الحلقة الرابعة عشر

قصر روز هول

حد فيكم سمع عن قصر روز هول المسكون بالأشباح في جمايكا؟

طب حد  سمع قبل كدا عن ساحرة جمايكا البيضاء؟

إللى ميعرفش الحكاية تعالوا أحكيلكم عليها.

القصة بدأت سنة ١٧٤٦م لما اشترى واحد إنجليزي إسمه هنري فانج أرض في جمايكا مساحتها ٢٩٠ متر علشان يبني على جزء منها بيت ويزرع الباقي.

سنة ١٧٤٧م اتجوز هنري واحدة إسمها روزا كيلي ودي كانت بنت لأب وأم أيرلنديين عايشين في جمايكا.

هنري كان بيحب روزا  جدا بس مع الأسف القدر مأمهلوش وتوفى بعد كان شهر من جوازه هو ورزا.

بعد ٣ سنين من وفاة هنري قررت روزا إنها تستأنف حياتها مرة تانية واتجوزت سنة ١٧٥٠م من واحد إسمه جورج آش ودا كان واحد غني جدا في أبريشية سانت جيمس.

بعد جواز روزا وجورج قرر يبنيلها قصر جميل علشان يعيشوا فيه سمى القصر ده روز هول ويقال إنه سماه بالإسم ده تيمنا بإسم روزا لأنه كان بيحبها جدا.

القصر زي ما قولت كان في مزرعة روز هول  وتم بناءه في خليج مونتيغو في جامايكا، وكان عبارة عن قصر فخم جدا تم بناؤه على طراز معماري فريد، كان بيحتوي على الكثير من الزخارف والنقوش وكانت  المفروشات والستائر بتاعته مصنوعة من الحرير الغالي والنادر والقصر كان موجود وسط واحدة من أكبر مزارع السكر في جامايكا.

بعد سنتين من الجواز يعني سنة ١٧٥٢م وبعد مدة قليلة كدا من بناء القصر حصل جيمس هنري ومات هو كمان وبقت روزا أرملة للمرة التانية.

بعد سنة من وفاة جيمس يعني سنة ١٧٥٣م اتجوزت روزا واحد إسمه نوروود ويتر ودا كان صاحب مزرعة من ويستمورلاند.

عاشت روزا ونوروود في سعادة طول مدة جوازهم بس نوروود كان مسرف جدا ضيع كل ثروته وثروة مراته واتراكمت عليهم الديون وانتهى جوازهم بوفاة نوروود سنة ١٧٦٧م يعني استمر جوازهم تقريبا ١٤ سنة.

بعد سنة من وفاة ويتر اتجوزت روزا للمرة الرابعة سنة ١٧٦٨م من واحد إسمه جون بالمر ودا كان أرمل وعنده ولدين عايشين في إنجلترا.

(بسم الله ماشاء الله روزا مكانتش عاتقة كانت بتدوب الرجالة أكتر ما بتدوب الجزم اللهم صلي عالنبي😂😂😂)

استمر جواز بالمر وروزا وكانوا عايشين سعدا جدا لحد سنة ١٧٩٠م.

طبعا كلكوا توقعتوا إيه اللي حصل وزمانكوا بتقولوا إيه الولية النحس اللي بتخلص عالرجالة فشر الأرملة السوداء دي بس أحب أقولكم إنكم ظلمتوا الست الغلبانة اللي مخلصتش الا على ٣ رحالة بس.

اللي حصل عكس توقعاتكم لأن المرادي روزا هي اللي فلسعت وورث جون أملاكها اللي من ضمنها القصر وضمها لأملاكه ومات جون بعدها بسبع سنين يعني سنة ١٧٩٦م.

بعد موت جون طبعا ولاده ورثوه بس الولدين فضلوا عايشين في إنجلترا ومرضاش ولا واحد فيهم يروح ياخد أملاكه في جمايكا.

بعد موت أولاد جون بالمر راحت ملكية الأراضي والقصر لحفيد بالمر اللي كان بيحمل نفس إسمه "جون روز بالمر"

❈-❈-❈

سنة ١٨١٨م راح جون روز بالمر على جمايكا واستلم ثروته وبدأ يتولى إدارة أملاكه.

سنة ١٨٢٠م اتعرف بالمر على بنت جميلة جدا إسمها آني بيترسون.

وقرر يتجوزها ودي كانت نقطة التحول الكبرى في حياة جون بالمر والقصر بتاعه.

مين هي آني دي؟ وحكايتها إيه؟ تعالوا أقولكم.

الحكاية بدأت في هايتي أوائل القرن ال ١٩ لما اتولدت طفلة صغيرة إسمها آنى باترسون فى هايتي من أبوين بريطانيين  أب من إنجلترا وأم من أيرلندا.

عاشت آنى مع أسرتها فى حياة سوية هادية لحد ما شاء القدر إن أبوها وأمها يموتوا بالحمى الصفراء وهى لسة طفلة صغيرة  ودي كانت نقطة التحول فى حياة آنى.

خدتها الخدامة بتاعتهم علشان تربيها والخدامة أو المربية دى كانت ضليعة فى ممارسة السحر الأسود إللى عملته لآنى وربتها عليه لحد ما شريته شرب واتفوقت على معلمتها نفسها.

لما كبرت آنى إللى  كانت جميلة جدا جدا جدا كانت فاتنة بكل معانى الكلمة كانت محط إعجاب كل إللى حواليها لكن مكانش ولا واحد من المعجبين بيها قادر يلفت نظرها أو يرضى طموحها.

فى يوم كان جون بالمر في رحلة تجارية في هايتي وشافها هناك ويقال إنها هي اللي راحت جمايكا علشان تدور على زوج ثري تعرف توقعه في شباكها وقد كان ووقعت جون.

هو اللي راح هايتي أو هي اللي راحت جمايكا مش هتفرق النتيجة واحدة  طبعا جون أول ما شافها اتفتن بجمال آني وطلبها للجواز وطبعا دا عريس لقطة استحالة يترفض وبالفعل تم الزواج وكانت آنى ف الوقت ده عندها ١٨ سنة وخدها جون بالمر معاه جمايكا علشان تعيش معاه فى القصر بتاعه (وكانت بداية اللعنة أن أن أن)

❈-❈-❈

عاشت آنى مع جوزها فى القصر بتاعه كام شهر لكن مبطلتش السحر بتاعها كانت بتمارس السحر فى بدروم القصر وكانت بتمارسه على العبيد والخدم ويقال كمان إنها كانت بتعمل علاقات مع الخدم واللي تزهق منه تمارس عليه طقوس السحر بتاعتها.

(من الآخر كدا كانت بتاخد غرضها منه وترميه)

لما الموضوع زاد عن حده الريحة فاحت وعرف الزوج إللى كان نايم فى العسل وفاكر إنه اتجوز ملاك من الملايكة.

طبعا كانت مفاجئة بالنسبالة مكانش متخيل إن واحدة بالجمال ده تعمل الحاجات دى لكنه كان بيحبها جدا وميقدرش يستغنى عنها فاكتفى بإنه يمنعها من ممارسة السحر ويؤمرها إنها توقف كل إللى بتعمله.

طبعا آنى قالتله إنت تؤمر يا حبيبى هو أنا عندى أغلى منك يا بعلي وبعدها بكام يوم مات جون بالمر فى ظروف غامضة بيقولوا أزمة قلبية وطبعا ناس كتير قالت إن آني هي الي قتلته وحطت سم في القهوة بتاعته بس اللي يثبت بقى.

طبعا بعد موت جوزها ورثت كل ثروته وبقت من أغنى أغنياء جمايكا وطبعا رجعت تمارس السحر زى ما هى عايزة محدش يقدر يكلمها بقى ويلا يا عيال المكان مكاننا والقصر قصرنا.

يقال إنها كانت حاطة أفخاخ في كل مكان في جنينة القصر علشان محدش من الخدم يقدر يهرب.

طبعا أرملة جميلة غنية كاملة الأوصاف زى ما بيقولوا لازم تبقى محط أنظار الكل والكل يخطب ودها (ميعرفوش إللى فيها يا عينى)

اتجوزت آنى مرتين بعد جوزها والاتنين ماتوا بنفس الطريقة أزمة قلبية وإن كان اتقال كلام كتير جدا عن الموضوع ده فيه ناس وصل بيهم الحال إنهم يقولوا إنها قتلت جوزها التاني بطعنة نافذة في القلب وصبت الزيت المغلي في ودانه علشان تضمن موته أما جوزها التالت يقال إنها خنقته لحد ما مات.

طبعا كل واحد من اللي اتجوزتهم  كان بيبقى أغنى من التانى وكانت آنى بتورثهم طبعا فأصبح عندها فى الآخر ثروة ضخمة وعبيد كتير جدا وصل عددهم ل ٢٠٠٠ عبد كانت بتمارس عليهم طقوس السحر الأسود وبتقدم الأطفال قرابين للشياطين علشان ينفذوا اوامرها وحاجة فى منتهى البشاعة وكانت بتدفن الجثث فى الخباثة فى حديقة القصر.

استمر الحال على كدا ومات بسببها معظم العبيد واتحولت حديقة القصر من مكان للورود والأشجار لمدافن للعبيد كانت القبور في كل مكان ومن كتر إللى كانت بتعمله كانوا مسمينها ساحرة روز هول البيضاء أو الساحرة البيضاء.

❈-❈-❈

طيب بعد المرار دا كله قدروا يخلصوا منها إزاي؟

بصراحة فيه ٤ آراء عن طريقة موتها:

أول رأي: قالوا إن العبيد اتحالفوا وهجموا عليها وقتلوها سنة ١٩٣١م ودفنوها في قبر خراساني في الحديقة جمب جثث العبيد اللي قتلتهم.

 وحطوا تعاويز على القبر علشان روحها متخرجش منه بس التعاويز مكانتش مجدية أبدا وخرجت روحها تعفرتهم كلهم.

الرأي التاني: قالوا إن آني كانت بتحب واحد إسمه روبرت راذرفورد بس روبرت ده كان عنده حفيد بيحبه جدا جدا إسمه تاكو ولأن آني كانت عايزة روبرت ليها لواحدها قررت تتخلص من حفيده وألقت عليه تعويذة قديمة معروفة باسم "البيج القديم" والتعويذة دي كانت عبارة عن تحضير جن او شبح وتسليطه على الشخص المقصود ويفضل وراه لحد ما يدبل ويموت.

لما روبرت عرف اللي حصل لحفيده هجم عليها وخنقها لحد ما ماتت وبرضه العبيد خدوها ودفنوها في القبر الخراساني.

الرأي التالت بيقول: إن تاكو مكانش ولد صغير ولا حاجة دي كانت ست عجوزة آني قتلت حفيدها وهي اتربصتلها وقتلتها علشان تنتقم لحفيدها.

الرأي الأخير بيقول: إن تاكو ده كان واحد من العبيد وكان على علم بفنون السحر الأسود هو كمان بس طبعا كانت آنى أقوى منه بكتير فبدأ يعمل تعاويز علشان يحجم قوتها ويقدر يسيطر عليها وفضل مستنى الفرصة المناسبة علشان تكون في لحظة ضعف ويقدر يخلص عليها لحد ما جت اللحظة المناسبة وقدر تاكو يقتل آنى فعلا  ودفنها فى التابوت الخراساني وحطه فى الجنينة وعمل عليه طلاسم وتعاوييز علشان روحها الشريرة أو شبحها أو الشياطين بتوعها ميقدروش يخرجوا من التابوت زي ما أجمعت كل الروايات بس برضو التعاويذ مكانتش مجدية أبدا وخرجت روح آني ومعاها شياطينها.

فضلت الحوادث الغريبة والمرعبة تحصل فى القصر لحد ما طفش باقى العبيد الموجودين وبقى القصر مهجور ومرتع للأرواح الشريرة والشياطين وفضلت الناس مرعوبه منه وكانوا بيقولوا إنهم بيسمعوا دوشة كتيرة طالعة من القصر وصوت صراخ وأنوار بتقيد وتطفى ونور ملون وصوت مزيكا وخلافه.

كمان فيه ناس كتير أجمعت إنها شافت حد غامض لابس عباية خضرا وراكب حصان اسود بيجري بيه في الأراضي اللي حوالين القصر بيظهر فجأة ويختفي برضو فجأة.

ناس تانية قالت إنها شافت واحدة ست لابسة هدوم بيضا وواقفة على سلالم القصر ونفس الست دي بنفس المواصفات شافوها بتتحرك جوة القصر وطبعا مش محتاجة أقولكم مين الست دي.

استمر القصر مهجور لاكتر من ١٣٠ سنة لحد ما  اشترته ملكة جمال الولايات المتحدة الأمريكية في الستينيات "ميشيل رولنز" وقامت بتجديده وعملته مزار سياحى لكل عشاق المغامرة والرعب وأى حد عايز يشوف مسرح جرايم آنى باترسون ولحد دلوقتى بيقال إن الأحداث الغريبة لسة بتحصل جوة القصر.

طبعا القصر بقى سبب في نشاط السياحة في جمايكا وبقى الناس يروحوله من كل أنحاء العالم علشان يزوروه.

فيه ناس بقى كذبت الكلام دا كله وقالوا دي كلها أساطير وخرافات قالوا إن آني  ولا اتولدت في هايتي ولا كان عندها مربية هاييتية ولا اتعلمت السحر ولا أي بتنجان وإنها اتجوزت جون بالمر سنة ١٨٢٠م فعلا وعاشت معاه حياةطبيعية جدا ولا قتلته ولا حاجة هو مات بصورة طبيعية جدا سنة ١٨٢٧م وبعد كدا باعت آني القصر ب ٢٠٠ جنيه استرليني وماتت آني سنة ١٨٤٦م يعني بعد ١٥ سنة من قصة قتلها الزعومة ولما ماتت ورثت ثروتها اللي كانت ضئيلة جدا بنتها "غيانا ماري سبنس"

طيب لو الكلام ده حقيقي وآني بريئة فعلا إزاي طلعت الإشاعات دي كلها عليها وعلى القصر؟

قالوا إن الإشاعة بدأت سنة ١٨٦٨م لما نشر رئيس تحرير جريدة "فالماوث" كتيب قال فيه معظم الكلام اللي إحنا قولناه ده من سحر وقتل وتعذيب وخلافه بس كان الكلام دا كله مش على آني باترسون كان على روزا بالمر صاحبة القصر الأصلية واللي القصر اتبنى علشانها وساعده في كلامه ده إن روزا اتجوزت أربع مرات ومعظم ازواجها كانو بيموتوا بعد الجواز بمدة قليلة.

طبعا القصة اتنشرت جدا وبقى كل واحد يزود عليها شوية لحد سنة ١٩١١م لما اتنشر كتاب بيتكلم عن تاريخ سانت جيمس والكتاب أعاد سرد القصة بس قال إن الساحرة كانت آني مش روزا.

سنة ١٩٢٩م ثبتت الإشاعة على آني والناس كلها قالت عنها إنها هي ساحرة جمايكا البيضاء لما نشر "هربرت ج. دي ليسير" روايته اللي بعنوان الساحرة البيضاء  لروز هول "The White Witch of Rose Hall"

وذكر في الرواية كل الكلام اللي قولناه عنها من ولادتها لقتلها ودفنها والعفاريت اللي ظهرت بعد موتها وطبعا الناس صدقت كل كلامه ومحطوش كلامه على إنه ممكن يكون رواية ممكن تكون من وحي خيال المؤلف مش حاجة حقيقية ١٠٠%.

طيب لو الكلام ده حقيقي ومفيش عفاريت ولا آني ساحرة ولا اي حاجة من دي إيه حوار العفاريت والحاجات الغريبة اللي الناس أجمعت إنها بتحصل في القصر دي.

قالولك بقى لو القصر مسكون فعلا فهو مسكون بحاجة مالهاش أي علاقة بآني ولا أزواجها ولا العبيد بتوعها وفيه منهم ناس قالت إن دي روح آني خرجت غضبانة من الكلام اللي اتقال عنها والتشوه اللي حصل لسيرتها.

انتوا بقى رأيكم إيه في الموضوع ده شايفين إيه الكلام الصح في الروايتين وهل آني عملت كل الجرايم دي فعلا ولا كل دي إشاعات ولو إشاعات إيه سر ظهور الحاجات الغريبة اللي بتحصل في القصر ولا ده كله مجرد تخيلات وتهيؤات حصلت للناس من كتر تصديقهم للإشاعة.

انا شخصيا مش قادرة أحدد الحقيقة من الإشاعة بصراحة طبعا السحر موجود ومذكور فى القرآن ربنا يعافينا جميعا يارب ويبعد عنا الأذى وبرضو وارد جدا تكون دي كلها إشاعات.

دي كانت قصة قصر روز هول بكل الآراء اللي اتقالت عنه وعن آني باترسون ساحرة جمايكا البيضاء أتمنى تكون عجبتكم ولنا لقاء آخر إن شاء الله مع مكان مسكون جديد من سلسلة أماكن مسكونة.

دمتم بالف خير.

سمر إبراهيم