رواية زواج مثالي- بقلم الكاتبة منى محمود- الفصل الرابع عشر
رواية زواج مثالي بقلم الكاتبة منى محمود
الفصل الرابع عشر
رواية
زواج مثالي
انس بصلها شوية كانة بيحفظ ملامحها و بعد نظرات كلها شوق وحب وعتاب وندم اخيرا نطق
انس ...
انا عايز اريحك يا مكة قوليلي انتي ايه يريحك وانا هعملو فورا
مكة بدموع ...
مش عارفه صدقني طول الطريق وانا بفكر انا جايه هنا دلوقتي ليه ؟ عايزة ايه ؟ وايه هيريحني ؟ ولاقيت نفسي مش عارفه إجابة لاي سؤال منهم انا مش عارفه اعمل ايه غصب عني شلل مش قادرة اسامح مش قادرة انسي انك لمست ست تانيه غيري مش قادرة انسي الشات والفويس اللي كانت بينكم مش قادرة انسي الايام اللي كنت بتقولي متأخر في المستشفي وانت بتكون معاها واخر الليل ترجع وتنام جمبي عادي مش قادرة اتخطي كل دا وفي المقابل يا انس مش قادرة ابعد عنك مش متخيلة حياتي من غيرك انا وعيت علي الدنيا ومش شايفه راجل غيرك فيها طول عمر اسمي مرتبط ب اسمك مكة لانس مكة و انس انا بحبك مجروحة منك اوي بس بحبك اوي يا انس قولي انت اعمل ايه انا مش عارفه مش عايزة ارجع ل مكة العصبيه اللي كانت ديما تقل منك لأن دا بردو مش صح انا عايزة مكة يا انس مكة حبيبتك اللي حبتها عايزاها وعايزاك ومش عايزة الوجع اللي في قلبي دا شوف طريقه وخليني انسي والوجع دا يروح من قلبي يا انس اتصرف انت اتصررررف
انس شدها من علي الكرسي وخدها في حضنه جامد وهي في اللحظة دي انهارت تماما نسيت اي اتفاق اي كلام اتقال بالعقل نسيت كل حاجة ولاقت نفسها بتقول كل اللي جواها حقيقي كان نفسها تلاقي حل يريحها ويريحه
أما انس طول ما كانت مكة بتتكلم وهو موجوع من قلبه عليها كل كلمة قالتها كانت أشد الف مرة من اي عتاب قاله هو بينه وبين نفسه ومع انهيارها في اخر كلمة لاقي نفسه بيخدها جامد جوة حضنة و يطبطب عليها عينيه لمعت بالدموع عايز يتكلم عايز. يواسيها أو حتي يطمنها بس صوتة مخنوق مش راضي يطلع وعشان صوتة يطلع سمح ل دموعه أنها تنزل الاول
انس بصوت باكي ...
حقك عليا حقك عليا الف مرة واسف الف مرة والله العظيم انا ندمان فوق ما تتخيلي وبحبك لا لا بحبك دي قليلة علي اللي في قلبي انا بعشقك يا مكة ومش عارف ازاي اراضي قلبك ازاي تنسي بس اللي عارفه انك لازم تعرفي اللي خلاني اعمل كدة
مكة بعدت عن حضنة وبصلتة بصه هو مفهمهاش
انس ...
ايه النظرة دي معناها ايه ؟
مكة ...
عايز تقولي ايه انا معرفوش يا انس ؟ عايز تقولي انك عملت كدة بسبب احساسك انك أقل مني ؟
انس بصلها بدهشه و خجل وسكت
مكة بحب ...
مش فاهمه ازاي انت شايف نفسك كدة ومش فاهمة ازاي مشفتش انا شيفاك ازاي يا انس تعرف ... مرة و انا في في ثالثه جامعه واحدة صحبتي سالتني انتي ازاي بتحبي انس ابن خالتك اوي كدة رغم انك اعلي اوي منه بصيت لاقيت السؤال دا في عيون الشلة بتاعتي كلها وبصنلي باهتمام وتركيز اوي عارف قولتلها ايه
انس باهتمام ...
قولتلها ايه ؟ عشان بحبه مبصتش للفرق اللي بينا صح ؟
مكة ...
لا يا حبيبي مقلتش كدة ... قلتلها انا غير اني وعيت علي الدنيا علي حبه جوة قلبي بس كمان انس مش قليل ابدا انس راجل لما باباه تعب وهو في جامعه بقا ينزل يراعي الأرض بنفسه ويقف وسط الفلاحين ويشوف ايه ناقصهم و محتاجين اية قبل ما يسأل علي إيراد الأرض فين وكام انس اللي مهما كبر مش بيخجل أنه يبوس ايد ماماتة قدام اي حد انس اللي دخل طب وكل سنة يطلع بتقدير جيد جدا انس اللي جمب البيت والأرض والجامعة وانا كمان خد كروسات في الانجليش والكمبيوتر لمجرد أنه يكون ملم بيهم مش اكتر انس اللي تفكيرة سابق سنة وكتير ناس اكبر منه بتلجاء له عشان يحل ليهم مشاكلهم انس اللي عندة طموح وروح وحياة مش موجودة في ناس كتير اوي وقبل كل دول بحبه اوي كدة عشان انس ل مكة ومكة ل انس وبس
انس بحب ...
بجد بجد يا مكة انتي شايفاني كدة ؟
مكة ...
السؤال الصح يا انس انت ليه مش شايف نفسك كدة كل اللي حواليك شايفينك زي ما انا شايفاك ليه انت الوحيد اللي مستقل بنفسك دا اللي انا نفسي أفهمه
انس فضل باصص لها و مردش
مكة اتنهدت بحزن ...
لسه هتخبي عليا تاني يا انس ؟
انس بتردد ...
مش عايز اخبي بس مش قادر احكي ... مكة لو في فرصه تانيه نكون سوا لو وافقتي تديني الفرصه دي تاني اول حاجة هعلمها اني يعني انا يعني لو انتي كملتي معايا انا مستعد
قاطعتة مكة ...
حبيبي براحة خد نفس كدة واهدي واتكلم وقول ال جواك انا سمعاك
انس بهدوء ...
لو قررتي تكملي معايا انا هروح ل دكتور نفسي عشان نبدء المرة دي صح ايه رايك ؟
مكة ابتسمت ...
راي أن حضرتك تقوم عشان نتغدي ونسافر سوا قبل الليل ما يليل اوي انا مش بعرف انام هنا من الناموس بياكلني طول الليل
انس ضحك ...
ناموس بيفهم قدامة الحلويات مياكلش ليه
دخلت صابرين وهو انس بيقول اخر جمله
صابرين كشرت ...
ايه الالش الرخيص دا يا انس تؤ تؤ تؤ وحش اوي ليك في الالش يا معلم قولي وانا أعلمك بدل ما تطفشها منك واحنا ما صدقنا جرينا رجلها تاني وهي هبله واتجرت علي طول
مكة بصدمة ...
انا هبله ؟! وايه جريتي رجلي دي ؟ ( بصت لانس بشر ) انت مكنتش تعبان وكنتم بتشتغلوني عشان اجي يا انس ؟؟؟
انس كشر ...
ربنا يهدك يا صابرين عجبك كدة اهي صدقت ام هزارك الثقيل زيك يا ثقيلة ( بص ل مكة ) والله بتهزر انا فعلا بيت ليله كامله في المستشفي تحبي نعدي عليهم واحنا مسافرين عشان تتاكدي بنفسك؟
مكة ...
لا خلاص مصدقاك انا عارفه أن صابرين شريرة وبتحب تهدي النفوس ديما
صابرين ضحكت ...
حبيبة قلبي الله يخليكي دي شهادة اعتز بيها
ضحكو كلهم ف دخلت احلام اللي اول ما شافت ابتسامة مكة و انس حست أن روحها ردت ليها تاني
احلام بحب وفرحة ...
ربنا يديم الضحكة علي وشوشكم حبايبي يلا الغدا جاهز يا حلوين
مكة ....
معلش تعبتك معايا يا خالتو اومال فين تالا
احلام ...
انا مش هرد علي الكلمتين ال في الاول دول وبالنسبة تالا ف هي سبقتكم يا ستي وأتغدت من ايدين ستها ونايمة دلوقتي
انس ...
تسلم ايدك يا حبيبتي احنا أن شاء الله بعد الغدا هنتحرك علي طول قبل ما الوقت يتأخر علينا
احلام ...
طب كنت خليكم انهاردة يا حبيبي هتسوق ازاي وانت تعبان كدة ؟
مكة ردت ببتسامة ...
وانا روحت فين يا خالتو هسوق انا طبعا
احلام حست أنهم متفقين محبتش تضايقهم هي بس كانت قلقانة علي انس لكن. الفرحة اللي شيفاها في عينيه دي ضيعت اي احساس بالقلق عندها
احلام ...
وماله يا حبايبي زي ما تحبو يلا بقا الغدا زمانة برد ( بتبص حواليها ملقتش صابرين ) ايه دا فين البت صابرين مش كانت لسه هنا
صابرين من برة ...
بتاكل صابرين جعانة وانتم بترغو جت هي تاكل
ضحكو كلهم عليها وقامو يتغدوا في جو جميل لاول مرة انس يحس بالراحة دي من وقت اللي حصل وقرر أنه يحافظ علي الفرصه دي المرادي بكل قوتة
❈-❈-❈
محسن لما نزل شقتة كان حاسس ان لي في حاجة غلط لو زهرة ناويه تغير الاتفاق مقالتش ليه ؟ هو ماجبرهاش علي اي حاجة طب ولو بعد ما بقت لوحدها في الطريق جة في بالها حاجة معينه متصلتش بيه ليه تعرفه ؟ كان قلقان ومحسن لما بيقلق يعني في حاجة وحشه حصلت قرر يتصرف ويحط اي عقاب أو خلاف دلوقتي علي جمب طلع تلفونة وطلب رقم عمار وانتظر الرد
عمار بضيق ...
أيوة يا عمي
محسن بحزم ...
تعالي لي حالا عشان نسافر اسكندريه دلوقتي
عمار ...
عمي انا مش حمل خطط وحوارات الله يخليك انا
قاطعة محسن ...
مراتك في حاجة يا عمار انا مبحورش عليك انا فعلا مش هنكر اني ساعدتها تسافر اسكندريه لأن دي كانت رغبتها لكن كلام خالتها وتلفونها اللي اتقفل دي حاجات مش طبيعيه نهائي ف تعالي بسرعه خلينا نلحق نفهم حصل ايه انا مش مرتاح لكلام خالتها دا نهائي
عمار بشك ...
ولا انا يا عمي انا عملت تتبع للتلفون بتاعها واخر مرة كان مفتوح كان في عنوان خالتها اللي اتصلت خدتة من ماما وبعدها اتقفل طب هيكون حصل ايه ؟ يمكن مش عايزة تتكلم وحبت تكون مع نفسها شوية بس هي كويسه صح ؟
محسن بضيق ...
لا يا عمار انا قلبي مش مطمن ابدا تعالي يا ابني خلينا نسافر نطمن بنفسنا عليها انا مستنيك
عمار بتوتر...
حاضر يا عمي حاضر تلت ساعه واكون عندك
محسن بلغ ايمان وابتسام أنه هيسافر مع عمار اسكندريه وطلب منهم ميعرفوش عدي دلوقتي اي حاجة لحد ما هما يوصلو و يتصلو بيهم وفعلا خلال وقت بسيط اوي كان محسن وعمار في طريقهم ل اسكندريه
❈-❈-❈
عدي كان في شركتة مندمج اوي في شغله وقطع تركيزة دخول السكرتير بتاعه
محمد ... اسف يا عدي بيه في واحد برة مش واخد معاد سابق ومصر يقابل حضرتك وبيقول موضوع شخصي
عدي باستغراب ...
موضوع شخصي !! اسمة ايه يا محمد
محمد ..
اسمة وليد سيف الدين
عدي سمع الاسم وملامح وشه كلها اتقلبت
عدي ...
خليه يدخل يا محمد ومش عايز اي تلفونات طول ما هو هنا مفهوم
محمد ...
حاضر يا فندم مفهوم
محمد خرج و دخل وليد بكل ثقة وبرود المكتب وقف عدي وحط ايديه في جيبه وبصلة هو كمان ببرود متبادل
عدي ..
خير ؟
وليد بسخريه ...
في حد يقابل ضيف عندة لي في مكتبه بالطريقه دي ؟
عدي ...
وليد ياريت تنجز لاني ورايا شغل كتير مش فاضي جيالي لحد مكتبي ليه ؟
وليد بهدوء ...
ممممم جاي يا سيدي عشان تحددلي يوم كامل اقضيه مع هايدي وكريم
عدي بغضب ...
نعم يا اخويا !!! تقضيه مع مين ؟؟؟
وليد ببرود وهو بينطق الاسم ببطيء ...
مع ها يدي و كر يم ايه السمع عندك بعافيه ولا ايه ؟ اصل طلبت كدة من هايدي بحكم أن كريم مش بقعد يعني يوم كامل من غيرها وهي وافقت بس طلبت مني أخد الاذن منك الاول فقلت يا وليد بدل الاتصالات بقا اجي بنفسي واستاذن منك ها اختار اليوم وياريت يا بكرة يا بعدة بالكتير
عدي بغضب ...
انت مجنون ؟ وهايدي ايه ال كلمتها و وافقت كمان وانت باي حق تتصل بيها هه متصلتش ب عمي ليه وهو حددلك وقت مع كريم زي ما بيحصل كل مرة بتيجي ؟
وليد ...
وايه المشكلة لما اكلمها هي علي طول هاكلها يعني ولا ايه ؟ و بعدين ايه الغضب دا كله اهدي شوية بس قولي يا تري الغضب دا غيرة ولا قبة ثقه ؟
عدي في اللحظة دي مقدرش يسيطر علي نفسه وراح ناحيه وليد وضربه بالبوكس ف وشه وليد بعد خطوة وحط ايديه علي دقنة مسح دم ال نزل من بؤة و بص ل عدي وضحك
وليد وهو مبتسم ...
تمام يا عدي انا مش هردلك الضربة دي بس عشان خاطر هايدي عموما انا بلغتك وانت بقا بلغ ديدي المعاد وهي تعرفني هسيبك لانك مش فاضي ومشغول كان الله في العون سلام
وليد خرج و عدي خبط علي المكتب بكل قووووتة كان غضبان وحاسس أن في نار بتاكل فيه خد تلفونه ونزل جري علي بيتة عشان يفهم من هايدي ايه حصل بالظبط هو لازم يتأكد من كلام وليد قبل ما ياخد أي رد فعل الأمور بينه وبين هايدي مش هتستحمل اي غلطة منه دلوقتي
❈-❈-❈
اخيرا محسن وعمار وصلو اسكندرية عند خالة زهرة طلعو وخبط عمار وفتحت شابه في العشرينات تقريبا
عمار ...
السلام عليكم
البنت ...
وعليكم السلام مين حضراتكم ؟
عمار ...
مش دا بيت الحجة ام رامي ؟
البنت ...
أيوة انتم مين ؟
صوت من جوة ...
مين يا راويه اللي علي الباب ؟
راويه ...
معرفش يا ماما بس بيسالو عليكي
جت ام رامي واول ما شافتهم عرفتهم ..
مين .. اهلا اهلا اتفضلو اتفضلو ايه النور دا اوعي يا بت كدة دا حضرة الظابط جوز زهرة بنت خالتك و الاستاذ محسن عمه اتفضلو تعالو
دخل محسن من غير ولا كلمة وعمار رد السلام ل ام رامي وقعدو كلهم في الصاله
ام رامي ( خديجة ) ...
اهلا وسهلا تشربوا ايه ؟ سخن ولا ساقع ؟
عمار ...
اهلا بحضرتك واعفينا مش هنقدر نشرب اي حاجة احنا بس عايزين نطمن علي زهرة هي فين
عمار اول ما نطق اسم زهرة لاحظ الارتباك علي وش راويه لكن خديجة كانت عاديه جدا
خديجة ...
والله يا بني انا ما عارفه اقولك ايه بس
عمار ..
الحقيقه واللي حصل فعلا يا ام رامي
خديجة كشرت ...
ايه الحقيقه دي هو انا كنت كدبت ولا ايه زهرة جت وقعدت وحكتلي أنها علي خلاف معاك وأنها متفقه مع عمك أنها تيجي هنا رحبت بيها وقلتلها لو مشالتكيش الأرض اشيلك انا فوق. راسي ويادوب قمت احضر الغدا واتغدينا لاقتيها ماسكة شنطة هدومها تاني سالتها في ايه قالتلي انها فكرت تاني ومش عايزة تعمل مشاكل بينك وبين عمك لما انت تعرف أنه بيساعدها وأنه هتروح تقعد ف اوتيل يومين تلاته لحد ما أمورها تستقر ولما رفضت فضلت تعيط جامد وتترجاني أنها محتاجة تكون لوحدها وافقت بشرط اعرف هي فين وخليت راويه و رامي نزلو معاها و وصلوها بنفسهم للاوتيل ورجعو وطمنوني عليها
عمار بص ل راوية ...
فين الاوتيل دا ؟ اسمه ايه وعنوانه ايه ؟
راويه بارتباك ...
ا ا انا مش حافظة اسمة والدنيا يعني ك كانت ليل محفظتش الطريق ر رامي اللي عارف كل حاجة
محسن بخوف ...
زهرة فين انطقي ؟؟ انا قلبي مقبوض وقلقان عليها فين هي ؟ من غير كدب ولا حوارات
عمار بهدوء وهو باصصلها بتركيز ...
اخوكي وداها فين يا راويه متخافيش اتكلمي خليني بس اطمن عليها مش عايز اكتر من كدة
راويه فضلت ساكتة شوية وهي بصلهم بحيرة و خديجة مش فاهمه ايه اللي بيحصل حواليها وليه القلق والتوتر دا كله واخيرا راويه نطقت
راويه ...
انا هقولك
قاطعها دخول رامي من الباب شاب في الثلاثين ملامحة جامدة
رامي ...
تقولي ايه ؟ ومين دول اصلا ؟ في ايه ؟
عمار وقف في وشه ..
زهرة مراتي فين ؟
رامي بقوة ...
معرفش روح دور عليها في حتة تانيه ملناش دعوة بيها
خديجة بضيق ...
عيب كدة يا رامي حضرة الظابط من حقة يطمن علي مراتة قوله العنوان اللي هي فيه أو روح يلا وصلهم بنفسك
رامي بهدوء. ..
انا قلت اللي عندي يا امي انا معرفش مراتة فين لما نزلنا وقفت تاكسي وطلبت تبقي لوحدها وانا سبتها براحتها اكتر من كدة معنديش
محسن ...
انت كداب ( بص ل راويه ) قولي انتي يا بنتي زهرة فين ؟ الله يخليكي اعتبريها اختك دي لسه خارجة من مستشفى وعمليه
رامي كان باصص ل راويه بتحذير وغضب
عمار ...
لو مبطلتش تبصلها كدة هعدلك انا وانتي اتكلمي متخافيش انا اقدر احميكي ومحدش هيقرب منك بس اعرف مراتي فين ؟
راويه بارتباك ...
ا اصل زهرة يعني
يتبع...
