وقعها إزاي كان بيطلق شرارات من عينه عشان يوقعهم ولا ايه؟

طبعا كل دى استنتاجات قالها ناس مؤمنين بالحاجات الخارقة للطبيعة ومسيطرة عليهم الفكرة دى تعالوا بقى نشوف أهل العلم قالوا إيه الأسباب ورا الحوادث دى؟

العلماء قالوا ان السبب في الحوادث دي أسباب طبيعية جدا من ضمنها غاز هيدرات الميثان وإن الغاز ده موجود في قاع البحار والمحيطات وبيصدر فقاعات بتغير خصائص المية بتحول المية لمية رغوية قليلة الكثافة ممكن تؤدى لغرق سفن عملاقة في لحظات قليلة (وحسب ما نقلت صحيفة سبوتنيك نيوز إن مجموعة من الباحثين من جامعة القطب الشمالي النرويجية أكتشفوا حفرًا في قاع البحر ناجمة عن انفجارات ضخمة لكريات فقاعات من غاز الميثان  والتي تراكمت عبر الزمن أسفل البحر مبيّنين أنّ قطر تلك الحفر المكتشفة يصل إلى 500 متر، فيما يبلغ عمقها حوالي 45 مترا، ويقدر الباحثون أن انبعاث الغاز من تلك الحفر قد أدى إلى ارتفاع في حرارة مياه المحيط، بعدما اختلطت المياه بنسبة من الغاز. ويرجح العلماء أن تكون مياه "المثلث" قد فقدت نسبة مهمة من كثافتها جراء الاختلاط بالغاز، مما أدى إلى غرق السفن التي تعبرها) 

ده بالنسبة للسفن أما الطيارات فقالوا السبب فى وقوعها هو الغيوم حيث أن المنطقة الموجود بها المثلث بيزيد فيها كثافة الغيوم وده بيعمل زي قنابل جوية ودوامات هوائية كفيلة بإسقاط الطائرات.

فيه كمان ارتفاع المجال المغناطيسي للمكان وهو ده إللى بيعطل البوصلات وأجهزة التحكم في الطيارات والسفن وبيؤدي لتحطمها. 

فيه كمان الأمواج المحيطية القاتلة ودا ارتفاعها عالي جدا ممكن يبلغ عشرات الأمتار ويبلع أكبر سفينة.

فيه كمان العواصف الاستوائية وفيه الأسباب الطبيعية إللى بتؤدى للحوادث بشكل طبيعى عادي جدا وفيه الأخطاء البشرية زي ما شوفنا على مر العصور ممكن خطأ بشرى يؤدي لكارثة ومن ضمن الأسباب اللي اتقالت عن اختفاء الرحلة ١٩ إن تشارلز تيلور كان معروف عنه ضياع الطريق وكان سكير ومكانش اصلا المفروض هو اللي يطلع  بالرحلة بس مكانش فيه بديل وبما إن باقى السرب كان من المتدربين عديمي الخبرة حصل اللي حصل. 

كمان اتقال ان من ضمن الأسباب هو القرصنة ودى منتشرة في البحار من القرن ال ١٦ وكانت سبب في سرقة وغرق كتير من السفن كمان قالوا ان سبب غرق يو اس اس سايكلوبس هو عمل عدائي من الدول المعادية فى الحرب العالمية الأولى مش المثلث ولا حاجة .

وفيه بقى مجموعة من العلماء اللي شايفين ان مفيش أي لغز ولا أي حاجة غريبة وان المنطقة زيها زي غيرها من المناطق البحرية في المحيط معرضة للحوادث وزي ما فيه حوادث فيه كمان سفن وطيارات عدت من هناك ومحصلهاش أي حاجة وإن الموضوع كله عبارة عن شو اعلامى وبروباجندا اعلامية هي اللي عملت الحوار ده كله و طبعا المخرجين والمؤلفين السينمائيين كان ليهم دور كبير فى تضخيم الأحداث لحد ما وصلت للشهرة دي كلها انما الحكاية ولا حاجة خارقة للطبيعة ولا لغز ولا اى حاجة. 

دى كانت معظم الآراء اللي اتقالت في الموضوع ده ولكم مطلق الحرية في تصديق الرأي اللي يعجبكم.

سمر ابراهيم