رواية زواج مثالي بقلم الكاتبة منى محمود

رواية زواج مثالي

البارت التاسع عشر

(((( وجع ))))

الحياة مش بتقف علي حد ديما بنكمل سواء اللي اختفي من حياتنا دا كان كويس و اختفي غصب عنه سواء كان سيء واذانا قبل ما يختفي وكان بمزاجة في الحالتين لازم نكمل وجوانا حتة وجع كدة بتبدء كبيرة وبتصغر مع الوقت لحد ما بنكمل حياتنا بيها عادي جدا بل وبتبقي جزء من شخصيتنا كمان 

وقفنا لما عمار كان بيكلم راويه 👇👇

عمار ...

حبسك ليه وساحب تلفونك ليه ؟ دا وقت خلاف اصلا ف ظروفكم دي ؟

راويه بقهر ...

عشان كمان تلت ايام هيجوزني غصب عني للمعلم اللي شغال معاه  

عمار بغضب ...

نعم ؟ يجوزك غصب ازاي يعني هي سايبة وانتي مرفضيتش و اتمسكتي برايك ليه 

راويه ...

رامي من بعد الدفنة بتاعت ماما وهو بيضربني بسبب اني رفضه وحبسني وخد التلفون مني اعمل ايه محدش من الجيران راضي يدخل ويخلصني منه بسبب خوفهم من الناس البلطجيه اللي هو شغال معاهم وأهل بابا اتصلت استنجد بيهم قفلو التلفون في وشي وقالو ملناش دعوة ( سكتت وخدت نفس ) استاذ عمار انا بس طلبه منك توصل وصيه ماما ل زهرة ضروري وانا هرضي بنصيبي الحمد لله علي كل حال

عمار بهدوء ...

بصي يا راويه انا عندي ظروف صعبه اوي ومع ذلك مش هقدر اسيبة يعمل فيكي كدة تقدري تنزلي القاهرة وتيجي ع عنوانا ؟ ولا صعب ؟

راويه بتردد ...

م مش عارفه اقدر ولا لا بس رامي يعني 

عمار بقوة ...

سيبك من رامي واللي معاه خالص متشغليش بالك بيه كدة كدة ليا حساب معاه مخلصش ها يا راويه لو كنتي هنا معايا صدقيني هقدر احميكي بس بسرعه لان فعلا مشغول ورايا تحقيق ومستشفى وليله كدة 

راويه بتفكير ...

ا انا ممكن افهمو اني خلاص وافقت يمكن يهدي عليا شوية ويبطل ضرب فيا و في فلوس في المطبخ ماما كانت مخبياها منه هخدها واهرب واجيلكم بس اكيد مش هعمل لحضرتك مشكله ؟

عمار بوجع ...

لا يا راويه انتي زي اختي ومينفعش اسيبك في ظرف زي دا المهم اول ما تنزلي القاهرة كلميني علي طول وانا احتياطي عشان لو تلفوني كان فاصل هبعتلك العنوان بالتفصيل في رساله علي رقم دا تمام 

راويه ابتسمت بأمل ...

تمام حاضر شكرا جدا لحضرتك 

عمار ...

العفو ع ايه يلا هسيبك انا دلوقتي معلش 

راويه ...

اوك مع السلامة 

قفل عمار وبص لاقي توحيدة غيرت هدومها وقاعدة حواليها فلوس ودهب وبتحطهم في شنطة صغيره و مندمجة اوي وكأنها نسيت وجودة معاها

عمار ...

حضرتك بتعملي ايه ؟

توحيدة بصتله ...

بنقذ ابني هحاول افديه بالفلوس دي يمكن وقتها يسبوه في حاله ونخلص من الحوار دا كله بقا

عمار بسخريه ...

هه يسبوة في حاله عموما اعملي اللي تعمليه ابنك ميخصنيش يرجع ولا لا سلام 

عمار نزل ودماغه من كتر التفكير هتنفجر اهم حاجة عندة دلوقتي ينقذ سمعت اختة ويطلقها من معتز راح قعد في كافيتريا وطلب قهوة وطلع سجايرة وفضل يفكر محسش بالوقت فصل عبري الوضع دا اكتر من نص ساعه واخيرا اخد القرار و طلع تلفون لمار و خد الرقم بتاع حسن علي تلفونة وبعته لحد واتصل بيه 

عمار ...

يوسف باشا ازيك 

يوسف زميل عمار ...

عمار باشا بنفسه بيكلمني دا ايه المفاجأة الحلوة دي وحشني يا راجل 

عمار ابتسم ...

حبيبي تسلم انا كنت بصراحة طالب منك خدمة شخصيه ينفع ولا هعطلك عن حاجة ؟

يوسف ...

اكيد طبعا ااموريني يا باشاتنا ومفيش عطلة ولا حاجة انا إجازة الاسبوع دا كله كدة كدة 

عمار ...

الأمر لله وحدة طب تمام بص انا بعتلك رقم تلفون علي الواتس دلوقتي عايز اعرف مكانة فين وعايز كشف بكل مكالماتة اخر اسبوعين تلاته كدة 

يوسف ...

غالي والطلب رخيص يا حبيبي اديني ساعتين زمن وكل اللي طلبته هيكون عندك أن شاء الله

عمار ...

تسلم يا يوسف دا العشم بردو 

يوسف ...

تمام يا غالي يلا سلام وساعتين واكلمك بالمفيد 

عمار ...

تمام مع السلامة 

                        ❈-❈-❈

عمار قفل التلفون واتنهد بحزن علي حاله وعلي الوجع اللي في قلبه اتصل علي انس واطمن أن وضع لمار بدء يستقر و اتصل علي مكة واطمن أن زهرة تمام طلع علي القسم اللي متقدم فيه البلاغ بس لما وصل اتفاجا بلي عرفو 

عمار بغضب ...

يعني ايه مفيش محضر معمول بالاسم دا بقولك انا متاكد وفي تلفون متحرز كمان اللي عليه الفيديو ازاي يعني تقولي مفيش محضر انت اجننت يا امين انت فين الظابط اللي هنا 

خرج الظابط ...

نعم ادي الظابط جيالك بنفسه اهو في ايه ومعلي صوتك كدة ليه فاكر نفسك في صالة بيتكم 

عمار طلع الكارنيه بتاعه وادهولو من غير ما يتكلم بس نظراتة كانت كلها غضب 

الظابط بخوف ...

ا اهلا وسهلا يا باشا القسم كله نور والله اسف اللي ميعرفك بقا اتفضل علي مكتبي نشرب القهوة مع بعض ونتكلم اتفضل

دخلو المكتب وعمار قعد واتكلم بهدوء ...

انا عايز افهم حصل ايه عشان المحضر يختفي

 (رفع حاجبه وحول نبرة صوتة وقال بتحذير مخيف )

اوعي تفكر تقولي أن المحضر متعملش اصلا زي الأمين الخايب اللي برة اووووعي اتكلم حصل ايه يا ؟؟ اسمك ايه صحيح ؟

الظابط ...

احمد يا باشا 

عمار ...

تماما سمعك يا احمد اتكلم 

احمد ...

احم هو يعني بصراحة يا باشا من نص ساعه كدة جت الست اللي عملت المحضر وطلبت تتنازل ولما الأمين محمد غلس عليها عشان يعرف حصل ايه قالتله أن ابنها كويس وفي البيت و اتفاهم مع اهل البنت اللي معاه في الفيديو ودي وان الله حليم ستار ودي سمعه وليه وكدة وان طالما هي هتتنازل يبقي قانونيا محدش مضرور وان اهل البنت هيسكتو عشان يسترو عليها وفضلت تعيط للأمين كتير جدا صعبت عليه والمحضر مكنش اتاخد فيه أي خطوات رسميه لسه طلعه وقطعه وبعد ما الست مشيت جة وقالي وقلتله تمام بصراحة يعني مشكله واتحلت ودي وخلصنا منها لكن معرفش أن حضرتك طرف في الموضوع من قريب أو من بعيد حتي 

عمار ...

ممممم تمام يا باشا انا دلوقتي جاي بشكل رسمي عايز اقدم بلاغ في جوز اختي لمار اللي هو معتز أنه ضربها ضرب مبرح ادي أنها خسرت الجنين اللي كان في بطنها وهي في شهرها السابع وأنها حاليا في العنايه المركزه وحالتها غير مستقرة يعني شروع في قتل هتمشيها معايا رسمي ولا بتقولي ودي وبالحب بردو ؟

احمد اتوتر بس لحق نفسه واتكلم بثبات ...

علي ما حضرتك تشرب قهوتك كل حاجة هتكون خلصت يا باشا 

عمار ابتسم وسكت 

                      ❈-❈-❈ 

نرجع ل راويه بعد ما قفلت مع عمار قفلت التلفون خالص و خبته كويس وبدأت تفكر تقدر تهرب من هنا ازاي خافت الوقت يسرقها قامت تحضر الاكل ل رامي بدل ما يضربها كالعادة وهي بتعمل الاكل افتكرت الادويه بتاعت ماماتها واللي كان منهم دوا بينيمها جدا مدة طويلة جريت علي اوضه خديجة و طلعت الدوا واخدت منه حبيتين وطحنتم كويس اوي وحطتهم في طماطم قبل ما تضيفها علي المكرونة واتنهدت بارتياح أنها خلصت قبل ما رامي يوصل وبيان عليها الارتباك 

عدي حوالي ساعه و رامي رجع من برة لاقاها قاعدة علي الكنبه جمب الشباك وساكتة تماما

رامي ...

قومي اتحركي حضريلي اكل بسرعه لازم انزل تاني 

راويه ...

حاضر ثواني والأكل يكون جاهز 

راح علي أوضتة وفتحها بالمفتاح وسابه في الباب ودخل غير هدومة وخرج كانت حطت الاكل علي السفرة قعد وبدء ياكل 

رامي ...

خير ساكتة يعني ومش قلباها مناحه زي كل يوم ؟ ايه القطة كلت لسانك ولا ايه ؟ 

راويه ...

ما انا لو عيطت تاني هتضربني تاني وانا جسمي وجعني يا رامي مش قادرة استحمل ضرب والله

رامي ... 

وياريته بيحوق فيكي الضرب دا كله الا بردو دماغك ناشفة وعايزة كسرها

راويه بقهر ...

اللي انت عايزه اعمله يا رامي بس بطل ضرب فيا الله يخليك 

رامي ابتسم ...

شاطرة احبك انا كدة ( فجأة حس بدوخة ) ا ااه

راويه لما حست انه داخ خافت يشك فيها وخافت اكتر يعمل فيها حاجة قبل ما الدوا يعمل مفعوله 

راويه ...

مالك ؟ شكلك عايز مايه هروح اجبلك ثواني 

جريت راويه علي اوضة رامي الوحيدة اللي ليها مفتاح واللي ل حسن حظها نسيه ف الباب بعد ما غير هدومة دخلت وقفلت علي نفسها لحد ما تتأكد أن المنوم عمل مفعول 

رامي بصوت ضعيف ...

ر راويه .... ااه انتي يا زفت___ة دماغي هتتفرتك رحتي فين ( حس أن عينيه بتقفل ) م مش هسيبك مش هسيبك 

وفجأة راح في دنيا تانية خرجت راويه براحة من الاوضه ولما لاقته واقع ع الارض ومش حاسس بحاجة جريت علي اوضتها و حضرت شنطة صغيره فيها كام طقم ليها و جابت الفلوس من المطبخ وتلفون خديجة و خرجت قربت من رامي بهدوء وخوف طلعت المفاتيح وجريت علي باب الشقة فتحتة و نزلت وهي الخوف مالي قلبها بس علي قد خوفها علي اد إصرارها أنها تهرب وتجري بعيد عن المكان دا تجري بعيد عن شخص المفروض أنه يكون امانها وسندها تهرب من اخ عايز يبيعها دموعها كانت نازله كل ما تمسحهم تفتكر حاجة يرجعو ينزلو تاني وصورة خديجه في خيالها مش بتفارقها ابدا اد ايه العالم كله فضي من حواليها بعد خديجة ما سبتها اد ايه هي لوحدها (( وحيدة ))

                        ❈-❈-❈  

عمار كان لسه في القسم مستني يتأكد بنفسه أن كل حاجة تمت وحلف ميرجعش المستشفى تاني الا لما يتأكد أن معتز في الحبس وهو قاعد تلفونة رن برقم يوسف 

عمار ...

يوسف باشا 

يوسف ...

حبيبي ... انا قدرت اوصل للي انت عايزه هتلاقيه كله عندك علي الواتس كشف للمكالمات و حاليا التلفون في فندق اسمة .... في وسط البلد وثابت من مدة كبيرة 

عمار ...

بجد شكرا اوي يا يوسف دي خدمة كبيرة عمري ما هنسهالك ابدا 

يوسف ...

عيب عليك يا باشا متقلش كدة انا معملتش حاجة واي وقت تحتاج حاجة كلمني اخوك موجود 

عمار ...

اكيد يا حبيبي تسلم سلام

يوسف ...

سلام 

طلع عمار كشف المكالمات وركز فيه جامد وابتسم لما خمن حاجة يقدر يخفي بيها حسن خالص ويطمن علي سمعه أخته في الوقت دا دخل احمد 

احمد ...

تمام يا باشا انا رحت بنفسي المستشفى وجبت تقارير من هناك بحاله مدام لمار وطلعت علي البيت ولاقيت معتز مع والدتة بس حالته كانت صعبه جدا بس اطمن احنا جبناه معانا هنا وفي ظابط زميلي بياخد اقوال الجيران هناك 

عمار ...

حالته كانت صعبه ازاي يعني ؟

احمد ...

يعني مضروب علقه محترمة شكل أهل البت إياها ظبطوة

عمار ...

تمام انا عايز اشوفو وبعدها هتحرك انا اشوف اشغالي بس هتابع معاك اول باول كل حاجة تمام يا احمد باشا 

احمد ...

حاضر يا باشا ( رفع سماعه وطلب الأمين ) أيوة يا محمد هاتلي معتز علي هنا بسرعه يلا 

خبط محمد ودخل و وراه معتز ال ملامح وشه مكنتش باينه من كتر الضرب والدم خارج من كل مكان في جسمة ومش قادر يقف ورغم ملامح التعب والحزن اللي كانو علي وشه إلا أنه أول ما لمح عمار قاعد الفزع اترسم علي وشه بوضوح شديد شاور احمد ل محمد يخرج وهو كمان من غير اي كلام خرج وساب عمار مع معتز لوحدهم 

عمار فضل باصص ل معتز من غير كلام 

نظراتة كانت كلها قوة وقسوة وغضب اما معتز ف كان مرعوب من عمار مع تعب جسمة والأحداث اللي شافها في اليوم كله كان مش قادر يقف علي رجليه وبعد صمت دام مدة طويلة اتكلم عمار 

عمار ...

أهل البت ولا أهل جوزها سابوك ازاي ؟

معتز بخوف ...

ت ت ت

عمار ...

لا اهدي كدة ومن غير تأتأه انا مش هقعد اليوم كله مع جنابك يعني هااااا

معتز بصوت ضعيف ...

ا ا انا اصل هو انت عايز ايه يا عمار 

عمار برفعه حاجب ...

باشا .... عمار باشا واللي عايزه حاليا تجاوب علي اي سؤال أسئلة بدون كلام كتير أنجز 

معتز ...

بعد ما ضربوني عشان يوصلو ل بوسي واحدة من صحبها اتصلت وقالت إنها كلمتها وحاليا عندها ولأنها مش عايزة مشاكل اتصلت قالت لأهلها ف يعني راحو جابوها من هناك و بعد علقه دي مضوني علي وصل أمانة وسابوني

عمار وقفه ...

الله هما اللي جم خدوك من قفاك أهل بوسي ولا أهل جوزها عشان ابقي فاهم 

معتز كشر ...

اخو بوسي متجوز بنت خاله جوزها 

عمار بتفهم ....

ااااه منهم فيهم يعني عشان كدة انت متروق تمام 

معتز ...

واخرتها ايه ؟ بلاها اقسام وفضايح وكفايه لحد كدة انا هطلق لمار وهديها كل حقوقها كمان وخليني أخرج من هنا 

عمار بسخرية...

ت ايه ؟ سمعني تاني كدة تخرج من هنا ؟ هههههههههههههههه سوري بس ضحكتني اوي انا راجل قانون يا باشا وكله هيمشي قانوني للآخر وواثق في قضاء البلد دي يجيب حق اختي اللي كانت هتموت في ايديك انا بس كان عندي فضول اعرف انت خرجت من تحت أيديهم ازاي يلا انت ابن حلال وتستاهل سلام 

خرج عمار ومهتمش بنداء توحيدة المستمر له رجع علي المستشفي وهو حاسس أنه مش مهيء لاي صدمات أو اخبار تاني انهاردة وقبل ما يقرب من المستشفي اتصل عليه انس 

عمار بلهفه ...

أيوة يا انس ف حاجة ؟

انس ...

اهدي مفيش حاجة انا متصل اطمنك أن لمار فاقت وبقت احسن 

عمار بترقب ...

طيب والمضاعفات ايه ؟ ولا هي الحمد لله كويسه ومحصلش مضاعفات 

انس بتردد ...

هه ا الحمد لله طبعا علي كل حال تعالي بس واطمن بنفسك لما تيجي 

عمار ...

تمام يا انس انا فضلي خمس دقائق واكون عندك مش متأخر 

انس ...

تمام مع السلامة 

عمار...

سلام 

اتنهد بحزن وراح وهو حاسس ان دخوله المرة دي المستشفي هيختلف تماما عن خروجة منها 

                    ❈-❈-❈ 

عند مكة كانت زهرة نايمة ديما بتلجاء للنوم عشان تهرب من واقع مفروض عليها وهي مش عايزاه طلعت هايدي ومعاها تالا و كريم تقعد معاهم بدل ما كل واحدة قعدة لوحدها وهما بيتكلمو حكت مكة ل هايدي المكالمه اللي دارت بينها وبين منار 

هايدي ....

وانتي فعلا السبب ف المكانة ال هي فيها ولا دا مجهودها ؟

مكة ...

لو انا وقتها كنت بفكر زي ما هي بتفكر مكنتش وصلت ل كدة منار شخص روتيني جدا في شغله ومستر سعيد مش بحب كدة بيحب الشخص ال كيريتف اللي يفكر ويجيب افكار برة الصندوق وانا تقريبا ادتها كروس شامل في الحوار دا كانت يوم و يوم عندي هنا في البيت وكنت بديها افكار كتير و بعملها ملازم و ملخصات تساعدها لو اي مشكله واجهتها كنت بعمل كل دا بحب يا هايدي كنت مبسوطة يوم ما كلمتني وقالتلي أن مستر سعيد أداها مكاني انا مزعلتش أنها عايزة تحافظ علي مكانها مع اني كنت سبب اساسي فيه بس اتقهرت من الطريقه اللي اتعاملت معايا بيها اتوجعت يا هايدي اني اديت اوي من غير تفكير ف اي مقابل مبخلتش لا بوقت ولا معلومة مهما كانت كبيرة أو صغيرة ويبقي دا جزائي في الاخر بجد زعلت اوي اوي يا هايدي كان ممكن تطلب مني بطريقه تانيه كان ممكن تستني اصلا وانا كنت هرفض من نفسي والله وكنت هقولو يشوف اي مكان بعيدا عنها بدل ما تكلمني بالطريقه دي 

هايدي ...

عايزة نصحيتي وتوعديني تفكري كويس اوي فيها ؟

مكة ... 

اكيد طبعا اوعدك 

هايدي ...

انتي هتروحي الشركة بنفسك وهتتكلمي مع مستر سعيد انك عايزة ترجعي بس مش علي نفس مكانك لأنك بقالك مدة كبيرة قاعدة وانك عايزة تسترجعي شغفك ونشاطك مع تيم جديد كله لسه باديء تتعبو فيه سوا وهو هيوافق انا واثقه 

مكة ...

و بعدين ؟

هايدي ابتسمت ...

ولا قبلين الشاطر بيفضل طول عمرة شاطر خليها تاخد المكان واديها خسرت اللي وصتلها اصلا للمكان دا خليه ينفعها خليها تشوفك وانتي بتكبري من الاول خالص قدام عينيها ولما تحب تتلون وتيجي تقولك صحبتي وحبيبتي والكلام دا اديها الكلمتين اللي تستحقهم في وسهل وسيبها وامشي 

مكة بتفكير ...

اقولها ايه يعني ؟

هايدي ...

قوليها انا مش صحبتك لا عمري كنت ولا هكون احنا زمايل في شركة واحدة فقط لا غير و زي ما انا كنت سبب ف نجاحك وقت ما اخترت اني ابعد اعرفي اني هكون سبب في انك تظهري تاني الشخص الروتيني وقت ما انا قررت ارجع وسيبها وامشي وارميها من حياتك كلها خالص صدقيني يا مكة هي اللي خسرتك مش انتي 

مكة ابتسمت ...

هحاول اعمل كدة انا مش بعرف اكلم حد بقسوة بس لو هي بعد ما نجحت بعيد عنها رجعت فعلا تقول كلمة صحبتي دي يبقي لازم تسمع الكلام دا فعلا .... شكرا يا دودي بجد 

هايدي ...

شكرا علي ايه يا عبيطة انتي اختي يا مكة ربنا يعلم بحبك انتي وزهرة قد ايه 

زهرة من وراهم بصوت ضعيف ...

وزهرة زعلانة منكم قاعدين ترغو سوا وهي مش معاكم يا رخمين 

ابتسمت البنات بفرحة وجريو عليها حضنوها 

                     ❈-❈-❈  

نرجع ل عمار وصل المستشفى وشاف انس واقف علي الباب من برة بيتكلم في التلفون سرع خطوتة ووصل كان انس بيقفل مع ماماته

انس ...

تمام يا ماما هكلمك تاني اكيد ... ماشي هقفل دلوقتي عشان عمار وصل .... مع السلامة .... تعالي يا عمار 

جه يتحرك وقفه عمار واتكلم ب خوف ...

طمني الاول لمار حالتها ايه فهمني قبل ما ندخل يا انس الله يخليك 

انس بحزن ...

الحمد لله يا عمار انت مؤمن اكيد أن كل اللي يجيبو ربنا كويس 

هز عمار رأسه من غير كلام ف كمل انس 

انس ...

لمار للاسف حصلها شلل رباعي نتيجة الاصابه في المخ اللي حصلت 

عمار عينيه دمعت وسكت وانس اتكلم بمواساه

انس ...

عمار كله خير الحمد لله صدقني طبيا هي اتكتبلها عمر جديد حالتها كانت صعبه جدا معلش عارف أن حاجات كتير بتحصل فوق طاقتك بس انت قدها وانا معاك وجمبك يلا تعالي معايا والدتك فوق مش مبطله عياط تعالي خليك جنبها 

عمار اتحرك مع انس من غير كلام الكلام كله كان داير في دماغه مليون جملة و مليون سؤال اصوات كتير جوة رأسه بتتكلم مش عارف يسكتها بس كل الأصوات دي سكتت لوحدها اول ما باب الاوضه اتفتح وعينيه اتقابلت ب عيون اختة (( لمار )) وبدء الوجع ياكل في قلبه لدرجة أنه حط ايديه وفضل يدلك مكان النغزة اللي وجعاه لكن بدون فايدة ..... 

اتحرك وقعد قدامها علي السرير وهي لسه عينيهم متعلقه ببعض اتكلم بصوت يبان هادي لكن كله وجع وغضب وحزن 

عمار ...

ممكن تسيبونا لوحدنا شوية معلش

الكل خرج من غير اي اعتراض وهي لسه عينيها عليه ودموعها نازله عايزة تتكلم مش قادرة بعد صمت دام شوية اتكلم هو 

عمار ...

عارفه انا حاسس بايه دلوقتي ؟ عارفه الوجع اللي جوة قلبي عامل ازاي بسببك دلوقتي ؟ عارفه انتي كسرتني ازاي ؟ ليه ؟ عملتي كدة ليه ؟ انا قصرت معاكي في ايه ؟ تعليم وفلوس وفسح و حب واهتمام وحنان مفيش حاجة بخلت عليكي فيها حتي معتز دا لا كنت مرتحله ولا كنت راضي عن جوازك منة لكني مقدرتش اشوفك حزينة و وافقت وديما كنت جمبك ومعاكي عمري ما بعدت عنك عمري ما حسستك أن في حد اهم منك عملتي كدة ليه ؟ ( دموعه نزلت وصوت اتخنق ) تعرفي حسيت بايه لما قريت القرف اللي بينك وبين الزفت اللي كلمتيه ؟ حسيت بس_كاكي_ن بتقطع في قلبي يا لمار حسيت انك مش بنتي اللي ربتها و كبرتها وجوزتها وكنت مستني اكتر منها هي نفسها اشوف بنوتتها كنت ساعات اسرح كدة واقول لما انا بحبك اوي كدة اومال هحب حتة مصغرة منك قد ايه وكنت اقول لنفسي اوعي يا عمار تحب بنت بنوتك ابنك حبهم واهتم بيهم قد بعض كفايه مقدرتش تقرب بين زهرة ولمار خلي الاطفال قريبين من بعض ومفيش بينهم غيرة ..... كنت بقاوح اي حد يقولي اني بعاملك غلط ... كنت رافض اي تلميح فية زعل أو حزن ليكي .... قوليلي انا قصرت في ايه ( صوت بكائه علي ) قوليلي يا بنت عمري انا غلطت في ايييييه عشان تكسريني كدة عشان تدبيحني بالشكل دا غلطت في ايييييييييه 

يتبع ...