رواية زواج مثالي- بقلم الكاتبة منى محمود- الفصل الخامس عشر
رواية زواج مثالي بقلم الكاتبة منى محمود
تعريف الرواية
الزواج الرابط اللي بين اي اتنين ايه بيخليه ناجح ؟
ايه يخليه مثالي ؟
ويا تري العلاقات الي بتبان قدام الناس مثاليه وناجحة هي كدة فعلا في الحقيقه ؟
ولا قدام الناس حاجة واللي جوة البيوت ومقفول عليه حاجة تانيه ؟
ليه بنحاول نظهر أما أننا ناجحين جدا في علاقتنا بالطرف الآخر أو نظهر أننا مظلومين جدا معاه ؟
كل دي تساؤلات هنشوفها في حكايتنا حكايه الزواج المثالي اللي قدام الناس بيبان ناجح وبيلمع لكنة في الحقيقه ضعيف وهش ومن اول مشكلة بينهار بالكامل
حكايات موجودة في بيوت كتير مقفوله علي صحابها جواها اسرار مبتتحكيش ولو اتحكت الحياة بعدها احيانا بتكون صعبه
تصنيف الرواية
عاميه مصريه اجتماعية دراما روايات مصرية
حوار الرواية
عاميه مصرية، روايات بالعاميه
سرد الرواية
عاميه مصرية
❈-❈-❈
الفصل الخامس عشر
قاطعها دخول رامي من الباب شاب في الثلاثين ملامحة جامدة
رامي ...
تقولي ايه ؟ ومين دول اصلا ؟ في ايه ؟
عمار وقف في وشه ..
زهرة مراتي فين ؟
رامي بقوة ...
معرفش روح دور عليها في حتة تانيه ملناش دعوة بيها
خديجة بضيق ...
عيب كدة يا رامي حضرة الظابط من حقة يطمن علي مراتة قوله العنوان اللي هي فيه أو روح يلا وصلهم بنفسك
رامي بهدوء. ..
انا قلت اللي عندي يا امي انا معرفش مراتة فين لما نزلنا وقفت تاكسي وطلبت تبقي لوحدها وانا سبتها براحتها اكتر من كدة معنديش
محسن ...
انت كداب ( بص ل راويه ) قولي انتي يا بنتي زهرة فين ؟ الله يخليكي اعتبريها اختك دي لسه خارجة من مستشفى وعمليه
رامي كان باصص ل راويه بتحذير وغض/ب
عمار ...
لو مبطلتش تبصلها كدة هعدلك انا وانتي اتكلمي متخافيش انا اقدر احميكي ومحدش هيقرب منك بس اعرف مراتي فين ؟
راويه بارتباك ...
ا اصل زهرة يعني
رامي بحدة ...
ما قلنا منعرفش هي فيييين هو عشان انت ظابط جاي بيتنا تهددنا فيه ولا ايه ؟
عمار بغض/ب ....
انا لحد دلوقتي بتكلم معاكم بأدب هتقل انت ادبك وربنا أخفيك ومحدش يعرفلك طريق العمر كله
خديجة بخوف ...
لا لا الله يخليك احنا ناس ملناش في المشاكل والله (بصت ل رامي برجاء ) يا ابني انطق وصلت بنت خالتك فين امبارح ؟ خلينا نخلص من ألموال اللي ملناش دعوه بيه دا لا من قريب ولا من بعيد
رامي بقوة....
معنديش حاجة أقولها غير اللي قولتة
عمار في لحظة كان مطلع مسد/سه وخبطة بيه علي رأسه وقع رامي فاقد الوعي راويه وخديجة صوتو وجريو عليه
محسن بحدة ....
الله اية اللي بتهب/به دا يا عمار اهدي شوية مش كدة
عمار وهو باصص ل خديجة و راويه ..
انا هادي جدا يا عمي بس الواضح أن في كلام هما مش عارفين يقوله بسبب البيه دا فسكتة شويه علي ما اعرف اتكلم معاهم هو مغم عليه مش اكتر ها زهرة فين ؟؟
راويه خدت نفس واتكلمت مرة واحدة بسرعه عشان متتراجعش ...
لما ماما دخلت تحضر الغدا رامي زعق ل زهرة وقالها أنها انانيه عشان تيجي لحد هنا بعد المدة دي كلها وتجيبلنا المشاكل معاها وطلب منها تمشي بهدوء من غير شوشرة خصوصا أنه شغال مع جماعه شغلهم مش مظبوط وهو خاف أن كل شوية انت تفضل رايح جاي علينا والناس ال شغال معاهم يفكروه باعهم وشغال مرشد للبوليس ... وفعلا بعد الغدا زهرة قالت ل ماما اللي قالته ليكم ونزلنا ع اساس هنوصلها ل فندق بس بس يعني رامي طمع في التلفون اللي كان معاها ف خدة منها بالعافيه و وقفلها فعلا تاكسي وقالها تغ/ور لي في داه/يه اللي جت منها و الله ما نعرف حاجة من بعدها عنها وانا انا خفت اقول ل ماما عشان قبلها الضغط والسكر كانو عاليين عليها مكنتش هتستحمل ف طلبت من زهرة تأكد الكلام ال انا قولته ل ماما انها راحت اوتيل
محسن بدهشه وحزن ...
ايه القسوة دي ؟ حرام عليكم دي كانت بستنجد بيكم دي ملهاش غيركم ليه كدة
عمار بتركيز ...
في حاجة غلط لو ال انتي بتقوليه دا صح كانت رجعت ع البيت تاني هو خد التلفون لكن معاها فلوس تركب وترجع ودا محلصش ومتصلتش بأي حد
محسن ..
يا بنتي انتي متأكدة أن دا ال حصل لو في حاجة مخبياها قولي الله يرضي عليكي
خديجة في حاله صدمة شديدة مش مستوعبه اللي ولادها عملوه هي كانت حسه أن رامي شغله مش مظبوط بس ديما كانت تكدب احساسها دا ديما تدعيلهم في صلاة الفجر كل يوم ازاي اللي عمرها وصحتها راحو عليهم يكونو بالجحود والقسوة دي ازاي قدرو يعملو كدة في بنت خالتهم اللي كان باين عليها الحزن والقهرة والتعب ازاي هي محستش بكدبهم دا لحظة واحدة فاقت من كل دا ع صوت راويه وهي بتتكلم وتعيط
راويه ببكاء ...
والله العظيم دا اللي حصل كله والله ما بكدب انا اسفة اني سكت بس انا خفت علي ماما والله اسفه بجد
عمار كان هيتجنن اومال راحت فين ؟ حصلها ايه ؟ ومحسن كمان القلق كان مسيطر عليه وقبل ما عمار أو محسن يقولو اي حاجة تاني تلفون عمار رن برقم غريب رد بسرعه وهو عندة احساس أن التلفون دا هيعرفو مكان مراتة فين
❈-❈-❈
عدي وصل البيت في وقت قليل جدا اول ما دخل لاقي كريم نايم علي رجل هايدي اللي ساندة دماغها علي الانتريه ونايمة هي كمان والتلفزيون مفتوح قدامهم
وقف شويه يبص عليهم ... ملامحهم بريئه وهاديه مريحه ل نفسه جدا الابتسامة اترسمت علي وشه تلقائي دي عيلتة الصغيرة اللي لازم يعافر لاخر نفس لحد ما يرجعو لحض/نة من تاني قرب منهم بهدوء وشال كريم براحة دخله اوضتة و غطاه كويس وخرج قرب من هايدي ونزل بوشه قصاد وشها ونطق بصوت هامس وهو ايديه بتمشي براحة علي خدها ....
عدي ...
ديدي حبيبي اصحي هايدي
هايدي فتحت عينيها لاقت عدي قدامها وقريب قوي منها استغربت وهو ابتسم واتكلم بنفس الصوت ..
عدي ...
مش بتحلمي لا انا جيت لاقيتكم نايمين دخلت كريم اوضته ورجعت عشان اصحيكي يا حبيبي
هايدي بهدوء ..
رجعت بدري يعني ؟ في حاجة حصلت ؟
هنا عدي افتكر وليد وزيارتة الابتسامة اختفت من علي وشه وكشر وحاول يتكلم من غير عص/بيه بس غصب عنه كان باين في نبرة صوتة أنه مضايق وبيحاول يتماسك
عدي ...
اه في حاجة حصلت ... وليد جالي الشركة انهاردة واتخ/نقت معاه وضر/بته
هايدي بخضه ...
ايه !!! ضرب/ته يا عدي !!!! انت اتجنن/ت من امتي وانت بتمد ايدك علي حد هه ودا مش اي حد دا ابو كريم يا عدي
عدي بضيق ...
عصبني واستفزني يا هايدي وبعدين معلش انا عايز اعرف حاجة هو فعلا طلب منك تقضو معاه يوم كامل وانتي وافقتي وطلبتي بس اذني ؟؟ حصل دا ولا هو بيالف من عندة عشان يضايقني ؟؟
هايدي ببرود...
لا هو مش بيألف ولا حاجة إلي قاله حصل
عدي بغ/ضب وهو بيقف وبيشدها من دراعها تقف قصاده....
نعم !!! عيدي تاني كدة يا هايدي عشان أنا حاسس اني بسمع كلام غريب هو ايه ال حصل بالظبط عايز اعرف دا بعد اذن سيااااادتك يعني
هايدي بهدوء ...
انا مش فاهمه ليه العصبيه دي كلها هو اتصل بيا وطلب أنه يقعد يوم كااامل مع كريم لأن اجازتة صغيرة اسبوعين وبس وانا اللي قلتله ع فكرة أن صعب كريم يفضل معاه يوم كامل من غير ما يعيط في هو اقترح عليا أن نروح كلنا انا وكريم وبابا وماما نعمل داي يوز في اي مكان من الصبح ل بالليل عشان يتبسط مع كريم قلتله مقدرش اقولك اه او لا الا لما عدي يوافق ياريت تستاذنه الاول قالي تمام بس دا ال حصل غلطت ف ايه انا بقا
عدي بغضب ...
هااااايدي متستفزتيش اكتر من كدة انا عفاريت الدنيا بتتنطط في وشي انت عارفه كويس انك غلطانة ف بلاش تقاوحي
هايدي لسه هترد تلفون عدي رن برقم عمار
عدي ...
استني ارد الاول و بعدين نكمل كلامنا (فتح الخط ) آلو أيوة يا عمار
عمار بتوتر وسرعه في الكلام...
عدي اطلع بسرعه علي المستشفى اللي بعتلك اللوكشين بتاعها ع الواتس وخد ماما و معاك زهرة عمله حادثه هناك وانا وعمي كنا ف اسكندريه وراجعين اهو ع المستشفى
عدي بعدم فهم ...
اسكندريه ؟ بتعملو ايه هناك ؟ وزهرة خرجت امتي وازاي ؟
عمار بصوت عالي كله وجع وغضب ...
مش وقتة الكلام دا بقولك مراتي لوحدها في مستشفى ومش عارف حتي حالتها ايه روح الله يخليك بسرررررعه وطمني بسرعه يا عدي وخد ماما معاك هي اكيد هتحتاج لها واول ما توصل هناك تكلمني وتفهمني ف ايه ماشي
عدي ...
حاضر حاضر مسافه السكة وهكلمك اطمنك يلا سلام
هايدي بقلق ...
في ايه يا عدي ؟
عدي وهو خارج من الشقه ...
زهرة عامله حادثه هاخد مرات عمي ونروحلها وبابا وعمار راجعين من اسكندريه ال معرفش راحوها ليه اصلا
هايدي من علي باب الشقه...
طب ابقي طمني يا عدي متسبنيش كدة الله يخليك
❈-❈-❈
عدي طلع وبلغ ابتسام اللي ف ثواني كانت نازله معاه علي السلم والخوف والقلق بياكل فيها قابلو انس و مكة وهما داخلين من باب العمارة
مكة ...
في ايه بتجرو كدة ليه ؟
عدي ...
زهرة عملت حادثه ف مستشفى وهي لوحدها دلوقتي
انس ...
لا حول ولا قوه الا بالله اطلعي انتي يا مكة انا هروح معاهم
عدي وهو بيركب ابتسام العربيه وهي مش بتتكلم دموعها نازله بدون توقف وبس ...
عدي ...
ملوش لزوم انتم لسه راجعين خليك انت هشوف الوضع ايه هناك واكلمك لو في حاجة
انس وهو بيركب ...
اطلعي يلا يا مكة وانت يا عدي يلا أنجز خلينا نطمن عليها بسرعه انا هاجي معاك يعني هاجي معاك
طلعوا علي المستشفي وسالو علي الاسم بلغوهم أنها في العمليات وان الحاله مش مستقرة طلعو التلاته قدام اوضه العمليات يدعو أنها تعدي علي خير وابتسام كانت منهارة تماما عدي مكنش عارف يتصرف ازاي أو يعمل ايه بعد عنهم شويه و اتصل ب هايدي
هايدي بهلفه ....
أيوة يا عدي طمني زهرة كويسه ؟
عدي ...
اهدي هي لسه في العمليات منعرفش اي حاجة بس مرات عمي منهارة هنا وبدأت تتعب وانا مش عارف اتصرف
هايدي بتفكير ...
طيب انا ممكن اجيلك اكون جمبها بس كريم اجيبو معايا ؟ مش عايزة اقلق ماماتك
عدي ...
سيبيه مع مكة اهو يتلهي شوية مع تالا بنتها
هايدي ...
مكة مسافرة مش
قاطعها عدي ...
رجعو قابلناهم واحنا نازلين حتي انس معايا هنا مرضيش يسيبني
هايدي ...
طيب انا هسيب كريم مع مكة واجي ابعتلي لوكيشن بسرعه يلا
هايدي عدت علي مكة وسابت معاها كريم وطلعت علي المستشفى بسرعه
عمار طول الطريق وهو مع عدي علي التلفون الاحساس اللي كان حاسس بيه ميوصفوش اي كلام ومحسن جمبة بيلوم في نفسه أنه وافقها علي سفرها ل اسكندريه ومتمسكش بكلامة
فلاش باك
محسن ...
يا زهرة انا مش موافق علي موضوع سفرك دا يا بنتي ما قلتلك الشقق موجودة وكتير هقعدك في شقه من اللي في العمارة التانيه عشان اطمن عليكي وسيبيني مني ل عمار مليكش دعوة
زهرة برجاء ...
ارجوك يا عمي انا محتاجة ابعد عن هنا خالص ومش عايزة اعملك مشاكل كبيرة مع عمار انا كمان بقالي كتير اوي مشفتش خالتو هكون مبسوطة ومرتاحة هناك ارجوك وافق
باك
محسن بحزن لنفسه ..
ياريتني يا وافقت يا بنتي ياريت
في المستشفي الوقت بيمر ببطيء بعد حوالي نص ساعه كمان كانت هايدي وصلت وفضلت جمب ابتسام تحاول تهديها وعدي وانس مستنين اي حد يخرج من اوضه العمليات يطمنهم بكلمه حتي .... واخيرا اتفتح الباب وخرج الدكتور والكل جري عليه
عدي ...
خير يا دكتور طمنا
الدكتور ...
حضرتك جوزها ؟؟
عدي ...
لا انا اخوه هو جاي في الطريق خير ؟
الدكتور ...
طب احنا محتاجين إقرار بسرعه من جوزها أو حد من أهلها عشان نقدر نكمل العمليه اي دقيقه بتمر فيها خطر علي حياتها
انس ...
اقرار بايه بالظبط ياريت تفهمنا
الدكتور ....
الكلية الشمال اتضررت بالكامل ولازم است/ئصال حالا ولازم إقرار من الأهل بالموافقه
عدي ....
طيب احنا موافقين احنا اهلها دلوقتي
الدكتور ...
مينفعش يا فندم لازم الزوج أو الأب أو الأخ
عدي بغضب ...
يعني اييييه هتسيبوها تموت عشان اهلها مش موجودين وجايين في الطريق هاتلي اي إقرار وانا همضي عليه اي ورق انت عايزة ضمان للمستشفي هاته وانا همضي عليه المهم تلحقوها
انس بعمليه ...
جوزها ظابط في الداخليه وجاي في الطريق يعني بين لحظة والتانيه يكون هنا واحنا هنمضي أن العمليه ع مسؤوليتنا وهو أول ما يوصل مضوه علي اللي انتم عايزينه لكن دلوقتي بعد اذنك تدخل تكمل العمليه عشان في مريضه حالتها خطر جوة وانت واقف هنا تتكلم معانا عن إجراءات و مستشفي
الدكتور ...
تمام انا هدخل اكمل وفي حد هيجي لحضرتك من الإدارة بالاوراق عن اذنكم
انس وهو بيوقفه ...
ثواني يا دكتور حضرتك اتاكدت أن الكليه التانيه هتقدر تقوم بوظائفها كامله ؟
الدكتور ببتسامة بسيطة ...
اكيد طبعا ... عن اذنكم
الدكتور دخل يكمل العمليه والكل برة قاعد علي أعصابه وبعد نص ساعه تاني اخيرا وصل عمار ومحسن المستشفي والرعب والخوف كان باين علي ملامحهم
عمار ...
ايه هي لسه جوة كل دا ليه في ايه ؟
عدي ...
خير أن شاء الله اهدي بس وخد نفسك ( بص لابوة ) تعالي يا بابا اقعد استريح هنا
انس ...
الحادثه أثرت علي الكليه الشمال بتاعتها وكان لازم يستصئلوها واحنا مضينا علي إقرار بالمسؤولية كامله علي ما انت تيجي
عمار كان حاسس ان مفيش كلام يقولو بيبص لانس ويبص ل باب اوضه العمليات ويرجع يبص ل ماماتة مش عارف يعمل ايه ولا يقول ايه وفي وسط تواهانه خرج الدكتور من اوضه العمليات وكان عمار اول واحد وصله
عمار بصوت مخنوق ...
هي هي كويسه صح ؟
الدكتور فهم أن دا جوزها ...
متقلقش الحمد لله العمليه تمت علي خير هتفضل بس اول ٢٤ ساعه في العنايه المركزه تحت الملاحظه وان شاء الله خير عن اذنكم
ابتسام بدموع ...
يارب كملها معاها علي خير يارب نجيها يا رب دي غلبانة وطيبة
هايدي ...
أن شاء الله هتبقي زي الفل يا طنط هوني علي نفسك عشان متتعبيش انتي
عمار وهو ماشي ...
انا نازل اعرف الحادثه دي حصلت فين وازاي بالظبط وراجع تاني
عدي وهو بيمشي معاه ...
استني هاجي معاك وهما معاهم انس و بابا
###
الايام ال فاتت عدت علي لمار ومعتز بهدوء ماماته رجعت من المصيف وروتين حياتهم رجع زي ما هو لكن اللي معتز لاحظة أن أمه لا تتغير معاه ردودها غريبة نظرتها اغرب مكنش عارف يتأكد دا حقيقي بيحصل وهي متغيرة ولا هو بيتهياله بعد الأحداث الأخيرة ال حصلت معاه وفي يوم كان سهران في سطح البيت لوحدة بيشرب سيج/ارتة واز/ازة الب/يرة في أيديه تلفونه رن برقم بوسي اتاكد أن محدش علي السلم ورجع رد
معتز ...
حتتي اللي وحشاني اوي
بوسي ...
يا سلام وحشاك بإمارة اية بقا ؟ لا مكالمة ولا مقابلة تقلان عليا حضرتك
معتز ضحك ...
انا اقدر اتقل علي القمر بتاعي بردو دا كلام انتي عارفه اني كنت بأمن بس نفسي مش عايزين مشاكل مع اللي ما تتسمي مراتي
بوسي بضيق ...
ربنا ياخدها وليه بومة ... المهم يا سيدي ها امنت نفسك ولا لسه
معتز ...
كله تحت السيطرة يا قلبي واعملي حسابك علي الاسبوع الجاي هكلمك اكون ظبطت مكان ونتقابل
بوسي بفرحة ...
بجد يا معتز
معتز ...
بجد يا قلب معتز دا انا هموت عليكي
بوسي ضحكت بم/ياعه...
وانا كمان يا بيبي
معتز ..
قلب البيبي يلا كفايه رغي بقا لحسن انا فوق السطح مضمنش الدنيا بردو
بوسي ...
اوك يا بيبي هستني تلفونك باي
معتز ...
باي
كمل سهرته وهو فرحان حاسس أنه قدر يخلص من المشكله ال كانت هتحصل وحاليا كل حاجة رجعت زي الاول بالظبط بعد ساعه نزل ملقاش لمار في شقتهم نده عليها ودور ملقهاش نزل عند ماماته لاقهم قاعدين قدام التلفزيون سوا ودي يمكن من المرات القليلة جدا اللي يشوف فيها أمة ومراته سوا بيتفرجو علي حاجة ف استغرب
معتز باستغراب...
انتي هنا بتعملي ايه ؟ انا عمال ادور عليكي فوق
توحيدة ام معتز ...
قاعدة معايا شوية في مانع ول اية ؟
معتز ...
لا طبعا يا ماما انا بس استغربت لأن عادة هي بعد ما بتخلص كل ال وراها هنا بتطلع فوق
لمار ...
ما انت قاعد فوق السطح وانا قلت انزل ل ماما اشوف لو محتاجة حاجة بدل القاعدة لوحدي وهي مسكت فيا اتفرج علي تلفزيون معاها
معتز بدهشه ...
مسكت فيكي !!
لمار ببرائه ..
اه مسكت فيا مالك مستغرب كدة ليه ؟
معتز ...
لا ابدا يارب ديما التفاهم ال بينكم دلوقتي دا عموما انا جالي تلفون شغل يوم الاربع الجاي هسافر شغل الاربع هرجع الجمعه
توحيدة ...
هي ايه حكايه سفرك ال كتر دا ؟
معتز كشر...
شغل ياما شغل حد يقول ل الشغل لا
توحيدة ...
وهو الشغل ميجيش الا بالسفر يا معتز ؟ وبعدين ما انت ديما تقولي معيش فلوس اصل مفيش شغل ودلوقتي بتقولي هتسافر تاني وانت لسه جاي من كام يوم من سفر وقلت شغل بردو ايه بتشتغل لله وللوطن ولا ايه ؟
معتز ...
الراجل هقبضي السفريه دي ياما وهديكي الفلوس ال خدتها منك جزء ف جزء
توحيدة ...
ماشي لما اشوف اخرتها معاك ايه
معتز بصلهم هما الاتنين بضيق وخرج طلع شقتة تاني خلاص كل يوم بيتاكد عن اليوم اللي قبلة أن في حاجة غريبه بتحصل ودلوقتي لازم يركز عشان يعرف في ايه بيحصل من وراه
نرجع ل عمار نزل هو وعدي وسأل في الاستقبال وعرف أن زهرة كانت راكبه تاكسي والسواق وقف بيها في حتة هاديه ثبتها ولما قاومت ضربها بالمطواة في جمبها وخد كل ال معاها وهرب وهي قبل ما تفقد الوعي كان في عربيه معديه وقفت ليها قالت علي رقم عمار وبعدها راحت لي في دنيا تانيه وان الناس جابوها علي طول واتصلوا بالرقم ال هي قالته
عمار في اللحظة دي طلب من عدي يطلع ويسيبه لوحدة شويه خرج وقف في حتة فاضيه شوية وعينيه بتلمع بالدموع وإحساس العجز مسيطر عليه
ازاي عمل كدة في مراتة ... ازاي مكنش السند والضهر ليها ... طب ليه كان متمسك اوي بدوره ك اخ ل لمار واتنازل بكل سهوله عن دورة ك زوج وأب واخ لمراتة .... وزهرة بعد ما شافت القسوة عند اهلها وعنده هو قبل اهلها هتقدر تكمل معاه ؟ ... هتقدر تنسي التجربه الصعبه اللي مرت بيها من قهر و وجع ل حرمان من طفلها قبل حتي ما تشوفه ل خذلان من أهلها اخيرا حادثه اللي اتعرضت ليها والخوف والرعب اللي اكيد حست بيهم
يعمل ايه عشان يعوضها ؟ يعمل ايه عشان يرجع زهرة حبيبته زي ما كانت .... وفجأة حس انه عرف أول خطوة لازم تتعمل
ملامحة كشرت وطلع تلفونة وطلب رقم اختة وانتظر الرد
لمار ...
حبيبي عامل ايه
عمار ...
الحمد لله اسمعي يا لمار انا عايز اقولك كلمتين وياريت من غير معارضه يتنفذو
لمار كشرت...
في ايه يا عمار ؟ مالك داخل فيا شمال كدة ليه ؟
عمار ...
في أن بيت ابوكي مفتوحلك اي وقت لكن بيتي يحرم عليكي خلاص ومراتي لا هتجتمع بيكي تاني ولا ليها علاقه بيكي تاني منين ما هي تكون انتي متكونيش تمام اللهم بلغت اللهم فاشهد عشان أنا مش هستني لما تروح مني خالص يا لمار انتي عندك جوزك وبيتك وحماتك وبنتك اللي قربت توصل بألف سلامة وعافيه يارب أنا معنديش غير زهرة يا لمار ابعدي عنها احسنلك فاهمه ....
لمار بصدمة ....
ايه دا كله يا عمار ؟ انا عملت ايه لكل دا ؟ بتحرم بيتك علي اختك يا عمار هي دي اخرتها هي دي وصيه بابا ليك يا اخويا يا حبيبي بتنصف مراتك عليا وانا معملتش حاجة ولا جيت جمبها بتنفذلها اللي هي عايزاه يحصل من يوم ما اتجوزتك يا عمار خلاص كدة دوست علي وصيه بابا برجلك يا حضرة الظابط
عمار بجمود ..
خلصتي ؟ انا دوست علي وصية بابا ولا بنصف حد علي حد انا بعرفك وضع بعد كدة هيكون ثابت بينا عجبك عجبك مش عجبك يبقي متجيش خالص وانا هطمن عليكي بالتلفون كل يوم وطلباتك هتوصلك لحد عندك
لمار بغضب ...
مين دي اللي متجيش ؟؟؟ لا انت ولا مراتك ولا اي حد خلقه ربنا هيمنعني اجي بيت ابويا يا عمار سامع ولا لا ولو عليك انت والمحروسه مراتك براحتكم مش هجري وراكم يعني لكن بيت ابويا خط احمر يا عمار تمام يلا مع السلامه
يتبع...
