الفصل الرابع 

انس رجع من شغله وهو مترقب رد فعل مكة بعد اللي عملوا امبارح وكان طول الطريق بيتخيل سيناريوهات كتير لاي حوار ممكن يدور بينهم وصل وفتح الباب لكنة اتفاجا وفضل باصص قدامة ثواني يستوعب اللي شايفه 

احلام ...

ايه يا انس هتفضل واقف عندك كتير مش هترحب بينا ولا ايه ؟

انس وهو بيحضنها ... 

ايه المفاجأة الحلوة دي حضرتك جيتي امتي ؟ ومقلتليش ليه انك جايه ؟

احلام ...

جيت امتي فانا ياسيدي لسه جايه من ساعتين كدة ومقلتلكش ليه حبيت اعملهالك مفاجأة ومكة كانت هتتصل بيك بس انا وصابرين قولنلها لا 

انس وهو بيدور علي اختة بعنيه ...

ايه دا البت صابرين هنا وحشتني اوي فينها

صابرين وهي خارجة من المطبخ ...

انا اهو يا دكتور مراتك بتعملنا وليمة جوة مش عشا وكل ما ادخل اساعدها تطردني برة شر طردة يرضيك كدة برستيجي بقا ف الأرض والله 

انس ...

وحشتيني يا صاصا اوي عامله ايه ؟ 

صابرين ....

بغض النظر عن صاصا اللي مبحبهاش بس انت كمان وحشتني اوي لما صدقت ماما وافقت نيجي نشوفكم 

خرجت مكة من المطبخ وهي شايلة اطباق ومبتسمة ابتسامة صافيه 

مكة ...

حمد لله على السلامه يا حبيبي والله كنت هتصل اقولك بس خالتو مرضيتش خالص 

انس كان متعود من مكة علي كدة قدام الناس علاقتهم مثاليه جدا لكن بينهم وبين بعض حواجز وخناقات مش بتنتهي

انس ببتسامة ...

الله يسلمك حبيبتي احلي مفاجأة بصراحة 

صابرين ...

ها مسموحلي احط معاكي الاكل ع السفرة ولا هتهزق بردو في ليلتكم دي 

مكة بضحك ...

لا تعالي حطي معايا يلا عفونا عنك خلاص 

علي السفرة اللي كانت مليانة اكل كأنها عزومة مش عشا ابدا 

احلام بعتاب ...

بردو تعبتي نفسك يا مكة يا بنتي دا انا بقيت اجي علي غفلة بسبب اللي بتعمليه دا هتخليني كدة مجيش خالص بقا

مكة ...

بعمل ايه بس والله كل حاجة كانت موجودة في الثلاجة انا متعبتش ولا حاجة حضرتك يا خالتو اللي بتزعليني لما بتقولي كدة 

صابرين ...

تسلم ايديكي يا حبيبتي الاكل كله يجنن

انس ببتسامة بسيطة ...

تسلم ايديكي يا حبيبتي 

مكة ببتسامة ...

تسلمو يارب يلا بقا كفايه رغي وكلو كويس الاكل دا كله لازم يخلص حااالا 

صابرين ... 

والله وحشتيني اوي يا مكة بقا يا بنتي نبقي صحاب و بنات خاله وكمان مرات اخويا الوحيد ولازم أنا بس اللي تجيلك كل مرة انا وماما يا رخمة اغلطي مرة وابقي تعالي قضي معانا يومين تلاته كدة والله هتتبسطي اوي 

مكة ....

اكيد هنبسط المشكلة أن انس اجازاتة مبقاش ليها اي مواعيد و نبطشيات كتير فمش عارفين نظبطها سوا بس 

احلام ...

ايه يا سي انس هي البلد موحشتكش ولا ايه ؟ علي راي البت صابرين لازم كل مرة احنا اللي نيجي 

انس ...

والله غصب عني يا ست الكل حقك عليا بس فعلا زي ما مكة قالت انا بقالي فترة كبيرة ظروف شغلي ملخبطة شويه زميل تحصل عندة حاله وفاة أشيل مكانة زميل يتعب أشيل مكانة لما خلاص هلكت والله 

احلام ...

يا حبيبي طب ما انت كمان لازم ترتاح أن لجسدك عليك حق يا دكتور كدة مينفعش خالص يا انس 

انس ببتسامة ...

اكيد انا ناوي اخد إجازة شهر كامل كدة اريح فيها بعد الطحن دا وان شاء الله هجيب مكة وتالا ونجيلك في الإجازة دي بس أخدها الاول 

صابرين ...

اه أن شاء الله علي السنة الجايه الكلام دا 

انس ...

لا يا لمضي هانم أن شاء الله قريب جدا 

احلام ...

ايه مكة سكتي فجأة يعني ؟

مكة بتوتر بسيط...

ابدا يا حبيبتي بفكر بس ماما كمان لما تشفوكم هيكون رد فعلها ايه هتفرح اوي 

احلام ...

وهي كمان وحشتني اوي بعد العشا أن شاء الله ننزل نسلم عليها 

انس ...

هي متعرفش لحد دلوقتي ولا ايه ؟

مكة ..

لا وقت ما هما جم كانت ماما نايمة و بابا في المعرض فقالت تفاجاها هي كمان بعد ما تطمن عليك 

انس ...

تمام بعد العشا ننزل سوا نسلم عليهم كلنا

❈-❈-❈

عند ابتسام عمار فضل ساعه يتحايل علي لمار عشان تخرج من الاوضه وتتغدي معاهم ولما خرجت قعدو يهزرو سوا وقليل اوي لو وجهو كلام ل ابتسام ومتجاهلين زهرة تماما 

حاولت زهرة تتماسك علي قد ما تقدر وبعد الغدا زهرة كانت عايزة تقف تغسل المواعين بس ابتسام رفضت كانت حسه بيها وبأن خنقتها زادت اوي طلبت منها تطلع شقتها وترتاح وزهرة وافقت علي طول وطلعت كان عمار و لمار ف البلكونة ومحسوش بيها 

بعد مدة دخلو من البلكونة 

عمار ... 

الواحد مصدع اوي 

لمار ...

قصدك ايه بقا لو بتخلع عشان متسهرش معايا هزعل بجد 

عمار ...

انا اتكلمت يا بت مالك بتقولي شكل للبيع ليه هو فنجان قهوه وهبقي تمام .. زهرة زهررررة 

خرجت ابتسام بصنيه عليها فنجان قهوة وكوباتين شاي 

ابتسام بهدوء ...

زهرة طلعت ترتاح شوية من الصبح بتغسل وبتعمل حاجات في الشقة تعبت واصريت عليها تطلع خد القهوة اهي مش بتندة علشان كدة بردو 

عمار كان باين عليه القلق علي زهرة لكن مش قادر يطلع عارف إن لو طلع هيكون فيها نكد من اختة شهر قدام خد الفنجان من غير كلام وبدء يشربه ولمار فرحت أنها خلصت منها بدري بدري والسهرة هتبقي مع اخوها للصبح وبدءت هي كمان تشرب الشاي 

وخلال دقائق كانت لمار نامت علي نفسها وهي قاعدة عمار نده عليها كزا مرة بس كانت نائمة بعمق 

ابتسام ...

متقلقش دا طبيعي من وقت ما حملت ديما تنام بدري اوي كانت لسه بتحكلي كدة قبل ما تيجي 

عمار ...

بجد يا ماما عادي يعني ولا اتصل بالدكتور ؟

ابتسام برفعه حاجب ...

انت هتخاف علي بنتي اكتر مني ولا ايه ؟ قلتلك دا طبيعي في حملها اطلع يلا انت كمان اطمن علي مراتك اللي طلعت تعبانة دي اتفضل 

عمار طلع جري علي زهرة فتح الباب بهدوء عشان لو نايمة واول ما دخل الاوضه لاقاها قاعدة علي السرير وبتعيط في صمت قرب عليها 

عمار ...

حبيبتي عامله ايه دلوقتي ماما بتقول انك طلعتي عشان تعبانة طمنيني عنك ؟

زهرة بصتله بلوم ومردتش عليه 

عمار ...

زهرة حقك عليا انتي عارفه اني مقصدش ازعلك بس مينفعش تيجي تقعد يومين معانا وازعلها مني 

زهرة بصوت مخنوق ...

بس ينفع تزعلني انا مش كدة ينفع كل مرة تيجي عليا انا قدامها وتصالحني بينك وبيني صح ؟

عمار ...

انا مقصدش ازعلك يا حبيبتي أن شاء الله بكرة تخلف وتنشغل بالبنوتة بتاعتها والمشاكل دي كلها تخلص خلاص بقا خلي قلبك ابيض يا زهرتي أنني عارفه اني بحبك صح 

زهرة ...

عمار انا تعبت من وضع دا بجد 

عمار ...

وعد يا زهرتي لو بعد ما تقوم بالسلامة من الولادة الوضع متحسنش انا هتصرف 

زهرة ...

هتتصرف ازاي يعني ؟

عمار ... 

زهرة خلاص بقا قلتلك مسأله وقت والوضع هيتغير 

زهرة بإصرار ...

لا احب اعرف لو هي متغيرتش انت هتتصرف ازاي ؟

عمار ...

مش مفكر في حاجة محددة يا زهرة بس وعد اني هتصرف 

زهرة ...

طب يا عمار لو هي بعد ما تولد متغيرتش ودا شيء انا واثقه فيه يبقي وقتها لو سمحت اي وقت هي تكون موجودة انا هقعد هنا في شقتي مش هتجمع معاها في اي مكان تمام ولا ايه ؟

عمار بضيق ...

نعم ! عايزاها تتحرم تدخل بيت اخوها الوحيد ولا ايه ؟

زهرة ... 

لا طبعا بس اولا يا عمار هي مش بتدخل هنا ديما بتكون يا في شقه ماما ابتسام يا في شقه مرات عمي محسن في التجمعات ثانيا اي وقت تدخل بيت اخوها طبعا دا بيتها قبل ما يكون بيتي وقتها انا بكل هدوء هنزل عند اي حد مرات عمي أو ماما أو حتي هايدي 

عمار ...

زهرة متكبريش المواضيع لو سمحتي 

زهرة ...

والله انا كدة مش بكبرها انا بشوف حل من غير اي تصادم بين اي أطراف 

عمار منهي الحديث ...

خلاص يا زهرة لو متغيرتش بعد الولادة هعملك اللي انتي عايزاة مرضيه كدة يا ستي 

زهرة ...

اه مرضيه وربنا يصبرني شهرين اللي فضلين دول 

عمار ...

طب ايه هتقدري تسهري معايا شوية ولا تعبانة فعلا انتي وحشاني اوي 

زهرة ...

لا يا حبيبي مش تعبانة هسهر معاك وهعملك عصير مانجة اللي بتحبه كمان 

عمار ...

ايوة كدة هو دا الكلام يا قلبي هدخل اخد شور علي ما تجهزي العصير 

ابتسمت زهرة وقامت دخلت المطبخ هي تعبت تعبت من كتر المشاكل والتريقه والنوم معيطة كان لازم تتكلم لازم تبعد عن كل التوتر دا 

ابتسمت بحزن علي علاقتها بعمار اللي بتكون مثاليه طول ما هما لوحدهم لكن قدام الناس وتحديدا في وجود لمار علاقتهم بيبان معدنها ضعيفه وهشه

❈-❈-❈

مكة وانس نزلو مع احلام وصابرين يسلمو علي ايمان ومحسن ومكة انتهزت فرصه أنهم مشغولين بالسلامات والاخبار وبعتت رساله لانس علي التلفون

مكة ...

انسي اني اسافر البلد عندكم تمام ؟ شوف بقا هتبقي تعتذر تقول ايه ل ماماتك بعد ما أكدت عليها أننا رايحين 

انس رد عليها ...

متبقيش تيجي هبقي اسافر انا لوحدي

مكة ...

ياسلام عشان ماماتك تعرف اني انا ال مش عايزة اروح عندكم صح

انس ...

مش دي الحقيقه ؟ 

مكة ...

انس بطل برودك دا انا مش برتاح هناك ومش بعرف انام من الناموس ومبحبش ماماتك تزعل مني أو تحس اني مانعه ابنها عنها ميبقاش دا جزاتي في الاخر 

انس ...

مكة خلاصه الموضوع انا هبقي اسافر لامي البلد تمام عايزة تيجي اهلا وسهلا مش عايزة ممكن وقتها نقول تعبانة أو اي حجة عشان صورة جلالتك متتهزش قدامهم 

انس مستناش يشوف ردها وقفل التلفون وبدء يتكلم معاهم وهي كمان حاولت تبان عاديه وميبنش عليها الغضب الشديد اللي جواها

عدي كان اتحسن كتير ايمان كلمته وعرفته أن خالتو وبنتها تحت وهو خد هايدي و كريم ونزلو يسهرو معاهم 

جت تكلم ابتسام بس محسن قالها ملوش لزوم ولمار فوق لأنها ديما بترخم علي صابرين من وهما صغيرين ولما قالتله أن ابتسام ممكن تزعل قالها تبقي تتحجج باي حاجة بس هي رفضت تزعل صحبتها منها وأصرت تكلمها 

والموضوع اتحل لما ابتسام قالت أن لمار نامت وعمار وزهرة طلعو ينامو و نزلت هي بس سهرت معاهم في سهرة جميل كلها ضحك وهزار ومحبه

ايمان ميلت علي ابتسام من غير ما حد يحس 

ايمان ... 

بس مش غريبه لمار تنام بدري كدة دي لما صدقت جت و كنتي بتقولي رسمة علي سهره للصبح مع اخوها 

ابتسام ...

وهي كانت ناويه فعلا و نكدت علي الغلبانة التانيه وطلعت شقتها مخنوقه يا عين امها والدموع في عينيها كان لازم اتصرف عشان الموضوع ميكبرش عن كدة

ايمان بشك ...

عملتي ايه يا مصيبة انتي احكيلي 

ابتسام ...

ابدا كل اللي عملتة حطتلها في كوبايه الشاي ربع قرص من مهديء بتاعي اللي باخدة لما يكون عندي ارق فنامت بسلام والليله خلصت 

ايمان بخضه ...

يالهوي يا ابتسام وجالك قلب تعملي كدة وبعدين افرضي المهديء دا غلط عليها وهي حامل ولا غلط علي البيبي نفسه هتعملي ايه هه 

ابتسام ...

متخافيش انا سالت الدكتور وقالي ربع قرص مش مضر خالص لا ليها ولا للبيبي هو انا معقول هأذي بنتي بردو يا ست انتي 

محسن ..

بتتوشوشو تقولو ايه انتم الاتنين ؟

ابتسام ...

احنا الكلام بينا مبيخلصش ابدا 

احلام ...

ربنا يديم المحبه بينكم ديما يارب عارفه يا ابتسام طول ما انا عارفه أن ايمان هنا معاكي بكون مطمنة عليها في البلد عارفه أن معاها اخت جدعة وبنت اصول

ابتسام ...

تسلمي وتعيشي يا احلام هو احنا اللي بينا عشرة يوم ولا اتنين دي سنين كتير بحلوها ومرها انا اللي متسندة عليها دي هي اختي وصحبتي وعيلتي كلها 

ايمان بدموع في عينيها ...

ربنا يخليكو ليا انتم الاتنين يارب 

عدي ...

ايه يا جماعه هنقلبها نكد ولا ايه 

هايدي ...

دا مش نكد دي مشاعر احاسيس هه تعرفهم 

انس بمرح ...

اوباااا الحق يا عدي في تلقيح كلام هنا قابل

عدي ...

ايه يا دودي قابلة عليا ليه بس دا انا غلبان والله 

هايدي ... 

طبعا يا حبيبي غلبان اوي انت هتقولي 

مكة بمرح ...

الله مالك باخويا يا ست هايدي 

هايدي ...

لا بقولك ايه احنا ستات زي بعض لازم نكون ديما في صف بعض قلبا وقالبا 

مكة بتفكير ...

مممم تصدقي معاكي حق خلاص اديلو كمان ولا يهمك 

عدي ...

ايه يا ستي انتي ما تخليكي في جوزك وملكيش دعوة بيا 

انس ...

الله ومالو جوزها دلوقتي انتم عيلة في بعضيكم انا ايه دخلني 

مكة ...

ما انت من العيلة دي ياقلبي 

صابرين ...

لا تصدقو انا بدأت اتوغوش

هايدي ...

هههههههههههههههه ليه ؟ من ايه ؟

صابرين .....

يعني لو مفترض أن دا هزار أو الحب بين المتجوزين يبقا انا لازم اتوغوش ولما ارجع ابعت ل مصطفي خطيبي اشيائه كلها كمان 

انس ....

حرام عليكي دا الراجل زي البلسم وبيتمنالك الرضا ترضي وبعدين ماله هزارنا مش عجبك 

صابرين بملامح عابسه....

انا مش هرد عليك 

استمرت السهرة لقرب الفجر الكل كان مبسوط وفرحان الكل نسي همومه ومشاكله مع الطرف الآخر زي ما يكونو في اليوم دا اتفقو من غير معاد ياخدو كلهم هدنه من الزعل والمشاكل والخناق هدنة مكنوش يعرفو أن بعدها هتيجي العاصفة اللي هتقلب حياة الكل 

يتبع